فاكر اول مرة تسوق عربية؟؟؟

[ذهبية]

السلام عليكم و رحمة الله

بما انى اليومين دول عقبال عندكم جوزى العزيز بيعلمنى دروس فى السواقة و انا مطلعة عينة و مرة اسوق حلو و مرة ارجع تانى من اول السطر

ياترى انا بس اللى كدة و لا انتم لما اتعلمتوا السواقة اول مرة كنتوا زى

ياترى فاكرين اول مرة اتعلمتوا فيها السواقة كانت امتى و عندكم كام سنة ؟؟؟

قعدت مدة قد اية حسيت ساعتها انك بريمو فى السواقة ومعتش محتاج حد جنبك و انت سايق ؟؟؟

و ياترى مين اللى علمكم ؟؟؟

و امتى كان ليك عربية خاصة بيك اول مرة ؟؟؟و نوعها كان اية ؟؟ و كنت مسميها اية ؟؟

و ياترى انت راضى عن نوع عربيتك الان و لا عايز تغير؟؟؟و ياترى الواحد بيزهق من عربيتة بعد قداية سواقة و بيحب يغير ؟؟

لو سالتك قيم نفسك فى السواقة تقول على نفسك اية ؟؟

؟متسرع حريص متهور من محبى الجنون فى السرعة مش بتحب حد يسبقك و لا يكسر عليك اعصابك هاديةةةة بتخاف على عربيتك موووووت علشان كدة بتسوق براحة وبطىء

ياريت تدخلنا الى عالمك انت و عربيتك اللى باعتبرها فرد من الاسرة ولها ميزانيتها الخاصة و طلباتها التى يجب ان تحترم علشان تكمل و تعيش معاك على الحلوة و المرة

[doha]

اول عربية سقتها كانت هي برضه آخر عربيه وهي سيارة والدي .. لانوس فضي

الي بدأ كان اختي الصغيره قعدت تسوقها فترة ثم انا واخيرا بعد كام سنه انضم اخويه الصغير للقافله ..

كان عندي وقتها يمكن 24 او 25 ..

اول مرة تعلمت فيها السواقة كانت على يد مدرب سواقة قعدت معاه اظن ست حصص .. والدي برضه علمني حصة واحده وكانت كافيه بصراحة استفدت منها جدا ..

رحت بعدها مدرسة السواقة اخذت كام حصة صوريه كده عشان استخرج الرخصة وطلعتها بس فضلت بعدها خايفه اني اركب السيارة او اسوقها لوحدي لغايه ماجاء يوم ..

كنت قاعده في الشغل وزمايلي تحدوني اني اسوق السيارة لغايه العمل وانا قبلت التحدي ..

كان في بالي اني هخلي اختي الصغيره تسوق لغايه بدايه الشارع الي فيه الشغل بعدين اركب انا اسوقها الاثنين متر الباقيين دول في الحته الفاضيه الي قدام الشغل وبكده اكسب الرهان ..

اختي رفضت نهائيا تركب جنبي وانا بسوق وقالت ان الركوب جنبي رعب لا تتحمله ..

اعمل ايه وكان في تحدي ..

سلمت امري لله وقلت كلمتي لاممكن تنزل الارض ابدا.. رحت اسوق بنفسي وانا قاعده لوحدي في السيارة وكانت لحظات لا انساها ابدا..

اكثر مالفت نظري ان التابلوه كان كبييييييييييييير .. والبنزين بس تدوسي عليه تلاقي العربية بتجري وتحسي نفسك هتنزلي في الدواسه من الرعب .. معرفش ليه شعور السواقه وانتي لوحدك مختلف تمام الاختلاف عن الشعور وانتي مع المدرب او حد ( ادلت ) راكب جنبك يشيل الليلة لو حصل حاجه ..

حظي كان حلو اوي في ذلك اليوم كانت مباراة مصيرية بين المنتخب وحاجه او بين الاهلي والزمالك مش فاكره .. المهم الشوارع كانت فاضيه بشكل غير مسبوق .. ده جمد قلبي شويه .. فضلت ماشيه ماشيه والرعب ماليني لغايه مابدأ قلبي يجمد شويه بشويه واخيرا وصلت الشغل بالعربيه عادي لوحدي من البيت لهناك بدون اي مشاكل والحمد لله ودي كانت البدايه ..

وبرضه فاكره ملاحظة غريبة جدا اني في ذلك اليوم كنت شايفه برواز الشباك داخل معايا في المشهد يعني شايفه نص الشارع من الزجاج الامامي والنص التاني من الشباك معرفش ليه .. الحكايه دي اختفت تماما بعد كده لما بقيت محترفة سواقه ..

بعد اليوم ده قلبي جمد جدا اني اطلع بالعربية لوحدي فبقيت اروح بيها مشاوير قصيره وكان في حاجه ساعدتني اوي على اني اتقن السواقه .. السيارة كانت موديل السنه يعني لو حصل فيها خدش هنتعلق من رجلنا او شعرنا الي هيبقى موجود وقتها هنتعلق منه .. وده كان مخليني حريصه جدا اني اسوق بكل اعتدال وهدوء واراعي كل قوانين السواقه لاني زي ماقلت لك خايفه تتخربش بس مجرد خربشه هتبان فيها .. طبعا دلوقت اخويه بيلطش فيها يمين وشمال ويقلبها على الجنبين مهي بقت عشرة عمر بقى ومننا وفينا وشافت كتير ..

الموقف التاني بقى الي كان بدايتي الحقيقة مع السواقه هو مرة سافرت بيها مع والدي على الطريق الزراعي لمده ثلاث ساعات رايح ثلاث ساعات جاي وكان هو راكب جنبي وبيوجهني للطريقة الصحيحه للقياده اهدي امتى وادي اشارات امتى وو وو .. بصراحه ذلك اليوم كان ميلاد حقيقي لي في السواقه لاني من بعده خلاص عرفت اني بعرف اسوق فراح مني الخوف نهائيا والاهم ان ايدي خدت على السواقه تمام .. طبعا وجوده جنبي كمحترف ربنا يديله الصحه ساعدني كتير جدا لان في ملاحظات المدرب مش بيقول لك عليها ومش هتعرفيها الا لو تعرضتي لها فعلا وبرضه القياده على الطرق السريعه بتدي تدريب كويس اوي للسائق ..

حاليا وبرضه مع ان السيارة بقت ( شرك ) وحلال فيها الخربشة والتخبيط الا اني ولله الحمد ملتزمه جدا في قيادتي وبتبع كل قواعد المرور وللامانة حتى لو كنا بليل خالص الساعة 1 مثلا وواقفين في اشاره ومفيش عسكري مرور ولا في سيارات من الجانبين بتمر وكل العربيات حوالي عماله تكسر الاشارة لايمكن اكسرها ودائما بقول اني هفقد احترامي لنفسي لو كسرت اشاره عشان معلييش رقيب وان دي نقطه البدايه لو كل مصري التزم بانه يقف في اشارته حتى لو العسكري مش موجود مصر هتبقى حاجه تانيه .. اختي الصغيره لما بتكون موجوده في موقف زي ده مبتتفقش معايا نهائيا في وجهة نظري هي وبعض سائقي السيارات او التاكسيات بالذات الي بشوفهم بيبصوا لي بصه غريبة لما بقف في اشارة من النوع ده قبل مايضحكوا ويكملوا طريقهم ولا كأن الاشارة حمرا ..

تفتكري انا غلطانه ولا معايا حق ؟

تم تعديل 11 يونيو 2009 بواسطة doha

[بندق أفندى]

اول مرة سقت كان عندى 15 سنة .. بدون ما حد يقعد جنبى ولا يعلمنى أى حاجة خالص .. انا كنت بألاحظ .. والظهر فى عز الحر وكله مقيل أقوم نازل سارق العربية ومتحرك بيها فى الدنيا الواسعة (مفيش شوارع ولا زحمة) فى يوم لازم حد يسوق ومفيش غيرى قلت انا أسوق .. والدى قاللى امشى بلاش لعب عيال .. قت خاطف المفتاح مشغل العربية وجايبها لحد عنده .. قعد كده أخبط أخبط لوحدى .. وعملت حادث صغير ومرة حادث معقول يعنى هههههههه

أول عربية ملكى شخصيا كانت بيجو 504 موديل 79 دفعت فيها 500 جنيه بس والباقى كان خلوص حق .. وأول والدى ما شافها راسه وألف سيف الا تتباع .. عشان كنت صغنون .. واتباعت ..

فيييييين روح يا زمان وتعالى يا زمان .. اشتريت فى سنة 1992 هوندا أكورد بيضاء موديل 91 كانت تحفة .. فضلت معايا لحد سنة 2003 .. فى سنة 2000 اشتريت سيارة من ماركة مشهورة جدا (القمة يعنى) موديل 1998 وعشان هى فخمة وحمالة أسية لسة معايا .. فضلت مخليها للبيت وللخروجات ونزلت بها مصر مرتين .. لحد ما رئيسى فى الشغل اكتشف انها عندى وشه أسود أوى لأنه بيكره الخير حتى لنفسه بجد مش بأهرج .. وكانت صعبة عليه انه يكون عندى سيارة أحسن منه .. قلت ما بدهاش أروح بها الشغل وخلاص .. فى سنة 2003 واحد صاحبى قعد يلح على ياخد الهوندا قلتله خدها .. واديتهاله هدية .. قعد يقول برضه أكيد فيها مصيبة كبير (يعنى هتنفجر فيه مثلا؟) ولسة ماشية معاه زى الفل وكل فترة يكلمنى يقولى مش عاوز فلوسها؟ أقول ايجار كل يوم 10 ريال هطلع ليا معاك مبلغ محترم ههههههه

[محمد عبدالعزيز]

اول مرة سقت كان عندى 15 سنة .. بدون ما حد يقعد جنبى ولا يعلمنى أى حاجة خالص .. انا كنت بألاحظ .. والظهر فى عز الحر وكله مقيل أقوم نازل سارق العربية ومتحرك بيها فى الدنيا الواسعة (مفيش شوارع ولا زحمة) فى يوم لازم حد يسوق ومفيش غيرى قلت انا أسوق .. والدى قاللى امشى بلاش لعب عيال .. قت خاطف المفتاح مشغل العربية وجايبها لحد عنده .. قعد كده أخبط أخبط لوحدى .. وعملت حادث صغير ومرة حادث معقول يعنى هههههههه

أول عربية ملكى شخصيا كانت بيجو 504 موديل 79 دفعت فيها 500 جنيه بس والباقى كان خلوص حق .. وأول والدى ما شافها راسه وألف سيف الا تتباع .. عشان كنت صغنون .. واتباعت ..

فيييييين روح يا زمان وتعالى يا زمان .. اشتريت فى سنة 1992 هوندا أكورد بيضاء موديل 91 كانت تحفة .. فضلت معايا لحد سنة 2003 .. فى سنة 2000 اشتريت سيارة من ماركة مشهورة جدا (القمة يعنى) موديل 1998 وعشان هى فخمة وحمالة أسية لسة معايا .. فضلت مخليها للبيت وللخروجات ونزلت بها مصر مرتين .. لحد ما رئيسى فى الشغل اكتشف انها عندى وشه أسود أوى لأنه بيكره الخير حتى لنفسه بجد مش بأهرج .. وكانت صعبة عليه انه يكون عندى سيارة أحسن منه .. قلت ما بدهاش أروح بها الشغل وخلاص .. فى سنة 2003 واحد صاحبى قعد يلح على ياخد الهوندا قلتله خدها .. واديتهاله هدية .. قعد يقول برضه أكيد فيها مصيبة كبير (يعنى هتنفجر فيه مثلا؟) ولسة ماشية معاه زى الفل وكل فترة يكلمنى يقولى مش عاوز فلوسها؟ أقول ايجار كل يوم 10 ريال هطلع ليا معاك مبلغ محترم ههههههه

نفسى أصاحبك يا حاج بندق عشان تهادينى بعربية

أنا بقى اتعلمت من حوالى 5 أو 6 سنين كده, كنت بشتغل فى السعودية وكان فى واحد باكستانى بيوصلنى الشغل ويرجعنى السكن تانى فعرضت عليه يعلمنى السواقة بالعربية بتاعته مقابل مبلغ مالى.

المهم اتفقنا وكانت أول مرة فى حياتى أسوق عربية, والحمد لله من أول مرة طلعت بيها ومشيت عادى بس طبعاً كان فى مكان فاضى زى ملعب كورة كده.

أفتكر إن كان فى عقدة واحدة بس مع الراجل الباكستانى ده, وهى إنى كنت بتفاهم مع بصعوبة عشان كنت لسه جديد فى السعودية وفى مصطلحات كانت بتيجى معايا بالعكس, زى مثلاً هو كان بيبقى عاوزنى أشيل رجلى من على الدبرياج, فيقولى خلى كلاتش, وأنا متعود إن كلمة خلى زى خليك قاعد معانا مثلاً فبفضل سايب رجلى على الدبرياج, وواحدة واحدة فهمت إن كلمة خلى عندهم عكس عندنا وبقيت أشيل رجلى من على الدبرياج.

الموضوع ده استمر أسبوع واحد فقط كل يوم نصف ساعة تقريباً, ووقفت على كده.

فى رمضان اللى فات بقى كبرت فى دماغى أشترى عربية عشان أرحم نفسى وأسرتى من بهدلة المواصلات وحبيت أرجع أفتكر تانى, وفى يوم حمايا كان عندنا وعنده عربية قلت له عاوز أتعلم السواقة وأجرب نفسى كده والحمد لله المنطقة عندنا فاضية, قال ماشى ونزلت وسقتها علطول الحمد لله, حتى بعدها قال إنت مش محتاج تروح مدرسة ولا غيره إنت تجيب العربية مادام نويت وتتعود عليها واحدة واحدة مع نفسك والمنطقة هنا فاضية وتسمح بكده.

اقتنعت بوجهة نظره ودورت فعلاً على عربية واشترتها, وهى اللى معايا طبعاً لغاية دلوقتى, لادا 2107 موديل 90, قلت أشترى حاجة مستعملة عشان أخبط براحتى وبالمرة تصليحها وقطع غيارها تعتبر ببلاش بالنسبة للحديث.

وطبعاً بما إنى كنت لسه ماطلعتش رخصة ومش 100 100 فى السواقة خفت أرجع بالعربية وطلبت من صاحب العربية يوصلها لى لحد البيت, وفعلاً الراجل طلع كريم ووصلنى لحد البيت لأن المسافة كانت طويلة شوية وماينفعش أمشى بيها لوحدى المسافة دى كلها وأنا مش معايا رخصة.

كنت طاير من الفرحة بالعربية الصراحة وحسيت إن كل مشاكلى اتحلت :lol: بقى عندى عربية خلاص بقى مين قدى.

أنا فاكر كويس جبتها يوم 25 رمضان اللى فات, وقبل المغرب بساعة كده فردت صدرى و قلت للمدام تعالوا أفسحكم بالعربية شوية قبل الفطار, ونزلنا فعلاً ومشيت بالعربية شوية ولكن اتزنقت فى مكان كده ومحتاج أرجع لورا, أجيب الفتيس على وضع المارشدير ألاقينى بطلع لقدام, أحاول تانى مفيش فايدة, طبعاً عرقت واتلخطبت وكانت حالتى صعبة جداً.

المهم استعنت بصديق, والحمد لله عرف حل مشكلتى بسرعة وهى إن العربية عندى المارشدير لازم تدوس على الفتيس الأول لتحت وبعدين تجيب مارشدير, وإن اللى كان بيحصل معايا إنى كنت بجيب الرابع عشان كده العربية كانت بتمشى لقدام.

المهم الموضوع عدى على خير والحمد لله, وبقيت كل يوم أمشى بيها شوية كده عشان أعلم نفسى وأتعود عليها فى السواقة, وكام يوم كده طلعت الرخصة وبقيت أمشى بيها مشاوير صغيرة, وطبعاً فى البداية خبطت واتخطبت كذا مرة بس الحمد لله كلها حاجات بسيطة مش حوادث كبيرة ولا حاجة بس العربية بقت محتاجة شوية سمكرة ودوكو بقى عشان ترجع عروسة زى ماكانت.

الحمد لله أقدر أقول على نفسى دلوقتى بعرف أسوق كويس, بس مش محترف يعنى, سافرت بالعربية بره اسكندرية 4 مرات وطبعاً المشاوير العادية بقى من زيارات لتسوق لفسح الواحد كل يوم بيتعلم جديد فى السواقة وبيكتسب خبرات أكتر, بس أقدر أقول على نفسى إنى سواقتى هادية مش بحب السرعة وبحب ألتزم بقواعد المرور, بس بصراحة فى حاجات صغيرة كده ساعات بفوتها و واحدة واحدة بعود نفسى ألتزم بيها, وبخاف على نفسى وعلى اللى راكبين معايا وعلى عربيتى جداً وكذلك على الناس وعربياتهم عشان كده بمشى بهدوء.

اصعب حاجة واللى بتضايقنى جداً فى السواقة هى الركنة وخصوصاً لو فى مكان زحمة ومش لاقى مكان تركن أو المكان ضيق.

اتعلمت إن لما يكون فى حد بيحاول يكسر على أو عاوز يسابقنى أسيب له الطريق يعدى براحته وبمسك نفسى أكون هادى جداً عشان مايحصلش حاجة وحشة لا قدر الله.

المهم إنى أوصل بالسلامة أنا واللى معايا وخلاص.

وهى دى حكايتى مع العربية, وأتمنى فى يوم من الأيام أغير لعربية أحدث وأريح فى الركوب والسواقة بس لما شوارع مصر تتصلح الأول عشان قلبى بيتقطع على العربية مع كل مطب أو حفرة من اللى بنشوفهم عندنا فى مصر.

[MoTo]

أول عربية سقتها كانت هيونداي أكسنت في مركز تعليم سيارات و كان عمري 19 سنة

و طبعاَ كنت منبهر بنفسي أوي و انا أول مرة بحرك العربية .. و بصراحة في الأول كنت بسوق بتهور و كنت بسوق سيارة والدي رينو كليو

لحد ما حد عزيز عليا جداَ توفي في حادث سيارة بسبب السرعة .. مكنش هو اللي سايق بس كان راكب قدام

من ساعتها و انا من أشد المحافظين علي أداب المرور و الإشارات و مبتخطاش 60 داخل المدينة و 100 عالطرق السريعة

مش خوف علي نفسي بس لقيت الموضوع مش مستاهل السرعة .. و إن و انا عالطريق مسئول عن حياة ناس كتير

سواء اللي راكبين معايا أو المستخدمين الأخرين للطريق .

عربيتي الحالية دايهاتسو سيريون بحبها جداَ و خاربة بيتي .. مش تصليحات بس انا بحب أوي منتجات العناية بالسيارات

و بشتري معطرات كتير أوي .. و تلاقيني كل ما أقف في أون ذا ران ولا رحت كارفور أطلع بشوية حاجات في إيدي

و مبطيقش شوية تراب عالتابلوه ولا في الأرضية و علي طول إيدي فيها

لدرجة صحابي بيقولولي إحنا بنحس بالقذارة اما نركب عربياتنا بعد ما نكون راكبين معاك هههه .

لأن إنتوا عارفين الشباب دايماَ تلاقي نقر سجاير في الفرش و ورق مرمي و تراب في الأرضية و التابلوه مش باينله ملامح .

[rewsha]

انا بقه اول مره اتعلمت فيها السواقه كانت مع والدي ربنا يخليه .

ضحى وخلاني اسوق عربيته ال 132 بيضاء وكنت في تانيه ثانوي واول ما سوقت طبعا زي اي حد بيتعلم العربيه بطلت مني .المهم طلعت بيها وبعد كده وانا ماشيه في الشارع كان في ناس قاعده على الرصيف فبابا قال لي اضربي فرامل.

قمت انا بقه عامله ايه؟؟؟؟؟؟؟؟؟؟

دوست بنزين

واخدت شتيمه.من الناس طبعا ومن بابا ههههههه

وقال لي ما عرفكيش مع نفسك بقه

المهم كل ماكنت اتحايل عليه وانزل اسوق العربيه وهوه جنبي.اطلع معيطه وهوه متنرفز

لكن بصراحه اللي علمني السواقه بجد .هوه ابن اختي.بصراحه كان ميه ميه .انا بقه خالته ومايقدرش يقول بم وانا راكبه معاه

وبعد كده كان عندنا عربيه ريتمو وانا في اولى كليه وبابا قال لي خلاص اجيب لك سياره سيات تروحي بيها الكليه وكنا طالعين مصيف

فقلت له انا هاسوق الريتمو علشان متعوده عليها وانت سوق السيات (لاننا كنا لسه شارينها في نفس اليوم اللي مسافرين فيه)

كنت انا سايقه الريتمو وبابا سايق السيات واخويا ورانا طالع بالسوبارو بتاعته .وانا كنت في النص بين بابا واخويا

المهم مشيت اول تلت ساعه حلو .وبعدين.................. عملت لهم مفاجاْه

كنت قال ايه عايزه اعدي بابا لانه هوه اللي قدامي .جيت اعديه والطريق ضلمه روحت لابسه في عربيه نص نقل صغير(تويوتا)

والحمد لله الريتمو اتشيعت

بس الحمد لله انا طلعت سليمه.وقلت له خلاص مش هاسوق تاني.ورجعنا من نص الطريق وتاني يوم دفعنا الشرط الجزائي ورجعنا السيات

وبعدين روحي يا ايام وتعالي يا ايام وعملت لي بتاع حادثتين كده كمان .لاني بقيت تخصص حوادث

لكن دلوقتي الحمد لله باسوق كويس ومعايه عربيه 128 موديل 97 بتاعتي

[ايهاب سالم]

لحد ما حد عزيز عليا جداَ توفي في حادث سيارة بسبب السرعة ..

قصدك عزيزه عليا يا موتو

انا بقى والدي كان راجل عملي

طلعلي الرخصه الاول و بعدين علمني السواقه على عربيته

متعتبوش ... لقطتها بسرعه عشان كنت صغير

[عنبو]

بجد اول مره اشوف واحد يدى واحد هديه عربيه تحياتى ياحاج بندق ورننا يوعدنى بواحد يدنى هديه عربيه

انا بقى تقريبا اتعلمت السواقه على فترات يعنى فى 2000 كان واحد صاحبى جاب عربيه وانا طبعا كنت باخدها منه لفه فى اى منطقه واسعه والراجل بجد مكنش بيقصر بس طبعا كانت بتبطل منى كتير فى الاول بعد كده صاحبى ده باع العربيه وسافر وطبعا اقعدت يمكن لحد 2006 مسوقتش وانا فى 2006 / 2007 كان معايا واحد صاحبى فى الدبلومه وهو طبعا مكنش بيحضر بسبب ظروف شغله وانا طبعا كنت بحضر علشان ظروف شعلى تسمح وهو كان شغال فى دعاية الادويه وطبعا الشركه متدينله سياره وطبعا هو كان بيطلب منى اشرح له واديله ورق وكتب وطبعا ده كان فى مقابل انى اخد من العربيه لفه او اتنين فى الجامعه وطبعا برضه كانت بشوف اوسع مكان علشان الف فيه بس كانى راكب العربيات اللى بتبقى فى الملاهى

بعد كده جيت على السعوديه وطبعا او ل لما جيت الشركه طلبت منى رخصه قياده علشان استلم سياره .. طبعا انا مكنش معايا رخصه مصريه بس الحمد لله ربنا سهلها وعملت رخصه واستلمت السياره

طبعا انا عمرى فى حياتى ممشيت بسياره فى الشارع ولا بين عربيات ولا اشارات ولا حاجه بس طبعا عارف قواعد المرور

طبعا المفروض اروح استلم السياره من المعرض علشان الشركه عندنا يتتاجر سيارات مش بتشترى على العموم اخدت واحد زميلى فى الشغل بسيارته علشان اروح استلم السياره طبعا انا اخدت السياره ومشيت بين العربيات واول مره فى حياتى امشى بين العربيات وانتوا عارفين جده وطبعا الكلام ده كان تقريبا الساعه 1 الظهر وطبعا صاحبى ماشى اقدامى وانا وراه بالظبط يدخل يمين ادهخل يمين يقف اقف لحد لما تهت منه فى اشاره وطبعا انا مش حافظ الشوارع بس انا كنت مطمن طول ما انى ماشى ورى صاحبى ده لكن اول لما تهت حسيت زى العيل بتوه من امه وهم فى السوق وطبعا انا ماشى على طول ولا عارف انا ماشى شمال ولا جنوب ولا شرق ولا غرب ماشى وخلاص وفجأه لقيت نفسى فى جامعة الملك عبدالعزيز اقعدت يمكن نص ساعه عاوز اطلع معرفتش لحد لما وقفت تاكسى واقولته امشى واحده واحده ووصفتله مكان الشغل ووصلنى اول لما وصلت حسيت بفرحه غريبه بس بجد كان احساس صعب وانا معرفش اروح منين ولا اجى منين وكل شويه عربيه تطلع من جنبى وسرعه وانا خايف لاعمل حادثه والله العظيم كانت ساعه رعب لكن ربنا سترها لكن حاليا الواحد الحمد لله بيسوق بقلب جامد ومش بتحرك الى اى مشوار الا لما بكون عارف انا هروح ازاى وهرجع ازاى

بس بجد اول لما خلصت الشغل ورحت كنت فرحان فرحه علشان بقى عندى عربيه يعنى كل لما روح اصلى وارجع من الصلاه ادور العربيه واخد بيها لفه على السريع كده وربنا يسترها معانا

بالنسبه لنوع العربيه مش ثابته اصلها ايجار يعنى كل شهر لما الاقى عربيه احسن فى المكتب اخدها بس اللى معايا حاليا هيوندى اكسنت لونها فضى

[ذهبية]

لا طبعا يا ضحى مش غلطانة ابدا الناس هما اللى غلطنين انهم مش ملتزمين الالتزام مش قدام الناس فقط الالتزام صفة متاصلة فى الشخص و متربى عليها من الضغر و مش بتظهر يا ضحى ىف السواقة و لا اشارا المرور دى مجرد ظاهرة لالتزامك الداخلى و ضميرك الحى

احييك يا ضحى من كل قلبى على التزامك واحترامك لنفسك سواء قدام الناس او وراالناس سواء حد شايفك او مش شايفك و استمتعت بجد بحكايتك مع السواقة و عجبنى جراتك و انت بتنفذى الراهن من الاول بتعملى راهن و انتى مش متاكدة من نفسك بجد شجاعة تحسدى عليها يفتقدها الكثير

بندق افندى اية الهدايا الغالية دى اول مرة اشوف واحد بيهادىصاحبة بعربية يا بخت كل اصحابك بيك اوع المرة الجاية تهادى حد بشقة ولا برج و عمارة على الماشى تبقى بجد محصلتش

محمد عبد العزيز اةةة من مووضع المارشدير اللى مطلع عينى و مووضع الركنة اللى لسة لحد الان ما اتشرفت انى اعملة و بيتهايلى هاطول شوية لحد ما اوصل للمرحلة دى

احييك على طريقة سواقتك الهادية ويارب تغير عربيتك بالاحدث منها و اللى تتمناها ام مووضع تغير شوراع مصر اعتقد ان دة حلم لعيد المنال يا استاذ محمد

[ذهبية]

MOTO برافو عليك انك اتعملت بدون حوادث تذكر و بسرعة ام موضوع النظافة دة بقى انت فكرتنى بزوجى

حاجة فظيعة كل شوية يلمع و ينظف فى العربية و لو حد لمس اى حاجة مشكلة و ممنوع اكل اى نوع من انواع الطعام داخل العربية

و لا شيبسى او حلويات و لا اى شىء ممكن ممكن يكون فية شبهة ان يوقع فى العربية لو حصل بقى مشكلة كبيرة و على فكرة هو فى البيت كدة كمان دة بيكون طبع فى كل شىء هى حاجة كويسة طبعا بس ما تويد لدرجة الوسوسة بتكون ساعاتها متعبة

بس لو فكرت تبيع عربيتك ابقى قولى لان ساعتها هاكون مطمنة من انها عشرة على عشرة ومش هتحتاج اى مصاريف و هتكون فابريكة :wub:

فكرتينى يا روشة و بجوزى و هو طالع من جنبى من العربية و هو متنرفز و انا مضايقة و عايزة اعيط و باقولة مش هاسوق تانى وةاخر مرة هاسوق و لا حتى اقعد جنبك كل شوية تزعق و تحرق اعصابى

ماهى جت لة الفرصة بقى يعمل عليا استاذ و انا تلميذة و هات يا اوامر

الحمد الله انك خرجتى سليمة من الحادثة حمد الله على سلامتك ما الانسان مش بيتعلم بالساهل

ومبروك على عربيتك الخاصة و ادعيلى بقى انى اتجرا و اعملها زيك

ايهاب انت مذكرتش انت كنت ضغير عندك كام سنة يعنى ؟و ماعملت و لا حادثة بيها و الله برافو عليك

دة انا على كدة خيبانة خالص و مفيش منى امل :lol:

[ذهبية]

استاذ محمد العنبى انا عيشت معاك الموقف المرعب دة و تخيلت نفسى مكانك بجد موقف مرعب خاصة ان خبرتك فى السواقة فى البداية الحمد الله عدى على خير

احيى ذكائك فى مووضع التاكسى دة ان ربنا الهمك بهذا الحل و عدى على خير

و يارب ان شاء الله تجيب عربية بتاعتك و ساعتها هتكون خبرة فى السواقة مش هتحتاج حد يكون جنبك و انت بتسوق :happy:

[الرويناء]

السلام عليكم

اتعلمت سواقه مع مدرسه تعليم بس خدتها من قصيره واتعلمت على اتوماتيك طبعا الاتوماتيك سهل مش محتاج سوقت على طول واخترت اتوماتيك لانى كنت عارفه انى مسافره الامارات وفيه هنا رخصه اتوماتيك او مانيوال والعربيات هنا اغلبها اتوماتيك

بس انا اصلا بخاف من السواقه جدا حتى زمان كنت بخاف اقعد قدام بحس اننا هنخبط اكيد فى اى عربيه قدامنا

والحمد لله سقت بسهولها لدرجه انى مكنتش مصدقه انى انا اللى بسوق قولت هو الراجل اللى جنبى معاه فرامل وبنزين ولا ايه

وكان الاهم انى اتدرب على السواقه بسرعه كبيره شويه مع التحكم لان طبعا هنا الطرق مفتوحه والعربيات كلها سريعه مش زى الزحمه فى مصر وسوق على الدائرى وخلصت الحصص واجرت عربيه سقت بيها برضه علشان منساش بس برضه حد جنبى يعنى امان اول عربيه سقتها هيوانداى اكسنت بس موديل قديم اوى معرفش كام والفرامل متقلينها وبعدين خدت عربيه اخويا دايهاتسو شاريد بس كانت مشكلتى انى مش متعوده على الفراما العاديه واخده على فرامل عربيه التدريب ادوس شويه شويه لاقيت انى اجى ادوس فرامل بسيطه تقف علشان كده اجرت عربيه تانيه اتدرب عليها برضه كانت متسوبيشى لانسر 2008

وخلاص بقى ابتديت احضر اوراق المطلوبه للرخصه وسبحان الله كلها معقده معايا عايزه اغير البطاقه على عنوان بيتى علشان امتحان جنب البيت البطاقه اللى بتاخد اسبوعين خدت معايا شهر ونص ولا يقولوا لازم تجيبى جوزك يشهدا انكم لسه متجوزين وانك مقيمه معاه اقولهم مسافر يقولولى هاتى بطاقته المهم

طلعت البطاقه وعايزه ادخل الامتحان لانى مسافره بعد عشر ايام لاقيت جوزى بيقولى انا قلقان من موضوع انفلونزا الخنازير وانتى لوحدك مع العيال تعالى بسرعه ومش مهم اى حاجه قولت اروح علشان اطلع الرخصه بسرعه ادوخ انى اجيب عربيه اتوماتيك مافيش رحت للراجل اللى بيأجر عربيه عند الامتحان قالى قدمى الملف وهاتصرفلك ويندهوا اسمى علشان ادخل البروفه اشوف الراجل يقولى مافيش غير مانيوال وده سهل وادربك بسرعه وعندنا واسطه وافلام كده وانا هادورلك وانتى مش محتاجه تنقلى فى الامتحان

ودخلت الامتحان حرف اس وموقعتش ولا قمع وجايه اخرج من البوابه العربيه بطلت احاول معاها طبعا انا واخده على الاتوماتيك دوس بنزين تمشى معرفش ايه اللى حصل نطت منى تقريبا ورحت خبطه البوابه من الجنب على الحظ السعيد برضه ان الظابط مكانش موجود خالص وجيه يشوف خناقه وطبعا شافنى وانا بخبط البوابه وسقطنى طبعا

والحمد لله على كل حال دعواتكم بقى لانى هادخل المدرسه هنا وربنا يسهل وادخل الامتحان وانجح بقى المره ديه

تم تعديل 13 يونيو 2009 بواسطة الرويناء

[alsaher]

اول مره سقت عربيه كانت في تانيه عدادي كنت حوالي 14سنه

لكن كانت يعني لعب عيال ، في مكان فاضي جدا ووالدي جنبي

لكن كان معايا عربيه في تانية ثانوي ، وكانت تويوتا كريسيدا ، كنت باروح فيها المدرسه وأرجع

تعليمي للسواقه كان على مراحل وكان بهدوء ، يعني كل اسبوع كان والدي ياخدني مكان فاضي ويعلمني ، لغاية ما بدأ يدخلني الطرق العامه

بعدها بقيت اسوق وأنا جنبه ، لكن لوحدي ما يرضاش وبعدها خلاص أخدت تصريح مؤقت وأخدت عربيه

إستمرت العربية معايا سنة ونص بعدها غيرناها لكامري وبعدين سافرت الجامعه وأغلب الفترات من غير عربيه

أهلي رافضين الفكره بسبب حادثه حصلت معايا ،

والحمد لله تعودنا على قلة العربيات ، لكن لما بأنزل عند والدي بيبقى معايا عربيه دائما إما هوندا سيفيك أو كورولا 2007 ومعايا أكثر من رخصة لأكثر من بلد الحمد لله