كأس العالم للقارات

[elshafey]

موقع الصورة فيه واضحة جدا وإتفرجت علي البرازيل وأمريكا فيه وناقل من ART

http://www.livesporthd.com/

[mandoo]

صرح اليوم حسن شحاته بأنه قدم ( بفتح القاف وكسر الدال وفتح الميم ) الى جنوب أفريقيا للمنافسة على كأس البطولة ، أعجبنى جدا التصريح بس ياريت يكون ثقة فى المنتخب وليس بداية الغرور ، لكن شوقى غريب قبل البطولة صرح وقال إحنا رايحين جنوب أفريقيا للتمثيل المشرف، أموت وأعرف هما راسمين على إيه ؟ ولا ده تكتيك عسكرى مخابراتى سرى والواد البلطجى حيلطش الكاس ويجرى وبكده نكون حصلنا على كأس البطولة :rolleyes:

هو اللى يسرق كاس البطولة يطلتش إعدام ولا سجن بس ؟

[elshafey]

صرح اليوم حسن شحاته بأنه قدم ( بفتح القاف وكسر الدال وفتح الميم ) الى جنوب أفريقيا للمنافسة على كأس البطولة ، أعجبنى جدا التصريح بس ياريت يكون ثقة فى المنتخب وليس بداية الغرور ، لكن شوقى غريب قبل البطولة صرح وقال إحنا رايحين جنوب أفريقيا للتمثيل المشرف، أموت وأعرف هما راسمين على إيه ؟ ولا ده تكتيك عسكرى مخابراتى سرى والواد البلطجى حيلطش الكاس ويجرى وبكده نكون حصلنا على كأس البطولة :rolleyes:

هو اللى يسرق كاس البطولة يطلتش إعدام ولا سجن بس ؟

أعتقد أن هذا التصريح نوع من أنواع الحرب النفسية

لكي تخشانا إيطاليا ومن بعدها أمريكا

ويا رب ..... يارب .... يكرمنا ونوصل لنصف النهائي

قولوا آمين

[Alrefaey]

الحمد لله فزنا على بطل العالم ايطاليا 1-0 والحضرى بطل المبارة من وجهة نظرى

[Salwa]

مليون مبروك ....

وعقبال انتصار الأحد.

بس بصراحة يعنى....كان واضح جدااااا ان الحكم بيتلكك والود وده ..يرفد الحضرى !!!! ويسيب الشبكة فاضية مستنية اى حد من الطلاينة العمالقة يجيب جول التعادل...لكنهم فى الحقيقة تحولوا لأقزام فى منتهى الخشونة ومعاهم حكم يزود فى الوقت...كان نفسه يزود اربعين دقيقه يمكن يلحقوا يتعادلوا...

الحمد لله.....لسا الأغانى ممكنة....فيه امل.

[النجم الثاقب]

انخفاض حااااااااااااااااااااااد فى اسعار البيتزا و المكرونه الاسباجيتى يقابلها ارتفاع رهيب فى اسعار الفوووووووووووووول و الكشررررررررررررى

[سكر]

مفيش احسن من الكلام دة ممكن ينكتب فى حق الراجل دة

على فكرة النهاردة عيد ميلادة الثانى والستين

كل سنة وانت طيب

إبراهيم عيسى يكتب : المعلم

17/06/2009

إستثناء مصري صميم لكل قاعدة في مصر

يحمل عدة استثناءات مهمة وحقيقية عن الشخصية المصرية

عن حسن شحاتة أتحدث!!

أولا: لا تجد عند شحاتة هذا اللوع وتلك الملاوعة واللف والدوران والمراوغة والكلام بلسانين أو النفاق لكبير أو صغير، لذلك فإذا تأملت خصوم نجاحه ستجد معظمهم هم هؤلاء الملاوعون المنافقون الذين يلبسون ألف وجه ومائة قناع و«معاهم معاهم عليهم عليهم» وهم ناجحون أيضا وناجحون في ذلك أو لذلك!

ثانيا: يتمتع شحاتة بالنفس الطويل وروح الدأب والمثابرة، ولم يكن أبدا من قصار النفس أصحاب النجاح الطياري المفاجئ والمؤقت، ويغيب عنه هذا المنهج الذي يسود لاعبي الكرة، حيث يحاول كل لاعب استغلال شهرته وموهبته بأسرع وقت وبأقصر الطرق وأسهلها ولا يري إلا المال والفلوس ولا يحترم موهبته ولا أكل عيشه ولا يتقن ولا ينشغل بتطوير نفسه، بل بتهليب نفسه ويخلو من خصلة عمال وصنايعية مصر الغريبة المقيتة حيث أول ما يمتلئ جيبه بشوية فلوس يتوقف عن العمل ويتلاعن ويتمارض ويغيب عن العمل،

وهو كذلك لا يملك سمات وصفات رجال الأعمال أصحاب مدرسة «اضرب واجري»، صفقة وهووب في السما، ولا تري عند شحاتة هذا الإحساس بالاضطهاد والرغبة في الانتقام والعدوانية ضد الجميع كما تراها في الموظف المصري، ولا يبدو كارهاً للنجاح والتحقق وباحثا عن سوءات الناس كما يظهر لدي نخبة مصر، ولا يتسم بالتعالي ولا الترفع المصنوع كما يبدو عليه فريق المثقفين، ولا هو كذاب ومزور أشر كأن الكذب والتزوير في دمه كما رجال السياسة، ولا هو منفوش متعنطز علي الفاضي وشاعر بوهم الأهمية كما هو منهج أمناء الشرطة والضباط الذين إن امتلكوا سلطة تسلطوا علي الناس وأظهروا من صفاتهم شرارها!

ثالثا: حسن شحاتة ينشغل بعمله ويجتهد في جهده وليس مثل السائد من شعبنا الذي يبذل جهدا في الغش وكتابة البرشام للامتحانات، ولو استغل الجهد والوقت في المذاكرة بدلا من إرهاق البرشام لنجح وتفوق، المصريون ينشغلون جدا بعمل برشام لحياتهم أكثر من المذاكرة لها فهم يسألون: نرشو مين؟ قبل أن يسألوا: ما المفروض أن نعمله؟ وهم يبحثون عن مذكرات الـ«سين وجيم» ونماذج الامتحانات وليس عن المقرر والمنهج!!.. ومعظمنا يبحث عن واسطة قبل أن يفكر أصلا ماذا يريد أن يعمل؟ وكلنا ندور علي أفضل طريقة للتزويغ من الشغل وأسهل طريقة كي يوقع لنا زميلنا علي الدفتر ليداري غيابنا؟ وسياسيونا يزورون قبل أن يجربوا نتيجة الحرية؟ وينافقون قبل أن يتركوا فرصة لأنفسهم كي يقولوا الحقيقة؟

رابعا: حسن شحاتة يصدق ما يفعل ويفعل ما يصدق وليس مثل المنهج السائد في بلدنا أن كلها نحتاية وسبوبة وقلِّب رزقك واعمل الشويتين بتوعك واخلص، حسن شحاتة بيشتغل بينما الجميع بيشتغلنا، ولا عمرنا شفناه بيرمي نفسه علي المناصب والمكاتب ولا نفسه يبقي نائبا في البرلمان ورئيسا للاتحاد ومفكرا رياضيا ومذيعا ومعلقا وإعلاميا ومهندسا وسفيرا ومليارديرا وصاحب شركات وصاحب برامج وصاحب كرسي وصاحب مسئول،.. فحسن شحاتة صاحب صاحبه!

خامسا: حسن شحاتة يؤمن بالعمل الجماعي علي عكس مصر كلها فهي بلد يقوم علي عبادة الفرد وعبودية الفرد، لا نحب ولا نعرف العمل الجماعي، لا نجيده ولا نتقنه ولا نطيقه، ابحث عن العمل الجماعي في مصر ستجده الأصعب والأندر والأقصر عمرا علي الإطلاق، فمصر تعودت المشي في ركاب فرد والطاعة لفرد من أول رئيس الجمهورية حتي رئيس الوحدة المحلية لكفر البطيخ، لهذا فالشركاء في مصر ينفضون ومعظم الجمعيات العمومية للشركات وهم من الأوهام المطلقة، وأكثر من 90% من الشركات المصرية التجارية قطاع عائلي أي يملكها فرد وعياله، حتي إن «الإخوات» في مصر لا يكملون أبدا أي شراكة ويفضون أي شركة، لكن شحاتة يقود فريقا من المدربين ومن اللاعبين بعقلية مصرية استثنائية، عقلية العمل الجماعي الديمقراطي القائم علي احترام الاختلاف وتحمل الخلاف وهو الحمول الصبور!

سادسا: شحاتة متصوف تصوفا حقيقيا وليس هذا التصوف الزائف الذي يعتنقه أفاضل من الناس وأباطرة من الفاسدين وملايين من الطيبين، فالتصوف يعني التسليم لله لكنه لايعني التواكل والاستهبال علي القدر، يعمل ويجتهد ويبذل الطاقة ويخلص النية وعلي الله قصد السبيل، لهذا فإنهم يتهمون مخلصي النية، عاقدي العزم وأصحاب العزائم بأنهم ناس بركة، كم مرة سمعت العشرات من الأدعياء والأذكياء والأخيار والأشرار والناجحين والفشلة يقولون تهكما إن حسن شحاتة بركة وكأن البركة شيء سيئ وهي صفة عظيمة محفوفة بالروحانية والرضا والسموق ومع ذلك فهو رجل شغال وشغيل ومؤهل لما يفعل وأهل للنجاح فيما يفعل.

سابعا: كل المحيطين بحسن شحاتة يريدون أن يصبحوا- أو أصبحوا فعلا- أعضاء في مجلس الشعب، بينما حسن شحاتة يحب أن يظل هو الشعب، التسلق والتوسل والنفاق والفساد سبيكة أساسية في بناء قطاع واسع من المجتمع المصري وبات الوسط الرياضي تحديدا منشغلا بالنفاق واكتناز الأموال وحصد الحصانات أكثر من أي وسط آخر ويسعي معظم هؤلاء إلي استغلال واستخدام الشهرة والأضواء في الصعود المالي والاجتماعي والسياسي، يتاجرون من أجل ذلك بكل شيء، لكن حسن شحاتة نسيج خاص وحده مع قلة نادرة في هذا الوسط، لايريد جزاءً ولا شكورًا ولا يقترب ولا يتقرب، حتي وجوده إلي جانب أبناء الرئيس مبارك أو بالأحري وجود أبناء الرئيس مبارك إلي جانبه لا يعني إلا هذا المعني الإيجابي الطيب والمستقيم في الرجل الذي لا يمنع محبا ولا شغوفا بالمنتخب ولا مشجعا للفريق الوطني، والحقيقة- مهما كنا معارضين لسياسة الرئيس مبارك- أن محبة علاء مبارك للكرة المصرية وتشجيعه المخلص للمنتخب وللإسماعيلي لم يستغله أبدا يوما لصالح هوي ولا رغبة شخصية بل كان ولايزال مشجعا مثاليا- من وجهة نظري-، وكان ولايزال قربه من حسن شحاتة دعما لشحاتة في مواجهة ديناصورات النفاق وحماية للمنتخب ومديره الفني من تهجمات المداهنين ودهاقنة الكرة والسياسة ولا شأن ولا ذنب لعلاء مبارك بمتاجرة المنافقين باهتمامه المحب لمنتخب بلده، ولا شأن ولا ذنب لحسن شحاتة من غيرة تنهش البعض من تعامله الراقي والمستقيم مع ابن الرئيس دون مصلحة ولا حاجة من الطرفين للطرفين، الغريب والعجيب أن حسن شحاتة لأنه حسن شحاتة فهو الوحيد في مصر الذي يتلقي عشرات الاتهامات والضرب والهجوم والتهجم والنقد والتجريح والتهوين من شأنه والتهويل من أخطائه رغم قربه الحميم من أبناء الرئيس وكأن من يهاجمه يعرف أن هذا القرب لا يستفيد منه ولا يريد حسن شحاتة أن يستفيد منه ولا فرض علي نفسه حصارا أو وضع نفسه في حصن نتيجة هذا القرب والتواصل مع أبناء الرئيس!

كان حسن شحاتة نجم أيامي وحلم شبابي وبطل جيلنا.

كان البعض يحاول أن يسرق الأضواء والبعض الآخر يسرق الفرح لكن حسن شحاتة كان المعلم دائما، الجدع في مواقفه، المخلص في عطائه للكرة، المتفاني في حب ناديه، العاشق لجمهوره، منكر الذات بين زملائه، «معلم» فيه كل ملامح المعلم الجسدية من جسم قوي وبدن عفي يشبه التكوين الجسدي لفتوات نجيب محفوظ، ومن ثم فهو المصري ابن الحارة وابن الدائرة وابن الحتة الذي يغيث وينقذ ويحمي ويصون ويحكم بقوة علي قسوة المخالفين النافرين، وبشاربه الذي لم يتخل عنه أبدا كان المعلم بذكورة الشهم ورجولة ابن الحتة الذي يحرم معاكسة بنات المنطقة ويحلق للعيال الخنافس التي تتطاول علي حرمة المحرم، وهو المعلم بطريقة كلامه وأداء حنجرته الذي تشعر معه أنه يتفاوض مع معلمين علي قهوة أو يطلب يد البنت سعاد بنت المعلم هريدي للواد منعم ابن الحاج زين- الله يرحمه- وعشان كده هو في مقام والده وبيخطب له.

معلم ومصري جدا واستثنائي في مصريته هذا الرجل، فقد رافقه في جيله كثير من الأسماء البارزة الآن علي صعيد الرياضة لكنهم بنوا شهرتهم ومجدهم بعد الاعتزال علي الصورة المصنوعة والإعلام المدفوع حبًا أو أجرًا وعلي العلاقات العامة وعلي بزنس التجارة والشطارة إلا هذا الاستثنائي الذي مزق فانلته غضبًا وحماسًا بعد أن أحرز هدفًا أنقذ الزمالك من هزيمة، والذي عاد من اعتزاله كرة القدم كي يلعب مباراة إنقاذ للزمالك (الله يخرب بيت الزمالك دائما في حاجة إلي إنقاذ ) فأحرز هدفا معجزة في مرمي المصري لايزال يزورني في الحلم، والذي تحمل عدوانية جمهور مباراته مع الأهلي وهو يسبه في شرفه ويطعن في كرامته فرد عليهم بكبرياء المعلمين الذين يترفعون عن الدفاع عن أنفسهم في مواجهة صغار الصغائر، وهو الذي أحرز هدفا شريفا ليكسب الزمالك الدوري من فك الأهلي فألغي الحكم الهدف وأبقي حسن شحاتة في التاريخ، حسن شحاتة الذي يصعد بفرق الدرجة التانية لتكسب مليارات الأهلي والزمالك، وهو الذي ينقل منتخب مصر من حالة التفكك والتفكه به إلي مرمي البطولة ومرامي الشرف وتهتز عروضه وينهش النهاشون في موهبته وعبقريته ويتطاولون عليه، لكنهم لا يطولونها أبداً، فإنه يعود ليضرب بقوة من جديد، من حديد، من بعيد، من جنوب أفريقيا حيث يمنح الشعب المصري مجدا للذكريات وعزا لحكايات الأبناء للأحفاد وفخرا للأجيال وفرحا بالذات وحلما بالفوز علي الكبار، حسن شحاتة بصرف النظر عن مباراته المقبلة مع إيطاليا فقد جعل المصريين الذين يعشقون فريق البرازيل ويشجعونه بجنون عشقهم للأهلي والزمالك يفخرون أننا رغم واقعنا المصري نستطيع أن نواجه ونلاعب الحلم البرازيلي.

حسن شحاتة منحنا الكثير وهذا بعض من كثيره!

[ام بودى]

الف حمد وشكر ليك يارب واللة وعملوها الرجالة ورفعوا راس مصر بلدنا الف مبروك الفوز التاريخى لمصر على حامل اللقب المعروف بالبلطجة وقلة الذوق ولا ننسى مافعلوة فى كاس العالم مع زين الدين زيدان واحب اقول للعالم كلة اللى استهتر بالمصريين وسخر منهم واللى شجعهم وكان قلبة معاهم الرجولة ادب مش هز اكتاف وحسن شحاتة استحمل كتير وصبر صبر الجبال وعزم الرجال تحية كبيرة للمدرب الجميل واللعيبة الاخلاق والرجولة حمص..ابو تريكة .. ولا ننسى الجندى المجهول اللى اتظلم كتير عصام الحضرى نرفع لة القبعة لانقاذة 3 اهداف محققة ودولا مين ودولا مين دول الوحوش المصريين وانتظروا ان شاء اللة حنقطع امريكا [يمين][/يمين]

انخفاض حااااااااااااااااااااااد فى اسعار البيتزا و المكرونه الاسباجيتى يقابلها ارتفاع رهيب فى اسعار الفوووووووووووووول و الكشررررررررررررى

قصد حضرتك الحمصصصصصصص مش الفول والكشرى

[النجم الثاقب]

الف حمد وشكر ليك يارب واللة وعملوها الرجالة ورفعوا راس مصر بلدنا الف مبروك الفوز التاريخى لمصر على حامل اللقب المعروف بالبلطجة وقلة الذوق ولا ننسى مافعلوة فى كاس العالم مع زين الدين زيدان واحب اقول للعالم كلة اللى استهتر بالمصريين وسخر منهم واللى شجعهم وكان قلبة معاهم الرجولة ادب مش هز اكتاف وحسن شحاتة استحمل كتير وصبر صبر الجبال وعزم الرجال تحية كبيرة للمدرب الجميل واللعيبة الاخلاق والرجولة حمص..ابو تريكة .. ولا ننسى الجندى المجهول اللى اتظلم كتير عصام الحضرى نرفع لة القبعة لانقاذة 3 اهداف محققة ودولا مين ودولا مين دول الوحوش المصريين وانتظروا ان شاء اللة حنقطع امريكا [يمين][/يمين]

انخفاض حااااااااااااااااااااااد فى اسعار البيتزا و المكرونه الاسباجيتى يقابلها ارتفاع رهيب فى اسعار الفوووووووووووووول و الكشررررررررررررى

قصد حضرتك الحمصصصصصصص مش الفول والكشرى

عندك حق يا فندم .. فاتتنى دى

عايزين بقى سنيور سكوربيون يعرفنا ايه الاخبار فى ايطاليا ؟؟؟ :o

[شرف الدين]

مبررررررررررروووووووووووووووك لمصر

[mandoo]

الفراعنة يدكون برج بيزا ويحدثون زلزالا قويا بقوة 10 درجات بمقياس رختر

مبروووووووووووووووووووك لمصر ورجالة منتخب مصر ويارب تمم فرحتنا بالنصر على أمريكا ونتأهل للدور قبل النهائى :o h):

شكرا ليكم أسعدتونا وفرحتونا وليلة سعيدة

[د هشام ابراهيم]

مبروك لمصر و المصريين

أنا كنت حاطط ايدي علي قلبي أخر ربع ساعة تخوفا من مفاجأت الطلاينة ...... فريق رزل و لزج أصلا مش سهل يتغلب ....لحد دلوقتي مش مصدق ....مهما حصل في ماتش أمريكا اللعيبة و جهاز التدريب عملوا اللي عليهم و زيادة كمان ..... ربنا يتممها علينا و نعدي الدور الأول ....

[الترجمـان]

الف مبروووووك ويارب كتر أفرحنا يا رب h):

بجد أتمنى أن يستثمر هذا الفوز بشكل إيجابي ويرتفع سقف الطموحات للمنافسه على الكأس لإن دوره مجمعه لأبطال القارات زي دي بالمستوى العالمي دا ومدى الجديه والمنافسه والتغطيه الإعلامية صعب أنه يتكرر تاني .. حتى لو عملنا 100 معسكر لن تكون الإستفاده على القدر الذي يحظى به اللاعبين الآن ...

وأتمنى أن يتركوا لنا أجواء الفرحة بالفوز على بطل العالم الآن ويبدأوا يركزوا في الماتش اللي باقي واتوقع الأمريكان هيستقتلوا الماتش اللي جاي والمباراه هتكون أصعب واكثر نديه من الماتشات اللي فااتت...

وأنصح الأخوه الأعزاء بتجنب الشورتات الإيطاليه لإن التقفيل الإيطالي طلع مش تماام :o

وحمص حمص أوعى يجيلك حمص

[سكر]

ايطاليا تنهزم من مصر بالملابس الداخلية

دة تعليق

فى الصحف الايطالية بكرة

[حسام يوسف]

مطلوب ترجمة تلخيصية للرأى العام الايطالي بكرة يا عم سكوب

مبروووووووك لمصر

فاضل أمريكا

يامسهل يارب

[الباشمهندس ياسر]

يا مدام ريمو الماتشات متشفرة

بس ممكن تشوفيها على بعض المواقع على الانترنت , أقصد مواقع ال tv

من ضمنها الرابط ده

http://www.justin.tv/directory/sports

دا رابط لأكثر القنوات الرياضية, وقت المباراة هاتلاقيه قنوات كثيرة منها ذايعة الماتش

==================================================

بالمناسبة ياجماعة

أنا حلمت إن مصر كسبت إيطاليا, وإنها جابت جول في بداية المباراة كمان h):

بعض الناس اللي بيفسروا أحلام بيقولوا إن ممكن الأحلام ييجي تفسيرها بالعكس :o

يعني لو واحد حلم إنه مات مثلا, ممكن ده يكون معناه إن عمره هايكون طويل ..

عموما هايبان في الساعات القليلة القادمة

و الله و شهدنااااااااااالك يا عم سهل

مبروك الفرحة اللى مالية الشوارع بتاعتنا

[dawn walker]

الف مبروووووووووووووووووووووووووووووووووووووووووووووووووووووووووووووووووكككككككك

[أبو محمد]

مع إنى كنت واخد قرار بعدم الكتابة فى مواضيع الرياضة ، إلا إن الماتشين الأخيرين يهزوا جبال الصمت

كنا بنلعب مع أحسن فريقين فى العالم ياجماعة .. أى فرقة من دول صعب جدا إنها توافق تلعب معانا ماتش ودى .. وإذا وافقت كنا حندفع لها فلوس .. فى كأس القارات .. لعبنا مع أحسن فرقتين وأخدنا فلوس وكسبنا احترام كل عشاق كرة القدم .. فيه أحسن من كده ؟ ... نفسى نلعب مع أسبانيا .. عشان نبقى لعبنا مع أحسن تلات فرق فى العالم

واضح إن الجهاز الفنى ركز فى التلات أيام اللى فاتوا على تفادى أخطاء ماتش البرازيل .. خصوصا الضعف الدفاعى اللى كان واضح فى التعامل مع الكرات الثابتة والعرضية .. وعلى فكرة .. كل فرق مصر عندها هذا الضعف .. حتى إنى كنت باقول لأحد أصدقائى (تعليقا على الجول التانى اللى دخل فينا فى ماتش البرازيل وفكرنى بأجوال فلافيو) إن اتنين لاعيبة أنجوليين (جيلبرتو وفلافيو) غلبوا كووووول الفرق المصرية بالكرات الثابتة والعرضية :giveup:

كمان نزول حمص "أساسى" النهارده .. بدلا من احمد حسن كان موفق تماما .. ربط الدفاع وخط النص تمام زى أبو تريكة ما كان رابط خط النص بالهجوم .. ويلاحظ أن دور أبو تريكة كان أقل وضوحا بخروج المهاجم الصريح "الوحيد" فى المنتخب المصرى (زيدان) .. كان عليه أن يلعب دوره الأصلى إلى جانب دور المهاجم "الوحيد" .. حمص يستحق جائزة أحسن لاعب فى المباراة .. وابو تريكة هو صانع الأهداف الأربعة التى أحرزها فريقنا فى المباريتين

نستحق الفرحة .. نستحقها .. فلنفرح ..

وأرجو هواة ضرب الكرسى فى الكلوب إنهم يسامحونا على فرحتنا .. معلش .. مش حنعمل كده تانى

[elshafey]

بس بصراحة الحضري هو نجم المباراة

وده بإعتراف المهاجمين الطلاينة ومارشيلو ليبي نفسه

تحس إنه رجع لأيام غانا 2008

ربنا يحميهم ويحرسهم ويتمم فرحتنا علي خير يارب إن شاء الله

ونقابل أسبانيا في نصف النهائي إن شاء الله

[محمد عبدالعزيز]

ألف مبروك لمنتخبنا ويارب دايماً الأداء الممتاز ده

ماتش أمريكا لازم يكون حياة أو موت يا جماعة لأن أمريكا مازال عندها أمل أعتقد عشان لو لا قدر الله أمريكا غلبتنا والبرازيل غلبت إيطاليا يبقى ممكن تدخل حسبة الأهداف.

إلى اللقاء فى نصف النهائى