كأس العالم للقارات

[adrianocrespo]

امبارح و انا بتابع التحليلات الرياضيه عالقنوات الفضائيه

كنت بضحك ساعات عالتبريرات

مدحت شلبي بيقول الفريق المصري كان بيعاني من ارهاق بعد مباراتي الدور الاول الشديدتين

لانهم امام فريقين بحجم البرازيل و ايطاليا

هاهاهاهاهاهاهاهاها

طب و هي امريكا كانت بتلاعب الكونغو و كينيا

ماهي امريكا كانت بتلاعب نفس الفريقين

و كانت متقدمه علي ايطاليا لحد الدقيقه ستين

و مطرود منها لاعب في منتصف الشوط الاول

و خسرت من البرازيل بثلاثيه

و سددت كرتين في العارضه

و تعرض احد لاعبيها للطرد

يعني اللعيبه كانت بتبذل جهد كبير في الماتشين

و مرهقين زينا

الارهاق ليس عذرا يا شلبي

تم تعديل 22 يونيو 2009 بواسطة adrianocrespo

[SAW]

عندما تنصلح السياسة سينصلح حال كل شيء في مصر.

أما تمنياتي أن تفوز أسبانيا بالبطولة لأنه منتخبي المفضل.

[نصير]

الاهم من الخسارة هو ان نتعلم كيف نستفيد من الخسارة

[elshafey]

يا جماعة الهجوم عندنا ماكانش معتمد غير علي زيدان لأن متعب وزكي مصابين والحلوين عبد الغني وأبوجريشة آخرهم الدوري المحلي

وهاتلي حد في المنتخب ممكن يسد مكان معوض

وأحمد فتحي كان بيلعب شبه مصاب وشفنا المحمدي كام كورة طلعت منه في الأوت عشان مش قادر يجري

وبعدين كمان فتحي أصيب وإتغير إضطراري

وأحمد عبد الغني أصيب وإتغير إضطراري

وغير كده وكده الحالة النفسية للعيبة من الإشاعات اللي طلعتها صحافة جنوب أفريقيا القذرة اللي كأس العالم هيفشل علي إيديها إن شاء الله

كل العوامل اللي فاتت دي وأهمها الحالة النفسية كانت السبب في الخسارة

وطبعا قبل كل ده توفيق ربنا

[elshafey]

ليس تبريرا

لكنى أرى أن السبب الرئيسي في فضيحة النهاردة انهيار اللياقة البدنية بعد معركتي البرازيل وايطالياده سبب 70%من المشكلة

وباقى النسبة موزعى بين غياب زيدان ومعوض

وائل جمعة كفاية أوى كدة دولى

هانى سعيد أتمنى ما يلمسش كورة فى حياته لا زمالك ولا منتخب

مصر تعانى من غياب المدافعين

يا عم حسام ...... مش ده وائل اللي كنا رافعينه في السما يوم ماتش إيطاليا

[se_ Elsyed]

ليس تبريرا

لكنى أرى أن السبب الرئيسي في فضيحة النهاردة انهيار اللياقة البدنية بعد معركتي البرازيل وايطالياده سبب 70%من المشكلة

وباقى النسبة موزعى بين غياب زيدان ومعوض

وائل جمعة كفاية أوى كدة دولى

هانى سعيد أتمنى ما يلمسش كورة فى حياته لا زمالك ولا منتخب

مصر تعانى من غياب المدافعين

يا عم حسام ...... مش ده وائل اللي كنا رافعينه في السما يوم ماتش إيطاليا

إذا إتكلمنا عن لمس الكورة

يبقى نقول إيه عن أحمد عبد الغني

و المحمدي

وعيد عبد الملك

؟!!!!!

[الأقصرى]

جريدة البشاير بتاريخ 22-6-2009

جنازة منتخب مصر .. أديب يكشف فضيحة فتيات الليل!!

بتاريخ : الاتنين 22 يونيه 2009 3:23:29 م

عدد القراء : 3567

فجأة تبخرت أحلام وآمال 80 مليون مصري .. والسبب نزوة !!

الاحلام كانت عريضة عرض السموات والارض ، حتى انها دفعت الموسيقار عمار الشريعي الى اعلان رغبتة فى اللعب مع منتخب مصر حتى يسعد الملايين الذين افرحهم الفوزعلى ايطاليا .

لكن للاسف لم يقدر لاعبو المنتخب هذه الامال والمشاعر والاحلام ، لانهم "شوية مراهقين " انشغلوا بالنساء ولم ينشغلوا بامال الشعب ، وبينهم لاعبين بـ " زبيبية " فاطاحوا بفرحة الشعب المصري والعربي كله .

الخسارة أمام امريكا كانت ثقيلة ، وحولت الاحلام الى " كابوس" ، واطارت النوم من العيون وعكرت صفو ومزاج الجميع وكانهم جميعا يشاركون فى جنازة تشييع منتخب مصر الى مثواه الاخير .

وكان عمرو اديب كشف عن تفاصيل مخزية فى فضيحة بنات الليل ولاعبى المنتخب الوطنى لكرة القدم ، فقد قام بعضهم باصطياد فتيات ليل من جنوب افريقيا وظهرن على شاشة كاميرات المراقبة الخاصة بالفندق ولم يسلم لاعب واحد من الاتهام ، لأن الفتيات كما اظهرت الكاميرات دخلت اغلب الغرف...

شهدت حلقة برنامج القاهرة اليوم الليلة فضائح من نوع جديد ، انتهت بمشاجرة وتبادل شتائم بين عمرو اديب ولاعبى المنتخب وبأن اغلق حسن شحاتة الخط فى وجه عمرو اديب بعد ان شتمه ودافع عن لاعبيه !!

قال عمرو اديب :

لعيبة غير منضبطين ، جابوا 5 فتيات ليل بعد الفوز على ايطاليا وبعد كده ادعوا ان اتسرق منهم 2400 دولار ، ومتحدث فى محطة البوليس فى جنوب افريقيا

اكد ان لديه دليل ان لعيبة المنتخب المصرى كانوا بصحبة عدد من فتيات الليل !!!...وقال : احضروهم من شارع اكسفورد بجنوب افريقيا والبنات دول هم اللى قشطوهم وبعد ذلك اشاروا باصابعهم الملوثة للعاملين بالفندق فقد تخيلوا ان العاملين فى الفندق ما داموا سود فهم حرامية !!

لولا الحضرى !ّ!

اكمل عمرو : سمير زاهر قال ان الامن فى جنوب افريقيا بيدعوا هذه الافتراءات للبعد عن اى اتهامات ممكن يوجهها لهم الاتحاد الدولى ..

لكن لما شفنا المباراة ياولاد ..

واللعيبة مش قادرة تحرك رجليها والعيال شكلها مجهد ، المبارة دى احنا ماعملناش فيها اى حاجة وربنا تدخل لصالحنا ولولا الحضرى لكانت الفضيحة اكبر

انت كنت بتلعب مع ناس طوال وكل كورك عالية زى مايكون محدش فاهم حاجة !!

ليه التشكيل الغريب ده وليه محمد فتحى مش فى مكانه وليه حمص مانزلش وليه بيقرفونا ؟!!

لما نتكلم يقول لك ده المنتخب الوطنى وماينفعش تتكلم عليه كده !!! نسوان ايه وقرف ايه ؟!! وفين فريق الساجدين ؟؟!!

فريق امريكا ده عيال صغيرة عمرهم قد ايه فى الكورة علشان يعملوا فيكم كده !!؟!!

الفريق بيلعب وهو نجس !!

اضاف عمرو بصرحة وجرأة يحسد عليها : الفريق كان بيلعب وهو نجس النهارده !! امريكا كانت احسن مننا فريق محترم مش بينزل يدور على نسوان فى الشارع ..!!

نعمل لكم ايه تانى ؟!!لازم يتحاسب المسئول وحد زى سمير زاهر واتحاد الكورة لازم يقول بجد اسماء اللعيبة اللى خدت ستات فى الغرف !!صحف العالم بتتكلم عن الفضايح بتاعتكم ومحدش فيكم لعب بينالتى واحد ....فكرتونا بمباراة تونس وفضائح تونس !!!

نفس حادثة الستات برضه وانتهت باربعة واحد ..!!

انتوا فريق مش محترم !!

انت فريق مجهد ولياقتك البدنية تعبانة والجزائر برقبتكم ، وانتوا مش احسن لعيبة فى افريقيا ولا كاس القارات انتوا مش لعيبة مركزة وانتوا فريق مش محترم !!

عايز حد يفسر لنا احنا ليه بنعمل فى نفسنا كده ؟!!مشكلتنا هى الحفاظ على المستوى وده مش عندنا ...

لما صحيفتين ينشروا الفضائح دى وبوليس جنوب افريقيا يؤكدها يبقى لازم يكون فيه تحقيق ومش بابالغ لو قلت تحقيق جنائى دى لعيبة رايحة تلعب باسم مصر !!

وبعدين زبالة الستات فى جنوب افريقيا وناس عندها ايدز ومرض ...فكر فى نفسك وفى ربنا ,...فيه حد نجس فى المباراة !!

هم معترفين ان فيه غرف لاعبين اتسرقوا ..ليه ماقالوش اسماءهم ؟!!اعتقد لو عرفنا الاسماء هتشوفوا لعيبة مش بتشكوا فيها وحسن شحاتة ليس مسئولاً وحده ، ورئيس جهاز الرياضة لازم يكون مسئول ..

تخيل لما يكون معاك وزير وتنزل تجيب" حتة "من لوبى الفندق ؟!!!!

ده انت فايز والبلد كلها شايلاك على اكتافها تقوم انت تشيل الستات دول على كتفك...!!

عزاء هانى شاكر !!

اتصل الفنان الكبير هانى شاكر بالبرنامج مقدماً خالص العزاء فى مصر وفى الاخلاق !!وقال : باعزيكم فى المنتخب وفى الاخلاق والقيم والمبادئ ودى ناس مش عارفة قيمة المكانة اللى هى فيها وخاطب عمرو قائلاً : ياريت لو تعرف تقول الاسماء قول ؟!

رد همرو : انا هابعت اجيب صورة من المحضر من جننوب افريقيا ..

اضاف عمرو : صحيفة قالت ان فتيات الليل علموا اللاعبين ازاى يسجلوا !! ولما خسروا جايين يقولوا ده ماحصلش !! ليه الدناوى دى ؟ ليه القرف ؟ ليه القذارة ؟. ولما ربنا يكرمك المفروض تصلى وتقول يارب ...!!

هنبعت لسفارة جنوب افريقيا ناخد المحضر ونقول كل التفاصيل !!

[محمد عبدالعزيز]

ياعينى عليك يا معلم وانت بتتاوب فى بداية الماتش