رعاياك يا مولاى

[الأفوكاتو]

هذا الخبر هو دليل آخر على أن هناك خلل فى المجتمع, و رغم أن مظاهر الفساد فى بعض الإدارات الحكومية قد أستفحلت, إلا أن سبب جنوح بعض المواطنين الى القيام بمثل هذه التصرفات إنما يعكس وضعا إقتصاديا و احتماعيا فى غاية السواد, و اليكم الخبر الذى جعلنى أحس بالشفقة على المخطئ. لأن تصرفه كان نتيجة لعيوب المجتمع.

محاكمة تأديبية لرئيس قسم بالشئون الاجتماعية

يبيع الفول المدمس علي عربة أثناء مواعيد العمل

كتب علي عفيفي:

وافق المستشار عبدالمنعم الروبي نائب رئيس هيئة النيابة الادارية علي احالة 5 مسئولين بادارة وسط القاهرة الاجتماعية للمحكمة التأديبية العليا. وذلك لقيام احدهم ببيع الفول علي عربة اثناء مواعيد العمل الرسمية وتستر باقي المسئولين علي مغادرته العمل الساعة الحادية عشرة صباحا. فضلا عن انقطاعه عن العمل في بعض الايام. كشفت تحقيقات هاني جاد الله رئيس النيابة ان صالح حامد رئيس قسم التسويات والملفات بادارة وسط القاهرة الاجتماعية دأب علي عدم الالتزام بمواعيد العمل الرسمية بانصرافه من العمل الساعة الحادية عشرة صباحا. وأنه يزاول بيع الفول المدمس علي عربة مخصصة لذلك بشارع السروجية بالدرب الأحمر اثناء مواعيد العمل الرسمية. وأنه انقطع عن العمل 5 ايام. واشترك مع كل من حسني عبدالمجيد مدير شئون العاملين وعبدالرؤف السيد مدير الشئون المالية والادارية وعوني خليلة مدير عام الادارة خطوط سير لتلك الايام الخمسة بهدف التستر علي انقطاعه عن العمل.

ووجهت النيابة الادارية لرأفت جرجس رئيس قسم الاجازات انه لم يطالب المتهم الأول بأيام انقطاعه عن العمل ولم يقم بتسجيلها في سجل الاجازات. كما وجهت النيابة لباقي المتهمين تهمة الاهمال والتستر علي الأول

[فــيــروز]

لدى بعض الملاحظات على هذا الخبر

اولها ان اسماء المتهمين قد ذكرت و معروف طبعا مكان عملهم ولا ادرى هل هذا قانونى ام لا فى حين بعض المطربين و الفنانين لا تذكر الصحف اسماءهم فى قضايا التهرب الضريبى مثلا !! فلم التفرقه بين اولئك و هؤلاء؟

هل المحاكمه التاديبيه للانقطاع عن العمل ام لان العمل الآخر كان بيع الفول على عربيه؟ فى الحقيقه لم افهم هذه النقطه من الخبر .. اعنى هل يستحق الانقطاع عن العمل محاكمه تاديبيه !! اللى انا باسمع عنه انه يتم الانذار بالفصل مثلا فاذا لم يستجب الموظف يتم فصله وليس تحويله لمحاكمه تاديبيه !!

[Handicraft]

فيـــروز كتبت

هل المحاكمه التاديبيه للانقطاع عن العمل ام لان العمل الآخر كان بيع الفول على عربيه؟ فى الحقيقه لم افهم هذه النقطه من الخبر .. اعنى هل يستحق الانقطاع عن العمل محاكمه تاديبيه !! اللى انا باسمع عنه انه يتم الانذار بالفصل مثلا فاذا لم يستجب الموظف يتم فصله وليس تحويله لمحاكمه تاديبيه !!

أولا القطاع العام كله كده وبنسمعش عن ان حد اتحول لمحكة تأديبية ولا حاجه.

ثانيا: الموظفين اصلا معندهمش شغل ولو حد راح أى شئون اجتماعية فى اى جامعة حيشوف العجب والموظفين قاعدين طول اليوم يحكوا لبعض عن كلام تافه وعن وصفات اكل ... طيب انا شوفت مره موظفه جايبه بنتها (حوالى 10 سنين) الشغل معاها واللى بيعمل شاى واللى بيقرا الجرنان ... يعنى من الآخر كده عاطلين بمسمى موظف رسمى.

ثالثا: المرتب طبعا لا يشبع ولا يربى اطفال فكلن من الطبيعى شخص فاضى مرتبه مش مقضيه انه يتصرف ولأن للأسف شغل عربية الفول بيبقى بس الصبح والموظفين والعمال رايحين اشغالهم فالأخ اتصرف علشان ما يبقاش عاطل ويعرف يربى ولاده ... طيب واحد حيسأل طيب هو ليه ما استقلشى من الوظيفة؟؟؟ حارد لأنه خايف بكره لما يجى يجوز بنته والعريس يسأله حضرتك بتشتغل ايه حيقوله ازاى انه واقف على عربية فول !!! وكمان الفكر المصرى بتاع تراب الميرى المضمون.

رابعا: المحكمة التأدبية حتديله لفت نظر وخصم الأيام اللى تغيبها بالكتير من الراتب والأخرون حيخدوا لفت نظر يعنى عادى.

خامسا: الخبر اتنشر لأن الراجل اتجرأ واشتغل على عربية فول ... طيب من زمان ونص سواقين التاكسى كلهم مدرسين وموظفين وتركب معاهم يقعد يحكيلك ظروفه وولاده اللى بيتعلمه وانه طول النهار فى الشارع الصبح الشغل وبعد الضهر التاكسى علشان يعرف يربيهم.

خامسا: للأسف انا بارجح ان الراجل معرفش يفتح مخه ويدارى على شمعته علشان كده غيره حب ينفخ فى الشمعة ويطفيها علشان المره الجايه يعرف يتعامل مع زمايله ازاى.

موضوع الأسامى ده انا ما اعرفش قانونيته ولكن الراجل لسه محول للمحكمه يعنى لسه برئ على ما اعتقد لحد ما يصدر القرار بس للأسف ده راجل موظف غلبان بيبيع فول حيعمل ايه للجريده يعنى!! يخبط دماغه فى الحيطه ... ده رأى المحرر المهم السبق الصحفى ومش مهم سمعة الراجل.

يا رب أمسك الحكومة وانا كل يوم الموظفين أشغلهم ساعتين بس الصبح فى المكتب وبعد كده فى المزارع يزرعوا وآخر الشهر اديلهم المرتب + خضار ولحمة ورز ودقيق علشان ياكلوا من اللى زرعوه علشان يعرفوا قيمته.

[الأفوكاتو]

الأخت فيروز:

الصحافة المصرية تنتهك القانون, و جميع الأعراف الدولية الخاصة بالنشر,( ميثاق العمل الصحفى الدولى)

و لو حدث هذا فى بلد متحضرة, لتم إغلاق الصحيفة بعد دفع تعويض كبير للمتضرر.

عينة من بعض عناوين الأخبار( التى تم نشرها فى خلال العام الماضى

الزوج يجد زوجته ساندوتش بين عشيقين فى غرفة النوم( الجمهورية)

حقا إنها لإمرأة ساقطة ( مع ذكر الإسم.... الجمهورية)

الذئاب تفترس فتاة عمرها13 سنة فى عرض الطريق( تم ذكر المكان, و إسم أسرة الفتاة, و الحروف الأولى من إسمها)

موظف البلدية الحرامى..... ( تم ذكر إسم البلدية, ووظيفة الشخص.. ثم الحروف الأولى من إسمه)

و طبعا قارئ هذه الأخبار لن يجد صعوبة فى التعرف على الشخص المذكور فى الخبر, و لو حدث ذلك فى الدول المحتمة, فإن الصحف الناشرة تتعرض لتهمة التشهير, و قد يتم سحب ترخيصها. مع دفع تعويضات تصل الى الملايين من الدولارات.

, و لكن فى صحافة مصر, كل قذارة مباحة.