في بيتنا رِوِشْ

[toota]

كانك بتوصف الي عندي بالظبط....قول يا سكوب واشجيني...دانا بتحايل عليه يروح يزور اهلي في بيروت ويهيص هناك رافض رفضا باتا...تقولش حوديه جوانتانامو.... :rolleyes:

.وقاعد يعمل كل الي بتقول عليه ده بالحرف.....مطلع عيني بالالوان

[Scorpion]

الأعزاء

مدام زهرة الجبل

الأستاذ محمد العنبي

مدام فولانة

الأستاذ mffaswan

الأستاذ زعلان

مدام Toota

لا أجد بالفعل الكلمات لأشكركم علي تشجعيكم هذا .... فلقد جعلتوني أصدق انني نجحت في ايجاد فكرة كوميدية معبرة بحق و حقيقي ... و أعتذر عن تأخيري في التكملة .. و لكن تعلمون جيدآ انه كي يستطيع واحدآ منا ان يرسم ابتسامة علي وجه الآخرين يجب ان تكون تلك الأبتسامة موجودة بداخله أولآ .... و هي مؤخرآ ضلت طريقها الي حتي قرأت ما كتبتوه فعادت مرة أخري ....

أشكركم بصدق ....

و الآن نعود الي صديقنا الروش ....

-_- :P :blink:

[Scorpion]

ضربت رجلي في الشبشب و خرجت ...

- اهلا يا يا لطفي .. خش يا راجل ... اعمليلنا شاي من فضلك يا أم جونيور

- لأ أعفيني يا سكوب .. هما كلمتين و حمشي علي طول

- يا راجل ... ده احنا ما بقيناش نشوف بعض الا في المناسبات ...

- الدنيا تلاهي يا صاحبي ...

يخرج موحة في تلك اللحظة من غرفته .. فتتحول نظرة الصداقة في عين لطفي الي نظرة عدوانية .. نظرة لم يخفي علي معناها و فسرت لي تلك الزيارة المفاجئة حتي قبل أن يفتح لطفي فمه ...

- شوف يا سكوب يا أخويا .. انا حخش في الموضوع علي طول .... احنا نعرف بعض من ايام ما كنا لسه عرسان جداد .. و ما فيش بيننا غير كل الود .. فحيصعب عليا بجد بعد العشرة دي نخسر بعض ...

- يا ساتر .. للدرجة دي قلقتني يا لطفي فيه ايه يا جدع ؟؟

- البني آدم اللي انت زرعته قصادنا ده .... مش ناوي يجيبها البر ابدآ

تأكد الشك داخلي و لكني قررت الأستعباط كسبآ للوقت و بحثآ عن حل في نفس الوقت ...

- انا مش زارع غير نعناع قصادكم يا لطفي .. و لو مضايقك نشيله يا سيدي و نبقي نشرب الشاي بالكرفس ...

- و النبي يا شيخ بلاش هزار ... الموضوع جد

- فيه ايه بس يا لطفي

- ابن اختك يا سيدي شغال ملاغية في البت و طول النهار ودودة في البلكونة لما لحسلها مخها ....

- موحة شغال ودودة مع حنان

- آه يا سيدي .... ايه رأيك بقي ؟؟؟

- والله مش عارف اقول لك ايه يا لطفي .. طبعآ ده شيء ما يرضينيش لو كان بيقل أدبه و ان كنت ما افتكرش ابدآ .. بالنسبة ليا شخصيآ العيال في سن بعض و كأنهم زملا في المدرسة ... ما احنا برضه لما كنا في سنهم كنا شغالين ودودة مع بنات الجيران ليل نهار ...

- ما هو ده اللي قالقني يا سكوب .. احنا كنا شغالين ودودة انت عارف ليه .... و بعدين انت عارفني .. يعني انا مش حنبلي مع البت .. و طول عمري مديها الثقة .. لكن ابن اختك ده قالقني ... مش محدد معالمه ... حاجة كده هلامية ... اللي شقلب عقلي بقي ان البت ابتدت تتكلم عن حاجات غريبة من ساعة ما شرف جنابه ...

- غريبة زي ايه يعني ؟؟

- البيرسينج مثلآ

- بير ايه ؟

- سينج ... بيرسينج

- ده ممثل هندي ؟؟

- ده انت اللي هندي يا سكوب ... البيرسينج ... البنات دول اللي بيخرموا ودانهم و شفايفهم و حواجبهم ...

- طب ودانهم و معروفة و عادي يعني ... لكن بيخرموا شفايفهم و حواجبهم ازاي و ليه أصلآ ؟

- انت بتسألني أنا يا سكوب ... ما انا زيي زيك .. اسأله هو ... جيل ما يعلم بيه الا ربنا ...

- طب روق دمك ... نتصرف بهدؤ ...

و ندهت علي موحة

و دخل هذا الأخير بنفس التي شيرت الذي لم يغيره منذ 4 ايام و لكن هذه المرة لسعادتي البالغة البنطلون المقطوع ترك مكانه لبنطلون آخر سليم تمامآ .. و لكن أعتقد انه يخص والده لأنه كان واسع لدرجة انه كان يصل الي ما تحت بطنه بقليل بصورة تظهر ملابسه الداخلية بصورة أخجلتني ..

- ما ترفع البنطلون يا موحة و داري نفسك ... خش خد لك حزام او حمالات من الدولاب عندي ترفع بيهم البنطلون ده بدل ما أستك البتاع باين قدام الضيوف كده الله يكسفك ...

- مش فاهم يا خالو .. بتاع ايه ؟

- انت مش شايف اللي باين من تحت بنطلونك يا موحة .. انت بتتمسخر بخالك يا ولد ؟؟

- اتمسخر ايه بس يا خالو ... هو موديل البنطلون كده .. الموضة كده ...

لم اتمالك نفسي و لأول مرة أصرخ في وجهه :

- ابو الموضة علي اللي عملها علي اللي بيلبسها ... لم نفسك يا موحة ما تخلينيش اوريك وشي التاني ...

تردد موحة قليلآ ... فمن الواضح انه لم يتوقع هذا الأسلوب مني أولآ .. و كرامته التي جرحت قليلآ أمام الضيوف ثانيآ .. و لكنه في حركة سريعة لم أفهم كيف عملها وجدت البنطلون يعود الي وضعه الطبيعي بدون اي مشاكل و مقاسه يتوائم تمامآ مع حجمه ...

- مبسوط كده يا خالو ... اقدر أزق بقي ...

- لأ .. اقعد حندردش شوية .... انت تعرف طبعآ عمو لطفي ...

- انا مالياش دعوة بنونا .. و لا عملت حاجة .... و لا كنت عايز أكلمها من اساسه ...

- نونا مين يا موحة ؟ قالها لطفي بجزع

- أنت مش عارف بنتك يا عمو .. نونا ... حنان ...

لطفي : - و انت ايه اللي بينكم علشان تدلعها كمان ...

- أدلعها ؟؟ حد يدلع اوتوبيس راجع بضهره

صرخت فيه : ولد .. احترم نفسك ... و الا و ديني حعمل معاك اللي ما عملوهوش ابوك لحد دلوقتي ...

- يا خالو انت بتديها جاز و الا ايه .... هو انتوا فاكرني أنش ...

- جاز ايه و انش ايه ... هو الواد بيقول ايه يا لطفي ؟؟؟

- انت بتسألني أنا .. ما اهو متنيل قدامك

- انش يعني ايه يا موحة ؟

- يعني ساذج و عبيط يا خالو ... بص يا خالو ... شوف يا عمو لطفي .. ما تزعلوش مني ... لكن نونا بصراحة عندها الأبلتين لادع خالص

احنا الأتنين في صوت واحد : لادع ؟؟

- ده لادع في كل دهاليز الحياة

ثم نظر الينا لحظة .. و هز رأسه كأنه فهم ما نعاني منه في موقف ينقص فيه قاموس ...

- يعني فاضية من جوا خالص ....

أنا : لحظة نظام .. كده مش حنوصل لحاجة خالص .... لأنك يا موحة لو اتكلمت بالشكل ده .. يا حروح انده لأنيس عبيد يحطلك ترجمة ... يا حخسر أختي فيك .... نقلب الصفحة دي و نتكلم من البداية ...

- ماشي يا خالو ... Enter

[mffaswan]

هههههههههههههههههههههههههههههههههههه

إيه الابداع ده يا أبو جونيور؟؟ والله فطستني من الضحك و أنا في الشغل .. الناس عمالة تقول ايه اللي عمال يضحك مع نفسه ده !! :lol:

بس تصدق فعلاً .. الجيل ده كله (أبلاتينه لادع)!!

مستني التكملة .. و ما تتأخرش علينا ..

مودتي و تقديري mfb: :D :lol:

[Salwa]

اسعد الله صباحك يامبدع كوميديا ......الشباب اللى كان على وشك الضياع فى رأينا وعلى بداية النجاح فى رأيه ..!!

طبعااا من غير تصوير لأى احساس وقت قراءة كلماتك ......تعلم بالطبع انى كنت اضحك كثيراااا.....بالتأكيد تعلم انى رجعت بالذاكرة شوية سنين صغيرين .

كان ليا موقفين مع ابنى .. فقط ..الصراحة ....

هما يعنى اللى غلبونى معاه فى الفترة دى ...!!

البيه ابنى فى يوم جه قاللى ..ليه بابا (( بيحاربنى ؟؟ )) مش عاوزنى اعمل بيرسينج فى ودانى ؟؟....هل انا قصرت فى اى شئ فى واجباتى ؟؟ طيب هو ليه مش بيدينى حقوقى اللى هى اول شئ انا حر فى جسمى ؟؟...انا حر فى نفسى ؟؟ مزاجى البس حلقين ...!!!

ولما قلت له طيب نتفاهم بالعقل ..!!...حاولت اتفاهم رغم اقتناعه انى ظالمة وواقفة فى صف...زوجى..!!!....طبعااااا وقتها مش بيقول ابويا ..

فضل ..مقموص فترة ...والشئ الغريب جدا جداااااا...انه ايامها فى امتحان معين اتعمد انه لايحل كل الاسئلة ...!!! ولما سألته ليه تركت الامتحان بدرى ؟؟ قاللى ..طيب وليه انتوا بتتركوا بعض واجباتكم ؟؟..

.طبعااااااااا....معملش لاحلق ولا غيره .....لان الكلمة الاولى والاخيرة لوالده ..هو مش بيخاف طبعااا لكنه يحترمه ...ويحترم هذا النظام.فى البيت ...الى الآن .

تانى موقف ....

فى يوم كنت انظم بعض الاوراق ووجدت اربعة ابيات من الشعر كانت كاتباهم والدتى ......وبكيت.

وسألنى ؟؟....وقرأتهم له.....فهمهم طبعااا .....وقاللى جدتى كانت امرأة رائعة وصدقينى ياماما دى اجمل كلمات واجمل احساس ...وطلب منى الورقة وصورها بالاسكانر ..

بعدها بيومين ...

فوجئت بيه بيتكلم مع اخته ...وصوتها يعنى فيه رنة مش عجبانى ...وكلما اقتربت ...اجد الصمت...وهى تنظر له شذرااا....وفقط سمعت كلمة ...انت اتجننت؟؟

والمهم...

البيه الصغير ..برضه ايامها كان عنده حوالى ستاشر او سبعتاشر سنة ...

كان عاوز يعمل ...وشم....وفين؟؟

على ظهره ...!!!!!!!!!!!..............بالأربع ابيات......اربع ابيات من الشعر على ظهره و...بالعربى ...!!!!!!!!

يعنى ده غير الوشم....عاوز يعنى اى متعصب يشوفه على البحر او فى النادى و...يدبحه..(( لاقدر الله ))..؟؟؟؟؟؟؟؟؟

طبعاااااااا...

حضرتى ....جالى انهيار ...!!

وقلت له انت كدة بتخلينى اكره نفسى ....لانى انا اللى قرأت لك الابيات دى ....يعنى كدة حاتخلينى احس ان امى اغلى الناس فى عمرى كله هى حاتكون سبب عذابى ...انت مجنون ومتخلف ...ثقافة ايه اللى انت بتتثقفها؟؟ انا كنت فاكراك غير باقى الشباب ؟؟ طيب امال لو مكناش ربيناكم صح وشفنا الغلب فى بعدنا عن بلدنا واهالينا ...و..و.و..و.و.و.و.و....

و...

لو حصل لك حاجة صدقنى بقى ...البيت ده حايتخرب ..وابوك حايعمل وحايعمل ..

عاوز تبهدل جسمك ويبقى زيك زى الشباب اللى بنشوفهم ضايعين فى الشوارع؟؟ انت ليه بتفكر كدة ؟؟ احنا قصرنا فى ايه ؟؟؟

وتعالى نكلم بالعقل...

انت يعنى عاوز تعمل بوهيمى ...؟؟....تطول شعرك وتعزف موسيقى وتعيش على سجيتك ؟؟ ...انت كدة يابنى حاتبقى بهيمى ؟؟ ولا حتى حصلتهم لو عملت كدة ؟؟

انا فاهمة اختيارك حايكون مفيش زيه فى الدنيا كلها بس مش معنى اننا نحب حد اننا نرسم كلامه على جسمنا؟؟ ...الوشم ده حاجة تدل على عدم التحضر ..رغم انه تقليد لكثير من الشعوب ..

بس دى شعوب ساكنة الغابات ..

والمهم بجد يعنى ...

كانت فترة بسيطة بس عدت على خير ..

اجمل حاجة بقى انه بيعايب على الولاد اللى بتلبس البنطلونات الساقطة وغيره ....سبحان الله.

بس حبيت اشارك فى ذكريات التعامل مع الشباب الصاحى ..

وفيه نقطة مهمة ياسكوربيو .....رغم اللى حصل مع ابنى لكنه كان عاشق (ولازال والحمدلله) للقراءة والكتابة ....ويمكن ده كان عامل كبيررر جدا جدااا فى ابتعاده عن اشياء كثيرة .

يعنى بصراحة ..

بتوفيق من ربنا ....مش ...جدعنة منى .

صباح سعيد ..

[shahd]

رووووووووووعه يا عمو كامل موتني من الضحك الله يسعد ايامك

احترماااااااااااااااتي

[زعلان]

:) كمل يا عمو سكوربيون

[Scorpion]

:ninja: كمل يا عمو سكوربيون

خالو .... بيدلعوني و بيقولولي خالو يا زعلان باشا .... عمو ده يبقي الأستاذ لطفي جارنا .. يا ريت نذاكر شوية

العزيز mffaswan .. اشكرك علي تشجعيك

شهد العزيزة ... مجرد ما قريت اسمك دخلتيني في موووود سعادة و تفاؤل ساعدني في اللي بكتبه .... :ninja: اشكرك

مدام سلوي .... مش لاقي رد علي طوفان المشاعر اللي قريتها في سطورك .... يمكن بكتبها باسلوب كوميدي ... لكن ده اللي بنعانيه فعلآ بصورة أو بأخري في مشوارنا كآباء و أمهات .... لكن في نفس الوقت لا أستطيع توجيه اصبع الأتهام لهذا الجيل ... فبصورة مختلفة كنا نحن أيضآ "روشين" نوعآ ما في مراهقتنا .... و ها قد حان وقت دفع الثمن ... :)

تحياتي و احتراماتي ....

نعود للأفندي اللي بيقول لي Enter

[Scorpion]

آه دي انا فهمتها من غير قاموس الروشنة ... و علشان اوريله اني برضه بستخدم مصطلحاتهم .. قلت ساخرآ للطفي

- الواد بيقول لي Enter يا لطفي .. علي اساس اني كومبيوتر يعني ... مالاقيش معاك فلوبي ديسك

لطفي : ده ليه علاقة بالإنزلاق الغضروفي

ابتسم موحة ساخرآ ... و لكن قبل ان يبدأ في المألسة من جديد عاجلته بسؤال :

- ايه بقي حكاية بيرسلم ( قلتها بثقة و تمكن من المصطلحات بتاعتهم )

- بير سلم ايه يا خالو ؟؟

لطفي هامسآ في أذني : بيرسينج يا سكوب

انا : حد جاب سيرة بير سلم .. ايه شغل الخدامين ده .. بقول لك بيرسينج ...

موحة : ماله البيرسينج ..

انا : يعني ايه اساسآ بيرسينج

موحة : يعني تخريم بالأنجليزي

أنا : تخريم .. تخريم يعني ايه ... حتخرموا بالعربية في شوارع جانبية ..

موحة : تخريم يا خالو .. تخريم .. موجودة والله الكلمة دي .. ثم لحظة تفكير قصيرة ثم قال : صناعة الثقوب .. قاشط كده ؟؟

أنا : آآآآآه ... ثقوب ... و بيخرموا ايه بالظبط ؟؟

موحة : اي حتة عايزين يحطوا فيها حلق او اشكال معدنية ...

أنا : اي حتة ازاي يعني ؟؟ الحلق مالهوش غير الودن يتحط فيها ...

موحة : ازاي يا خالو .. انت عمرك ما شفت صور او افلام عن افريقيا ؟؟

أنا : قصدك بتوع الزولو دول اللي بيحطوا حلقان في مناخيرهم .. و عضم فيران في خدودهم .. نظام فيلم طرزان يجد أبنآ و كده؟؟

موحة : حاجة زي كده

أنا : و طرزان بقي موضة عندكم دلوقتي

موحة : مش بالظبط يا خالو .. استني حوريك اشكال البرسينج في اوربا ازاي

و ذهب الي حجرته و أتي باللاب توب و قعد يتكتك بالزراير شوية .. و بعدين قلب الشاشة ناحيتنا ... للحظة لم أفهم ما أراه ... و هل الذي امامي رجل أم كوبري صغير بكل تلك المسامير المعدنية التي تخرج من جسمه ...

نظرت الي لطفي منزعجآ و قرفان بالفعل... و كان هو بدوره يقاسمني نفس المشاعر:

لطفي : فهمت البرسينج يا سكوب .. الأول يخرموا نفسهم بسرنجات المخدرات و بعدين يسدوا الخروم بمسامير قلاووظ و و يثبتوها من الناحية التانية بصامولة ..

أنا : و جناب سعادتك عايز تعمل بيرسينج بالشكل ده ؟؟

موحة : مش بالدرجة دي يا خالو .. بس هي طاقة في دماغي اني اعمل خرم لحلق صغير في ودني .. ممكن يا خالو ؟؟ وحياتي عندك .. عايز اعملها مفاجأة لماما لما ترجع ...

أنا : الخرم ده مش محتاجه في ودنك ... لأن فيه خرم كبييييييير قوي في دماغك واخد مكان مخك ... حلق ايه يا موحة اللي انت عايز تلبسه ... يا نهار اسود ... يا نهار اسود ... انت راجل ياااد ؟؟

موحة : انت حتسوده ليه بس يا خالو .. و ايه دخل الرجولة من اساسه .. مش موافق بلاش .. أومال لو قلتلك نونا كانت عايزة تعمل البيرسينج فين كنت عملت ايه

لطفي ملتاعآ و صائحآ : كانت عايزة تعمله فين !!!!! يا ليلة كوبيا .. شفت يا سكوب .. شفت .. ثم قفز علي موحة وشده من ياقة التي شيرت ( تمنيت ساعتها ان يمزق هذا التي شيرت لأخلص من شكله للأبد ) ... البت كانت عايزة تحط الحلق فين يا موحة .. و انتو بتتكلموا ازااي من اساسه في المواضيع دي و بمناسبة ايه .. و...

تدخلت بينهما لأخلص موحة من يديه ... و لكن في نفس الوقت كنت اقاسمه الغضب ... بينما موحة كان "مخضوضآ" بالفعل :

- ايييييييه ... هو فيه ايه ؟؟ ... انا حأتشبح في بيت خالي و الا ايه ... مالك يا عمو لطفي ... نونا كانت عايزة تعمل بيرسينج في حاجبها الشمال .. و انا كل اللي عملته اني قلتلها ان الموضة هي الحاجب اليمين .. و بس .... الله

لطفي : حاجبها .. حاجبها ؟؟ و انت مالك .... انت شغال بلانة ؟؟ بقول لك ايه ... من هنا ورايح انت مالكش دعوة بيها خااالص .... اسمع يا سكوب ... انا مالياش كلام مع العيال .. انا بكلمك اهه و عامل حساب العشرة .. سي زفت ده مالوش دعوة ببنتي من هنا و رايح .. و لا حتي صباح الخير .. و لو شفته بيهزلها راسه بس ... مش بيكلمها .. بيهز راسه .. حقطعهاله و احطهالك في السبت ... و من هنا لحد ما يغور .. انا مالياش كلام معاك انت كمان ... سلام .. و الا اقول لك .. من غير سلام

- أنا : اهدي يا لطفي .. اهدي يا راجل .. و حقك علي راسي ... من النهارده حخليه يغير الأوضة و مش حتشوفه لحد ما ترجع أختي من السفر ان شاء الله .

- يكون أحسن .... و خرج رازعآ الباب خلفه

لحظة سكوت و تفكير كي أهدأ قليلآ .... ثم قلت له

- مبسوط يا موحة .. مبسوط يا ابني ... الراجل اعرفه من اكتر من عشرين سنة عمرنا ما اختلفنا .. تخليه يزعل مني بعد العمر ده ؟

- يا خالو ما تزعلش مني .. بس بجد اللي انتوا عملتوه ده اوفر قوي .. هو انا كنت عملت ايه علشان كل ده

- يا ابني فيه حاجة اسمها اصول ... اسمها حرمة بيوت و جيران ... اسمها عادات و تقاليد ... الحاجات دي مش موجودة في قاموسكم من اساسه ..

- يا خالو انا لو عملت بالكلام ده مش حلاقي حد يصاحبني او يخرج معايا ... زماننا بقي كده دلوقتي

- و ايش دخل الزمن في الأصول يا موحة ؟؟

- عالعموم يا خالو انا خأختفي شوية لحد ما الحياة تعدي .... و ما تزعلش مني

- تختفي يعني ايه ... حتطلع الجبل مثلآ ...

- تنهيدة عميقة و ببطء شديد ... لأ يا خالو حختفي شوية يعني حهدي اللعب مع نونا ....

- و لا تهدي و لا تسرع و لا ليك دعوة بيها من اساسه ...... انت ماكفاكش اللي جري ؟؟

- حاضر يا خالو ... بس كده الحياة بقت امبلايز ...

- بقت ايه يا حيلة ... امبلايز ... يعني ايه ؟؟

- يعني بقت في القاشوش ...

- آه ... آه ... هي الحياة بقت البتاعة دي ... و مش حنولك مرادك و أسألك معناها .... زق عجلك بقي

- طب متأبجني علشان أروح املا التانك

- يا ابني كلمني بالعربي

- هات حاجة اروح آكل بيها مع الشلة

- فلوس يعني

- ايوه ...

- ما تقول فلوس بدال اللفة دي كلها .. حتخس لو قلت فلوس ... و حتروحوا تاكلوا فين ؟؟

- ماكدونالد

- طب انا حديك الفلوس بس لو قلتلي حاجة ...

- اللي هي ؟

- الواد سامي ابن المستشار رأفت جارنا ... هو كمان من شلتكم ؟؟

- اشمعني

- أصله عامل بيرسينج في كل سنانه

- ده مش بيرسينج يا خالو .. ده جهاز تقويم اسنان

[النجم الثاقب]

rofl

ده اختصار لجملة rolling over the floor laughing .. و ده بيستخدم فى الشات

و ده نفس اللى بيحصلى لمّا بأقرأ لك يا خالو سكوب .. بس الحقيقة بيبقى على السرير مش على الأرض :)

[Scorpion]

rofl

ده اختصار لجملة rolling over the floor laughing .. و ده بيستخدم فى الشات

:lol:

:blink:

:blink:

:blink:

هو أنا ناقص ؟؟؟ روفل ... روشنة انجليزي كمان .... و معناها ايه دي .. فين القاموس يا ابني

رولينج :بيتأدلج

أوفر : بيباصي كورة عالية لزميله

ذا فلور : الدقيق

لافينج : عطر فرنسي

:blink:

يعني ايه ؟؟؟ !!....

الصبر يا رب

اسعدتني زيارتك لهذا الموضوع يا استاذ بيرسينج ستار ...

( حتي النجوم بتتخرم هي رخرا ... و احنا اللي كان بيخرم التعريفة فينا كان بيبقي الواد اللي هو )

علي ايه حال .. اشكرك بجد

[Scorpion]

تدخل ام جونيور مع جونيور حاملين اكياس مشتروات و بينما تتجه الي المطبخ تسألني :

- اللهم اجعله خير .. البيت هُس هُس يعني .. هو موحة بره ؟

- أيوه يا ستي .. راح يتغدي في الماكنونان

جونيور : ماكدونالد يا بابا ..

- بقول لك ايه .. انا مش ناقصك انت راخر .. اهه كلها اسامي اسكتلندي لرجالة بيلبسوا جيبات ...

أم جونيور : أحسن .. ماما جاية تتغدي معانا و غداه بره حيوفر تعليقات كتيرة

حماتي جاية ... آه صحيح ده النهارد الحد .. الصبر يا رب .. ثم خطرت في بالي فكرة ابتسمت لها ...

- بقول لك ايه يا حياتي ... هي مش مامتك برضه متابعة الموضة

تنظر أم جونيور جهتي بريبة ...

- ساعات .. بس ليه السؤال ده

- يعني .. أصلي لسه كنت بتكلم مع موحة عن موضة البيرسينج

- و ايه علاقة ماما بالهبل ده

- يعني .. انا شايف ان البيرسينج حيكون لا يق عليها خالص .. لو عملت المسامير القلاووظ دي اللي بيحطوها في شفايفهم .. يعني مثلآ لو حطت واحد منهم يطلع من شفتها اللي التحت و يخلص في شفتها اللي فوق ... او واحد تاني في لسانها و يتثبت في سقف الحلق مباشرة .. بجد مش حتبقي شيك خالص ؟؟...

جونيور : بس تيته كده مش حتعرف تفتح بقها خالص يا بابا ..

- اسم الله عليك يا روح بابا ....

ام جونيور : حنبتدي يا سكوب في جر شكلها من قبل ما تيجي .. والله لو خففت دمك كده معاها و خليت رقبتي زي السمسمة زي كل مرة ... بجد حزعل منك أوي ...

- يا عيون سكوب ديه حاجة أقوي مني ... و بعدين بذمتك مين اللي بيبتدي كل مرة ... شوفي .. منعآ للمشاكل انا حنزل قبل ما تيجي ... و حروح اتطمن علي موحة من بعيد لبعيد مطرح ما بياكل هو و اصحابه .. اهه من جهة الواحد يتأكد انه ما بيعملش مصايب .. و من جهة الواحد يتعرف علي الأماكن دي ..

- و لما ماما تيجي اقول لها ايه ...

- قوليلها الحقيقة .. خرج يدور علي ابن اخته

- ماشي يا سكوب .. ماشي .. خليك فاكرها ...

- انتي زعلتي مني يا حبيبتي ...

لحظة سكوت ..

- لأ يا سيدي .. يمكن كده أحسن .. بس ما تتأخرش

جونيور : بابا .. خدني معاك .. عايز آكل هابي مييل

أم جونيور : سكوب .. قول لجونيور يخش يستحمي و علي اوضته عدل ... انا مش ناقصاه هو راخر

أنظر الي جونيور .. و ينظر الي ... ثم يتجه محني الرأس الي الحمام ... بينما أطبع أنا قبلة علي وجنة زوجتي و أتجه الي مراعي القطيع المسماة بماكدونالد لأتعرف علي نوعية العلف الذي يعيشون عليه ....

[عنبو]

كمل يا عم سكوربيون كلنا منتظرين بجد اسلوبك رائع فى الكتابه

[newcomer]

الله يا يضحكك و يسعدك يا ا. سكوربيون

شوفت الموضوع ده بالصدفة بس دلوقتى......

ما قدرتش اسيبه غير لما قريت الموضوع من اوله

حضرتك بترسم صورة حقيقية جدا ل "روش" عند اى حد فينا فى عيلته

..........................

اول مرة اعرف مصطلح " انش" ......معناه عبيط

و عماله افكر ايه علاقة البوصة ( كترجمة يعنى ) بالعبط؟؟؟؟؟

بعدين خفت حد يشوفنى واخدنى التفكير كده ....يفكر انى " انشه" و لا حاجة

متابعيين يا ....خالوه هوه

تم تعديل 13 أغسطس 2009 بواسطة newcomer

[Scorpion]

أعزائي العنبي و newcomer ... اشكركما علي التشجيع و الأطراء المبالغ فيه ... فأكثر ما يسعدني بالفعل تخيلي لأبتسامة من القلب علي وجه من انتهي من قراءة شيئآ كتبته ...

عالم ماكدونالد n2&(

[Scorpion]

خرجت من البيت و انا اصفر لحن لليلي مراد .. و علي باب العمارة وجدت عم لمعي البواب .. و لدهشتي الشديدة أجد فمه مليء بالمسامير ...

- إيه ده يا عم لمعي ... إنت كمان عملت بيرسينج ؟؟

فيرد عليا بلهجته الصعيدية اللطيفة :

- بيرسينج ده يطلع إيييه يا أستاذ سكوربيون ... أنا بثبت صناديج البوسطة اللي كانت حتُجع ..

و يتناول مسمار من فمه و يبدا في الخبط ...

أبتعد مبتسمآ ساخرآ من نفسي ... و أتجه ناحية مراعي القطيع ... و من بعيد أجدهم يدخلون زرافات من تلك البوابة الزجاجية التي يعلوها وجه بلياتشو .... في اول إشارة ان هذا المكان يجب أن يتم تصنيفه كسيرك و ليس كمطعم ...

أتردد قليلآ ... ثم أبدأ في النظر حولي كأني علي وشك ان "أعمل عملة" ... استجمع شجاعتي و .. أدخل ...

أبحث عن موحة من بعيد لبعيد .. حتي أراه مع اصدقائه و هم يأكلون متبادلين الضحك و القفشات .... ابتسم في راحة .. و أقرر أن أخوض التجربة أنا أيضآ ... لنري ما هو هذا العالم الهامبورجري ...

اتجه الي الكاونتر .. لأجد ....

ميكي ماوس ...

آه والله ميكي ماوس ... بني آدم مسكين ملبسينه هدوم ميكي ماوس واقف بيبص لي ...

- أؤمر يا افندم

- ساندوتش هامبورجر .. قلتها ببساطة و تلقائية

- أنهي فيهم ؟؟ تسائل ميكي ماوس و هو يشاور فوقه علي لوحة اعلانات مليانة سندوتشات باشكال مختلفة ..

يا نهار كوبيا ... هي دي كمان فيها اصناف .... الواحد عند عم ابراهيم يقول له سندوتش فول يا عم ابراهيم .. يتحطله سندوتش فول معتبر من غير اعلانات و لا صور و لا الحركات دي ....

ارفع راسي و ابتدي "أتجول" بين صور السندوتشات ... لكن ده كله مكتوب بالأنجليزي !!!

اعمل حادي بادي و اللي شكله عجبني شوية أحاول اقرا اسمه و أقول له :

- أديني من فضلك واحد " سويشينج ويش" ...

و الا اٌقول لك .. واحد " بيج رويال دوبل ديلوكس" .. لأ .. بلاش ده .. شكلي بقاول علي تشطيب حمام شقة ...

اديلي البتاع ده اللي اسمه " تشيكن إن ذا كيتشن "

تشيكن ان ذا كيتشن ... مش دي يعني الفرخة في المطبخ .... بقت سندوتش دلوقتي ... ياللا ما علينا .. خلينا ناكل و نروح من هنا ...

- حضرتك عايز وان تشيكن ان ذا كيتشن ؟؟

يا دي النيلة انا ما صدقت ارسالي علي واحد منهم ... بيسألني ليه البني آدم ده .. أهه الواحد شك في السندوتش ده ... أنظر للمرة الأخيرة في لوحة الأعلانات بتركيز و أقرر القرار النهائي :

- أديني ده .. و اشاور علي سندوتش معين

يسألني بهدؤ

- حضرتك عايز سوبر بيج لارج بيرجر مينو سويمينج بوول ...

لا أتمالك نفسي و أسأله :

- هي مش كفاية عليا الحوسة حتزودها انت كمان ... ثم هو حضرتك مصري ؟

- طبعآ مصري و من بنها ....

- طب مادام انت مصري .. النبي عربي يا أخي ... ليه مصرين تخلوني اتكلم لغة ما بعرفهاش .... عالعموم اديني البتاع ده .. و ما تسألنيش أي سؤال تاني من فضلك

- هو سؤال واحد حضرتك .. الكوكاكولا بيج و الا سموول

- سموول من فضلك ... علي الأقل ديه فاهمينها ...

يملالي جردل كرتون و يديهولي ..

- أنا طلبت السموول

- ما هو ده السموول حضرتك ...

أهز رأسي مستسلمآ و أطلب أن يضيف يعض الثلج ... فيضيف قطعتين من الآيسبيرج الذي غرقت بسببه التيتانيك ..

أخيرآ وصل الطلب بتاعي ... حطهملي علي صينية .. دفعت و رحت قعدت في ركن بعيد .. لما نشوف السويمنج بوول ده ..

الصينية كان عليها الكوكاكولا .. كيس ورق فيه نص كيلو بطاطس محمرة ... و علبة من كرتون أصفر جواها الساندوتش .... تابوت فيه حاجة بيسموها سلطة و ملفوفة بسلوفان .. كيس تاني صغير شكله فيه حتة كيك او جاتوه ... شوية حاجات بلاستيك ... ما علينا ... انت مش طلبت المينو ... قابل بقي ...

اشرب بق من الجردل ... و اشم نفس طويل ..

أخيرآ حانت لحظة اللقاء فيس تو فيس مع الهامبورجر ...

لحد ما العلبة الصفرا دي مقفولة .. الساندوتش بيفضل نايم و ما فيش اي مشكلة ... لكن حاول بس انك تفتح العلبة ...أول ما يدخل جواها الأكسوجين.. تلاقي الساندوتش دبت فيه الحياة و ابتدي يتحرك ...

تحاول تقطم أول قطمة .. تتشششيياااف ... تلاقي الكاتشاب طرطش علي اي حاجة في مساحة قطرها 60 سنتي .. هدومك ... وشك ... صوابعك ... و غصب عنك حتلاقي الوشم اللي كنت بتتريق عليه من شوية ملطوع علي وشك شخصيآ في اقل من 5 ثواني .. بس لونه أحمر ... و لو كنت لابس نضارة ... مليون في الميه حتلاقي حتة خس اتحشرت في المفصلة بين دراع النضارة و العدسة ... ازاي ؟؟ .. ما تسألنيش ...

قطمة تانية .... بتشششااام ... حتة فلفل أصفر تطير من الساندوتش و تلزق في كتف الجاكيتة ... يعدي جنبك واحد يضربلك تعظيم و يقول لك : صباح الخير يا سيادة العقيد ...

تركن الساندوتش ... و تحود علي البطاطس ... لكن ما تفهمش ايه نوعية الزيت اللي ممكن تخللي البطاطس ديه لو حكيت اتنين في بعض يطلعوا شرارة ..

تركن البطاطس علي جنب .. و تتجه الي مرساك الأخير ... السلطة ... سلطة !! ديه حتة ورقة خس يتيمة ... تبص علي ورقة الخس ورا غلاف من السيلوفان ... هي كمان محطوطة في علبة مشفوط منها الأكسجين .. و تلاقيها يا حبة عين أمها .. هفتانة .. و صفراااا .... شبه مغمي عليها ... تبصلها .. تلاقيها بتبصلك بتوسل .. كأنها بتقول لك : أرجوك انقذني .. انا بمووووت ....

تطلع القلم الجاف من حيبك بسرعة .. و بسنه تعمل خرم في السيلوفان يدخل منه الأكسجين .. يمكن تلحقها ... لكن للأسف ...

توووو ليت .... ورقة الخس تنكمش للمرة الأخيرة و تزفر نفسها الأخير بين دراع ربع طماطاية ما كانتش باينة من الأول ...

تشعر بالأسي و تحني رأسك ... تهمهم بكلمات غير مفهومة جهة الطماطماية معزيآ اياها ....

ما فاضلش غير الحلو .. اهه برضه حتة كيك ... فضلت يا جماعة امضغ فيها نص ساعة .. لا عرفت امضغها و بلعتها بالعافية ... التجربة بالنسبة ليا كانت بكل بساطة .. تجربة معفنة ...

قبل ما ما امشي رجعت تاني للكاونتر :

- معلش يا استاذ ميكي ماوس .... انا يمكن مش واخد علي النوعية دي من السندوتشات .. لكن علي الأقل الحلو .. ابقوا اعملوا حاجة تتمضغ ..

- الحلو ؟؟؟ السوبر بيج لارج بيرجر مينو سويمينج بوول مافيش فيه حلو اينكلوديد ..

- ازاي ما فيش فيه حلو ؟ .. اومال اللي في الكيس البلاستيك الأزرق ده يطلع ايه ..

- دي الماديلية الهدية يا افندم .... ( قالها بسخرية لا تخطأها أذن )

اخرج بسرعة من هذا السيرك .. و أركض جهة بيتي متمنيآ ان تكون حماتي مازالت هناك ....

[Scorpion]

للبيع لدواعي صدة نفس طارئة و بسعر مغري :

سندوتش هامبورجر شبه جديد ناقص منه قطمتين بس

كيس بطاطس محمرة بحالته

جردل كوكاكولا بجميع كمالياته ( شفاطة جديدة .. تلج مكعب)

الوسطاء يمتنعون

خصم 30% لأعضاء المحاورات

[Damo]

هههههه جامده اوي يا سكوب :blush2: . واضح ان مافاتنيش كتير فمصر

[redando]

فعلا الواحد بيعدي بمواقف زي دى كتير وهو عارف ان الموضوع بسيط جدا

لكن لما يدخل الموضوع في الجد الموقف بيتغير 180 درجة

[se_ Elsyed]

للبيع لدواعي صدة نفس طارئة و بسعر مغري :

سندوتش هامبورجر شبه جديد ناقص منه قطمتين بس

كيس بطاطس محمرة بحالته

جردل كوكاكولا بجميع كمالياته ( شفاطة جديدة .. تلج مكعب)

الوسطاء يمتنعون

خصم 30% لأعضاء المحاورات

استاذ سكوب

هي الصفقة دي لوكشه واحده ؟

ولا ممكن تبقى قطاعي

يعني لو عندي رغبه جاده في الدخول بقوة لشراء قرطاس البطاطس لأعلى سعر ... مونكن ؟

أصل بعيد عنك دي الحاجة الوحيدة اللي مضمونه دلوقت