في بيتنا رِوِشْ

[Damo]

هي كده خلاص خلصت؟؟؟! :sad:

[عبير يونس]

خرجت من البيت و انا اصفر لحن لليلي مراد .. و علي باب العمارة وجدت عم لمعي البواب .. و لدهشتي الشديدة أجد فمه مليء بالمسامير ...

- إيه ده يا عم لمعي ... إنت كمان عملت بيرسينج ؟؟

فيرد عليا بلهجته الصعيدية اللطيفة :

- بيرسينج ده يطلع إيييه يا أستاذ سكوربيون ... أنا بثبت صناديج البوسطة اللي كانت حتُجع ..

و يتناول مسمار من فمه و يبدا في الخبط ...

أبتعد مبتسمآ ساخرآ من نفسي ... و أتجه ناحية مراعي القطيع ... و من بعيد أجدهم يدخلون زرافات من تلك البوابة الزجاجية التي يعلوها وجه بلياتشو .... في اول إشارة ان هذا المكان يجب أن يتم تصنيفه كسيرك و ليس كمطعم ...

أتردد قليلآ ... ثم أبدأ في النظر حولي كأني علي وشك ان "أعمل عملة" ... استجمع شجاعتي و .. أدخل ...

أبحث عن موحة من بعيد لبعيد .. حتي أراه مع اصدقائه و هم يأكلون متبادلين الضحك و القفشات .... ابتسم في راحة .. و أقرر أن أخوض التجربة أنا أيضآ ... لنري ما هو هذا العالم الهامبورجري ...

اتجه الي الكاونتر .. لأجد ....

ميكي ماوس ...

آه والله ميكي ماوس ... بني آدم مسكين ملبسينه هدوم ميكي ماوس واقف بيبص لي ...

- أؤمر يا افندم

- ساندوتش هامبورجر .. قلتها ببساطة و تلقائية

- أنهي فيهم ؟؟ تسائل ميكي ماوس و هو يشاور فوقه علي لوحة اعلانات مليانة سندوتشات باشكال مختلفة ..

يا نهار كوبيا ... هي دي كمان فيها اصناف .... الواحد عند عم ابراهيم يقول له سندوتش فول يا عم ابراهيم .. يتحطله سندوتش فول معتبر من غير اعلانات و لا صور و لا الحركات دي ....

ارفع راسي و ابتدي "أتجول" بين صور السندوتشات ... لكن ده كله مكتوب بالأنجليزي !!!

اعمل حادي بادي و اللي شكله عجبني شوية أحاول اقرا اسمه و أقول له :

- أديني من فضلك واحد " سويشينج ويش" ...

و الا اٌقول لك .. واحد " بيج رويال دوبل ديلوكس" .. لأ .. بلاش ده .. شكلي بقاول علي تشطيب حمام شقة ...

اديلي البتاع ده اللي اسمه " تشيكن إن ذا كيتشن "

تشيكن ان ذا كيتشن ... مش دي يعني الفرخة في المطبخ .... بقت سندوتش دلوقتي ... ياللا ما علينا .. خلينا ناكل و نروح من هنا ...

- حضرتك عايز وان تشيكن ان ذا كيتشن ؟؟

يا دي النيلة انا ما صدقت ارسالي علي واحد منهم ... بيسألني ليه البني آدم ده .. أهه الواحد شك في السندوتش ده ... أنظر للمرة الأخيرة في لوحة الأعلانات بتركيز و أقرر القرار النهائي :

- أديني ده .. و اشاور علي سندوتش معين

يسألني بهدؤ

- حضرتك عايز سوبر بيج لارج بيرجر مينو سويمينج بوول ...

لا أتمالك نفسي و أسأله :

- هي مش كفاية عليا الحوسة حتزودها انت كمان ... ثم هو حضرتك مصري ؟

- طبعآ مصري و من بنها ....

- طب مادام انت مصري .. النبي عربي يا أخي ... ليه مصرين تخلوني اتكلم لغة ما بعرفهاش .... عالعموم اديني البتاع ده .. و ما تسألنيش أي سؤال تاني من فضلك

- هو سؤال واحد حضرتك .. الكوكاكولا بيج و الا سموول

- سموول من فضلك ... علي الأقل ديه فاهمينها ...

يملالي جردل كرتون و يديهولي ..

- أنا طلبت السموول

- ما هو ده السموول حضرتك ...

أهز رأسي مستسلمآ و أطلب أن يضيف يعض الثلج ... فيضيف قطعتين من الآيسبيرج الذي غرقت بسببه التيتانيك ..

أخيرآ وصل الطلب بتاعي ... حطهملي علي صينية .. دفعت و رحت قعدت في ركن بعيد .. لما نشوف السويمنج بوول ده ..

الصينية كان عليها الكوكاكولا .. كيس ورق فيه نص كيلو بطاطس محمرة ... و علبة من كرتون أصفر جواها الساندوتش .... تابوت فيه حاجة بيسموها سلطة و ملفوفة بسلوفان .. كيس تاني صغير شكله فيه حتة كيك او جاتوه ... شوية حاجات بلاستيك ... ما علينا ... انت مش طلبت المينو ... قابل بقي ...

اشرب بق من الجردل ... و اشم نفس طويل ..

أخيرآ حانت لحظة اللقاء فيس تو فيس مع الهامبورجر ...

لحد ما العلبة الصفرا دي مقفولة .. الساندوتش بيفضل نايم و ما فيش اي مشكلة ... لكن حاول بس انك تفتح العلبة ...أول ما يدخل جواها الأكسوجين.. تلاقي الساندوتش دبت فيه الحياة و ابتدي يتحرك ...

تحاول تقطم أول قطمة .. تتشششيياااف ... تلاقي الكاتشاب طرطش علي اي حاجة في مساحة قطرها 60 سنتي .. هدومك ... وشك ... صوابعك ... و غصب عنك حتلاقي الوشم اللي كنت بتتريق عليه من شوية ملطوع علي وشك شخصيآ في اقل من 5 ثواني .. بس لونه أحمر ... و لو كنت لابس نضارة ... مليون في الميه حتلاقي حتة خس اتحشرت في المفصلة بين دراع النضارة و العدسة ... ازاي ؟؟ .. ما تسألنيش ...

قطمة تانية .... بتشششااام ... حتة فلفل أصفر تطير من الساندوتش و تلزق في كتف الجاكيتة ... يعدي جنبك واحد يضربلك تعظيم و يقول لك : صباح الخير يا سيادة العقيد ...

تركن الساندوتش ... و تحود علي البطاطس ... لكن ما تفهمش ايه نوعية الزيت اللي ممكن تخللي البطاطس ديه لو حكيت اتنين في بعض يطلعوا شرارة ..

تركن البطاطس علي جنب .. و تتجه الي مرساك الأخير ... السلطة ... سلطة !! ديه حتة ورقة خس يتيمة ... تبص علي ورقة الخس ورا غلاف من السيلوفان ... هي كمان محطوطة في علبة مشفوط منها الأكسجين .. و تلاقيها يا حبة عين أمها .. هفتانة .. و صفراااا .... شبه مغمي عليها ... تبصلها .. تلاقيها بتبصلك بتوسل .. كأنها بتقول لك : أرجوك انقذني .. انا بمووووت ....

تطلع القلم الجاف من حيبك بسرعة .. و بسنه تعمل خرم في السيلوفان يدخل منه الأكسجين .. يمكن تلحقها ... لكن للأسف ...

توووو ليت .... ورقة الخس تنكمش للمرة الأخيرة و تزفر نفسها الأخير بين دراع ربع طماطاية ما كانتش باينة من الأول ...

تشعر بالأسي و تحني رأسك ... تهمهم بكلمات غير مفهومة جهة الطماطماية معزيآ اياها ....

ما فاضلش غير الحلو .. اهه برضه حتة كيك ... فضلت يا جماعة امضغ فيها نص ساعة .. لا عرفت امضغها و بلعتها بالعافية ... التجربة بالنسبة ليا كانت بكل بساطة .. تجربة معفنة ...

قبل ما ما امشي رجعت تاني للكاونتر :

- معلش يا استاذ ميكي ماوس .... انا يمكن مش واخد علي النوعية دي من السندوتشات .. لكن علي الأقل الحلو .. ابقوا اعملوا حاجة تتمضغ ..

- الحلو ؟؟؟ السوبر بيج لارج بيرجر مينو سويمينج بوول مافيش فيه حلو اينكلوديد ..

- ازاي ما فيش فيه حلو ؟ .. اومال اللي في الكيس البلاستيك الأزرق ده يطلع ايه ..

- دي الماديلية الهدية يا افندم .... ( قالها بسخرية لا تخطأها أذن )

اخرج بسرعة من هذا السيرك .. و أركض جهة بيتي متمنيآ ان تكون حماتي مازالت هناك ....

دي أول مداخلة أقرأها في الموضوع

و بجد أسلوب حضرتك ممتع جدا

و كوميدي من الدرجة الأولى

خسارة اني ما كنتش متابعة الموضوع من الأول

تحياتي

:sad:

[miramikhail]

:sad: :unsure:

بصرحة أناقعدت أضحك يأستاذ سكربيون و الحمد لله أنى أجازة و قاعده فى البيت هو صحيح أبنى كان نايم ورايا على الكنبة (عشان كنا بنظف الأوضة فخرجناه و هو نايم عشان الست تخلص فنام على الكنبة و من ساعتها ولا الساعة أربعة على ما يصحى ماهو روش زى اللى بتحكى علية مش قوى كده لكن 60% يعنى) صحى من النوم بيقول لى أنتى بتضحكى على أية- وطبعا ده أعجاز أنه يقوم ده عشان أصحية لازم أهزة و أنادى و ميضرش لو موضوع مستعجل شوية مية صغيرة كده.

ده ينفع مسلسل كوميدى أحسن ميت مرة من السات كوم اللى بزيعوهم.

المهم أحنا فى أنتظار باقى القصة أصل نصها تقريبا حاصل عندى ده مش بيشوف التليفزيون و يلعب على الكمبيوتر ده بسيطة لكن بيذاكر و مشغل أغانى على اليو تيوب و فاتح الشات كمان :blink:

أما مكادونلدز فحدث ولا حرج بس المواقف كلها مع بنتى لما يبقى ورانا درس و لسة نص ساعة و تقولى ماتيجى ناكل فى مكدونلز الحقيقة أنا بأخد الأبل باى سهلة الأكل و بنت حلال و هى بقى تطلب اللى يعجبها والغريبة تجيب السندوتش تخين و ماتعرفش بتكله أزاى و أنا جعانة أقول لها طيب أدين أطمة أدوق (يعنى أقول الموضوع سهل)و عينك ماتشوف الا النور كل اللى بتقول عليه و يذيد بقى بنتى أية ده كده طلعتى السندوتش من بعضة ووسختى الدنيا :lol:

[عنبو]

يلا يااستاذ سكوربيون

انزل بقى بالباقى

انا هقعد الناس فى اماكنهم وهاخد من كل واحد تمن التذكره

بس زى لما اتفقنا بالنص انا 90 % و10 % للمكان وانت تاخد دعوات الناس ليك ؟؟ ولا تحب نبدل ؟؟

يلا بقى الناس كلها متشوقين لمعرفة الاسرار الخفيه لحياة الروشين ؟؟

miramikhail مشاركة بتاريخ اليوم, 03:04 PM

بصرحة أناقعدت أضحك يأستاذ سكربيون و الحمد لله أنى أجازة و قاعده فى البيت هو صحيح أبنى كان نايم ورايا على الكنبة (عشان كنا بنظف الأوضة فخرجناه و هو نايم عشان الست تخلص فنام على الكنبة و من ساعتها ولا الساعة أربعة على ما يصحى ماهو روش زى اللى بتحكى علية مش قوى كده لكن 60% يعنى) صحى من النوم بيقول لى أنتى بتضحكى على أية- وطبعا ده أعجاز أنه يقوم ده عشان أصحية لازم أهزة و أنادى و ميضرش لو موضوع مستعجل شوية مية صغيرة كده.

ده ينفع مسلسل كوميدى أحسن ميت مرة من السات كوم اللى بزيعوهم.

المهم أحنا فى أنتظار باقى القصة أصل نصها تقريبا حاصل عندى ده مش بيشوف التليفزيون و يلعب على الكمبيوتر ده بسيطة لكن بيذاكر و مشغل أغانى على اليو تيوب و فاتح الشات كمان

أما مكادونلدز فحدث ولا حرج بس المواقف كلها مع بنتى لما يبقى ورانا درس و لسة نص ساعة و تقولى ماتيجى ناكل فى مكدونلز الحقيقة أنا بأخد الأبل باى سهلة الأكل و بنت حلال و هى بقى تطلب اللى يعجبها والغريبة تجيب السندوتش تخين و ماتعرفش بتكله أزاى و أنا جعانة أقول لها طيب أدين أطمة أدوق (يعنى أقول الموضوع سهل)و عينك ماتشوف الا النور كل اللى بتقول عليه و يذيد بقى بنتى أية ده كده طلعتى السندوتش من بعضة ووسختى الدنيا

الاخت ميرا تحيه طيبه وبعد

ياجماعه الروشنه دى ليها ناسها وبعدين اساساً دى موهبه من عند ربنا مش اى حد يبقى روش

تحياتى الكيميائى الروش سابقاً

المعلم محمد بتاع الكبده حالياً وربنا يديم المعروف

[أبو محمد]

أول مرة آخد بالى من الموضوع ده

قعدت افكر .. ليه ليه ليه ليه يا عين ؟

بس عرفت .. ده كان أيام ما كنت عامل عملية فى عينى

 

كده برضه يا سكوب ؟

تستغل فرصة إنى كنت قطة مغمضة وتنزل بموضوع من النوعية دى ؟

خليك فاكرها .. واحد فى الصندوق

:)

أسعد الله أيامك يا سنيور

[Grandma]

هايل يا أستاذ سكوربيون عندك مقدرة رائعة على الكتابة الساخرة و طولة نفس كمان 

بس حضرتك جيت اوي على ابن اختك ...يعني مش فاكر زمن الروشنة بتاعك لما كنتم بتقيسوا عرض شارلستون البنطلون بالمتر ؟!!

وسوالف الشعر العريضة اللي واكلة الخد كله و الشعر الواقف الطويل اللي لازم يكون زي زعافة التراب ؟!!

ووقفة الكورنيش لمغازلة الرايحة و الجاية ...يا عيني ابن اختك ما كانش بيشوف جارته الا من البلكونة و ياريتها عجباه 

[عادل أبوزيد]

موضوع " في بيتنا روش" يعتبر قطعة راقية من الادب الفكاهي الذي يتميز فيه الفاضل سكوربيون

ما سبق كان استهلالا لابد منه

تم البدأ في كتابة هذا الموضوع سنة ٢٠٠٩. و لسبب أو لآخر طغت مواضيع أخرى كثيرة على سطح محاورات المصريين ، و في الفترة القليلة الماضية كان عدد من الآباء و الأمهات يطلبون النصيحة لوجود روش في البيت