مخاوف وردود حول الهجرة الى كندا

[znaty]

اخي الفاضل زناتي

من غير عصبية

الموضوع ببساطة ان حركات التاريخ المنتظرة انا معنديش وقت انتظرها

فبكل بساطة ربنا يكرمنا ونسيبها وبراحتها مصر بقي

مش اموت انا والله يرحمني في انتظار شيء بعيد

قالها اخويا يعني اعيش واموت في عصر رمسيس الاول والثاني كفاية رمسيس واحد رمسيس التاني ده اشربوه هو الشلة بتاعته

مع العلم ان رمسيس الاول طيب وهنترحم عليه

بمنتهي الهدوء يا اون اون اهو

حلنعمل ايه يعني يا صاحبي ؟؟؟

بلدنا

هانصحي الصبح يعني نقول لولادنا

لا لا لا مصر كخة انتوا موش مصريين انتوا خلاص بقيتوا كنادوة ؟؟

لا

بردة بلدنا

حلوة وحشة بلدنا

بردة هانفضل مصريين

حتى لو سبتها هاتيجي هيا وراك علشان هاتفضل مصري

هو يعني اللي ضحوا بحياتهم علشانها من 30 سنة كانوا خدوا منها ايه والا كانوا عاشوا فيها ازاي

كانوا فقرا وغلابة وبسطاء وياما اتبهدلوا

بس كانوا بيعرفوا يحبوها

حب يخللي واحد يسد فتحة الرشاش بصدره علشان زمايله يعدوا

بطل زي دة عمر ماحد هايعرف اسمه ولا هو عاوز يتعرف

بس خلاص

بيحبوها زي ماهيا

وبيحبها باخلاص مهما عملت فيه

كندا يا صاحبي بالنسبة لي وسيلة

موش وطن تاني ينسيني وطني الحقيقي

وعلى فكرة

هاتروح تلاقي الصينيين والهنود وغيره وغيره

ولائهم الاول والاخير لبلادهم

علشان كدة هتلاقيهم مجموعات بتخاف على بعضها

مع ان لو تعرف مثلا الهنود عايشين ازي في كيرلا والا بومباي ؟؟

والصينيين مضهدين ازاي وعندهم قمع وفقر واستعباد في وسط العمالة

هاتستغرب اوي

يعني دول احسن مننا ؟؟؟

[znaty]

طيب

وهتتنفس ايه؟

وهتعيش فين؟

لو معاك عربية تعرف تعيش فى القاهرة؟

وقريب مش فى غيرها

ولو مش معاك

برضة الحياة صعبة

البقاء فى مصر على قيد الحياة أصبح بطولة

هو انت موش حطيت فرضية انك معاك فلوس ؟؟؟

خلاص يالا نحلم

المياة بلاش ياعم معدنية

هات ماية افيان مستوردة من فنلدنا بيشرابوها الممثلين

ركب فلتر مستورد طالما مشكلتك المياة

الهوا

اسكن يا سيدي في فيلا على النيل والا في التجمع

تسوق ليه مالسواق بيسوق المرسيدس ومكيفة

لا تقدر تعيش طالما معاك فلويس طبعا

بس لومامعاكش

خلاص تبقي على كندا يا حاج

[poulaemad]

طيب ما هو احنا كده رجعنا تانى من الاول

ان الى معاه فلوس ومش اى فلوس يعيش عيشه محترمه والباقى بقى يولع

ده هى الحياه الى انت عاوز تعيشها فى مصر

على فكره بقى انا زوجى شغال it فى شركه محترمه وانا مدرسه واولادى فى مدارس اجنبيه زى ما انت بتقول من الى مصاريفها قد كده ده يعنى من المفهوم الى انت بتتكلم منه ده يبقى مفيش داعى للهجره خالص

لكن السبب الاساسى للهجره مش دايما الفلوس

السبب هو مستقبل افضل للاولاد ده احنا حتى مش عارفين نأمن مستقبل لينا احنا فما بالك اولادك

ده حتى المدارس الاجنبيه ده مبقتش الافضل ولا حاجه و لازم تكون تحت اشراف وزاره التربيه والتعليم وطبعا ده كافى لتدميرها انا عوزاك بس تشوف المناهج الى الاولاد بيدرسوها دلوقت وكميه التعقيد وسياسه الكم مش الكيف ونلجأ بقى بعد كده للدروس الخصوصيه هى دايره مغلقه بنلف فيها وبنضحك على نفسنا ونقول طالما معانا فلوس يبقى نعيش عيشه محترمه

اما بقى الحياه فى كندا مش لالى ممعاهمش فلوس زى ما انت بتقول وبس لأ ده لأى حد من اول الزبالين لحد الدكاتره والمهندسين مثلا كله بيتعالج فى مستشفى واحده يغض النظر عن فلوسه او وظيفته

اما التعليم هناك فانت اكيد عارف عنه معلومات قد ايه الاولاد هناك بيحبوا الدراسه لانهم مش حاسين بالتعقيد الى هنا وقد ايه بينموا المواهب حتى ولو بسيطه بس بيحاولوا يدوروا على اى حاجه صغيره يبدئوا منها التشجيع للطفل

كل ده وتقولى الى معاه فلوس يعيش عيشه كويسه

الفلوس مش حتشترى الثقه فى المجتمع الى انت عايش فيه

وبعدين تقولى ميه معدنيه ليه هو انت مشربتش من نيلها!!!!!!!!!!!!!!!!!!!!!!!!!!!!!!!!!!!!!!!!!!!ا

[حسام يوسف]

تسلمي يا مدام بولا

بذمتك يا عم زناتى مجتمع مش بيعيش فيه الا الأغنياء

ومش أى أغنياء كمان

ده مجتمع؟

انا مش شيوعي

انا يساري معتدل

انما دي مش عيشة

وبخصوص الفيلا ومية الممثلين ماشي

طب والسواق بتاع حضرتك هيعمل ايه فى الاشارات والجراج الكبير اللى اسمه القاهرة؟

بلاش ده كله

بذمتك مانفسكش اولادك يتعلموا بشكل محترم بعيدا عن التعليم المصري العقيم؟

والله العظيم انا مهاجر اساسا عشان محمد ابنى

يتعلم كويس

ويعيش كويس

ويلاقي بلد ترعاه لو حصلتله حاجة

ومايلاقيش الظلم اللى بنشوفه

الله يسامحك يا عم زناتى قلبت علية المواجع

لو انك سخنتنى عشان اقوم اذاكر

ال فو اتيدييه بيان بور لانترفودي كيبيك

تم تعديل 10 أغسطس 2009 بواسطة حسام يوسف

[poulaemad]

تسلمي يا مدام بولا

بذمتك يا عم زناتى مجتمع مش بيعيش فيه الا الأغنياء

ومش أى أغنياء كمان

ده مجتمع؟

انا مش شيوعي

انا يساري معتدل

انما دي مش عيشة

وبخصوص الفيلا ومية الممثلين ماشي

طب والسواق بتاع حضرتك هيعمل ايه فى الاشارات والجراج الكبير اللى اسمه القاهرة؟

بلاش ده كله

بذمتك مانفسكش اولادك يتعلموا بشكل محترم بعيدا عن التعليم المصري العقيم؟

والله العظيم انا مهاجر اساسا عشان محمد ابنى

يتعلم كويس

ويعيش كويس

ويلاقي بلد ترعاه لو حصلتله حاجة

ومايلاقيش الظلم اللى بنشوفه

الله يسامحك يا عم زناتى قلبت علية المواجع

لو انك سخنتنى عشان اقوم اذاكر

ال فو اتيدييه بيان بور لانترفودي كيبيك

ربنا معاك يا دكتور حسام

ان شاء الله المقابله حتبقى سهله وتاخد الس اس كيو قريب

وبعدها تنضم لفريق الانتظار

وبالتوفيق

[حسام يوسف]

ربنا يخليكي يا مدام بولا

ويوفقك يارب

هة يا جماعة

محدش عنده اى مخاوف جديدة من كندا؟

[znaty]

ياااااااااااااااه

علطول كدة كندا كرهتكم في مصر للدرجة دي ونسيتم كل حاجة كويسة وكل ذكري حلوة ؟؟؟؟؟

اومال لما تروحو كندا هاتعملوا ايه ان شاء الله ؟؟؟؟؟؟؟

ايه يا مدام باولا؟

مين قاللك ان دة المجتمع اللي انا عاوز اعيش فيه؟

ماتقري اللي كتبته كويس الاول

انا قلت للاسف

انا موش مادي بس دي الحقيقة

موش راضي عن الوضع طبعا ولا حلمي بالطبقية دي ابدا بس

لو معايا فلوس اه هاعيش في بلدي

ولو ماعييش وموش هاقدر اوفر لهم الحياة دي يبقي معاك انك تدور على هجرة لغاية ماتحقق هدفك موش لغاية ماتغير جلدك؟؟

وبعدين مالهم ناسها ؟؟؟

ما انا وانتي وحسام واهلك واهلي واهله منها وهما دول ناسها؟؟؟

مستقبل افضل مستقبل افضل

يعني ايه مستقبل افضل طالما ان عندك فلوس تربي وتعلمي ولادك كويس في مصر بلدهم؟

يعني كندا اللي هاتديهم نوبل وهاتخليهم عباقرة ؟؟؟؟

وبعدين تعليم تعليم تعليم

الله ؟؟

طب مانا وانت وهيا بقينا مهندسين ودكاتره من تعليمها ان شاء الله؟؟؟

دة انا دورت على جامعة ويست ترونتو علشان اشوف المعادلة لقيت نص الاستاف دكاترة ومعيدين مصريين وكلهم في السي في خريجي القاهرة وعين شمس واسكندرية والمنصورة وغيره

الله؟

موش للدرجة دي يا اخوانا

اللي مالوش خير في بلده مالوش خير في حته

اومال البلد دي لو حاربت هاتسيبها وتقول انا كندي يا حسام ؟؟؟

وبعدين هو كل واحد موش عاجبه وطنه يا ناس يقوم الصبح يغيره ؟؟؟

يعني لو ابوك والا امك موش عاجبينك هاتغيرهم ؟؟؟

لو ماحترمتش بلدك (برغم كل عيوبها ومساوئها و و و و و و و و و و و و و و و و و و ) عمر ماحد بره هايحترمك

عموما ارجع واقول

بكرة تسافروا وتتغربوا ونتقابل بعدها :ninja:

وكلكم مسيركم لبلدكم وبكره الايام تثبتلكم

تمنياتي بالتوفيق للكل

[poulaemad]

باشمهندس زناتى

على فكره انا معاك مش ضدك اه مصر ده وطنى والبلد الى عشت فيه واتربيت فيها مش معنى انى حهاجر كندا ان شاء الله يعنى يبقى حنساها لأه

بس حضرتك بتنزل مصر اجازه لمده شهر شهرين بالكتير تزور اهلك واصحابك وبتشوف كل حاجه فيها وبتفتكرها وبتضحك لانها بالنسبه لك ذكريات واغانى تفكرك بالذكريات ده زى ما انت بتقول لكن للاسف لاتصلح تبقى حاضر او حتى مستقبل

بس اسمحلى انا مقلتش ان حضرتك مادى

بس الحياه فى مصر اصبحت للناس الى معاها فلوس وبس وبرده مش اى فلوس دون الاعتبار والاهتمام للباقى

وبعدين ارحع تانى واقول الفلوس مش حتشترى ثقه المجتمع الى انت عايش فيه واديك انت قلت اشرب ميه معدنيه او حتى اتعالج بره اشمعنه فى ده قلت بره مش جوه

للاسف المجتمع مبيتجزئش اخد الحلو الى فيه والوحش ابقى اجيبه من بره

يعنى ابسط حاجه موضوع العيش طبعا ابو شلن ده راحت عليه نيجى بقى لابو ربع جنيه الى خلاص حصل ابو شلن ويمكن اسوأ

تقدر تقولى اعمل ايه بقى اروح اجيب حد يعملى عيش مخصوص ولا اروح افتح لى فرن عيش ليى ولا ابعت اجيبه من بره برده ما هو انا معايا فلوس يبقى حعيش فى بلدى مرتاح ولا بلاها عيش واكل توست

مستقبل افضل ايوه مستقبل افضل مش بجائزه نوبل ولا بالعبقريه كفايه انه يطلع شخص سوى من غير عقد ولا كلاكيع يطلعها على الناس بعد كده وكفايه كمان انه حيقدر يعيش طفولته مش كل الى مطلوب منه انه يدلق على الكتاب يصم ويحفظ مش يفهم

التعليم التعليم الى انا وانت اتعلمناه يدوبك يمشينا هنا فى مصر لكن تروح اى بلد تانيهومش شرط اوروبيه ده حتى فى الخليج الى عندك برده يقعدوا يتشرطوا عليك ولازم تكون معاك شهادات وكورسات ولغه يقولك ابدأ من الصفر تقدر تقولى ايه السبب فى ده

ومع ذلك مش معنى كده ان انا مش بحترم بلدى ولا مبحبهاش لأه بس لمده الزياره والذكريات مش اكتر

[أحمد سيف]

بشمهندس زناتي ... اسمحلي اتفق مع حضرتك :ninja:

أنا شايف إن الواحد لازم يفكر بدل المره عشره قبل الإقدام على الهجره لو عنده واحد أو أكثر من الظروف التالية:

- سنه على مشارف الأربعينات أو معديها.

- وضعه المادي والأدبي في الخليج متميز ومستقر

- عنده أبناء داخلين على سن مراهقه

- ليس عنده استعداد للبدء من جديد سواء في عمل كاجوال أو في مذاكره وكفاح

- ليس أمامه خطة واضحة المعالم لمشوار الهجره

طبعا أنا لا أتمتع بأي من المميزات الوارده أعلاه وبالتالي داخل على موضوع الهجره بصدري ... وإن كان بتجيلي ساعات أفكار محبطه تخليني هاين عليا أسحب ملفي واخلص من التفكير والتخطيط والقلق

لكن برضه ممكن تمسك العصايه من النص وتخلي الباب موارب... امشي في موضوع الهجره ولما تاخذ الفيزا أجّل اللاندينج على أد ما تقدر وبعديها هيبقى معاك 3 سنين تحسب وتقرر براحتك ... ممكن بعدها تفكر انك تروح تقعدلك سنتين ولا ثلاثه في كندا فسح ودراسه وشغل لو لقيت لحد ما تجدد الإقامه أو تاخذ الجواز وبعديها ترجع الخليج... وممكن تلاقي الموضوع مش مستاهل وتنسى حكاية كندا خالص ويا دار ما دخلك شر ... ولو لاقدر الله ظروفك لطشت في السعوديه تطير على كندا وتستقر هناك الى أن يقضي الله أمرا كان مفعولا.

[MZohairy]

انا اعتقد ان اهم نتائج الهجره هي الاستثمار في الاولاد و تعليمهم و حصولهم على تعليم و جنسيه كنديه تسمح لهم بالمنافسه مستقبلا في هذا العالم الشرس

[Salwa]

انا اعتقد ان اهم نتائج الهجره هي الاستثمار في الاولاد و تعليمهم و حصولهم على تعليم و جنسيه كنديه تسمح لهم بالمنافسه مستقبلا في هذا العالم الشرس

بصراحة يعنى يااستاذ/ م.زهيرى .

كلامك ده انا موافقة عليه جدا جداااا.....وبحكم السنوات الطويلة والتجربة .....اؤكد لك انه سليم 100%.

وفى حالتى ممكن نلغى ..(( جنسية كندية ))...ومش شرط تكون اى جنسية اجنبية برضه ...عارف ليه ؟؟

بحكم نمو الابناء فى مكان به مساحة كبيرة من الحرية ..(( التى تحكمها انت او تحجمها من بعيد ..من وقت لآخر ...او توجهها للطريق الصحيح ...بكل حذر وعناية ..))

خلاص كدة بتكون شخصية الابن او الابنة .. اتكونت ...وبيطيروا فى الدنيا بجناحين ثابتين .

واحد فيهم العلم والمعرفة .....والتانى الثقة بالنفس والمبادئ .

مفيش حتى عشوائية فى التفكير ...واخد بالك ؟؟

ربنا يوفق الجميع .

ولا تنسوا ..

فى اى مكان على سطح الارض ....يجب مراعاة اى نبتة من اولها ...وخصوصا لو فى بيئة صالحة للنمو ....الصحى ...واول بأول ابعاد اى نباتات غريبة او متسلقة او دخيلة ..

بس....حبيت اشارككم واقول لكن ..

صباح الخير..

صباح الخير دايما ..

[mizozizo]

تسمحولي اعلق ع الموضوع

انا شايف اننا كلنا متفقين على حاجة واحدة وهي حب البلد

اللي لازم نوضحه ان هناك فرق شاسع بين مصر( الاهل والارض والاصحاب والذكريات ورائحة الزرع ودفئء المشاعر ... الخ) وبين

النظام الحاكم:( تعذيب وقتل ابرياء في اقسام الشرطه+ اعتقالات في الفجر لمن يثبت انه يصلي الفجر بانتظام مع عدد من الاصدقاء + رشاوي بالهبل في كافة المجالات مرورا بالشرطة وحتى القضاء + ضرائب على المواطن الفقير الكادح ولاشيء على الملياردير + احتكارات للسلع وجباية من الاشخاص واللي يكلم يخبط دماغه في الحيطة واذا كان عاجبك..الخ

اعلام مليء بنشر الانحلال والتفاهه المقصودة والتي يؤخذ عنها الجوائز.. ممثلات في قمة الفسق والفجور يفرد لهم الاعلام ما يريدون من الوقت لنشر رسالتهم!!!

مواصلات غير ادمية صحف عميلة ومتواطئة

تعليم احقر ما يكون ولابد ان تتعلم على حسابك دروس خصوصية من الحضانة وحتى الماجيستير والدكتوراة

منظومة علاج تجعل الشخص يدعو الله ان يعجل بنهاية حياته ولايرى ما سيحدث له في هذة المنظومة

منظومة امنية تجعلك تفكر في ان تحمل سلاح لان محدش بيحميك ولا ح يلحقك ولا ح يجيب حقك

هذا هو ما لا يستطيع البشر ان يتحمله لانه ضد فطرة الانسان بغض النظر عن ديانته وعقيدته

اي ان لو في مصر المسلمين واليهود والهندوس والبهائين والبوذيين .. الخ لفكروا ان يتركوا البلد.. لان هذه البلد يتحكم بها اشخاص ليست لهم مرجعية دينيه ترحم هؤلاء الاسرى اللي هم اسمهم مجزا موطنون

لك الله يا مصر

[حسام يوسف]

أتمنى أن يعود الموضوع لمساره حيث المخاوف من الهجرة والرود والحلول لها بعيدا عن التعليقات عن عدم الانتماء للوطن

وللجميع تحياتى :ninja:

تم تعديل 11 أغسطس 2009 بواسطة حسام يوسف

[znaty]

[مدام باولا

والله مفهوم حب الوطن دة كبير اوي واكبر من الذكريات والزيارة والاغاني بكتير

انا عموما بارجع من الاجازة موش طايق الفساد والاستغلال وقلة الذمم والضمائر والحالة اللي بقت فيها بلدي

بس لما ارجع واحن ليها

اقول لنفسي

بردة بحبها ..حتى لو بقت ايه ..بردة بحبها

وواضح انه صعب اوي انقلك احساسي هنا

دي حاجة بتتولد جوه الانسان من وهو صغير

وعلى فكرة

كلنا اتولدنا واتربينا في مصر

والحمد لله

ولا شايفنا معقدين والا مكلكعين وشباب زي الفل وماليين مراكزنا والخليج اللي انتي بتتكلمي عنه دة من غيرنا اقسم بعرش الله والا هايروح والا هاييجي والحياة هاتوقف فية فورا

واحسن ناس في الجامعات ومراكز الابحاث بره للمرة التانية بقولك بردة متخرجين من مصر

والله عمري ماشفت صومالي والا سوداني بيكره بلده مع ان بلدة عبارة عن حتتة صحرا ولا يفها اكتر من كدة ولا عمرها قدمتله اي حاجة اصلا

اه من حقك تدور على مكان افضل بس عمرك ماتدور على وطن وهوية تانية ابدا

عموما

انا اللي نفسي اعرفة

هو من شروط الهجرة لكندا ان اكره مصر الاول علشان اتقبل ؟

اصل لو الشرط دي موجود

يبقي ملعون كندا موش عاوزها ولا عاوز اخطيها

وبكرة تسيبيها وتسافري ان شاء الله

وتعرفي انا كنت باتكلم عن ايه

حتى لو رحتي جنة الله في الارض

اخي احمد سيف المحبوب دائما :ninja:

اوجزت فانجزت كعادتك دائما

[znaty]

أتمنى أن يعود الموضوع لمساره حيث المخاوف من الهجرة والرود والحلول لها بعيدا عن التعليقات عن عدم الانتماء للوطن

وللجميع تحياتى :ninja:

والله عندك حق

اللي عاوز يحب يحب واللي موش عاوز هو حر

انا دماغي باظت من الكلام دة

وطول الليل عمال احلم باناشيد وطنية :lol: :lol:

انا اسف يا مدام باولا لو اتعصبت شوية

انتي عارفة داخلين على اكتوبر والواحد سخن حبتين

يالا بينا نكمل خوف من الهجرة :lol:

[qenawy]

خايف من عيال الجيران

اطفالي بحكم انهم يحملو الباسبور الصعيدي

قافشين علي طول

تفتكر ولاد الجيران هيستحملوا الاربع غرز اللي ابني غاوي يديهم في المشاكل

[znaty]

خايف من عيال الجيران

اطفالي بحكم انهم يحملو الباسبور الصعيدي

قافشين علي طول

تفتكر ولاد الجيران هيستحملوا الاربع غرز اللي ابني غاوي يديهم في المشاكل

:ninja: :lol:

سبب وجيه برده للخوف :lol:

هيا دي العيال والله يا خللو

والله لننيمك من المغرب يا كندا

[somayasaleh]

انا اعتقد ان اهم نتائج الهجره هي الاستثمار في الاولاد و تعليمهم و حصولهم على تعليم و جنسيه كنديه تسمح لهم بالمنافسه مستقبلا في هذا العالم الشرس

الله ينور عليك يا استاذ زوهيري

هي ده يا سادة خلاصة الموضوع

احنا كل مخاوفنا من الهجرة بتزول لما نعرف ان التضحيات ده علشان اولادنا يعيشوا افضل منا

انا بالنسبة لي اخذت موضوع الهجرة ده بعد تفكير عميق وطويل ومخاوف ليس لها اول من اخر

المخاوف الاصلية مش الشغل او التاقلم مع البيئة هناك او عمل الفلوس........لكن كل مخاوفي علي الاولاد؟؟؟؟؟؟

الانفتاح الرهيب اللي هناك هو اللي مخوفني عليهم.....لكن كل ما افتكر اني بهاجر علشانهم اشعر ببعض الراحة

وادعو واستخير الله كثيرا ان قرارنا في الهجرة فعلا يكون في مصلحتهم وليس العكس

[znaty]

والله يا باشمهنسة سمية

الانحلال في مصر وفي كندا

يعني اللي عاوز يبوظ في مصر موش هايبوظ ؟

ماكل حاجة بقت متاحه خلاص

المهم هو التربية

تعرفيهم وتربيهم دايما على الحلال والحرام

وتعرفيهم يعني ايه الخجل من ربنا لو اذنبت

وتعرفيهم ان موش كل حاجة في كندا صح

احنا نفرق عنهم وعندنا اصول وعيب

مع المتابعة دائما والتحقق من التربية الدينية السليمة والمحافظة على الصلاة في المسجد مع جماعة المسلمين ومراقبة اي تغير يظهر عليهم في طباعهم وطريقة تفكيرهم

وقبل كدة الاستعانة بالله

واختاري المدرسة كويس

وربنا هايكرمك فيهم باذن الله

[حسام يوسف]

انا اعتقد ان اهم نتائج الهجره هي الاستثمار في الاولاد و تعليمهم و حصولهم على تعليم و جنسيه كنديه تسمح لهم بالمنافسه مستقبلا في هذا العالم الشرس

الله ينور عليك يا استاذ زوهيري

هي ده يا سادة خلاصة الموضوع

احنا كل مخاوفنا من الهجرة بتزول لما نعرف ان التضحيات ده علشان اولادنا يعيشوا افضل منا

انا بالنسبة لي اخذت موضوع الهجرة ده بعد تفكير عميق وطويل ومخاوف ليس لها اول من اخر

المخاوف الاصلية مش الشغل او التاقلم مع البيئة هناك او عمل الفلوس........لكن كل مخاوفي علي الاولاد؟؟؟؟؟؟

الانفتاح الرهيب اللي هناك هو اللي مخوفني عليهم.....لكن كل ما افتكر اني بهاجر علشانهم اشعر ببعض الراحة

وادعو واستخير الله كثيرا ان قرارنا في الهجرة فعلا يكون في مصلحتهم وليس العكس

والله يا باشمهندسة سمية انا معاكى تماما فى خوفك ده

لدرجة انى بفكر ان فى السن الحرجة للابن من 12 الى21

ارجع مصر

بس ارجع وأقول ان الفساد موجود فى كل مكان

صحرا ان كان او بستان

ربنا يستر