ذكريات رمضانية

[se_ Elsyed]

تم بحمد الله إفتتاح توبيك " ذكريات رمضانية " لصاحبة الحاج س س وولده أبو سريع ، وعايزين من الاخوة الاعضاء يحكولنا ذكرياتهم في رمضان خاصة زمان وهل إختلف رمضان زمان عن دلوقت ؟ وكيف كانت اهم مظاهر الإحتفالات الرمضانية ؟

- انا بأعتذر عن عدم المشاركة لظروف خاصة ، واحب اوضح ظروف خاصة دي علشان ماحدش عقلوا الباطن يروح كده ولا كده ، الظروف هي ان الهلال مخاصمنا وماظهرش عندنا النهاردة .

يالله نقول بسم الله ... هاتولي الصايم الأولاني من التلاجة ....

[فــيــروز]

اييييييييه بقى

سيبونى عاوزه اقعد فى التلاجه املى نظرى بالاكل و العصير لحد المغرب

كل ده عشان س.س. لسه مش صايم ومعندهمش هلال :)

أه يا عالم يا قلالاة الهلال -اوعى حد يزعل انا باهزر والله- مش عاوزه ابتدى رمضان بعركه :P

المهم .. اكثر ذكريات رمضان تميزا بالنسبه لى هى ايام التشرد و اللعب فى الشارع :o

ايوه الحقيقه انا كنت من العيال المتشردين اللى بيلعبوا فى الشارع و يركبوا عجل و كده يعنى مش هاخبى عليكم :)

كنا نجتمع كلنا انا و اقاربى الاعزاء و الاصدقاء من الجيران اما فى بيتنا او فى بيت جدتى و ننطلق على غير هدى :P

ماكانش لنا هدف محدد فى الغالب المهم نكون سوا -على راى الراحله سعاد حسنى- وكله على الله .. ;)

يمكن دلوقت باحس ان كان هدفنا نبعد عن البيت و خلاص :wub: عشان محدش يقول اطلعوا اتسحروا او كلوا ..

وحتى اما كان الوقت يتاخر و نبطل لف بالعجل بقى نرجع نقعد تحت البيت و نتكلم نتكلم نتكلم .. مش مهم فى ايه المهم بنتكلم و خلاص ..

كانت ايام جميله اوى .. من كتر جمالها باحس دلوقت اما افتكرها انها كانت مجرد حلم بس ومش ممكن اكون عشت ايام جميله بالشكل ده :(

الايام دى كنت باحس ان فيها نور من عند ربنا .. كانت دايما الايام منوره و سعيده .. يا خساره :(

[Handicraft]

وحوى يا وحوى ............... ايوحه ... رحت يا شعبان ... ايوحه ... جيت يا رمضان

الله يجازيك يا س س فكرتنى بأيام زمان

يا سيدى من الذكريان اللى مش ممكن أنساها فى رمضان ايام زمان

.

.

.

.

كنا زمان بنتسحر قبل الفجر ونفطر بعد المغرب .... ياااااااه صحيح الأيام بتجرى

[فــيــروز]

انا جيت تانى

من اجمل الحاجات التى لا تنسى فى رمضان الزينه :wub:

شارعنا ماكانش من الشوارع اللى بيعلقوا فيها زينه :(

والحقيقه الموضوع ده كان بيضايقنى جدا لان الشوارع التانيه يمكن عشان كانت اصغر كان يبقى فيها زينه و فانوس فى النص وكان ده بيدى احساس طاغى بالدفء و السعاده :P

المهم فى يوم من الايام و عشان احنا كنا جيل الطلائع اللى طالعين فيها عالفاضى قررنا انا وبنت جارتنا نعمل زينه !! :)

المشكله اننا ماكناش ساكنين قصاد بعض كما يفترض اما نيجى نمد زينه !! لا هى كانت ساكنه فى العماره اللى جنبى ;)

وكمان هى ساكنه فى الرابع وانا فى الاول .. يعنى مفيش اى محل للتفكير فى اى زينه ممكن تقام بيننا :o :o

بس ولو .. من امتى التوافه ددى توقف المشروعات العظيمه !! قلنا هنبنى وآدى احنا بنينا السد العالى :D

الاجمل من كل ده اننا قررنا مانشتريش زينه جاهزه .. هى ماكانتش منتشره اوى الجاهزه سنتها فاشترينا جلاد كتير و سهرت طول الليل اقص الورق على شكل هلال و نجوم .. وبعد القص الزق الورق على الحبل وهكذا .. كنت سعيده جدا رغم ان البيت اتملى ورق :P

تانى يوم الصبح بقى كانت المعضله هنركب الزينه فى بعضيها !! توصلنا بقى اننا هنوقف اختى فى بلكونتنا تنزل الزينه بتاعتنا .. و صاحبتى تنزل الزينه من بلكونتها وانا اقف تحت اربط دول فى دول و بعد كده كل واحد يشد الحبل و يربطه عنده .. وقد كان .. كان بالنسبه لى الموضوع ده ولا بنا الهرم الاكبر :o :) حتى فضلنا سايبين الزينه لبعد رمضان من كتر اعتزازنا بيها .. السنه اللى وراها جبنا زينه جاهزه بس مافرحتش بيها زى الزينه دى .. هييييه ايام

[se_ Elsyed]

- من ذكرياتي الرمضانية إني مش فاكر أي حاجة عن رمضان قبل خمسة إبتدائي مش عارف ليه ... وشكلي كده طبعاً ماكنتش بأصوم ...

- وذكريات الطفولة الرمضانية دائماً ما تكون مرتبطة معي بلعب كرة القدم حتى الإفطار .. وساعة الإفطار التجمع العائلي حول الطعام والإستماع والإستمتاع بقرآن ما قبل المدفع - يا عيني على صوت محمد رفعت الملائكي - ومن بعدها برامج الراديو اللذيذة ولم يكن للتليفزيون هذه البهجة الموجود حالياً ولكن كان الراديو هو الذي يجتذب قاعدة عريضة من المستمعين ...

- ومن بعد الإفطار والذي منه نذهب لصلاة العشاء وطبعاً ماكنتش لسه متعود على التراويح في هذه السن المبكرة ، ومن بعد العشاء لعب أستغماية وكره قدم وفيه لعبة أسمها المنديل كانت جميلة قوي ... يــــــاه أيام

- ويرتبط رمضان الطفولة أيضاً بسلطنية الطرشي وأنت رايح وشايلها على دماغك لحد معمل الطرشي وممكن تضربلك بؤين مية طرشي في الخباثة من غير ماحد ياخد باله ... ولا الوقفة قدام بتاع الكنافة اللي بيبقى قدامه أمم .... والسحور اللي غالباً ما يكون فول وزبادي وجبنة ....

- اما شارعنا في رمضان فكان مثال للتعاون - خلال رمضان فقط بعد رمضان بنرجع نمسك في شعر بعض - فكل شقة لازم تدفع المعلوم وبعد مانجمع الفلوس بنتفق مع كهربائي يوصل لنا سلك نور من اول الشارع لآخره ونتخانق مع بعض على مين هايكون له شرف ان النور يتوصل من عنده ... ونتجمع نحن الصغار ومعانا الجلاد الملون بتاع فيروز ونقطع فيه ونجيب كيس نشا ونعمله بميه على النار ونلزق بيه الزينة وطبعاً مع الفانوس الخشب الملون .... مما كان يعطى للشارع منظر وشكل رائع .

يتبع ...........

[فــيــروز]

وممكن تضربلك بؤين مية طرشي في الخباثة من غير ماحد ياخد باله .

سمعت ان مية الطرشى زيها زى الشاى :unsure: مش بتفطر :lol:

:D :lol: :lol:

[الأفوكاتو]

أرجوا من عشاق السحور المكون من الفول و الطعمية و السلطة الطحينية, و السلطة الخضراء, و الطرشى, أن يزوروا مطعم " الجحش" بالسيدة زينب, و يسلموا عليه و على طاقم المطعم الظرفاء.

توجد هنا مطاعم لمثل هذه النوعية من الطعام, و لكن لا توجد محلات يديرها " جحش" فأغلبها يديرها" حمار"

تم تعديل 27 أكتوبر 2003 بواسطة الأفوكاتو

[Scorpion]

أولآ..... أرق الأمنيات لجميع الأخوة المسلمين بشهر رمضان الكريم... ربنا يجعل في قدمه علينا عودة الحب و الوفاق في الدنيا كلها....

هييييييييييييييييه يا سي السيد.. ذكريات رمضان معايا ترجع لأيام الطفولة.. كان الشهر اللي بستناه علشان الوالد كان بيسمحلي فيه اخرج العب مع الولاد في الشارع.... و كان جدي الله يرحمه هو اللي بيشتريلي الفانوس.. بتاع زمان .. صفيح و أزازملون و شمعة...و نلف و نلف و وحوي يا وحوي... و البيوت كلها كانت مفتوحة علي بعض... الجيران... و أولاد الجيران... شارع كامل بكل أهله.. مسلمين و مسيحيين... حتي الزعلانين مع بعض كانوا بيبقوا عيلة واحدة... الكنافة بالزبيب... و القطايف.... و كنا بنعمل حلوي الجزر بدل قمر الدين علشان كان غالي.. و لغاية دلوقتي الوصفة بتاعت الجزر ديه بعملها هنا في أيطاليا...

الشارع كله منور... و الفانوس الكبير في النص... أختي تلعب الحجلة مع صاحباتها.. و أحنا نلعب نقرة و شبر بنوي المشمش.. أو تريك تراك... و فوازير الثلاثي... سمير و جورج و الضيف... و الضحكة كانت من القلب....

كبرت.. و الدنيا أبتدت تتغير... بس رمضان عمره ما تغير... سبت القاهرة و رحت عشت في أسوان 3 سنين.. احلي سنين عمري... و هناك رمضان له طعم تاني.. بسيط..هادي... النوبيين... و أهل أسوان الطيبين.. عمري ما هنسي أسامة.. الحاج حمادة .. طارق العديسي.. كانوا أهلي.. لقيت نفسي في وسطهم بصوم لوحدي.. في الأول عشان كنت مكسوف اني اكون الوحيد الفاطر في وسطهم.. لكن مع الوقت بقي شيء أساسي.. مافهوش أي تضحية من ناحيتي.. و ساعات الدور ييجي عليّ في تحضير الفطار للشلة...و ده بيكون يوم أغبر عالكل...علشان انا ماليش في الطبخ... يعني.. التمر المنقوع في اللبن كنت شاطر قوي فيه.... بس لما حاولت مره أعمل محشي كرنب.. أضطريت ألف كل صباع محشي بفتلة ( ما كنتش عارف اني لازم أسلق ورق الكرنب اول )... أو لما عملت لوبيا ناشفة.. ماكنتش عارف أني لازم أنقعها في المية الأول.. و فضلت ميتها تغلي و تتبخر...تغلي و تتبخر ييجي 5 مرات.. و كل مرة أحط ملح من جديد.. و أسيبلكم تخيل وش الولاد كان ايه بعد ما أكلوا أول لقمة...النهاية.. حتي البط بتاع جارتي هناك رفض ياكل اللوبيا ديه...

تصدقوا بالله.. انا عيني ابتدت ترغرغ و انا بفتكر الأيام ديه...

كل سنة و احنا كلنا طيبين....و كل سنة و انتي طيبة يا شعنونة مطرح ما انتي موجودة دلوقتي.. مش عارف ليه نطيتي في تفكيري و انا بتكلم عن اسوان

تم تعديل 29 أكتوبر 2003 بواسطة Scorpion

[freefreer]

المعلم س س .. الف مبروك التوبيك .. عقبال الملك .. فرحنالك و الله .. و معاليكم ممكن تشوف الهلال لو بصيت من الشباك أو البلاكونه .. هاهاهاهاها

كل الذكرايات جميله .. سواء ذكرايات فيروز او سكوربيون او المعلم الكبير .. او باقى الذكرايات ..

مش عارف ليه ارتبط رمضان بالنسبة لى .. ب "قمر الدين" ارتباط جوهرى .. و ايام الله ي....ر...ح.....م.....ة (علشان خاطر رمضان فقط) جمال عبد الناصر .. و زى ما كان هناك ازمات مستمرة فى كل شيئ .. كان هناك ازمات فى ياميش رمضان و قمر الدين .. و كنا نقضى ايام طويلة من غير قمر الدين و انا حزين .. لحد ما يوصل لنا (وصاية) .. يعنى نكون موصيين حد مسافر يجيب لنا معاه و هو راجع ..

و ارتبط ايضا رمضان بالزينة اللى بتقول عليها فيروز .. بس للأسف شارعنا عريض جدا .. و لا يمكن ان يصلح فيه مثل هذا الأمر .. فكنت استمتع بمشاهدتها فى الشوارع و الأحياء المجاورة ..

و من الذكرايات الهامة للعواجيز برامج الإذاعة اللى كانت ملعلة فى كل رمضان .. و من ينسى تحلق كل الناس على "الف ليلة و ليلة" و صوت الفنانة زوزو نبيل ..

ثم جاءت فوازير الثلاثى لتصبح علامة فارقة وايذانا بعصر الفوازير التى تطورت و اصبحت كلها رقص و فساتين و الون و اصبحت كلها شبه بعضها البعض

الطرشى البلدى – العرق سوس – الزبادى – الفول (مسمار البطن) .. هاهاهاهاه من علامات الشهر الفضيل ..

المدفع – الآذان – الشيخ محمد رفعت – صلاة التراويح – ختم القران .. ايضا من اهم علامات و ذكريات ماضى و حاضر رمضان ..

و كل عام و انتم بخير ..

[متفائل]

شكرا يا س س على أنك فتحت الموضوع ده خليت الناس تكلم عن زكريات كلنا عشناها ورجعتنا لأيام جميلة

التشرد في الشوارع على رأي فيزرو smk:

لعب الكورة لغاية مدفع الفطار

بتوع الكنافة والقطايف على الفرن الطوب والمدهو أبيض

صوت قراءة الشيح رفعت للقرآن الكريم والادان

الصحور كان له طعم تاني خالص يا جماعة مش عارف ليية الفول بالمون و الزبادي و الجبنة الأريش ....كل حاجة كل حاجة

الف ليلة وليلة على رأي فري فرير

اسكوبيون كتب

أختي تلعب الحجلة مع صاحباتها.. و أحنا نلعب نقرة و شبر بنوي المشمش.. أو تريك تراك

خسارة أن الألعاب دي أنقرضت

أنا متأكد أنك لو سألت أي حد من الجيل الجديد عنها محدش هيعرف حاجة

سكروبين أتأثرت أوي بكلامك

وفكرتني بست كبيرة في الشارع بتاعنا مسيحية أسمها أم سمير (الله يرحمها)

كل الناس بتحبها وكانت هادية أوي وطيبة وكان الناس ديما تعدي عليها تسألها لو عاوزة حاجة من البقالة أو السوق حتي تخيل كان الشباب الملتحين لطاف معاها وبيسلمو عليها لو لقوها واقفة في الشباك بتاع شقتها وكان ديما معاها بنبوني تديلنا منه

[سقراط المصري]

المعلم سقراط بيدحرج المسى للمعلم س السيد وولده ، وبيقوله متنساناش في كيلو لحمه من دبيحة العيد لو كنت هتدبح ، او صاج كحك مشكل..........وكله سلف ودين.

ازايكم ياجماعه ، الله ينعل ابو الغربه اللي مخليه الواحد بعيد عن مصر الايام المفترجه دي.

ماعلينا نتدخل على المفيد.

زكرياتي في رمضان لاتقل عن ما ذكرتموه يعنى الورق والزينه بس كنا بنعمله بالنشا ومش عارف هل كان الصح بالنشا ولا المفروض نستخدم ماده تانيه.

اجمل حاجه في رمضان بالنسبه لى وانا طفل هو ليلة القدر ، ليه بقى ، لان في الليله دي كان فيه اختراع عجيب ومزهل يدخل بيتنا يوم واحد في السنه وبالتحديد لبلة القدر .

ماهو هذا الاختراع ، الاختراع هو مسحوق بني اللون زو رائحه ذكيه ومنعشه يشربه الناس ليكونوا مفتحين وفايقين ، كان والدي- الله يمسيه بالخير- يحضر هذا المسحوق يوم واحد في السنه لمنزلنا ويشرب منه هو ووالدتي وكأنه احد الاسرار الحربيه الذي يظهر يوم واحد في العام ، وكان مسموح لي فقط ان اخذ شفطه واحده فقط سنوياً ، وكنت انتظر رمضان من السته للسنه عشان الشفطه دي ، ولما كبرت واتعلمت واتنورت ، وبحثت عن اسم لهذا المسحوق البني اللون وجد ان اسمه العلمي................................القهوه

يمكن تضحكوا عليا بس هو ده اهم حدث لي في رمضان .....انتظار شفطه من فنجان القهوه.

والغريبه انني لم اعرف القهوة فعلياً او اصبحت متعود عليها الا عندما اتمت ثلاثون عاما.

ممكن تكون دي عقده في بسبب ان والدي كان يحيط فنجان القهوه ليلة القدر بهاله عريبه من الاهميه، وكان يحذرني من ايه اللي ممكن يحصلي لو اخذت شفطتين في السنه.

(شكل واحد معقد وعنده عقده القهوه).

...

واتذكر ايضاً لما امي كانت بتعودني على الصيام وتقوم الصبح وتفطرني وانا ارفض واقولها انا صايم يا ماما ، فتقولي لا اكل الصبح مبيفطرك وهتفضل برضه صايم.

وساعة العصاري اكون لابد جنبها في المطبخ واقولها ببراءه:

هو انا لو دوقت الخشاف افطر ، ترد وتقولي لا ياحبيبي الدوقان يفطر لكن لو كلته كله هتفضل صايم ، هب على طول اكل كبايه خشاف بحالها عشان افضل صايم وما افطرش.

اما اليوم الذي لا انساه فهو اول يوم بحق وحقيقي اصوم وكان في الصيف ، كنت حاسس ساعتها اني هموت خلاص ، وماكنتش عارف احمرء كده ولاكده.

اجمل احساس جالي في رمضان كان بعد الزواج وانا داخل على ام العيال زي السبع ومعايا كيس المخلل والتمرهندي والعرقسوس. ههههههههههههههههههههههههههههههههه

ماكنتش بعرف العب كره قدم للاسف بس كنت بتفرج (حتى كرة القدم الواحد خايب فيها)، ولو عايزين ابرهن لكم على معلوماتي الكرويه العميقه والغزيره هقول انني لما كنت اشوف الماتشات في التليفزيون كنت بسمع جمله بتتكرر كتير وهي ( الدفنس صد الهجمه) ولعند ثانوي كنت معتقد ان الدفنس ده اسمع لاعيب كره ، بس مكنتش اعرف شكله ، والغريبه ان الدفنس ده كان في كل الماتشات تقريباً، حتى اعتقدت انه لاعيب عالمي بيلعب في كل الماتشات ومع كل الانديه المصريه، وبعدين مره كنا واحنا طلبه في ثانوي وتقريبا كان فيه ماتش اهلى وزمالك والطلبه بتتكلم عنه ، وانا قاعد زي الحمار في الزفه ، المهم حبيت اثبت وجودي واحيطهم علماً بمعلوماتي الكرويه الغزيره ، فقلت : والله الواد الدفنس دا بطل دا كان اول امبارح لسه صادد هجمه في ماتش الترسانه والغريبه انه لعب الشوط الاول مع الزمالك وصد هجمه للاهلي وبين الشوطين غير فانلته ولعب مع الاهلي وصد هجمه للزمالك ، حقيقي واد لعيب مش كده ولا ايه ياجماعه.

ولكم ان تتخيلوا رد الفعل اللي حدث .

ومن يومها وانا لا افتح بقي بتاتا عن الكوره ، حتى بطلت اتفرج عليها خالص.

بس ارجع واقول لكم الواد الدفنس دا واد لعيب بصحيح.

تحياتي

سقراط

[فــيــروز]

الحقيقه يا جماعه رمضان اجمل بذكرياتكم smk: مش عارفه ليه حسيت انى عشت ذكريات كل واحد شارك فى الموضوع و استمتعت بيها زيه تمام .. ربنا يجمعنا مع بعض دايما ..

[متفائل]

فقلت : والله الواد الدفنس دا بطل دا كان اول امبارح لسه صادد هجمه في ماتش الترسانه والغريبه انه لعب الشوط الاول مع الزمالك وصد هجمه للاهلي وبين الشوطين غير فانلته ولعب مع الاهلي وصد هجمه للزمالك ، حقيقي واد لعيب مش كده ولا ايه ياجماعه.

موتني من الضحك يا سقراط

مش ممكن والله إحنا لسة شعب زي العسل smk:

على فكرة على ذكر ليلة القدر كان لينا جارة طيبة مكنش عندها ولاد كنا بنروح لها واحنا صغيرين نقعد معها

كنت مرة عندها وأعدين في البلاكونة وقالت اليلادي ليلة القدر وأبواب السماء مفتوحة لو لقيت السما نورت وأتفتح فيه كده حاجة بيضا تبقي دي طاقة القدر والي يدعي بأي حاجة تتحقق

المهم أعدت أبص على السما

والله الغريبة أني لقيت فعلا حاجة بيضة متوهجة أكن السما أتفتحت فعلا أعدت أدعي أدعي

وألتلها طقة القدر أتفتحت أهه وكنت معتقد تماما أن طاقة القدر أتفتحتلي وبقيت مبسوط أوي

بس مش فاكر كنت بدعي بإيه

معلش عيال بأة smk: smk:

تم تعديل 30 أكتوبر 2003 بواسطة متفائل

[فــيــروز]

انا كمان موضوع الواد الدفنس اللعيب ده عجبنى جدا smk: حتى فضلت احكيه لصحابى و نضحك

اما بقى موضوع القهوه مش عاوزه اقول لكم انى قربت من الشاشه اوى كانى هاسمع سر خطير smk: و كنت هاموت و اعرف ايه المشروب الساحر ده :lol: ومش هانكر انى اما عرفت انه القهوه اتكبست شويه smk: اصلى مش من هواتها يعنى بس ذكريات لذيذه بردو :lol:

[sos]

دكتور سقراط مزاجك كان عالى اوى فى المداخلة ده

انما كان ايه سبب القهوة فى ليلة القدر smk: smk: smk:

[بنت شعنونة]

مش ها اتكلم عن ذكريات

ها اتكلم عن رمضان دا :angry:

عندنا النبطشيات بتبقى من 5-12 بالليل دا احد المواعيد يعني

والمغرب في ليبيا ييييييييييه قصدي مطروح بيدن على 5 ونص

ف تلاقي الساعا 5 و ربع زميل لنا مسيحي اسمه ميشو بينزل يطلع النبطشي ويقعد مكانه لحد ما يفطر ويروح يطلع هوا بعد كدا

مع انه ميشو بيكون صايم طول اليوم زينا تمااااام

بجد حركة جدععععة جدااااا

واوقات عمرو ينزل يسبق ميشو ويتخانق معاه عشان يطلع هوا يفطر وبعدين ينزل

بجد بجد

بتبقى لحظة سكرررر جدا والكل بيتخانق مع الكل عشان يخليه يطلع يفطر

حتى الممرضات بجوا ياكلوني بالعافية لما اكون انا النبطشة

لمت البنات في السكن حلوة

بس عمرها ما هاتكون زي قعدتي مع بابا وا اخواتي الل واحشني موووووت :(

[yasovinas]

كلماتك وذكرياتكم كلها رائعه وكلنا عشناها من زمان بس للايف اولادنا مش بيعيشوها دلوقت

اتغيرت الدنيا حتى رمضان اتغير وطعمه اتغير

انا فاكر زمان كنا نلعب في الشارع لغاية الفطار مع الحفاظ على مواعيد الصلاه في المسجد طول رمضان ومن بعد التراويح للفجر نسهر ونحكي ونتكلم ونلف البلد كلها وبعد صلاة الفجر نذهب كلنا الى البحر نصطاد ونسبح لغاية الشمي ماتطلع وبعدين نروح ننام

واتذكر ايضا رمضان في ايام الجيش كانت من احلى ايام رمضان ومن احلى ايام الجيش ياه واللهايام روعة بس فعلا على قد حلاوتها وعلى قدر ما انا مستمتع وانا بكتب لكم ومن قبلها وانا بقرا ذكرياتكم على قدر ما انا متالم وحزين على ابنائنا لانهم مش بيشعروا برمضان ومش بيستمتعوا بكل هذه الاشياء

وعلى راي عمنا مدبولي

يرحم زمان وليالي زمان

[فــيــروز]

امبارح دخلت بيتنا لقيت فيه نور جاى من ناحية الشباك رغم اننا بالليل !! mfb: سالت اختى ايه النور ده !! :blink: فقالت ده البواب ركب الزينات و علّق التعاليق و مالقيش غير المنشر بتاعنا يربط فيه اللمبه على اعتبار اننا فى الدور الاول .. ساعتها افتكرت الموضوع ده بس فعلا كان تايه عن بالى ادوّر عليه فين :unsure:

[Scorpion]

في وسط الهم اللي محاوطنا ... علشان نطلع الأبتسامة اللي مدكنين عليها بقالنا فترة....

مافيش احسن من الموضوع ده نستريح فيه شوية....

في انتظار ذكرياتكم

:happy:

[الباشمهندس ياسر]

مشكووووووووووووور على رفع الموضوع

و لى عودة ان شاء الله