سؤال لاهل الخبرة في الخروج والعوده من السعوديه ..

[doha]

عندي استفسار لاهل الخبرة في مسائل الخروج والعوده وياريت تطولوا بالكم علي شويه عشان اشرح بالتفصيل .. الممل .

دلوقت الحمد لله زوجي استخرج الاقامه ..طيب لو احنا اضطرينا ننزل مصر في الفترة القادمه عشان اقدر انقل نفسي على اقامه زوجي ايه هي الاوراق المطلوبه مننا بالظبط مع العلم بالآتي :

- لما كنا مسافرين ظابط الجوازات المصري قال لزوجي فين تصريح العمل قاله مجبتوش ( زوجي معاه تصريح عمل لعمله في مصر لكن مطلعش لعمله في السعوديه ) فالظابط قاله خلاص مش مشكلة بس اعمل حسابك المرة الجايه لما تنزل مصر مش هتطلع منها غير بتصريح .. وده تعمله اما في السعوديه او لما ترجع مصر اجازه ..

فسؤالي بخصوص هذه الجزئية وبما ان ربنا اكرمنا بكفيل سكر وزي العسل ميتخيرش عن اي كفيل بتتكلموا عنه في المنتدى هنا وكل ورقة بيطلعها لنا بتطلع الروح قبلها وطبعا مش بنستلمها غير بعد مانلطع المعلوم .. وبما اننا بنحاول قدر الامكان نقلل احتكاكنا بالكفيل ده عشان طبعا زي ماانتم عارفين ان كان كفيلك عسل سده واستريح ..

وبما اننا لسه يادوب مستلمين الاقامه بعد شد وجذب معاه وبما اننا بغلاستنا كمصريين وطلباتنا الي مبتخلصش طالبين منه ورقه تانيه موافقة على استقدامي كزوجه فيااهل الخبرة تنصحونا نطلب منه ايه بالمرة على اساس تكون اوراقنا جاهزه مرة وحده وندفع مرة وحده ونخلص ..

هل نطلب منه تعريف مثلا عشان نطلع تصريح العمل ولا نخليه يطلع من مصر احسن ؟ طيب لو طلعناه من مصر هل هنحتاج عقد من الكفيل او ماشابه؟ طبعا للي مش عارفين احنا معناش عقد احنا جايين كده ترحيله على باب الله والحمد لله عاملين حسابنا وجايبين معانا شوال بطاطا ..

طيب السؤال التاني هل عشان نطلع تاشيرة خروج وعوده لازم ورقة من الكفيل ولا بنطلعها عادي وفي الحاله دي نزن عليه شويه عشان ناخذ منه الجواز وخلاص ؟

وسؤال اخير هل تنصحونا باي اوراق او اجراءات نقوم بيها هنا قبل مانسافر عشان منتفاجأش بحاجه بعدين ؟

ياريت حد يكون متاكد من المعلومات ويجيبني على وجه الدقة نطلب منه ايه ومنطلبش منه ايه لان زي ماقلت لكم الراجل ذوق ذوق ذوق الصراحة واحنا مبنحبش نحرجه ونطمع في كرمه كتير خاصه والميزانية على قد القد والراجل كتر خيره قنوع جدا ومش بيطلب في الورقة كتير .. شويه فكه من الي بننزل كل يوم الشارع نغرف ونعبي فيهم ..

ماعلينا .. في انتظار الرد من الساده الخبراء ادام الله فضلهم ..

[خالد شحاته]

السلام عليكم ورحمة الله وبركاته

اولا بالنسبه لتصاريح العمل من الافضل يتعمل في مصر

لانه هنا بيتعمل في القنصليه الموهل العالي 200 ريال والمتوسط 150 ريال انما في مصر بيتعمل بي 130 جنيه وخلاص وهنا بيحتاج عقد عمل انما مصر مش محتاج غير صورة التاشيره ومش محتاجين اي اورق من هنا

اما بخصوص تاشيره العوده بما ان الكفيل كريم معكم اوي كدا مش هيعطكم الجواز لان هيقول انا الا هعمل التاشيره علشان تزويدي المعلوم شويه انما علشان تعمليها من غير اورق صعب شويه والا هيعمل هيخد اكتر من الكفيل الكريم لما الكفيل كريم معكم اوي كدا انتم مش تكونو بخلاء معه هو كريم للازم نكون اكرم منه ونملي عيونه رغم مش هيملي عيونه غير التراب

اما بخصوص اوراق الاستقدام هي كالاتي

استماره مختومه من الكفيل الكريم للازم تصديق الخطاب او الاستماره من الغرفه التجاريه

خطاب بالراتب يكون فوق 3500 ريال وده ممكن الكفيل يخاف منها بما انه كريم يخاف يعطيكم الورقه دي

فسيمه الزواج مصدقه شهاده الميلاد مصدقه

[alex man]

اهلا ي ا خت ضحى

بالنسبة للشهادة الزواج ليس شرط تكون موثقة من السفارة السعودية

بالنسبة الى تصريح العمل عندما يعود ممكن يعمله فى مصر

وبالنسبة الى ورق تعريف بالراتب ممكن يمضى الى الكفيل انه اخذ هذة الورقة لغرض الاستقدام فقط

بالنسبة للخروج والعودة لابد ان الكفيل هو اللى يعمل الخروج والعودة للزوج ام بالنسبة الى لكى الزوج هو اللى يعمل الخروج العودة لكى

[سهل جدا]

بالنسبة لتصريح العمل، فما فيش أسهل منه

بيتعمل من مصر في مكتب تصاريح العمل اللي في الدراسة

لو سألتم أي حد في مصر عليه هايدلكم, وهو مكانه جنب مرور الدراسة علطول..

ولازم يكون مع الشخص المقدم لتصريح العمل أصل جواز السفر والبطاقة وفيه استمارة لازم يملأها هايدوهالو هناك

وتصوير الأوراق كله بيتم هناك في نفس المكتب (برسوم طبعا)..

والرسوم بتتفاوت حسب المؤهل, لكنها لا تتجاوز ال 150 جنيه بأي حال

الورق بيتقدم صباحا ويتم تسليمه في نفس اليوم بعد الساعة 3 , أو على أقصى تقدير تاني يوم

لو مقدم الطلب ملتحي ممكن يتأخر شوية ورقه لحد ما يتأكده إنه ما فيش عليه حاجة..

=============================

بالنسبة لتأشيرة الذهاب والعودة , فلازم موافقة الكفيل وتوقيعه على استمارة الجوازات

لكن اللي أعرفه إن أغلب الناس بتدي كفيلها الفلوس وهو بيخلص كل حاجة عن طريق المعقب بتاعه.

وربنا يوديكو ويجيبكو بالسلامة

بالنسبة للاستقدام زي ما حضرتك عارفة, إنه لازم المهنة يكون مسموح ليها بالاستقدام

[ام زياد]

الله يعينك يارب وييسر لكم الحال

بصي

استخراج تصريح العمل من مصر

اسهل واوفر

بالنسبة للاوراق اللى تطلبيها من كفيلكم مرة واحدة عشان تخلصي زى ما انتى عايزة

لو عندك اطفال هيدخلوا مدارس عايزة خطاب تعريف للمدرسة

ولو ربنا كرمكم وهتشتروا عربية لازم خطاب تعريف

ولو هتفتحوا حساب فى البنك

لازم خطاب تعريف

ولو هيستقدمك اصلا لاااااااااااااااازم راتبه يكون تقريبا 4000

وده عشان الكفيل يطلع لكم ورقة بيه ربنا يسهل يارب

وبالمناسبة انتى جيتي ازاى من غير استقدام زيارة يعنى

طب ما تسالى على تمديد الزيارة وتكلفتها اد ايه

يمكن تكون اوفر من الاستقدام

[doha]

جزاكم الله كل خير جميعا على الردود ..

يعني تقريبا الكل اجمع ان نعمل تصريح العمل من مصر وان مش هنحتاج اي اوراق غير جواز السفر وصورة التاشيرة الي فيه .. خلاص هعتمد على كلامكم وان شاء الله ميكونش في اوراق تانيه مطلوبه .

وبالنسبة لتاشيرة الخروج والعوده للاسف واضح من كلامكم كده مينفعش يعملها غير معقب الكفيل طيب الله ثراه قصدي ربنا يطول عمره فبما انكم اصحاب خبرة ايه المبلغ العادل في رايكم الي يندفع في ورقة زي دي ..

========

بالنسبة لسؤالك ام زياد فالحمد لله مهنة زوجي تسمح بالاستقدام لان هو مهندس زراعي وجاي على فيزا مهندس زراعي اما بالنسبة للراتب فطبعا طلبنا ورقة ( كده وكده ) من الكفيل ان الراتب 4000 عشان نقدر نعمل استقدام وربنا يعين ويجيب الورقة دي ..

اما عن انا ازاي موجوده فانا جايه زياره على والدتي طبيبة هنا وممكن امد الزياره لغايه تسع شهور بس المشكلة مش هنقدر ندخل البنت المدرسة وعشان كده مضطرين نحولها استقدام وللاسف لازم ارجع مصر انا وهي عشان نستقدم من هناك على اقامة زوجي .. بس دي الحكايه

[alex man]

الاخت ضحى

يوجد اقتراح انا عملته مع زوجتى فى التاشيرة السابقة انى حاولت الزيارة الى استقدام ممكن تجربي ولن تخسر اى شىء سوى تصديق الغرفة التجارية اذا رغبت فى ذلك ممكن اقول لكى الطريقة

[محمد افندى]

الاخت ضحى زى الزملاء أفادوكى

تصريح العمل افضل يطلع من مصر والمقر الرئيسى لادارة تصاريح العمل فى الدراسة وهو بيكلف تقريبا حوالى 130 جنية

[doha]

الاخت ضحى

يوجد اقتراح انا عملته مع زوجتى فى التاشيرة السابقة انى حاولت الزيارة الى استقدام ممكن تجربي ولن تخسر اى شىء سوى تصديق الغرفة التجارية اذا رغبت فى ذلك ممكن اقول لكى الطريقة

اكيد ياريت تفيدني بيه ويبقى جزاك الله كل خير ..

[عاشق النيل]

عمنا الاسكندرانى

صحيح ممكن تحويل الزيارة لاستقدام بالنسبة للزوجة

يارييت تشرح لنا الله لا يشحتتففك يا شيخ

اصل كدة اضمن اجيبهم زيارة 3 شهور ونمدها وبعدين نحولها لاستقدام

السؤال لو حضرتك عملتها يبقى ممكن

انا مش عارف اذا كان ينفع والا لا