كان نفسك تشتغل ايه

[مغتربة]

السؤال بسيط تماما زى ما فى العنوان

كان نفسك تشتغل ايه

كلنا دخلنا الكليات تبع مكتب التنسيق

فينا الى قدر يدخل الكليه الى هوه كان عايزها و بالتالى كمل فى الوظيفه او المهنه الى كان بيحلم بيها

و فينا الى مكنش محظوظ و متوفقش فى كده

حتى بعد التخرج فيه الى اشتغل فى تخصصه الاصلى و فيه الى غير مسار من ابوابه gt: wst::

ياترى انت درست الى كان نفسك تشتغل فيه و لا لا

و ياترى بعد التخرج اشتغلت فى نفس تخصصك و لا غيرت

و ايه هيه المهنه الى نفسك انك كنت تشتغل فيها

بغض النظر عن امكانيه تحقيق دا دلوقتى من عدمه

و يا ترى فى سن معين بيكون صعب فيه ان الانسان يغير اتجاهه الوظيفى تماما احاجه هوه بيحبها ان توفرت له الفرصه

دعوه للتناقش و سرد الخبرات

smk: bnd5::

[سهل جدا]

كنت أتمنى إني أشتغل طبيب..

ما أجملها من مهنة

واحد كل شغله في الحياة إنه يزيل الآلام عن الناس ويرسم البسمة على وجوههم

أنا بصراحة بحسد كل طبيب

أعني الحسد الممدوح وهو الغبطة , وليس الحسد المذموم..

[pink rose]

بصي يا ستي انا من هواة بل من عشاق الآثار الفرعونية

و كان نفسي ادخل كلية آثار لكن بابا حسم الموضوع دا تماما قبل ما ادخل ثانوية عامة اصلا بان كلية آثار في القاهرة و احنا من اسكندرية فاشيليها من دماغك خالص عشان مش هاتسافري القاهرة تقعدي فيها وحدك

فا قولت لنفسي خلاااااص البركة في كلية الآداب قسم آثار و فعلا دخلت القسم دا و كنت مبسوطة جدا فوق الوصف و بعد 3 اسابيع كده من الدراسة فيه الباشاوات الدكاترة عملولنا امتحان محترم في اللغة اليونانية و اللاتينية على اساس اننا مولودين في اتينا

و طبعا ما كانش الغرض من الامتحان غير تصفية اكبر عدد من الموجودين فيه و رحت انا مع اللي راحوا في 67 مع اني و الله ذاكرت كويس جدا بس و ما جاش في بالي اني اظبط معيد او دكتور و اخد كورس لاني كنت فاهمه كويس و ذاكرت كويس و في الامتحان برضه حليت كويس الحوار كله 3 اسابيع بس

و بعدين طلعت النتيجة و لقيتهم وزعوني على قسم الفلسفة كده منهم لنفسهم طبعا رفضت تماما اني ادرس فلسفة مع اني كنت شاطرة جدا فيها و جيبت الدرجة النهائية فيها في ثانوية عامة لكن ما حسيتش اني عاوزة اكون مدرسة فلسفة

قولت خلاص ادخل تاريخ ما هو كله آثار(وش جورج سيدهم في المتزوجون) لكن لما شوفت العدد المهول في القسم تراجعت عنه فورا

قعدت بقى كام يوم كده بعدها افكر و كان في قسم مكتبات لسا جديد نوعا قولت خلاص الخيرة فيما اختاره الله و قدمت فيه و كان عددنا معقول في الدفعة و بعدين لقيت الدراسة لذيذة فيه

و كملت فيه و اتخرجت منه و اشتغلت اخصائية مكتبات اد الدنيا

و الحمدلله اللي ما زعلنيش في الموضوع اني برضه انا اللي اخترت مكتبات ما رضيتش باللي اتفرض عليا من التنسيق الداخلي للكلية

بس برضه يفضل حبي الاول و الاخير للآثار

[حسام يوسف]

مرشد سياحي

[doudy]

دكتورة اطفال

[عنبو]

اولا اخد شوية حسانات

السلام عليكم ورحمة الله وبركاته

ثانيا :: كلام الهزار

انا كان نفسى اشتغل مؤذون البلد بجد وروح كده للبيوت واكتب الكتاب واهيص بقى شربات وتبقى اخر دلع وبعدين الناس يقولوا الشيخ محمد راح والشيخ محمد جه وطبعا لو فيه اقعدة عرب اكيد طبعا هبقى حاضر وهبقى من اللجنه اللى بتحكم بايه متعرفش بس تحس انهم مبسوطين وخلاص و طبعا شويه شويه ممكن ابقى قاضى عرب اقد الدنيا ودى كده ابقى انا عديت

بس بجد انا لو فيه اى قعده فى البلد مش بسيبها بس بروحها من باب الهزار انا وصحابى مع احنا اساسا شكلنا فرافير من لبسنا بس بنروح وكل واحد يلبس جلابيه وتمام والجزمه السوده اللميع وناخد بعضنا ونروح وسبحان الله الناس تقابلنا احسن مقابله ونقعد مع اللى قاعدين بس ده طبعا ان الناس عارفينا وعارفين ان احنا محترمين اساسا

نيجى بقى للجد

انا ولله الحمد طول سنوات الدراسه بطلع الاول على المدرسه وبعدين جت حصلت ظروف فى تانيه ثانوى التزمت بس التزام خاطىء يعنى كنت اقعد طول الليل وطبعا مافيش مذاكره مهو طول النهار بسمع خطب واروح الدروس بتاعتى وبالليل لما بصلى لما نايم فطبعا مكنتش مظبوطه جت بعد كده ايه ؟؟على العموم جبت فى تانيه ثانوى تقريبا 94 % وطبعا دى كانت وقتها اللى كان جايب 60 % كان فرحان اكتر منى لانى كنت علمى علوم فطبعا 94 % مكنوش ليهم لازمه

جيت فى تالته ثانوى بظت خالص برضه جبت 94 % يظهر ان الواحد مكنش يعرف يبقى وسط لاما كده لاما كده على العموم انا كان نفسى ادخل كلية الصيدله بس طبعا مجموعى ماجبهاشى جاب طب بيطرى وطبعا انا مكنتش بحب الطب البيطرى فقولت ايه ياض محمد اقرب كليه للصيدله اقولت خاص علوم كيمياء وبعد لما اقعدت شويه مع واحد خريج تجاره اقلى متدخل تجاره انجليزى وخلاص اقولته بس انا بحب المواد العلميه اقوى وماليش اقوى فى التجاره اقلى ياعم ادخل تجاره انجليزى وشغلها كتير اقعدت افكر فى كلامه وبعدين اقولت خلاص هروح احول وانا رايح احول من الكليه الى تجاره انجليزى فطبعا كنا لسه فى الصيف والدراسه لسه مبدأتش فماشى فى الطرقه كده رايح شؤن الطلبه وبتكلم مع الموظف اقولته عاوز احول تجاره اقلى ليه يابنى علوم حلوه وبعدين اللى يخليك تحول تجاره متحول طب بيطرى وانت مجموعك كويس اقولته لا تجاره شغلها كتير اهو اى حاجه وخلاص طبعا انا كنت فى الوقت ده بجد كنت يأس مووووووووووووووت وحالتى لا يرسى لها وبعدين وهو بكلمنى دخل معيد فى قسم الكيمياء اقلى تعالى والراجل بجد كان محترم اقوى وقعد يكلمنى عن الكليه وفهمنا حاجات كتير اقوى وعرفنى على طبيعة المواد واقلى مش هتحس بالفرق بين الدراسه هنا وصيدله واقعد يكلمنى طبعا عن مجالات الشغل وانا طبعا كان اخر علمى بكلية العلوم انها بطلع مدرس علوم او امين معمل بالكتير طبعا اقلى لا ياعم ده فيه حاجه اسمها كيميائى اقولته يعنى ايه اقلى ده بيشتغل فى كذا وكذا وبعدين ممكن تاخد دبلومه تحاليل طبيه وتفتح معمل من الاخر ظبط دماغى وطلعنا صلينا الضهر مع بعض ودعيت ربنا اقولت يارب انت عالم بنيتى وعارف انى عمرى ما كرهت حد فلو كان هنا الخير خلينا فيها ولو ماكنش اصرفنى عنها واقمنا مشينا وسبحان الله ربنا بعت الدكتور ده ليا علشان"" يشهد ميلاد الكيميائى الروش""" شوية ضحك

وخلاص الحمد لله دخلت الكليه ودخلت قسم كيمياء وكنت مستمتع اقوى بالمواد وخصوصا الى بدروسى المراد ليا كانوا علماء بجد وعاملين حاجات ممكن تنقل مصر والعالم العربى كله وشويه شويه خلصت الكليه بس بجد سنة تحولى كانت سنه تالته كليه لانى دى اللى الواحد التزم فيها بس التزام وسطى ؟؟؟

نيجى بقى لبعد التخرج عملت دبلومه فى التحاليل الطبيه وشوية حاجات تانيه كده واشتغلت فتره فى التحاليل الطبيه وبعدين سبتها واشتغلت كيميائى فى مصنع العاشر وبعدين سبته لما جاتلى فرصه شغل فى شركة مياه محترمه فى مصر وبعدين سبتها علشان جالى السفر وحاليا شغال فى شركه فى السعوديه لمحطات وتحليه ومعالجة المياه والحمد لله على كل شىء

اما بالنسبه للسن ان الانسان ممكن يغير فيه الكارير الوظيفى اكيد طبعا فيه سن معين يعنى ممكن اقبل التلاتين لكن اكتر من كده مش هيستحمل اساسا انه يغير الشركه الى هو فيها بس بجد انا ممكن اغير طول ما انا لسه مش متجوز لكن بعد الجواز هفكر الف مره اقبل لما اغير علشان الواحد بيكون عنده مسؤليات ولازم يكون عامل حسابه كويس وربنا يوفق الجميع

[fatfouta]

انا كان نفسى اشتغل مهندسة ديكور او مهندسة معمارية جدا جداااا

لكن بقى عشان مجموعى فدخلت كليه تجارة ومالحقتش هندسة وده خلانى اشتغل محاسبة وامرى لله

وكان نفسى اشتغل مرشدة سياحية ذى دكتور حسام

[الباشمهندس ياسر]

كان نفسى ادرس اداب تاريخ ... بس المجموع بقى

و نفسى موووووووووت اشتغل فى التجارة ... بس كله نصيب

يلا

الحمد لله على كل حال

[elfakhrany]

مهندس ميكانيكا

تم تعديل 24 يونيو 2009 بواسطة elfakhrany

[elshafey]

في مجال الالكترونيات

وانا الحمد لله دلوقتي مدير مبيعات في نفس المجال

[Alrefaey]

دبلوماسى

بالرغم انى فى الثانوية جبت مجموع يدخلنى اى شىء انا عاوزة لكن اصابتنى الخيبة كما تصيب الكثير منا ودخلت صيدلة

[adrianocrespo]

السلام عليكم

كان نفسي ابقي جراح

او طبيب طوارئ

زي اللي بنشوفهم في ER و باقي المسلسلات الاجنبيه

و لكن للاسف

اللي حصل كالتالي

بالرغم انى فى الثانوية جبت مجموع يدخلنى اى شىء انا عاوزة لكن اصابتنى الخيبة كما تصيب الكثير منا ودخلت صيدلة

[hosambob]

علي فكرة كان نفسي ابقي .... دكتور جراحة قلب ....

و لكن دخلت أدبي ....

و كان نفسي اطلع مدرس جغرافيا ..

و بالفعل بقيت مدرس جغرافيا .. بس لقيت انها لوحدها متكفيش احتياجات الحياة ..

درست كمبيوتر .. و قلت يا رب اكون مهندس كمبيوتر كويس ..

الحمد لله اشتغلت في كذا شركة لحد ما اشتغلت في شركة كويسة في مصر و كان ليها فرع في المحافظة بتاعتي

السر في النجاح يا جماعة بجد .... انك تحب الشغل اللي بتشتغله.... و تحاول تبقي كويس فيه ....

هو دة سر النجاح بعد التوفيق من ربنا سبحانه و تعالي ...

علي فكرة انا دلوقتي شغال شغلانه تانية خالص ( سكرتير ) في شركة مقاولات بالسعودية .... و الحمد لله صاحب الشركة بتاعي مبسوط مني ... زي ماقلتلكم المهم تحب شغلك اللي انت بتشتغله ...

و ربنا يوفق الجميع

[icehearted girl]

مذيعة وصحفية

ولكن

بالرغم انى فى الثانوية جبت مجموع يدخلنى اى شىء انا عاوزة لكن اصابتنى الخيبة كما تصيب الكثير منا ودخلت الطب

:sad: :sad: :waf: :waf:

[jessika]

انا كان نفسى اشتغل مرشدة سياحية او مضيفة جوية بس للاسف مواعيد وظروف الشغلنتين صعبة جدا مع ظروف الجواز والبيت والاطفال

[جيمي]

بالرغم انى فى الثانوية جبت مجموع يدخلنى اى شىء انا عاوزة لكن اصابتنى الخيبة كما تصيب الكثير منا ودخلت صيدلة

اللى مزعلنى بقه ان دى كانت رغبتى ودلوقتى كل ماجى ابعد الاقيها بتشدنى ......يعنى نفسى اغير بس مش عاارف

[ذهبية]

كان نفسى اشتغل مصممة ازياء واتعلم التفصيل و الخياطة ويكون لى خط موضة باسمى

ومازالت عندى هذة الرغبة

واتمنى ان احققها فى يوم من الايام و لو احد من الاخوات يعرف كيف الوصول الى هذا الفرع من فروع الدراسة

ياريت يساعدنى جزاة الله كل خير

لان مازال هذا الحلم يروادنى واتمنى تحقيقة لانى لا اعرف كيف يتم دراسة هذا المجال

[emano]

انا كان نفسى ادخل كليه فنون جميله

بس اصحاب الخير قالوا لماما بنتك حتنحت تماثيل

وصور والتماثيل والصور حرام

فماما طبعا قاله كله كوم والحرام كوم تانى لاممكن ابدا تدخلى فنون

وعليها دخلت كليه اداب مكتبات

بس فعلا نفس اكون فنانه فى الرسم عن دراسه

وان شاء الله حيتحقق حلمى

[عاشق الترحال]

السلام عليكم ورحمة الله وبركاته

أنا كتير أوزي بسأل نفسي السؤال ده وأفتكر من صغري كان نفسي في ايه

وانا صغير فى الإبتدائي كنت عاوز أبقى ظابط شرطه وفى الإعدادي كان نفسي ادخل ثانويه جويه ومنها عالكليه الجويه وأبقى طيار ولما دخلت ثانوي عام وبدأت أعرف الدنيا ماشيه ازاي عرفت أن الضباط عموما لازم لهم شروط وأولها الواسطه

وأتقهرت أوي لما عرفت الكلام ده وشفته بعيني وبعدين قلت خلاص يا واد زيد زي عبيد إدخل أي كليه بدل متدخل معهد وأهي كليه والسلام

ودخلت حقوق وفضل أخبط فيها وتخبط فيا لحد ماخلصت بس اللى مزعلنى أنى محبتش المهنه بتاع المحامي دي وبأمانه إستحرمت فلوسها قلت ياواد روح جرب حظك فى النيابه يمكن يكون لك نصيب و رحت مقدم نيابه أتاري الواسطه ورانا ورانا رحت ومكنتش مقدم نيابه عامه كنت مقدم نيابه إداريه وألاقي واحد زميلي كان وقتها فى الخدمه العسكريه بيؤدي التجنيد بس عمه عضو مجلس شعب ألاقي عمه نزله أجازه من الجيش وجايبه فى ايده وجاي الإختبارات وكمان واحد دكتور كان عندنا فى الكليه جاي مع إبنه قلت بالصلاة عالنبي زمان أعرف ان الواسطه بتخلص بالتليفون دلوقتى صبحت الواسطه بتحضر بنفسها قت عمااااار يامصر.

المهم من هنا لهنا انا مش هغير الكون قلت ياواد دور على شغل اشتغلت مندوب مبيعات شويه ومندوب فى شركه سياحه شويه وآخر المتمه سافرت السعوديه بعد ما طلعت عيني بحث عن سفر لأوروبا خصوصا إيطاليا والحمد لله

الوقتى كل ماأفكر أدرس حاجه ممكن أميل لها زي الميكانيكا أو أدرس طيران ألاقى العقبات أكتر أولاَ الشغل والإلتزامات الماديه والأسريه والواحد مبيلاقيش وقت ينام علشان يدرس أصلاَ .

يعني لا دخلت كليه بحبها ولا اشتغلت شغلانه بحبها ولا سافرت سفريه بحبها . بس الحمد لله إتجوزت اللي بحبها .

وعجبي...

[icehearted girl]

بالرغم انى فى الثانوية جبت مجموع يدخلنى اى شىء انا عاوزة لكن اصابتنى الخيبة كما تصيب الكثير منا ودخلت الطب

اللى مزعلنى بقه ان دى كانت رغبتى ودلوقتى كل ماجى ابعد الاقيها بتشدنى ......يعنى نفسى اغير بس مش عاارف

come on :lol:

litc ...tshanj

تم تعديل 25 يونيو 2009 بواسطة icehearted girl