ماذا سيحدث لو اصبحت العِصمة في يد المرأة ؟

[se_ Elsyed]

من يومين كده وبمناسبة عيد زواجنا التاسع ...

لقيت حرمنا المصونه والجوهرة المجنو .. قصدي المكنونة ... بتقول لي : الحمد لله يا سي سين سين - ما هي ما تقدرش تقول لي سين سين حاف كده .. برضوا الألقاب محفوظه - الحمد لله إن العصمة في إيد الراجل وإلا كنت تلاقي مدابح في الحياة وتلاتة أرباع الرجالة متطلقة ...

فعدلت الطربوش ومسكت منشة الذباب وقلت لها : الحمد لله ... عشان تحمدي ربنا عاليغمه والنعمة اللي إنتي عايشه فيها . .. إنما إيه اللي خلاكي تقولي كده يا هانم ؟ - أنا برضوا بأقولها يا هانم وكدهوت .. هما بيحبوا الحاجات دي خلوا بالكم - ؟

قالت : لأ يعني أصل الستات عواطفيين وكدهوت ... وممكن لو زعلت في يوم من الأيام - وهما أساساً بيزعلوا كل يوم يا معلم - ممكن تقوم راميه اليمين عالراجل وبالسلامه يا شربات ...

قلت : الحمد لله وشهد شاهد من أهلها .

فلقيتها بتبرأ - أنا أفتكرت إنها هاتتحول ولا حاجه - وتقول لي : إنما قولي يا سي الأفندي .... لو من تسع سنين كدهوت كنت ترببست دماغي قبل كتب الكتاب وأشترطت إن العِصمة تبقى في إيدي .. كنت هاتعمل إيه ؟

قلت : بما إني كنت بأحبك .. ومازلت والله ... كنت هاوافق ..

فتهللت وفرحت وقالت : إن شالله تِسلم ويخليكي ليه يا سبعي ... هو ده العشم برضوا ... وبدأت في النحنه والبكاء

قلت لها : إستني بس .. بس ساعتها كنت هاغير إسمي وأخليه " كوثر " أو " بُثينه " أنا بأحب إسم بثينه قوي .... وعدلت نبرت التون بتاعي وخليته سوبرانو من فوق السلم الموسيقي من السلمة المكسورة .. ورميت لاي الشيشية من إيدي ونكشت زر الطربوش معبراً عن غضبي الشديد وقلت لها : أنا راجل يا ست هانم ... ولما العصمة تبقى في إيد مراتي ... يبقى أنا المفروض دوري إيه ؟ أحمل وارضع العيال وأروح السوق أشتري فاصوليا واقعد أشغلك شرز لحد ما ترجعي من الشغل ؟

قالت بنبرة هادئة محاولة أمتصاص ضغطي الهجومي من عالأجناب بسيد معوض وأحمد فتحي : لأ والله ما قصدي .. قصدي يعني كانت حياتنا هاتتأثر يعني لو العصمة في إيدي ؟ كأنك يا سيدي كاتب الشقة بإسمي .

قلت : لا شقة ولا أوضة وصالة ... أنا راجل وهافضل طول عمري راجل وفي 56 أنضربنا .. لكن كنا رجالة ووقفنا وقفت رجالة ...

قالت مقاطعةً : عارفه عارفه الأسطوانة بتاعت محمد ابو سويلم دي ... هاتقعد تعد لي من 56 لحد حرب الخليج ... يا سيدي إديني سبب مقنع .. ويا تقنعني يا أقنعك ..

فقلت لها : أنا عندي 3 أسباب .. وتحسست ذقني اللي محلقتهاش لسه وقلت لها هما في الحقيقة 4 أسباب ..

فقالت : طب يا عم يا بتاع كريم حلاقة إنجرام ... قولي سبب واحد ؟

فقت لها متلعثماً : السبب الأولاني .... ثم أنتي يا هانم سايباني على لحم بطني من الصبح وقربت أكاكي من الجوع ... قومي أمشي شوحي لي حتتين لحمه وحطيهم في رغيف ...

فقالت : يا نهار إسود ... إنت في دود في بطنك يا راجل ؟ إنتي مش لسه متغدي وضارب اللهم صلي عالنبي فرخم بملحقاتها من 10 دقايق ؟ ..

قلت متذكراً وبصوت خافت : آه صح ... أيوه بس أنا جوعت ... وإنتي عارفه من 9 سنين بأحب أكل لحمه متشوحه بعد الفراخ ....

قالت وهي تكظم غيظها : طب قولي على سبب واحد وأنا أقوم أشوح لك اللحمة اللي في التلاجه كلها

قلت : والله مانا قايل ... أنا ما أتعودتش أدخل في نقاشات جدلية وأنا على لحم بطني ...

فأنسحبت يا عيني تجر أذيال الخيبة من حُججي القوية وأدلتي الدامغه ...

وتنفست الصعداء وقلت لنفسي : يا نهار مدوحس ... أما يا ولاد لو فعلاً العصمت دي لو في إيد الست ... كنت تمشي في الشارع تدوس على جثث نص الرجالة المُلاقاه على قارعة الطريق ... والنص التاني كنت هاتلاقيهم ماشيين بشُنطهم في طوابير طويلة وهما رايحين على بيوت أمهم ...

آه يا عم ... الحمد لله إحنا لا مؤخذه أعقل برضوا ...

مش عاقلين يعني هما مجانين ... لأ .. عشان ما حدش يزعل

عاقلين يعني بنوزنها كويس ... وساعات بنفوت عشان المركب تمشي

أما هُنَ ... فعندهن أستعداد يخرمن المركب بعد 5 متر من الشط والكل يغرق - أنا عن نفسي بأعرف أعوم يابا .. الدور والباقي عاللي بيغرق في شبر ميه -

تخيلوا لحد دلوقت مش عارف آليات إن العصمة تبقى في إيد الست !!!!!!!!!

أيوه يعني .. لما سي عصمت يبقى في إيدها وهي اللي بتسوق ... وتحب تشقلط أخينا ... تقوم قايله له .. روح يا شكري إنتي طالق بالتلاته ؟

ولا تيجي من وراه وتروح للمآذون تديله أستمارة 6 جُند وتبعتها له على بوسطة العتبه ؟

و

للحديث بقية ..

[سهل جدا]

والله يا أستاذ سين فكرتيني بحكاية كنت قرأتها قبل كده في أحد المنتديات

أحد الأزواج حدث بينه وبين زوجته خلاف ومشاجرة (ودي حاجة عادية طبعا)

ولكن هذه المرة طلبت الزوجة الطلاق !!

ولكن لأن الزوج عاقل ويحب زوجته ويعلم أن هذه حركات فاضية, فقام بعمل حيلة جميلة..

أخرج ورقة من جيبه وكتب عليها:

((نعم انا فلان الفلاني أقرر وبكامل قواي العقليه انني متمسك بزوجتي تمام التمسك ولا أتخيل أبدا أن أعيش بدونها !!!))

ووضع الورقة في مظروف وسلمها للزوجة وخرج من المنزل غاضباً ..كل هذا والزوجة لاتعلم مابداخل الورقة ,

وعندها وقعت الزوجة في ورطة ..أين تذهب وماتقول؟وكيف تم الطلاق؟

كل هذه الأسئلة جعلتها في دوامة وحيرة وفجأة دخل الزوج البيت ودخل مباشرة إلى غرفته دون ان يتحدث بكلمة

واحدة ...فذهبت الزوجة إلى غرفته واخذت تضرب الباب فرد عليها الزوج بصوت مرتفع ماذا تريديييييييييين؟؟؟

فردت الزوجة بصوت منخفض ومنكسر ارجوك افتح الباب اريد ان اتحدث إليك !!!

وبعد تردد فتح الزوج باب الغرفة واذا بالزوجة تسأله بأن يستفتي الشيخ وانها متندمة اشد الندم , وأنها غلطانة وانها لاتقصد ماحدث .

فرد الزوج وهل أنتي نادمة على ما حدث ..فردت الزوجة نعم نعم والله ما كنت أقصد وأنا نادمة أشد الندم!

عندها قال الزوج افتحي الورقة وانظري مابداخلها !!!

وفتحت الزوجة الورقة ورأت مابداخلها واخذت تـقبل الزوج وهي تقول:

والله ان هذا الدين عظيم ان جعل العصمة

بيد الرجل ولو جعلها بيدي كان طلقتك 20 مرة ...

[الباشمهندس ياسر]

مسألة ان العصمة فى ايد المرأة ... مش معناه ان تقول للرجل انت طالق.....

انما معناه لما تطلب الطلاق ... يتم تنفيذ طلاقها .... و الله اعلم

و تقريبا الفرق بين الخلع و ان العصمة تبقى فى ايد الست

انها ف حالة الخلع بتتنازل عن المهر انما و العصمة فى ايديها بتحصل ع الطلاق و على حقوقها كاملة

و الله اعلم

و ياريت حد يجيبلنا النصوص اللى بتحدد الموقف صح

[doudy]

والله يا أستاذ سين فكرتيني بحكاية كنت قرأتها قبل كده في أحد المنتديات

أحد الأزواج حدث بينه وبين زوجته خلاف ومشاجرة (ودي حاجة عادية طبعا)

ولكن هذه المرة طلبت الزوجة الطلاق !!

ولكن لأن الزوج عاقل ويحب زوجته ويعلم أن هذه حركات فاضية, فقام بعمل حيلة جميلة..

أخرج ورقة من جيبه وكتب عليها:

((نعم انا فلان الفلاني أقرر وبكامل قواي العقليه انني متمسك بزوجتي تمام التمسك ولا أتخيل أبدا أن أعيش بدونها !!!))

ووضع الورقة في مظروف وسلمها للزوجة وخرج من المنزل غاضباً ..كل هذا والزوجة لاتعلم مابداخل الورقة ,

وعندها وقعت الزوجة في ورطة ..أين تذهب وماتقول؟وكيف تم الطلاق؟

كل هذه الأسئلة جعلتها في دوامة وحيرة وفجأة دخل الزوج البيت ودخل مباشرة إلى غرفته دون ان يتحدث بكلمة

واحدة ...فذهبت الزوجة إلى غرفته واخذت تضرب الباب فرد عليها الزوج بصوت مرتفع ماذا تريديييييييييين؟؟؟

فردت الزوجة بصوت منخفض ومنكسر ارجوك افتح الباب اريد ان اتحدث إليك !!!

وبعد تردد فتح الزوج باب الغرفة واذا بالزوجة تسأله بأن يستفتي الشيخ وانها متندمة اشد الندم , وأنها غلطانة وانها لاتقصد ماحدث .

فرد الزوج وهل أنتي نادمة على ما حدث ..فردت الزوجة نعم نعم والله ما كنت أقصد وأنا نادمة أشد الندم!

عندها قال الزوج افتحي الورقة وانظري مابداخلها !!!

وفتحت الزوجة الورقة ورأت مابداخلها واخذت تـقبل الزوج وهي تقول:

والله ان هذا الدين عظيم ان جعل العصمة

بيد الرجل ولو جعلها بيدي كان طلقتك 20 مرة ...

فعلا حكاية جميلة و فيها عظة

[doudy]

آه يا عم ... الحمد لله إحنا لا مؤخذه أعقل برضوا ...

مش عاقلين يعني هما مجانين ... لأ .. عشان ما حدش يزعل

عاقلين يعني بنوزنها كويس ... وساعات بنفوت عشان المركب تمشي

أما هُنَ ... فعندهن أستعداد يخرمن المركب بعد 5 متر من الشط والكل يغرق - أنا عن نفسي بأعرف أعوم يابا .. الدور والباقي عاللي بيغرق في شبر ميه -

تخيلوا لحد دلوقت مش عارف آليات إن العصمة تبقى في إيد الست !!!!!!!!!

أيوه يعني .. لما سي عصمت يبقى في إيدها وهي اللي بتسوق ... وتحب تشقلط أخينا ... تقوم قايله له .. روح يا شكري إنتي طالق بالتلاته ؟

ولا تيجي من وراه وتروح للمآذون تديله أستمارة 6 جُند وتبعتها له على بوسطة العتبه ؟

و

للحديث بقية ..

يا س س ايه دة كله الفراخ و اللحمة المتشوحة

ايه علاقتها بموضوع العصمة

المهم شوف يا س س انا فى رايى ما ينفعش اخلى العصمة فى ايدى خالص

ازاى يعنى مش هحس ان متجوزة راجل بمعنى الكلمة لو وافق ان العصمة تبقى فى ايدى

و بعدين الست ممكن فى اى لحظة تزعل من جوزها تروح مطلقاه على طول يمكن اكتر من 100 مرة فى اليوم

و بعدين ما الخلع موجود عادى و متاح

[alex fox]

يانهار أزرق...

العصمة فى أيدها...

ليه...متجوزة سوسن...

أنا أرفض وبشدة مجرد مناقشة الموضوع ده...

طب دى يوم ما تفكر تقول كده ولو على سبيل الهزار حتى...

دا أنا كنت...كنت ...

كنت أيه...مش عارف...

أصل انا مش متجوز أصلا...

[icehearted girl]

انا بقالي ربع ساعة مش عارفة ارد لحد مقدرت امسك نفسي مالضحك :roseop: :D :D

بجد اسلوب حضرتك مش معقول

بس في سؤال مهم

هل حضرتك شايف فعلا كون العصمة في يد الزوجة دا ينقص من قدر الرجل شيئا؟

ولو الاجابة بنعم

فهللللللللللللللللللللل

حضرتك شايف ان الرجولة فموقف زي دا هي كلمة ايا كانت بخصوص طلاق او غيره سواء تطلق الكلمة او تحبسها؟

علما باني اعرف ان كون العصمة في يد الزوجة ان الزوج ميقدرش يطلقها الا بموافقتها وليس كما يعتقد البعض

ان من حقها تطليقه في اي وقت

وهللللللللللللللللللللللللللل

الوضع دا يفرق كتير بعد ظهور الخلع وانتشاره؟؟؟؟

اسيبك بقي تاكل اللحمة المشوية وتيجي تجاوب قوام :)

[Falcon Crest]

علما باني اعرف ان كون العصمة في يد الزوجة ان الزوج ميقدرش يطلقها الا بموافقتها وليس كما يعتقد البعض

ان من حقها تطليقه في اي وقت

ده الي اعرفه بش س س لخبطي كل معلوماتي

[HDarwish]

معظم الحالات اللي بتطلب الزوجة فيها إن العصمة تكون في إيدها بيكون بدافع خوفها من إنه يتزوج عليها .. وبالتالي تستطيع في هذه الحالة إنها تطلقه دون التوسل إليه وتطور المشكلات .. في حين إني شوفت نساء كثيرة تعاملت بذكاء في هذه الحالة وهي أن يتم في عقد الزواج وضع شرط وهو أنه في حالة زواجه من أخرى أكون محرمة عليه .. وبهذه الحالة تضمن أنه لن يتزوج عليها أو إن حدث وتزوج عليها فتكون طالق منه ومحرمه عليه شرعا .. ومن الناحية الشرعية أظن أن هذا جائز مئة في المئة فالعقد بين الطرفين من الممكن أن يشتمل على أي شروط يتفق عليها الطرفين عدا الشروط التي تخالف الشرع ...

لكن بصراحة .. قليل قوي اللي يمكن يقبل بوضع شرط زي ده في عقد زواجه .. ومنهم أنا ...

[سهل جدا]

معظم الحالات اللي بتطلب الزوجة فيها إن العصمة تكون في إيدها بيكون بدافع خوفها من إنه يتزوج عليها .. وبالتالي تستطيع في هذه الحالة إنها تطلقه دون التوسل إليه وتطور المشكلات .. في حين إني شوفت نساء كثيرة تعاملت بذكاء في هذه الحالة وهي أن يتم في عقد الزواج وضع شرط وهو أنه في حالة زواجه من أخرى أكون محرمة عليه .. وبهذه الحالة تضمن أنه لن يتزوج عليها أو إن حدث وتزوج عليها فتكون طالق منه ومحرمه عليه شرعا .. ومن الناحية الشرعية أظن أن هذا جائز مئة في المئة فالعقد بين الطرفين من الممكن أن يشتمل على أي شروط يتفق عليها الطرفين عدا الشروط التي تخالف الشرع ...

يا عم إتش درويش الله يباركلك , ما توعّيش الستات على الكلام ده :)

بس عموما اطّمن

في رأي فقهي بيقول إن حتى لو اشترطت المرأة هذا الشرط فمن الجائز أن لا يفي به الرجل

لماذا ؟؟

لأن هذا الشرط يحرم الرجل من شيء أباحه الله وأحله بالنص الصريح في القرآن الكريم

وقد قال رسول الله صلى الله عليه وسلم: (الْمُسْلِمُونَ عَلَى شُرُوطِهِمْ ، إِلاَّ شَرْطًا حَرَّمَ حَلاَلاً أَوْ أَحَل حَرَامًا)

وقال: (مَنِ اشْتَرَطَ شَرْطًا لَيْسَ فِي كِتَابِ اللَّهِ فَهُوَ بَاطِلٌ ، وَإِنِ اشْتَرَطَ مِائَةَ شَرْطٍ).

أي خدمة يا باشا :huh:

بس للأمانة, المسألة ديه فيها خلاف بين الفقهاء

[elfakhrany]

المشكلة مش فى إن العصمة تكون فى أيد الزوجة المشكلة بتكون فى الزوجة نفسها :)

[HDarwish]

يا عم إتش درويش الله يباركلك , ما توعّيش الستات على الكلام ده

الأخ / سهل جدا ..

كنت متأكد إنك أول واحد هتستفزك مشاركاتي وإنك أول واحد هتعلق عليها ..

عالعموم زي ما قولت قبل كده .. أعرف ناس كثير متزوجة بالطريقة دي ..

تحياتي

[mandoo]

شوف ياأبو الأسيان

الستات دول مالهومش حل تبقى العصمة فى إيديها ولا حتى فى رجليها اللى فى دماغها حتنفذه ولو بعد حين ، ودايما الست من دول بتخطط وتكتك ونفسها بيكون طويل ، ودليلى على ذلك كثرة الطلاق ، يعنى ببساطة ياأبو الأسيان الراجل من دوكهم ياولداه بيوصل لمرحلة ياينتحر يايطلق .

وبعدين عاوز أقولك على حاجة من يوم ماوافقوا على قانون الخلع وتلاقى الست من دول بتحسبها مليون مرة لإنها عارفة مصيرها حيكون فللى وحتخسر كل حاجة.

بس بأمانه هم جنس رقيق وحساس ومرهف المشاعر :huh: وربنا يعينا عليهم ويقلل من أمثالهم ... الوحشين منهم طبعا :)

لكن أحلى حاجة لما تغنيلها أغنية تامر حسنى الجديدة

ده إنتى اللى زيك يتشال على الراس وماينزلش

ده إنتى اللى زيك يؤمر ولا يتأمرشى

ومشى حالك وكبر دماغك وإبعد الكياس السودا والسكاكين من البيت ونام لوحدك وإقفل عليك الباب بالمفتاح تصحى الصبح مرتاح

[روبي]

ههههههههه

لا بجد بغض النظر عن العصمة تكون عند الست و لا الراجل

اسلوبك في الالقاء كثير رائع و مشوق و ينتشل الضحكة بالرغم منك

اهو دوما بقولها الله الله على خفة الدم المصري :closedeyes:

نجي للعصمة بص يا افندينا سواء العصمة بيد المراة و لا مش بيدها

احسن لك تمشي عدل مع الست لا و كمان تشغلها رومانسية و تسمع الكلام

و متنطقش و متقولش تلت الثلاتة كم

لانه بكل بساطة ان كيدهن عظيم

اما تخليك ظريف و لا هي توديك وراء الشمس

و ساعتها لا ينفع عصمة و لا مش عارفة ايه :blink:

[toota]

العصمة في يد المرأة مش عيب ولا حرام...حتى الشرع حللها....بس عشان تبقى في ايد الزوجة اكيد لازم يكون ليها ظوابط وشروط معينة.....

مثلا .....

ان الزواج اصلا ترتب على زوجة ثرية وزوج بيدير اعمالها ( يعني من الاساس موظف عندها او عند والدها )....واكتشفت انه مثلا بياكل مالها....

او الزوجة مطلقة وعندها اطفال من زوج اخر...وتزوجت...يقوم طليقها يساومها على الاطفال...والزوج الجديد يرفض...تقوم تطلق نفسها ( مش تطلقه)

او ان الزوج متزوج بأخرى...وهي خايفة من عدم استقرار الحياة بينهم وخايفة من المشاكل لاحقا...الخ...

لكن بنت في بيت اهلها وبتبتدي حياتها من اول وجديد وتطلب العصمة في ايديها....دي ميصحش لان الاساس في الزواج ده هو الاستمرار والامان وطالعة من بيت ابوها ورايحه لبيت زوجها الي المفروض مش حتطلع منه الا على قبرها...

بعدين فيه معلومة بسيطة جدا...ان العصمة لما تكون في ايد الست...مش معناه انه ميقدرش يطلقها...وانها هي الي تقدر فقط تطلق...لا...المعنى انها تشاركه في قرار الطلاق...,وتبقى زيها زيه...وهنا المعضلة....