العمة نور ... إيه النور ده ...

[Lancelot]

أولا .. أنا شخص موضوعي جدا .. بمعني إن أستطيع أن أنقد تصرفات أو أفكار شخص ما بدون أن تؤثر مشاعري الشخصية تجاهه علي حكمي عليه ....

ثانيا ... أنا بأكره نبيلة عبيد .... شخصية مغرورة بطريقة فظيعة ... و ديه صفة واحدة من قائمة طويلة ... و هذا رأيي الشخصي ...

ثالثا ... مسلسل "العمة نور" هو أسوأ ما رأيت من دراما تليفزيونية في حياتي .... الست نور وصلت من أمريكا علشان تعيش مع أخوها و مرأته و أولاده ... للوهلة الأولي تظن أنك أمام إصدارة نبيلة عبيد لمسلسل "إمراة من زمن الحب" فهي بالتأكيد جايه علشان تعلمهم .... تعلمهم أي حاجة و كل حاجة ...

لكن بصراحة أنا إندهشت من اللي شفته ... ديه مش تمثيلية ... ديه مجموعة من الدروس الواضحة الصريحة بطريقة مستفزة للمشاهد ... دروس في أهمية الوقت .. و حب الوطن .. و الإتيكيت في الأكل .. و التعامل المتحضر ... و كله كوم و درس الصلاة كوم تاني ... العمة نور – عمتي و عمتكوا و عمتنا جميعا – وصلت مصر تدي درس في أهمية المواظبة علي الصلاة لأخوها و مرأته و أولاده .... أنا بصراحة إندهشت .. بمعني أدق نزل علي الخبر – المشهد – كالصاعقة ... بقيت هأتفرس من السذاجة و الإستخفاف بعقل المشاهد ...

كفاية كده عليكوا ... لأني أنا نجوت بأعجوبة من الحلقة ديه ... الله أعلم ممكن تعمل فيكوا إيه ... و كل رمضان و إنتوا طيبيين ...

[الأفوكاتو]

عزيزى لانس,

أشكر الله أنى لا أشاهد هذه البرامج

و التليفزيون اللى يجيلك منه الريح, إغلقه........... و استريح

لا تنسى إطفاء النور

كل عام و انت طيب.

[Lighthouse]

انا شفت اول حلقة وقررت احترم مخي من السماجات والسخافات اللى مليان بها المسلسل

والحمد لله ماشفتهاش امبارح

لكن اعمل ايه بقى

حظي العثر خلاني اشوف حلقة النهاردة

غير النصائح المباشرة وانهبارها الشديد بالصناعة المصرية وتشجيع المنتج المحلي وباقي الاعلانات المباشرة اياها

الحوار كله اسفاف ولا يمكن وصف استظراف الاخ اللى فاكر نفسه ظريف قوي ومش عارفة اسمه ايه الصراحة ولا مين رماه علينا في المسلسل علشان يتحفنا بكم غير عادي من الفاظ عمري ماسمعتها غير في هذا المسلسل الذي يروج لافكار سخيفة جدا

اسخف مشهد في المسلسل النهاردة بخلاف باقي السخافات الاخري

عندما اتي جارهم والد صديقة ابنتهم التي تحضر معها الدروس الخصوصية ليشكو من سوء اخلاق ابنهم الذي كتب خطاب غرامي لبنته ووضعه لها في كراسة اخته ( اللى هي صديقتها )

الاسلوب الفج الذي رد به الاب لايتناسب مع كونه اب له ابنه المفترض الا يرضي بأن يتعامل معها احد بنفس الاسلوب

بخلاف كونه وكيل وزارة فهو اولا واخيرا اب لايرضى لابنتيه بان يتعرضن لتصرف شبيه فقد برع الاب المحترم في تبرير سلوك ابنه وماولة تبسيطه بشكل فعلا مقرف

مش عارفة العالم دي عايزة ايه مننا

الجيل اخلاقه انهدمت بسبب البلاوي اللى بيكتبوها

جايين يكملوا على بقية القيم الموجودة بالافكار السمجة والحوارات السوقية الموجودة في مسلسلاتهم

حسبنا الله ونعم الوكيل :lol: :D

[moody00x]

فعلا حاجة تقرف وشئ مقزز

[فــيــروز]

فعلا زى ما قال لانس

العمشه نور -انا قصدى اكتبها كده- جايه من امريكا تدى حكم و مواعظ

نفس طريقة مسلسلات اسامه انور عكاشه اللى فيها شخص اسطورى مثالى جاى من المدينه الفاضله يعدل المايله

وانا المسلسلات اللى بالفكره دى بتعفرتنى جدا .. بدء من ابو العلا البشرى .. اهالينا .. امراه من زمن الحب .. اميره فى عابدين "اظن انه كان ايضا من تاليفه" .. ليس هناك انسان كامل له الحق ان ينظر للآخرين من عليائه كى يصلح شئونهم .. وحتى لو اراد فلهذا الانسان هو الآخر عيوبه التى تستحق الاصلاح و مفترض حتى يكون هناك توازن بالعمل ان يظهر هذا الجانب ايضا

الحمد لله اخذت قرار بمقاطعة هذا المسلسل بعد الحلقه الاولى و نفذته من الامس .. خصوصا بعد حوار نور مع بنت اخيها الصغيره التى لاتزال طالبه صغيره فى ثانوى وتتلهف على الحب و الغرام و الهيام ومجهزه العده كلها من مناديل و دموع ولا ينقصها سوى الفارس اللى تحب فيه !! fsh:: هو الحب اصبح موضه مفروض كلنا نطبقها حتى نصبح اسوياء؟ ولمصلحة من افهام الفتيات الصغيرات انه لابد لكل منهن ان تقع فى الحب وهى بعد فى بداية مرحلة المراهقه والا فانها تكون انسانه غير طبيعيه !! ناهيك عن حوار الفتيات زميلاتها مع مدرس الفلسفه منكوش الشعر الذى قام باداء شخص عبيط يتراقص فى اغنية بابا فين فى اختيار سيئ جدا من المخرج !! هل هذا الشخص يصلح لاداء شخصية مدرس !! وفلسفه كمان !! وما الداعى للحوار السخيف الذى راد بينه وبين الطالبات ولا هدف من ورائه سوى مط الحلقات و تطويلها !! :lol: حاجه تقرف ..

نصيحه بقى .. فيه مسلسل بييجى على نايل تى فى فى نفس وقت مسلسل العمه نور .. جميل جدا و كوميدى .. شوفوه بدل حرقة الدم ..

[mnman]

لآ وكلة كوم و حشرها للانجليزي في كلامها كوم تاني... يعني المفروض انها من السيدة زينب و سابت مصر قول علي سن 25 سنة يعني حصيلتها من الكلمات العربية زي اي واحد فينا اية لزوم العوجان.... والله اول مانزل مصر حقلب برتغالي و يبقي الجدع يفهم....

[جـورج]

انا اكتفيت بالحلقه الاولى

وكانت كافيه لمعرفه المضمون

قلت اشترى دماغى و اريح اعصابى و انام درى احسن

smk: smk: smk:

[lالمطحون]

الخاله ضلمه وهى تقرب لصاحب جامعة نور فى كازاخستان وهى فى الحقبه السنيه المتشابهه وطبعا عدا الاصتناع المقزز للست الحاجه الهاديه منقدة البشريه فهناك انها عملت عملية شد للوش والقفى واشياء اخرى مما ادى الى تلك المسوخ او التمثال المتكلم وطبعا الكلام لازم يكون بهدوء وبالراحه خاللص علشان وشها لايتفك ويبعثر مما ادى لتلك الكارثه ولا ادرى من وافق على مثل المسلسلات الفاشله طبعا صاحب الرياله الاعلاميه ورمضان كريم

[Lancelot]

سيدي الأفاكاتو .... يا بختك ...

منمان قال ملحوظة مهمة أوي ... اللغة ... و الله أنا أعرف واحد لسه واصل مصر من حوالي إسبوعين .... الراجل ده في أمريكا من 30 سنة ... و مندمج تماما في الحياة الأمريكية و متجوز من أمريكية ... و الله و لا كلمة إنجليزي تخرج منه .. طالما الشخص اللي قدامه مش موثوق من لغته الإنجليزية ... فقط لما يقعد مع شخص الإنجليزي بتاعه كويس يبدأ يأخد راحته في الكلام ... لكن لا لغته مشكلة عربي علي إنجليزي و لا نقطه العربي مكسر ...

عمتنا نور بقه ... تلات أربع كلامها ... yes .... why ... what happened .... و كله من ده ... يعني أنا قاعد و أهلي معاي و فيهم ناس كبار في السن قاعدين طبعا الإنجليزي بتاعهم ضعيف جدا .. يدوب yes و ok ... مضطر أنا أترجم كل اللي الست نور بتقولوه ... طب ماشي يا ست نور عيشي الدور علي الأخر و إتكلمي إنجليزي – رغم إنه نطق ردئ جدا و لهحة لا تمت للأمريكية بصلة – لكن الناس الغلابة اللي مش بتعرف إنجليزي تعمل إيه .... و لا يمكن بيوفروا للناس عذر علشان يطفوا التليفزيون ....

جورج ... و النبي الدخان بيتعب لي صدري ... الله يخليك ... smk: smk: smk:

فيروز

ليس هناك انسان كامل له الحق ان ينظر للآخرين من عليائه كى يصلح شئونهم .. وحتى لو اراد فلهذا الانسان هو الآخر عيوبه التى تستحق الاصلاح و مفترض حتى يكون هناك توازن بالعمل ان يظهر هذا الجانب ايضا

و هل هو ده الهدف من المسلسلات و الأعمال الفنية ... عمر ما كان الهدف هو التلقين المباشر للنصائح بهذه الطريقة الفجة زي ما نكون إحنا في المدرسة مثلا ... ده الإعلانات بتاعة حملة رعاية المراهقين و تنظيم الأسرة مستواها أفضل من المسلسلات ديه .... الأعمال الفنية .. سينما أو تليفزيون .. الهدف منها نقل فكرة معينة من خلال قالب درامي .. حكاية أو حدوتة ظريفة و خفيفة علي الواحد و في نفس الوقت يخرج منها بفكرة أو مبدأ معين يود الكاتب نقله للمشاهد أو المتلقي .... أما العك ده فهو أبعد ما يكون عن المسلسلات ...

المطحون

ولا ادرى من وافق على مثل المسلسلات الفاشله

و معمولة بفلوس الدولة .. يعني فلوسنا ... حرام عليكوا مش كفاية القرف اللي إحنا عايشيونه ... مين المسئول عن المهزلة ديه ....

لايت هاوس

الجيل اخلاقه انهدمت بسبب البلاوي اللى بيكتبوها

جايين يكملوا على بقية القيم الموجودة بالافكار السمجة والحوارات السوقية الموجودة في مسلسلاتهم

يعني مش كفاية غم و نكد و عكننة علي الواحد بسبب إن مفيش تمثيلية عدلة ... و مش كفاية إنها تضييع فلوس علي الفاضي ... نيجي لمشكلة المشاكل ... بإسم نقل الواقع تحدث هذه المهازل ... الحوارات السوقية و الألفاظ و المعاني اللي عمر الواحد ما سمع عنها ... و أنا مش راجل كبير بعيد عن الشارع و ألفاظه ... أنا شاب من الجيل بتاع الألفاظ ديه ... و عمري ما سمعت عن تلات إربع الألفاظ المذكورة ...

و حتي لو كانت حقيقية إلا أن هذا لا يبرر بأي حال هذا الإستخدام المتكرر بداعي و بدون داعي لها .. فقط للدلالة علي إن الشباب كله كده ... طب ما نقدم للشباب نموذج كويس و بعدين نتهمهم إنهم لم يتعلموا منه ...

كفاية كده لأحسن هأبدأ أوجع دماغكم بإن الشباب مظلوووووووووووووووم ... بس و الله الشباب مظلووووم ...

[فــيــروز]

يا جماعه

انتم مش واخدين بالكم من حاجه مهمه

مسلسل العمه شمعه ده من مده وهما بيشتغلوا فيه

يعنى لنا سنين بنسمع عنه

فطبيعى انه يكون كله وعظ و ارشاد بصوره مباشره لان جه فتره كانت هى دى الموضه بتاعتها .. مسلسلات الحقن smk: زى مسلسل ونيس كده .. كنت باحس انه مسلسل اطفال وبعد ما نشوفه نروح نكتب فى الكراسه الدروس المستفاده من حلقة اليوم بس على الاقل ونيس كان كوميدى شويه مش اوى smk: .. يعنى المسلسل ده من الآخر كده حمضان .. ومفيش داعى تتفرجوا عليه حرصا على صحتكم الغاليه smk:

[Sherief AbdelWahab]

لا يفوق هذا المسلسل سوءا إلا ثورة الحريم

دعائي-فج-عبيط و ساذج-أقرب للتنويه منه إلى عمل درامي

1-من هي نيرمين الفقي حتى يكتب بجوار اسمها "النجمة"؟

2-من نصح إيمان البحر درويش بوضع الموسيقى التصويرية؟ ألم يتعلم من فشله في حلقت الطيور نحو الشرق؟

3-ماذا عن نظام التصوير العجيب بركات هاني اسماعيل مخرج الفظائع ؟

4-ايه الصعيدي النيوزيلاندي اللي بيتكلم بيه سي قابيل؟

5-إيه الحوار الركيك دة؟...و إيه نظام المواويل المقحمة في السيناريو؟ زي ابن محمود ياسين كدةة؟

6-و لا الحتة بتاعة المجلس القومي للمرأة اللي لا يفوقها إلا بقين محمود بكر في ماتش الأهلي النهاردة عن الريس في موضوع ضحايا الشطرنج

دراما أونطة...و كله بفلوسنا

خلص الكلام

[فــيــروز]

كل ما نتفرج على المسلسل ده .. على فكره بنتفرج عليه لانه بييجى وقت السحور ولو غير كده لا اعتقد كنا فقعنا مرارتنا بالشكل ده .. اختى تسالنى : هو مين فهم نرمين الفقى انها بتمثل دور سندريللا !! :huh: انا اهز راسى واضحك و اقول ماعرفش ty:) بس فعلا مسلسل ركيك جدا ولا يصلح للعرض حتى فى غير رمضان :huh:

[جـورج]

جورج ... و النبي الدخان بيتعب لي صدري ... الله يخليك ... ;)  ;)  ;)

لانس

تصدق ان الدخان اللى بيتعب الصدر ارحم من الهباب اللى بيتعب المخ

بس عشان خاطرك انت

الف سلامه لك و انشا الله صدر شارون هو اللى يتحرق

smk:

[Lancelot]

الف سلامه لك و انشا الله صدر شارون هو اللى يتحرق

أمـــــــــــــــــــــــــــــــــــين

;) ;) dntl:: ;)

smk: shk():

[Lighthouse]

الف سلامه لك و انشا الله صدر شارون هو اللى يتحرق

أمـــــــــــــــــــــــــــــــــــين

;) ;) dntl:: ;)

smk: shk():

للاسف الشديد

يبدو ان شارون لايشاهد التليفزيون المصري

علشان كده صحته زي البمب fsh::

[Lancelot]

النهاردة العمة نور بدأت فصل جديد من فصول الإستهزاء بنا و بعقولنا ....

عملت فيها جيمس بوند و شرليوك هولمز و أدهم صبري في بعض و قررت تتحدي عصابات المخدرات في الجامعة ....

و نهت إبن أخواها عن أن يبلغ الشرطة لأنها تقوم بمساعدة الشرطة ....

سؤالي .. هل هذا مثال و قدوة حسنة للناس اللي بتتفرج ... و لا كده كل واحد هيعمل فيها باتمان حامي العدالة و يساعد الشرطة علي مزاجه ....

حسبي الله و نعم الوكيل ....

[se_ Elsyed]

طب ماتريح نفسك يا لانس وبلا حرقت دم وأعصاب واتفرج على حاجة مفيدة ...

انا لا اتابع إلا مسلسل واحد فقط وهو " رجل الأقدار " الذي يدور حول قصة الصحابي الجليل سيدنا عمرو بن العاص .

[Cleo]

على أخر الزمن يسرا و نبيلة عبيد بيعملوا مسلسلات تربوية...!!!

تخيلوا لما ولادنا على أخر الزمن يطلعوا تربية يسرا و نبيلة عبيد...!!!!!!!!!

:D

[Sysanalyst]

أنا لاحظت إن فى إعلان عن مسلسل العمة نور فى ميدان روكسى, :D

والظاهر أن العمة نور لها نظرية تسويقية خاصة مختلفة عن نظرية إن الواحد بيعمل إعلان علشان يجيب فلوس منه, ولكن المرة دى بنعمل إعلان علشان مسلسل بنقول فيه فى رمضان إن الرقاصين ولاد حلال وهما اللى حيصلحوا مصر إن شاء الله :D

[Lighthouse]

أنا لاحظت إن فى إعلان عن مسلسل العمة نور فى ميدان روكسى,  :D

والظاهر أن العمة نور لها نظرية تسويقية خاصة مختلفة عن نظرية إن الواحد بيعمل إعلان علشان يجيب فلوس منه, ولكن المرة دى بنعمل إعلان علشان مسلسل بنقول فيه فى رمضان إن الرقاصين ولاد حلال وهما اللى حيصلحوا مصر إن شاء الله  :D

هو مش العمة نور بس اللى لها اعلان في الشارع

يبدو ان دي سياسة ماسبيرو الاعلانية الجديدة للاعلان عن مسلسلاتهم وبرامجهم السمجة في كل مكان

فيه اعلان على عمارة في معروف باشوفها من فوق كوبري اكتوبر لبرنامج حلو وكذاب للمدعو محمود سعد

ياللا

بلدهم بقى وهم احرار فيها fsh::