إيه حكاية عماير بيتشو أمريكان بالمعادي ؟

[se_ Elsyed]

بصراحه

انا من الناس اللي أنخدعت بحجم الدعاية الرهيبة والترغيب وزغللة العين اللي كانوا بيعملوها لفترة طويلة للمستهلكين ..

لكنه كان حب من طرف واحد ...

لأن عمري ما فكرت أسكن في المعادي أو 6 اكتوبر او النواحي دي ...

لكن اتكلم عن التصميمات والأغراءات اللي قعدوا يعملوها للناس من مطلع الألفية كده

المهم الناس راحت دفعت وحجزت وتماما التمام وتعالى يا عم الحج للتسليم ...

خالتي بتسلم عليك

ما فيش تسليم

ورفعوا قواضي وإحتجاجات وبهدلة وقلة أدب واللي حاجز شقة من 6 سنين كل ما يروح يشوف المبنى اللي حاجز فيه يلاقيه لسه عالارض ... ودول لموا الفلوس ... ووريني عرض اكتافك

امبارح العاشرة مساءً أعادت فتح الموضوع بعد موجه إحتجاجات من الحاجزين منذ عدة شهور ... وإنشاء مواقع عديدة عالفيس بوك لتجميع المنصوب عليهم ...

وسبب إعادة فتح الموضوع إن الشركة بتاع بلياتشو أمريكان إنهم هدوا اللعب وما بقوش ينزلوا إعلانات من فترة

لكن مع قرب نزول المصريين المغتربين الغائبين عن البلد واللي الفمروض مش عارفين حاجه .. إبتدت الشركة تنزل إعلانات بنفسة الكثافة الأولى يومياً في لاصحف

فراحت منى الشاذلي عامله تجربة وخلت واحد من طقم البرنامج يتصل بالشركة

وسجلت المكالمة

ويا سلام عالحنيه

إيه يا خواتي ده ... حطين واحد علاقات عملاء بيرد عالناس صوته ولا عبد الحليم وناقص يغني .. ويقولك التسليم فوري والوحدات جاهزة وأدفع وشيل يا معلم .. فلما الراجل سأله : أنا سمعت إن في ناس دفعت ثمن الوحدات ولم تستلم حتى الان ؟ .. يقوم بكل ثقة قايل له : لأ لأ دول توقفوا عن السداد يا فندم ...

تخيلوا يا جماعه بيعيدوا الأن بيع الوحدات المحجوزة واللي متسدد ثمنها مره أخرى .. عيني عينك واللي ما يشتري يتفرج ؟

وكإننا في لا دوله .. ولا حكومة ولا قانون ..

والجرايد الحكومية أصبحت مرتعاً خصباً للنصابين للإيقاع بالضحايا في وضح النهار ...

[se_ Elsyed]

آه نسيت أقول

امبارح عرضوا بعض صور حيه للمشروع خصوصاً للوحدات الجاهزة

أقسم بالله حسيت إين شايف مساكن النهضة بتاعت مدينة السلام والبلوكات الشهيرة دي ... مع أحترامي لكل السكان هناك ..

لكن أنا مش رايح أدفع ربع مليون في شقة وفي الأخر تطلع العمارة شبة البلوك وتحس إنها مدهونة بالأيد ويالا أسكن يا معلم وتلاقي الصرف الصحي ناشع من بره المبنى وحاجه تقرف !!!!

[mfarag]

السلام عليكم

الوحدات دى اتعملت بفلوس الناس اللى دفعت اقساطها من سنين و هتتباع لناس تانية بسعر النهاردة

وفى الاخر لو مش عاجبك ابقى خد فلوسك اللى دفعتها من سنين واللى هما اشتغلوا بيها و طبعا اللى متجبش دلوقتى غرفة مش شقة

طيب هل دة لية اسم تانى غير نصب

و كل دة طبيعى مادام مفيش قانون فى البلد

وطبعا القانون لا يحمى ال.......

وشكرااااااااااااااااااااااااااااااااااااااااااااااااااااااااااااااااااا

[dongol]

في واحد اعرفه كان حاجز في بيتشو و استلم عادي بس المشكله انهم بيخلوه يدفع كل شهر مائة جنية للكهرباء و الميه حتي لو مش قاعد في الشقه

بس انا رحت زرت المكان وفعلا العمارات من بره شكلها عامل زي البلوكات و مفيش فيها ريحة الذوق الجمالي خالص حتي الالوان اللي داهنين بيها العمارات من بره الوان فاقعة كده و تغيظ

[fatfouta]

احنا روحنا وشوفتاها من حوالى اربع سنين كده وكان النظام انك تروح لغايت الشركة عند جرانه مول وبعدين هما ياخدوا الناس اللى هتتفرج بباصات بتاعة الشركة

وركبنا الباص وروحنا وكانت المفاجاة المكان بعيد والعمارات فعلا عاملة ذى البلوكات ذى ماقلتوا وكمان الممرات بين العمارات ضيقة وهيبقى فيه اكيد مشكلة فى ركن العربيات

طلبنا اننا نتفرج عالشقة ال150م وفعلا فرجونا وانت طالع بقى فيه 2 اصانصير او واحد مش فاكرة والسلم ضيق جدااااا والممر اللى بين الشقق جوا ضيق اكتر ويخنق كده

اما من جوا الشقة فكانت الشقة اول مادخلناها حلوة الريشبسن كبير وواسع والبلكونة حلوة انما الغرف جوا بقى ضيقة برضو

والشقة فيها عيب فظييييييييع انه المطبخ ضيق جدااا جدااا وبعدين اللى كان بيفرجنا قلنا خلاص لو مش عاجبكوا المساحة بتاعة المطبخ افتحوه عالحمام اللى جمبه وبما ان ده الحمام الرئيسى والتانى فى اوضة النوم احنا طبعا قلناله اذاى يعنى الشقة مايبقاش فيها غير حمام واحد وهو بتاع اوضة النوم الرئيسييه ويا سلام لو جالك ضيف يروح داخل جوا عشان يدخل الحمام .....طبعا مارضيناش

وعلى ذلك قلنا حلوة وكنا هناخدها على كده وهندفع ورجعنا الشركة ولما جينا نتكلم معاهم قعد المندوب يقولنا عاوزين عرض الشارع ادامكم اد ايه لو 40م هيبقى بكذا ولو 20م هيبقى كذا وقعد ينزل فى المساخات لغايت مانزل ل10م وفيه كمان اقل يعنى تحس انك ساكن فى حارة ولا مؤاخذة

المهم قعدنا نتخانق ناخد لا مناخدش وبعدين واحنا نازلين من عندهم لقينا واحد بيزعق وعمال يقول نصابين فجوزى قالله مالك قالله انا استلمت شقتى يا سيدى ولما روحت اسكن الاقى في صرف صحى ومجارى ايوه لكن مافيش مياة والخدمات زفت ولا فيه اى حاجة من اللى قالوا عليها وقعد يحكى حكاية طويلة خلانا قلنا يالله ننفد بجلدنا ومن ساعتها لو قالوا ببلاش فى اى مشروع ذى كده استحالة نفكر فيه

وربنا يوفق الجميع

[محمد عبدالعزيز]

مصراوي - خاص - أصدر المستشار عبد المجيد محمود النائب العام قراراً الاحد بمنع هشام محمد رضا رمضان رجل أعمال ورئيس مجلس إدراة شركة تراست للاستثمار العقارى والسياحى بالقاهرة من السفر ووضع اسمه على قوائم الممنوعين من السفر وأمر بإلقاء القبض عليه والتحقيق معه فى النيابة العامة بمنطقة المعادى.

تبين أن المتهم حصل على أموال من المواطنين لحجز شقق سكنية وعددهم 100 مواطن بمشروع سكنى خاص بالمتهم أمريكان سيتى بمنقطة زهراء المعادى وحصل الاموال ولم يعطى المواطنين الشقق الخاصة به وظل يماطلهم حتى اختفى.

قام الاهالى بتحرير بلاغات ضد المتهم فأصدر النائب العام قرار بمنع المتهم من السفر والقبض عليه للتحقيق معه فى البلاغات المقدمة ضده.

http://www.masrawy.com/News/Cases/General/...ericancity.aspx

إلى اللقاء فى حلقة جديدة من حلقات مسلسل سرقة ونهب فلوس المصريين

[مهندس تحكم]

طيب يا جماعه ...الناس ايلي عايزة تشتري شقة علشان تعيش فيها (مش للاستثمار يعني) وممكن يكون ثمن الشقة هو كل ما يملكوا في حياتهم ....يعملوا اية ....وازاي يشتروا...ويثقوا في مين....؟؟؟؟؟

[Abu Reem]

طيب يا جماعه ...الناس ايلي عايزة تشتري شقة علشان تعيش فيها (مش للاستثمار يعني) وممكن يكون ثمن الشقة هو كل ما يملكوا في حياتهم ....يعملوا اية ....وازاي يشتروا...ويثقوا في مين....؟؟؟؟؟

اشتري من أشخاص ( أهالي ) أو إتحاد ملاك ، أو اشتري وحدات جاهزة للتسليم من شركات لها تاريخ ومعروفة من زمان ،،، أما الشركات إللي بتنزل إعلانات في الأهرام وخصوصا يوم الجمعة ، فمعظمها تنصب عليك بطرق مختلفة

- معظم هذه الشركات حضرت إلى الدوحة وكان هناك معرض كبير للشقق والفلل والشاليهات

- 90 % من هذه الشركات يعطي لك رسومات روعة وسي دي به ( افتراض ) لشكل المشروع بعد اكتماله ( ثلاثي الأبعاد ) وتلاقي كأنك في مانهاتن ، وزروع وورود ورياحين ، وأشكال مبهرة ،

- تيجي تسألهم إمتى الاستلام ( يقول لك بعد 3 سنين ) احنا رمينا الأساسات ( طبعا كلهم بيقولوا كده )

- الشركة الوحيدة إللي عندها الوحدات جاهزة كانت ( النصر للاسكان والتعمير ) وكان شكل المشروع على السي دي والورق هائل

- رجنا على الطبيعة وشفنا الشقق تلاقي الشقة إللى مكتوب أن مساحتها 140 متر سعر المتر 2600 جنيه تلاقي أنهم يحسبوها لك أنها 170 متر ( طب ليه ) يقول لك أن الجراج مساحته ستضاف إلى مساحة الشقة ، تطلع تشوف الشقق وتقيسها بالمتر ، تجد أن صافي الشقة 100 متر فقط ( يعني 40 متر منااور وبروزات ) ده غير طبعا ال 20 أو 30 متر مساحة الجراج.

- وطبعا لاتجد إلا الدور الأرضي أو الشقق الضيقة جداً

- معلش طولت عليك ، حاول تاخذ شقة يكون واحد اشتراها زمان وعاوز يبيعها.

[Abu Reem]

وكإننا في لا دوله .. ولا حكومة ولا قانون ..

والجرايد الحكومية أصبحت مرتعاً خصباً للنصابين للإيقاع بالضحايا في وضح النهار ...

فعلاً اسلوبة الدعاية المبهر في الجرائد ووسائل التقنية الحديثة اللي تخليك تشوف شكل المشروع الافتراضي بعد ما ينتهي تخليك تحط ايدك في جيبك وتديهم إللي معاك علشان تحجز ، والناس طبعا لا تشك في اعلانات الجرائد،،

بالنسبة للشقق إللي بتتكلم عنها أنا شايف الصور اللي انت منزلها كويسة يعني شكلها مش بطال ،

وبعدين طيب مش فيه عقود مكتوب فيها التسليم بتاريخ كذا ، وهل لم يكن هناك شرط جزائي ، ياريت تقول لنا طيب هما ناويين على ايه ، يعني هل مثلا قالوا ان التسليم سيتأخر شوية ، ام هل طلبوا دفع مبالغ أخرى مثلاً ، يعني وصلتوا لإيه معاهم!!

-

تم تعديل 29 يونيو 2009 بواسطة Abu Reem

[se_ Elsyed]

بالنسبة للشقق إللي بتتكلم عنها أنا شايف الصور اللي انت منزلها كويسة يعني شكلها مش بطال ،

وبعدين طيب مش فيه عقود مكتوب فيها التسليم بتاريخ كذا ، وهل لم يكن هناك شرط جزائي ، ياريت تقول لنا طيب هما ناويين على ايه ، يعني هل مثلا قالوا ان التسليم سيتأخر شوية ، ام هل طلبوا دفع مبالغ أخرى مثلاً ، يعني وصلتوا لإيه معاهم!!

-

مين اللي وصلوا يابو ريم ؟

انا عرضت الموضوع فقط عندما سمعت به وقرأته عالفيس بوك للناس اللي إندهست وراح شقى عمرها ...

ما أكثر العقود ...

سوري هايقولك بلها واشرب ميتها ...

وميعاد التسليم فات والسبت فات والحد فات ومعدنا بكره يوم التلات .. وهو النصاب بتهمه الحاجات الصغيرة دي عقود وكلام فاضي من ده ...

غالباً ما يكون الشرط الجزائي على المشتري أما البائع فبيبقى صاغ سليم وطاهر وصفحته بيضا

[Abu Reem]

بالنسبة للشقق إللي بتتكلم عنها أنا شايف الصور اللي انت منزلها كويسة يعني شكلها مش بطال ،

وبعدين طيب مش فيه عقود مكتوب فيها التسليم بتاريخ كذا ، وهل لم يكن هناك شرط جزائي ، ياريت تقول لنا طيب هما ناويين على ايه ، يعني هل مثلا قالوا ان التسليم سيتأخر شوية ، ام هل طلبوا دفع مبالغ أخرى مثلاً ، يعني وصلتوا لإيه معاهم!!

-

مين اللي وصلوا يابو ريم ؟

انا عرضت الموضوع فقط عندما سمعت به وقرأته عالفيس بوك للناس اللي إندهست وراح شقى عمرها ...

ما أكثر العقود ...

سوري هايقولك بلها واشرب ميتها ...

وميعاد التسليم فات والسبت فات والحد فات ومعدنا بكره يوم التلات .. وهو النصاب بتهمه الحاجات الصغيرة دي عقود وكلام فاضي من ده ...

غالباً ما يكون الشرط الجزائي على المشتري أما البائع فبيبقى صاغ سليم وطاهر وصفحته بيضا

معلش افتكرتك اتطورت لما قريت كلمة ( انخدعت ) في أول مداخلتك ، الحمد لله جت سليمة ،،، وربنا يسهل للناس اللي اتورطت.

- على العموم تنبهيك لمثل هذه المصائب به فائدة كبيرة جدا علشان الناس لا تنخدع ، وبصراحة الواحد مش عارف يحاسب من الأكل الملوث ولا من نصابين شركات العقار ،

( كل واحد يخلي فلوسه في جيبه خصوصا في أجازة الصيف لأن هناك من ينتظر جيوب المغتربين بفارغ الصبر :D )

تم تعديل 29 يونيو 2009 بواسطة Abu Reem

[se_ Elsyed]

معلش افتكرتك اتطورت لما قريت كلمة ( انخدعت ) في أول مداخلتك ، الحمد لله جت سليمة ،،، وربنا يسهل للناس اللي اتورطت.

- على العموم تنبهيك لمثل هذه المصائب به فائدة كبيرة جدا علشان الناس لا تنخدع ، وبصراحة الواحد مش عارف يحاسب من الأكل الملوث ولا من نصابين شركات العقار ،

( كل واحد يخلي فلوسه في جيبه خصوصا في أجازة الصيف لأن هناك من ينتظر جيوب المغتربين بفارغ الصبر

النصب موجود في كل مكان طالما الأنسان موجود

فاكر المخططات هنا في السعودية ؟

وصالح الدريبي وغيره

وشركات المضاربة ف البورصة اللي خلت الناس تنتحر

وشركات توظيف الأموال في كروت الشحن ؟

[بركة]

كان لنا جار الله يرحمه حجز فيها وبيدفع الاقساط تمام التمام وواخد موقع الشقة ورقمها وفين

العمارة وكله ماشي في السليم .؟

لحد ما توفاه الله وراحت والدته تستلم في الميعاد أول ما الموظف عرف ان صاحب الشقة الأصلي

مات عملها زي القرد وقعد يتنطط وحاول يسلمها شقة تانيه خالص أصغر و على جوه وفي دور تاني

ولما حس انها مش هيتضحك عليها وانها فاهمه اداها الوش التاني وقالها لا لسه عليكو فلوس

عشان تستلمي الشقة اللي بتقولي دي بتاعتكم ..

طب ازاي ماهو كله في العقد مكتوب قالها حصل تغيير في الاسعار ولم يتم اخطاركم اللي عايز يستلم

شقته يدفع واللي مش عايز ياخد فلوسة..

المهم هي كانت معاها ناس كويسين ولهم معارف جابولها حقها واستلمت وبتبيع الشقة عشان

البلوكات طلعت بمستوى :rolleyes:

[HassanMMM]

طيب يا جماعه ...الناس ايلي عايزة تشتري شقة علشان تعيش فيها (مش للاستثمار يعني) وممكن يكون ثمن الشقة هو كل ما يملكوا في حياتهم ....يعملوا اية ....وازاي يشتروا...ويثقوا في مين....؟؟؟؟؟

حسبي الله ونعم الوكيل:

انا تعرضت لنفس السرقه لكن من شركه تانيه اصغر شويه لكن في زهراء المعادي برضه هي شركه: المعادي للأسكان والتعمير

وصاحبها اسمه الحاج ابو الوفا مقرها في المعادي الجديده فوق مطعم مؤمن واللينك:

http://www.egyptiantalks.org/invb/?showtopic=69475

بس انا لسه مش عارف ليه اداره المنتدي عدلت العنوان وشالت اسم الشركه منه رغم انه الهدف تحذير الناس من الشركات دي بالأسم

و حسبي الله ونعم الوكيل في مثل هذه الشركاتز

[se_ Elsyed]

إبتسم أنت في عصر مبارك

الراعي الرسمي للفساد

مستند رسمى يكشف عدم صدور تراخيص لبعض مراحل «بيتشو أمريكان سيتى».. وارتفاع بلاغات الحاجزين إلى «٨٠»

كتب وفاء بكرى وفاروق الدسوقى ٤/ ٧/ ٢٠٠٩

حصلت «المصرى اليوم» على بلاغات جديدة تقدم بها نحو ٢٠ حاجزاً فى المرحلة الرابعة بمشروع «بيتشو أمريكان سيتى» بالمعادى إلى النائب العام، اتهموا فيها الشركة بالتأخر عن التسليم ٩ شهور كاملة، وأكدوا أن وحداتهم مازالت المخصصة فى العقود لاتزال مجرد «أساسات»،

فضلاً عن صدور مستند رسمى من حى البساتين بمحافظة القاهرة ـ حصلت «المصرى اليوم» على نسخة منه ـ يفيد بعدم منح تراخيص عدد كبير من العمارات فى مراحل المشروع، وتم إيداع المستند الأصلى بمحكمة المعادى، الخاصة بنظر دعاوى الحاجزين ضد الشركة.

وقال كامل جمعة أبورحاب ـ محامى الحاجزين لـ«المصرى اليوم» ـ إن حاجزى المرحلة الرابعة فوجئوا منذ ٧ شهور تقريباً بأن الشركة ترفض تسلم الدفعة الأخيرة من القسط المحدد فى العقود المبرمة بينهم لأسباب غير معروفة، مشيراً إلى أنهم قاموا بتحرير محضر للشركة فى قسم المعادى لإثبات رفضها تسلم الدفعة وتسليم الوحدات فى الموعد المحدد لها، خاصة فى ظل مطالبة الشركة بسداد مبالغ تتراوح بين ٣٥ و٤٥ ألف جنيه «نقداً» للبدء فى التسليم، بما يخالف شروط التعاقد.

وأضاف أبورحاب: «قام حاجزون بإيداع المبالغ المحددة فى خزانة المحكمة باسم الشركة، فى انتظار التسليم الذى تأخر ٩ شهور، وبعدها قاموا بزيارة الموقع المحدد للمرحلة الرابعة وفوجئوا للمرة الثانية بأن الشركة لم تستكمل بناء المرحلة التى مازالت مجرد أساسات»،

مشيراً إلى أنه تقدم ببلاغات إلى النائب العام ضد الممثل القانونى للشركة يتهمه فيها بالاستيلاء على أموال الحاجزين والنصب عليهم، على اعتبار أن الشركة أوهمتهم بوجود وحدات والتعاقد عليها نظير مبالغ طائلة، دون أن يكون لها وجود على أرض الواقع.

وحصلت «المصرى اليوم» على صورة من مستند رسمى صادر من قبل حى البساتين بمحافظة القاهرة يفيد بأن الشركة لم تتقدم للحى لإصدار تراخيص المرحلة الرابعة بالكامل، وأنها تقدمت بطلب إلى التخطيط العمرانى بالمحافظة لتعديل أرض المرحلة وتقسيمها، إلا أن المحافظة لم تبت فى الطلب حتى الآن، وبالتالى لم تصدر التراخيص اللازمة للمرحلة.

وأشار التقرير الخاص بالحى، الذى تم إيداع النسخة الأصلية منه بمحكمة المعادى، إلى أن المرحلة الأولى التى سلمت الشركة فيها عدداً كبيراً من الوحدات تم تقسيمها إلى ٥٦ قطعة، وتم إصدار تراخيص لعدد ٢٩ قطعة فقط، بينما لم تصدر باقى التراخيص لعدم ورود تقرير مركز بحوث البناء والإسكان الذى يفيد بصلاحية العمارات، مما ينذر بالخطر على حياة المواطنين الذين تسلموا الوحدات فى هذه المرحلة.

وأوضح مستند الحى أن المرحلة الثانية مقسمة إلى ١٢ قطعة، وتم إصدار تراخيص لقطعتين فقط فيها، والمرحلة الثالثة مقسمة إلى ١٧ قطعة تم إصدار تراخيص لـ ٧ قطع فقط، ولم تتقدم الشركة بمستندات تراخيص العمارات للحى، فضلاً عن عدم إخطاره بإنهاء الأعمال للقطع التى صدرت بشأنها التراخيص ليتسنى للحى عمل مطابقات لازمة لإدخال المرافق ومخاطبة الدفاع المدنى.

من ناحية أخرى، تباشر نيابة المعادى بإشراف رئيسها أحمد دعبس تحقيقاتها فى البلاغات المقدمة ضد مسؤولى الشركة، وكشفت التحقيقات أن النيابة أصدرت أمر ضبط وإحضار لصاحب الشركة لكنه لم يمثل أمام النيابة ـ حتى مثول الجريدة للطبع ـ وحضر عدد من المحامين عنه، واعدين بتسليم الوحدات السكنية للحاجزين على مراحل خلال الفترة المقبلة.

واستمعت النيابة إلى أقوال ٦ آخرين من الحاجزين المتقدمين بالبلاغات، والذين وصل عددهم حتى أمس إلى ٨٠ مبلغاً، وأجمع الحاجزون أمام أحمد الشناوى وكيل النيابة على أنهم قاموا بحجز وحدات سكنية من الشركة وسددوا جميع الأقساط المطلوبة منهم، لكنهم فوجئوا بامتناع مسؤولى الشركة عن التسليم دون أسباب واضحة.

وعلمت «المصرى اليوم» أن عدداً من الحاجزين بدأوا فى تسلم وحداتهم أمس «على المحارة» ودون تشطيب «سوبر لوكس» كما هو منصوص عليه فى التعاقد، رغبة فى انتفاء أسباب البلاغات المقدمة ضد الشركة على أن يكون تاريخ التعاقد فى ٢٠١٠ بما يعنى التسليم قبل الموعد بسنة على الأقل، فيما رفض عدد من الحاجزين فى المرحلة الرابعة التسلم انتظاراً لما ستسفر عنه تحقيقات النائب العام.

[se_ Elsyed]

هههههههههه

الإسبوع الماضي شب حريق رهيب في احدى مصانع الكرتون بمدينة 6 أكتوبر قبل يوم واحد من زيارة مبارك لها .... والخساير 8 مليون وأرتفعت ألسنة اللهب إلى عنان السماء وقعدوا أكتر من 8 ساعات يطفوها .. لكن اللي أتحرق في 30 سنة مستحيل يتطفى في ساعات ...

المهم السيد رئيس جهاز المدينة كان هناك يتابع الموقف أول باول وصرح معاليه إن المصنع لم يصد رله ترخيص وتم تحرير 4 محاضر على مدار عدة سنوات هذا الخصوص ...

ههههههههههههههههههههه

ونسي يقول إن اللي بيحرر المحضر كان كل مره بياخد 10 جنيه ويبوس إيده وش وضهر ويروح يشتري فاكهة للأولاد ..

أصل إحنا بنطبق الرأسمالية بحذافيرها ...

دعه يعمل ..

دعه يمر

آه صحيح ... ماحدش عنده خبر مشروع أعمار في المقطم أخباره إيه ؟ ههههههههههههههه

عسل والله ... واللي ما عملش مليارات في عصر مبارك وتحت جناحه .. يبقى مش هايشوف خير ...

متر الأرض شارياه إعمار بـ 80 ج ..... وباعت رملة .... كيس رمل .. أقل متر بيبدأ من 8 آلاف ج .... هههههههههههههههه

[se_ Elsyed]

امبارح كان في حلقة مسخرة من العشرة مساءً وخصصوها لضحايا هذا البيتشو وجابو كمان محامي الشركة

اللي اعتقد اسمه دسوقي افندي اللي بيقف قدام المحاكم يكتب عاريض ويأجر شهود زور ، ولما احاطت به الحقائق من كل حدب وصوب جاوب اجابة نموذجية وقال : اومال لما احنا نصابين ... ليه الناس كل يوم بتيجي تحجز عندنا وتدفع فلوس ؟؟ ههههههههههههه

آه صحيح

نسيت اقول لكم في ناس حاجزه من 2002

ولسه ما استلمتش

ههههههههههه

على اساس ان دي حاجه للاحفاد يعني وربنا يديهم طولة العمر

وعلى راي المثل

انا نصاب ... إذاً انا في عصر مبارك

[أحمد سيف]

اومال لما احنا نصابين ... ليه الناس كل يوم بتيجي تحجز عندنا وتدفع فلوس ؟؟ ههههههههههههه

عارف ليه ... علشان احنا شعب طيب و ***** ومش بنتعلم من أخطاءنا ... وطريقة تفكيرنا وردود افعالنا سهل جدا التنبؤ بيها ... احنا شعب يتمناه أي نصاب أو ديكتاتور

الناس خسرت مليارات في شركات توظيف الأموال منذ سنوات ... ولو جيت النهارده تقول للناس إنك هتعمل شركة توظيف أموال هتلاقيهم بيتحايلوا عليك علشان تاخذ منهم الفلوس

الكل عارف إن أسعار العقارات وصلت مستويات غير طبيعية ولا تتناسب مع مستوى الدخول في مصر ورغم ذلك الكل مصّر على الشراء في هذا الوقت سواء محتاج العقار أو مش محتاجه

الناس شايفه خريجي ما يسمى بكليات القمة مش لاقيين شغل أو بيشتغلوا بملاليم وبرضه مصممين يدخلوا أولادهم الكليات دي وبيدفعوا دم قلبهم في الدروس الخصوصية ولو قلتلهم دخل الواد تمريض أو معهد فني صحي أو مبارك كول تبقى كإنك بتشتمهم رغم إن ده اللي عليه الطلب

لو عملت انتخابات حرة اليوم أغلبية الشعب المصري هتنتخب حسني أو جمال كرئيس للجمهورية وهيقلولك اللي نعرفه أحسن من اللي منعرفهوش

ممكن أضرب لك أمثله من هنا لبكره الصبح عن مشكلة الجمود الفكري والخوف من التغيير اللي عامله لنا مشكلات كثير في حياتنا ومعطلة تقدم البلد

يبقى لازم نعترف إننا كشعب مصري نتحمل جزء من المسؤولية عن اللي بيحصل لنا ... وبصراحه مش عارف ايه سبب الظاهرة دي هل هي مشكلة في الجينات ولا الحكاية موروث ثقافي نحمله منذ آلاف السنين ... المهم إننا لو فضلنا بالعقلية دي يبقى مفيش أمل أحوالنا تتحسن.

[طه بدر]

بص ياحاج سيد

انا اقولك الحكاية من الاول

فى يوم لقيت الحاجة ام العيال بيتقول الحق يا ابو طه فى شركة منزلة شقق فى المعادى وسعرها خطير 555ج بس

الحق وهات لك اثنين ثلاثة نشليهم للولاد :)

لكن علشان صاحبك خبير فى حالات النصب وخاصة فى موضوع العقارات بداية من موضوع شراء العتبة الخضراء زى اخوانا اسماعيل ياسين - الله يرحمه- وصولا لمشاريع مثل صقر قريش التى مات احفاد الحاجزين ومازالت تحت الانشاء بدات قرون الاستشعار والشك والريبة تشتغل

ازاى تعمل شقة وتبيع المتر ب555ج اذا كان اقرب واحد لك فى عباد الرحمن او غيرها يبيع باكثر من 800ج.

هل تعمل لوجه الله والوطن والا العملية فى النملية من الاول

المهم ما اطولش عليك اكتفيت بخناقة من الحاجة من نوعية انت مش ها تعمل حاجة فى عمرك

والناس كلها بتحجز وانت قاعد تتفرج وخلافه وقلت اهى خناقة وتعدى

يوم ورا يوم - زى عمر دياب- بتابع الموضوع علشان اشوف النظام

بدا الموضوع بكلام عن ملكية الارض وكلام عن مخالفة الارتفاع - والتضبيط مع مهندسى الحى الذى تم تغيرهم وجارى التضبيط مع الجدد- نفس الحال مع المحافظ نفسه

طبقا لكلام العالمين بالامور وهم كل الشعب المصرى بالمناسبة

ثم كلام عن البناء فى حرم الكهرباء وكلام عن المرافق التى لم تصل للمنطقة وغيرها وغيره

كل ده واحنا قاعدين زى ملائكة مدرسة المشاغبين

حتى انفجر الوضع الان

الكلام هو مين اللى غلطان

اللى اشترى التراموى والا احمد مظهر اللى باعه؟؟؟؟؟؟؟؟؟؟؟؟؟

قلت بالسابق ومازالت اقول

عندما تشترى جزمة - لامواخذة- تذهب لمائة محل حتى تتاكد من الجودة والخامة والصيانة كمان

لكن عندما تتخذ قرار بمئات الالاف فى شراء ارض او عقار فان اعلان مزخرف بالجريدة او كلام سمسار بعمة مزيته هو كل ما تحتاجه لدفع الاموال

وعندما تكتشف ان وقعت ضحية نصب نجرى ونصرخ فين الحكومة الحقونى ياناس

المصيبة واحدة فى بيتشو وفى طريق الاسماعيلية وفى كل المشروعات المتعثرة

طماع ونصاب احيانا - علشان ما نظلمش الناس كلها - و موسسات غير موجودة للمراجعة والضمان والتامين ومهنة تتعامل فى مليارات الجنيهات وتوثر فى اقتصاد البلد وحياة الناس كل موهلاته عمه وشبشب والناس تقول عليك المعلم فلان السمسار لتقرر انت والبوابين اصحابك سعر المنطقة وترفع مشاريع السما وتخسف باخرى الارض بينما الموهلين فعلا فى المجال يضربون اخماس فى اسداس وهم يشاهدون كل نظريات العالم تتحطم على مقاهى السماسرة

فى فيلم - فيلم ثقافى - جاء الاخ الخبير فى تشغيل الفيديو للشباب وصرح لهم اخيرا ان العيب فى النظام.

صحيح العيب فى النظام :unsure:

مع تحياتى

[abdulmuttaleb]

تحياتي للجميع،

المشكلة العظمى التي ألاحظها هنا في مصر هي غياب ثقافة (الاستشارة)

فمثلا لا يوجد من يهتم باستشارة محامي قبل توقيع عقد شراء أو بيع

ولا يوجد من يكترث لسؤال (المتخصصين) قبل الإقدام على دفع شقى العمر في شقة بمشروع سكني

هذه المشكلة يقابلها على الجانب الآخر تخصصات في النصب والاحتيال، فقد نشرت الصحف أن مشروع بيتشو أمريكان يقوم بحركة ظريفة لطيفة خالص خالص، وهي ببساطة أنه عند توجه العميل لدفع آخر دفعة نقدية قبل الاستلام فإنّ الشركة ترفض استلام الدفعة!!! وبالتالي يحلّ موعد السداد بدون دفع ويكون العميل متخلفا عن السداد وبالتالي وطبقا للعقد المبرم بين الطرفين يحق للشركة إنها تعمل اللي هي عايزاه في الوحدة، وطبعا الشركة لا تتصرف في الوحدة ولـكـن تستغل هذا الموقف في المماطلة في التسليم.

من اشترى منكم أهرام الجمعة الماضي 3يوليو الذي أعتبره عددا تاريخيا، سيلاحظ أن هنالك ملحقا إضافيا للعقارات به 8صفحات خصصت منها اثنتان لشركة بيتشو أمريكان، إحداهما بيان صحفي مضحك، والأخرى لحوار صحفي مدفوع الأجر مع المدعو هشام محمد رضا وتضمن الحوار مانشيتات مستفزة منها بالحرف الواحد (أنا عبقرية اقتصادية يجب أن تدرس بالجامعات) وأما نص الحوار فيتضمن كلاما غير واقعي وغير صحيح منها أنه عضو في مجالس إدارات شركات مساهمة في أمريكا والوطن العربي، وهو الرجل الذي لم يكشف عن مؤهلاته العلمية.

طبعا لم يفت الأهرام أن تنشر مع الحوار صورة للرجل بين مرسي عطا الله ووزير الإسكان المغربي في إطار معرض للعقارات ترعاه الشركة المنفذة تراست جروب.

فيا أيها السادة إذا كان هذا الهزل يحصل في الأهرام فماذا تنتظرون؟

أظرف ما في الملحق أن الشركة نشرت إعلانا أيضا عن وجود وحدات للتعاقد، وضمن بيانات الاتصال وضعوا عنوانا في الولايات المتحدة لكن فقط عنوان بدون لا ايميل ولا رقم تلفون ولا موبايل، ويبدو ذلك محاولة أخرى لإيهام الرأي العام

وهذا بالمناسبة ليس بجديد على الصحافة، ومن يقرأ الموضوع الذي نشرته نقلا عن موقع الوسط الصحفي والذي عنوانه قصة ترشيح نبيل البوشي رئيسا لوزراء مصر سيرى العجب العجاب وسيشاهد تورط صحف كالمصري اليوم والشرق الأوسط والأهرام في تلميع شخصية النصاب نبيل البوشي:

http://www.egyptiantalks.org/invb/?showtopic=72972

وهذا صحفي آخر ينادي هشام محمد رضا برجل الأعمال الوطني ويصفه بالمهندس لاحظوا تاريخ المقال في 2006م وهذا الصحفي يعمل بجريدة الأهالي:

http://www.ahewar.org/debat/show.art.asp?aid=57969

وبعد الدعبسة في الانترنت وجدت خبرا في حوادث الجمهورية عن اتهام المدعو هشام محمد رضا بالنصب والاحتيال منشورا في أيلول2007م:

http://www.gom.com.eg/algomhuria/2007/09/0.../detail09.shtml

ووجدت موضوعا آخر عن شكاوى التسليم والاختلاف عن بنود العقد والتي أراهنكم على أن 99% من الملاك لم يستشيروا محاميا في هذه البنود:

http://dvd4arab.maktoob.com/showthread.php?t=748654

تحذير: الرابط أعلاه في الديفيدي العربي يضم مآسي لشباب مصري زي الورد منهم من اقترض من البنوك ليسدد باقي ما عليه للشركة لكي يستلم شقة يسكن فيها

بالمناسبة هنالك عدد كبير من الناس لا يدركون نوعا من النصب الخفي (على وزن اللهو الخفي) الشائع هذه الأيام،

وهو أن آتي لمجموعة ناس بمشروع كويس ومربح، وباسم الله أبدأ جمع الأموال منهم، وأقوم أعمل حاجات لمصلحتي أنا مشروع خاص بي مثلا وبعد فترة أبدأ فعلا في تنفيذ المشروع المربح المتفق عليه، وهذه آلية نصب واحتيال محرمة شرعا وقانونا يقوم بها كثيرون في هذا الزمن،

يعني أنا أراهنكم أن هشام محمد رضا النصاب ده بقى مليونير بفلوس أصحاب الشقق الحاجزين حيث من المؤكد أنه دخل بهذه النقود أو بعضها في مشاريع أخرى لمصلحته الشخصية قبل أن ينهي المشروع الذي دفع الناس النقود من أجله، وهذا يفسر التأخير الحاصل، ويفسر اختلال كل الحسابات لأن النصاب ده غالبا بيكون مستواه التعليمي متدني فبيعتقد أنه مفيش مشكلة أنه يبدأ المشروع بعد سنة أو سنتين يكون دخل في كام مشروع خاص يدر ربحا جيدا وبعد كده يبدأ المشروع اللي اتفق مع الناس عليه.

أخيرا

لي عتاب على السيد العضو المحترم (سي السيدse_elSayed) وهذا العتاب في أنه يلوم الرئيس والحكومة المصرية وعهد الرئيس مبارك وكأنه هو سبب ما حصل للضحايا، أنا لا أقول إنه يوجد بشر بدون أخطاء، ولكني أختلف كثيرا مع الإخوة الذين يرون الخطأ والعيب فقط في شخص رئيس الدولة، نعم رئيس الدولة يتحمل جزء من المسؤولية، ولكن لماذا لم نسأل أنفسنا:

1-ما هو التعليق على موظفي المشروع الذين يمنعون مسددي الدفعة الأخيرة من السداد بحجج واهية؟

2-ما هو التعليق على موظفي مبيعات المشروع الذين كانوا يبيعون الوهم ويدركون طبيعة المشروع؟

3-ما هو التعليق على مسؤولي المحليات الذين كانوا يرون المشروع ومخالفاته وكانوا كعادة أول مشروع نصب في بدايته لا يثيرون أية زوبعة كي تكتمل خيوط النصب؟

أليس هؤلاء هم العنصر الأساسي في تعرض المواطنين للنصب والمماطلة وتعب الأعصاب؟

تم تعديل 7 يوليو 2009 بواسطة abdulmuttaleb