الهجره نعم ولا , (مقاله من المصرى اليوم,للتوعيه وليست للاحباط)

[montrealAlex]

اسواء ما فى الهجرة ح يكون افضل من مصر

والنجاح فى الهجرة يعتمد على الشخص نفسة

خلاص ملكش حجة - فى مصر بتقول ان التعليم والمواصلات والصحة والجو والكوسة والواسطة

لكن انت الان فى المهجر -- اعتمد على نفسك وو رينا قدراتك

انما مش عارف امشى فى اللغة ومش عارف اعمل علاقات ولما مشيت فى الشوارع تهت ولما رحت الجامعة معرفتش افهم حاجة

يبقى تاخد الاتوبيس وتروح بيتكوا احسن

وشكرا

صديقي العزيز منتريال اليكس انا اختلف مع كلامك وخصوصا اول جمله

اسوء ما في الهجره هيبقا اسوء مافي حياتك ((لا قدر الله طبعا))

في تجاارب ناجحه اه وبرضه في تجارب مؤلمه وانا اعرف ناس من هنا وناس من هنا

بس توفيق ربنا قبل اي حاجا والتخطيط الكويس والعزيييمه بالتعب

اما ان الناس تهاجر عشان غيرهم هاجرو ((سياسه القطييع))هي دي الناس الي بتتبهدل

حبيب قلبى فايزر باشا

انا مقتنع بكلامك تماما -- الهجرة فيها كدة وفيها كدة

انا وجهة نظرى ان --1- فرد مجتهد وناجح فى مصر دا شخص نحت الصخر للوصول الى النجاح

2-او وصل للنجاح بطرق انت عارفها ودا مبيفكرش فى الهجرة لان مصر بالنسبالة الجنة المريحة

3- شخص مجتهد و غير ناجح بسبب انة لم يجد الطريق عدم وصولة للطريق الصحيح

4- شخص فاشل فى مصر

الاول نسب نجاحة فى الهجرة عالية والتانى غير مهتم بالهجرة اما التالت نسب نجاحة فى حياتة كويسة اما الاخير فليس من الضرورى ان يكون فاشل فى الخارج ايضا

الامر يرجع بالمقام الاول للشخصية وتوفيق الله تعالى

كما انى اقصد انة من الممكن ان تجد انسان فشل فى مصر نتيجة الظروف المحيطة

مثلا كل ما يقدم على شغل يلاقى الوسايط راح عمل مشروع جالة بتوع الضرايب ومكتب العمل والصحة والحى وحماية المستهلك وفى الاخر قال جاى قفلة

راح الخليج عرف ان نظام العبيد لسه منتهاش فى العالم راح مهاجر

كل ماسبق كان نتيجة الظروف الاجتماعية المهببة اللى احنا عايشنها

لكن فى الهجرة الحياة بتعتمد عليك مش انت اللى بتعتمد على الحياة

عايز لغة روح ادرس وبدل الشغل الكاجوال فى 100 اختار الى المناسب ليك

الدراسة اختار الوقت المناسب ليك علشان المعادلة

لو مش عاجبك غير المدينة -- مثلا من مونتريال الى تورونتو او من تورونتو الى كالجارى وهكذا

طيب بعد كل دة الفشل يجيى منين

طيب فايزر باشا انت تصدق ان كان فى اتنين مهندسين على مراكب الهجرة الغير شرعية -- دلوقتى بقوا من رجال الاعمال اصحاب البزنس

وما بين الاتنين قصص وقصص تثبت ان الموضوع بيعتمد على الشخص وقدراتة

عارف انا يمكن بأكد اوي على جزئيه ان الهجره متتخدش بمبدئ اشمعنا هما هيسافرو وانا لاء ليه؟

يعني مثال المهندسين الي كانو على مراكب الموت دول

ده نموذج لشاب شاف انه وصل للنهايه وربنا كرمه فالاخر تعب وشقي وفكر وطور نفسه واكييد ضحى بحاجات كتيير عشان يوصل للي وصله وفي غيره ودول الاغلبيه بيضيعو

يعني يمكن بيغظني اوي واحد لخمه ومش عارف ياخد اي خطوه فحياته ومشتت ويمين يمين شمال شمال ده هيسافر يعمل ايه؟

انت عارف مره بكلم واحد (محامي)بقله وانت عايز تروح كيبك ليه؟

الاجابه تتصور كانت ايه؟؟؟

الاجابه كانت:أصل انا ليا خالي هناك ملياردير(طبعا ده متصور الفلوس هناك بتنزل زي التلج) وهو قالي ان انا لما اروح كيبك هاخد الجنسيه وارجع بقا مصر و اتجوز اي بنت انا عايزها

يعني كل الفلم ده عشان يتجوز الي هتعجبه ساعتها....

طبعا ده مزودها واكيد الناس مش رايحه هناك للسبب ده

وبعدين بقا لو مش عاجباني منريال هروح فين(انت نسيت زي ما انا نسييت موضوعك بتاع الولاء لكيبك ولا ايه) شكلك بتلمع اؤكر يا مريالا

ربنا معاك ويرجعك لينا بال سي اس كيو انشاء الله

فايزر باشا

انا ما نسيتش الولاء ولا حاجة بس

احنا بنتكلم على نقطة المحك -- وهى الفشل فى الهجرة -- اذا كان بقائى فى مونتريال ح يفشل مشروع الهجرة يبقى باى باى مونتريال --دا بالنسبة الى اى حد تانى

اما انا ف مونتريال اولا واخيرا -- يكفينى فخرا ان واحد صاحبى كان فى سيدنى 3 سنوات وعمل هجرة كيبيك وهو الان فى مونتريال

-- بيقول ان مونتريال احسن من سيدنى بكتييييييييييييييييييييييييييييييير -- طبعا انا مجبتش سيرة مصر لانها خارج المقارنة

انا ماطلبتش غير بعض الولاء لكيبيك -- لكن لو شايف ان سكتك مش فى كيبيك يبقى مصلحتك اولا

اما تقدم كيبيك وتظبط حالك على غيرها قبل ما تسافر حتى -- انا شايف انه مش صح

ارجو ان تكون وجهة نظرى واضحة

[اغابي]

اعزائي فى المنتدى الجميل

بالنسبة للفشل والنجاح

انا جيت مع جوزي الكويت من 8 سنين فى نفس السنة جات واحدة صديقتى من مصر برضوه مع جوزها وجه ابن خالى

اولا صديقتى هى وجوزها فشلو فى كتير من الوظايف لدرجة ما بقاش معاهم حتى تسديد اجرة الشقة واخرت دخول بنتها المدرسة لان مش معاها ال350 دينار مصاريف للمدرسة رغم جوزها تخصص جوزي نفس التخصص

وبقيت تتنقل من شغلة لشغلة وجوزها زيها وتعبت ببنتها وبعد سنتين فى الكويت رجعو مصر

اما ابن خالى فضل 3 سنين مش ماشي معاه الحال رغم امكانياته رائعة فى الدراسة واللغة وكمان كان جاى بمبلغ كبير ابوه سددهولو للكفيل - ووصل بيه الحال ان اهله فى مصر كانو يبعتولو مصاريف من مصر ياكل ويسكن تخيلو مش العكس - واستلف من كل الناس

وبعدين سافر مصر وخسر مبالغ طائله غير ال3 سنين كمان لكن احنا والحمدالله انا بعد ما جيت الكويت باسبوع ابتديت ادور علي شغل باجتهاد بجنون مفيش رحمة ( لكل مجتهد نصيب ) وشوية شوية افهم البلد انا وجوزى ضبطنا امورنا والبدايه كانت اول سنتين صعبين جدا جدا والواحد استحمل كتير وحاول يتأقلم مع الناس واطباعها ويستحمل - و الحمدالله مشي الحال

انا باحكي لكم علشان دي مش هجرة دا نموذج لدولة عربية ( الكويت )

[اغابي]

الفشل مش لازم يقابلك فى الهجرة لا ممكن لو رحت السعودية او الكويت او دبي - دا مالوش علاقة بالمكان ممكن فى مصر تعمل مشروع ضخم ويكلفك كتير وبرضوه تفشل وممكن تعمل فى امريكا سوبر ماركت وينجح انا كان معايا زميلي فى الشغل فى الكويت جاتلو امريكا لوتاري هجرة لم كل اللى حوشهم فى الكويت لمدة 11 سنة واخد اولاده ومراته وسافر امريكا وفى البداية كمان نزل فى فندق وعمل سوبرماركت شارك فيها واحد فلسطينى هناك وناجح جدا وهو على اتصال بينا ليه سنة دلوقتى مسافر وبيحكى ان البقالة ماشي حالها وكمان شغالين عنده فيها ناس

النجاح او الفشل فى اى مكان فى العالم

[ramyfathalla]

والله يا أغابى كلامك صح 100% حتى لو الواحد مش مسافر و قاعد فى مصر لازم يصبر فى شغله لأن الصعود الى القمة مش سهل و مش فى يوم وليلة و أنا عايز أضيف على كلامك أنى لو الواحد يرضى على حاله و يجتهد و ما لوش دعوة بغيره ده معاه كام و ده فى منصب ايه أكيد حيرتاح و ربنا حيكرمه فى يوم ما.. المهم أحاسب نفسى كل فترة بمعنى بذلت مجهود قد ايه و حصدت ايه و أكيد حيكون فيه تقدم لو فيه اخلاص وضمير .المشكلة تكمن فى الحلم بأكثر من الواقع.

[ام محمد]

اعتقد ان الفرص الاستثمارية في مصر ميسرة وفرص النجاح كبيرة اكبر من الخليج او امريكا ...اقصد راس المال المعقول مش شرط يكون كبير ..ممكن يفتح مشروع متوسط ويمشي حاله ..في الخليج لازم ...كفيل ..وضمانات كبيرة ولازم راس مال كبير