هل أنت مع توريث الحكم لإبن الرئيس أم لا؟

[Egypt]

هل تؤيد توريث حكم مصر الى ابن الرئيس؟

لكى اجيبك على هذا السؤال من فضلك جاوبنى عن الاسئله التاليه

1- يعنى ايه اؤيد او اعرض....انا لم اجرب هذا من قبل

2- يعنى ايه حكم وايه وظيفة الحاكم...ماهى حدود الحاكم.

3- يعنى ايه مصر.

4 - يعنى ايه ابن الرئيس...مين فيهم ...علاء والله شكله مقبول وكان ممكن اؤيده لو كنت اعرف يعنى ايه تاييد بس الابن التانى ....سبحان الله يا اخى

5- يعنى ايه رئيس وما هى صلاحيات الرئيس

6- مصر بتورث من ايام الفراعنه حتى الان....الاخشيد والبطالمه والفاطميين والمماليك والعثمانيين والملك فاروق والملك عبدالناصر والملك السادات والملك مبارك....لم اجد احد من شعب مصر يعترض على هؤلاء ....اشمعنى جت على جمال الغلبان.

[rar]

عزيزي زياد...

أنا مش مستوعب خوفك من عدم وجود بدائل لسيادة معالي دولة الوريث لجمهوريتنا الموقرة!!

مين اللي قال ان مافيش بدائل أجهز و أقدر بآلاف المرات من عم أبو جلمبو ده... افتح انتا بس باب الترشيح بدون حبشتكنات و أنا أوريلك المرشحين، اللي جمال ما يستحقش يقف يمسحلهم المكتب...

اديك مثال... لي معيد في كلية الهندسة... صديق... كان من أوائل الجمهورية في الثانوية العامة... طلع أول دفعته... حصل علي الدكتوراه من أتخن جامعات أمريكا... حصل علي MBA من جامعة مش بطالة... فتح شركة (من الخمسة المؤسسين يعني، مش لوحده) تصميم دواير متكاملة هنا في أمريكا، ماشية زي الفل و بقي لها وضعها... هو بأقل المقاييس "مليونير"... و بيفهم في الاقتصاد و التمويل و البورصة و البنوك... له سابقة أعمال و resume تقدر حضرتك تقراها و تتأكد بنفسك من قدراته الادارية و خبرته... رجع مصر من كام سنة عشان يفتح فرع لشركته في مصر... و قف الفرع الجديد علي رجله و رجع تاني أمريكا... عشان هيدخلوا في مجال تاني و عايزين استعدادات...

ينفع صاحبي ده ينافس عمو جمال؟ ( اللي دراسته الجامعية وقفت عند البكالوريوس و ما تسألش عن التقدير حتي)...

صاحبي ده ايده نضيفة... ما لوش تاريخ "مقزز" مع الفساد في مصر... عنده تاريخ اداري و سابقة أعمال... عنده تعليم كافي، و ثقة بالنفس...

اسمح انت بالترشيح... و انت هتشوف البلد دي جابت مين... المصريين مش يا حرام جهلة و معوقين... عشان نجيب واحد أعور بينهم يعمل مفتح... مع احترامي للخبرة المكتسبة من جلوسه علي حجر الحرامي الكبير...