سؤال عن التاْمين الصحي .....احترت في اجابته

[rewsha]

انا عايزه اعرف ...لما حد بيتعاقد للعمل في السعوديه سواء في شركه او مستوصف او مستشفى .لازم صاحب العمل او الكفيل بياْمن على اللي بيشتغل عنده علشان يطلع له اقامه

السؤال بقى.. بالنسبه لاسره المتعاقد تكاليف التاْمين الصحي واستخراج الاقامه بتكون على مين ؟على المتعاقد وله على الكفيل ؟

لاني سمعت من ناس ان الكفيل هوه اللي بيدفعها وبيطلع الاقامه للمتعاقد واسرته

وسمعت من ناس تانيه ان الكفيل بيطلع الاقامه للمتعاقد بس....وبالنسبه لاسرته بيخصم حق التاْمين الصحي للاسره من مرتب المتعاقد وبيتكفل بس بالمتعاقد لوحده دون اسرته

لان معروض علينا عقد في مستوصف مشهور بالرياض بس الكفيل بيقول انه ملتزم باستخراج الاقامه للمتعاقد بس وهاياْمن على المتعاقد بس لكن تكاليف التاْمين الطبي واستخراج الاقامه بتاعت الاسره بيتحملها المتعاقد

ولو فعلا كان بيتحملها المتعاقد ممكن اعرف تكلفتها قد ايه لزوجه وطفلين

يعني هل الاطفال برضو بيتعمل لهم تاْمين بنفس سعر تاْمين الفرد الكبير وهل ليهم رسوم بتندفع لاستخراج الاقامه

وله رسوم استخراج الاقامه بتكون للزوجه والاطفال مع بعض والرسوم دي كام؟

[زعلان]

قول لصاحب المستوصف انك مصر انه الاقامة و التأمين الطبي بتاع اسرتك يبقى عليه هو و اشترط نوع التأمين الصحي يكون شامل اكبر عدد ممك من المستشفيات الكبيرة زي السعودي الألماني

[MZohairy]

انا عايزه اعرف ...لما حد بيتعاقد للعمل في السعوديه سواء في شركه او مستوصف او مستشفى .لازم صاحب العمل او الكفيل بياْمن على اللي بيشتغل عنده علشان يطلع له اقامه

السؤال بقى.. بالنسبه لاسره المتعاقد تكاليف التاْمين الصحي واستخراج الاقامه بتكون على مين ؟على المتعاقد وله على الكفيل ؟

لاني سمعت من ناس ان الكفيل هوه اللي بيدفعها وبيطلع الاقامه للمتعاقد واسرته

وسمعت من ناس تانيه ان الكفيل بيطلع الاقامه للمتعاقد بس....وبالنسبه لاسرته بيخصم حق التاْمين الصحي للاسره من مرتب المتعاقد وبيتكفل بس بالمتعاقد لوحده دون اسرته

لان معروض علينا عقد في مستوصف مشهور بالرياض بس الكفيل بيقول انه ملتزم باستخراج الاقامه للمتعاقد بس وهاياْمن على المتعاقد بس لكن تكاليف التاْمين الطبي واستخراج الاقامه بتاعت الاسره بيتحملها المتعاقد

ولو فعلا كان بيتحملها المتعاقد ممكن اعرف تكلفتها قد ايه لزوجه وطفلين

يعني هل الاطفال برضو بيتعمل لهم تاْمين بنفس سعر تاْمين الفرد الكبير وهل ليهم رسوم بتندفع لاستخراج الاقامه

وله رسوم استخراج الاقامه بتكون للزوجه والاطفال مع بعض والرسوم دي كام؟

التأمين بيكون في المتوسط حوالي 4000 ريال سنويا للشخص

طبعا بيختلف من شركه لأخرى ومن وثيقة تأمين لأخرى حسب المتفق عليه من تغطيات

كل ما تقل القيمه بتقل الخدمه الصحيه المقدمه و عدد المستشفيات و خلافه و العكس صحيح

[rewsha]

كتشكره جدا يا جماعه

يعني التاْمين الطبي للاسره بيتحمله الكفيل

طيب لو في تاْمين ضد مخاطر المهنه ؟مين بيتحمله

لان الطبيب لازم بيعمل تاْمين ضد مخاطر المهنه وكمان في رسوم امتحان هيئه التخصصات علشان رخصه مزاوله المهنه على مين برضو؟

[MZohairy]

يعني التاْمين الطبي للاسره بيتحمله الكفيل

طيب لو في تاْمين ضد مخاطر المهنه ؟مين بيتحمله

لان الطبيب لازم بيعمل تاْمين ضد مخاطر المهنه وكمان في رسوم امتحان هيئه التخصصات علشان رخصه مزاوله المهنه على مين برضو؟

لألألألألأ

التأمين الطبي للأسره لا يتحمله الكفيل ابدا الا اذا تم الاتفاق على هذا في التعاقد

غير هذا كل واحد مسؤل عن اسرته

و اي رسوم اخرى هي مسؤلية المتعاقد الا اذا اتفق مع صاحب العمل على ان تتحملها جهة العمل

الموضوع هو تعاقديا في الاول و في الآخر

[rewsha]

طيب تكاليف التاْمين الطبي للزوجه وطفلين في حدود كام ؟

اقل تكلفه يعني اقل تاْمين

لمجرد ان الواحد يستخرج بيه الاقامه

[MZohairy]

طيب تكاليف التاْمين الطبي للزوجه وطفلين في حدود كام ؟

اقل تكلفه يعني اقل تاْمين

لمجرد ان الواحد يستخرج بيه الاقامه

التأمين الصحي لا غنى عنه في الخليج لغلاء الاطباء و الادويه و العلاج بصفه عامه

يعني اللي حتدفعيه تأمين مش حتخسريه ابدا

عموما اعتقد ان فيه تأمين بيكون رخيص في حدود 2000 ريال للفرد سنويا

طبعا السعر بيختلف حسب العمر و الحاله الصجيه

الطفل غير الكبير غير العجوز المسن غير المرأه الحامل

و هل التأمين شامل متابعة الحمل و الولاده ام لا

يعني في عناصر كتير قوي بتحدد السعر

تم تعديل 12 يوليو 2009 بواسطة mzohairy

[rewsha]

شكرا اخي mzohairy

شكرا اخي زعلان

افادكم الله

[se_ Elsyed]

ممكن يا زهيري طالما بقيت في كندا .. ممكن تركن في حته ما يكونش فيها تلج ؟ wst::

مونكن ؟

فاتح لي مكتب عمل من الباطن في فانكوفر وماسك الكوز وهاتك يا تصريحات طول اليوم ؟

ما تسمعيش كلام زهيري يا مدام روشه ... معليش التلج سيح نفوخه وإحنا بنعالجه بطريقة تصادميه دلوقت وهانسحبة على فولتا العُليا في وسط أفريقيا حيث تبلغ درجة الحرارة 75 فهنرهايت وطبقة التلج اللي على نافوخه هاتسيح وهايرجع زُهيري بتاع زمان ...

----------

ندخل في الجد ونسيبنا من التلج

أسئله هامه وجديدة يا مدام روشه وأعتقد إننا ما أجبناش عليها قبل ذلك ( أبداً أبداً - يارب صبرني يارب وخليني متماسك عشان ماعورش حد في المنتدى واخد فيه 6 أنذارات )

لما حد بيتعاقد للعمل في السعوديه سواء في شركه او مستوصف او مستشفى .لازم صاحب العمل او الكفيل بياْمن على اللي بيشتغل عنده علشان يطلع له اقامه

قانون العمل صريح وواضح

وبينص على إن أي تكاليف مترتبة على تعيين العامل - دكتور مهندس ولا مبيض محاره - بيتحملها الكفيل بدون حدود ومنها التأمين الطبي

واستخراج الاقامه بتكون على مين

لم أرى هنا غير البقالات والمسامط - جمع مسمط - هما اللي بيحملوا الموظف تكاليف إستخراج الإقامة اللي هي 750 ريال سنوياً

واي كفيل يتم الإثبات عليه إنه بيحمل موظفينه حاجات من دي بيروح في داهيه ...

الكفيل بيقول انه ملتزم باستخراج الاقامه للمتعاقد بس وهاياْمن على المتعاقد بس لكن تكاليف التاْمين الطبي واستخراج الاقامه بتاعت الاسره بيتحملها المتعاقد

في الحالة دي بنقول للكفيل .. الكلام ده بيحصل عند مامتك هناك ...

إذا كان عقد الموظف " متزوج " فالكفيل غصبٍ عن عينه وبالقانون بيتحمل التكاليف الخاصة بالتأمين الطبي لعائلة الموظف بدون حدود حتى لو كان زي إخواننا الفلسطينيين بيخلفوا 10 مره واحده ... وكذلك تذاكر سفرهم حتى سن 18 سنه وكذلك التأمين الطبي الخاص بهم .وكذلك تكاليف إستخراج إقامتهم .بالمناسبة ... النظام الجديد بيقتضي إن كل فرد في العيله بيطلع له إقامه منفصلة .... يعني الزوجة والأولاد ( لكنها بدون رسوم للعائلة المرافقة للموظف ... أؤكد مره تانيه بدون رسوم ) ...

يعني هل الاطفال برضو بيتعمل لهم تاْمين بنفس سعر تاْمين الفرد الكبير

كل شركة تأمين وحسب نظامها ...

يعني هاخد مثال أكبر شركتين هنا

شركة بوبا الشرق الأوسط .. ودي بتريح دماغها وبتعمل تكاليف التأمين مبلغ موحد للطفل وللكبير وللسيدة الحامل وهكذا

شركة التعاونية للتأمين ... لأ الموظف الرجل بيختلف سعره عن الطفل بيختلف عن الزوجه يعني نرتبهم من الاعل للأقل يبقى ( الزوجه عشان داخل فيها تكاليف الحمل والولادة ... والموظف .. ثم الطفل )

- تكاليف تأمين مخاطر المهنة بيتحملها الطبيب نفسه ولو المستشفى أتحملتها يبقى كتر خيرهم .. وبتبقى في حدود 1500 ريال سنوياً بتغطيه مخاطر 500 ألف ريال ( أنا ما جاوبتش على أسئلة من النوع ده أبداً أبداً قبل كده - الصبر يارب - )

- التأمين بيكون في المتوسط حوالي 4000 ريال سنويا للشخص

مش قلت لك إنت بقيت كندي

لأ طبعاً ده رقم مبالغ فيه جداً .. والتأمين الكويس لو من ضمن عدد من المؤمن عليهم فبيكون في حدود 1500 ريال كمتوسط للفرد .. وفي شركتنا عاملين للموظفين الصغيرين بـ 700 ريال للفرد وتغطيه 250 ألف سنوياً وحاجه زي الفل

و هل التأمين شامل متابعة الحمل و الولاده ام لا

لو إتكلمت تاني يا زهيري .. هاحبسك في أوضه مليانه ألواح تلج وأشغل كمات تكييف على درجة حراره 25- .....

أختيارات مزايا التأمين الطبي لم تعد شيء إختياري للمؤمن عليه أو لشركته ... فهناك نظام يسمى وثيقة التأمين الطبي التابع لمجلس الضمان الصحي ... وضعوا فيه حدود دُنيا لمزايا التأمين على الأجانب منها 250 ألأف ريال تغطيه شاملة العلاجات والعمليات والادوية ... إلخ .... أصبحت تغطية الحمل والولادة لأي سيده شيء إجباري في وثيقة التأمين ...الأسنان مُغطاه بحدود معينه .... عمل نظارة طبيه ( عدسات وفريم ) مغطاه أيضاً .... إلخ

وأي شركة تأمين بتسمع كلام المؤمن عليه وتنزل تحت تلك الحدود بتتغرم وممكن تتقفل كمان ..

لألألألألأ

التأمين الطبي للأسره لا يتحمله الكفيل ابدا الا اذا تم الاتفاق على هذا في التعاقد

غير هذا كل واحد مسؤل عن اسرته

و اي رسوم اخرى هي مسؤلية المتعاقد الا اذا اتفق مع صاحب العمل على ان تتحملها جهة العمل

الموضوع هو تعاقديا في الاول و في الآخر

( كلام زهيري مش صحيح - ده أنت نجم النهاردة وهاشتغلك wst:: )

ما يحدث من تهريج بعض الكوافيل في تحميل الموظفين تكاليف لا علاقة لهم بها هو من قبيل التهريج ومخالفة صريحة للقانون ... والموظف اللي بيقبل ذلك ويسكت يبقى يستاهل اللي يجرا له ...

اقل تكلفه يعني اقل تاْمين

لمجرد ان الواحد يستخرج بيه الاقامه

في حدود 600 أو 700 ريال للموظف

وعيلته مش مهم ..

لسه التأمين على الأسره لم يتم ربطه بنظام أستخراج الأقامه

يعني لو موظف عنده زوجه وبنتين حلوين مثلاً ..

فلما بييجي بيطلع لهم 4 إقامات ...

وبالتالي الموظف بس اللي بيتأمن عليه عشان يستخرج إقامه والعيلة مش مهم ...

انا بأتكلم عن نظام إدارة الجوازات اللي مربوط بنظام مجلس الضمان الصحي .... عشان إستخراج الإقامه فقط اللي لو الواحد إتنطط النظام مس هايقبل إستخراج إقامه له إلا لو كان متأمن عليه ...

لكن قانوناً في التعاقد الكفيل لازم يتحمل التأمين الطبي للعيلة كلها

-------------------

أنا في رأيي إن أي كفيل أو شركة بتحكي في الحاجات دي في بداية التعاقد .. الواحد بالفُم المليان يقول له " إنت كفيل معفن وبقى لك 15 سنة ما ستحمتش "

يعني إيه أنا جاي على وظيفه محترمة ورايح أعلم ناس وافيدهم بخبرتي وواحد معفن ييجي يقول لي إنت هاتتحمل الـ 750 ريال بتاعت أصدار الأقامة السنوية ؟

انا عن نفسي شخص بأفقد أعصابي بمنتهى السرعة في أمور العوج والأستهبال وممكن اقوم أضربه أو أمسك الشماغ أخنقه بيه لحد ما يقول أنا عيل يا معلم ... زي ما عملت في شركة كبيرة أعتقد شركة العشري اللي في القصر العيني وضربت صاحب المكتب لما قال لي إن التذكرة عليك ... والإقامه عليك وما كملش وقمت ساحبه من على مكتبه ضاربه وقلت له دي تصبيرة لحد ما الكفيل ييجي بالسلامه مصر وياخد نصيبه هو كمان .

[rewsha]

طيب سؤال اخير والله

انا ليه قريبه في الرياض ولسه مكلماها امبارح

قالت لي ان من 1/7 /2009

في نظام جديد .هوه ان الاسره لازم يتاْمن عليها علشان يطلعلها اقامه

يعني الكفيل بتاع جوزهابياْمن عليه هوه بس ويطلع له اقامه

لكن هي والاولاد لا جوزها اللي بيدفع تاْمين الاسره للكفيل علشان يطلع الاقامه

والكلام ده من 1/7

[se_ Elsyed]

انا ليه قريبه في الرياض ولسه مكلماها امبارح

إسمها إيه ؟ wst::

قصدي .. ما تسمعيش كلام حد

قالت لي ان من 1/7 /2009

في نظام جديد .هوه ان الاسره لازم يتاْمن عليها علشان يطلعلها اقامه

لم يصلنا أي تعاميم بهذا الخصوص وكل يوم بنجدد بالخمسين إقامه للموظفين وعائلتهم وفي شهر 7 كمان اللي إحنا فيه ده ...

[زعلان]

سؤال على الماشي يا عم سي السيد هي بوبا الشرق الاوسط بتقبل في كل المستشفيات الكبيرة عندكم ولا بتدفع وبعدين كليم باك - ولو عندك بوبا الدولية ينفع نستخدمها في السعودية

[se_ Elsyed]

سؤال على الماشي يا عم سي السيد هي بوبا الشرق الاوسط بتقبل في كل المستشفيات الكبيرة عندكم ولا بتدفع وبعدين كليم باك - ولو عندك بوبا الدولية ينفع نستخدمها في السعودية

كليم ؟

ده غير مرعي بتاع الكليمه ؟ wst::

لأ يا ريس شركة بوبا من أكبر الشركات هنا وإحنا بنتعامل معاها وبصراحة ... عندهم سيستم من أقوى ما يُمكن والأبروفلز والكليمز والحاجات دي بتتم عن طريق السيستم فبتريح المؤمن عليه ...

بالنسبة لو إنت مأمن في الأمارات مثلاً .. وجيت السعودية بيزنس تريب ... فلو شركة بوبا متعاقده مع شركات داخل السعودية ... يبقى تروح بالكرت عادي ...أما لو مش متعاقده .. يبقى بتروح وتدفع الفواتير ويتم تعويضك داخل الأمارات بالأسعار المتعارف عليها هناك ..

يعني عندنا هنا في السعودية

لو صرفت حاجه بره وجبت فواتير ومستندات كاملة ... بتيجي هنا بيسترشدوا بمستشفى " المملكة " كمرجع لهم

لو تكاليفك اقل .. فبتاخدها زي ما هي ..

لو تكاليفك أعلى من مستشفى المملكة .. يبقى بتاخد الأقل wst::

[زعلان]

مشكلة بوبا انها ملهاش مكتب في الامارات مكتبها في لندن و بتتعامل في الامارات عن طريقة شركة تانية يعني لو في كليمز او حاجة ببعتلهم في لندن عن طريق السيستم وهما يبعتلوي الشيك من لندن اسحبه من اي بنك في الامارات

تم تعديل 13 يوليو 2009 بواسطة زعلان

[MZohairy]

ماهو ياسين سين يا ابني ده اللي بيحصل و الناس مبتعرفش تتصرف بعد كده

ليه نخلي الكفيل يشتغله و بعدين نقوله روح اشتكي؟

طب ما نخلي كل شيئ في العقد اريح؟

عمال و موظفين كتير في السعوديه بيدفعوا التأمين الصحي (الخاص بالموظف نفسه مش عائلته) من جيوبهم عن طريق الخصم من الراتب ياسطه و متتحدانيش عشان مجيبلكش امثله حيه تعضك

اما موضوع التأمين ابو 700 ريال ده فده غالبا ممكن المؤمن عليه يتعالج بيه في القصر العيني و ام المصريين و مستوصف كله فاني

التأمين كل ما يعلى كل ما تزيد مزاياه و العكس صحيح

مستشاركم التأميني

صحيح سليم عبد القوي

فانكوفر

عند حماده بتاع المخلل تحت فرن حسن بتاع الفينو

[elfakhrany]

طيب سؤال اخير والله

انا ليه قريبه في الرياض ولسه مكلماها امبارح

قالت لي ان من 1/7 /2009

في نظام جديد .هوه ان الاسره لازم يتاْمن عليها علشان يطلعلها اقامه

يعني الكفيل بتاع جوزهابياْمن عليه هوه بس ويطلع له اقامه

لكن هي والاولاد لا جوزها اللي بيدفع تاْمين الاسره للكفيل علشان يطلع الاقامه

والكلام ده من 1/7

أنا سمعت الكلام ده وكان المقصود بيه التأمينات الإجتماعية وليس التأمين الصحى :rolleyes:

[rewsha]

طيب ممكن اعرف ايه هيه التاْمينات الاجتماعيه؟

وهل كل الناس بتعملها ؟

وبتبقى بكام؟

دي معلومه جديده.

[خالد شحاته]

طيب ممكن اعرف ايه هيه التاْمينات الاجتماعيه؟

وهل كل الناس بتعملها ؟

وبتبقى بكام؟

دي معلومه جديده.

التأمينات الاجتماعيه علي الكفيل وهي 2% من الراتب وناس كتير جدا بتخد راتب ممتاز وللاسف بيكتبه في التامين راتب ضعيف