هندي (باراتا) ... مكسيكي (تورتيلا ) ... مصري ( فطير)

[DrGM]

بما اني رجعت من امتحان الشفوي امبارح مبسوط على غير العاده ..

قلت لازم اعمل حاجة برضو على غير العاده ...

قعدت اقلب النت كله رايح جاي ... لحد ما لقيت اكله عباره عن سندويتشات اسمها كاتي رولز Katti Rolls... بتتعمل بعيش شبه الفطير (نفس المكونات) وهوا نفسه العيش الهندي المعروف باسم (باراتا) وهوا نفس العيش المكسيكي المعروف باسم (التورتيلا) اللي بيتقدم في كنتاكي ...

هيا خدت مني تلات ساعات وربع... مش عشان حاجة غير لان كل حاجة كنت بعملها لوحدي ...

المهم ..

الوجبه دي تنفع سناك تقيل شوية ... فطار او عشا

الاول هنعمل العجينه و هيا سهله جدا (المكونات لعمل 4 سندوشتات)

خير اللهم اجعله خير .. مكوناتها :

- كوب و ربع دقيق قمح (لو عايز تعمل تاكو (وجبه مكسيكيه يبقا استعمل دقيق ذره * انظر للملاحظات في النهايه) ... اما في الهند بيستعملوا نوع تاني من الدقيق غني بالبروتينات و اقل في النشويات )

- معلقه ملح و معلقه زيت و كوب ميه

اعجن واضرب جميع ما سبق كما في الصوره

افرد العجينه

ولفها تاني (شغلانه هيا ) :sad:

ودورها على نفسها و سيبها ترتاح لها بتاع تلت ساعه كدا ...كفايه ضرب يعني مش افترى هوا !! :wub:

بعد كدا ... سعادتك خلصت مرحله الضرب اشتغل شوية مرحله تقطيع ...

العجينه دي ...قطعها اربع دواير صغيره ... (انا قلت قطعها ...ملقتش اعجنها ...ركز)

وافرد كل دايره ...

كل ما كانت ارفع كل ما كانت احسن ... بس طبعا كل ما كانت اصعب في السيطره عليها وقلبها ... wst::

وبعد كدا امسح على وش وظهر كل واحده يادوب مسحه زيت خفيفه جدا و حطها في طاسه ...متوسطه الحراره ... لو عندك جرل مسطح يبقا تمام

متنساش الوش التاني يا باشمهندس :wub:

...

كرر الخطوتين اللي فاتو لحد ما تخلص من كل العجينه اللي عندك

وبكدا يكون احنا عملنا العيش المطلوب للسندويشتات wst:: ... ممكن تطلب ديليفري من برا لو جعت

نيجي للحشو :

- ربع كيلو صدور فراخ متقطعه صغير جدا ... او حتى بواقي فرخه من التلاجه او لحمه صغيره جدا جدا ... انتا وراحتك النفسيه ...

- 1 طماطم و 1 فلفل رومي (او 4 قرون فلفل شطه ) و فحل بصل كدا ابن حلال من بتوع زمان وبطاطسايه يتيمه و لمونتين (ليمونتين = 2 × ليمون) :blink:

- التوابل اختياري ... انا حطيت فلفل اسود و شطه (بودره و صلصه ) و روزماري (اكليل الجبل) و ملح و كزبره مطحونه

(ملاحظة ... لاختصار 8 ساعات من وقت اعداد الوجبه (خصوصا العزاب)...ياريت سعادتك تستعين بحد يقشر لك البطاطس و يقطعهالك مكعبات صغيره جدا و معاها البصل برضو تجنباً للعياط ... مفيش راجل بيعيط )

كل جاهز ....

طاسه او مقلايه كبيره شوية و يفضل يكون لها غطاء ... او سعادتك حاول توفق لها غطا ... المهم اتصرف بس متغطهاش ببطانيه :blink:

البصل اولا قبل الجميع

http://img170./img170/7969/dsc01393.jpg

يليه بقيه الشله

http://img221./img221/3203/dsc01394m.jpg

والتوابل ... وسبكهم في بعض بتاع 5 دقايق

http://img190./img190/3188/dsc01395e.jpg

والفراخ تتبعهم ....

سعادتك ضيف بعد كدا كوبايه ميه ...

وغطي المقلايه و خلي النار على اقل درجه (او درجه متوسطه) لمده 30 دقيقه ...

ابقا بص عليها كل 10 دقايق علشان تتأكد من الميه انها مخلصتش ..

وممكن على الآخر كدا (الدقيقه 25 ) تحط واحده لبن رايب حبه صغيرين للتمليح والطعم -متغرقش الدنيا ...قلت حبه صغيرين- ... جامده جدا جدا ...

وبعد كدا شيل الغطا و وسيبها كمان 3-5 دقايق مع التقليب علشان تخلص من كل السوائل (تتبخر)

http://img190./img190/6677/dsc01396ege.jpg

آخر مرحله ...

العيش اللي سعادتك عملته من 4 ساعات فاتو ..

تفرد عليه شوية ... وعليهم كام شريحه طماطم و بصل ... ولو عندك كزبره خضره هتضبطلك الجو والالوانات

ومتنساش صلصه التاباسكو (الشطه ) كام نقطه هيبقا ميه ميه (مش في العين يا دوك )

تلفهم بعد كدا ...

هنا ... وبعد المرحله دي بالضبط انا كان فات 3 ساعت و ربع من بدايه العجن والطبخ ... دا غير ان كان عندي امتحان شفوي ... فكنت في قمه الارهاق بصراحه ومكنتش ناوي استنى ثانيه زياده ...

انتا بالنسبه ليك ... ممكن تاخد السندوستات دي بعد ما تلفها و تحطها تحت الجريل 5 دقايق يتحمصوا فيهم ...

بجد ملهاااااش حل

طبعا الخطوه دي ملهاش صوره ...

وهي خطوه الاكل ...

كل اللي انا فاكره ان الجيران كانو بينقلوني بالاسعاف على المستشفى بعد ما اكلت الطبق مع السندوشتات ...

بجد جربوها و هتعجبكم جدا جدا

مراجع :

http://www.youtube.com/watch?v=J5PRWm0bYM0

ملاحظات :

- بالنسبه للفطير (المصري) هوا عباره عن نفس العجينه بس بيتم ترقيقها جدا جدا جدا و بعدين في مرحله اللف (المرحله التانيه) بيحطو كميات زبده كبيره على الوش وبعدين يلفوا عليها (زي السويسرول) و بعد كدا في مرحله الفرد (المرحله التانيه) مبتبقاش رقيقه اوي وسميكه

- بالنسبه للتاكو (مقرمشات مكسيكيه) هوا نفس العيش بس مقرمش جدا عباره عن نفس العجينه وبتتعمل من "دقيق ذره" وبيتم ترقيقها جامد وتتقطع بعد كدا لمثلثات... بعد كدا بتقليها في زيت عميق ... هتلاقي عندك في الآخر "دوريتوس" بس من غير مكسبات الطعم ... شوية شطه و بصل جاف مطحون او اي حاجة ممكن تيجي في بالك تديها طعم ... وياسلام على شوية جبنه شيدر او متزاريلا او اي حاجة بتسيح -إلا البلاستيك- في طبق وحطها في الميكرويف لمده دقيقه ... وغمس بالنسبه للناس اللي بتحب تغمس

- بالنسبه للعيش العربي او عيش التنوره ... هوا برضو بيتعمل من نفس العجينه بس معاه زيت زيتون و بيتحط في الفرن بعد ما يتفرد .. والحشو بيبقا غالبا مشاوي ...شاورما او كباب او كفته

- بالنسبه للباراتا (العيش الهندي) هوا نفس الطريقه المشروحه

- بالنسبه للعيش التورتيلا (العيش المكسيكي) هوا نفس العيش الهندي بس بيحطوا مع العجينه معلقه زبده

= الكميه اللي في الصور هيا ضعف الكميه اللي في الشرح لاني بطبخ لاكتر من يوم ... مش كل يوم مولد هوا !!!

[mandoo]

ياسيدى .. ياسيدى بصراحة يا دكتور جى إم الفطيرة حاجة جامدة قوى ولا أجدعها فطاطرى من بتوع الحسين :waving: وأتحدى الشيف بندق بخبرته الطويلة إنه يعملنا حاجة دلع وعالية كده وربنا يكتر من أمثالكم علشان المنافسة تبقى نار ، فلتحيا العزوبية واللى مراته معاه ياسعده وياهناه :gather:

[لولا]

الحقيقة مجهود جبااااااااار ورائع ومميز ويستلزم رفع القبعة بلا جداااااااااااااال .

وصفة هايلة

خطوات واضحة

تميز فى العرض

ميرسي جدا على الموضوع المييز دوت يا دكتور .

تحياتى البالغة ..

اروح اتعشي بقى كنت ناويه انام خفيفه .. بس غيرت رايى :bsmal: :aslam:

لولا

[النجم الثاقب]

ده ايه وجع القلب ده .. ماشاء الله عليك بجد يعنى .. بيتهيألى عمرى ما هعمل حاجة فيها عجين أبدا .. بس حبيت أشكرك على مجهودك الرائع فى شرح الوصفة بالطريقة دى و تنفيذها و دعمها بالمراجع كمان :unsure: .. و ربنا يوفقك فى إمتحاناتك :rolleyes:

بخصوص البصل و العياط .. و عشان إخوانا العزاب .. و أخواتنا الفضليات برضه ( إن شالله ما حد حوش ) wst:: .. كنت قريت مرة مش عارف فين .. إنك لو مش عايز تدمع و انت بتقطع البصل او بتبشره ( أكيد عايز طبعا ) ممكن تجيب منديل أو قطنه أو أى حاجة تطبقها و تضغط عليها بسنانك و أنت بتبشر البصل و بكده مش هتدمع .. انا جربتها و نجحت .. و فى ناس بتقول امضغ لبان .. مش عارف مدى صحة الكلام ده .. بس خلاص

.