كفيلي يهددني بخروج نهائي

[عماد حمدي]

بسم الله الرحمن الرحيم

أولا ً انا مباشرتي ودخولي المملكة 15/03/2009 ياعني تقريبا ً 4 شهور بالظبط ,, لحد دلوقتي الكفيل مدانيش إقامة .. وماشي بصورة الجواز وشغلي 8 ساعات محاسب , وسكني بإستراحة علي طريق الدمام بعيد جدا ً عن مقر شغلي بالملز ..

دلوقتي الكفيل كل شوية يهددني ان يديني خروج نهائي علشان اقامتي لسة مش طلعت وعايز يجبرني اني اخلص دوامي الاساسي بالمكتب واروح الإستراحة اشتغل تاني دون اي بدلات ..

سؤالي هل ينفع انه يديني خروج نهائي وانا لسة مستلمتش الإقامة ...

ثانيا ً العقد مخليني امضي ان الإقامة وكارت العمل والتأمين الطبي وتأشيرة الخروج والعودة عليا ولو مش عجبني ارجع بلدي تاني .. ومش راضي يديني صورة من العقد مش نسخة صورة علي الأقل مش من حقي أخذها ...

دلوقتي انا نفسيتي تعبانة جدا ً لان كل يوم بسمع تهديدات منه وانا مش عايز اشتغل في مكان راحتي ( الاستراحة ) لاني من حقي ان ارفض العمل بعد دوامي الرسمي حتي لو اداني 1000000 بدل

انصحوني اية هيا حقوقي لو دخلت معاه في مشاكل وممكن هوه فعلاً يديني نهائي ... من غير سبب

شكرا ً

تم تعديل 13 يوليو 2009 بواسطة EMAD HAMDY

[MZohairy]

ثانيا ً العقد مخليني امضي ان الإقامة وكارت العمل والتأمين الطبي وتأشيرة الخروج والعودة عليا ولو مش عجبني ارجع بلدي تاني .. ومش راضي يديني صورة من العقد مش نسخة صورة علي الأقل مش من حقي أخذها ...

ً

اتفضل يا سي السيد اهو ربنا وراك الحق بشكل عملي

حاله عمليه مؤسفه و ربنا يفكها عليك يا عماد

اتفضل حل المشكله بقى يا سين سين :gather:

[se_ Elsyed]

هو انا انكرت ان ده بيحصل يا زهيري ؟

انا اتكلم من منطلق قانوني عشان كل واحد يعرف حقه

واللي يقبل بغير كده يبقى يستحمل واللي قدم تنازلات ما يرجعش يشتكي انه غرق والحقوني

وانا اسف اني باوجه كلامي للاخ عماد حمدي اللي لسه فاكره بالرغم من اني كبرت في السن وبقيت انسى ,, آه والله يمكن عشان عدد الناس كتر ما شاء الله وبقى منتدانا عامر بوجود هذا الجمع المميز

لكن فاكر اسم عماد حمدي عشان كان ممثل :gather:

واللي فاكره اني حذرته من سنتين وقلت له ما تسافرش والا هاتندم لكن زيه زي غيره من الناس اللي بتسمع كلمه السفر تقوم منفذه وهي مغمضه ويرجعوا يندموا

واترك الجميع مع بداية موضوع عماد عشان تحكموا بنفسكم

وهارجع لك يا عماد واساعدك في حل المشكلة بإذن الله

لكن يا حبيب قلبي لما بنكتب موضوع او رد .. فنحن لا نختص به شخص بعينه .. ولكن بيبقى للجميع عشان يستفيدوا

اتفضلوا شوفوا موضوع من اغسطس 2007

[عماد حمدي]

ربنا يخليك يا باشا وأتمني حلها في وقت قريب وبالنسبة للموضوع الخاص ب 2008 دا كان عقد صاحبي فعلاً انا بقا وقعت وقعة جميلة ناس ربنا يهديهم يارب

[se_ Elsyed]

كفيلك كده وداك في داهيه عشان ما طلعش لك اقامه وكده دخلت في فترة الغرامة

واتحدى ان ما كان بيأخر لك الراتب !!!!!

1- يبقى انت دلوقت ماعندكش حاجه تبكي عليها

لا اقامة ولا مرتب محترم ولا معامله كويسه وعاوز سوري يعني يربطك في الساقية 24 ساعه

2- توجه حالاً لمكتب العمل واعمل ضده شكوى وقول انه اخل بشروط العقد ولم يستخرج لك اقامه متعمداً ولو عرفت انه بيأخر الراتب يبقى كويس وكمان اذكر انه عاوز يشغلك بعد اوقات الدوام الرسمي وكمان توجه لامارة منطقة الرياض واعمل ضده شكوى وكمان اكتب لوزير العمل شكوى عالميل ده info@mol.gov.sa

وخلاص بقى مانت ما قدمكش غير كده

ودعم كل ده باي عرض عمل او اي ايصالات مرتبات

نيجي للمهم

يا عالم يا هو يا متعلمين يا حلوين يا كبار يا مثقفين في حد يطلع من بلده وما معهوش ورقه ..... مكتوب عليها عقد او شروط ؟

في كده في الدنيا ؟

يا اخي ده انت لو شغال عند والدك يبقى هاتكتب عقد وماحدش يضمن الحياه من الموت

انا تعبت بجد من الناس اللي بتلهث ورا حلم السفر وهما مغمضين

وزهقت اكتر من المدافعين عن ذلك بشراسه ويقولك :

ايوه محاسب طالع على 1500 في سنة 2009 والدنيا مولعه والظروف زي الطين .. يا عم سيبه يجرب .. يا عم ده لسه صغير .. يا عم انت قاعد في التكييف ومش حاسس بالناس

خلاص يا جماعه هانسيبكو وهانكمل قعده في التكييف

لكن اشربوا بقى وماحدش يقول آي

آه نسيت اقول ... الاسبوع اللي فات تمكنت بفضل الله فقط من ايجاد فرصه عمل لواحد قريب المدير المالي عندنا لسه جاي طازه بنار الفرن

متزوج وعنده اولاد

عنده حوالي 35 سنة

شاري تأشيرة سائق خاص

لُقطه بصراحه موقعه وقيع

10 الاف ريال بس !!!!!!!!!!!!

يا بلاش و الله

معاه دبلوم تجارة

بتعرف تشتغل ايه يا حبيبي ؟

اي حاجه يا بيه اسوق عربية

احمل بضاعه

اي حاجه اي حاجه ولو بخمسمية ريال حتى

ولا حول ولا قوة الا بالله العلي العظيم

والحاج رجع من السعودية وجايب من خيرات الله يا ولاد

[عماد حمدي]

شكرا ً جزيلا ً علي إهتمام سيادتك وعايز اوضحلك كام نقطة كده :-

1- انا ماضي عقد في مصر مع وكيلة ومرسلة ليه فاكس هنا اني شغلي محاسب وراتبي ×××

2 - فعلا ً في راتب شهر متأخر عاينة عندجه احتياطي ياعني 1 يولية نقبض يونيو وهكذا

3- العقد اللي انا مضيته هنا مش راضي يديني نسخة منه خااااالص ومش موثق من الغرفة التجارية والمهنة مكتوبة فيه محاسب وسكرتير وشرط كمان ان العامل يتحمل كافة المصاريف الإدارية والتأشيرة والخروج والعودة وكذا

بس انا ممكن أتصرف واجييب صورة هل كدا ادينة ويبقي ليا حق لانه ممكن يتخنق مني ويدين نهائي وانا بصراحة مش حمل نهائي خالص دلوقتي .. فمعلشي يا باشا استحملني وقولي نص الرسالة اللي ابعتها لوزير العمل وراي حضرتك اية ممكن يجبرة اني انقل كفالة ولا اية بالظبط انا توهت اصلا ًَ ومش عارف انا بكلم بقول اية

وحضرتك بتقول ادعم شكوتي باي عرض عمل "" ممكن توضح ""

استغفر الله العلي الظيم

مع خالص تقديري واحترامي

تم تعديل 16 يوليو 2009 بواسطة EMAD HAMDY

[عماد حمدي]

انته فين يا سي بلييييييييز لاني والله لسة هفوة وهقوم أقتلة واريح دماغي من مكتب عمل وشكاوي والليلة دي

[se_ Elsyed]

أنا فين إيه ؟

ما تعمل اللي قلت لك عليه الأول وإبدأ !!!!!!!!

[doha]

شوف يااخ عماد حمدي انا هقولك رايي ان كنت عاوز تسمع ..

بالنسبة لحالتك انت بالذات فلا انصحك انك تشتكي في مكتب عمل ولا تحاول تلوي ذراع الكفيل لان للاسف موقفه دلوقت اقوى منك بكتير ده من جهة ومن جهة تانيه مشكلتك معاه الى حد ما مش كبيرة وممكن متكونش ناتجه عن افترا الكفيل بقدر ماهي ناتجة عن جهله او خوفه .. يعني ممكن الراجل ده بيعاملك بالشكل ده لانه حس فيك بوادر تمرد وللاسف هم بيشوفوا ايه الي في مصلحتهم من طريقة تعامل ويطبقوها بغض النظر ان كان فيها ظلم للطرف الثاني او افترى عليه متفرقش معاه المهم انه يضمن حقه خاصه وهو بيحمل المقيم كل عيوب ومساويء واجرامات من سبقه وبيحاسبه عليها ومن اول يوم حتى لو كان ماشي عدل فمابالك لو اظهر شيء من التمرد ..

لو كنت لسه في فترة الثلاث شهور الاولى يمكن كانت الشكوى تفيدك لكن دلوقت انت خلاص عديت فترة الاختبار .. فكر انت لو اشتكيت ايه اقصى منفعه ممكن تعود عليك ؟ انت متخيل هيجبروا صاحب العمل يشغلك عدد ساعات مناسب وبراتب مناسب؟ مظنش .. اعتقد ان اقصى مايمكن تقديمه لك لو اثبت ان الحق معاك هيقولوا لك فعلا الراجل ظالمك ومش مريحك يبقى خلاص ارجع بلدك يابني وحقك علينا .. هترجع على حسابك خلي بالك واعتقد اقصى مايمكن انك تاخذه هو الراتب المتاخر الي عنده وللاسف يمكن يقدر يثبت انك كلفته قد كده عشان يجيبك وبالتالي الراتب ده هيكون من حقه ..

مستحيل الكفيل هينضر الا لو لاقدر الله عمل فيك جنايه وفيما عدا ذلك مشاكل نقص الراتب او المماطلة في اعطاء الحقوق حلها هو شيل ده عن ده يرتاح ده من ده ..

الحل في رايي انك تتبع سياسه النفس الطويل وتحاول تقنعه بانك شخص يعتمد عليه يجوز يكون الي عمله ده زي ماقلت لك من باب الحرص الزائد ويكون الراجل كويس في داخله .. ويجوز العكس .. منقدرش نحكم غير لما نتاكد وبما ان مفيش حاجه تخسرها فاعتقد انك تديله وتدي نفسك فرصه لاثبات حسن النيه هو اسلم حل ..

بدايه تبطل تظهر تذمرك من موضوع العمل في الاستراحه ده ووافق ضمنيا على القيام بيه بس حاول تلاقي سبب لتغيرك ده عشان الكفيل ميحسش انه عرف يلوي ذراعك بموضوع الخروج النهائي ..

ممكن تكلمه بهدوء وتطلب منه تحسين بعض الاوضاع وفي المقابل تتعهد بانك هتقدم له افضل خدمه وانه لما يجربك هيعرف فرقك عن غيرك وان وان وكلمتين حلوين .. الخ .. طبعا انت اختار الكلام باسلوبك وبطريقتك المهم ان ميكونش فيها انكسار ولا تذلل وفي نفس الوقت ميكونش فيها تكبر ومناخير في السما لان الوضع لايحتمل .. كلمتين كويسين مفيش مانع ابدا تذكره فيهم بالله وانه ميرضاش الظلم ووضح له انك عاذره في الي بيعمله لان في ناس مش كويسه وذكره بشغلك وازاي هو مظبوط وكويس عكس الناس دي وهكذا .. يعني خلي خلاصه الحوار انك هتتغير وهتعمل الي مش واجب عليك مش عشان هو ضغط وانما عشان ريحك ..

بالنسبة لشغل الاستراحه هو شغل حسابات يعني تقدر تعمله وانت نايم في السرير لو حبيت .. خلاص اقبل بيه بس بما انه مش شغلك ومش بتاخذ عليه فلوس خلاص اعمله براحة راحتك وخلصه في خمسين سنه ايه المشكلة ؟ ..

طبعا هتقول ان ده ظلم وحرام وحقك هيضيع ومجهودك والخ الخ الخ .. هقولك على فكرة الناس دي بتفكر بطريقة عجيبه جدا .. انا مرة قرأت مشاركه لوحده في منتدى بتقول فيها ان عندها شغاله بتاخذ 800 ريال وان بعد مابتنظف عندها وشقتها صغيره زوجها بيوديها تنظف عند امه شقتها والشغاله طفشت وعاوزه تروح بلدها وان زوجها بيقول ان الشغاله بتستهبل وبتاخذ 800 ( حته وحده ) وعليه فلازم تحللهم وتشتغل اربعه وعشرين ساعه خاصه وبيتهم مش كبير يعني الست جايه مرتاحه .. هي كانت بتقول انها منغاظه من الشغاله لانها بتقوم الصبح بدري تخلص الشغل في عشر دقائق وتقعد بقية اليوم فاضيه !! والعجيب اني مشفتش حد من الردود استنكر الكلام ده بشكل واضح بل الغالبية كانت مؤيده ان الشغاله بتستهبل وعاوزه قطم الرقبه .. تخيل وهي بتاخذ راتب 800 فمابالك بمن بيأخذ راتب اعلى ..

نستنتج من هذا ان زي ماانت ( مستشوي ) الراتب بتاعك او مميزات شغلك برضه كفيلك ( مستشوي ) ماتقوم به من اعمال وعاوز دائما يشيل ويحط عليك .. الحكايه دي مش عاوزه اقول عند الكل وانما هي منتشرة جدا ولافرق بيها بين كون العامل شغاله او دكتور كله عندهم سواء طالما راتبه طالع من الجيب يبقى هيطلع بطلوع الضرس ولازم روح الموظف تطلع قبل مانطلع له الراتب .. عادي جدا ..

اذا التمس لكفيلك بعض العذر والحل معاه متاخذوش بالصدام من اولها كده وانما وحده وحده وباذن الله لو قدرت انك تبني معاه ثقة هتكون الموظف المفضل عنده وساعتها هترتاح في شغلك معاه . وطبعا بؤكد عليك اياك ثم اياك تموت نفسك في الشغل لان هيبقى ده المعتمد بعد كده وهيحاسبك لو قصرت يعني لو انت عودته انك بتشتغل عشرين ساعه في اليوم وبتقضي فيهم الشغل كله خلاص لو جه يوم واشتغلت 19 هيوريك الوش التاني وهيقلب عليك لانه هيعتبر العشرين دول حق مكتسب ليه .. فالصح انت اشتغل طاقتك بالظبط ومتجيش على نفسك بحيث لو استمر الوضع على ماهو عليه لفترة طويله متكونش تعبان .. لو طلباته الي بيطلبها منك اكتر من طاقتك يبقى قسمها واديها بما يتناسب مع طاقتك .. يعني طالب منك تاخذ شغل وتخلصه في الاستراحه مفيش مشكلة خذه وخلص منه على قدر ماتقدر ولما يقولك ليه مخلصتوش قولوه ان شاء الله بكرا يكون عندك وطول ماهو شايف انك بتنجز عملك الاصلي وباتقان فاكيد مش هيدق اوي لو اخرت عملك التاني شويه خاصه لو كان كلامك معاه كويس ومعاملتك كويسه هيستخسر انه يطفش من عنده موظف كفء مش جايب له مشاكل بينما لو العكس وكلامك كتير وشغلك قليل وكل حاجه تعترض هيطلع مركب النقص ان وجد وهيوريك النجوم في عز الظهر وللاسف زي ماقلت لك موقفك اضعف من انك تقدر ترد عليه الرد ( المناسب ) .

اذا ادي لنفسك ولكفيلك فرصة شهرين تلاته عامله فيها كويس وبما يرضي الله بشرط انك متجيش على نفسك او صحتك اقضي شغلك الي طالبه منك كله حتى لو مكانش ضمن مااتفقتم عليه طالما انك قادر على ادائه وطالما مش هتضغط نفسك جامد بأدائك له .. بعد الشهرين تلاته دول لو لقيت نفسك مش متحمل او زاد تعنت الكفيل خلاص ساعتها من حقك تهدم المعبد على من فيه وتشتكي لطوب الارض لو حبيت وساعتها برضه محدش هيلومك لانك اديت نفسك فرصة وياسلام لو ربنا اكرمك ورحت حجيت يبقى حتى طلعت من البلد دي بفايده ..

اتمنى تفكر في كلامي بهدوء وتستخير برضه وان شاء الله هيوفقك لما فيه الخير ليك ..

[الحازم حسن]

راجع حقوقك والتزاماتك هنا الاول وبعدين قرر الشكوى من عدمها

ربنا ييسر لك الأمور

[عماد حمدي]

والله انا مش عارف اقولك اية يا DOHA ياعني بجد ربنا يكرمك وكلامك لما قريتة أرتحت كتير .. ربنا ييسر الأمور ويعمل اللي فيه الخير ... انا خايف بس لو اداني نهائي هل ممكن يعترض انه يديني اخلاء طرف بحيث لما انزل ارجع تاني علي تأشيرة جديدة ولا انتي شايفة اية ..

والأخ حازم جزاك الله كل خير

وشكرا ً لكل اللي اداني ردة وشارك

[doha]

بص يااخ عماد مهو زي ماانت خايف تاخذ نهائي هو زيك بالظبط خايف احسن انت تسيبه ويرجع يدخل الدوره دي من تاني ويدور على محاسب تاني ويقعد يتحايل لغايه مايلاقي واحد يرضى بالعرض بتاعه ويرجع يجربه من اول وجديد ومين عارف هيطلع عدل ولا هينعوج ويسفره ويجيب غيره وهلم جرا ..

هو عنده شغل عاوز يقضيه وماصدق على الله لقي حد يشيل الشغل ده عنه ويرتاح .. اذا ان كنت انت خايف من النهائي قيراط فهو اخوف منك باربعه وعشرين ..

نيجي لاسوأ الاحتمالات افرض ان الراجل ده ادالك نهائي فعلا واشك في ذلك لان ايه مصلحته وايه يخليه يمشيك انت بالذات عشان يرجع يجيب غيرك الله العالم بيه .. لو فرضنا مشيت من غير مايديلك اخلاء ففي الحاله دي اما انك هترجع مصر وتشق طريقك فيها او هتروح اي بلد تانيه الكويت او قطر او حتى موزمبيق وبرضه هتشق طريقك هناك .. انت بتشتغل بعلمك ودماغك وصحتك وتفانيك وكل ده ملكك انت مش هيقدر يسحبهم منك حتى لو حاول .. اذا مفيش ابدا داعي للقلق ..

زي ماقلت لك لم الموضوع مع كفيلك وعلى فكرة قانون العمل بيقول ان التاخير في استخراج الاقامه هيسبب غرامه على الكفيل مش عليك .. طبعا هو اكيد هيجبرك تدفع الغرامه ويمكن لو انت شايف شغلك كويس ومش عامل له مشاكل غصب عنه هيدفعهالك هو ده من جهه ومن جهه تانيه مايمكن هو طلع الاقامه فعلا بس بيستهبل ومش راضي يسلمها لك فبرضه تاكد من النقطة دي ..

واخيرا هقولك حاجة مهمه وهي عسى ان تكرهوا شيئا وهو خير لكم يعني وجودك في السعوديه ده ممكن يكون فاتحه خير عليك وممكن يكون مانع عنك خير تاني في حته تانيه الله اعلم فانت متقلقش ابدا .. لو كملت هنا يبقى ده الخير ولو مكملتش برضه هيكون ده الخير .. سيبها على ربنا وانت بس اعمل الي عليك وشوف هيكرمك ازاي ..

[عماد حمدي]

انا اتأكدت فعلا ً انه لسة مصدرشي الإقامة .. ودي أتاكد فعلا ً منها ... وكده ولا كده انا عرفت انه هيخرجلي نهائي :lol: الحمد لله علي كل شيء نهائي بعد 4 شهور دا اية الجمال دا ... بس انا عايز اخد منه إخلاء طرف هل ممكن يمانع ولا من حقي اطلب .. ولو أخدت هل ينفع ارجع تاني السعودية .. اطمن بس

[الحازم حسن]

انا اتأكدت فعلا ً انه لسة مصدرشي الإقامة .. ودي أتاكد فعلا ً منها ... وكده ولا كده انا عرفت انه هيخرجلي نهائي :lol: الحمد لله علي كل شيء نهائي بعد 4 شهور دا اية الجمال دا ... بس انا عايز اخد منه إخلاء طرف هل ممكن يمانع ولا من حقي اطلب .. ولو أخدت هل ينفع ارجع تاني السعودية .. اطمن بس

اخلاء الطرف موضوع قديم وملوش لازمة واتلغي خلاص ممكن ترجع السعودية تاني يوم لو حبيت بس غير الباسبور

تم تعديل 22 يوليو 2009 بواسطة الحازم حسن

[الباشمهندس ياسر]

يا سيدى سيبها على الله

انت طالما مظلمتش حد و مقصرتش ف شغلك ف ان شاء الله الامور هتيجى على احسن حال

تخيل..

لما حصل هبوط فى اسعار النفط من كام شهر ... الشركة قررت انها تصفى الناس و فعلا قامت بتصفية الناس

و كنت معتبر نفسى واحد من الناس اللى هتتصفى يعنى هتتصفى علشان القاعدة الازليه

last in first out

و انا لسه جديد ف الشركة دى

المهم

من فترة حصلت الازمة العالمية و الدنيا وقفت و الشركات ابتدت تقع ( لانها بتبقى مجموعات اقتصادية و مرتبطة ببعض )

و برده الشركة ابتدت تصفى تانى

ولا حطيت ف دماغى و عدت على خير

دلوقتى جه موعد تجديد العقد بتاع الشركة نفسها مع الشركات الاونر

و بكل اسف عندنا مدير عامانجليزى فاكر نفسه ف بحر الشمال و قدم عطا يفرق عن اللى وراه برقم رهييييييييييييب

و خسرنا اكبر عقد و بيشتغل فيه حوال 70% من موظفى الشركة

و ادينا بنلم ف المعدات و بنحولها لليارد ف العاصمة

تخيل بقى

يعنى الشهر ده اخر شهر و الاجازة اللى جاية ... متوقع انها تكون بلا رجعه

و مع ذلك ولا ف الدماغ و الله

و مش لانى معتمد على حاجة مادية .... اطلاقا

انما معتمد على ربى تبارك و تعالى

معتمد انى طالما اتنفس فاكيد عندى رزق و هوصله يعنى هوصله

بمزاج اى حد هوصله ... غصب عن اى حد هوصله

هى دى الفكرة

و بعدين هقولك على حاجة ... استحملنى انا طولت عليك

لما تسيب شغلك ف اى حتة و ترجع بيتك بصحتك .... فده يسوى الدنيا و ما عليها

تصور المنظر ,,,بعد الشر عنك و عن كل الناس يارب ,,, لو راجع البيت و معاك مائة الف دولار مثلا و ناقص ايد بعد الشر

تخيل

هيكون ايه احساسك ساعتها

ربنا يديم علينا نعمة الرضا ... امين

[doha]

انا اتأكدت فعلا ً انه لسة مصدرشي الإقامة .. ودي أتاكد فعلا ً منها ... وكده ولا كده انا عرفت انه هيخرجلي نهائي :lol: الحمد لله علي كل شيء نهائي بعد 4 شهور دا اية الجمال دا ... بس انا عايز اخد منه إخلاء طرف هل ممكن يمانع ولا من حقي اطلب .. ولو أخدت هل ينفع ارجع تاني السعودية .. اطمن بس

معليش لو تسمح لي اسألك عرفت منين انه عمل لك خروج نهائي؟ حد قالك يعني ولا شفت الورق بعينك؟

وايه السبب الي دفعه لكده هل تخانقتم مثلا خناقة جامده ولا حصل منك تقصير في شيء معين؟

صدقني دائما في خط رجعه ودائما في بصيص امل بس اركز كده وفكر بهدوء وان شاء الله هتنحل متخافش ..

[حاتم سكر]

نداء الي سي السيد

قولت لنا في موضوع ( القول الفصل في نظام البصمة ) ( .. في حالة الخروج النهائي أو الخروج والعودة والإقامة سارية ... وروحت بلدك وغيرت الجواز ورجعت مرة أخرى بتاشيرة جديدة وكنت باصم بالخمستاشر قبل ذلك ... أول ما ترجع من المطار المفروض ياخدوا بصمتك مرة أخرى .. فأوتوماتكي هايظهر عندهم في قاعدة البينانات إنك كنت هنا إن شاء الله من يومين حتى .. ومع ذلك سلطات الجوازات لا تكترث ولا تهتم بهذا الشيء طالما لم يكن ضدك أي ملاحظات أمنية ... )

ودلوقتي واحد صاحبي محاسب خرج منذ 7 شهور بتاشيرة خروج وعودة وكان واخد شهرين اجازة ومعاه فيزا تانية بمهنة محاسب - الفيزا الاولي كانت بمهنة بناء عام - وهو جاي المطار هنا بالرياض

طبعا كان باصم قبل ماينزل فلما رجع المطار وبصم طلعت كل بياناته اتصلوا بالكفيل السابق قالهم رجعوه بالرغم من انه تم الجرد عليه ولا كان عليه اي التزامات لكفيله السابق

الحل يعمل ايه خصوصا وانا كنت ناوي اعمل زيه وعلي وشك نزول اجازة .. انا مستني ردكم يا جماعة وخصوصا سي السيد

والله العظيم صاحبي دا نفسيتو وحشة جدا الان بمصر والله يصبرو ويعوض عليه تمن الفيزا اللي اشتراها وراحت عليه

[عماد حمدي]

أوبا أهوه هوه دة بقا اللي خايف منه وأهوه حصل رجع بتأشيرة جديده بجواز جديد واتقفش !!! عليه العوض ومنه العوض ... منه لله اللي خلانا نسيب بلدنا .. مكنا قاعدين مرتاحين نلعب ونضحك ونهزر .. قعد يخنق فينا وفي كل الشباب لحد ما اتخنقتنا وسيبنا البلد .. بس اية اللي رماك علي المر الأمر منه ...

علي أي حال حد يفيدنا بقا إخلاء الطرف في حالة زي دي يقضي الليلة ولا برده ملوش لازمة

أنا أتأكدت من انه مطلعشي الإقامة عن طريق دخول صديق سعودي علي بنك الراجحي عغلس اساس انه يسدد إقامتي لقاها متسددتشي

[doha]

والله يااخ عماد مازال عندي امل ان موضوعك محلول بس انت الي مكبره ..

على كل حال انا هقولك الي حصل مع كفيل زوجي والي كان بيتهرب مننا عشان استخراج الاقامه .. احنا دفعنا له فلوس الاقامه وفلوس التعقيب وكل حاجه ومنتظرين يطلع الاقامه مطلعهاش وكان باقي شيء بسيط على دخولنا فترة الغرامه وكل مازوجي يتصل بيه بالجوال ميردش فانخنقنا منه .. رحت كتبت له رساله على الجوال فيها كلمتين مامعناهم .. احنا دفعنا لك الي علينا ولانريد منك شيء سوى الاقامه عشان نكون ماشيين قانوني وفلوسنا في ذمتك والله خصيمك .. وبس وانا كنت اعنيها فعلا بان احنا مش قادرين عليك او انت واكل فلوسنا في عبك طيب منك لربنا بقى هو الي واقف امامك مش احنا ..

بعد ماكان بقالنا اسبوع بندور عليه ومش طايلينه مفيش ساعه من ارسال الرساله الراجل اتصل وعامل زعلان وقعد يقول انا ومش انا وخلاص اقامتكم هتطلع ومش هتطلع .. المهم يومين اثنين والحمد لله كانت الاقامه طالعه ..

فالقصد انك اياخ عماد مقدامكش حاليا غير قطع عرق وتسييح دمه .. انت واجه كفيلك مباشره قوله يابو فلان دلوقت انا عاوز اعرف وضعي بالظبط عشان انت كده بتظلمني بالغموض وربنا ميرضاش الظلم .. ان كنت ناوي تخلينا نكمل مع بعض طلع لي الاقامه وان مكنتش ناوي قولي من دلوقت وزي مادخلنا بالمعروف نخرج بالمعروف ..

الوضوح والصراحه مفيش احسن منها .. وان قالك خلاص انا مش عاوزك وهديلك نهائي قوله كلمتين بهدوء شديد وبدون انفعال او استعطاف .. قوله دلوقت انا عشان اجيلك هنا تكلفت مبلغ كذا .. قوله على مادفعته اجمالا سواء لمكتب السفريات في مصر او تكاليف سفرك .. هيقولك وانا مالي .. قوله مبحملكش المسؤوليه لكن لا ضرر ولا ضرار يعين لو انت متكلف قد كده عشان تجيبني وانا جيت خسرتك ورجعت هتبقى مبسوط ؟ يبقى الحل انا بشوف لك شغلك شهرين تلاته لغايه مااسترد جزء من خسارتي وبكده لا ابقى ضريتك ولا انت ضريتني ..

جرب التعامل بالحسنى وذكر الراجل بربنا وبانه بكده بيظلمك ومين عارف يمكن يكون بني آدم ويحس او ربنا يحسسه غصب عنه وتمر الازمه دي على خير ..