انفلونزا الموالد

[Scorpion]

لا أدري اذا كان هذا الخبر صحيحآ ام مجرد فرقعة اعلامية و لكن ما جاء في مصراوي اليوم يفيد بانه تم اتخاذ قرار بالغاء الإحتفال بمولد "السيدة زينب" هذا العام للوقاية من أنفلونزا الخنازير ....

أستطيع أن أتخيل ردود الأفعال حول أمرآ مماثل .. حول عادة متغلغلة في الوجدان الشعبي لأهل مصر ... و الضيق الذي سيصيب أهل الطرق الصوفية بها ...

أستطيع أيضآ أن أتخيل كيف سيتم البحث عن حلول بديلة ...

شخصيآ أنا ضد فكرة الموالد بصورة مطلقة .. فهي أبعد ما تكون عن الإقتراب من الدين .. و ان كانت تستخدمه كواجهة للقيام بأمور في غاية الأنحطاط ... و هذا ما لمسته بصورة شخصية سواء في موالد اسلامية و أخري مسيحية ....

في الدين المسيحي المولد و ما يدور فيه هو ضد تعاليم السيد المسيح نفسه .. فهو من قال : "بيتي بيت صلاة يدعي و أنتم جعلتموه مغارة لصوص " ... و بالرغم من هذا تأثر مسيحيي مصر أيضآ بعادة الموالد و أنشأوا موالدهم الخاصة .... حتي وصلت الي حوالي 80 مولد ...

علي اي حال أتمني شخصيآ أن يكون هذا الخبر صحيحآ و أن يكون حجة يقتنع بها الكثيرين لتبدأ بعدها رحلة الغاء جميع الموالد ....

[الباشمهندس ياسر]

الموالد بدعة من اولها لاخرها دون اى استثناء

و كما ذكرت يا سكوب يحدث بها ما يعف اللسان عن ذكره

و ارجو ان ياتى اليوم الذى تنمحى فيه الموالد من ذاكرتنا تماما

[أحمد سيف]

جميل أن نرى اتفاقا بين أعضاء المنتدى من مختلف التيارات والمشارب حول هذا الموضوع ... ربما تكون الدوافع والمنطلقات مختلفة ولكن النتيجة هي واحدة

صحيح الموالد هي تراث مصري أصيل ... ولكني أفضل أن أقرأ عن هذا التراث في كتب التاريخ لا أن أراه في الواقع

وكما ذكر أخي الفاضل ياسر فهي بدعة دينية ... وهي بالإضافة الى ذلك تجمع عشوائي تمارس فيه الكثير من العادات والممارسات الخاطئة ويعتبر فرصة لنشر الأمراض الجسدية منها والفكرية.

[tarek hassan]

أنا معك الفاضل العزيز : سكربيون في كل ما قلته وأتمنى مع الباشمهندس ياسر أن تلغي تلك الموالد لا من أجل أنفلونزا الخنازير ولكن للبدع والخرافات والشرك والضلال الذي يحدث فيها

و أرجو أن يأتي اليوم الذي تنمحي فيه الموالد من ذاكرتنا تماما

وأود أن أشارك في الموضوع بحكاية عن الصوفية كتبتها من قبل :

دائما عندما أسأل أحد المتصوفة عن أفعالهم المخالفة للشرع وتعييه الحجة يقول لي هذا ليس من الصوفية حتى ظننت أن كل الصوفية ليست من الصوفية

- قدر لي أن أشاهد فقط إحدى حلقات الإنشاد الصوفية في احتفال سنوي خاص ووجدت سياحا أجانب يقومون بالتصوير بطريقة جماعية فسألت منتسبا إلى الصوفية أعرفه كان موجودا وقلت له لماذا يقومون بالتصوير فقال هؤلاء سياح يهود بدليل وجود الحراسة فسألته مرة أخرى لماذا يقومون بالتصوير قال : ليقولوا عنا في بلادهم : إننا أناس متخلفون بدائيون ما زلنا تحت الأرض فضحكت من اعترافه !!!!

- وكنت أريد معرفة طريقة الصوفية في الذكر فشاهدت حلقة الذكر وهم يقومون بالإنشاد والتمايل ووجدت سائحة فرحة ضاحكة وهي تشاهد وتشاركهم التمايل من خارج الحلقة ولم أكن سعيدا لما رأيت وانصرفت سريعا ثم جلست مع أحد المتصوفة وقلت له : أنتم تقولون : ( من عطش شرب ومن شرب طرب ومن طرب تمايل ومن تمايل رقص ومن رقص وصل ومن وصل اتصل !!!! ) فاشرح لي ما المقصد بهذا الكلام قال : إن من يشتاق للذكر فكأنه عطشان وحينما يروى بالذكر ويسمعه يطرب وحينما يطرب تأخذه الخفة فيتمايل .... فقاطعته وقلت له هذا غير صحيح لأنكم بدأتم بالتمايل مع الإنشاد وليس تأثرا من بسبب الإنشاد

قال : هذا ليس من الصوفية !!!!!

تحياتي للمشاركين

تم تعديل 15 يوليو 2009 بواسطة tarek hassan

[سهل جدا]

طبعا نتمنى أن يأتي اليوم الذي لا نرى فيه أي وجود لهذه الموالد

وهي بدعة من بدع الصوفية, لا علاقة لها بأي دين

لكن اللي الناس ما تعرفوش إن الحكومة المصرية في بعض السنوات كانت بتموّل وتنظّم الموالد ديه عشان تكون وسيلة لإلهاء الناس

كما أن الإدارة الأمريكية صرّحت في تقارير رسمية أنها تدعّم الصوفيّة صاحبة الموالد في بلاد المسلمين, لأنها تتمنّى أن يكون المسلمين كلهم صوفيين ودراويش

يحصروا الدين في شوية خزعبلات, ولا يتدخلوا في السياسة

لا يقولوا حلال وحرام , ولا تحكيم شريعة ولا جهاد ولا والكلام اللي انتوا عارفينه دا كلّه ..

دمتم بدون موالد

[doudy]

فعلا الموالد دى شعوزة و دجل

و يا ريت تتلغى يبقى كويس جدا و حاجة حضارية كمان

احنا فى اسكندرية عندنا 4 موالد :

سيدى ابو العباس و سيدى جابر و سيدى بشر و سيدى كمال

[elfakhrany]

إحنا عندنا فى طنطا مولد السيد البدوى وطبعا بيجيله ناس من كل أنحاء مصر وبيكون زحمة جداً بس فى نقطة مهمة إن فعلاً السنوات الأخيرة قلت الأعداد اللتى تتوافد بشكل ملحوظ عن الأول بمعنى ان الأسبوع اللى يسبق الليلة الكبيرة كان بيبقى زحمة جداً بعد كده أصبح 5 أيام ثم 4 ثم 3 ثم 2 واعتقد ان ده مؤشر كويس جدا لإختفاء هذه التقاليع فى الفترة القادمة

[عادل أبوزيد]

الأرجح أن خلفية هذا الإقتراح هو الخوف من إنتشار "أنفلونزا الخنازير" و فى هذا يتساوى الأمر مع أيضا منع الإزدحام فى وسائل النقل العام و فى الموسكى و فى أماكن كثيرة فى مصر.

ما سبق كان إستهلالا لابد منه

لاحظت أن معظم إعتراضات الأفاضل على ظاهرة الموالد يرجع فى جانب كبير منه على رؤية عقائدية معينة تقارب الرؤية الدينية للسعودية و فى جانب آخر على رفض التجاوزات التى تصاحب المولد.

من الناحية الدينية لا أستطيع و لا أرى أن تتدخل الدولة فى فرض رؤية دينية معينة أما من ناحية التجاوزات فهذه هى مربط الفرس.

قبل أن أستطرد أذكركم ب أوبريت الليلة الكبيرة المولد أيها السادة هو كرنفال شعبى و فرصة للمشاركة فى اللهو و المرح و البيع و الشراء ... فى العالم كله توجد الكرنفالات أو المهرجانات الشعبية ...

هل تذكرون منذ شهرين تقريبا فى الإحتفال بالعيد القومى لحى مصر الجديدة ... هذا لم يكن أكثر من مولد فقط بدون "مقام سيدنا الولى".

خلاصة ما أراه أن الموالد ظاهرة طبيعية لا نستطيع منعها و لكننا يمكن أن نهذب من آثارها السلبية.

فى بيتى الشغالة التى تعمل عندى ... من الفيوم أحد قري الفيوم إسمها سرس ... تغيب عن العمل مدة أسبوع كامل من أجل حضور المولد فى قريتها و لا تعرف عن المولد إلا المراجيح و اللهو مع صويحباتها و لا تعرف إسم "صاحب المقام" أى المولد بالنسبة لها مجرد كرنفال أو مهرجان أو مناسبة قومية للقرية.

[مغتربة]

انا ايضا ضد الموالد و مع قانون منعها

اعترف اننى لم احضر مولد فى حياتى كلها

و لكن تراكم معرفتى مما ينقل او يكتب او يروى عنها

ارى انها مرتع خصب لتجاوزات اخلاقيه و صحيه عديده

و لكن اتمنى عدم حصر الصوفيه فى اقامه الموالد

و الخلط بينهم

و تحويل دفه الموضوع للهجوم على الصوفيه

[mandoo]

الموالد هى مسخره بكل المقاييس ، ولكن السؤال ماهى الطبقة التى تهتم بمثل هذه الموالد ؟ والإجابه كانت لدى أستاذنا الفاضل / عادل أبو زيد فى نهاية مداخلته وبمعنى أدق وبالبلدى كده ( الموالد ليها ناسها ) وهى طبقة من الشعب لايعلمون مايفعلون ، وإذا سألت أحدهم ماذا يعنى لك المولد ؟ ستكون الإجابة إما أنها عادة عن آبائهم وأجدادهم أو فريق آخر يطلب المساعده من هذا الولى لحل مشاكله الدنيوية وأستشهد هنا بأفلامنا المصرية التى وضحت أن تلك الأمور لاتمت للإسلام من قريب أو بعيد .

لذا وجب علينا كطبقة مثقفة أن نحارب مثل هذه العادات السيئة التى ليس لها أى مردود إيجابى على المجتمع بل العكس حيث تحوى هذه الموالد على تجاوزات أخلاقية وصحية عديدة .

منذ ثلاثة أيام شاهدت برنامج العاشرة مساءا وكان الضيف على الهاتف وكيل وزارة الصحة والذى أكد أنه بالتعاون مع الجهات الأمنية سيتم منع مولد من أحد الموالد والتى تقام فى مثل هذا التوقيت بالقاهرة بحجة منع إنتشار مرض أنفلونزا الخنازير .

وصدق الله العظيم فى كتابه الكريم ( بسم الله الرحمن الرحيم ، قل هو الله أحد ، الله الصمد ، لم يلد ولم يولد ، ولم يكن له كفوا أحد )

وتمعنوا فى هذه الآية الكريمة فالولى لن ينفع والصوفية كذلك .

وفى النهاية أعتقد أن من يسعون لهذه الموالد لديهم عدم إيمان كامل بالله وهو بداية الطريق للشرك .... اللهم إحفظنا وقوى إيماننا بالله ورسوله

[mandoo]

فعلا الموالد دى شعوزة و دجل

و يا ريت تتلغى يبقى كويس جدا و حاجة حضارية كمان

احنا فى اسكندرية عندنا 4 موالد :

سيدى ابو العباس و سيدى جابر و سيدى بشر و سيدى كمال

أول مره أسمع عن مولد كمال ( ياترى بركاته إيه ومكانه فين )

طيب وفين مولد المتولى و مولد أبو الدرداء ، مش ممكن الواحد لو حب يعمل إحصاء حتبقى مشكلة

تم تعديل 20 يوليو 2009 بواسطة Scorpion
تم تعديل بسيط يبعد بالسؤال عن نطاق السخرية

[doha]

يمكن زمان ولطبيعه نشأتي في السعوديه كنت زي البعض منكم متاثرة بالراي القائل بحرمه الموالد وانها ( سبه ) يجب التخلص منها .

في فترة الجامعه كنت عايشه في مصر تحديدا في مدينتي طنطا ..

اذكر مرة واحده فقط لا غير شفت تجمع غير عادي من الناس ماشيين في الشارع شايلين اعلام خضرا وسيوف ودفوف وكل مايخطر في بال حتى الثعابين كانت موجوده ..

الملابس المبهرجه والفرحه العارمه والتناغم الغير عادي شفته في ذلك اليوم وفي الحشد الكبير ده الي كنت اول مرة اشوفه وسألت عليه فقالوا لي اسمه مولد الرفاعي او مسيرة الرفاعيه حاجه زي كده ..

بصراحه شكلهم كان ممتع جدا ياريتني صورته ..

للاسف دي كانت اول وآخر مرة اشوفه ولما سألت عنه بعد كام سنه ليه الواحد معادش بيشوفه قالوا لي اتمنع او اتلغى ..

مرة تانيه برضه كنت مسافره من طنطا للقاهره قبل مولد السيد البدوي بشيء بسيط .. طبعا مكنتش اعرف ان ده وقت المولد لاني مش مهتمه اوي بحضوره ولا عمري حضرته من اساسه نتيجه كما قلت لكم اني متربيتش في مصر وبالتالي فالتقاليد الشعبيه لا تعني لي الكثير يعني مش هامه اوي بالنسبة لي زي الي عاش وتاثر بيها وهو صغير .

المهم شفت منظر جميل برضه زي الي قبله .. شفت ناس كتييييييييير ماشيين فيما يشبه القافله .. جمال ماشيه ورا بعضها وشايله حاجات ومتلونه ومتزينه والناس لابسين زي البدو او ( العرب ) كما نطلق عليهم في مصر .. سالت الناس دي رايحه فين قالوا طالعين من كل البلاد المحيطه عشان يوصلوا طنطا على المولد او الليلة الكبيرة وهي آخر ليله من ليالي المولد الي بيحرص اخويه الصغير على حضوره كل سنه وانا بصراحه مفكرتش اشاركه في ده ولا اعرف حتى فيه ايه ..

نيجي بقى للمهم ليه قلت لكم عن كل ماسبق ..

باختصار لان الموالد في مصر مش حاجه دينيه زي مابيروج البعض ولا هي بدعه زي ماكنت فاكره وانما هي ثقافه شعبيه وهي بديل لما يطلق عليه الكرنفال في بلاد الغرب ..

للاسف من مصلحه ( الناس الي برا ) ان ميكونش لنا اي هوية ثقافيه يعني شوف كده اي خليجي ممكن نعرفه من الغتره والعقال اي يابانيه ممكن نستدل عليها من الكيمونو اي هندية من الساري لكن هات لي كده لبس مميز لاهل مصر ممكن نقول اول مانشوفه ده مصري؟ مفيش غير عمه الصعيدي او ثوب المصرية في تمثال مختار وللاسف كل ده اما لا يمثل المصريين او حتى اختفى وجوده في حياتنا من سنين فاتت ..

الحرب على الموالد للاسف كانت دعوى حق يراد بيها باطل .. هدفها هو القضاء على قوة مصر الناعمه او طغيانها الثقافي على الدول العربية و الي ( كان ) موجود زمان وللاسف معادش بنفس القوة دلوقت ان افترضنا ان مازال له وجود ..

ده غير الحقيقة التي لايمكن انكارها ان سبب نشأة الموالد اساسا هو سبب اقتصادي بحت لانها تعتبر فرصة لانعاش النشاط الاقتصادي خاصه في الاماكن النائية والريفية الي يمكن يكون مكسبهم كله قائم على حصيلة البيع في ايام الموالد والاعياد ..

لست نهائيا مع الدعوة لألغاء الموالد وانما مع تنظيمها ووضع الظوابط لها بحيث يزال منها المخالفات الشرعية زي التمسح بالاولياء او التبارك بيهم او كل مالايمت للعقيده بصله وان يتم توعيه الناس باسس النظافه والتجمهر في الاماكن العامه بحيث يخرج المولد في النهايه بشكل حضاري يخدمنا ثقافيا واقتصاديا كمان ..

[الباشمهندس ياسر]

يمكن زمان ولطبيعه نشأتي في السعوديه كنت زي البعض منكم متاثرة بالراي القائل بحرمه الموالد وانها ( سبه ) يجب التخلص منها .

في فترة الجامعه كنت عايشه في مصر تحديدا في مدينتي طنطا ..

اذكر مرة واحده فقط لا غير شفت تجمع غير عادي من الناس ماشيين في الشارع شايلين اعلام خضرا وسيوف ودفوف وكل مايخطر في بال حتى الثعابين كانت موجوده ..

الملابس المبهرجه والفرحه العارمه والتناغم الغير عادي شفته في ذلك اليوم وفي الحشد الكبير ده الي كنت اول مرة اشوفه وسألت عليه فقالوا لي اسمه مولد الرفاعي او مسيرة الرفاعيه حاجه زي كده ..

بصراحه شكلهم كان ممتع جدا ياريتني صورته ..

للاسف دي كانت اول وآخر مرة اشوفه ولما سألت عنه بعد كام سنه ليه الواحد معادش بيشوفه قالوا لي اتمنع او اتلغى ..

مرة تانيه برضه كنت مسافره من طنطا للقاهره قبل مولد السيد البدوي بشيء بسيط .. طبعا مكنتش اعرف ان ده وقت المولد لاني مش مهتمه اوي بحضوره ولا عمري حضرته من اساسه نتيجه كما قلت لكم اني متربيتش في مصر وبالتالي فالتقاليد الشعبيه لا تعني لي الكثير يعني مش هامه اوي بالنسبة لي زي الي عاش وتاثر بيها وهو صغير .

المهم شفت منظر جميل برضه زي الي قبله .. شفت ناس كتييييييييير ماشيين فيما يشبه القافله .. جمال ماشيه ورا بعضها وشايله حاجات ومتلونه ومتزينه والناس لابسين زي البدو او ( العرب ) كما نطلق عليهم في مصر .. سالت الناس دي رايحه فين قالوا طالعين من كل البلاد المحيطه عشان يوصلوا طنطا على المولد او الليلة الكبيرة وهي آخر ليله من ليالي المولد الي بيحرص اخويه الصغير على حضوره كل سنه وانا بصراحه مفكرتش اشاركه في ده ولا اعرف حتى فيه ايه ..

نيجي بقى للمهم ليه قلت لكم عن كل ماسبق ..

باختصار لان الموالد في مصر مش حاجه دينيه زي مابيروج البعض ولا هي بدعه زي ماكنت فاكره وانما هي ثقافه شعبيه وهي بديل لما يطلق عليه الكرنفال في بلاد الغرب ..

للاسف من مصلحه ( الناس الي برا ) ان ميكونش لنا اي هوية ثقافيه يعني شوف كده اي خليجي ممكن نعرفه من الغتره والعقال اي يابانيه ممكن نستدل عليها من الكيمونو اي هندية من الساري لكن هات لي كده لبس مميز لاهل مصر ممكن نقول اول مانشوفه ده مصري؟ مفيش غير عمه الصعيدي او ثوب المصرية في تمثال مختار وللاسف كل ده اما لا يمثل المصريين او حتى اختفى وجوده في حياتنا من سنين فاتت ..

الحرب على الموالد للاسف كانت دعوى حق يراد بيها باطل .. هدفها هو القضاء على قوة مصر الناعمه او طغيانها الثقافي على الدول العربية و الي ( كان ) موجود زمان وللاسف معادش بنفس القوة دلوقت ان افترضنا ان مازال له وجود ..

ده غير الحقيقة التي لايمكن انكارها ان سبب نشأة الموالد اساسا هو سبب اقتصادي بحت لانها تعتبر فرصة لانعاش النشاط الاقتصادي خاصه في الاماكن النائية والريفية الي يمكن يكون مكسبهم كله قائم على حصيلة البيع في ايام الموالد والاعياد ..

لست نهائيا مع الدعوة لألغاء الموالد وانما مع تنظيمها ووضع الظوابط لها بحيث يزال منها المخالفات الشرعية زي التمسح بالاولياء او التبارك بيهم او كل مالايمت للعقيده بصله وان يتم توعيه الناس باسس النظافه والتجمهر في الاماكن العامه بحيث يخرج المولد في النهايه بشكل حضاري يخدمنا ثقافيا واقتصاديا كمان ..

المسألة ملهاش علاقة بالسعودية ولا بغيره

انما المسألة معتمدة على التوحيد فى الاصل ... ده اولا

ثانيا بقى : العادات دى اتزرعت فينا أيام حكم الدولة العبيدية ( المسماة زورا بالفاطمية ) و حكامها كانوا روافض ... ياريت شيعة بس انما روافض

و بدأوا بزرع هذه العادات فى الشعب المصرى حتى دارت الايام و صارت اقرب ما يكون لصناعة كاملة لها ادارات عليا من المافيا كما يحلو لى ان اسميها

ثالثا و ده اجمل نقطة حضرتك وضعتيها : اين هو الزى التقليدى المصرى ...

المعلومات اللى عندى و جمعتها بصورة شخصية بعد لقاءات عديده مع اكابر السن فى مختلف محافظات مصر

من الصعيد الى الوجه البحرى الى البدو فى سيناء و الصحراء الغربية

الزى التقليدى المصرى ... القميص الفضفاض ذو الاكمام الواسعة و الرقبة حوض و العمامة العربية

و اشبه حد بكده ... رفاعة الطهطاوى

و تختلف العمامة و عدد ادوارها من اقليم لاخر و من عصبية لاخرى

و الله اعلم

و قد كان الاتراك و الشراكسة يلتزمون هذا الزى التقليدى ... حتى جاء احد السلاطين (اظنه سليمان باشا ... صححوا لى ان كنت مخطأ) و فرض الطربوش

و قامت ضد هذا الطربوش ما يشبه الثورة وقتها فى تركيا و عموم ارض الاناضول

و تغلب الفرمان السلطانى و صار لزاما على كل رجال الحاشية و النواب و الباشوات و البكوات و كبراء ضباط الجيش ارتداء الطربوش

و انتقل بالتبعية لسائر ارض الخلافة ...

انا مش عاوز اتكلم كتير فى الموضوع ده و اطلع عن الموضوع الاساسى

انما مصر ملهاش هوية فى الموالد و البلاوى اللى بتحصل ف الموالد

حضرتك بتتكلمى من واقع المشاهدة الخارجية البعيدة تماما عن قلب الحدث

انما يا اختى لو رايتى ما يحدث بداخلها ... مش بعيد تقولى

ربنا اخسف بهم الارض اجمعين

[HDarwish]

بصراحة المولد بالنسبة لي بيمثل ذكريات حلوة جدا أيام الطفولة وحتى لما كبرت شوية أو شويتين

كنا بنستناه من السنة للسنة ونزعل قوي إن ده آخر يوم في المولد .. ونقول إمتى حييجي تاني

المولد .. يــاه

كنت أفرح قوي وافضل اتحايل على ابويا علشان يوديني المولد وتتعدد محاولات لحد ما ييأس ويضطر آسفاً إنه يوديني .. أمسك في إيده علشان ما اتوهش وسط الزحمة أو يشيلني على إكتافه (شُق رقيبة) دلع منه أو بغرض نسهل حركتنا وسط الزحام ..

طراطير وطرابيش فيها شنب مربوط بأستك ومراجيح من كل لون وركوب حصان والحلاوة الشعر و حمصية وسمسمية وضرب نشان وإن جيت صح تكسب جايزة ورمي الطوق ويطلعلك في الآخر جايزة تافهة بس بتفرح بيها علشان إنت نشنت صح وأختى الكبيرة تشبط في عقدين لولي وغويشتين فالصو تشوف في ملامحها فرحة مالهاش حدود وكإن باباها جابلها الشبكة وفرحة كبيرة وناس تخبط في بعض بدون ما حد يزعل ونعدي على حلقات الذِكر (إبراهيم مجاهد) نفسي اسمعله من تاني كنت بتمتع جداً وأنا بسمعله حتى لما كبرت خصوصا حكايات ابو زيد الهلالي كانت ليله من أحلى الليالي نقعد نفتكرها ونحاول ما ننساش أي حاجة حصلت فيها علشان تاني يوم نحكي لكل صحابنا ونغيظهم ونقولهم على كل اللي عملناه آه ونسيت أقولكم على شوية الترمس والفول النابت اللي عليهم شوية شطة وابويا كان يكثر منهم علشان يعطي ل ستي إللي هيا جدتي يعني

ممكن تعتبروا المولد لاولاد القرية وكإنها الملاهي أو المدينة الترفيهية عند أولاد المدينة .. وانا صغير كنت بحسد اولاد المدينة اللي عندهم المراجيح جنب البيت وفي أي وقت ممكن يروح يتمرجح بعكسنا احنا اللي كنا نستنى المولد من السنة للسنة علشان نتمرجح ونتفسح ..

لما كبرت برضه المولد كان له طعم وجو تاني .. خصوصا لما تطلع مع الشلة والشلة دي مش ثلاثة ولا اربعه كنا ساعات بنوصل لخمستاشر او عشرين واحد كلهم في نفس السن ونلف في المولد ونركب مراجيح بس المرة دي مش بتاعة الأطفال لأ مراجيح كبيرة شوية وندخل نتفرج على الراجل اللي بيركب المتسكل وبيمشي بيه على الحيطة ولا المعزة اللي بتتكلم ولا البقرة أم خمس رجلين والساحر وحاجات كثير من دي .. وفي مرة دخلت مع حلقات الذكر من باب الفضول وفي نفس الوقت واحد صاحبي كان نفسه يدخل يعمل زيهم ومكسوف قولت اشجعه بس بصراحه بعد ما كانت من باب الفضول لقيتها ممتعة جدا وما عرفشي بئا من الدوخة واللف يمين وشمال الواحد ما عدشي حاسس فعلا باللي حوليه وبئت حركات لا إرادية .. وساعات كانت بتقلب بقصة حب لمدة اربع ليالي اللي هي مدة المولد لإن المولد كان بيجمع ناس من كل القرى اللي حولينا وساعات من بلاد بعيدة كمان .. قصة الحب دي كانت تنتهي على أمل بلقاء تاني في المولد القادم لكن للأسف ما كانشي بيحصل اللقاء في المولد اللي بعده لأسباب كثيرة

أنا ضد إلغاء المولد .. لا هو تجمع إرهابي ولا تجمع سياسي ولا أي شيء سيبوا الناس تعمل اللي تعمله طالما ما بيأذوش حد

[ozoozo]

في احدي مقالات د.احمد خالد توفيق قال ان بعض المصريين لاهم مسلمين ولا مسيحين انما هم موالده اي بتخذو من الموالد سواء المسيحيه او الاسلاميه عقيده لهم

[HDarwish]

يا سيد أوزوزو .. صدقني ثلاث اربع الناس اللي في المولد بيعتبروه زي فسحة وتقضية وقت لا هي عقيدة دينية ولا كلام فاضي من ده .. تسالي يعني ..

إنما لو جيت تتكلم عن الصوفية بجد .. فإحنا كنا بنعتبر من الناس اللي بيطلق عليهم الصوفية على حسب وصفكم وكلامكم .. بس الكلام ده زمان يجي من خمستاشر سنة كده وده لما كنا عايشين في القرية .. واقولك الصوفية عندنا بئا كان شكلها ايه ..

العائلة عندنا كانت تعتبر وما زالت من اكبر عائلات القرية حسبا ومالا .. وكانت العائلات الكبيرة زينا بتتنافس بينها وبين بعض في حتة الكرم والعطف على المساكين .. فكان تلاقي في المولد النبوي مثلا تلاقي في يوم من أيام الاسبوع اللي بيبقى فيها المولد النبوي إمام المسجد بعد صلاة العشاء يقول إن الليلة بكره في بيت فلان الفلان من عائلة كذا .. وبيكون البيت عندنا بئا على قدم وساق كل اللي فيه شغال بيعمل حاجة علشان الناس اللي جايلنا تاني يوم ممكن تقول لا يقل عن 200 أو 250 فرد .. البيت كان كله بيتملى وفوق وتحت ورجالة وحريم وصغار .. تبدأ الليلة بقراءة القرآن من أحد المشايخ ويتوزع علينا كتيبات صغيرة كده لونها أخضر عبارة عن مدح في الرسول والكل بيئوله في نفس واحد وبعدها بئا نيجي على الحاجة اللي انا بعترض شخصيا عليها واللي ما كنتش عارف لازمتها إيه .. نطفي النور خالص وواحد كده من اللي هو متعهد بالشعائر او الطقوس دي ونقعد نعمل الحاجات اللي بتشوفوها في التليفزيون دي .. الله حي .. وهو الله .. مع تأدية الحركات بالراس وأعلى الوسط يمينا ويساراً .. بس انا كنت صغير وكثير قوي كنت بدوخ ومن كثر الدوخة اقع في الأرض .. بالظبط حوالي نصف ساعة وبعدين يفتحوا النور وتلاقي الأكل جاي من كل ما لذ وطاب وبيبتوزع في رغيف عيش لحمة على بطاطس على دجاج كده يعني .. مع الفاكهة والحلويات بتاعة المولد .. بس والله كان كل هدفها هي إطعام المساكين والناس الفقرا .. ومعظم الناس كانت بتيجي علشان كده لا أكثر ولا أقل ..بس طبعا ما عادشي موجود الوقتي الكلام ده .. إيه زمن ..

كل اللي في الموضوع هو إحياء ذكري الرسول بس بمبالغة شوية في نقطة الذِكر بالحركات الصوفية بس .. لكن فيها برضه قراءة قرآن وقراءة الاذكار المسائية وصدقة أو أطعام المساكين ..

وتقبلوا تحياتي

[hanzalah]

المولد

بمعناه الموجود والذي يمارسه أهل مصر (مسلم و مسيحي) هو شيء من الدجل معجون بنوع من التلهية والفسحه للفقير

وقد يصاحبه نوع من الـ (نصب) وأكل أموال الناس بالباطل

بعض الموالد يصل بها التطرف الى حد ترتيب (زنا) بكل أركان الجريمة

....

كل ماسبق .. لا يتفق مع كلمة - كرنفال شعبي - من قريب

الكرنفال الشعبي الذي نراه في كثي من دول العالم

هو شيء من الموروث الشعبي تم تهذيبه وتنظيمه ووضع قواعد له وتحديد مسار واضح وتوقيت وترتيبات امنيه ومرورية واماكن للمشاهدين و ترتيب خروج الفرق المشاركة والمدارس والجامعات والمصالح والبنوك والى غير ذلك من مؤسسات المجتمع كافة

أرجو أن يكون الفارق قد اتضح بين

المولد : بمعناه و مدلوله المصري

و بين

الكرنفال الشعبي

دمتم بكل خير

[hamoudi]

لا أدري اذا كان هذا الخبر صحيحآ ام مجرد فرقعة اعلامية و لكن ما جاء في مصراوي اليوم يفيد بانه تم اتخاذ قرار بالغاء الإحتفال بمولد "السيدة زينب" هذا العام للوقاية من أنفلونزا الخنازير ....

أستطيع أن أتخيل ردود الأفعال حول أمرآ مماثل .. حول عادة متغلغلة في الوجدان الشعبي لأهل مصر ... و الضيق الذي سيصيب أهل الطرق الصوفية بها ...

أستطيع أيضآ أن أتخيل كيف سيتم البحث عن حلول بديلة ...

شخصيآ أنا ضد فكرة الموالد بصورة مطلقة .. فهي أبعد ما تكون عن الإقتراب من الدين .. و ان كانت تستخدمه كواجهة للقيام بأمور في غاية الأنحطاط ... و هذا ما لمسته بصورة شخصية سواء في موالد اسلامية و أخري مسيحية ....

في الدين المسيحي المولد و ما يدور فيه هو ضد تعاليم السيد المسيح نفسه .. فهو من قال : "بيتي بيت صلاة يدعي و أنتم جعلتموه مغارة لصوص " ... و بالرغم من هذا تأثر مسيحيي مصر أيضآ بعادة الموالد و أنشأوا موالدهم الخاصة .... حتي وصلت الي حوالي 80 مولد ...

علي اي حال أتمني شخصيآ أن يكون هذا الخبر صحيحآ و أن يكون حجة يقتنع بها الكثيرين لتبدأ بعدها رحلة الغاء جميع الموالد ....

اتمنى ذلك ولكن اشك فى حدوثه بل ربما محو الموالد يؤدي الى مشاكل داخليه من هذه الفئه الهمجيه صاحبة الخزعبلات

[Amr Radwan]

المفروض اننا بناخد تعاليم دينا و اسلامنا من القران الكريم و السنة النبوية الشريفة ..

و الان ..

المولد ده لا هو مذكور في القران و لا هو في السنة .. يبقي ده تبع اية ؟؟!؟!

مرة من المرات للاسف حضرت خطبة الجمعة في مسجد و كانت الجمعة اللي بعد الليلة الكبيرة في المولد و للاسف لم يحضر امام المسجد الاساسي و اعتلي المنبر احد المتصوفين ليخطب خطبة الجمعة ..

باختصار ..

ان ما سمعته في خطبة الجمعه عبارة عن قصص و روايات و حكايات و كرامات لصاحب المولد و ان من يعاديه و يرفض اقامة المولد كل عام سيلاقي غضب "الله" و غضب "الولي الصالح" صاحب الموالد !!!

طبعا انا كنت قاعد في الخطبة و مش عارف اعمل ايه .. امشي ؟ اسكت و بلاش شوشرة في الصلاة ؟ اكلم الامام بعد الصلاة ؟ بجد موقف مش عارف اعمل فيه اية و كل شوية يقول كلام ما ينفعش يكون في منبر و هو كله خرافات و خزعبلات و المسجد كان مزدحم بالموالديه اللي مبسوطيييييييييييييين بالخطبة و حاسيين ان ربنا كرمهم و انعم عليهم بالحضور هذا العام للمولد !!!!

ممكن احد فئات الناس اللي بتحضر المولد :

1- عائلات كبيرة تتخذ من التصوف وسيلة للتنافس بينها واظهار الكرم و ذبح الذبائح تقربا "للولي الصالح" و ليس "لله" و تتنافس في ان تكون الخيمة التي تقوم بنصبها في اماكن واضحة و انوار و اضاءة مبهرة متحركة و مكبرات الصوت اعلي ما يمكن من الضوضاء و اصطحاب بعض المغنيين الصوفيين الشعبيين في الليلة الكبيرة و اللي قبلها و للاسف كان "محمد ثروت" بيحضر و بيجي ينشد في الموالد .

و العائلات دي بتدفع مبالغ ضخمة لتاجير ارضية الخيم للمحافظة و وزارة الكهرباء و لذلك ليس من مصلحة المحافظة و لا وزارة الكهرباء ان الموالد دي تتلغي .

2- ناس غلابة عايشة علي الموالد راس مالهم تاجير المراجيح .. بنادق صيد .. عربيات .. بيع قصب السكر .. عمل سيرك و العاب نارية و بهلوانية .. و يتحركون من مولد الي مولد لان هذا هو "اكل عيشهم" .

3- اسر غلبانه مسكينة لا بتهش و لا بتنش و عادة بتكون في نفس المنطقة او المدينة اللي فيها المولد و بتكون مسلمة او مسيحية مش فارقة المهم ان الاب بياخد ابناؤه و زوجته و يطلع يفسحهم في المولد و يجيب لهم فسيخ و سردين و بلاوي سودا - عادة بتكون اخرتهم تسمم و يروحوا المستشفي - مع القصب و الطراطير .. و الاسرة بتكون مبهورة بالانوار و الاصوات و الناس .. و الاطفال مش مصدقين نفسهم من الفرحة و الاستغراب لما يحدث حولهم و يشاهدوه ..

4- شباب مراهق يذهب الي المولد لمشاهدة الاحتفال بالمولد و "زفة الخليفة" طبعا هؤلاء الشباب يبحثون عن الجديد و المرح و لسعادة في اكل القصب و اكل سندوتشات الكبدة و غيرها و اللي ريحتها و هي بتتعمل تجيب "اسهال" بس سبحان الله بيكونوا مبسوطين جدا ..

و طبعا حدث و لا حرج عن الاحتكاكات بين هؤلاء الشباب و بعضهم و الخناقات و التحرش بالبنات و الاطفال الصغيرة و التي تبدا عادة علي سبيل المداعبة الي ان يحدث مثل ما حدث من سنوات بسيطة في العيد في ش جامعة الدول العربية من تدافع و تحرش مجموعة كبيرة من الشباب ببنت او مجموعة صغيرة من البنات الي ان ياتي من يدافع عنهم و يبعد عنهم الذئاب المرحة الهائجة.

5- خيم خاصة ظاهرها الرحمة و باطنها العذاب ... اي ان الخيمة من الامام هي مجموعة من الصوفيين المنشغلين بالاهتزاز و التمايل اما من الباب الخلفي فحدث و لا حرج .. غرف خاصة لل"--" اعزكم الله

6- الحرامية و النصابين و اللصوص من كل حته فيكي يا مصر بيوصلوا بالسلامة الي ارض "المولد" و هاتك يا شغل .. ده دهب ..دي محفظة مكتظة بالمال .. ده حلق بنت صغيره ..

7- اهل المدينة او المنطقة التي تقام فيها المولد .. و هم الضحية في هذا المولد اي ان حياتهم تتعطل نهائيا في اسبوع المولد .. الدراسة تلغي لمدة اسبوع و الاعمال تقف و المواصلات تزحم و الطرق مغلقة و شلل تاااااااام للحياه فترة المولد

و الان .. بعد عرض الفئات التي تحضر المولد .. ما رايك ؟؟ هل من الصحيح الذهاب للمولد و المشاركة فيما يقال عنه انه "كرنفال شعبي" ؟؟

الراي يرجع لكم .. احببت ان انقل لكم الصورة كما عرفتها :blink:

تحياتي للجميع

[doha]

الكرنفال الشعبي الذي نراه في كثي من دول العالم

هو شيء من الموروث الشعبي تم تهذيبه وتنظيمه ووضع قواعد له وتحديد مسار واضح وتوقيت وترتيبات امنيه ومرورية واماكن للمشاهدين و ترتيب خروج الفرق المشاركة والمدارس والجامعات والمصالح والبنوك والى غير ذلك من مؤسسات المجتمع كافة

واهو ده بالظبط الي بقول عليه .. نهذب وننظم الموجود حاليا ونشيل منه المخالفات الشرعيه وبكده نبقى اخذنا خيره واتقينا شره .. مش نستسهل ونمنع