المراة احسن من الرجل..

[بنت شعنونة]

كنت عمالة اقرى دراسة عن عمل المرأة و الرجل

و فجأة اكتشفت شيء خرافي

ان الست احسن من الرجل في العمل ( الففففففففف مررررررررة) في الاداء و الانتاج بشرط انها تكون لسا انسة.. يعني لا عندها جوز ولا عيل :yahoo:

حد يقولي ليه...

اقولكم انا بقى ليه...

المرأة وهيا انسة نسبة انشغاالها ب حاجا غير شغلها ضئيلة مقارنة بالشاب اللي بيبقى عاوز يخرج مع صحابه او صاحباته ويتنطط ويروح ويجي و يلعب كورة و هكذا

انما البنت ما ينفعش في مجتمعنا انها تنتشر بالحرية الرهيبة دي عشان كدا يا عيني بتبقى مركزة في شغلها 110% كمان

بينما..

مجرد ان البنت تتجوز و يبقى عندها مسؤوليات تانية زي الزوج و البيت و الاولاد ( اللي هيا في مجتمعنا العربي مسؤوليات اولى) يبتدي دور العمل في مخها ينحصر و ادائها يتخلف و الحالة بتبقى ضنك ع الاخر :yahoo:

لأن احساسها بالذنب بيفضل مرافق لها طول ما هيا بعيد عن البيت او مسؤولياتها و مشاكلها بتروح معاها الشغل..

في حين ان الراجل لما بيتجوز بيستقر..!! او بالبلدي بيتهد و يتكلبش في الارض بميت كلبش اسمهم المسؤولية و البيت و والولاد وانه لازم يصرف عليهم عشان حتى منظره قدام مجتمعه الذكوري!!

ف يبتدي يؤدي احسسسسسسسسن بكتير عشان ينتج لنفسه عائد افضل + انه بيرمي كلللللللل المسؤوليات ع الست اللي اتجوزها..!!

ايه رايكم في الكلام دا

:yahoo:

[toota]

مظبوط يا شانا.....وانا عندي اقتراح.... ان اي مؤسسه او شركة...تعين انسات فيها ويشترط فيها بعد الزواج يعينوا ازواجهم بدالهم....وبكده نحل ازمة البطالة....ويقعدوا الستات في البيوت يأمعوا بتنجان ويقوروا بامية.....

[esocial]

انا بقى شايف

شايف بعينى محدش قالى

فعلا الست عموما بتكون أكثر تحملا من الرجل وأيضا أكثر صبرا لكن ده مش معناه انها أفضل أو أحسن أداءا فى عملها من الرجل لكن الموضوع له أبعاد تانية كتير جدا وهى ان الرجل يحب أن يكون الكل فى الكل وده بيخليه يهمل أحيانا فى أداء عمله لأنه لا يحب أن يكون هناك شخص أخر يأمره بما لا يرغب فيه لكن المرأة عموما تكون أكثر مرونة حسب الموقف وقد تفضل عملها على أمورها الشخصية أو بالمعنى الأصح بتيجى على نفسها لكى لا تتهم بالتقصير .

دا رأى شخصى مش من الضرورى أنه يكون صحيح

[جيمي]

انا كمان زمان قريت ان المراه اقوي اعصابااا من الراجل واقوي عاطفة ........ ولاحظو ان مافيش تعارض بين الصفتين فى هذا الكائن الناعم فكم من المشاعر تتضارب داخل قلب المرأه ................. وكان دليل الكاتب علي ذلك قوله.......لاحظو معايا كل جرائم القتل اللى بيقوم بيها جنس الرجاله تلاقيه ضارب الضحيه بمطوه شومه سلاح ناري او اي من الوسائل التى تؤدي للقتل وهوه اعصابه بتتشنج ويمكن يكون بيصرخ من الغل والكره للقتيل اما المراه ....يا سلام على الاعصاب ............... تلاقيها بتديلك صباع الكفته اللى فيه السم الزعاف وهي بتبتسم وبتقولك كل يا حياتي بالهنا والشفا

[الباشمهندس ياسر]

ويلكم باك يا دوك

انا موافق تماما ع الكلام اللى موجود داخل الموضوع نفسه و عايز اقول كلمتين من باب الاضافة

سعادتك انت و هى خارجيين بتتمشوا مثلا ( كان اخرنا نتمشى بس ايام الدراسة )

انت ترجع و تقعد نص الوقت بتبص ف الكتاب و دماغك تفتكر كلامها و قالت ايه و ضحكت ازاى و هى تقصد ايه من كذا و .......الخ

انما هى بسلامتها طبعا ترجع و تنسى الليلة كلها و هاتك يا طحن ف الكتاب

لو غلطتوا مرة و جيبتوا سيرة المذاكرة تلاقيها بتكلمك عن حاجات انت معندكش عنها اى فكرة اصلا

ولا ف الدمااااااااااااااغ خالص و تقوم مسبهل كده و قايلها هى الحاجات دى عندنا ف المادة

تقولك ... ايه ده هو انت مش عارف

انما عن عنوان الموضوع ... ف أنا مش موافق طبعا جدا خالص

لانه طبقا لمبادىء الليبرالية نوع من انواع التمييز بين الانسان ( اللى ابوه ادم مش حد تانى )

و حمدا ع السلامة مرة تانية يا شعنونة

[elfakhrany]

بس ياترى لو عمل بيحتاج لقوة بدنية و مجهود ياترى المرأة هتقعد تعيط وتقول يانى يانى حرمت أعمل كده تانى :)

[الباشمهندس ياسر]

بس ياترى لو عمل بيحتاج لقوة بدنية و مجهود ياترى المرأة هتقعد تعيط وتقول يانى يانى حرمت أعمل كده تانى :)

عندنا ف الفيلد بيقعدوا يعيطوا ... سواء انسة او مدام

[أبو محمد]

اما المراه ....يا سلام على الاعصاب ............... تلاقيها بتديلك صباع الكفته اللى فيه السم الزعاف وهي بتبتسم وبتقولك كل يا حياتي بالهنا والشفا

تمام زى السكر .. القاتل الصامت :)

يعنى فعلا المرأة أحسن من الرجل .. شعارها "دعونا نعمل فى صمت" وبمنتهى الرقة :)

وأنا من موقعى هذا .. أناشد شاعرات "المحاورات" مثل "لولا" .. "بنت مصرية" .. "مدام سلوى" ... أن يبدأن فى كتابة قصائد بعنوان نهج الكفتة .. تلتف حولها سيدات وآنسات "المحاورات" .. وينزلوا على "خناشير" المحاورات حتتك .. بتتك

والله زمان ياشانا :) مضمون الموضوع عن المرأة والرجل فى العمل قبل وبعد "الحادثة" .. لكن العنوان عبارة صباع كفتة شديد الانفجار :D

[عنبو]

لا ياجماعه انا مش معاكم فى الموضوع ده خالص

يعنى لازم اولاً نحدد طبيعة العمل مثلا يعنى مش تقولى واحده مثلا تشتغل مهندسه مدنى فى الموقع مثلا وتقف علشان تشغل عمال وصناعيه ؟؟

لكن نيجى بقى للاعمال المكتبيه دى على حسب بس اللى انا اعرفه ان ممكن الواحده تتفوق على الراجل فى النظريات يعنى الدراسه لكن الناحيه العمليه بتلاقى الرجاله يدوا اكتر بكتير

يعنى ممكن تلاقى واحده طالعه الاولى على الدفعه وتشتغل مع واحد طالع 1200 على الدفعه وتلاقى اللى طالع 1200 يديك فى الشغل ويضيف اكتر منها

طيب انا ليا واحده بنت خالتى كانت من الاوائل فى طب وكانت بتخاف تدى حقنه لاى حد يعنى نظرى بس ولو هتكتب دواء تقعد تعمل حساب الف مره على النقيض الاستاذ سعيد بتاع الحقن كان بيعمل عمليات وكان شغال زى الفل

نيجى بقى للكلام الجد

النجاح فى الشغل مالوش علاقه اقوى بالدراسه له علاقه اكتر بالشخصيه وان ازاى الواحد ياخد قرار سريع ومش يتردد ويكون صواب ده كله عاوز ذكاء فى التعامل ومخ صاحى وطبعا اقلب جامد علشان كده انا دايما بشرب بيريل علشان اجمد قلبى

وطبعا انا اتفق تماماً مع نقيب شباب العزابيه "" ياسر "" فى الكلام بتاع لما تخرج مع واحده

تحياتى

الحاج محمد الروش

[سهل جدا]

اقولكم انا بقى ليه...

المرأة وهيا انسة نسبة انشغاالها ب حاجا غير شغلها ضئيلة مقارنة بالشاب اللي بيبقى عاوز يخرج مع صحابه او صاحباته ويتنطط ويروح ويجي و يلعب كورة و هكذا

انما البنت ما ينفعش في مجتمعنا انها تنتشر بالحرية الرهيبة دي عشان كدا يا عيني بتبقى مركزة في شغلها 110% كمان

تمام كده, وهو دا نفس السبب اللي يخلّينا نشوف البنات دائما هم اللي بيطلعوا الأوائل في الثانوية العامّة

تقريبا في كل السنين تلاقي العشرة الأوائل أغلبهم بنات

ودا عشان البنت قبل الزواج ما وراهاش حاجة غير مذاكرتها بخلاف الشباب

وليس سبب تفوّق البنات في الدراسة (كما يدّعي بعضهنّ) إنها أذكى من الأولاد :)

بل الثابت علميّاً وشرعاً أن الراجل عقله أرجح من المرأة بكثيييييير

ولذلك شهادته باثنين من الحريم, والعصمة دائما في إيده :)

والاختراعات الحديثة, نلاقي إن 99 في المائة منها اللي مخترعينها رجّالة

حتى في مجال الطبخ (اللي الستّات فاكرة نفسها ما فيش أحسن منها), نلاقي إن أشهر وأعظم الطبّاخين في العالم رجّالة

حتى في قسم المطبخ في منتدى المحاورات ... تلاقي الشيف بندق (الراجل ابن الراجل) حفظه الله من أشهر طبّاخين المحاورات..

والستّات يسألوه وهو يجاوبهم

وسمّعني أجدع سلام للرجّالة

:lol: :) :sad: :D

[بندق أفندى]

حتى في مجال الطبخ (اللي الستّات فاكرة نفسها ما فيش أحسن منها), نلاقي إن أشهر وأعظم الطبّاخين في العالم رجّالة

حتى في قسم المطبخ في منتدى المحاورات ... تلاقي الشيف بندق (الراجل ابن الراجل) حفظه الله من أشهر طبّاخين المحاورات..

والستّات يسألوه وهو يجاوبهم

وسمّعني أجدع سلام للرجّالة

:) :ninja: </div>

الله يخرب بيت شيطانك يا أستاذ سهل ..

بس احب اقولك رجل ماهر فى الطهى وشيف على اعلى مستوى مش ميزة تضاف له .. لكن ست لا تعرف المطبخ عيب ..

ولا أوافق على هذا التقسيم من أساسه .. فطبيعة الخلق انه لكل دور وكلاهما مكمل للآخر .. ولا تستقيم اى حياة و لا أى مجتمع بدون هذا التكامل لتلك الأدوار .. ويمكنك ان تبحث لا بل ان يدور بعينيك فيما حولك لترى هل كل سيدة وحيدة او آنسة أو رجل لا تخلو من تعقيدات نفسيه؟ لا أعتقد هذا يحدث الا لمن تخلى عن جزء من طبيعة الخلق وتحور الى شئ آخر ليس هو الفطرة بالتأكيد ..

دمت سعيدا مكتملا بنصفك الآخر بلا منافسة .. لا انت ولا الأخت شانا التى أثارت الموضوع من أساسه .. فالحياة أدوار وتبعات وكل ميسر لما خلق له .. ولكم فى رسول الله صلى الله عليه وسلم أسوة حسنة .. فقد قال خيركم خيركم لأهله وأنا خيركم لأهلى .. رفعت الأقلام وجفت الصحف ..

بالصدفة الآن كنت أقرأ ميل وصلنى من أمريكا عن طبيعة خلق المرأة وكيف ان الله ميزها ... طبعا بشوية خيال فيه بعضا من سمات الكفر والعياذ بالله لذا لا يمكن نشره هنا .. طبتم وطاب مسعاكم ..

[حسام يوسف]

موضوع عنصري وكمان فيه خطأ التعميم :)

[بنت شعنونة]

ايسوشيال

انت لفت نظري لحاجا مهمة قوي وهيا ال "ايجو" الذكوري

طب هل دا موجود في الرجل الاجنبي والا العربي بس؟؟ :ninja:

جيمي

يعني انت سبت كل حاااااااااااااااجا الست بتعملها ومسكت في القتل :ninja:

ماشي ياعم :D عشان تعرفوا بس اننا عندنا ذمة و حونينييييييييييين جدا wst::

باشمهندس ياسر

ربنا يخليك ع الترحيب

بس عاوزا اقولك ان البنت بتركز ع التفاصيل كلها ما تاخدش بالها من الصورة الكبيرة مطلقا

في حين الرجل بيعمل العكس تماما

ودا بيظهر مثلا لو اسندت نفس العمل ل مراة و رجل هتلاقي الست عاملة كل حنتوفة و نتوفة ونسيت تبروز اللوحة مثلا

لكن الراجل اول حاجا ها يعملها ها يرسم البرواز واحتمال ينسى يرسم اللوجة اصلا :lol:

ابو محمد

ربنا يخليك :)

وما تنساش " ان كيدهن عظيم"

استاذ محمد العتبي

حتة القلب دي يختلف فيها رجالة وستات

ايام تكليفي كان عندي بنات اجمد من قلب كتير من زمايلنا الرجالة

احنا بنقول لو وحدنا الظروف كلها يا ترى مين ها يؤدي اكتر

على فكرة

من تجربتي ممكن الدكتورة تطبق 3 ايام شغل بدون نوم وتموت بعد كدا الصبيان كان اخرهم 24 ساعة وابقى قابلني لو لاقيتهم rs:

استاذ سهل

انا متفقة مع نص كلامك الاولاني

انما موضوع الطبخ دا

عشان انتوا دخلتوا مجالنا ف بقيتوا مميزين

زي بالظبط الست المأذونة ما هيا مميزة جدا دلوقتي لأنها دخلت مجال مختلف

بس wst::

بندق

ما احنا قلنا ها نوحد التصنيف و نفرق على اساس الاداء

ليه خدته الموضوع بعنصرية!!

حسام

يا ساااااااااااااااااااااتر عليكوا!!!!

[حسام يوسف]

والله العظيم انا بفرح وبتبسط لما أشوف موضوع ليكي يا دكتور

بس مشكلتى انى مش بكره فى كل كلمات اللغة العربية قد أخوات أفعل التفضيل دي

الأحسن

الأطول

الأعلى

الأقوى

الأجمل

مش كل الستات

ومش كل الرجالة

تحياتى من اسوان فى عز الحر

تم تعديل 17 يوليو 2009 بواسطة حسام يوسف

[بندق أفندى]

بندق

ما احنا قلنا ها نوحد التصنيف و نفرق على اساس الاداء

ليه خدته الموضوع بعنصرية!!

لم تفهمينى بس مش مشكلة

بس سؤال بسيط هو فين العنصرية؟ فى كلامى؟

[takiro]

انا بضم صوتي لصوت استاذ حسام ان مش كل البنات ولا كل الولاد عندك جق 100 في ال 100

بس انا معترض علي حاجه تانيه

ان الجواز بيخلي الواحد مستقر و بيدي في شغله اكتر

بالعكس

المسؤوليه بتقيد الراجل بتخليه يمشي حاله زي ما احنا فاهمين و بنشوف

عكس الواحد لما بيكون مش مسؤول و قراراته بتاثر عليه لوحده

افتكر بيكون اشجع و بيعمل الي هوه عايزه

و دي احسن حاجه في الدنيا

[عبير يونس]

دكتور شانا

إخواني الأفاضل

عن نفسي طول عمري ضد عمل المرأة من أساسه

و طول عمري شابفة ان الست دورها مهم جدا في الحياة من داخل بيتها مملكتها

لكن الواقع فرض عليا غصبا عني اني اشتغل

و لكني اتمنى من الله أن يأتي اليوم الذي أتفرغ فيه لبيتي و أبنائي

و هل هناك أجمل من أن تقر المرأة في بيتها تملأه بهجة و حب و دفء لزوجها و أطفالها

منزل مرتب منسق تفوح منه روائح الطعام الشهي

تتناول طعامك و تنام قليلا

و تصحو لتجد مقعدك الوثير و فنجان القهوة مع كتابك المفضل لتسمتع بالقراءة و أبناءك يقومون بالواجبات المدرسية

تجتمعوا معا في المغرب على مسلسل تلفزيوني شيق

أو في محادثات عن يوم كل منكم في العمل و المدرسة

و ماما الحلوة تتحفكم بشطائر و مرطبات

و في العطل تحلو السهرات مع الأسرة في الداخل و الخارج

و الأم دائما متواجدة

النموذج الذي اتحدث عنه هو نموذج والدتي الله يرحمها

كانت دائما متواجدة

كانت رمزا للدفء

كان وقتها كله لنا و معنا

كانت امرأة قمة في التدين و قمة في الأناقة و مثقفة و قارئة و مستمعة ممتازة للإذاعة التي كانت تفضلها على التلفزيون حتى يتسنى لها القيام بأعمال أثناء الاستماع بينما التلفزيون لا يمكننا أن ننجز معه أي شيء سوى الأكل!!!

كانت منتجة للعديد من مشغولات الإبرة كالتريكو و الكنافاة و الكروشيه و الديكورات و الخياطة و كل ما من شأنه أن يجعل المنزل متحفا بما يحوي من انتاجها الغزير

كانت تقرأ كثيرا و أكثر ما كانت تقرؤه هو كتاب الله

كانت متحدثة لبقة

لم أرها تزور الصديقات و لا تتحدث بالتليفون الا في أضيق الحدود

كانت معنا

مع ذلك كانت تراعي المجاملات كثيرا في الأفراح و الأتراح

و كانت مضيافة من الدرجة الأولى و أستاذة في عمل الولائم المبهرة

و كانت تتصدق كثيرا

كانت ملجأ لكل من له ضائقة مالية من الأهل و الأقارب

لا تضيع الوقت فيما لا يفيد

هذه هي الانسانة التي ربتني

و كم كنت أتمنى أن أكون و لو جزء منها

طبعا هناك أعمال تليق بالمرأة مثل الطب و التمريض و التدريس

و لكن هذا يتطلب امرأة سوبر يمكنها أن تقوم بعملها الرئيسي في الحياة و يكون لديها طاقة إضافية تنفع بها الآخرين

أما أن تعمل المرأة في كل المهن فقط لتثبت للرجل أنها مساوية له فهذا ما أرفضه بشدة

و هؤلاء نساء لهن ظروف حياتية مربكة جعلتهن يهربن من الدور الأساسي لمثل هذه الترهات

و ربما لعدم وجود دور لهن من الأصل أو فشلهن في القيام به

فتتجه المرأة للفت الأنظار بأن تبرز و تنجح في مهن غريبة عن طبيعتها كي تعطيها قدرا من الرضا عن الذات

و هناك من تضطرهن الظروف إلى العمل للمساعدة في رفع دخل الأسرة

و هناك من يتكفلن بالأسرة وحدهن كالمطلقات و الأرامل

كل له ظروفه التي لا يعرفها غيره

و في النهاية كل ميسر لما خلق له

شكرا مرة أخرى على الموضوع اللطيف و ان كنت أتمنى أن يتم تعديل العنوان

فالأحسن حقا هو من يتق الله عز و جل و يعمل الصالحات

سواء كان ذكرا أم أنثى

[سهل جدا]

دكتور شانا

إخواني الأفاضل

عن نفسي طول عمري ضد عمل المرأة من أساسه

و طول عمري شابفة ان الست دورها مهم جدا في الحياة من داخل بيتها مملكتها

لكن الواقع فرض عليا غصبا عني اني اشتغل

و لكني اتمنى من الله أن يأتي اليوم الذي أتفرغ فيه لبيتي و أبنائي

و هل هناك أجمل من أن تقر المرأة في بيتها تملأه بهجة و حب و دفء لزوجها و أطفالها

منزل مرتب منسق تفوح منه روائح الطعام الشهي

تتناول طعامك و تنام قليلا

و تصحو لتجد مقعدك الوثير و فنجان القهوة مع كتابك المفضل لتسمتع بالقراءة و أبناءك يقومون بالواجبات المدرسية

تجتمعوا معا في المغرب على مسلسل تلفزيوني شيق

أو في محادثات عن يوم كل منكم في العمل و المدرسة

و ماما الحلوة تتحفكم بشطائر و مرطبات

و في العطل تحلو السهرات مع الأسرة في الداخل و الخارج

و الأم دائما متواجدة

النموذج الذي اتحدث عنه هو نموذج والدتي الله يرحمها

كانت دائما متواجدة

كانت رمزا للدفء

والله كلام جميل يا أختنا الفاضلة

فين اللي بيقولوا إن جلوس المرأة في البيت تعطيل للطاقات

دلوقتي بعض عقلاء الغرب بدأو ينادوا بجلوس المرأة في البيت.. لمّا لقوا التفكك الأسري اللي حاصل والفراغ العاطفي لدى الأبناء

كنت قرأت بحث جميل أوي في الموضوع ده...

ثانية واحدة كده لما أدوّر عليه على جهازي..

أيوه أهو .. لاقتيه

هاقتبس منه جزء يسير

قالت الدكتور إيدايلين: إن سبب الأزمات العائلية في أمريكا وسر كثرة الجرائم في المجتمع هو أن الزوجة تركت بيتها لتضاعف دخل الأسرة، فزاد الدخل وانخفض مستوى الأخلاق ،وإن التجارب أثبتت أن عودة المرأة إلى الحريم هو الطريق الوحيد لإنقاذ الجيل الجديد من التدهور الذي يسير فيه.

وقال أحد أعضاء الكونجرس الأمريكي: إن الله عندما منح المرأة ميزة إنجاب الأولاد لم يطلب منها أن تتركهم لتعمل في الخارج بل جعل مهمتها البقاء في المنزل لرعاية هؤلاء الأطفال.

وطبعا أنا لست ضد عمل المرأة في بعض الحالات للضرورة.. كأن تكون هي في حاجة إلى ذلك أو يكون المجتمع في حاجة إليها..

ولكن ما أنكره بشدة هو أن تكون الدعوة عامة لكل النساء أن يعملن خارج البيت ..

[enjisultan]

الحقيقة الموضوع جامد

طبعا مش كل الستات ومش كل الرجالة

يعنى بس فعلا البنت لما بتتجوز بتحس انها وهى بتشتغل ان الوقت دا مسروق من حق ولادها

ودا احساس لو سيطر عليها هتبقى من مش احسن من الراجل ولا حاجة

طبعا دا مش الهدف من الشغل اصلا

هى يعنى مش منافسة لا سمح اللة

انما هى محاولة لمكافأة الذات

او يعنى بيعملوا الابحاث دى لرفع روح المنافسة وحب الانتصار عند المرأة

لو موجودة الروح دى اصلا

الخلاصة ان المرأة ممكن اوى تبقى احسن من الراجل انما لو تغيرت حالتها الاجتماعية

نجاحها اصبح يقاس بمدى تشجيع زوجها لهذا النجاح

يعنى جت برضة سيرة الرجالة

ما فبش فايدة

طريقك مسدود مسدود يا ولدى

[Amr Elgbaly]

ممكن يكون كلام سليم بس فى الاعمال النمطية

يعنى المراة اشطر فى العمل التكرارى مش الابداعى

خصوصا فى ال IT بصراحة كنت شغال تيكنيكل سبورت فى شركة كنت بشوف تحف لدرجة اننا كنا بنعمل على مكالمتهم نكت ونحكيها لبعض

واول مااتصل بالسبورت بتاع تى داتا والاقى صوت انثوى ناعم اقفل على طول واطلب تانى علشان راجل اللى يرد علشان المرارة

خالص التحية والتقدير