عمولة مكاتب السفريات

[KAhamid]

يا جماعة

كان في اعلان في اهرام الجمعة وعملت المقابلة وربنا كرم والناس كلمتني تاني

المهم اللي عمل معايا المقابلة مصري ـ مدير المكتب ـ

اتفقنا علي كل شيء خاص بالسفر ـ العقد / الراتب / السكن / المده

بدأت اخلص في الاجراءات والاوراق المطلوبة

انا عايز اعرف هلي في عليا عمولة هاتدفع للمكتب ولا لا

ولو في العمولة بتكون رينجها ايه يا عني نسبه في المية ولا حاجة ثابتة ولا اية بالظبط

[عاشق النيل]

يعنى سالت على كل حاجة الا عمولة الشركةدا فى ناس رفضوا السفر عشان عمولة الشركة وااله انا شفت بعينى عامل دفع 7000ج.م. المهم لو الشركة قابضة من الكفيل مش هتاخد منك حاجة لان الكفيل بيبعت الفيزا وساعات التذاكر والاتفاق فى الامتحان /المقابلة

وانا ف حالتى الكفيل مادفعشى مليم والشركة خدت منى4000ج.م.والسفر كان عليا

واللى ماشى شهر من راتب العقد الاساسى طبعا

ويللا بالتوفيق

[KAhamid]

ربنا يخليك ياباشا علي الرد والمساعده

انا الحقيقة ما اتكلمتش معاهم في الموضوع ده خالص وجه علي بالي دلوقتي بس فحبيت اسال

ولما قعدت مع المدير ما اتكلمش معايا في حاجة وبردوا قعدت مع صاحب المكتب وما اتكلمش معايا في حاجه وكمان في مدير المكتب بيتابع معايا بالتليفون اول باول الاجراءات اللي انا خلصتها في الورق

ومرة تانية شكرا ليك

[rewsha]

يا جماعة

كان في اعلان في اهرام الجمعة وعملت المقابلة وربنا كرم والناس كلمتني تاني

المهم اللي عمل معايا المقابلة مصري ـ مدير المكتب ـ

اتفقنا علي كل شيء خاص بالسفر ـ العقد / الراتب / السكن / المده

بدأت اخلص في الاجراءات والاوراق المطلوبة

انا عايز اعرف هلي في عليا عمولة هاتدفع للمكتب ولا لا

ولو في العمولة بتكون رينجها ايه يا عني نسبه في المية ولا حاجة ثابتة ولا اية بالظبط

بصراحه مش عارفه اقول لحضرتك ايه؟

من الواضح انك لسه جديد في موضوع التدوير على عقود عمل عن طريق مكاتب السفر .

انت اتفقت معاهم حلاص يعني ؟.طب اتفقت ومضيت عقد وله اتفقت بس ؟

اصل احنا اتفقنا ومضينا العقد كمان وبعدها المكتب طلعوا نصابين .فخلي بالك ماتعملش اي اجراْات الا لما تمضي العقد وتعرف ان هوه ده العقد اللي هاتسافر بيه وان مافيش اي عقد تاني هايطلبوا منك انك تمضيه

كمان خلي بالك من التلاعب بالافاظ في كتابة بنود العقد .

حاول تتعامل مع مكاتب لها سمعه كويسه (بمعنى)في مكاتب مشهوره بالنصب والكذب ومكاتب تانيه معروف عنها المصداقيه

اما بالنسبه للعموله .اقول لك طبعا طبعا طبعا طبعا .في عموله والعموله بتكون 2,5 %من راتب اول سنه ليك ده القانوني

او بعض المكاتب بتكون عامله لنفسها مبلغ معين .مثلا 6000 او 7000 او في مصر الحجاز ممكن ياخد 12000 لو جاب لك عقد حكومي

وفي بايونير مكتب محترم جدا وبياخد العموله القانونيه اللي هيه 2,5%

المهم ماتتسرعش .احنا بقالنا 7 شهور بندور ولفينا على مكاتب كتير جدا .خلي بالك كويس قوي

وربنا يقدم لك مافيه الخير

[ينبع]

السلام عليكم

فيه مكاتب بتأخذ عموله قدر راتب شهر المتفق عليه فى العقد

وفيه مكتب بيأخذ مبلغ معين على اى عقد اى كان بيبقى قدرده 5ونصف او 6 دى المكاتب اللى قابلتا لكن 2,5 % لم تقابلنا يارب تقابلنا ويطلع فيه ناس ولاد حلال

[زعلان]

مفيش حاجة اسمها عمولة تدفعها له هو بيقبض من صاحب الشغل

[rewsha]

الاخ /زعلان

معلوماتك مش ابتوديت

مافيش مكتب دلوقتي بيسفرك ببلاش .حتى لو كان قابض من صاحب العمل .برضو بيقبض منك انت كمان وزيادة الخير خيرين

في حاله واحده بس ممكن المكتب ماياْخدش منك عموله .وياخد بس تكاليف تخليص الورق اللي هوه بيخلصهولك منك

ده في حاله انك تكون مربط مع الكفيل وانت اللي مظبط العقد معاه والمكتب مالوش اي دعوه غير انه يخلص لك الورق

بمعنى :ان يكون لك قريب او صديق باعت لك عقد من السعوديه مثلا او انت تكون كنت مسافر قبل كده ومظبط عقد تاني مع كفيل تاني وهوه هايبعتهولك لمصر وفي الحاله دي بس المكتب بياْخد رسوم تخليص الورق بتاعك وبس

وبعدين انا كنت قراْت هنا في المحاورات منفتره .عضو معانا كاتب مشكلته .انه راح وعمل مقابله في شركة سفريات والكفيل وافق عليه واتفقوا وكل حاجه والكفيل كان هوه اللي مقبض المكتب زي ماحضرتك بتقول

والمفروض هوه مش هايدفع ولا مليم .الكفيل هوه اللي عايزه

وفوجيْْان المكتب بيطلب منه العموله .ولما رفض وقال لهم انه عارف ان الكفيل هوه اللي هايدفع

راحوا بايعين العقد لواحد تاني خالص قبل ودفع لهم .وهوه لماراح للمكتب قالوا له الكفيل لسه مابعتش حاجه

وقالوا للكفيل ان اللي هايسافر وانت اتفقت معاه ماخلصش ورقه او حصلت له ظروف منعته من السفر وجبنا لك واحد تاني

طبعا التاني ده .هوه اللي قبل ودفع لهم عموله

وده النظام اللي ماشي هنا في مصر

واي خدمه .....مصر لسه بخير

[adrianocrespo]

المكاتب المحترمه قليله

و الاغلبيه بتاخد شهر تقريبا عموله او اكتر شويه

[se_ Elsyed]

المكاتب المحترمه قليله

و الاغلبيه بتاخد شهر تقريبا عموله او اكتر شويه

لو اللي مسافر متعاقد مباشرةً مع الجهة التي سيعمل معها في الخارج ... يبقى بيدي المكتب على قفاه وما بيدفعش ولا مليم ....

والغاوي ينقط بطاقيته ...

خلال فترة طويلة جداً لم يتحمل اي موظف لدينا أي مليم ...

إحنا شخصياً ... كل اللي بياخده مننا المكتب في مصر أتعاب مقابل إنهاء أي تأشيرة هو 1500 ج فقط لا غير

ولحد 3 سنوات مضوا كانوا 300 ج

والموظف بيدفع بس تكاليف الشهادة الصحية ... وساعات بيبجح ويوصل السعودية يطالبنا بيهم :)

[pocy]

والله يا اخى الكريم انا رأئي دور انت بنفسك على شغل من على النت وهتلاقي ملايين الشغلانات بلا مكتب بلا كلام فاضي المكتب كان عايز يا خد من واحد اعرفه 14 الف جنيه تخيل وليه بس علشان جابله شغله مش مضمونه وكمان مش اقامه دا كان كارت زياره والحمد لله الواحد بيتعلم من تجارب الاخرين فمثلا انا لقيت شغل عن طريق النت وبعت السي في بتاعتى واتصلت بالرقم اللى موجود بس اللى فادنى ان اختى كانت موجوده فى البلد وخليتها تروح بنفسها للشركه دى وتتكلم معاها وبعدين الموضوع مشي لا دفعت لمكتب ولا شئ

انا عارفه والله ان الواحد بيدور بايديه واسنانه علشان يخرج بره مصر ويقدر يكون نفسه ويقدر يعيش اهل بيته عيشه محترمه لكن كرامه الواحد اهم شئ وكمان الاهم انك مش تخسر نفسك وفلوسك فى حاجه غير مضمونه ولا ايه يا كباتن

[elshafey]

النسبة القانونية هي 2 % من راتب أول سنة + البدلات المذكورة في العقد وغير كدة مكاتب التوظيف ليس من حقها طبقا لقانون العمل الحصول علي أية مبالغ أخري من الموَظَف اللي هو حضرتك

ده اللي انا عرفته من موظف في مكتب العمل والمفروض إنه بيفتش علي المكاتب دي . بس بعد ما قاللي كده رجع قاللي بس العقد في إيديهم وممكن ما يخلوكش تسافر لو مادفعتش اللي هما عايزينه.

فمن الآخر فاصل مع المكتب ولمح له بموضوع ال 2% ده والقانون (طبعا ده لو طلب اكتر من ال 2%)

وربنا يوفقك إن شاء الله

تحياتي

تم تعديل 18 يوليو 2009 بواسطة elshafey

[KAhamid]

يا جماعه انا متشكر جدا علي التفاعل المفيد جدا اللي في الموضوع

بس الغريب ان ما فيش حاجة اتكلموا فيها تخص العموله خالص

صاحب المكتب قعد معايا وشرحلي الاجراءات اللي هانتبعها لانهاء الاوراق والحصول علي التاشيرة لغاية لما نسافر وحسب كل المصاريف بالورقة والقلم معايا من اول الصور اللي هاتصورها لغاية السفر

انا علي العموم هاتصل بيه النهارده

وهاتكلم معاه واساله علي موضوع العمولة وم المكتب بالتحديد وبردوا هاكتب اللي حصل هنا علشان الناس تستفيد

المكتب علي العموم اسمه مكتب الاصدقاء للاستشارات والحاق العماله بالخارج

في ش محي الدين ابو العز بجوار فرغلي

موقع المكتب علي النت

www.elasdekaa.com

[ابو زمزم]

مارايكم فى مندوب مبيعات راتب 1500 ريال +البدلات والاقامة والسكن + عمولة المكتب 7000 جنية مفيهاش كلام طبعا + مصاريف الاوراق والباقى الى عارفينه والسفر عليا

وشاورهم فى الامر

[KAhamid]

طيب بالنسبة للحوافز

لان انا اعرف اكتر من مندوب بيطلع علي راتب اساسي في الرينج ده من 1200 ل 1500 بس في زيادة سنوية ثابتة وفي حوافز بتعمل معاه في اخر الشهر حوالي 4000 الي 4500 ج

بخلاف السكن

[ابو زمزم]

الزياده السنوية مش محددة فى العقد وبيقول انا مش عايزك تقولى زودنى انا بنقدر ونزود الى اتفقت علية ممكن تقعد بيه لحد نهاية العقد الزيادة دى وديا مننا

وبالنسبة للعمولة ا% على التحصيل مارايكم العمولة تبدا من بعد 3 شهور فى العقد

[KAhamid]

انا ما عرفش نسب العمولة المفروض بتكون كام

هي الشركة شغاله في ايه

[ابو زمزم]

الشركة تعمل فى مجال المعلبات البلاستيك والكاسات الفارغة والاطباق الفوم والحرارية وكاسات الشاى الورقية وطبعا هذة مواد لاغنى عنها فى انحاء المملكة