مكاتب تكسب وما تكسبكش

[ابو زمزم]

اخوانى الكرام هذا اول موضوع اشارك فيه بعد قرار حوارى للوصول الى حل وهو اصبح الان الوضع سىء جدا فى مكاتب العمالة الصغيرة والكبرى وهو عندما كان ياتى السعودى زمان ايام الخير كان بيجى ومعاه بريستيجه المحترم له هو والمتعاقد معاه وعرضه المغرى وكان المكتب ياخد حقه من السعودى وان اخذ عمولة من المتعاقد بياخذ القليل مثلا 2000 او 3000 ده الكبير ده لو كان العرض مغرى جدا

بيبص على قده كان فى خير زمان طبعا مش زمان قوى يعنى مقارنة بالوضع الحالى بقى السعودى دلوقت ينزل مصر اجازة حتى لو معهوش فلوس بس يكون فى جيبة كام فيزا وبس والباقى على مكاتب العمالة طبعا الفندوق والحفلات والواجب ..... طبعا كرم المصريين السعودى او من ينوب عنه يقول عاوز شباب ومواصفات ومثلا يكون معاه 5 فيز فقط والمكتب عشان يعمل شو قدام الراجل ويحسسه انه مشهور بيظبط المنديب والاعلانات فى الجرايد حتى دى كمان كانت زمان دلوقتى بقت على المواقع على النت اعلان مش مكلف ولا حاجه هيجى عليه الف واحد مثلا المكتب يقوم مدخل مثلا 100 شخص للمقابلة مع السعودى وطبعا السعودى يزقطط ماشاء الله تبارك الله الخير كتير يا ولاد بس يعمل المقابلات وطبعا مع شباب زى الفل ومؤهلات عاليه كلها وتلاقى بقى المفاوضات السعودى بيكون محدد بدايه راتب فى حدود 2000 ده الكلام ده فى دماغ السعودى بس غير البدلات ولما يشوف العدد الكبير الى قاعد ومستنى عمنا الحاج ويقول الله وفرت كام الف ريال طيب 2000 الى فى دماغة يقوم ايه يبتدى من يلا يا ولاد نفتح المزاد على 1000 ريال يلا والسكن عليا ويحسسك انه بيشترى ويبيع فيك وطبعا الشباب غلبان يا ولاد وقاعد مش لاقى شغل والبطالة والقهاوى والعولمة وماشاء الله القنوات الفضائية قايمة بالواجب مه السعودى شايف حقيقتنا على الفضائيات لاكدب ولا شعوذة المهم هنا المعظم دلوقتى بيكون فى ناس محترمة جاية تقابل الشباب طيب هنزودك هناك لما نشوف شغلك ويعملك من البحر طحينة زى مابيقولو والدليل قالولى طبعا كمان غير المصيبة المستخبية وهيا مسمى الفيزا الى بقت خلاص بقى ده سرو بلدنا وياعم اصل المهن متسعوده وده طريقة تدخل البلد بس وهناك هنــــــــــــاك هنغيرهالك طبعا ده مع الشركات المحترمة الى لو ليها نفوذ ومشهورة تستقدم المحاسب بفيزا محاسب مش عامل معمارى مثلا والمهندس بفيزا مهندس مش حداد مسلح يا اخوانى ده واقع وطبعا للتاكيد اسئلوا اخوانكم المغتربين وتصفحوا المغتربين وشوفو الى حصل لشبابنا والى راح ومش طايق يقعد والاوهام

الى شبعو ا الزبون منها واخبط دماغك فى الحيطة واشتكينى فى مكتب العمل وربنا يسهلك كام سنه وخش بقى فى الشرع وخد حقك ويقوم فى الاخر يبخس حقه ويعطيه الفتات ويسلخ جلده ويخرجله ومع السلامة ويقوم برضه مبلغ عنه او ميدهوش اخلاء طرف عشان يرجع تانى او يقعده كام سنه عشان يدخل المملكة المهم بعد ده كله اساس الشاب الى ربنا ابتلاه بالمصيبة ديه كان المكتب لاهف منه على 1200 ريال راتب والسكن الى هو ونصيبة حسب صاحب العمل المحترم يكون خابط الشاب فى 6000 او 7000 جنية على العقد ده وشروط كمان الاجازة بعد سنتين عشان توفر عليه تذكرة طيران ولا ايى حاجه السعودى يبخس بيها حق المصرى

وطبعا 1200 ريال ويلا سالسكن والاقامة يا عم وعربية ابسط ويا حاج ان شاء الله ويقوح قايلك على 6000 - 7000 جنيه طبعا غير الاوراق والنت والتحاليل ومرمطة موظفين الروتين المصرى وطوابير الكشف الطبى ماشى الحال طبعا حضرتكم فاهمين الكلام ده يقوم مثلا لو السعودى وافق عليك يلا نيجى بقى لمرحلة كتابة العقد والاتفاق على الراتب المذكور اعلاه يقولك انا باخد عمولة 7000 يا عم طيب خليه يزود الراتب شوية لا هو الراتب ده ان كان عاجبك مش راضى فى غيرك كتير هيرضى فاطبعا الموضوع عرض وطلب فانا راى لو الراتب بالشكل ده ميكونش فى عمولة للمكتب والسعودى يوفر تذاكر السفر انما اصبح الان الوضح مخزى الى فاهم السفر ازاى ومش قابل بالعرض فى غيره مش فاهم وساعات فاهم وبيقول يلا اهى تجربة والناس هتزودنى وده فى الاحلام طبعا ممكن بعد سنه يديك 150 ريال زيادة على 1200 ويبقى المكفول يتعب ويتحمل دوام 12 ساعة وفوق طاقته ويتبخس بحقة ودافع مبلغ كبير فيه السفرية ويرجع زى ما هو

انا معاكو ان دى ارزاق ربنا مقسمها ولكن ناخد بالاسباب لازم نعرف هو الوضع ده هيستمر بالنسبة للشباب المصرى عمتا

بسبب الموضيع المفتوحة لاخوانى المغتربين انشئت هذا الموضوع (مكاتب تكسب ومتكسبكش ) مثل مكاتب السفريات وعمولتها واعمال النصب التى بها

وانا لاانكر ان فى مكاتب محترمة وعروض محترمة بس قليلة قوى مش ظاهرة مع العدد الكتيــــــــــــــر قوى للشباب

فهذا الموضوع حوارى هل فى امل ان المصرى صاحب مكتب العمالة هو الى يعزز من قيمة المصرى بن بلده

اقصد يعنى انت هتاخد 7000 او ان اى رقم بس يكون فى مكانه مع راتب ممتاز وبدلاته ومهنة للفيزا محترمة واكسب زى ماانت عايز

الفيز زى الرز + شباب زى الرز وزى الفل طبعا مؤهلين وتلاقى الوضع سىء وكره للمصرى من السعودى وعبودية وغيرة مما تسمعونه فى الفضائيات وتتصفحونه فى المحاورات والمغتربين

اخوانى الكرام عذرا للاطالة ولكنى ارى ان الموضوع يستحق اكثر من ذلك

والله المستعان ويهدى شبابنا ويصلح احوالهم وياخذون مكانتهم مرة اخرة فى المملكة السعودية بالتحديد

بانتظار تفاعلكم مع الموضوع وتحاوركم فيه

[herohero]

والله االعيب فينا ان للاسف الي مضيعنا المصري سواء ف المكتب ف مصر ولا بيضيعك لما بتشتغل والله انا اكتر ناس شوفتها بتضر ف المصري هو المصري اللي زيه

نفسي نعمل سعر لبعض سمعتها كتير ، بيقول للسعودي هم لاقيين ف مصر ويبقى محسسك ان 2000 ريال اختراع بيرخص المصري اللي زيه

هل حد كان يتوقع ان السوداني والاردني اغلى مننا بقينا بنافس الهندي ف انخفاض مرتبه بس على فكره حتى الهندي بقى احسن مننا اللي المعيشه عنده ارخص مننا

[ابو زمزم]

شكرا على مرورك يا هيرو وانا معاك ان المصرى الى زينا هو الى مرخصنا اساسا يبقى السعودى هيموت عليك وعاوزك بس يقوم مصدرلك مدير مصرى يبخس بحقك يا عم انت طايل ماانت قاعد من غير شغل يا عم انت عارف 1200ولا 1500 بلاش 2000 زى ماحضرتك بتقول انت عارف يعملو كام بالجنيه المصرى اضرب 1200* 1.5 = الله مبلغ كبير ما بخدهوش فى مصر والراجل هيديك عربية وسكن ماتحلمش بيه والزبون مش فاهم حاجه انما هو مقتنع بكلام بن بلده الى يعرفله المصلحة ولازم يثق فيه وطبعا ميعرفش انه هو لما بيصرف فى السعودية بالريال مش بالجنيه وتلاقى ان المصرى القديم هناك هو دماغ السعودى الى بتفكرله ويقول ان لو الواد الى لسه جديد والكفيل شاف خبرته وومؤهلاته ممكن يهتم بيه ويشوفة ويتسحب البساط من عليه طبعا الكلام ده فى المؤسسات الصغيرة وليس بالشركات الكبرى ذات السيستم المنتظم والكفائات المتساوية انا مش عارف بحس ان المصرى الجديد لما بيروح للمصرى القديم بيحس منه انه جى يا خد اللقمة من بقه مش مؤمن ان دى ارزاق مخفية ومقسمة ولكن اقول انه ابتلاء وامتحان من الله يجب ان يصبر عليه كل مصرى من مصرى مثله بس المشكلة انهى زادت عن حدها وتسمع بيها كتير فى معظم الشركات وذاعت المشاكل بين السعودى مما ادى الى استغلالها

[خالد شحاته]

السلام عليكم ورحمة الله وبركاته

اخي الفاضل ابو زمز

انا هكلمك مش باني صاحب مكتب عماله

هكلمك باني انسان مغترب من 20 سنه في الرياض احب اوضح شي اولا المصري هو الا بيرخص نفسه للاسف بيكون طالب 3000 ريال مثلا ويجي مصري تاني يقول اشتغل بي 1500 يبقي المكتب ذنبه ايه انما الانسان الا بيكون واثق من نفسه وعارف مقدرته في العمل استحاله بيقبل براتب قليل حتي لو مش هيسافر وبيجالس رجل علي رجل وبيتشرط علي السعودي انا عايز كذا اقسم بالله كان عندي مره مقابله في الشركه وجه السعودي وطلب كم طلب من مدرسين ودخل كم مدرس للمقابله المهم في مدرس مشاء الله داخل وفاهم السعودي بعد مخالص الاختبار بيقول راتبك كذا رد المدرس قاله اسف انا مش هسافر اقل من كذ والله الراتب الا قاله المصري ضعف الا قاله السعودي رغم في اكتر من مدرس كان موفقين علي السعر الاقل ولما شاف المدرس ده وثق من نفسه مضي معه العقد بالسعر الا قاله المصري معني كلامي الانسان هو الا بيرخص نفسه وبيغاليها بمستوها وتعلميه واحترامه لنفسه وكرامته مش مجرد ما اي كفيل يقول راتب كدا يوفق عنده المقدره ان الراتب ده مش هينفع معه يتكلم ويقول لا انما يقول اروح اجرب السنه دي واشوف لما كل واحد يجرب ويشوف خالص السعودي مش عايز كل سنه ينزل يجاب ناس تجرب

[عاشق النيل]

معذرة للجميع

الظروف الاقتصادية الصعبة ف مصر/صعوبة ايجاد عمل براتب كويس ف مصر

وغالبية القطاع الخاص مش بتاخد حقك /ولامكافاة نهاية خدمة/ ولا اجازة سنوية/ولا اوفر تيم/ولا بدلات/وبصوا على اللى بيقدموا هجرة والا بيهربوا

والله ليا زملائى بيحلف ان عيال عمة بيدفعوا بال 50الف حتى 80 الف عشان يهرب لايطاليا او اليونان عن روية عين قدامة لاكتر من مرة لانة يعتقد انة حيعوضهم

وفى االى جاى السعودية ب فيزا من 15الف حتى 27الف بدون عمل معين وبيجرب بختة //ادينى عقلك

وكمان غالبية شركات العمالة مش بيدور الا على عمولتة وما يهموش الراتب اللى عارضة السعودى يعنى من الاخر محدش بيدور الا على مصلحتة

انا شخصيا كان معايا محاسبين ومديرى حسابات بيمحتنوا واصروا قبل الدخول "يا جماعة مش اقل من 3500 ريال"ودخلوا وانا الاخير طبعا وبعدين السعودى اصر على الحد 2500 وانا على العهد 3500 ريال

وبعدين اتصلوا بيا ف الصعيد "السعودى اختارك والراتب 2500ريال+مهنة عامل" ولما قلتلهم الراتب قليل وارد عليكم بكرة ومهنة عامل ما تنفعش قالوا حنكلمك تانى

وبعد ساعتين بالضبط طلبتهم للاستفسارعن البدلات يمكن تكون كويسة قالى الموظف والله اتنيين من القاهرة هنا جم عشان يسافروا بالشروط دى "2500 ريال+ مهنة عامل" طبعا من الخمسة اللى اتفقوا على ال 3500 ر.س. واعتذر الموظف بشدة واحترام الصراحة لان السعودى مستعجل جدا وممنوع اى اتصال بية او منة لان الشركة حتى بترفض اعطاءة اى تليفون للممتحن //طب يبقى ادينى عقلك

والصراحة المكاتب كلها حد المحاسبين مثلا من خريجى 2003 وطالع راتب من 1500ر.س.حتى 2500ر.س. للخبرة الجامدة والمكتب هو اللى بيزوق العرض ويلح وهيزودوك والريال *1.5 وغيرة وغيرة

المهم العروض كتييرة بالخليج والسعودى اللى بيمتحن بيحلف انة امتحن 40 واحد ف تلات شركات والمفروض شركات العمالة تفرز الكفاءات وتحدد شرائح للمرتبات حسب المستويات واكيد ساعتها حيبقى الرواتب والبدلات احسن لانهم بيحبوا المنظرة يتصلوا ب100 واحد من غير ما يهتموا بخبرتة والا تاهيلة العلمى لمجرد الظهور امام السعودى ان احنا هنا والسعودى عندة دهاء رهيب وفاهم كويس عشان كدة بيفطس الراتب

هو لو امتحن 5 بس فرز الشركة لازم بعون الله حيبقى الراتب والبدلات فل الفل

ويللا كلة بياخد نصيبة

[النجم الثاقب]

والله االعيب فينا ان للاسف الي مضيعنا المصري سواء ف المكتب ف مصر ولا بيضيعك لما بتشتغل والله انا اكتر ناس شوفتها بتضر ف المصري هو المصري اللي زيه

نفسي نعمل سعر لبعض سمعتها كتير ، بيقول للسعودي هم لاقيين ف مصر ويبقى محسسك ان 2000 ريال اختراع بيرخص المصري اللي زيه

هل حد كان يتوقع ان السوداني والاردني اغلى مننا بقينا بنافس الهندي ف انخفاض مرتبه بس على فكره حتى الهندي بقى احسن مننا اللي المعيشه عنده ارخص مننا

ارجو إننا نتكلم عن أخوانا من الجنسيات الأخرى بصورة أفضل .. هما مش أقل مننا فى حاجة و لا احنا احسن منهم فى حاجة