شاب يريد الزواج ويريد عمل انقلاب (زواج بدون شقة تمليك)

[abdulmuttaleb]

بسم الله الرحمن الرحيم

فيه موضوع طلع في راسي وأنا جاد جدا في عرضه، وعايز أسمع آراءكم جميعا، وخصوصا الآباء والأمهات

دلوقتي أي شاب محترم عايز ياخد بنت الحلال على الحصان الأبيض فإنّ المجتمع يفرض عليه عشرات الألوف من الجنيهات في شقة تمليك وأثاث، وطبعا عشرات الألوف ده يعني لو شقة في أسوأ منطقة

المصيبة أن مجتمعنا المنيل بستين نيلة، تلاقي الشاب يستلف، وأبوه يدفع (يكع بالأحرى)، وأمه تفك الوديعة عشان الولد يشتري الشقة ويتزوج

وفيه سؤال أهبل محدش عنده مخ بيفكر فيه:

هو مش الأفضل للشاب إنه يؤجر شقة ويعيش فيها مع عروسه، ولو افترضنا توافر هذا المبلغ الضخم للشقة أن يوجهه لمشروع يبدأ به حياته ويستقر ويقف على قدميه، وحتى ممكن عروسه تكون لها فرصة عمل في هذا المشروع، وبعد مرور الأيام (عادة متوسط 8-10سنوات) ح تتوافر لهم أموال تكفي لشراء شقة محترمة.

يا جماعة شوفوا أي رجل أعمال ناجح ح تلاقوه بدأ من مكتب إيجار، وجايز اشترى الكراسي وأثاث المكتب بالإيجار المنتهي بالتمليك، ووحدة وحدة الشغل بيبدأ يغطي مصاريفه، وشوية شوية تبدأ الأرباح والشركة تقوم على رجليها،

لو الراجل ده بدأ بشراء مكتب تمليك جايز ح يقعد في البيت،

ليه في البيزنس كلنا بنتفهم ده، وبينما في الجواز بنقول الناس ح تاكل وشنا لو ماكنش فيه وفيه وفيه

وعلى رأي أحد أصدقاءي اختلف مع حماته على نيش وصيني أخر الزواج أشهرا ولم يستخدم نهائيا رغم مرور 9 سنوات، طيب ليه من الأول الإصرار على هذه الأمور؟؟!!

هل كأب أو أم تقبل أن يتقدم شاب كفء.........إلخ ولكن ليس لديه شقة تمليك، وهو لا يرفض شراء شقة تمليك، ولكن فقط في بداية حياته صعب أن يشتري شقة تمليك، فلماذا لا يعجل الزواج وفي نفس الوقت الشقة التمليك جاية جاية

واحد صاحبي فتحت معاه الموضوع، قال لي لو لي أخت ما أرضاش لها كده، قلت له ليه؟

قال لي لازم أضمن أن الشاب ده جادّ في الزواج و(شاري) البنت عشان يحافظ عليها، والشقة هي الدليل على ذلك

طيب بالله عليكم، هل الجدية والأخلاق مرتبطة بشقة تمليك، مش ممكن واحد يشتري شقة تمليك ويعذب زوجته بحيث تكره الشقة وجدرانها؟ وهو أليس من الممكن أن تطلع الشقة منصوب عليهم فيها بعد الزفاف يتضح ذلك، أو أن لا سمح الله تتعرض العمارة لمشكلة مثلا، فلماذا الإصرار على الشقة، ونسيان الهدف الأصلي: الزواج والعفاف.

ما رأيكم دام فضلكم؟

هل تعرفون مثلا حالات زواج حصلت بدون شقة تمليك، وما هي ظروفها وهل نجح الزواج؟

[toota]

حتى الايجارات بقت غالية.....اي حد حيأجر دلوقتي شقة متوسطه مش حيدفع اقل من الف جنيه شهري.....طيب ما يحطهم في تمليك بدل مايرميهم في ايجار....

وبعدين فيه قانون بيظلم الراجل في موضوع الايجار وبينصف الست....لو لا قدر الله تبقى الشقه من حقة الزوجة...

وجهة نظر يعني...

تم تعديل 21 يوليو 2009 بواسطة toota

[أحمد سيف]

كالعادة موضوع "ثقيل" كما تعودنا من المهندس عبد المطلب

متفق معك تماما فيما تقوله وأزيدك من الشعر بيت ، أحد مشكلاتنا الكبرى أننا نخاف أكثر من اللازم ... عايزين كل حاجه تبقى مضمونه وما فيهاش أي مخاطره ... خصوصا فيما يتعلق بمستقبل أبناءنا

طبعا يجب أن نهتم لمستقبل أبناءنا ... لكننا تمادينا في ذلك كثيرا لدرجة أننا سلبناهم شخصياتهم وحرمناهم حريتهم في تحديد خياراتهم وأولوياتهم في الحياة ومواجهة صعوباتها وتحدياتها بأنفسهم ... موضوع الشقة التمليك ما هو إلا واحد من تجليات تلك العقلية الجبانة التي تسيطر علينا ... مثلها مثل الدروس الخصوصية والوظيفة الميري وشباب الثلاثينات الذين لا زالوا يقيمون مع "بابا وماما"

الوضع الطبيعي في كل بلاد الدنيا أن يبدأ أي زوجين عاديين حياتهما بأبسط ما يمكن (شقة ايجار غرفة وصاله مؤثثة بصورة بسيطة) ... لكن عندنا في مصر ما زلنا نصّر على أن يكون لدى العروسين منذ اليوم الأول ما يكفيهما أن يعيشا بقية حياتهما دون شراء أي أثاث ولو حتى كرسي حمام ... وطبعا هذا كله في شقة تمليك ... والنتيجة نسبة عنوسة عالية ومصاريف ينوء بحملها الزوجان وأهلهما وقد تتسبب في انهيار عش الزوجية

لمن يقول أن فلوس الإيجار نضعها في شقة تمليك ... الكلام ده لو عندنا سوق عقارية سليمة وخيارات ميسرة للتمويل العقاري ... الشقة أم ألف جنيه ايجار ثمنها في السوق لن يقل عن ربع مليون جنيه ... هذا وضع غير طبيعي لأن الايجار السنوي للشقة يجب أن يتراوه بين 8% و12% من قيمتها ... يعني شقة زي دي المفروض يكون سعرها 100-150 ألف جنيه على الأكثر ... غير كده يبقى الايجار أفضل من التمليك ... أضف الى ذلك نقطة هامة: من أين لشاب في بداية حياته ربع مليون جنيه ليشتري الشقة ... ولو توفر لديه مبلغ كهذا لماذا - كما اقترح الأخ عبد المطلب - لا يبدأ به مشروع أو حتى يضعه في بنك (لو مقتنع إن الفائدة حلال) وسيحصل بالتأكيد على أكثر من الألف جنيه التي سيدفعها ايجار

أتوقع أن تحدث حركة تصحيح ضخمة في السوق العقاري خلال فترة محدودة تجعل خيار الإيجار أكثر جاذبية للكثيرين بعد أن يكتشفوا أن الفقاعة العقارية التي يبنون عليها آمالهم في الثراء السريع قد انفجرت

[الباشمهندس ياسر]

انا اعرف

الولد اين ناس محترمين اوى اوى لكن ظروف ضعيفة نوعا ما و معندوش اى حاجة غير وظيفته و دخله الشهرى بس مش اكتر

و اتقدم لبنت ناس محترمين جدا و مبسوطين اوى و كان جواز صالونات كمان و البنت فرحت بيه و ارتحاتله و اهلها اطمنوا لناسه

فوالد العروس وافق تماما على كل ظروفهم و مختلفش معاهم اطلاقا بل بالعكس شال معظم الليلة بتاعت الجهاز

و نوى يدى البنت شقة هدية كمان بس بعد جوازهم عشان الولد ما يحسش بحاجة

شفت بقى

لسه فيه ناس بتفهم ف الناس و تعرف تقدرها ازاى

و برده اعرف العكس تماما

واحد ابن حلال و مؤدب و ماشى جوه الحيطة مش جنبها و كل ما يتقدم لحد يحس انه بيضحك عليه وقتى

و بيتعمل عليه شغل على اعلى المستويات

يلا اهو كله نصيب

[سهيلة]

وانا بعض من صحباتى اتجوزنا بدون شقة تمليك

عادى جدا فى الزمن الصعب اللى احنا فية دة

انا اهلى مثلا اشترطوا شقة تمليك

وحطيبى كان وقتها بيعمل ف احدى الدول العربية فاقترح حل وسط

انو يدفع اللى معاة كدفعة اولى لشقة تمليك يعنى ناخد شقة بالتقسيط

ونتجوز واسافر معاة

بدون عفش ولا اى حاجة ف الشقة

وفعلا عملنا كدة وما زلنا نسدد ف اقساط الشقة

والحمد لله قربنا نخلص

والحمد للة موش ندمانة خالص انى ما عنديش شقة جاهزة وبتاع

لان كدة كدة كنت هقفلها على الفاضى

لانى بالفعل انا مقيمة خارج مصر

يا ريت الاهل يقدروا الانسان اللى قدامهم ويتفهموا ظروفة ان كل شىء هييجى بمرور الوقت

والانسان الجاد المخلص بيبان على فكرة موش الشقة ولا الفلوس اللى بتثبت دة

[سهل جدا]

موضوع جيد الحقيقة

وأنا كنت كتبت موضوع يناقش نفس المسألة في هذا المنتدى

ثقافة الإيجار في مصر

[محمد عيسى]

في ظل عد الاستقرار في اي حاجه في مصر و عدم وجود مؤشرات و معايير تقييم و تسعير سليمة يصبح التمليك لمن يقدر عليه هو الحل الامثل، و اقرب مثال على كلامي هو تضاعف قيمة العقارات 3 مرات خلال السنوات الثلاثه الماضيه بعد ثباتها ما يقرب من عشر سنوات، و بالتالي قد ينتقل الايجار لشريحة يعجز البعض عن الاستدامه في الايجار الجديد

[pocy]

هلا هلا بالاخ عبد التواب فكرتك يا اخ عبد التواب ناس كتير بطبقها فعلا

وكتير جدا اتجوزا فى شقق ايجار لان الميزانيه لم تسمح وكتير جدا من الشباب عزف عن الزواج الا لما كون نفسه من وعمل بفلوسه مشروع وكسب وبعدين جاب الشقه فى العصر ده مبقاش ضرورى الشقه التمليك دا حتى الاثاث بيتشاركوا فيه وكمان ابو العروسه ساعات بيجيب اكتر وتصدق بالله قول لا اله الا الله محمد رسول الله

انا لما جيت اتجوز مكنش عندى شقه لاننا كنا قررنا نسافر بره (الكويت ) ولما جينا نشتري شقه لقينا الاسعار مولعه والشقه سعر الارض عشر مرات فاشترينا حته ارض وكل ما ننزل مصر حاجه من اتنين عند حماتى شويه وعند امى شويه او نأجر شقه لمده شهر الاجازه وهكذا عايشين لحد ما ربنا يكرمنا ونقدر نبنى الارض

الوقت اتغير وبقينا غير زمان وهتلاقي ان الام والاب بيساعدوا العريس ويوفروا عليه حاجات كتير انا منكرش ان لسه فى ناس بتفرض الشقه التمليك وولا الى اخره بس هتلقيهم قلوا دلوقت

وبالتوفيق يا أخى

[elfakhrany]

أخى الفاضل عبد المطلب فى الأونة الأخيرة كثير من الأسر تنازلت عن مطلب الشقة التمليك وذلك نظراً لزيادة نسبة العنوسة ولكن المشكلة تكمُن فى الشباب نفسه اللذى يحلم بالثراء السريع وهو جالس على القهوة وينعى كل مشاكله إلى سياسات الحكومة ..

[pocy]

جبت من الاخر اخ الفخرانى هو ده فعلا السبب الحقيقي للعزوف عن هذا الامر

ولتقدير الاهل من الجهتين لظروف الشباب والله يعين كل محتاج ان شاء الله يارب

[مغتربة]

هل تعرفون مثلا حالات زواج حصلت بدون شقة تمليك، وما هي ظروفها وهل نجح الزواج؟

طبعا اعرف

انا

انا و زوجى تزوجنا و بعد الفرح بعشر ايام سافرنا و لما بننزل مصر اجازة بننزل على شقه ايجار

و على فكره اعرف كتير من صحباتى و الى فى نفس سنى كلهم تزوجوا فى شقق ايجار و بقالهم فيها خمس و ست سنيين كمان

و فكره الشقه التمليك اساسا لم تكن مطروحه

المهم انه يجيب بيت زوجيه ايجار بقى تمليك مش مهم

و كمان فى صحبات ليا بيساعدوا مع ازواجهم فى دفع القيمه الايجاريه

الزواج للتيسير و ليس التعسير

[sohagy]

الموضوع ده على فكرة موضوع مهم جدا بس فى نقطة واضحة من الأخوة والاخوات اللى ردوا ان اغلب العرسان اللى مبيجبوش شقة تمليك شغالين فى الخليج يعنى وظيفة محترمة بمرتب كويس طيب الشباب اللى لا عنده ده ولا ده يعمل ايه يعنى انا ليا واحد صاحبى من اسرة متوسطة اتخرج من كلية تجارة وفضل يدور على شغل لغايت لما لاقى شغل بمرتب لا يكفى سوى مصاريف الحياة اليومية يعنى ولا هو يقدر ياجر شقة ولا يصرف على بيت وعلى فكرة دى مش مشكلته لوحده دى مشكلة عدد كبير جدا من شباب هذا الجيل

[Alshiekh]

بسم الله الرحمن الرحيم

فيه موضوع طلع في راسي وأنا جاد جدا في عرضه، وعايز أسمع آراءكم جميعا، وخصوصا الآباء والأمهات

وأنا كمان كانت طلعت فى دماغى نفس الفكرة وطرحتها للمناقشة هنا

إِذَا جَاءَكُمْ مَنْ تَرْضَوْنَ دِينَهُ وَخُلُقَهُ فَزَوِّجُوهُ

[NavigatorEg]

بس يا أستاذ عبدالمطلب ليه معتقد إن إنت كده هتعمل ثورة أو انقلاب ..

أنا عن نفسي اتجوزت في شقة ايجار جديد .. وحتى الآن لسة مجبتش الشقة التمليك ..

صحيح الموضوع انطرح في أول الخطبة لما اتقدمت .. بس الحقيقة الناس تفهمت الظروف ووافقوا على مبدأ الايجار ..

و عموما في الزمان ده .. ناس كتيرة بطلت تدقق في الموضوع .. وكفاية إنهم يلمسوا الجدية وتوفر باقي مقومات الجواز ..

وربنا بيعين ..

[abdulmuttaleb]

شكرا لحضراتكم جميعا ولي عودة قريبا بإذن الله

[Ahmed Anwer]

أنا أنصح الشباب إنهم يخلوا حكاية القانون الجديد اخر حاجة

لأنه إختراع فاشل

اشتري شقة في أي حته في المدن الجديدة ، في مشروع مبارك ، شقة 60 متر، شقة في البلاد النائية حوالين عن المدن

فيه شقق في المدن الجديدة دلوقتي كتير بمقدمات بسيطة و أقساط توازي اللي هتدفعه في الإيجار الجديد

و في الآخر اللي بتدفعه هيفضلك ،،، مش بتدفعه عشان حته تنام فيها كام سنة و خلاص

و علي فكرة معظم العرسان اللي احتكيت بيهم بيتجوزوا في قانون جديد

يأما مستنين شقة هيستلموها أو حاجة أهاليهم بيبنوها ليهم ،،،

و طبعا دوول عذرهم معاهم

يأما منظرة يعني هوا دخله كبير بس طبعا معهوش مبلغ علي بعضه لشقة في منطقة كويسة

فيقولك أأجر شقة في منطقة راقية بدل ما أشتري شقة في منطقة علي أدها أو بعيدة أو قليلة الخدمات

واحد أعرفه مأجر شقة في الرحاب و شغال في شركة اتصالات كبيرة

بقوله حرام عليك الإيجار اللي هتدفعه في الرحاب ،، قالي دي أحلي سنين حياتنا و ننبسط فيها براحتنا

من الآخر ،،، اللي بيأجر شقة قانون جديد ده ،،، مش واحد فقييييييييييييير خالص

القانون الجديد حل غالي و فاشل

[لماضة مصرية جدا]

السلام عليكم و رحمة الله و بركاته

استاذنا الفاضل

هو انا ليه كلمة انقلاب....في التوبيك بتاع حضرتك استفزتني

اه استفزتني اوي

لاني دخلت التوبيك و انا بقول لنفسي بس خلاص بجد هلاقي حتة الواحد يفضفض فيها.....و هنلاقي زملاء في الكفاح المسلح

سامحني يا استاذي بس انقلاب حضرتك مش في محله خالص

الانقلاب اللي حضرتك بتعبي الجماهير و بتكسبهم تأيدهم و تعاطفهم مش لازم يكون انقلاب علي فكرة الشقة يا تري ايجار و لا تمليك و لا عشة ع السطوح

الانقلاب لازم يبقي علي فكرة الزواج في حد ذاته دلوقتي

زواج صالونات....زواج مش صالونات.....

حوار القايمة...مش قايمة...دي نايمة

شباب غريب....علي راي ابن اخويا اللي عمره 4 سنين....بيقولي دي "قلة شنب"....و انا عجبني المصطلح ده اوي.... wst::

شباب شفته بام عيني بيدي مواعيد لفتاتين في نفس المكان عشان يعاين و يختار....(اه يا قلبي يا مين يديني غطا حلة...عايزة اعور حد)

بنات اغرب....بتقبل علي نفسها انها تتحط في كشف هيئة غريب لا عقلها يقبله و لا كرامتها ترضخ ليه(للاسف البنتين كانوا اصحابي...و للاسف الاكبر....الاتنين اتقابلوا في نفس المكان و كل واحدة منهم ابتسمت للتانية ابتسامة ليها معني.... :sad: )

اهالي...محسسنا ان فيه ازمة.....البنت لازم تتجوز....طب هو احنا اعترضنا....بس مش نهاية العالم يعني ان البني ادم ميتكعبلشي في soul mate

و لا الناس الغريبة المصرة انها تحشر مناخيرها الكبيرة اوي في تفاصيل حياتك.....و كل ما تشوف سحنتك....انتي مش بتفكري بقي...تستعبطو تقول ...اه بفكر ادرس بره مصر...تروح غمزاكي و تقولك لا....مش بتفكري ترتبطي بفلان....طب بلاش ايه رايك في اخوه....(يا لهوي....افتكرت مسرحية.....بلاها سوسن خد سوسو :blink: )...حاجة تخنق

سامحني استاذي يمكن انا طلعت بره الموضوع شوية....شويتين....بس بجد احنا محتاجين انقلاب

بس مش ع التوجه اللي حضرتك قولت عليه...من فضلك غير بوصلة الانقلاب....و قولي ساعة الصفر...و هتلاقيني في اول صفوف الضباط الاحرار

و ع فكرة الانقلاب ده

احنا اللي هنقوده.....انا مش هستني ان افكار غريبة تسيطر علي حياتي....و تعيش حياتي بالنيابة عني عشان مجرد اني انول حالة من الرضاالمجتمعي الزائف...اللي مهم اوي بالنسبة ليه ان احنا نترص كده في قوالب شبه بعض

مع ان ربنا لما خلقنا.....كل واحد فينا ليه دماغ

اه يا دماغي يا شايطة نااااااااااااار

ع جنب بقي

عشان مبقاش برضه حدفت بره الموضوع

اخويا الكبير و اختي كلاهما تزوجا ايجار....و علي ما اذكر ان حوار الشقة تمليك و لا لا مكنشي اصلا موجود في الحوارات الاصيلة المتاصلة اللي دارت في وقتهم

افتكر ان الواحد لما بيبقي عايز يرتبط بانسانة او انسان....هيبقي بجد عايز يكمل معاه....عايز يلاقي حد في كتفه و هو بيشق طريقه في الحياة

و بعدين انا قناعتي الشخصية لو البنت موقفتشي جنب جوزها من البداية....يبقي هي جاية ع الجاهز.....طب مش نتعب مع بعض شوية....مش نكافح مع بعض شوية

مش يبقي لينا رصيد ذكريات قصة صعودنا مع بعض كتفي في كتفه

و دي وجهة نظري

ربنا يوفقك

اعمل انقلابك.....بالتوفيق

و انا كمان هعمل انقلابي.......اصلها كده فعلا بقت محتاجة ثورة........غضب.....أوي

تحياتي