حرب نفسية تدمر حياتي ..

[MoTo]

الحقيقة انا مش عارف أبتدي إزاي بس انا مؤخراَ بقيت لا أشعر بالسعادة مطلقاَ .. و مؤخراَ ده مبقتش فاكر من إمتي

ببقي في وسط أصحابي و بنضحك و بنهزر بس مش مبسوط

بجيب إمتياز و تخرجت بتقدير جيد جداَ و لم أشعر بطعم أي إنجاز .. بشتغل من قبل الجامعة -بمجهودي مش واسطة- و كل اللي إشتغلت معاهم كانوا مبسوطين مني جداَ

سبب كل ده الحرب النفسية التي أعاني منها .. انا مش عارف أعامل الناس إزاي

أو عشان أكون محدد أكتر .. عارف إزاي كل بني أدم بالضبط سكته إيه و إيه اللي ينفع معاه .. بس مش عايز أكون الإنسان اللي يعامل الناس كدة.

كتير بقابل شخصيات مهملة جاهلة مستهترة و "تلمة" بالمعني البلدي كدة .. و كنت أعرف جيداَ أن المعاملة الجيدة تفهم منهم علي إنها ضعف و إذا عاملتهم معاملة جافة و"بلطة" زيهم يعملولك حساب .. و لكن لسبب ما مش عايز أعمل كدة .. مش خوفاَ عليه بس أعرف جيداَ أن مثل هذه الشخصيات اما بيحب ينفس عن غضبه بيروح يضرب عياله ولا يضرب مراته .. و هذا شئ لا أستطيع التعامل معه .. مش هقدر بسبب تهزيقي لواحد مثلاَ يروح يشرب مخدرات و يعمل مصيبة .. صحيح انا مش هعرف إيه اللي هيحصل .. بس انا و انا ماشي في الشارع كل ما أشوف شخص أو طفل متشرد بحس بمدي الجرم الإجتماعي اللي بنرتكبه في حق بعض .

قد تكون مشكلة هايفة أو بها بعض من المثالية الزائدة للبعض

و لكنها مدمرة حياتي بجد .. لأن عشان أتفادي إني أحتك بحد كتير باجي علي حقي انا .. و عشان بعض الناس فهمت إني بسامح في حقي بقي الكل يستعبط و عارف إني مش هتكلم و يقولك يا سيدي متخفش ده طيب مش هيقول حاجة ... و طبعاَ "طيب" دي أحياناَ بتكون أهبل أو عبيط حسب شخصية اللي بيتكلم .

انا مكنتش كدة علي طول .. بالعكس كنت شخصية in your face جداَ و أقف في وش التخين و ممشيش إلا و كل حاجة علي مزاجي و حقي واخده .. حتي لو كان الحل أتخانق جسدياَ مع شخص .. أشتمه .. أكون سبب في رفده .. أياَ كانت الطريقة !

و الغريبة إن كنت مبسوط .. كنت بعمل أي حاجة تيجي علي بالي صح أو غلط بعملها .. بدون النظر للعواقب .. اما إبتديت أبص لعواقب الأشياء .. إتغيرت .. بقيت شخصية تانية خالص .. تغيرت بالكامل .. و النتيجة .. مش فاكر أخر مرة كنت فيها مبسوط كانت إمتي !

نفس الشئ بالنسبة للعلاقات الإجتماعية العادية .. الإصطناع و "التحوير" و الكذب و قلة الذوق كان مخليني شخصية محبوبة جداَ (معرفش إزاي ناس كانت بتحب فيا إني قليل الأدب و قليل الذوق !) .. إنما إني أكون شخصية صادقة جعلني شخص غريب !

حتي إني مبقتش عارف سبب المشكلة و ماهيتها دلوقت بالضبط عشان أقدر أحط إيدي عليها و أحاول أعالجها .. بس لسبب ما فقدت شعوري بالسعادة تماماَ .. و ده خلاني فقدت الحماس لحاجات كتيرة في حياتي .. و بيخليني أجهد نفسي كتير زيادة عن اللزوم في أي حاجة عشان مقعدش أفكر أكتر .

تم تعديل 23 يوليو 2009 بواسطة MoTo

[جيمي]

يااااااااااه ده انت انسان حساس ومحترم اوى يا موتو ........ وما تقلقش عدم احساسك بالسعاده ده طبيعي ..... ايوه طبيعي ...علشان ذو العقل يشقى فى النعيم بعقله واخو الجهالة فى الشقاوة ينعم ......

با ختصاار حلا للمشكله اللى عندك دي انا شايف ان انت فاهم شخصيتك كويس وانت الحمد لله مش مولود كده يعني عشت شخصيتين مختلفتين خلال حياتك

يبقى انت ادامك بقه يا ريس نقمة الاختيار يا تتعب الناس وترتاح انت يا تتعب انت وتريح الناس وبين الاختيارين مرونة انك لا تظلم ولا تتظلم يعنى برده مش لازم يعني يا كده يا كده ...... بس انا ليه تعليق على كلمه انت قولتها كتير بقابل شخصيات مهملة جاهلة مستهترة و "تلمة" بالمعني البلدي كدة .. و كنت أعرف جيداَ أن المعاملة الجيدة تفهم منهم علي إنها ضعف و إذا عاملتهم معاملة جافة و"بلطة" زيهم يعملولك حساب .. و لكن لسبب ما مش عايز أعمل كدة .. مش خوفاَ عليه بس أعرف جيداَ أن مثل هذه الشخصيات اما بيحب ينفس عن غضبه بيروح يضرب عياله ولا يضرب مراته .. و هذا شئ لا أستطيع التعامل معه .. مش هقدر بسبب تهزيقي لواحد مثلاَ يروح يشرب مخدرات و يعمل مصيبة .. صحيح انا مش هعرف إيه اللي هيحصل .. بس انا و انا ماشي في الشارع كل ما أشوف شخص أو طفل متشرد بحس بمدي الجرم الإجتماعي اللي بنرتكبه في حق بعض .

ده اكبر دليل انك بتفكر زياده عن اللزوم .... ومش كل الناس اصلا حساسه زيك يا موتو .... يا اخى ده الواحد بيقابل ناس ناقص تتوسل اليك علشان تهزاها :lol:

[أحمد سيف]

عزيزي ... الحياة غابه ... وإن لم تكن ذئبا أكلتك الذئاب ... لازم تعامل كل واحد بالأسلوب الذي يستحقه ويجعله يتعامل معك باحترام ... ولا يوجد حل آخر

معليش المرحلة اللي انت بتمر بيها هي طبيعية جدا ... مرحلة الخروج من كنف الأسرة ومثالية الحياة الجامعية الى مستنقع الحياة ... وصدق فعلا من سماه مستنقع ... حيث ستلتقي بأسوأ أنواع الشخصيات وعليك أن تتعلم كيف تتعامل مع كل واحد منهم... خلي قلبك جامد ودافع عن حقك واستخدم كل الحيل التي تعرفها لأنك بدون ذلك ستجد الجميع يستهيفك ويستغلك ويصعد على أكتافك ويخرج عقده النفسية عليك ... وما يهمكش دوس عليهم براحتك ... اللي عنده استعداد يشرب مخدرات أو ينتحر سيفعل ذلك بسببك أو بدونك ... مش فارقه ... دي مشكلته مش مشكلتك ... ويوما ما ستتعلم أنك يجب أن تعيش الدنيا كما هي لا كما تتمناها أن تكون

تمنياتي لك بالسعادة والتوفيق

[الباشمهندس ياسر]

نفسى اقولك استمر...نفسى اقولك كمل و حافظ ع الاخلاق الحميدة اللى انت فيها

لكن بكل اسف احنا وصلنا جوه المجتمع لدرجة من السوء بقت صعبة اوى

عايزك تعرف انى كنت زيك و اضطريت انى اتغير 180 درجة

ووصلت لمستوى من الوقاحة مكنتش اتخيله و بقيت بتعامل مع بعض الناس باسلوب غير طبيعى اطلاقا

لكن ظروف المجتمع اللى انت فيه بتفرض عليك سلوك معين فتعمله

انت خلى قلبك ابيض ... حافظ عليه من التلوث قدر الامكان ...لكن مفيش مانع انك تبقى بلطجى و قليل ادب احيانا

مفيش مانع انهم يفهموا انك مبتاذيش حد انما ميقدرش حد يؤذيك

و بعدين انا مش فاهم ايه العلاقة بين انك تدى حد على دماغه و انه يروح يسكر او يشرب مخدرات..؟؟؟!!!1

[tarek hassan]

كل ما أفرأ رد من ردود الأفاضل على الأخ الكريم : موتو

اقتنع بيه جدا

وأنا مع كلمة الباشمهندس ياسر استمر يا موتو

لا تفعل مثل ما يفعل الناس إلا إذا كانوا قدوة لك

والوحش عمره ما كان قدوة فلا تكن مثله

خليك بشخصيتك المحترمة الرحيمة

لكن مع الاحترام حاول متسيبش حقك

(وَالَّذِينَ إِذَا أَصَابَهُمُ الْبَغْيُ هُمْ يَنتَصِرُونَ)

ومع الرحمة لازم يكون فيه وقفة

زي ما قال الشاعر

فقسا ليزدجروا ومن يك راحماً ****فليقس أحياناً على من يرحمُ

أنت مش ممكن تجعل الناس زي ما أنت عايز

والفكير في أفعالهم هيصيبك بالجنون

لأنك تفكر فيما لا تملك القدرة على تغييره

كان الله في عون هذا الجيل

فعلا فترة الطغيان الكبيرة في الأمة العربية أنتجت مجتمعات غريبة

تحترمهم يهينوك

تعطيلهم على دماغهم آسف في اللفظ يحترموك

وبلاشك هناك الكثيرين من الناس المحترمين يقدرونك ويحترمون أخلاقك

انت خلى قلبك ابيض ... حافظ عليه من التلوث قدر الامكان ...لكن مفيش مانع انك تبقى بلطجى و قليل ادب احيانا

مفيش مانع انهم يفهموا انك مبتاذيش حد انما ميقدرش حد يؤذيك

تعاملك مع الناس سيعطيك الخبرة لتعرف كيفية التعامل الأمثل مع كل واحد

بحين لا يكون هناك ضرر أو ضرار

تحياتي للجميع

تم تعديل 23 يوليو 2009 بواسطة tarek hassan

[ذهبية]

انا هارد عليك برد مختصر فى جملة واحدة

(((((((( اعمل اللى يريح ضميرك و تحس بية ان ربنا راضى عنك)))))))

انت بتدخل فى تصرفات الناس و دماغها و عقليتها قوى لية كدة انت بتفكر فى الناس حتى بعد ما يسبوك و بروحوا بيتهم هيعملوا اية ووقع كلمتك عليهم اية

ياترى هيتالموا و لا هيشربوا مخدرات و لا هاسبب لهم عقدة

انا شايفة ان شخصيتك الاولى فى الاستهتار بمشاعر الناس و قلة الذوق دى شخصية غلط و شايفة برضة ان العكس 180 درجة برضة غلط

انا اسفة يا موتو انى اقولك من وجهة نظرى انك غلط

اى شىء لو زاد عن حدة اصبح غلط و يضر صاحبة لا الطيبة الزيدة عن الزوم صح و لا الغلظة القلب و قلة الذوق و دوس الناس برضة صح

انت المفروض تكون معتدل فى افعالك و تصرفاتك و تفكيرك و حكمك عن الناس لا تظلم نفسك زيادة اللزوم و لا تقسو عليها برضة

نصيحة اخوية بجد يا موتو متركزش قوى كدة مع الناس متقعدتش تفكر و تحلل و تتعب دماغك هما بيعملوا لية كدة و هيعملوا بعد شوية

اتصرف بطبيعتك مضايق قووووول زعلان فضفض مظلوم قوم هات حقك ظالم ارجع الى نفسك ورجع الحق لاصحابة

لو ما عملت كدة هتدخل فى مرحلة اكتئاب لانك مش بتتصرف بطبيعتك و بتضغط على نفسك و بتعمل حاجات مش هى انت

عيش حياتك و اتصرف بطبيعتك طول ما بتريح ضميرك ومش بتغضب ربنا

بعدها لا تفكر فى حد و لا تركز قوى مع حد عيش نفسك بطبيعتك بدون تصنع و متعملش زى جحا و حمارة مع ابنة وطبعا دى حكاية كلنا عارفناها

ذهبية

[fatfouta]

مالكش دعوة بالناس

خليك نفسك وبس يعنى خليك انت وماتفكرش فى حد تانى بس بدون انانية

اعمل اللى هيخليك مبسوط من غير ماتتعدى على حد او تجرحه

وماتفكرش كتير ......صدقنى

فتفوتة

[النحلة زينة]

بالعكس

أنا بأشوف ان الشخص المهذب هو الأقوى

لان أي حد ممكن يتكلم كلام مش كويس

مفيش أسهل من الكلام

لكن القوة أن الإنسان يفضل محافظ على أخلاقه و تصرفاته الطيبة

علشان خاطر ربنا

اللي بيأذي الناس بكلامه ده

لما هيكون في القبر هيبقا حاله أية؟

بينام مستريح بالليل ؟

لما بيدعي ربنا في حاجة , بيكون له قدرة أنه يغمض عينه و يناجي ربنا ؟

هل ربنا بيبارك له رزقه أو وقته أو بيسعده مع اللي حواليه ؟

أظن معروف مين اللي خسران و مين اللي كسبان

[toota]

للاسف...انت بتوصف حالتي بشكل دقيق...وده حصلي من ساعة ما استقريت في مصر.....اتخنقت....ومبقتش عارفه الصح فين..

تريح الناس وتتعب نفسك....ولا يولعوا بجاز وانت ترتاح...؟؟؟

اكتشفت ان الصراحة متعبة....وهدامة....لانك لما بتتعامل بصراحة بتتفسر صراحتك على امور سلبية جدا....وانك تلاوع....مريحة اوي لغيرك....بس بتهدم البني ادم من جواه...

لفت نظري مشاركة ذهبية الي بتقول خليك وسط.....فيه امور مينفعش فيها الوسط....لان صفات الانسان الشخصيه بتغلب عليه في تعاملاته مع الناس حواليه...

باختصار وصلت اني اعامل ربنا....ومش فارقة الناس...الي يزعل يشرب من المالح....طالما انا مش غلط..

[وليد صفوت]

السلام عليكم،..

فى مقولة وردت فى الاثر لا اعرف اذا ما كانت حديث عن الرسول صلى الله عليه و سلم أم لا و لكنها مقولة صائبة تماماً و فيها الحقيقة المطلقة فى هذة النقطة:

من أرضى الناس و أغضب الله، سخط الله عليه و اسخط عليه الناس، و من أرضى الله و اسخط الناس رضى الله عنه و ارضى عنه الناس.

الصيغة بتصرف.

السلام عليكم,

[Tafshan]

العزيز موتو ..

انت تقول انك ما شاء الله متفوق و ناجح اثناء و بعد الجامعه ... و تقول انك تجيد التعامل مع الشخصيات المحيطه بك بالرغم من نفيك لذلك في نفس الوقت .. فانت بحسب كلامك تتلون لكى تتكيف مع كل شخصيه منهم و هو شئ مرهق .. و لكنها موهبه يجب ان تحترمها في ذاتك ... ثم تحدثت عن التغيير المبنى على احساسك بالمسئوليه تجاه تصرفاتك بشكل مفرط .. و كأنك تحاسب نفسك على تصرفاتك السابقه و تقدم الاعتذار عنها ضمنياً .. في الحقيقه هناك حلقه مفقوده بين الشخصيتين لم تتحدث عنها و هى سبب التغيير ؟؟ ماذا حدث ؟؟ تلك هى البدايه ( انا لا اطلب منك ان تسرد الحدث لأنه شئ يخصك و لكنه مهم في فهم التبعات )

يا عزيزي ان الله قد خلق الناس مختلفين و لو اراد لجعلهم جميعاً على قلب و خلق واحد .. و لكنه الاختلاف الذى يحدد هويتنا بشراً و ليس ملائكه او شياطين .. انه سنة البشر و ما لها من تبديل .. هناك الكثير من الانماط البشريه .. لا تصنف هذه الانماط ... بمعنى .. لا يمكن ان نصنف البشر باشرار و خيرين و عقلاء و بلهاء .. لا يحدث هذا الا في افلام الكارتون .. اننا مزيج من كل هذا .. مهما كان الانسان شرير ستجد فيه الخير مع شخص ما .. و مهما كان الانسان خير .. ربما بحسن نيه قد يؤذى كأعتى اشرار الارض .. اننا بشر .. خليط من كل هذا .. كل المطلوب هو القبول بهذا الانسان "الاخر" كما هو .. مدى مناسبته لشخصيتك تحدد مكانته عندك .. قد يصلح زميل او ربما صديق .. قد يكون منافس و ربما عدو .. انت فقط تحدد هذا المكان .. هذا من حقك .. و لكن ليس من حقك ابداً ان تفكر في تغير هذه شخصيته .. تعامل معها كما هى .. فهى ليست "انت" بادواتك و قدراتك ... لن تستطيع ان تقوم بشئ من ما تستطيع "انت" فعله .. فلديها ادوات اخرى و قدرات اخرى لا تؤهلها ان تكون غير نفسها ..

يا عزيزي ... انا مع شخصيتك الاولى مع احترامى لأى ظروف .. لأنها انت .. عندما تكون "انت" تكون مستريح و تكون على طبيعتك و تكون مقبولاً بشكل اكثر .. و تكون سعيداً بشهادتك انت .. اما عن الاثم .. فهو ما حاك في صدرك و خفت ان يطلع عليه الناس .. فاذا كان فيك منه .. فتجنبه .. و افعل بعد ذلك ما شئت ..

اظنك شاب فى مقتبل العمر و ربما تكون غير متزوج .. امامك الكثير لتفعله .. فلا تفوت هذه الفرصة .. انها اعوام الانتاج و الطاقه القصوى لقدراتك .. فاستغلها افضل استغلال و لا تضيع وقتك في التفكير في الاخرين .. كن نفسك و اقفذ فوق العقبات اياً كانت .. فقدرتك على القفذ لن تكون الى الابد ..

تحياتى