ماذا لو ؟

[se_ Elsyed]

هذا السؤال أصبح يطرح نفسه ، خاصة بعد ان أصبح ولي العهد قاب قوسين أو أدنى في أن يخلف والده ويقفز على كرسي الحكم الوثير بينما نقف جميعاص مكتوفي الأيدي ونتفي بمصمصة الشفاه أو إنتقاد الحكومة داخل الصالونات والمنتديات .....

ولنفترض أن الفأس قد وقعت في الرأس وأعلنها مبارك صراحة بإنه سيعين إبنه نائباً له ... ماذ ستفعل انت عزيزي المواطن قاريء هذه الكلمات ؟

وعلى ما يبدو بإنها قد أصبحت صرعة القرن الواحد والعشرين ، فها نحن نجد

جورج بوش الأبن في أمريكا

والملك محمد السادس في المغرب

والملك عبد الله في الأردن

وإمبراطور البحرين حمد بن عيسى

وبشار الأسد في سوريا

حتى وجدناها هناك في أقصى الشمال الشرقي بأذربيجان في إلهام علييف الذي خلف والده حييدر علييف الذي قد بلغ من العمر أرذلة ...

وطبعاً كلً له طريقته في تولي الحكم.

[se_ Elsyed]

إذا حدث هذا بالفعل وتولى جمال مبارك الحكم فأنا عن نفسي سوف أكفر بكل ماهو وطني او يقال عن الوطنية والإنتماء وحب الوطن وهذه الشعارات الجوفاء ، ولن أقول بإنني سوف احمل سلاح أوغيره لأن هذا ليس من أسلوبي ولكن لن يكون لولي الأمر سمعاً ولا طاعة عندي وسأحاول التهرب من إي إلتزامات وطنية وساتفنن في هذه الأساليب كالتهرب من الضرائب أو الرسوم ..... إلخ

أعلم بإنها سوف تكون أفكار مجنونة ولكن هؤلاء الثلة لم يتركوا لنا ذرة عقل واحده ويفعلون بالـ 70 مليون ما يحلو لهم وأصبح الشعب بالنسبة لهم كالكره يتقاذفونها كيفما شاءوا والكرة مستسلمة لركل الأقدام ولسان حالها يقول هل من مزيد

[Salwa]

ياه ...

كل دي ردود؟؟؟

الواحد حاسس برضوض ....من الخبطه دي ...

الناس حتي متقدرش تعلق ...قصدي الناس في مصر ......لا تتعلق..// واخد بالك //.

ياسي السيد ...وانت لسه حاتكفر بالمباديء القايمه هناك ؟؟؟

حاحكي لك حاجه لطيفه ...

زي ماسبق وقلت لكم ...ولادي اصحابي ..

وانا عندي مرض مزمن ...اسمه مصر.

ولادي حاولوا يقنعوني بشتي الطرق ..........ان الوضع مابيتغيرش في مصر ....مش علشان اللي فوق مستبدين بس .......لالالالا.

ده كمان علشان الناس اخدت علي الراحه .....خايفين من التغيير ...خايفين يقولوا ده غلط..

يعني حايحصل ايه ...اقذر من اللي بيحصل ...آسفه ...بحاول ابحث عن كلمه اخف مش لاقيه

شفت امبارح اللي حصل في جورجيا ؟؟؟؟؟؟؟؟

تقدر تقوللي ......ليه في مصر الناس ماتطلعش في الشوارع وتعبر عن رايها ؟؟؟؟

خوف خوف خوف .......والي متي ؟؟؟

بنتي وهي صغيره كانت بتاخد معاها سندوتشات وهي رايحه المدرسه ...

وفي سنه من السنين ...لاحظت انها بتيجي تدخل علي المطبخ تاكل اي حاجه وتقوللي ماما انا جعانه اكتر انهارده ....وذهبت للدكتور لقيتها ميه ميه واستغربت لاني ارعي اولادي بشكل خرافي ...

في يوم وانا اعمل لها السندوتشات صباحا ...صرخت ...ماما مش عاوزه جبنه ...انا بحب الجبنه بس الولاد ما بيحبوهاش ....وكنت حاتجنن ...اتضح ان كل يوم ...كل يوم ...الولاد كانوا بياخدوا منها الساندوتش...وهي من خوفها منهم ....لم تعترض ..

ومن خوفها مني ....ان اعنفها ....لم تشكي .

وكانت النتيجه ان في احد الايام اغمي عليها .....حتي العصير كانوا بياخدوه ..

وكانت لنا وقفه ......مع اداره المدرسه ....مع آباء الاولاد ..

ولم يتعرض لها احد بعد ذلك ..

عاوزه اقول ...ان الاولاد استغلوا سكوتها ..وحتي اللي كانت تاخده زياده كانوا ياخدوه ..

ورغم انها تتالم ...لكنها كانت صامته من الخوف ...

ولم تكن تعلم ان الحل يكمن فقط .........في الاعتراض ..

وده اللي حاصل معانا كلنا ...في مجتمعنا الكبير ..

سلامي.

[Lighthouse]

بكرة تشوف يا س س

الناس ح تهيص وتفرفش وتغني له زي مابيغنوا لوالده

والهتيفة والمطبلاتية ح يشوفوا شغلهم تمام واللى مش عاجبه باب البلد يفوت الشعب كله

حاجة تقرف :) :)

[أسد]

السؤال ....

ماذا فعلنا ونحن رافضون للحالي وهو على قمة الحكم منذ 22 عاماً ...

سنفعل مع الجديد مثلما فعلنا مع القديم ....

تحصيل حاصل .....

وماقالته السيدة / سلوى ... هو محصلة كل الكلام ....

[impossible]

تقدر تقوللي ......ليه في مصر الناس ماتطلعش في الشوارع وتعبر عن رايها ؟؟؟؟

خوف خوف خوف .......والي متي ؟؟؟[/quote

تقصدى حضرتك مظاهراات مثلاا

فى حكاية اخدناها كدة

كان فى فار بيجيبوة ويحطوة فى قفص

ويحطو معاة اكلة وشربة وكل حاجة

بس القفص متوصل بكهربة

يفضل ياكل و يشرب وبعدين عايز يخرج

يتكهرب

واليوم اللى بعدة واللى بعدة

ياكل ويشرب ويجى يخرج يتكرب

شالو الكهربة والاكل والمية موجودين بس محاولش يخرج

وبعدين شالو الكهربا والاكل والشرب

بردة مخرجش

يوم واتنين وتلاتة بردة مخرجش

......ليه في مصر الناس ماتطلعش في الشوارع وتعبر عن رايها

قصد حضرتك مظاهرات يعنى

اكيد حضرتك بتشوفيهاا فى الجزيرة والامن المركزى

بلاش مظاهرة

اعتصام اضراب نقف ونمسك لوحة نقول فيها اللى فى نفسنا

الامن المركزى كهربا

[White heart]

se_ Elsyed كتب:

جورج بوش الأبن في أمريكا

أعتقد انه وصل الى سدة الحكم عن طريق انتخابات ... على اننى شخصيا كنت أميل الى "ال جور" و لكن هذه هى الأنتخابات ... هذه هى الديمقراطية .... حتى اذا ما سمعنا همسات هنا او هناك حول هذه الأنتخابات ... فتبقى مجرد همسات و بلا دليل.

والملك محمد السادس في المغرب

والملك عبد الله في الأردن

وإمبراطور البحرين حمد بن عيسى

قلتها بنفسك ... ( ملك ) ... اذن لا يوجد أى مشكلة، أمر طبيعى و عادى.

وبشار الأسد في سوريا

هذا هو المثل الوحيد الذى أتفق معك فيه ... خاصة اذا كان المس بالدستور و التلاعب فى احدى بنوده خصيصا قد صاحب أو ساعد لوصولة الى سدة الحكم!!! و الأسوأ انه حتى يقود بلادة فى طريق شائك غير واضح و ربما غير أمن ايضا .....

Salwa كتبت:

وكانت لنا وقفه ......مع اداره المدرسه ....مع آباء الاولاد ..

ولم يتعرض لها احد بعد ذلك ..

حسب ما فهمت ابنتك الكريمة (حفظها الله و راعاها) هى الشعب الضعيف ...

و الأولاد الذين كانوا يأكلوا ساندويشاتها هم المسئولين الأشرار أو الحكام المستبدين ...

بقى الطرف الثالث الذى تحدثتى عنه فى مثلك .... من هم أولياء الأمور الذين ستكون لهم وقفة كالتى وقفتموها مع ادارة المدرسة و أولياء الأمور؟

تم تعديل 15 نوفمبر 2003 بواسطة White heart

[darker19]

ساعتها يبقى ليهم حق الأمريكان و الإنجليز إنهم يحتقرونا لإننا بنتورث زي العبيد, جمال ممكن يكون كويس و يكون صالح للدور زي بشار الأسد بصراحة الراجل مواقفة مشرفة, بس مش معناة كده إنه الأصلح, والموضوع موضوع مبدأ البلد و الشعب مش لعبة في إيدين الحكام يحطوا إلي يحطوا و يشيلوا إلي يشيلوه.

المفروض إن الشعب هوا سيد القرار, بس طبعا بالسلبية إلي إحنا فيها و اللامبالة إلي الشعب المصري مصاب بيها, أقدر أبشركم إننا مش هانفوق غير لما الطوبة تيجي في المعطوبة زي كل مرة و نسخن كام يوم و نطلع مظاهرات و نكسر ونتكسر وبعدين كلة يهدى كأن شيئا لم يكن و تستمر معاناة الشباب و كله يقول أنا مالي هيا بلدي لوحدي.

جتنا خيبة

أنا من رأيي إننا نسلم للأمر الواقع وندعي ربنا إن ولي العهد يكون كويس.

[arabawy]

[color=royalblue، ولن أقول بإنني سوف احمل سلاح أوغيره لأن هذا ليس من أسلوبي

وان فعلت لايلومك احد . فليس هناك من سبيل لازاحة هذا الكابوس الطويل

[Mohammad Abouzied]

في ظل الدستور الحالي وطبيعة تكوين مجلس الشعب ممكن كل شئ حتى ممكن شارون بنفسه يمسك الحكم والكل هايصفك له لانه مع الشرعية والشرعية هي استفتاء الشعب عليه وترشيح مجلس الشعب له ومفيش اي مشكلة والمفروض قبل ما نقول لا للتوريث نقل تعديل الدستور حتى لا يكون هناك سند شرعي يمكن من خلاله تنصيب احد على رأس الحكم واي واحد سوف يعترض سوف يواجه بتهمت معارضة الشرعية

[Doofy]

============================================

بيتهيألي أن المشكلة الرئيسية مش في الريس...

المشكلة في جنرالات الحكومة اللي أصيبوا بتخمة السلطة ومازالت حساباتهم في مزيد وقصورهم بتعلى وبتعلى...

مصر حاليا بتنهار...

واذا كان التفكير دلوقتي بتنصيب الأبن الكبر أو الأصغر وتغير أسم مصر على الخريطة من جمهورية إلى سلطنه....!!

وبما أن الفكر الجديد هيطبق فللأسف الشعب المصري هينحط من جديد تحت مجنزرات الجنرالات القدامة من جديد وبالتالي هياخد أكبر قلم على قفاه....

ومش بعيد القاهرة تبقى زيها زي بغداد دلوقتي ...

إللا قلولي يا جدعان محدش معاه نمرة بن لادن يمكن الاقي عنده حل للموضوع داه :angry:

كان معاكم المللا دوفي :angry:

منشية كابول

[رشيد22]

سؤال جميل يا سى السيد

أقول لك

عندما تقرأ تاريخ مصر و خاصه فى عهد المماليك سواء المماليك البحريه أو المماليك البرجيه تمر عليك هذه العباره كثيرا

و بعدما قتله دعا نفسه حاكما للبلاد فدعوا له بالنصر

من هم الذين دعوا له بالنصــر ؟؟ انهم شعب مصر

لذا أجيبك بوضوح أنه لو حدث و تم توريث الحكم فلن يحدث شيئ و سندعو له بالنصر و سنغنى له

إخترناك إخترناك

و سنغنى كنا فى زنقه و ضيقه و خنقه . رسم الخطه و فكها فكه و باقى علينا شوية فكه ( لم أكن أعلم من قبل أن 70 مليار دولار ديون أصبحوا شوية فكه :) )

أما أنا عن نفسى فلن أفعل شيئ بل سأحاول أن لا أعيش بمصر و أتوقع أن يتكرث الشعور السائد لدى فئه كبيره من الشعب و هو الغربه فى الوطن ( كان لى موضوع قديم عن الغربه فى الوطن و الغربه خارج الوطن )

و سنسمع مصطلحات مثل

يا عمى هى بلدنا ؟ يا عمى سيبك و إحنا مالنا و غيرها من التعبيرات الموجوده حاليا و التى تدل على اللامبالاه

بس خلاص

تم تعديل 13 ديسمبر 2003 بواسطة رشيد22