اختبار الذكاء للاطفال

[جديدة بالرياض]

معلش يا جماعة انا موضوعي معقد شويتين لكني محتاجة لاراء الاطباء والمهتمين بهذا الموضوع انا ابني عمره سبع سنوات كثير الحركةو تركيزه ضعيف بطييء جدا في المذاكرة والاكل وغسل الاسنان واللبس ..........

يحب الهزار ومش واخد الحياه جد ودايما بيقلب الكلام ويغيره علي سبيل المزاح

المهم اجريت له من 1.5 سنه اختبار ذكاء وكانت النتيجة 104 واخبرتني الاخضائية انه ليس لديه فرط حركة ولكنه بيدلع وعنده مشاكل في الحساب

السنه ده سافرنا الرياض في الترم التاني وذاكرتله في البيت لحد ما يجي يمتحن دور تاني في مصر وشفت المريين في الموضوع ده وكرهت نفسي والحياة لان طبعا المدرسة مش زي البيت وطلع عيييني في المذاكرة

وبعدين لما جيت مصر وديته لدكتور تاني وخلاني اعمله اختبار تاني وكانت نتيجته نفس النتيجة اللى فاتت وقالتلي الاخصائية انه مافيهوش حاجه بس خليه يلعب رياضه فيها نشاط كتير وبالنسبة للبطء اللى عنده حفزيه ....... وبعدين لما رجعت للدكتور بالنتيجة قالي انا مش عجبني النتيحة وسأله انت عايز تطلع ايه فقاله محاسب

_والمحاسب بيعمل ايه

-بيعمل جاتوه

فقلت للدكتو ر انه دايما كده بيهزر

فصاح الدكتور في وش الولد وقاله الكلام ده تهزر به مع واحد صاحبك انت بتتكلم كده مع مدرسينك لازم تتكلم كويس علشان تكون حاجه كويسة وهتتحرم من المصروف والكمبيوتر والكرتون اسبوعين

وكل ده بصوت عالي

المهم كتبه الدكتور على علاج للتركيز وقالي انه هيحتاج10 جلسات لمده الشهر الباقيلي في مصر وقالي العلاج ده هيتاخد لعدة شهور ولما ترجي السعودية كلميني مره كل اسبوع كمان عايزه اقول لكم ان الدوا ريحته وحشه اوي لانه من زيت الحوت فالولد بقت رحته سمك زفر بالرغم من انه غسل وشه وايده بالصابون

معلش انا طولت عليكم اوي في الكلام لكني محتارة اوديه الجلسات ده ولا ايه ولا اكتفي بالعلاج بس وده لان الواحد فعلا مش هيكون فاضي

قولولي اعمل ايه ارجوكم انا محتارة جدا

[بركة]

معلش يا أختي هو ايه اللي أنتم بتعملوه ده مع الولد

أنا بيتهيئلي ان المشكلة في اللي حواليه مش فيه

لأن من وصفك كده أنت بتوصفي كل أطفال هذا الجيل !!!!!!!!!!!!!!!!

[جيمي]

الطفل ده مش طبيعي .................... ده احسن من الطبيعي

المحاسب بيعمل ايه؟؟بيعمل جاتوه؟؟؟ والله سريع البديهة ودمه خفيف كمان حد لاقي طفل زي ده؟؟؟؟؟؟

نصيحه لوجه الله بلاش شغل الدكاتره ده لاني متاكد- والله اعلم- ان ده مش فى مصلحته خااااالص خااالص

انا اظن ان ده الطفل الوحيد لحضرتك .......... وكتر التركيز عليه ده (وخصوصاا ان حضرتك مفيش ادامك الا هوه بس طول اليوم نظرااا للحبسه اللى كل الستات بتتحبسها فى الرياض) و هوه ده اللى هيعمله ارتباك ومشاكل نفسيه مش ظريفه وتذكري دائماا ان كثرة النقد ممكن يزعزع الثقه بالنفس ناهيكي ان كتر اللوم بيولد الكره........

غسيل الاسنان والواجب المدرسي والاكل لطفل عنده سبع سنين ...دي حاجات اول مره يعملها وطبعاا مش عارف فايدتها على المدي البعيد ولو عارف اكيد مش مستوعب فشئ طبيعي يكون فيه فتور وملل من الحاجات دي وبعدين طفل عنده سبع سنين لو اكل وغسل اسنانه وعمل الواجب سريع سريع هيعمل ايه بقيت اليوم .......................................هيفتح عكا

طفل عنده سبع سنين يعني المفروض يدلع فى السن ده اكتر مايتعلم والمفروض مايحسش بالرقابة الشديده دي عليه سيبي الواد ينطلق ويختلط بزملاؤه وماتخافيش عليه ومفيش مانع انك تلاحظيه من بعيد ..........

انا مقدر اهتمامك بيه وربنا يحفظه لحضرتك وان شاء الله تفخري بيه فى يوم من الايام..........

[mffaswan]

لا طبعاً .. ولا علاج ولا دكاترة و لا أي شيء ..

نسبة 104 في اختبار الذكاء تدل على طفل ذو عقلية جيدة .. خاصة إن سن 7 سنوات ده تلاقي معظم الاطفال اللي بيجروا اختبارات الذكاء تلاقي نتايجهم من 92 إلى 98، إنما إبن حضرتك 104، يعني ماشاء الله .. زي الفل ..

المشكلة هي في كيفية تحفيز الطفل على ممارسة الحقوق و الواجبات .. يعني لازم تحببيه في الواجب المدرسي مش على إنه واجب .. إنما على صورة إنه لو حل الواجب صح .. هأديلك كذا أو هاوديك الحتة كذا .. و بالتالي الطفل هايتحفز و ينفذ المطلوب منه بدافع الرغبة في الحصول على الحافز ..

أما مسألة الحركة الزايدة .. أفضل شيء لإستثمار الطاقة اللي في الطفل .. هي ممارسة الرياضة .. و ياسلام لو رياضة تكون جديدة عليه .. لما يلاقي والده أو حضرتك بيتكلم عن الرياضة دي بإنبهار و بإنها رياضة لا يقدر عليها إلا الأولاد الممتازين .. أو إنها محتاجة ولد جريء و شجاع .. أو عاوزة ولد ذكي .. ساعتها الولد هايتحدى نفسه و يقرر يخوض التجربة بشكل التحدي مع النفس ..

بلاش أدوية ولا دكاترة .. و هاتي كتاب يكون كويس في تربية الأطفال .. أفضل مليون مرة من اللي حضرتك بتعمليه

ربنا يباركلك فيه و في بيتك إن شاء الله

[جديدة بالرياض]

شكرا يا جماعة جدا انتم فعلا طمنتوني كمان لما قلت برضو لجوزى قالي كفاية بس نديله الدواء واحنا نحاول نتكلم معاه كتير ونظبطه

بس على فكرة ده مش طفلي الوحيد انا عندي بنت تانيه عندها سنه ونصف

[عنبو]

لا تستعجلوا على الولد سيبوه براحته وهو هيبقى تمام هو بس عاوز معامله تانيه والنوع ده من الاولاد اللى بيكون زكى شويه بيحتاج الى معامله خاصه علشان تقدرى تسيطرى عليه زى مثلا الاهمال نوعاً ما لانه بيطبق مبدأ الممنوع مرغوب ؟؟

لكن سيبك من الدكتاره علشان مش تزرعى فكره عند الولد انه مش طبيعى ابنط طبيعى ميه بالميه بس حاول تسيطرى على الحاجات اللى بيتفرج عليها او بيسمعها فى التليزيون وسيبه براحته

وربنا يارب يخليه ليكى وتفرحى بيه ؟؟

[أسد]

مفيش حاجة إسمها سيبك من الدكاتره .. هذا أولاً ..

لأنه لازم نعتمد العلم أسلوب حياة لنا . ويجب أن نتبع الأساليب العلمية في التعامل مع أبناؤنا ..

ولكن يجب أن نتبع الاسلوب العلمي في كل شئ ..

بمعنى ..

أنه يجب التعامل بأسلوب علمي في كل شئ ..

بمعنى .. أن الطفل في عمر سبع سنوات يحتاج إلى بعض الحزم.. وتعليمه الجدية ..

نصيحة .. عندما تذهبي لطبيب لا تخبريه أنك في السعودية .. لأن بعضهم يستغل هذا الأمر .. ويحاول تحقيق أكبر مكاسب مادية في فترة وجيزة .. مثل جلسات مكثفة ... الخ

أعتقد .. حسب وصفك أن المشكلة ليست نشاط زائد أو مشكلة صحية أو ذهنية .. بقدر ما هي (سامحيني في التعبير) دلع زائد ..

الدلع والحب لأطفالنا مطلوب .. ولكن بحدود .. لأن مايبني الإنسان ليس الحب والدلع والتدليل فقط .. ولكن التربية النموذجية والسليمة ..

أن تحاولوا استشارة طبيب أو مختص فهذا أمر ممتاز جداً .. وخطوة تحسب لكم .. وتستحقون التحية عليها

أرى الكثير .. والكثير جداً من الحالات المشابهة .. وفي الحقيقة لا أستطيع أن أمنع نفسي من لوم الأهل في ذذلك ..

مرة أخرى ..

معذرة .. ولكن قد تكون هي الحقيقة ..

[عبير يونس]

....... وبعدين لما رجعت للدكتور بالنتيجة قالي انا مش عجبني النتيحة وسأله انت عايز تطلع ايه فقاله محاسب

_والمحاسب بيعمل ايه

-بيعمل جاتوه

فقلت للدكتو ر انه دايما كده بيهزر

فصاح الدكتور في وش الولد وقاله الكلام ده تهزر به مع واحد صاحبك انت بتتكلم كده مع مدرسينك لازم تتكلم كويس علشان تكون حاجه كويسة وهتتحرم من المصروف والكمبيوتر والكرتون اسبوعين

وكل ده بصوت عالي

ايه ده بالضبط؟

في دكتور نال قسط من التعليم اللي يؤهله للتعامل مع الأطفال يتكلم بالطريقة دي مع طفل المفروض انه بيعالجه؟

يا نهار مش فايت

الكلام ده تهزر به مع واحد صاحبك

دي جملة يقولها دكتور؟؟؟!!!! و لمين لطفل؟؟؟!!!

انت بتتكلم كده مع مدرسينك

ده لو كان استفسار ممكن يكون مقبول لو بيتقال بطريقة معينة

مثل:

اوعى تكون بتتكلم كده مع مدرسينك ... لحسن ده يبقى عيب

كونه يقول :

لازم تتكلم كويس علشان تكون حاجه كويسة

ده كويس بس مش بصوت عالي طبعا

أما تدخله لدرجة انه يحدد العقاب

ده بقى كتير اوي

يا أختي العزيزة

ابنك طبيعي جدا

و زي ما قالت بركة

حضرتك بتوصفي كل أطفال هذا الجيل تقريبا

هوة دمه خفيف و سريع البديهة

و رد فعل الدكتور بصراحة في منتهى الغباء

كان ممكن ياخد الأمر بطريقة أبسط من كده كتير

و على فكرة رد الفعل اللي من النوع العنيف ده بيزود الموضوع أكتر و أكتر

و بيقلب عند مع الطفل

عليك بالصبر و الاستعانة بالله

و ان شاء الله ابنك يبقى أحسن الناس

بس انتي اديه حنان و محبة

و ركزي على نقاط القوة اللي فيه

و ما تركزيش على النقاط السلبية

اهمليها

و ان شاء الله حتختفي تماما

اللهم بارك لنا في أبناءنا يارب

[جديدة بالرياض]

طيب انا ابني عنده مشكله ومش عارفة اقومها ازاي هو انه لما بيجي يحكي حاجة مش بيكون جمله سليمة يعني ممكن يحكي الموضوع من نصفه مثلا

كمان عايزه اسأل عن وجود اماكن يلعب فيها اي رياضة مثل السباحه او الجمباز في الرياض وبتكون اسعارها ايه؟؟

[بركة]

يا أختنا أنت مكبره الموضوع وفعلا واضح أن الناس اللي حواليكي مش بيرحموكي من تعليقاتهم

كأنك والله بتحكي على ابني ..... wst:: ده أنا شوفت أيام مايعلم بيها إلا ربنا وأخدت الولد لدكتورة عشان أريح

اللي حواليا بس وبعدين الدكتورة قالت الولد مافيهوش حاجة ما تحطوهوش في مقارنة بس مع حد وهو هيبقى

أحسن في نظركم بعد كده ....

ولحد السنة اللي فاتت وهو عندو 8 سنوات كنت مكبره دماغي وبعدين الحمد لله جمع وركز وبقى تمام ولله الحمد

أما عن أماكن للرياضة في الرياض .؟ يارب حد يفيدك لأننا في جدة , ربنا معاكم وأي حاجة محتاجاها كلنا معاكي إن شاء الله

ربنا يكرمك في أولادك يارب

تم تعديل 29 يوليو 2009 بواسطة بركة

[doha]

شوفي اختي بدايه جالي احساس لما قرأت موضوعك لاول مره انك شبه متخذه لقرارك بعدم اكمال مشوار العلاج مع الدكتور وطرحتي موضوعك اساسا كهدف اول انك تجدي من يقول لك برافوا قرارك صح اوعي توديه للمجرم ده تاني وكهدف ثانوي مفيش مانع لو حد وجد لك علاج بس بعيدا عن سكه الدكاتره ..

اولا انتم تصرفتم عين العقل في عرض الولد على طبيب .. وطالما انك كاهل محيطين بيه حسيتوا ان فيه شيء ( مش طبيعي ) يبقى الشيء ده موجود فعلا ولكن هذا لايعني بالضروره ان ملوش حل .. بالعكس .. طالما اكتشفتم المشكلة مبكرا يبقى باذن الله الامل في حلها ممكن جدا ..

المشكلة الاساسيه لابنك انه بطيء .. وده بيديلك احساس انه بيفهم ببطأ وينفذ الامور ببطأ وعلى فكره ده عرض قد يعني وجود مشكله فعلا بس برضه زي ماقلت لك اكيد في حل ..

اجابته على الدكتور لما قاله المحاسب بيعمل جاتوه تدل انه بيجاوب من غير مايفكر وده الي سبب رد الفعل بتاع الدكتور معاه .. الاجابه لم تكن منطقيه ولا تنم عن شيء الهم الا انه بيقول اي حاجه عشان يخلص من الموقف وخلاص .. واختلف مع اختي مصريه متغربه فرد الدكتور عليه هو ابلغ رد ممكن في حاله زي دي الحزم مطلوب جدا لان لو الولد معندوش الحافز من البدايه انه يفكر ويجاوب وبيستسهل يركن مخه ويقول اي حاجه تيجي على باله فالحزم ممكن يجبره يتكلم صح .. الدكتور مضربوش ولا هدده بالعكس هو بس لوح بعصى العقاب وطلب معاقبته عقاب منطقي جدا لاينطوي على عنف بدني او اهانه .. على فكره لو تعاملتي معاه باسلوب لاه ياحبيبي ومينفعش الي قلته ده يبقى خذيه على البيت احسن واقفلي باب العلاج من اساسه ..

دلوقت نتكلم في الحل ..

بدايه لو ابنك بيعاني من فرط النشاط او حركته كتير ومش بيركز امنعي عنه السكريات قدر الامكان او نهائيا يكون افضل .. وجد ان السكريات والشوكلاته بتسبب فرط الحركه للاطفال فمابالك بالي بيعاني منها فامنعيها عنه خالص ده اولا ..

زي ماقالوا لك خليه يشترك في نشاط بدني باي طريقة عشان يطلع الطاقه الي جواه ..

بالنسبة للدواء الي كتبه له الطبيب فالافضل تستشيري طبيب تاني قبل ماتديهوله واذا اتفق الرأيان يبقى خلاص امرك لله ياخذه بس واظبي عليه تماما وفي مواعيده بالظبط لان الادويه دي على حد علمي لازم تكون بمعايير دقيقه عشان ميحصلش انتكاسه او رد فعل عكسي ..

نيجي بقى لتنميه مهارات ابنك ..

انتي اعمليه قضيتك يعني سخري نفسك لانك ترفعي من مستواه وتحسني وضعه مهما قابلك في كده من مصاعب .. يعني في امهات عندهم اطفال متخلفين عقليا وشايلينهم من على الارض شيل مع طبعا ماللامر ده من مشقه لا تتخيلينها ومع ذلك راضيين ومستسلمين لامر الواقع وقائمين بالي عليهم فمابالك بيك انتي وابنك ماشاء الله سليم يعني مش هتتعبي فيه باذن الله زي دول فانتي اصري على التعب عليه واحتسبي في كده الاجر ..

هاتي له العاب تنميه ذكاء كتير يعني مكعبات او قطع خشبيه عليها صور .. الخ هتلاقيها في المكتبات الكبيره .. اشتري له كل شهر ولا حاجه لعبه واصبري عليه لتعليمها وابدئي بالعاب اصغر منه في السن يعني هاتي حاجات لسن ثلاث سنوات ولو حلها هاتي له لسن اكبر بالتدريج ..

لما يخفق متحطيش في بالك انه بيستهبل او عاوز يعاندك لان ده مش صحيح هو برضه مسكين يعني لو يقدر يتصرف صح كان تصرف فاصبري عليه ولما يغلط كرري ومتياسيش ومصيره ينفذ الصح .. بس برضه عشان تضمني انه مبيستهبلش فاستخدمي معاه اسلوب الثواب والعقاب يعني يتكافيء لو احسن ويتعاقب بالحرمان من حاجه لو غلط ..

لما يعمل حاجه صح اشيدي بيه دائما قدام والده واوعي تحطميه بالمقارنات بينه وبين حد خاصه لو كان اصغر منه سنا او تعايريه قدام حد بفشله في شيء لانك كده هتكوني بتقضي عليه ..

عززي ثقته في نفسه بايكال امور سهله اليه مثلا يرمي القمامه او ياخذ باله من اخته خمس دقائق او يروح يصلي مع والده اي حاجه سهله واعتبريها حاجه مهمه وحييه عليها من وقت لآخر ..

خليه يقعد على الكمبيوتر وهاتي له العاب تنمي ذكائه مثلا تركيب حروف ولا مربعات متشابهه ولا ولا .. النت مليانه العاب فلاش بتنمي ذكاء الاطفال وتعلمهم اشياء لا تخطر لك على بال وطالما بيعرف يستخدم الماوس يبقى هيعرف يستفيد منها ..

لما يتفرج على التلفزيون اقعدي معاه واتفرجي واحكي له شويه وهو يحكي لك شويه يعني مثلا تكوني شايفه البرنامج وفاهمه ايه بيحصل بس تعملي نفسك مش فاهمه وتساليه .. هو ليه فلان ده بيعيط ؟ هو ايه الي حصل بعد ماخرج من البيت ؟ كده تخليه يجاوبك على السؤال وكأنك فعلا فاتك شيء من الاحداث وعاوزه تعرفيه .. بس طبعا تختاري سؤال تكون اجابته واضحه وفي جمله او اثنين ..

خلي عنده ربط بين الحاجات وبعضها واللعب والدراسه .. يعني مثلا بتلعبي معاه مكعبات قولي له ناولني المكعب ( الرد ) على المكعب الاحمر .. او مثلا قولي له ناولني ثلاث مكعبات عد كده واحد اثنين ثلاثه وهكذا .. لو مستوى ذكاء ابنك اكبر من كده يبقى هتختاري ارقام اكبر او كلمات انجليزية اصعب وهكذا ..

بالنسبة للمذاكره لا انصحك انك انتي تذاكري له ابدا .. هاتي له مدرس افضل او افضل من الاثنين انه يدخل مدرسه لان وضعه في البيت بدون اختلاط باطفال هيزيد الحاله سوءا ويمكن هو اساسا سبب المشكلة الي ابنك فيها ..

وطبعا مستقبلا لو حبيتي تعملي له اي تحاليل او تعرضيه على اي دكتور ميكونش ده بشكل مباشر عشان الولد ميتعقدش .. يعني تقولي له خذ ده دواء فيتامين او تعال نحلل انا وانت الانفلونزا او انا رايحه للدكتور تعال معايا .. وطبعا متتكلميش امامه نهائيا عن ماقاله الدكتور او انك شايله همه او ايه الخطوه الجايه لان ده ممكن يدمر نفسيته من غير مايشعر .. وبمناسبه الحديث عن التحاليل فلو في امكانيه حللي له الغده الدرقيه ممكن هي سبب الخمول الي عنده الله اعلم ..

الخلاصه .. حطي همك في الولد ده وفي انتشاله مما هو فيه ومين عارف يمكن يطلع في النهايه موهوب ولا فلته في مجال ما وبالتاكيد ايا ماسيكون عليه هيعوضك كل تعبك فيه خير فمتستخسريش فيه التعب ابدا ..

[جديدة بالرياض]

انا اسفة للتاخر في الرد ولكنى اشكرك جدا لاهتمامك وامانتك في الرد وساحاول جاهده ان التزم بالنصائح لعله يكون خير