هل اشترك فى نادي وما هو احسن نادي فى مصر

[osaimi]

هل الاشتراك فى نادي اصبح ضرورة وما هو برأيك افضل النوادي الموجودة فى مصر بأسعار مناسبة

[tantrum]

لأ مش ضرورة .

[الأقصرى]

هل الاشتراك فى نادي اصبح ضرورة وما هو برأيك افضل النوادي الموجودة فى مصر بأسعار مناسبة

السلام عليكم

طبعا ضرورى وعلى الرغم من تكلفة تبرع الانشاء الغاليه ال انه حيريح لان الاسعا داخل النادى اجتماعيه هو اشتراك سنوى وجوه الاسعار مخفضه

مثلا لو حبيت تخرج انت وولادك مش اقل من 150 جم فى اى مول

ومثل ثانى فى شهر 5 اللى فات حبيت اوديهم حمام السباحه فى دار المشاه

دفعنا على الباب اللى بره اربعة تذاكر ب 20 جم

وحمام السباحه دفعونا اربع تذاكر ثانى ب 60 جم على الرغم من انى انا والمدام لم نستخدم الحمام قالو لازم تدفع وطبعا ما ينفعش ندخل العيال لوحدهم ودخلنا الحمام فى عز الحر الساع 12 والساعه 3 فضو الحمام يعنى البنتين نزلو حمام السباحه ب 80جم وهكذا باقى دور القوات المسلحه بقوا مفتريين فعلا

بس لازم النادى يكون قريب من السكن ( مهم جدا جدا جدا)

النادى المعقول وقريب من مدينة نصر نادى زهور التجمع الخامس حيتفتح اخر السنه دى اشتركت فيه فى اول السنه دى بمقدم 12 الف وتقسيط 18 الف على سنتين بدون فوائد

تحياتى للجميع

[osaimi]

فعلا يا اخ اقصرى اي مكان تروح فيه انت وولادك تلاقي نفسك بتدفع اقل شيء 200 جنيه دا غير انك مش بتكون برضه مبسوط ، انا اعرف ان نادي وادي دجلة عامل فروع فى المعادى والقاهرة الجديدة و6 اكتوبر ونظام الدفع 8000 ج مقدم والباقي تقسيط علي خمس سنين ، حد عنده فكرة عن هذا النادي و اذا كانت هناك نوادي اخرى محترمة واسعارها معقوله ؟ ياريت لوحد عنده معلومات وشكرا لكم

[وليد أهلاوى مصراوى]

فعلا يا اخ اقصرى اي مكان تروح فيه انت وولادك تلاقي نفسك بتدفع اقل شيء 200 جنيه دا غير انك مش بتكون برضه مبسوط ، انا اعرف ان نادي وادي دجلة عامل فروع فى المعادى والقاهرة الجديدة و6 اكتوبر ونظام الدفع 8000 ج مقدم والباقي تقسيط علي خمس سنين ، حد عنده فكرة عن هذا النادي و اذا كانت هناك نوادي اخرى محترمة واسعارها معقوله ؟ ياريت لوحد عنده معلومات وشكرا لكم

النادى فعلا مهم ..... مش بس للخروج ولتغيير الجو ... لكن لو أولاد حضرتك هيمارسوا رياضه "وده لازم بصراحه"

أو لو أنت نفسك هتمارس رياضه ..... Recommended

أنا مش عارف مكان حضرتك فين علشان أقدر أنصحك ... لكن عموما أنا مشترك فى أكتر من نادى

SMASH وده داخل القريه الذكيه ... على طريق مصر أسكندريه .... نادى ممتاز لو هتلعب جيم, تنس, سكواش , حمام سباح ..... لكن مش للقعدات العائليه

هيكون مناسب ليك لو ساكن فى 6 أكتوبر أو الشيخ زايد.

نادى الشمس ... فى مصر الجديده ....غنى عن التعريف ... لكن أنا شايف أنه نادى أجتماعى أكتر منه رياضى ....لو حضرتك بتحب الزحمه وجو العائلات يبقى النادى مناسب ...انا بدخله مره كل سنه ...أكل بيتزا وأخرج :)

نادى الصيد "القطاميه" قريب جدا من كارفور ...... لسه جديد وشيك ...أصغر طبعا من الشمس لكن أنضف وأقل أزدحام.....برضه يديك أنطباع أنه نادى أجتماعى أكتر منه رياضى

نادى الزهور "التجمع الخامس" ... ده لسه جديد تحت الأنشاء ...لو حضرتك ساكن فى التجمع هيكون مناسب ...ماعنديش عنه أى فكره لأنى لسه ماشوفتوش

بالنسبه لنادى "وادى دجله" ... أنا مش مشترك فيه ... لكن النادى مشهور بالمدارس الرياضيه ... يعنى لو حضرتك عندك أولاد فى سن صغير

وعايزهم يلعبو كره قدم أو تنس مثلا على أصولهم ...يبقى أكيد نادى وادى دجله .... لي أصحاب مشتركين فيه ...وبيشكروا فيه جدا من الناحيه الرياضيه

أتمنى اكون أفدتك بأى معلومه صغيره

[المهندس ماهر]

احـــــــــــــــــــــــــــــسن نادى فى مـــــــــــــــــــــــــــــصر هــــــــــــــــــــــــــــــو نادى الزمــــــالك نادى القرن الحقيقى ويكفى ان قميصة ابيض زى قلبة مش كدة ولا اية.....مع احترامى لباقى الاندية

[osaimi]

شكرا وليد و م ماهر ، انا خلاص اشتركت فى وادي دجله وبالتوفيق للجميع

[toota]

فعلا وادي دجلة فرع المعادي تحفة ونظيف وراقي.....رحته مرة مع اصدقاء ليا وعجبني جدا مستواه.... ياريت تقوليلنا نظام الاشتراك ازاي بالتقسيط....

انا عضوه في النادي الاهلي بس مبروحش الا كل سنه مرة....خصوصا فرع مدينة نصر....لان مستواه مش راقي...بقى زحمة جدا وخناقة عشان الباركينج ده غير الدوشة والبلاوي جوه....

لما احب اروح بروح فرع الجزيرة ........

[doha]

يبقى الف مبروك على الاشتراك.. .

كنت داخله اقولك ان الاشتراك في نادي من وجهة نظري ضروره ملحه جدا حتى لابناء الطبقه المتوسطه او الي هيجمعوا فلوس الاشتراك بطلوع الروح .. ببساطه لان معادش في مصر حته ( نظيفة ) ممكن تودي فيها اطفالك يتفسحوا ويشموا هوا من غير مايختلطوا بالناس ( البيئة ) وعذرا على اللفظ ..

مش هتبقى مطمئن على ابنائك في الحدائق العامه مثلا ده غير انه كما ذكر البعض هنا ارخص كتير من التنزه في المولات او الاماكن الراقيه الي ممكن توفر ترفيه نظيف بعيد عن الاختلاط بفئات منحبش نختلط بيهم ..

وطبعا كل ماتشترك بدري يكون افضل لان اشتراكات النادي كل مدى بتزيد والي كان زمان اشتراكه الف بقى بخمسين فاذا السرعه في الامور دي مطلوبه ..

الي اقدر اقوله لاي حد عاوز يشترك في نادي اولا انه يسال الناس المشتركه فعلا عن مزاياه .. ببساطه يروح النادي ويقابل اثنين ثلاثه من الاعضاء المتواجدين ويعرف منهم المزايا والعيوب .. ثانيا تصلي استخاره عشان تطمئن لحسن اختيارك .. ثالثا تأكد ان اشتراك النادي مش ( اوفر اوي ) بالنسبة لك عشان متحشرش نفسك في طبقه اجتماعيه اعلى كتير منك وتجر عليك مشاكل انت في غنى عنها .. يعني الوسط مطلوب اكيد ..

وفي النهايه انا رايي ان الاشتراك في اي نادي هو استثمار للمستقبل مش خساره ابدا بس المهم ان الواحد يروح ويحلل الاشتراك ده .. ( وحده مراحتش النادي غير مرتين وبالعافيه )

[KAhamid]

هو الاشتراك بيكون ايه نظامه

يعني بادفع مبلغ عند الاشتراك لاول مره وبعد كده بدفع كل سنة اشتراك ثابت ولا ايه النظام

[SajedSoft]

فعلا يا اخ اقصرى اي مكان تروح فيه انت وولادك تلاقي نفسك بتدفع اقل شيء 200 جنيه دا غير انك مش بتكون برضه مبسوط ، انا اعرف ان نادي وادي دجلة عامل فروع فى المعادى والقاهرة الجديدة و6 اكتوبر ونظام الدفع 8000 ج مقدم والباقي تقسيط علي خمس سنين ، حد عنده فكرة عن هذا النادي و اذا كانت هناك نوادي اخرى محترمة واسعارها معقوله ؟ ياريت لوحد عنده معلومات وشكرا لكم

النادى فعلا مهم ..... مش بس للخروج ولتغيير الجو ... لكن لو أولاد حضرتك هيمارسوا رياضه "وده لازم بصراحه"

أو لو أنت نفسك هتمارس رياضه ..... Recommended :blink:

أنا مش عارف مكان حضرتك فين علشان أقدر أنصحك ... لكن عموما أنا مشترك فى أكتر من نادى

SMASH وده داخل القريه الذكيه ... على طريق مصر أسكندريه .... نادى ممتاز لو هتلعب جيم, تنس, سكواش , حمام سباح ..... لكن مش للقعدات العائليه

هيكون مناسب ليك لو ساكن فى 6 أكتوبر أو الشيخ زايد.

نادى الشمس ... فى مصر الجديده ....غنى عن التعريف ... لكن أنا شايف أنه نادى أجتماعى أكتر منه رياضى ....لو حضرتك بتحب الزحمه وجو العائلات يبقى النادى مناسب ...انا بدخله مره كل سنه ...أكل بيتزا وأخرج :)

نادى الصيد "القطاميه" قريب جدا من كارفور ...... لسه جديد وشيك ...أصغر طبعا من الشمس لكن أنضف وأقل أزدحام.....برضه يديك أنطباع أنه نادى أجتماعى أكتر منه رياضى

نادى الزهور "التجمع الخامس" ... ده لسه جديد تحت الأنشاء ...لو حضرتك ساكن فى التجمع هيكون مناسب ...ماعنديش عنه أى فكره لأنى لسه ماشوفتوش

بالنسبه لنادى "وادى دجله" ... أنا مش مشترك فيه ... لكن النادى مشهور بالمدارس الرياضيه ... يعنى لو حضرتك عندك أولاد فى سن صغير

وعايزهم يلعبو كره قدم أو تنس مثلا على أصولهم ...يبقى أكيد نادى وادى دجله .... لي أصحاب مشتركين فيه ...وبيشكروا فيه جدا من الناحيه الرياضيه

أتمنى اكون أفدتك بأى معلومه صغيره

طيب ايه اسعار نادى SMASH

وعل فيه نوادى تانى باسعار متوسطة فى اكتوبر

[osaimi]

هما عاملين عرض تدفع (بداية من 8000 جنية ـ أو حسب مفدرتك ) والباقي بالتقسيط من سنة إلي 5 سنوات وطبعا كل ما الدفعة المقدمة تقل وأيضا مدة الفسط تطول كل ما يزيد المبلغ حيث ان قيمة الإشتراك النقدي 62300 جنية ممكن توصل 86 الف بالتقسيط وفرع المعادي أو مكتبهم بشارع شهاب بالمهندسين ممكن يجدولوا لك القسط حسب المقدم اللي هتدفعة

الحقيقة انا رحت النادي الأهلي ومعجبنيش خالص وكمان اشتراكه بقى ب 95 الف 40 مقدم والباقي علي 3 سنوات لكن مفيش اهتمام بالأنشطة الرياضية ولا فيه نظافة زي وادي دجلة

تم تعديل 3 أغسطس 2009 بواسطة osaimi

[Falcon Crest]

ايه أخبار نادي هليوبوليس (مصر الجديده - الشروق)

[سكر]

فى نادى رديم لاند حد يعرف عنه حاجة

كان فى اعلان فى دريم ون ان المقدم 10000 جنيه بس اية نظام النادى

[Masrawy Abroad]

يا ريت يا OSAIMI توضح لنا لماذا اخترت نادي وادي دجلة بالذات...... ما هي مميزاته التي جعلتك تشترك فيه؟ وهل الاشتراك في فرع يتيح لك دخول كل الفروع عادي خالص وبنفس المميزات؟

واين يقع فرع 6 أكتوبر تحديدا؟؟؟؟

شكرا لك

[osaimi]

اشتركت بنادي وادي دجلة لان به 3 فروع في المعادي والقاهرة الجديدة خلف اكاديمية مبارك وقريبا 6 أكتوبر بمنطقة النوادي قريب من بيفرلي هيلز وهذا يحل مشكلة انتقالي من مكان لآخر وثانيا لانه نادي محترم ونظيف جدا ويهتم بالرياضة للأولاد وبه مدارس تعليمية رياضية واشتراكة معقول جدا مقارتة بغيرة من النوادي

بالنسبة للإشتراك مثلا فى فرعين يجب دفع رسوم التجديد للفرع الأول بالكامل (900 جنية لأسرة من 5 افراد)

و خمسون بالمائة للفرع الثاني يعني 450 جنية

تم تعديل 4 أغسطس 2009 بواسطة osaimi

[usamara]

حد عنده فكره عن فرع النادي الأهلي في 6 اكتوبر و هل الأشتراك فيه هايبدا قريب والا لا ؟؟؟

شكرا ً

[سكر]

المهتم باشترك نادى وادى دجله

http://www.wadidegla.com/l-member.html

بس ياريت لو حد عندة تجربه يقولها

عايز اقدم فى فرع 6 اكتوبر

[MedoIbrahim]

المهتم باشترك نادى وادى دجله

http://www.wadidegla.com/l-member.html

بس ياريت لو حد عندة تجربه يقولها

عايز اقدم فى فرع 6 اكتوبر

يا جماعه انا بفكر انا كمان بجديه في الاشتراك في نادي وادي دجله فرع اكتوبر .

ارجوكم اللي عنده اي خبره ينقلها لينا . كمان لو في نوادي تانيه ممكن نشترك فيها في نفس المستوي تكون بديل يا ريت تقلولنا

[Mohamed hf]

عندنا في إسكندرية نادي سموحة المكان الوحيد اللي بقدر أسترخي فيه جوا البلد بالذات مع زحمة الصيف بياخد أولوية كبيرة للفسحة في جو نضيف وخضرة والعيال تلعب براحتها,, بدل اللف في المولات بعدين لازم نقعد نستريح في كافيه والعيال تجوع وغالبا بنرجع تعبانين.