هل تؤثر الاعلانات في توجهاتك الشرائيه؟؟

[السويفي]

السلام عليكم:

الاعلانات هي وسيله لترويج بضاعه ما بعرض مزاياها على الجمهور ....من اطعمه ....اجهزه كهربائيه....ادوات تجميل ...سيارات ...سياحه ....الخ

ولكن لم يحدث طوال عمري ان رأيت ان هناك من اشتري سلعه ما لان الاعلان اقنعه بميزات هذه السلعه....

بل بالعكس قد نتهم بعض الاشخاص بالسذاجه اذا اشتري سلعه بسبب اعلان .......الا اذا كان هذا الاعلان عن خصم او هديه

اسئلتي للاخوات الفاضلات:::::

هل منكن من اشترت السمنه الحلوه علشان تخلي جوزها زي الخاتم في صبعها؟؟؟

طب هل منكن من استخدمت الصابون او الشامبو علشان تخلي زوجها يعشقها اكتر من الاول؟؟؟

طب الغسيل علشان يكون ابيض ومزهزه ...هنقول مع تايد في الغسيل ولا اريااااااااااااال ارياال هوووو هووووووووووو

هل اشتريتي الشبكه من لازوردي علشان اليسا ؟؟؟ولا داماس علشان نانسي؟؟؟

لما بتكون حراااااااااااااااااااااااان ومش طايق نفسك بتفكر في ايه.؟؟؟؟؟ في ببسي ولا دش مايه ساقعه؟؟؟

طب هل اشتريت شبسي علشان السقا بيكله ؟؟؟ولا لايونكن نزعل شعبان؟؟؟؟؟

لو عاوز تجيب عربيه ..... طبعا دايهتسو وحش النص ام كابينه هتش

وطبعا اكيد بتدفع الضرايب علشان مصلحتك عند ام الترتر

اذا كان ما احسه صحيحا ...

فلماذا اذا كل تلك الاعلانات؟؟؟

واذا لم يكن لهذه الاعلانات هذا التأثير فماذا كل تلك التكاليف في الافكار و التسابق في اجتذاب النجوم لتمثيا هذه السلعه او تلك؟؟؟؟

[بندق أفندى]

الاعلان انواع وكل نوع يؤدى الغرض منه

نوع للتعريف ونوع للجذب ونوع للتذكير

وبالتأكيد كل نوع له حرفة ومرحلة معينة فى عمر كل منتج ودورة حياته ولو لم يكن يؤدى هذا الدور لانقرضت صناعة الاعلانات ذاتها

هذا مع افتراض تبات باقى العوامل الأخرى المؤثرة فى قرار الشراء والتى تكون هدف فى حد ذاتها

[جيمي]

شوف يا عم السويفي بالبلدي كده يقال ان الزن على الودان امر من السحر يعني حضرتك لما تفتح التليفزيون تلاقى سلعه معينه قدامك تفتح الشباك تلاقي بوستر كبير لنفس السلعه ادامك تفكر تعطس مثلا تسحب منديل تلاقى مرسوم عليه اعلان لنفس السلعه ادامك او واحد موظف يديك قلم علشان توقع مثلا تلاقى مرسوم عليه اعلان لنفس السلعه برده ادامك وفجاة تلاقى نفسك محاصر بنفس السلعه المره دي من وراك ومن ادامك يقوم يرتبط بزهنك ان السلعه دي بتاعة البتاع دي

انا هضرب لحضرتك مثال لمنتج مثلا زي الشيتوكال للتخسيس مع اني لا اقتنع بيه تماما الا ان مبيعاته تخطت الحدود اول ما ظهر ....... والسبب الوحيد الاعلانات ... وكلى ماتبين وبرده هتخسين ...

ومثلا حاجه زي الشيبسي الناس بتاكل شيبسى وليون ولايز مع ان فيه منتجات تانيه زى بطاطس البطل وفريكيكو ماحدش بيقربلها لان فيه ناس بتعتبرها بالطريقه دى مجهولة المصدر

معمل البرج ...... لما عمل اعلانه الضخم فى التليفزيون والله كنت اجى اكلم واحد واقوله طب حلل فى حته تانيه يقولي ايهيييه ده انا محلل فى معمل البرج ....وهوه يعني كان شافه فين غير فى التليفزيون

حضرتك بتشكك فى قدرة الاعلانات؟؟؟؟؟؟ انا بختلف معاك دى ليها مفعول السحر بدليل الناس الكتير اللى اتنصب عليها فى اراضى وعقارات وشركات توظيف اموال واشتري من عند حلمبوحه علشان حلمبوحه مسافر بره مصر

وفى النهايه الاعلانات مابتتعاملش مع حضرتك او معايا دي بتتعامل مع عموم الناس

[sohagy]

الأعلانات تختلف توجهتها فهناك حسب الفئة العمرية وحسب النوع رجل ام سيدة وبالنسبة لى ربما اتاثر بعض الشئ باعلان عن سلعة استهلاكية لكن لو سلعة عقارية فصعب اتاثر بسهولة

[toota]

طبعا توجهاتي بتختلف بعد رؤية الاعلانات...لان قوة الاعلانات في الاقناع ملهاش مثيل...ولو مكانتش بالقوة دي ماكانش المنتجين وصناع هذه المنتجات دفعوا مئات الملايين لعمل هذه الاعلانات ...على الاقل الاعلان بيعمل شهرة ودعاية للمنتج ...ودي بتفتح له مجالات قويه في التسويق...حتى لو كان معظمها كذب....لان المستهلك احيانا كثيرة بيشتري المنتج بناء على تواجده في مكان معين واضطراره لشراء هذا المنتج الموجود فقط.....

انا مثلا لما بروح المحمل بلاقي منتجات معينة احيانا بضطر اشتريها كبديل عن المنتج المفضل لدي...لاني مش حنزل اروح مترو او اولاد رجب او كارفور لشراء هذا المنتج بينما يوجد البديل الي شفت الاعلان بتاعه لتجربته وقد يصبح هو المنتج البديل المفضل لدي ....وهكذا الخ....

[فــيــروز]

طبعا الإعلانات مؤثره !!

ليس من أجل قوّة إقناعها لكن لأنّها بتخلّى السلعه تقول للمستهلك : خلّى بالك أنا هنا ..

فوقت ما تيجى تدوّر على شئ ما تحتاج لشرائه بتلاقى نفسك تلقائيا بتفكّر فى هذه السلعه اللىّ إعلاناتها بتزنّ على ودانك ليل نهار .. حكم يمكن يكون غير موضوعى غالبا لكنّها الأقرب لعقلك وقت الشراء خاصة لو اتّخذت قرار الشراء فجأه أو ماكانش عندك وقت كبير للبحث و التقصّى حول أفضل ماركه يمكن شراءها ..

[السويفي]

السلام عليكم:

اتفق معكم ان هناك فوائد للاعلانات في بعض الاحيان ولكن ما اقصده ان لو جربت سلعه ما وقتنعت بها فلن يغير اعلان سلعه اخري قناعتك....

ومن ناحيه اخري تجد ان هناك بعض المطاعم التي لا تعلن اشهر وافضل من اصحاب الاعلانات زي كوك دوور...ومحلات الكشري ...ومحلات الكباب ...محلات الاسماك

يعني المنتج الجيد يسوق نفسه بسمعته....وهذا يجعلني اعتقد ضعف المنتج كثير الاعلانات

وكما قلتم لكل منا منتج مفضل ليس لاعلاناته ولكن لجودته ......وعندنا في البيت قائمه المنتجات المفضله التي لم تتغير منذ 20 سنه

وهذا ما جعلني اتساءل عن جدوى الاعلانات

[سهل جدا]

طبعاً الإعلانات بتأثر على توجهاتنا الشرائية

وإلا لما كان حجم الإنفاق على الإعلانات يتجاوز ال 880 مليار دولار سنوياً (هذه إحصائية من بضع سنوات, وأكيد زادت دلوقتي)

وكله كووم, وزنّ العيال كوم

أهو زوجتي ممكن أقنعها إننا لسنا في حاجة شديدة للمنتج المعلن عنه في التلفاز, وإن في أولوليات تانية..

لكن الأولاد هاعمل إيه معاهم..

عاوزين ده, ونفسنا في ده, و.....

قرأت موضوع جميل جداً عن الإعلانات التجارية.. اسمه: الفانوس السحري

موجود على الانترنت

طبعاً وواضح من اسمه , إن الكاتب يريد أن يقول: أن الإعلانات بمثابة الفانوس السحري لتحقيق الأرباح للشركات والتجار!

[وليد أهلاوى مصراوى]

أنا كنت الأول متخيل أن الأعلان غير مؤثر .... لكن مع الزمن فهمت الهدف

الهدف هو عقلك الباطن .... عن طريق الألحاح على فكره معينه

مثال ..... لما التلفزيون المصرى بدأ الهجمه على الملتحين ..... وأى ملتحى فى أى فيلم أو مسلسل

لآزم فى الأخر يطلع يا أما حرامى ... يا أما أرهابى ... أو بتاع ستات :)

على الرغم أن معظم المتفرجين عارفين جدااااا الهدف ..... ومقتنعين أن ده كلام فارغ ... انما مع الزمن أترسخت الصوره فى العقل الباطن

بعض الأعلانات كمان هو ده الهدف ..... انك لما تروح تشترى ... وقدامك على الرف سلعتين .... تلاقى نفسك بتختار واحده وتقول "هى دى المعروفه"

حاجه كده خارج الحوار وجت على بالى ..... المعروف أن التلفزيون بيبث 25 fps "Frame per Second" قريت قبل كده أن كان فيه محاولات لبث

شويه frames كده فى النص دعايه ...... العين مش هتلقطها .... لكن المخ هيلقطها .......نوع من التأثير على المخ