هكذا أتعلم قيادة السيارات!

[واثق الخطوة]

يا ناس انا الموضوع ده معرفتش اكتبه فين : قسم الموضوعات المضحكة أو الفساد ..

عموما اسيب الموضوع كله للإدارة لتنقله للقسم الذي تحبه !!

اصل الحكاية اني مبعرفش اسوق عربية ؟

لا عيب ولا حرام ولا حاجة انكسف منها ...

والعلم نور برضه ...

رحت قدمت في مدرسة السواقة مدينتي!

غلطتش أنا ؟

المهم ادوني كتاب كبير وقالولي تعالى من بكرة ...

قريت الكتاب ..

فعلا حاجة تفرح !

الكتاب بيقدم امكانيات مدرسة القيادة في عهد السيد الرئيس ....

ساحات قيادة واسعة وممهدة ...

اجهزة قيادة الية الكترونية .. يعني تقعد على كرسي الكتروني في غرفة وتجرب تسوق لحد ما تتعود على القيادة وبعدها تنزل يا حلو الميدان بقلب جامد ..

وحاجات ثانية كثير تفرح ...

المهم قلت خلاص هتتعلم يا واد .. وعمار يا طنطا ..

ورحت في اليوم الموعود ... والكتاب تحت باطي ..

جي ادخل المركز العسكري رجعني وقال لي وكأنها جملة بيكررها على كل واحد مستجد زيي : اطلع على الترعة ..

قلت له : يا عم ده وقت هزار هو انا جي استحمى ... ترعة ايه يا عم !

قال لي : يا استاذ ما تتعبناش اطلع على ترعة طريق شبين .. واستنى هناك .. العربية هتعدي تاخدك من هناك !

كانه شغل مخابرات .. !!! :sad:

قلت في عقل بالي : يا واد خليك معاهم للأخر .. بس الشيء الوحيد اللي كان مخوفني ان جهاز تعلم القيادة الإلكتروني ممكن يتسرق من عالترعة !

رحت ويا ريتني ما رحت ...

ناس كثيرة سبقوني هناك

وشوية لقيت عربيتين لادا وعربية نقل (محملين) ناس بيعلموا عليهم السواقة ..

فين يا عم ؟

على شط الترعة

والطريق ترابي

ومفرد

ومليان خرفان وحمير وعربيات كارو ....

قلت يا واد اسكت خالص لما نشوف اخرتها معاهم !!

يا عم انا جي اتعلم ؟

الصول شخط فيه : استنى شوية ..

قلت يا واد اسكت خالص لما نشوف اخرتها معاهم ..

واحد ميل على ودني وقال لي : اصلهم بيعلموا الوسايط الأول ... واحنا هنستنى ..

طيب استنيت كثير : قول للساعة 12 ..

الوسايط خلصوا ..

يا عم عايز اتعلم ..

شخط فيه ثاني : استنى شوية ...

ميل علي ودني نفس الشخص وقال لي : هياخدوا المزز الأول ..

واحنا هنستنا ..

معلش اسف علشان كلمة (مزز ) دي .. بس العتاب على الراجل اللي قال لي

ولما سألته قال لي:

بيعلموا الستات الأول وبعدين الرجالة في الأخر ..

ولاني بدأت اثق في كلامه لانه واضح انه فاهم ..

قلت يا واد اسكت خالص

خلصوا الستات ..

خلصوا يا سيدي ..

وبعد ما كان المدربين بيتخانقوا على اللي يركب معاهم من البنات

انقلب الحال

فأصبحوا يتملصوا جميعاً من الخناشير امثالنا !

والكل يقول : تعبت خلاص مش مكمل ...

وفعلا وقفت ومحدش عايز يركبني معاه !

كلمة مني عشرة منهم

اخيرا ركبت

ركبت عربية نص نقل

!!

من غير تأمين من ناحية السائق يعني معندوش لا فرامل ولا بنزين

سيارة نقل عادية جدا

وقال لي سوق :

اسوق فين يا عم

أول يوم اسوق فيه في حياتي اسوق عربية نص نقل مهكعة ومن غير أمان

وعلى طريق فردي

مش مرصوف

ومليان حيوانات متنوعة

وغير مستقيم

رد العسكري رد في غاية الحكمة وقال لي :

انا بعلمك على الصعب علشان ما تسوق السهل تعرف تسوق

ثم اردف وهو يولع سجارته :

وبعدين انا معاك في الامتحان وكلك نظر !ما تقلقش هتاخذ الرخصة ..

دور العربية

دورت يا معلم

ومشيت يا معلم

اوعي حاسب

أول وثاني وثالث ..

دربياج

فرامل

يا عم انت بتعلمني ولا عايز تنتحر ما غير ما تدخل النار لانني انا اللي سايق !

دقيقتين وانزل يا استاذ مع ان المزز اقصد الستات كانا بيقعدوا حوالي 10 دقايق ...

:closedeyes:

وده كان اول يوم في مدرسة القيادة ..

شوية واحكي لكم اللي حصل بعد كده

ده لو عشت إن شاء الله

تم تعديل 7 أغسطس 2009 بواسطة واثق الخطوة

[أحمد سيف]

ما فيش حاجه واحده ماشيه صح في مصر

[toota]

طول عمري بسوق في ابوظبي....وسواقتي عشرة على عشرة ماشاء الله...اخطر حادثة عملتها كانت اني دخلت في الرصيف عشان الارض كانت مبلولة...ولله الحمد...

لما جيت مصر....مطلوب اني اطلع رخصة سواقة...طيب...... بما اني مش مصرية...كان المطلوب اجيب شهاداتي...او اطلع شهادة محو امية :sad: ....او ادفع مبلغ وممتحنش من اصلو.... :lol:

اخترت الاسهل طبعا.... :closedeyes:

نصيحه خد الرخصة وابقى اتعلم تحت بيتكم....

[ذهبية]

يا واثق الخطوة انتم اللحقون و نحن السابقون انا اتعلم فى مدرسة المرور فى محافظتى المنصورة مش بعيدة عنك

بس بصراحة محصلش زى ما بتقول كدة كنا بنتعلم على طريق مرصوف هو صحيح اتجاة واحد و نفضل رايحين جايين و كلة هبل

و كان السواق حاطط رجلة على الفرامل لانة خايف على عربيتة لحسن تتخبط لانها عهدة علية

و كان بيكبش من واحدة فينا عشرة او خمسة جنيهة فى الثلث ساعة اللى انت بتركبها

الخلاصة من الاخر يا واثق الخطوة ااسل مجرب و متسالش دكتور ما تتعب نفسك نفسيا لانك مش هتتعلم اى حاجة من مدرسة المرور الا استفادة واحدة الا و هى

تطليع الرخصة بسهولة لانك فى المدرسة

لو عايز اقولك حصل اية يوم الامتحان بتاع المرور اقولك ؟؟؟؟

فريح بالك و متتعبس نفسيتك و اعتبرها مرحلة بس لتطليع الرخصة و التعليم الحقيقى لا ام على عربية واحد صاحبك او حد قريبك

او المدرسة الخاصة بس دى بقى سعرها عالى شويتين و ليها فيلم تانى ابقى اقولك علية لو عايز

ذهبية

[doha]

هو انت فاكر مدرسة تعليم السواقه دي عشان تتعلم بجد ؟ دي حاجه شرعيه مقننه عشان تطلع الرخصه بشكل مضمون بعد ماتدفع المعلوم وهو رسوم الاشتراك في المدرسه الي اصلا لو حتى بتعرف تسوق هتنسيك الي تعلمته ..

بص نصيحه اربط الحمار مطرح مايقولك صاحبه ومشي حالك مع المدرسه دي وخذ رخصتك وخلاص وبعد ماتاخذها امرك لله هتدفع تاني لحد يدربك كام حصه بجد وبعدها ابقى سوق براحتك ..

وبما انك بلدياتي فهنصحك بمدرب كويس اوي هو الي علمني السواقه اسمه اشرف الشرقاوي اسأل عليه في اي محل تأجير سيارات .. وعامه اي محل برضه من بتوع السيارات دول بيكون عندهم دورات للتدريب وبيطلع معاك سائق بسيارته وكل شيء ويعلمك بجد لكن مدرسه السواقه زي ماقلت لك هي واجهة بس لتحصيل رسوم على كل رخصه بحجه التعليم وانما فعليا مفيش تعليم ..

[سهل جدا]

نصيحه خد الرخصة وابقى اتعلم تحت بيتكم....

bv:-

ما هو ده اللي أنا عملته لما أخذت الرخصة في مصر

========================

خارج النص

أمنية حياتي أشوف واحدة بتعرف تسوق كويّس

شدّي حيلك يا مدام ذهبية وحاولي تطلّعي نظريتي غلط ..

أما مدام توتا فقد قالت بنفسها :D

اخطر حادثة عملتها كانت اني دخلت في الرصيف عشان الارض كانت مبلولة...ولله الحمد...

وما خفي كان ... :happy:

[واثق الخطوة]

وبما انك بلدياتي فهنصحك بمدرب كويس اوي هو الي علمني السواقه اسمه اشرف الشرقاوي اسأل عليه في اي محل تأجير سيارات .. وعامه اي محل برضه من بتوع السيارات دول بيكون عندهم دورات للتدريب وبيطلع معاك سائق بسيارته وكل شيء ويعلمك بجد

أنا بالفعل اتعلم مع أشرف الشرقاوي في شارع النادي منذ أسبوع ..

والحمد لله وصلت بعد 3 حصص اني بسوق في طنطا عادي ..

ولكن ملاحظاتي السابقة كلها كانت بناء على شيء واحد فقط : انهم أعطوني كتاب ملئ بالصور والأجهزة وساحات التدريب .. ثم فؤجئت بالعكس ... وسؤالي : طيب الأجهزة دي راحت فين وايه فايديتها ... طالما كلنا طالعين عالترعة ... يعني طالعين عالترعة !!!!!!!!!!!!!!!!!!!!!!!!!!!!!

[عنبو]

وبما انك بلدياتي فهنصحك بمدرب كويس اوي هو الي علمني السواقه اسمه اشرف الشرقاوي اسأل عليه في اي محل تأجير سيارات .. وعامه اي محل برضه من بتوع السيارات دول بيكون عندهم دورات للتدريب وبيطلع معاك سائق بسيارته وكل شيء ويعلمك بجد

أنا بالفعل اتعلم مع أشرف الشرقاوي في شارع النادي منذ أسبوع ..

والحمد لله وصلت بعد 3 حصص اني بسوق في طنطا عادي ..

ولكن ملاحظاتي السابقة كلها كانت بناء على شيء واحد فقط : انهم أعطوني كتاب ملئ بالصور والأجهزة وساحات التدريب .. ثم فؤجئت بالعكس ... وسؤالي : طيب الأجهزة دي راحت فين وايه فايديتها ... طالما كلنا طالعين عالترعة ... يعني طالعين عالترعة !!!!!!!!!!!!!!!!!!!!!!!!!!!!!

هو بس تلاقى الراجل بتاع الكمبيوتر اللى كان بيطبع الكتاب هو اللى غلطان بدل الصور بس يبقى منجبش العيب على الدوله لا العيب على الراجل بتاع الكمبيوتر خد الرخصه وخلاص وابقى اتعلم لما تجيب عربيه

إقتباس

نصيحه خد الرخصة وابقى اتعلم تحت بيتكم....

ما هو ده اللي أنا عملته لما أخذت الرخصة في مصر

========================

خارج النص

أمنية حياتي أشوف واحدة بتعرف تسوق كويّس

شدّي حيلك يا مدام ذهبية وحاولي تطلّعي نظريتي غلط ..

أما مدام توتا فقد قالت بنفسها

إقتباس

اخطر حادثة عملتها كانت اني دخلت في الرصيف عشان الارض كانت مبلولة...ولله الحمد...

وما خفي كان ...

ياعم سهل انت ليه بتقول ان مافيش حريم بيعرفوا يسوقوا ؟؟ كده ياعم هيقولوا علينا ان احنا عنصريين واحنا مش ناقصين مجلس الامن

طيب اذا كان انا مره شفت واحده سايقه وكانت سايبه ايديها وكانت عادى خالص

[elfakhrany]

يا أستاذ سهل فى بنات بتعمل أحلى غُرز ودول تشوفهم فى القاهرة كتيــــر وكمان بيعملو خمسات بالعربيات فى auto cross :blink:

[سهل جدا]

ياعم سهل انت ليه بتقول ان مافيش حريم بيعرفوا يسوقوا ؟؟ كده ياعم هيقولوا علينا ان احنا عنصريين واحنا مش ناقصين مجلس الامن

طيب اذا كان انا مره شفت واحده سايقه وكانت سايبه ايديها وكانت عادى خالص

يا أستاذ سهل فى بنات بتعمل أحلى غُرز ودول تشوفهم فى القاهرة كتيــــر وكمان بيعملو خمسات بالعربيات فى auto cross :lol:

يا عم غُزر إيه بس , دا أنا لمابأسوق في مصر ببقى حاطط إيدي على قلبي لما بشوف أي واحدة سايقة عربية..

أحسن حاجة في السعودية إن ما فيش ستّات بتسوق :lol:

على فكرة موضوع قلّة مهارة النساء في القيادة موضوع معروف على مستوى العالم..

وشوفت فلمين وثائقيين عن الموضوع ده ..

لولا خوفي إني آخذ ذنوب كنت حطيت الروابط بتاعتهم

ومرّة عمرو أديب عمل حلقة تقريباً عن الموضوع ده .. (سواقة الستات)

طبعاً الحكم بيكون للأعمّ الأغلب.. يعني ممكن تلاقي ستات بتعرف تسوق ولكنهم قلة قليلة ..

بس كفاية كده عشان ما حدّش يزعل منّنا wst::

[الباشمهندس ياسر]

انا وصلت المرورر

عملت الطلب و امتحنت و نجحت و اتصورت و اخدت الرخصة و روحت

حوالى 4 ساعات تقريبا

و مدفعتش جنيه لحد و ما اخدتش اى واسطة

بس انا بعرف اسوق فعلا و يمكن اشطر م اللى كان بيمتحنى

اما عن السواقة الحريمى ... اوعى وشك

مفيش وسط يا عم الحاج انت و هو ... يا اما بتسوق فوق الممتاز يا اما بتسوق تحت السلم قصدى تحت العادى

و بتعجبنى اوى البنات بتاعت الغرز ....

افتكر انى شفت واحدة ع الطريق سايقة بطريقة اييييييييه.. .... ملهاش حل

فضلت وراها عشان اتعرف عليها و ف الاخر طلعت مودام...خدت بعضى و روحت و انا مخنوق

[MZohairy]

كنت حقع على الارض من كتر الضحك خصوصا لما قالكم ياللا ع الترعه

و بعدين كتاب ايه ده اللي بتصدقه؟؟؟

هي مصر فيها مرور؟؟؟؟؟

عندنا هنا و في دبي و في معظم بلاد العالم حاجه اسمها الشولدر تشيك (يعني لما تيجي تغير الحاره يمين او شمال تلف راسك و رقبتك 90 درجه على الاقل عشان تتأكد ان مفيش اي خطر من تغيير الاتجاه عشان بيكون فيه اماكن مبتظهرش في المرايه

و لو معملتهاش في الامتحان تسقط فورا

احب اؤكدلك ان 90% من السواقين المصريين ميعرفوش الحكايه دي

و الاحلى من كده ان انا شخصيا وانا في مصر في الثمانينات قعدت اسوق عربيتي ايام الجامعه قرابة السنه من غير وجود اي مرايات في العربيه و لا شولدر تشيك ولا اي بطيخ

ده غير ان معندناش حارات نلتزم بيها

و معندناش اشارات اصلا محترمه

بس عايز اقولك ان اللي يعرف يسوق في مصر تأكد من انه حيعرف يسوق في اي حته في الدنيا

بس مش شرط يعرف ينجح في امتحانات السواقه خارج مصر

[ذهبية]

ماهى جت لحد عندكم يا رجال المنتدى علشان تطلعوا السيدات مش بيفهموا فيها

طبعا انا مش هاختلف معاكم الا فى نقطة واحدة انها مش قاعدة اللى انتم عمالين تعمموها دى ان كللللللل الستات مش بتعرف تسوق كويس لا فية بيسوقوا كويس و كويس جدااا كمان واحسن من اى راجل

و بعدين سواقة السيدات دى مش شالت من عليكم ايها الرجال حمل كبير يعنى السيدة اللى بتعرف تسوق بتودى اولادها الدرس

تشترى لوازم بيتها بتحمى نفسها من ركوب المواصلات و ما فية من مهانة و ذل و خروج عن الادب

يعنى الست بتصون نفسها وولادها بدل ما تشجعوها على دة عاملين تكسروا فيها وكمان مش عاجبكم

[nizza la bella]

و بعدين سواقة السيدات دى مش شالت من عليكم ايها الرجال حمل كبير يعنى السيدة اللى بتعرف تسوق بتودى اولادها الدرس

http://www.dailymotion.com/video/x1g83x_creno-de-femme_fun

طب افهم من كدة ان بالطريقة دى العيال ها يرحو الدرس :)

mfb:

تم تعديل 9 أغسطس 2009 بواسطة nizza la bella

[nizza la bella]

احب اؤكدلك ان 90% من السواقين المصريين ميعرفوش الحكايه دي

mfb:

99%

[nizza la bella]

و بعدين سواقة السيدات دى مش شالت من عليكم ايها الرجال حمل كبير

http://www.youtube.com/watch?v=xLwm5I5yvAY&hl=fr

قصدك زودة الحمل

من مخلفات

سمكرى يصليح العربية اللى بات عملة زاى الخردة

يعنى زاى ماتقولى كدة بتزود الحمل

اوعى تزعلى منى :) :lol: mfb:

تم تعديل 9 أغسطس 2009 بواسطة nizza la bella

[nizza la bella]

بس عايز اقولك ان اللي يعرف يسوق في مصر تأكد من انه حيعرف يسوق في اي حته في الدنيا

بس عايز اقولك ان اللي يعرف يسوق في مصر تأكد من انه (مش ) حيعرف يسوق في اي حته في الدنيا

mfb:

[nizza la bella]

ماهى جت لحد عندكم يا رجال المنتدى علشان تطلعوا السيدات مش بيفهموا فيها

طبعا انا مش هاختلف معاكم الا فى نقطة واحدة انها مش قاعدة اللى انتم عمالين تعمموها دى ان كللللللل الستات مش بتعرف تسوق كويس لا فية بيسوقوا كويس و كويس جدااا كمان واحسن من اى راجل

اتفق معاكى

مش تعميم mfb: