العودة للوطن

[hosambob]

بدأ قرار العودة يدق أبواب عقلي بكل شدة بعد عام كامل من الغربة بالمملكة العربية السعودية

بدأ يدق حين فشلت كل محاولات استقدام الزوجة و الأبن

بدأ يدق حين بدأت أشعر أن الكفيل مش ناوي يزود المرتبات و السكن أربعة في غرفة واحدة

بدأ يدق حين أشتاق لرؤية وجه ولدي الذي بات لا يعرفني

بدأ يدق حين ضاق صدري و نفذ صبري

بدأ يدق حين اغفو علي وسادتى ليلا ً لأنام بلا أحلام مثل الماضي

دبروني ماذا أفعل ؟ دبروني لماذا الغربة ؟

راتب 2000 ريال + سكن علي الكفيل ( علبه سردين ) بس مفيش حاجة تاني

للأمانة علشان ربنا هيحاسبني :

( مبيأخروش رواتب + كويسين في المعاملة بالعمل )

تم تعديل 9 أغسطس 2009 بواسطة hosambob

[الباشمهندس ياسر]

ربنا يوفقك للخير حيث كان ....... امين

عموما انت ممكن تحسبها

امسك ورقة و قلم

و احسب وضعك ف الخارج و حياتك و مستوى استمتاعك بيها و حجم ادخارك و حط الناحية التانية نفس الكلام ف مصر

و شوف مين هيتفوق ف النهاية

و قلنا وصلت لايه..

بس ممكن سؤال لو تكرمت ... هو حضرتك بتشتغل ايه؟

[hosambob]

استمتاعك .. متهيألي هو في واحد فينا بيستمتع بحياته في الغربة ؟

هو في واحد فينا بيستمتع بحياته و هو بعيد عن اسرتة و ابنة

هو في واحد فينا بيستمتع بحياته و هو حاسس انه لازم يحوش علشان يقلل سنوات الغربة

علي فكرة يا باشمهندس ياسر انا شغال سكرتير في شركة مقاولات

علي فكرة معدل الأدخار هنا طبعا ً مش زي مصر .. بس و الله في مصر كنت الحمد لله العيشة كويسة و كنت عايش كويس ؟

بس للأسف مكانى في مصر أكيد راح ( كنت شغال في شركة لتعليم كمبيوتر ) كنت باخد منها راتب كويس + راتب الحكومة داخل اضافي شهري و الله لو اضمن ان وضعي المالي قبل ماجي القيه هو هو ارجع من النهاردة و بس خلاص ..

[doha]

حاسه بيك تماما وكل ماتمر به الآن تقريبا مر ويمر به يوميا كل المصريين في الخارج.. وكأن لسان حالنا لعيشتنا في الغربة مش طايقك ولا طايق بعدك ..

على كل حال انت لو ( ضحيت ) بوضعك هنا عشان تبقى مع اسرتك في مصر فمحدش ابدا هيقدر يلومك ولا هتبقى خسرت لو بديت لم الشمل على اي شيء تاني ..

المشكلة انك مش ضامن ظروفك في مصر يعني دلوقت لو سبت هنا ورجعت هتلاقي وظيفتك هناك مش مضمونه او مش موجوده ومعنى كده ان وجودك في مصر هيبقى غير مستقر وبرضه احتمال تضطر ترجع هنا تاني ..

على كل حال هقولك نصيحه ان عجبتك ممكن تعمل بيها ..

اولا تستخير بنيه صافية وتدعي ربنا يوفقك للخير ومتحطش في نفسك تحبيذ جانب على التاني .. يعني مش تقرر انك خلاص راسك والف سيف مسافر وتروح مصلي على كده ولا تبقى عازم النية على البقاء هنا وشايل من ذهنك تماما فكرة السفر وتقول انا استخرت .. لاه انت فعلا محتار ومش عارف ايه الصح انك تسافر او تبقى اذا استخير وقول يارب اهديني للصواب وريحني ليه ..

ثانيا تحط في بالك كويس اوي انك مغلطتش لما جيت هنا ولا تلوم نفسك على ضياع وظيفتك في مصر او ماشابه .. انت مجيتش هنا عشان تلف على الكبريهات ولا تسهر تستمتع للصبح .. انت جاي وشايل فاسك على كتفك وعارف انك هتنحت في الصخر وتطلع عينك وكل ده لاسرتك حتى مش لنفسك .. جيت وتحملت الصعاب ورضيت بالتعب عشان حياه افضل لكم كلكم .. كونك تحملت من ضمن ماتحملت فقد وظيفتك في مصر فده شيء يشرفك ولا يعيبك ومعناه انك انسان طموح بتسعى دائما للافضل وبالتالي فحالك دائما باذن الله هيكون افضل حتى لو الوضع الراهن مش كده ..

ثالثا وده بيت القصيد .. تحمل شويه بعد اسرتك عنك وكون ابنك مش عارفك دلوقت فمعليش باذن الله تتعوض ومجرد مايشوفك بعد كده هيتعلق بيك تاني بشرط انك تحط لنفسك خطه وتلتزم بيها .. انت حدد مهله زمنيه للوضع الي انت فيه ده عباره عن ثلاث سنوات انقضى منهم سنه وبعد سنه كمان قيم التجربة . ان وجدت ان الخطه ماشيه كما هي وانك الى حد ما كونت مبلغ معقول شويه استمر سنه كمان .. ان لقيت الوضع محلك سر ومفيش ادخار لشيء يذكر ارجع مصر فورا ..

طيب افرض انك كملت ثلاث سنوات ..

نرجع نقيم التجربة لمرة ثانيه .. فحاجه من عده بدائل .. لو انصلح الحال واصبح بامكانك استقدام زوجتك كان بها نحط اهداف جديده ونبني لها خطه زمنيه جديده وبرضه نقيمها كل فترة للتأكد اننا ماشيين صح .. طيب ان معرفتش تجيب الزوجه ؟ حاول تنقل وظيفة تانيه افضل وفيها انك تجيب زوجتك ومين عارف الوضع وقتها هيكون ايه .. طيب افرض بعد ده كله معرفتش تجيب زوجتك وابنك يبقى خلاص توكل على الله وارجع مصر وتبقى عملت الي عليك واديت لنفسك ولتجربتك فرصة .

ليه بقولك انتظر سنه كمان بعد الاستخاره ؟

اولا سنه مش هتغير شيء من ناحية ابنك لكن اكتر من كده مثلا خمس ست سنوات او ان يبقى الطبيعي انك هنا وهم هناك ده الي مش مطلوب ابدا .. سنه مقدور عليها باذن الله .

ثانيا ممكن في خلال السنه او السنتين الجايين القوانين تتغير او وضعك في الشغل يتحسن والله اعلم ممكن ايه تاني يحصل يخلي امكانيه اجتماعك واسرتك في المتاح .

ثالثا ايا كان المبلغ الي حوشته فمعروف ان اول سنه دي ضايعه ضايعه فلو رجعت دلوقت انت مستفدتش من الناحية الماديه تقريبا ويجوز سنه او سنتين كمان يفرقوا معاك ..

رابعا وده بيت القصيد بما انك خسرت وظيفتك في مصر فانت في امس الحاجه لوظيفة لو رجعت اذا لما ترجع وان ثلاث سنوات خبرة في مهنه معينه خير من رجوعك وانت سنه او بضعه شهور ولا ايه؟

على كل حال استخير وبرضه خليهم في مصر يبحثوا لك عن عمل من الآن عشان ميكونش موضوع الشغل ده ورقة ضغط عليك او يحسسك انك قاعد هنا غصب .. ومين عارف يمكن وجودك هنا خير ومين عارف بكرا فيه ايه ..

وربنا يهديلك الحال ويفتحها عليك من اوسع الابواب ..

[سهل جدا]

جزاك الله خيراً أختنا ضحى

كلام موزون جداً...

ونصيحتي لك يا أخ حسام إنك لو قرّرت إنك ترجع مصر.. بدون ما تكون حوّشت شيء.. فلازم على الأقلّ إنه يكون معاك ما يكفيك لمدّة 6 شهور من مصاريف بيتك..

لأن في الغالب الإنسان بيحصل على وظيفة مناسبة خلال 6 شهور من البحث..

وربّنا يفرّج همّك وهمّ جميع من في مثل حالك ..

[hosambob]

شكرا علي ردود الزملاء و خاصة الزميله ضحي

و ربنا يسهل يا ( سهل جدا )

تقبلوا خالص تحياتي

[dongol]

يا جماعة ربنا بيقول " و رزفكم في السماء و ما توعدون" يعني ما قالش في السعودية بس. كل مكان هتكون فيه ربنا هيبعتلك رزقك لو انت اجتهدت و دورت يعني ضياع الشغل في مصر مش مشكلة و اكيد ان شاء الله ربنا هيرزقك باحسن منه لو عقدت النيه علي النزول

احنا اللي دايما خايفين الناس في مصر تضحك علينا لما نرجع و تقول زي ما راح زي ما جه و هو ده مربط الفرس

ثم الالفين ريال اللي حضرتك بتاخدهم دول اكيد بتحوش منهم حوالي 1500 ده لو ربطت علي نفسك يعني حوالي 2250 جنية

هل المبلغ ده يساوي ان ابنك يكبر وهو ما يعرفكش الا شهر في السنه

انا رايي ان لو حضرتك ما عرفتش تجيب الاسرة تعيش معاك يبقي لازم تنزل و اكيد مش هتخسر كتير

ربنا ييسر الحال و يرزقك سواء كنت في السعودية ولا في مصر

[سهل جدا]

يا جماعة ربنا بيقول " و رزفكم في السماء و ما توعدون" يعني ما قالش في السعودية بس. كل مكان هتكون فيه ربنا هيبعتلك رزقك لو انت اجتهدت و دورت يعني ضياع الشغل في مصر مش مشكلة و اكيد ان شاء الله ربنا هيرزقك باحسن منه لو عقدت النيه علي النزول

ونعم بالله..

بس الآية الكريمة مكتوبة خطأ

وتصحيحها هو: {وَفِي السَّمَاءِ رِزْقُكُمْ وَمَا تُوعَدُونَ} سورة الذاريات

[الباشمهندس ياسر]

استمتاعك .. متهيألي هو في واحد فينا بيستمتع بحياته في الغربة ؟

ايوه يا اخى الكريم

فيه ناس بتستمتع بحياتها ف الغربة و ف اى مكان كمان

و ربنا يوفقك و توصل للقرار الصح

[capitshino]

استمتاعك .. متهيألي هو في واحد فينا بيستمتع بحياته في الغربة ؟

ايوه يا اخى الكريم

فيه ناس بتستمتع بحياتها ف الغربة و ف اى مكان كمان

و ربنا يوفقك و توصل للقرار الصح

فى الغربة اه ... انما فى السعودية لا

[hosambob]

شكل يا جماعة الباشمهندس ياسر مقضيها فسح و ضحك و لعب و جد و شغل هنا في السعودية و مش ناوي ينزل مصر خالص

قلي أنت يا باشمهندس ياسر ( متجوز و لا لئة ) اسرتك معاك و لا في مصر ؟

انا مش بحسدك لا سمح الله انا عاوز اعرف بتستمع بحياتك في الغربة أزاي ؟ يمكن تكون وسيلة علشان استمر هنا

تقبلوا خالص تحياتي

تم تعديل 10 أغسطس 2009 بواسطة hosambob

[herohero]

استمتاعك .. متهيألي هو في واحد فينا بيستمتع بحياته في الغربة ؟

ايوه يا اخى الكريم

فيه ناس بتستمتع بحياتها ف الغربة و ف اى مكان كمان

و ربنا يوفقك و توصل للقرار الصح

فى الغربة اه ... انما فى السعودية لا

لا عيش يومك طبعا هو الي له التزامات ف مصر هيبعت فلوس لهم يعني هيفيض معاه اد ايه اذا كان مرتبه بسيط لكن انا ضد اللي يقولك قرشين اعملهم وارجع مصر محدش يرجع لان قرشين النهارده مالهومش قيمة اللي بيحصل بتعيش العمر كله ع انك راجع السنة الجاية وسنة بتجر سنة وسنين معاها

[عاشق الترحال]

بدأ قرار العودة يدق أبواب عقلي بكل شدة بعد عام كامل من الغربة بالمملكة العربية السعودية

بدأ يدق حين فشلت كل محاولات استقدام الزوجة و الأبن

بدأ يدق حين بدأت أشعر أن الكفيل مش ناوي يزود المرتبات و السكن أربعة في غرفة واحدة

بدأ يدق حين أشتاق لرؤية وجه ولدي الذي بات لا يعرفني

بدأ يدق حين ضاق صدري و نفذ صبري

بدأ يدق حين اغفو علي وسادتى ليلا ً لأنام بلا أحلام مثل الماضي

دبروني ماذا أفعل ؟ دبروني لماذا الغربة ؟

راتب 2000 ريال + سكن علي الكفيل ( علبه سردين ) بس مفيش حاجة تاني

للأمانة علشان ربنا هيحاسبني :

( مبيأخروش رواتب + كويسين في المعاملة بالعمل )

الحال من بعضه يا ريس أنا راتبي بالظبط يزيد على راتبك 25 ريال يعني ( 2025 ريال ) بس أنا ساكن سكن خاص مع واحد صاحبي غرفه (600 ريال ) شهريا وحفيت علشان أغير مهنتي بدون فائده علما بأني حاصل على ليسانس حقوق وأوراق موثقه وخلصانه ودخلنا وسايط وبدون فائده حتى الآن وربنا عليه التساهيل.

واللي مصبرني أن الوضع هنا بالحال ده أفضل من مصر بالنسبه لي كتير.

انا تقريبا شغال نفس مهنتك مساعد إداري ومدخل بيانات حاسب وسكرتير أحيانا وأهي ماشيه.

انا هنا بالنسبه لي محطه إلى أن يقضي الله أمراَ كان مفعولا

وانت كمان شوف حالك وإحسبها وإن كان هناك زي هنا يبقى الغربه ملهاش لزمه وبلا ثمن .

وربنا يوفقنا و يوفقك ويوفق المسلمين أجمعين.

[الباشمهندس ياسر]

كسبنا صلاة النبى ... اللهم صلى عليه و على آله و صحبه و سلم

يا اخى الفاضل ... أنت تصنع حياتك

[ذهبية]

لا اعتقد انى هازيد على كلام ضحى كتير لانها اوفت بصراحة

لكن انا اعتقد ان مسالة ابعد عن الزوجة و الاولاد بالنسبة ليا هما مربط الفرس يعنى لو كانوا معاك تحت اى ظروف هنا او هناك هتستحمل و تعيش

يبقى دة يكون اساس اختيارك لو قدرت تجيبها هو و الاولاد يبقى خير لو مقدرتش يبقى الخير لك يا اخى مع المرتب القليل دة انك ترجع

انا يصعب عليا عمر الشباب و احلى سنين العمر يمر بين ايدينا واحنا مش حاسين بية يا اخى زوجتك واولادك عليهم حق عليك

طالما الغربة ما تستاهل و مفيش امل فى التحسن او فرصة احسن يبقى زوجتك و اولادك لهم الاولوية يا اخى

اعانك الله و قرب لك البعيد

ذهبية

[sayed_ossman]

مع احترامى لكل الاخوه بس انا ابدا مش بيعجبنى حاله المصرى المغترب والاستكانه اللى فيها الشباب المصرى - ليه دايما خنوعين ومش بنحاول نطور فى نفسنا ونغير من واقعنا ليه مين قالكو ان مستشارى نظم المعلومات واخدين دكتوراة فى الهندسه فى كل انحاء العالم - ليه فاكرين ان الدينا واقفه وهو ده قدرنا

اتعلمو - طورو من نفسيكم - افتخر بنفسك وثق فى ذاتك - خريج جامعه او دبلوم - انت اللى بتصنع نفسك وتكسب الناس احترامهم ليك بقوتك الفكريه والعملية وبمهاراتك المهنيه - مش حاجه تانيه

خلى لنفسكو هدف - قسمو اهداف حياتكم اربعه اقسام بحيث ان مفيش قسم يطغى على التانى - علمية - ماليه- اسرية - شخصية واجتماعيه

حدد اهدافك فى كل حاجه من دول اعمل وقت لتحقيق كل اهدف - اتعبو على نفسكو - استثمرو فى تطوير ذاتكم - واعرفو يقوم مش هتتقدموا العالم هنا وفى اى مكان هيدوسو عليكم - لان دى طبيعه الحياة مفيش حاجه ساكنه فى مكانها - يبقى ليه انت تقف

كلنا لازم نطور ونعرف اذاى نسوق نفسنا - لان كل مهنه مجرد سلعه او خدمه - ودائما العميل بيشترى السلعه او الخدمه المتطورة الحديثة

هو لسه فيه حد بيشترى تلفزيون ابيض واسود

ولا دلوقتى الوان ريموت كونترول -- الخ

قوم يا مصرى - ارفع راسك - واسال نفسك هل انت راضى عن نفسك ؟

[Aboraiamba]

انا شايف يا جماعة ان النظرة بتقتصر على المقارنة بين الماضى والحاضر فقط بس انا لي تعليق صغير , وهو ان فى حاجة اسمها فسيولوجية النجاح ، وفسيولوجية الفشل

بمعنى يجب على كل فرد تحديد حلم كبير عليه تحقيقه خلال حياتة هذا الحلم هو ما يجعله يقاتل كل صعوبات الحياة بمعنى عند حدوث اى كبوة او حتى فتور فى الحياه فأن هذا الحلم هو ما يجعله يقاتل من جديد .

اما فسيولوجية النجاج والفشل فهى الطريق لتحقيق هذا النجاح كيف ؟

يجب على الشخص التركيز دائما على ما تم انجازة فى الحياة وليس على ما تم الخفوق او الفشل فيه ودائما يقول انا اتطور حيث ان التركيز على النجاح يولد نجاح اخر اما التركيز على الفشل والاخطاء فلا يأتى الا بالاحباط وزيادة الفشل .

وشكرا

[herohero]

انا شايف يا جماعة ان النظرة بتقتصر على المقارنة بين الماضى والحاضر فقط بس انا لي تعليق صغير , وهو ان فى حاجة اسمها فسيولوجية النجاح ، وفسيولوجية الفشل

بمعنى يجب على كل فرد تحديد حلم كبير عليه تحقيقه خلال حياتة هذا الحلم هو ما يجعله يقاتل كل صعوبات الحياة بمعنى عند حدوث اى كبوة او حتى فتور فى الحياه فأن هذا الحلم هو ما يجعله يقاتل من جديد .

اما فسيولوجية النجاج والفشل فهى الطريق لتحقيق هذا النجاح كيف ؟

يجب على الشخص التركيز دائما على ما تم انجازة فى الحياة وليس على ما تم الخفوق او الفشل فيه ودائما يقول انا اتطور حيث ان التركيز على النجاح يولد نجاح اخر اما التركيز على الفشل والاخطاء فلا يأتى الا بالاحباط وزيادة الفشل .

وشكرا

كلام حضرتك صح 100 ف 100 للاسف الحلم تعالى مثلا شوف اللي مسافرين ف الخليج اهدافهم ايه هتلاقيها مع كامل احترامي وتقديري اهداف كان ممكن تتحقق ف مصر يعني تلاقيه بعد غربة 30 سنة رجع جوز عياله وفتح له حاجه وقرشين ف البنك وخلاص انتهت حياته ع كده وانا واحد من اللي اتربو كده لكن والدي اكتشف ان ده غلط لما جينا نقارن نفسنا بقريبنا اللي راح امريكا ف نفس الوقت بتاع ذهاب والدي للكويت

انا عارف انها ارزاق لكن هناك الافكار بتتغير احنا هنا بنحتك بفكر استهلاكي بيخلي تفكيرك استهلاكي

هاتوا حد من رجال الاعمال ف مصر بقى رجل اعمال ناجح من شغله ف مصر انا ماسمعتش باستثناء عثمان احمد عثمان ده راح السعودية فتره ورجع انما الباقي جابوا افكارهم او صناعاتهم الملوثه من بره العالم العربي هناك بتحتك بقيمة العمل مخك بيتغير احلامك بتتغير

وده اي حد يلاحظوا مثلا هل المصريين ف دبي احلامهم زي مصريين الكويت والسعودية مستحيل

انا كان ليا صحاب راح دبي وهو كان ف مصر عادي جدا بعد سنة من دبي قدم طلب هجرة وماشي فيه والمفروض خلاص ياخد التاشيره ليه كل ده لان احتك بفكر غربي كتير وبدأ مخه يتغير

للاسف الشديد بيئة اللي بتنشا فيها وبتشتغل فيها

لها دور كبير المصري الحالي للاسف الشديد بيفكر ف كل شيئ الا تطوير ذاته اللي هو اهم شيئ

فرحانين بان الكفاله هتتلغي هل ياترى المصريين جاهزين للمنافسه

اكبر مشكلة ان احنا مانقدرش كلنا ننافس فيه ناس ممتازة لكن للاسف المهني المصري غير مؤهل ع المنافسة فضلنا عايشين اننا اللي بس بنفهم ف العالم العربي لحد مالاقينا اللبناني مسيطر ع المناصب الادارية التنفيذية ف معظم فروع الشركات الاجنبية ف الشرق الاوسط

ياريت بجد نحلم بتطوير ذاتنا ساعتها اشتغلنا ف مصر او ف اي حته مش فارقه