مشكلة مع المدرسة المصرية للغات

[noureymo]

السلام عليكم يا جماعة وكل سنة وانتم طيبين

المشكلة ببساطة ان بنتي رايحة اولى ابتدائي في المدرسة المصرية للغات فرع التجمع الخامس السنة الي فاتت بنتي دخلت kg2 في المدرسة والاتوبيس كان بيوديها ويجيبها بعد ما ضيعنا حوالي اسبوعين بنقنع في المدرسة انهم يروحولها عند البيت (بيت جدها) المهم السنة دي جدها نقل بيت تاني يبعد حوالي اربع دقايق عن البيت القديم

المدام راحت السنة دي تدفع المصاريف وتغير العنوان

اخدوا الاستمارة والمصاريف ومصاريف الباص والمدام مشيت وبعد نص ساعة كلموها وقالولها ما بنرحش العنوان ده

طبعا مامتها كلمتني وقالتلي وكلمنا مشرفة الباص والمديرة بتاعتها وربنا قدرنا واقنعناهم انهم ياخدوا الاتوبيس ويجربوا العنوان ويتأكدوا انه هيوفرلهم اربع دقايق عن العنوان الاولاني علشان العنوان الجديد على الشارع الرئيسي وفعلا راحوا امبارح وكلمونا وقالولنا خلاص الموضوع انتهى وهنكلمكم بكرة علشان تكون قلنا لادارة المدرسة واعتمدنا خط السير

المهم كلمونا النهاردة وقالوا ان الاستاذة مديرة الحركة رفضت طبعا مامتها اول ما سمعت كده ارتبكت ومش عارفة تعمل ايه وكلمتني

طبعا انا كلمت المدرسة من هنا في ابوظبي ووصلت للاستاذة الفاضلة مديرة الحركة وقعدت اكلمها نص ساعة تقريبا علشان تقتنع

وكل ما تقولي سبب اديها حل مقنع جدا لدرجة انها في الآخر قالتلي مش هنروح ومن غير نقاش

هي بصراحة ما تجاوزتش في الكلام لكن كانت حد جامد جدا ومش عاوز يقدر المشكلة الي احنا فيها لدرجة اني فهمتها ان احنا ممكن نروح الصبح عند المكان الي هي عاوزاه والبنت تركب من هناك وبعد الضهر تودي البنت البيت علشان ما فيش حد هياخدها ومامتها بتشتغل بعيد شوية ومافيش حد يا خدها خالص

في نفس الوقت كانت المدام وصلت المدرسة والمشرفات قدروا المشكلة وتقريبا ماعندهمش مانع خلاص بس لازم السيدة الفاضلة مديرة الحركة تديهم الاذن وطبعا المدام راحتلها وبرده رفضت

المشكلة اني مش في مصر وبيني وبينكم حتى لو في مصر مش عارف اعمل ايه الموضوع ممكن يكون باين صغير لكن فعلا موضوع كبير بالنسبة لينا

يا ترى يا جماعة حد قابل مشكلة زي دي قبل كده ويا ريت حد يقترح عليا اي اقتراح اصلي بصراحة بعد المكالمة دي والطريقة الي عمر ما حد كلمني بيها دي قبل كده وان كان ما فيهاش ولا كلمة فيها غلط او تجاوز حاسس باهانة على الاقل علشان احساسي انها تقريبا بتقول هو ده النظام ولو مش عاجبكم اتصرفوا وكمان تقؤيبا قالت انتم ازاي تاخدوا بيت جديد من غير ما تقولوا للمدرسة

اسف جدا يا جماعة وارجو تقدير الظرف

كل سنة وانتم طيبين

[doha]

هو موضوع كبير فعلا وميحسش بيه غير الي بيعاني منه زيك لان توصيل الابناء ( في يد امينة ) مشكلة صعبه انك تدبرها لو الاوتوبيس كان رافض ..

وللاسف المشرفة المسؤوله عن الحركه مش غلطانة في موقفها ببساطة لان لو بنتك ساكنة ضمن حدود الباص عادي وبيوديها ويجيبها وجات بنت تانيه في وضع بنتك الحالي وسكنت في حته بعيده عن خط السير واكتشفت ان بنتك بترجع كل يوم متاخره نص ساعه عن موعدها عشان الباص بيضطر يطلع من خط سيره يروح مخصوص يجيب بنت واحده بس او يرجعها.. ممكن تعديها يوم او اثنين لكن اكيد مش هتسكت لما يبقى الوضع يومي وبنتك بتنزل بدري كل يوم نص ساعه وترجع متاخر نص ساعه هي وكل ركاب الباص عشان طالبه وحده بس بيتها بعيد ... اكيد المنطق هيكون ان شيل الطالبه دي من الباص خالص لمصلحه بقية الطالبات ..

وطبعا المدرسات وبقية الطاقم في المدرسة متفهم موقفك ومش بيقولك لاه مش لان معاك الحق بقدر مالانهم ( شاريين دماغهم ) يعني رايهم لا هيقدم ولا هياخر فعشان كده بيواسوك ويقولوا لك ماشي موافقين بس هات موافقة المشرفة .. هي مش متحاملة على بنتك بشكل شخصي وانما زي ماقلت لك ده خط سير واي بنت كانت في وضع بنتك كان هيترفض قبولها لنفس السبب ..

الحل الوحيد قدامك دلوقت انك تكلم حد من اقاربكم او جيرانكم او مدرسين البنت في المدرسة يوصلها ويجيبها معاه كل يوم مقابل اي مبلغ .. اكيد معندكش حد جاهز دلوقت ومتعرفش حد بس مقدامكش غير توصي كل معارفك واقاربك وباذن الله مع التفكير هتهتدي لشخص مناسب .. واكيد برضه لو مفيش الشخص ده وعجزت يبقى مقدامكش غير تنقل لها من المدرسة ..

معليش المشكلة اكيد مضايقاك جدا بس اريحك دي مش مسؤوليتك دلوقت دي مسؤولية الناس الي في مصر ربنا يعينهم ويقدروا يلاقوا حل مناسب بس انت عليك تتكفل بالمصاريف .. ربنا يعين ..

تم تعديل 19 أغسطس 2009 بواسطة doha

[ام بودى]

السلام عليكم وكل عام وانتم بخير والى اللة اقرب وعلى الطاعة ادوم ..الاخ الكريم مشكلتك مشكلة شائعة واحنا تعرضنا لها السنة اللى فاتت بس السبب كان انناقدمنا على الاشتراك فى الباص بعد استيفاء العدد المطلوب للباصات الخاصة بمنطقتنا وعبثا حاولنا انهم ياخدو الولد ابدا واضطر باباة يودية ويجيبة اسبوعيين كان حاسس انهم سنتين ولحد ما ربنا اكرمنا ولقينا ميكرباص خاص بيودى العيال ويجيبهم واتفقنا معاة والحمد للة كان احسن من باص المدرسة امين وحريص على الولاد اكتر من سواقين المدرسة نفسها

والحل بالنسبة لبنت حضرتك انك تشوف تاكسى مخصوص من اللى بيجيب الولاد ويوديهم ويكون ابن حلال ويوصلها لحد البيت او ميكروباص خاص برضة والموضوع دة منتشر جدا وربنا يوفقكم وان شاء اللة المشكلة تتحل

[noureymo]

شكرا جزيلا على رد حضرتك بس تخيلي ان كل الي حضرتك قلتيه في مشاركتك انا حليتهولها وانا بكلمها

البنت الصبح هتروح عند خط السير الطبيعي للباص ما متها هتوديها وتركبها وبعدين تطلع على شغلها

وبعد الضهر البنت اصلا بتنزل اخر واحدة في الباص وده من السنة الي فاتت

تخيلي حضرتك ان الفرق اصلا بين البيت القديم والجديد والله اربع دقايق لصالح البيت الجديد يعني فيه وفر في الوقت وكمان على الشارع الرئيسي مش هيدخلوا في شوارع جانبية

بصراحة نفسي انزل مصر للمشرفة دي

[noureymo]

السلام عليكم وكل عام وانتم بخير والى اللة اقرب وعلى الطاعة ادوم ..الاخ الكريم مشكلتك مشكلة شائعة واحنا تعرضنا لها السنة اللى فاتت بس السبب كان انناقدمنا على الاشتراك فى الباص بعد استيفاء العدد المطلوب للباصات الخاصة بمنطقتنا وعبثا حاولنا انهم ياخدو الولد ابدا واضطر باباة يودية ويجيبة اسبوعيين كان حاسس انهم سنتين ولحد ما ربنا اكرمنا ولقينا ميكرباص خاص بيودى العيال ويجيبهم واتفقنا معاة والحمد للة كان احسن من باص المدرسة امين وحريص على الولاد اكتر من سواقين المدرسة نفسها

والحل بالنسبة لبنت حضرتك انك تشوف تاكسى مخصوص من اللى بيجيب الولاد ويوديهم ويكون ابن حلال ويوصلها لحد البيت او ميكروباص خاص برضة والموضوع دة منتشر جدا وربنا يوفقكم وان شاء اللة المشكلة تتحل

شكرا يا ام بودي وجزاك الله خيرا وكل عام وانتم بخير

حضرتك الفكرة الي طرحتيها ممتازة طبعا بس طبيعة المدرسة ومكانها ما يخليش ان يكون في هناك ميكروباصات ممكن تعمل الخدمة دي وهو ده الي خلاني اكتب المشكلة دي علشان خلاص تقريبا مش عارف الاقي حل

المدرسة في التجمع الخامس والبنت في اول المعادي من ناحية الكورنيش ودي مسافة مش قليلة

بس اكيد في حد عنده المشكلة دي زينا وهندور ما هو ده الحل الوحيد لحد دلوقت

بس انا يما كتبت الموضوع ده كان قصدي اعمل ايه مع الاستادة المشرفة بعد الطريقة الي اتكلمت بيها وهل الموضوع يستدعي النزول لمصر يوم واحد بس اروحلها المدرسة وانشالله بعدها احول للبنت حتى لو هتيجي هنا

انشاء الله هي السنة دي وبعدين تانية ابتدائي هتيجي هنا لو كان في نصيب

مرة تانية شكرا جزيلا وربنا يكرمكم جميعا