هل كل من تربى في مستوى اجتماعي متواضع يجب ان يفقد الأدب؟

[MZohairy]

احيانا يوجد في مجتمعاتنا خلط بين بعض الألفاظ مثل

ابن ناس و ابن حلال و ابن بلد و ابن ذوات

و حقيقة اجد خلطا كبيرا بين زيادة او نقص المال و نقص او زيادة الأخلاق و الأدب

و السؤال هنا

هل كل من نشأ نشأة اجتماعيه متدنيه و فقيره و بين ابوين جاهلين و يمتهنا مهن متواضعه يجب ان يكون فقير الأدب ايضا ؟

أم من الممكن ان تثمر هذه الظروف عن انسان متربي و ابن حلال؟

هل البيئه الاجتماعيه المتدنيه يمكن ان تعطي انسان او انسانه متربيه؟

رمضان كريم

[ozoozo]

طيب ماقولتش انت رايك الاول ياستاذ زهيري

[الحازم حسن]

ارادة الانسان هي من تصنعه

والفقير ذو المستوى الاجتماعي المتواضع لديه الدافع والحافز للرقى أكتر من ولاد الذوات

[elfakhrany]

فكرت كتير فى اجابة السؤال ده .... والاجابه أعتقد ان فقدان الأدب يأتى نتيجة البيئة المحيطه

[عنبو]

اولا السلام عليكم ورحمة الله وبركاته

رمضان كريم وكل عام وانتم بخير

هل كل من نشأ نشأة اجتماعيه متدنيه و فقيره و بين ابوين جاهلين و يمتهنا مهن متواضعه يجب ان يكون فقير الأدب ايضا ؟

أم من الممكن ان تثمر هذه الظروف عن انسان متربي و ابن حلال؟

طبعاً ممكن وممكن العكس كمان ممكن شخص ينشأ فى بيئه محترمه ويطلع عيل اى كلام ومش محترم اصل موضوع التربيه ده بيدخل فيه كذا حاجه ممكن تلاقى اب دخله على قده بس تلاقيه مربى عياله على القناعه وانهم ميبصوش لحاجة غيرهم خالص والعكس ممكن تلاقيه

[عاشق الترحال]

هل كل من تربى في مستوى اجتماعي متواضع يجب ان يفقد الأدب؟

أكيد لأ والدليل أن فيه ناس كتير ولاد ناس غلابه وأهاليهم تعبت في تربيتهم وصرفوا عليهم دم قلبهم بالحلال وباللي يرضي ربنا وعلشان كده ربنا كرمهم في عيالهم وبقوا دكاتره ومهندسين ونماذج مشرفه وناس محترمه ومؤدبه .

وعلى العكس ياما كان فيه ناس تربت ونشأت في مستوى إجتماعي رفيع وطلعوا عيال ماسخه ومتدلعه ومشوا في طريق المخدرات وانحرفوا بلا عوده .

يعني قصد كلامي أن مش قاعده للحكم على اللي نشأ في مستوى إجتماعي متواضع أنه يفقد الأدب .

والمثل بيقول يخلق من ظهر العالم فاسد ومن ظهر الفاسد عالم .

[Alshiekh]

و حقيقة اجد خلطا كبيرا بين زيادة او نقص المال و نقص او زيادة الأخلاق و الأدب

و السؤال هنا

هل كل من نشأ نشأة اجتماعيه متدنيه و فقيره و بين ابوين جاهلين و يمتهنا مهن متواضعه يجب ان يكون فقير الأدب ايضا ؟

أم من الممكن ان تثمر هذه الظروف عن انسان متربي و ابن حلال؟

هل البيئه الاجتماعيه المتدنيه يمكن ان تعطي انسان او انسانه متربيه؟

رمضان كريم

استاذ زهيرى

سؤالك او اسئلتك لايمكن ان تصاغ بهذا الشكل وان اتجد الاجابة بهذه السهولة.

اذكرك بمثل شعبى يلخص الاجابة :

" يخلق من ظهر العالم فاسد ويخلق من ظهر الفاسد عالم "

وطبعا كما تعلم المقصود بـ " عالم " هو عالم الدين.

فليس من الحكمة او من المنطق وضع كل المتغيرات البيئية فى سلة واحدة مع اغفال العامل الاهم الا وهو الشخصية نفسها.

كم من شخصيات عظيمة جائت من اسر متواضعة ماديا وربما اخلاقيا وبيئيا ، وكم من اناس تافهة اضاعات سمعة اسرها العريقة الغنية .

من خلال رحلة حياتى قابلت نماذج كثيرة ومتعددة تثبت وجهة نظرى.

[سهل جدا]

إذا كنت تقصد بالأدب. الإتيكيت الغربي.. فربما يكون عندك حق

وإذا كنت تقصد بالأدب .. صفات الرجولة والأخلاق العالية..

فأنا حقيقة أراها أكثر في الطبقات الفقيرة..

قابلت وتعاملت وصاحبت أشخاص من أعلى الطبقات الراقية.. ولاحظت إنه يوجد عند أكثرهم بعض الصفات المحمودة.. مثل النظام والنظافة والشياكة وانتقاء العبارات التي فيها مجاملة (وقد تكون بنفاق أحياناً) ...

بالإضافة إلى طغيان الكلمات الغربيّة الشيك في كلامهم مثل..

(ميرسي- كوووول - دادي - مامي-...)

أمّا الأخلاق العالية التي تجبر الإنسان على أن يثق في صاحبها أشدّ الثقة.. ويأتمنه على جميع أسراره فلم أجدها بغزارة إلا في الطبقات المتدنية مادّياً وربّما علميّاً .

الشهامة والرجولة والغيرة والتفاني في خدمة الآخرين والكرم و...

وطبعاً الحكم للأعم الأغلب.. يوجد نماذج مختلفة من الفريقين ..

ملحوظة

أخوك سهل جدا رجل محايد.. من الطبقة المتوسطة.. لا من هذه ولا من هذه..

وبالرغم من إني "ضاضي" الله يرحمه (أقصد أبويا B) ) لم يُكمل تعليمه..

إلا أنه كان في قمّة الرجولة والشهامة والأخلاق.. بشهادة جميع أصدقائه الذين يعاملونني أنا وإخواني حتى الآن بكل ودّ واحترام، بسبب خدمات والدي وفضائله عليهم والتي لم ينسوها.. بالرغم من مرور 20 سنة على وفاته..

[التونسى]

اكتساب الادب ..والتحلى بالاخلاق ...لا بالفقر ...ولا بالغنى ... ((عالأصل دور)) .. مع الاعتذار لسمير غانم فى مسرحية المتزوجون

[mandoo]

إذا كنت تقصد بالأدب. الإتيكيت الغربي.. فربما يكون عندك حق

وإذا كنت تقصد بالأدب .. صفات الرجولة والأخلاق العالية..

فأنا حقيقة أراها أكثر في الطبقات الفقيرة..

قابلت وتعاملت وصاحبت أشخاص من أعلى الطبقات الراقية.. ولاحظت إنه يوجد عند أكثرهم بعض الصفات المحمودة.. مثل النظام والنظافة والشياكة وانتقاء العبارات التي فيها مجاملة (وقد تكون بنفاق أحياناً) ...

بالإضافة إلى طغيان الكلمات الغربيّة الشيك في كلامهم مثل..

(ميرسي- كوووول - دادي - مامي-...)

أمّا الأخلاق العالية التي تجبر الإنسان على أن يثق في صاحبها أشدّ الثقة.. ويأتمنه على جميع أسراره فلم أجدها بغزارة إلا في الطبقات المتدنية مادّياً وربّما علميّاً .

الشهامة والرجولة والغيرة والتفاني في خدمة الآخرين والكرم و...

وطبعاً الحكم للأعم الأغلب.. يوجد نماذج مختلفة من الفريقين ..

ملحوظة

أخوك سهل جدا رجل محايد.. من الطبقة المتوسطة.. لا من هذه ولا من هذه..

وبالرغم من إني "ضاضي" الله يرحمه (أقصد أبويا B) ) لم يُكمل تعليمه..

إلا أنه كان في قمّة الرجولة والشهامة والأخلاق.. بشهادة جميع أصدقائه الذين يعاملونني أنا وإخواني حتى الآن بكل ودّ واحترام، بسبب خدمات والدي وفضائله عليهم والتي لم ينسوها.. بالرغم من مرور 20 سنة على وفاته..

تعجبت لك ياعم سهل .... سعادتك بتقول الطبقات الفقيرة تتمتع بصفات الرجولة والأخلاق العالية ....والطبقات الراقية يتمتعون بالصفات المحمودة مثل النظام والنظافة والشياكة وإنتقاء العبارات .... أولا ياعم سهل كنت أتوقع أن تستشهد بالإسلام وكيف كان رسول الله صلى الله عليه وسلم نبيا أميا ولكن علمه ربه فأحسن تأديبة ..... وإنك لعلى خلق عظيم .... ثانيا .... لكل قاعدة شواذ .... يعنى ممكن سعادتك تلاقى ( عربجى ) ومؤدب جدا .... وتلاقى مهندس أو دكتور مؤدب برده جدا ... لكن فى الحالة الأولى سوف تدهش من أدب وأخلاق العربجى .... ولن تعلق على أخلاق وأدب المهندس او الدكتور ... لأنه من المنطقى أن يكون المنهدس والدكتور على خلق وأدب وعلم.

طيب لو عكسنا الآية يعنى العربجى قليل الأدب .... كلنا حنقول أصله عربجى ... هيجيب الأدب منين ....

وإيه رأيك لو كان المهندس أو الدكتور قليل الأدب ...ساعتها ناس كتير حتلتمس لهم العذر وتقولك لازم يكونوا كده ..... الله يكون فى عونهم .... بيتعاملوا مع أوباش ..

لكن ... أليس من الأفضل أن نتمسك بتعاليم ديننا الإسلامى والتى تدعوا الى الصفات المحمودة مثل النظام والنظافة والشياكة وإنتقاء العبارات....

تصور نسيت كنت عاوز أكتب إيه ! ياترى زهايمر ولا تأثير الدخان!

كل عام وانت طيب ولنا عودة بعد الإفطار .. مع كوب شاء بالنعناع وسيجارة ...

وهناك مقولة ( أصعب حاجة فى الدنيا إنك تكون مؤدب .... وأسهل حاجة فى الدنيا إنك تكون قليل الأدب ) ....

[MZohairy]

خليني اوضح اكتر

يعني لو واحده طلعت لقت ابوها قهوجي مثلا و والدتها خادمه في المنازل (مع بالغ احترامي لكل المهن)

بشكل عام و بصرف النظر عن وضع هذه الأسره المادي و الذي من الممكن ان يكون جيدا

اليس من الممكن ان تنتج لنا اسره كهذه بنت متربيه أم هذا احتمال ضعيف؟

و هل ترضى تجوزها ابنك مثلا؟

تم تعديل 22 أغسطس 2009 بواسطة mzohairy

[Alshiekh]

خليني اوضح اكتر

يعني لو واحده طلعت لقت ابوها قهوجي مثلا و والدتها خادمه في المنازل (مع بالغ احترامي لكل المهن)

بشكل عام و بصرف النظر عن وضع هذه الأسره المادي و الذي من الممكن ان يكون جيدا

اليس من الممكن ان تنتج لنا اسره كهذه بنت متربيه أم هذا احتمال ضعيف؟

و هل ترضى تجوزها ابنك مثلا؟

برضه ماينفعش نخلط الملوحية بالكرواسون ، الاثنين طعمهم حايضيع.

احتمالات ان البنت تكون متربية دى تعتمد على هل ياترى القهوجى او المكوجى والشغالة متربيين وعرفوا يربوا بنتهم ام لا ، فليس كل قهوجى صايع وليست كل شغالة اخلاقها مش ولابد.

القهوجى والشغالة يكسبون من كدهم وتعبهم واشغالهم هى من الوظائف او الاعمال الشريفة والتى تعتبر افضل الف مرة من التسول او مد اليد.

ربما تقصد ابناء الشوارع الذين لايعرف لهم اب او ام ، او معروف ابائهم وامهاتهم ولكنهم متربيين فى الشارع وبالطبع هؤلاء فئة لايمكن القياس على سلوكياتها.

أما فى موضوع الزواج فالامر مختلف.

الزواج ليس شاب وشابة والسلام ، ولكنه نسب وعائلات ، ومين حايبقى عم الاولاد ومين خالهم ومين حايكونوا نسايبك.

اعتقد ان كونى احترم واقدر مكوجى او سمكرى او قهوجى لايعنى بالضرورة ان اقبل ان ازوج بنتى او ابنى له او لاولاده.

[Tolbas]

بصراحة موضوع الادب ده انا شايف انه نسبي و موجود في كل فئات الشعب

يعني الفقير لو عاوز يرضي غريزته هيعاكس وحده في الشارع و اخره يلمسها

و لو اتمسك شوفوا هيحصله ايه :h!!!h:

لكن ابن الزوات الي معاه عربية هايحاول بشتي الطرق مع البنت و قدامه مليون طريقة عشان يتعامل مع الموقف

و لو شتمته ممكن يطلع مسدس و يضربها و لو لمت عليه الناس هيقول دي مجنونه ,معقوله؟؟انا فلان ابن حولان ابص لوحده بيئه زي دي؟؟؟؟

و لو ندهت العسكري طبعا طبعا و طبعا كمان مرة هتطلع هي الي غلطانه

حضرتكم الانحلال الاخلاقي موجود في كل فئات الشعب

بس احنا لنا الظاهر (interface)

مثال بسيط :

اتنين فقرا بيشربوا مخدرات و في نفس الوقت في اتنين ولاد عز بيشربوا مخدرات في الحي الراقي الناحية التانية

طبعا الفقرا هيتمسكو عشان في الشارع

لكن ولاد العز محدش حيشفهم عشان دول في شقة واحد فيهم

و حته لو في الشارع و البوليس مسكهم ,الموضوع حيخلص بتليفون زوغنن :h!!!h:

اما بالنسبه للالفاظ البزيئه فحدث ولا حرج

و متقنعنيش يعني ان ولد صبي ميكنانيكي طالع عين الي جبوه هيسمع سيلين ديون

او هيتكلم برقة مع الناس و هيبقي جنتل

استحاله يحصل ده لو عرفتوا ازاي الاسطة بتاعه بيعامله او الزباين بتتكلم معاه ازاي

المنطقي انه يبقي جنتل مان و لو خبط في حد يقولو اووه ام سو سوري؟

طب هات الولد ده كده!!,و علمه و اهتم بيه و اديله مصروف كويس و مشيه في شوارع نضيفة و شوفه بعد كده

و اكيد ابوه راجل غلبان مش فاضيله عشان يعلمه الصح من الغلط

و قالك انزلو الشارع هو اللي يربيه

كل الي احنا شايفينه ده طبيعي جدا و منطقي

[MZohairy]

انا شايف ان الانسان اللي عايز يغير من نفسه حيغير من نفسه

محمد عبد الوهاب مولود في باب الشعريه

و في احدى حاراتها كمان

و مع ذلك اصبح مطرب الملوك و الامراء

و بالتأكيد مكانش بيتخاطب مع الملوك و الامراء بنفس لغة خطابه في باب الشعريه

لكنه أراد التغيير و تغير

[Tolbas]

انا شايف ان الانسان اللي عايز يغير من نفسه حيغير من نفسه

محمد عبد الوهاب مولود في باب الشعريه

و في احدى حاراتها كمان

و مع ذلك اصبح مطرب الملوك و الامراء

و بالتأكيد مكانش بيتخاطب مع الملوك و الامراء بنفس لغة خطابه في باب الشعريه

لكنه أراد التغيير و تغير

هو حضرتك مش غير نفسه بالمعني الكامل

بس هو كان عنده موهبه و تعب عشان يوصل

و عشان يوصل و يظهر قدام الناس مكنش ينفع يتعامل معاهم بطريقة باب الشعرية

و الناس الي حوليه علموه

كمان ايام عبد الوهاب مكنش في انحدار اخلاقي بالصوره الي شايفنها اليومين دول

و كان في ادب في التعامل بين كل فئات عشان مكانش فيه الفجوة الطبقية الموجوده حاليا

و كان لسه الذوق العام مرتفع نسبيا

لكن انا مع حضرتك ان الانسان اللي عايز يغير من نفسه حيغير من نفسه

لكن لو جت الفرصة المناسبه :h!!!h:

[sohagy]

فى فرق بين المستوى الثقافى للفرد ومستواه الأجتماعى والأخلاقى بمعنى فى دكاترة كتير ومهندسين وناس ذو مراكز مرموقة فى المجتمع بس مولودين فى مناطق شعبية وحوارى وعايشين فيها لحد دلوقتى فمستواه الثقافى والتعليمى مرموق بس الأخلاقى ممكن يبقى انسان محترم جدا بس اكيد عنده قاموس من الشتائم الشعبية المحفورة فى ذاكرته اكيد هيستعملها عند اللزوم هو طبعا حاليا فى مجتمعنا الشتائم فى لسان الكل بس فى المناطق الشعبية نسبتها اكبر اما بالنسبة للناس التى تعمل بمهن متواضعة او كما نطلق عليهم حرفيين فدول صعب قوى تلاقى حد محترم فيهم وانا فى عملى باختلط ببعض العمال والحرفيين الناس دى بتهزر مع بعض بالشتيمة ومش اى شتيمة دى شتيمة بالأب والأم وعادى جد بالنسبالهم وعلى فكرة بعضهم ممكن ربنا يفتح عليه ويبقى معاه فلوس ويسكن فى منطقة راقية بس أكيد مش هيتغير كتير لان اصله هيفضل مسيطر عليه

تم تعديل 31 أغسطس 2009 بواسطة sohagy

[زعلان]

اظن ان هناك فارق كبير بين المستوى الاجتماعي و الادب و الاخلاق فالمستوى لااجتماعي ليست بالضرورة دليل على الادب و الاخلاق سلبا او ايجابا

كل ما كان المستوى الاجتماعي افضل كل ما كان اسهل في التعامل