ابحث عن زملائك . جيرانك . تعارف

[goold]

hg)::

اية رأيكم ممكن اوى هنا نسأل او نبحث عن زملاء الدراسة او العمل او حتى جيران ممكن نتلاقى هنا ونتذكر بعضنا فكثير منا اخذته الغربه من جيرانه ومن زملائه وتفرقنا ولا ندرى اين ذهب كل واحد منا .

انا واحدة من الناس سافرت ولما رجعت مصر وجدت اعز زميله لى تركت منزلها ولا ادرى اين ذهبت وحتى بتها اصبح مكانه عمارة اخرى

وبحثت على اسمها عن طريق دليل التليفون وجدت تليفون باسمها فى مصر الجديدة ولكن لايعمل

ممكن نذكر اسم المدرسة او الكليه او الحى ...

بس ياخسارة انا كنت فى مصر حتى الثانوية واكملت الكلية بالخارج ..

لكن مش مشكلة أحد كان فى كلية البنات الثانوية ال بالعباسية فى الفترة من 79

او كان فى مدرسة العباسية الاعدادية للبنات فى ش احمد سعيد

او فى مدرسة النباتات الابتدائية المشتركة ال امامها عمارات الظباط

نفسى التقى مع اصدقائى مش نسياهم .

[صعيدي]

طيب ممكن أبدا بالسؤال

فى اى زميل هنا من خريجى كلية هندسة البترول والتعدين بالسويس

[homer]

أقتصاد ينفع؟

[se_ Elsyed]

في حد هنا غير حشيش خريج تجارة عين شمس دفعة 98/90 إلى 92/93 .. بس مايكونش مدبلر mfb:

[Arabisc]

في حد هنـــا كان في أبـــها ؟؟

خصـــوصا ... في الثمانينات

[se_ Elsyed]

في حد هنـــا كان في أبـــها ؟؟

خصـــوصا ... في الثمانينات

آه في الوقت ده انا كنت في إبتدائي ....

إيه يا عم ده ده انت قديم قوي !!!!

أرابيسكو ... هي أبها كانت موجودة في الثمانينات ؟

قصدي يعني كان في كائنات موجودة غير القرود اللي لسه مستوطنة هناك لحد دلوقت ;) ؟

[Arabisc]

في حد هنـــا كان في أبـــها ؟؟

خصـــوصا ... في الثمانينات

آه في الوقت ده انا كنت في إبتدائي ....

إيه يا عم ده ده انت قديم قوي !!!!

أرابيسكو ... هي أبها كانت موجودة في الثمانينات ؟

قصدي يعني كان في كائنات موجودة غير القرود اللي لسه مستوطنة هناك لحد دلوقت :angry: ؟

سي السيــد باشا

مش قديم قوي يعني ;) !

عشنا ما بين أبها و خميس مشيط من 80 ل 88

أنا كنت في الفــهد الثانوية الى سنة 1988 و بعد كدة رجعت مصر

كانت من أجمل أيام العمر بصراحة :angry:

على كدة أكيد رحت السودة و دلغان و جبت التموين من الحناوي و سهرت لك كام مرة على الحزام في الضباب أو الجبل !!

اييييييه دنيا

[mb14]

يا حماعة فيه حد خريج علوم اسماعيلة

[Sharkiah]

يا حماعة فيه حد خريج علوم اسماعيلة

هل إنت من الإسماعيليه ؟؟؟؟؟؟؟؟؟؟؟؟؟؟

[mb14]

الاخ شرقية

انا مش من الاسماعيلية بس عشت فيها احلى الايام 6 سنوات الدراسة وبعدها سنتتين

[Sharkiah]

الاخ شرقية

انا مش من الاسماعيلية بس عشت فيها احلى الايام 6 سنوات الدراسة وبعدها سنتتين

ياخساره

عموما أنا كمان مش من الإسماعيليه ، أنا بس إستبشرت وقلت يمكن أقابل واحد إنتماءه الكروى "دراويشى" زى حالاتى

ألف أهلا وسهلا بك على كل حال ، وياريت توفق فى العثور على من تبحث عنهم

[فــيــروز]

معقوله !!

بعد كل هذا الحب للنادى الاسماعيلى حضرتك تطلع مش اسماعيلاوى !! غريبه جدا طيب ليه كل هذا الحماس للاسماعيلى !! يمكن بقى فى باب الرياضه اعرف الموضوع ده حتى لا يخرج الموضوع عن هدفه الاساسى

[Mohammad Abouzied]

hg)::

اية رأيكم ممكن اوى هنا نسأل او نبحث عن زملاء الدراسة او العمل او حتى جيران ممكن نتلاقى هنا ونتذكر بعضنا فكثير منا اخذته الغربه من جيرانه ومن زملائه وتفرقنا ولا ندرى اين ذهب كل واحد منا .

انا واحدة من الناس سافرت ولما رجعت مصر وجدت اعز زميله لى تركت منزلها ولا ادرى اين ذهبت وحتى بتها اصبح مكانه عمارة اخرى

وبحثت على اسمها عن طريق دليل التليفون وجدت تليفون باسمها فى مصر الجديدة ولكن لايعمل

ممكن نذكر اسم المدرسة او الكليه او الحى ...

بس ياخسارة انا كنت فى مصر حتى الثانوية واكملت الكلية بالخارج ..

لكن مش مشكلة أحد كان فى كلية البنات الثانوية ال بالعباسية فى الفترة من 79

او كان فى مدرسة العباسية الاعدادية للبنات فى ش احمد سعيد

او فى مدرسة النباتات الابتدائية المشتركة ال امامها عمارات الظباط

نفسى التقى مع اصدقائى مش نسياهم .

مش ممكن قبل كدا بشوية لان زوجتى سيدة كانت في كلية البنات القبطية فعلا وكانت ساكنة في شارع رمسيس في عمارة عبد الله سامي بتاع الاثاث وقريبة جدا من نجف بتاع الفول والطعمية اعتقد كانت خريجة 76 او 75 مش متأكد لكنها دخلت كلية رمسيس بعد كدا وكملت بكلوريوس تجارة في معهد التعاون

[Sharkiah]

معقوله !!

بعد كل هذا الحب للنادى الاسماعيلى حضرتك تطلع مش اسماعيلاوى !! غريبه جدا طيب ليه كل هذا الحماس للاسماعيلى !! يمكن بقى فى باب الرياضه اعرف الموضوع ده حتى لا يخرج الموضوع عن هدفه الاساسى

أنا وغيرى كثيرين يافيروز بنعشق نجيله ملعب الإسماعيلى وأسمنت مدرجاته كمان رغم إننا لانمت بصله للإسماعيليه المحافظه ، يمكن الإسماعيلى هو النادى الوحيد ـ بخلاف الأهلى والزمالك طبعا ـ إللى بينفرد بالظاهره دى

عموما علشان مانخرجش من الموضوع

حد كان فى الأورمان الإعداديه أو الأورمان الثانويه ؟

حد من سكان الدقى أو المهندسين أو من أعضاء نادى الصيد ؟

حد كان مواظب على صلاه الجمعه فى الثمانينات وبدايه التسعينات مع الدكتور عمر عبد الكافى فى مساجد الحسن وبابل وأسد بن فرات ؟

طب حد كان بيحب ياكل سندوتشات من عند نعمه ويحلى رزبلبن بالجيلاتى من عند السلطانيه فى العجوزه ؟

[فــيــروز]

حد كان فى الأورمان الإعداديه أو الأورمان الثانويه ؟

حد من سكان الدقى أو المهندسين أو من أعضاء نادى الصيد ؟

حد كان مواظب على صلاه الجمعه فى الثمانينات وبدايه التسعينات مع الدكتور عمر عبد الكافى فى مساجد الحسن وبابل وأسد بن فرات ؟

طب حد كان بيحب ياكل سندوتشات من عند نعمه ويحلى رزبلبن بالجيلاتى من عند السلطانيه فى العجوزه ؟

انا كنت فى مدرسة الاورمان الثانويه للبنات

اللى جنب بيت السادات

واتخرجت من كلية الهندسه قسم كهربا دفعة 97

وساكنين فى المهندسين وباشجع كل منتجات نعمه وزمان كنا بنجيب من عند ابو ظريفه

[Pianist]

Arabisc

في حد هنـــا كان في أبـــها ؟؟

خصـــوصا ... في الثمانينات

أنا كنت في خميس مشيط و أبها في الفترة دي و حتى أوائل التسعينيات B) و كنت في ثانوية الفيصل في خميس مشيط

على كدة أكيد رحت السودة و دلغان و جبت التموين من الحناوي و سهرت لك كام مرة على الحزام في الضباب أو الجبل !!

يا باشا هو في حد من اللي عاشوا في أبها ماكانش بيروح الأماكن دي؟ هايروحوا فين تاني؟ hg)::

[Sharkiah]

حد كان فى الأورمان الإعداديه أو الأورمان الثانويه ؟

حد من سكان الدقى أو المهندسين أو من أعضاء نادى الصيد ؟

حد كان مواظب على صلاه الجمعه فى الثمانينات وبدايه التسعينات مع الدكتور عمر عبد الكافى فى مساجد الحسن وبابل وأسد بن فرات ؟

طب حد كان بيحب ياكل سندوتشات من عند نعمه ويحلى رزبلبن بالجيلاتى من عند السلطانيه فى العجوزه ؟

انا كنت فى مدرسة الاورمان الثانويه للبنات

اللى جنب بيت السادات

واتخرجت من كلية الهندسه قسم كهربا دفعة 97

وساكنين فى المهندسين وباشجع كل منتجات نعمه وزمان كنا بنجيب من عند ابو ظريفه

يمكن بعد كل ده يافيروز نكتشف إننا وجوهنا على الأقل مألوفه ، الدنيا ضغيره وإحنا طلعنا أهو سكان حى واحد ، بس إنتى أختى الصغنونه إللى إتشرفت بمشاركتها لإنتمائى الجغرافى والسكنى ، وبمناسبه أبوظريفه ـ إللى أمام سور نادى الترسانه ـ هو أخباره إيه دلوقت بالمناسبه بعد مانفق ميت عقبه سدها عليه وبعد ما التابعى الدمياطى فتح فى ميدان مصطفى محمود وأكيد شد منه الزبائن ؟ أنا كان لى واحد صاحبى أيام الشقاوه كان زملكاوى وتملى ياخدنى لأبوظريفه ده بعد مانلعب كوره وبسم الله ماشاء الله لما تكون نفسه مسدوده ومتضايق ومش فى الفورمه يقوم بسبعه أو ثمانيه سندوتشات إنما لما يكون معنوياته مرتفعه إحسبيها إنتى بأه ، وكان فى عند أبوظريفه سندوتش إسمه "ديناميت" علشان كانوا بيحطوا فيه الفول على الطعميه على الباذنجان كله على بعضه ، المهم كل إللى بحكيه ليكى ده وأنا لم ولن أتذوق لا الفول ولا الطعميه لأن ربنا إبتلانى "بالفافيزم" لو تسمعى عنه ، وده يمنعنى من أكل الفول نهائيا ، شوفتى الذل ، بس بجد يااااااااااااااااااااه التوبك ده جميل بشكل وألف شكر للى فتحه على فكرته ، الواحد جتته قشعرت وهو بيكتب ويجتر الذكريات مع بنت حتته المثقفه إلى من خيره عضوات المحاورات ، صحيح شباب وشابات الدقى والمهندسين دول أجدع ناس ، لأ وكمان طلعتى أورمانجيه ، تبقى علطول كده بدون نقاش شخصيه وثقافه وأخلاق وأصل وحسب كله ISO 900 ، أوعى تكونى بتجيبى الكباب من أبوشقره بتاع ميدان مصطفى محمود ، ده بس منظر على الفاضى ، جربى العربى الكبابجى بتاع العجوزه ، ريحه زمان وتتبيله زمان وعبق التاريخ مع كل حته كباب وكفته وطورشى وسلطه طحينه معاهم ، وطلبات البيت بتجيبوها منين ؟ من أبوذكرى بتاع محى الدين أبو العز ولا من الهوارى بتاع شارع السودان ؟ ولا بتستسهلى وتجيبيها من مترو وخلاص ؟ أما أجمل حلويات فإتكلى على الله وهاتيها من العبد بتاع شارع مصدق وإنتى هاتدعيلى ، خاصه السبوسه بالبندق ، بس بذمتك التأليف إللى عمالين يألفوه فى إتجاهات الشوارع ده مش بيجيب لك القهر ؟ وكم القبح إللى بيسدوا بيه الشوارع الجانبيه بالحجاره بصوره ومنظر بشع علشان يجبروا الناس على إتجاه واحد مش بيخليكى تتحسرى على جمال شوارع زى جامعه الدول العربيه وشهاب ومحى الدين أبو العز زمان ؟ مين الكفتجيه إللى بيسلموهم تخطيط وتعديل الشوارع دول ، أنا مش فاهم

آآآآآآآآآآآآه صحيح قبل ما أنسى ، بتروحى تشربى فخفخينا عند فرغلى بتاع جامعه الدول ؟ أنا بأه فرغلى حضرته أيام ماكان محل صغير على قده فى ميدان الدقى ، ياترى لسه موجود ؟ والمقله إللى جنبه كان عندها أطعم لب سوبر فيكى يامصر ، وفرغلى القديم ده على فكره كان عصير القصب بتاعه هايل ، كان على أيامنا فى الجامعه والله بشلن وببريزه ويادوب لما غلى بقى بخمستاشر قرش ، وفى محل سندوتشات على صف المدرسه الألمانيه قبل منها علطول إسمه سمسمه ، عليه حته دين سندوتش كبده إسكندرانى من إللى يستاهل بقك والله ، وأفندينا بتاع الكشرى إللى تحت كوبرى الدقى ، ياسيدى على الطبق اللوكس بتاعه ، حاجه كده بنج

أظن كده أنا ما خرجتش عن الموضوع ، بل إستغليته الإستغلال الأمثل ، وإستعدت ذكريات مخليانى حاسس إنى باأحلق فى السماء وأنا باأكتب

على فكره جربى كمان صلوات الجمعه والتراويح فى رمضان فى مسجد السليمانيه ، تعرفيه ؟ فى عماره السليمانيه إللى قدام نادى الصيد إلى تحتها البنك التجارى الدولى والمغربى ، المسجد عباره عن دور كامل فى الدور الأول ـ بعد الأرضى ـ شقه يمين للسيدات وشقه شمال للرجال والخطيب شاب صغير فى السن إسمه على عبد الفتاح ـ طلع كام مره فى برنامج يالا ياشباب بتاع الmbc ـ بسم الله ماشاء الله علم إيه ولباقه إيه وفصاحه إيه وخشوع إيه ، ربنا يكثر من أمثاله

طبعا أرجو من كل من سيعثروا على جيران مثلى أو أصدقاء أو زملاء مدارس ألا يأخذوا الأمر بنوع من الحساسيه المفرطه وألا يقعوا فريسه سهله للغيره المدمره والحقد الأعمى وأن يتعاملوا مع الأمر بواقعيه شديده ، فالدقى والمهندسين هما دره أحياء مصر على مر العصور وأهلهما هم خيره الناس من نوابغ البلد وقد يحتاج الأمر منا إلى صفحات وصفحات لتغطيه هذا الجانب الثرى من مصر المحروسه ، أما وإذا أضفنا للأمر الإنتساب والتخرج من الأورمان بالإضافه لذلك فنحن إذا بصدد حاله unique

سلمى لى على كل الأماكن دى يافيروز لو سمحتى ، ماتستغربيش هم كلهم جماد بس زى مايكونوا فى دم الواحد ، عارفه الرسول صلى الله عليه وسلم كان متعلق وبيحب جبل أحد قد إيه ؟

[فــيــروز]

عقلى الباطن بيقول : استاذ شرقيه شكله ساكن فى شارعنا وانا ماعرفش

ايه العظمه دى ;) ده حضرتك عارف المنطقه ما شاء الله تمام التمام .. اصل الجماعه هنا كلهم من نواحى مصر الجديده ومدينة نصر فبيحسسونى بالاغتراب

احنا فعلا كنا بنروح عند ابو ظريفه بعد ما نرجع من نادى الزمالك لاننا اعضاء فيه باعتباره الاقرب لسكننا

"يا رب محدش من الاهلاويه يسمعوا احسن شكلى هيبقى وحش وهيفهمونى غلط" gt:

بس فعلا ابو ظريفه مسكين بعد انشاء النفق الجديد و هجوم محلات الفول و الطعميه الشيك التى تتناسب مع الوضع الجديد رغم عدم جودة منتجاتها فى بعض الاحيان .. يااااااااه سبحان الله الانسان وهو جعان يبقى طعم سندوتش الفول او الطعميه فى بقه مساوى لطعم افخم اكله ..

المهم كل إللى بحكيه ليكى ده وأنا لم ولن أتذوق لا الفول ولا الطعميه لأن ربنا إبتلانى "بالفافيزم" لو تسمعى عنه

لا حول ولا قوة الا بالله العلى العظيم .. انا فعلا اول ما اشتغلت كان لنا زميل مش بيقدر خالص يشترك معانا فى اكل الفول و الطعميه بسبب المرض ده .. معلش ده ابتلاء من ربنا .. بجد كنت احيان كتيره اتضايق جدا و اقول طيب دى ريحة الطعميه مثلا صعب مقاومتها جدا يا ترى خالد -ده اسم زميلنا- بيعمل ايه ..

أوعى تكونى بتجيبى الكباب من أبوشقره بتاع ميدان مصطفى محمود

الصراحه ايوه ys): .. اصله كان الاقرب لمكان عملى السابق .. كان شغلى فى شارع البطل احمد عبد العزيز و ابو شقره فى جامعة الدول يا سلام فركة كعب .. ;)

وطلبات البيت بتجيبوها منين ؟ من أبوذكرى بتاع محى الدين أبو العز ولا من الهوارى بتاع شارع السودان ؟

الهوارى هو المفضل لدينا وساعات ابو ذكرى لاننا ساكنين بينهم .. يعنى واحد على اليمين و التانى على الشمال

وكمان الناس في الهوارى اكثر ذوقا فى التعامل وكمان ابو ذكرى بيقفل شارع احمد عرابى بالعربيات اللى بتقف فيه وكثيرا ما اتعجب لماذا لا يطارد المرور هؤلاء و يكلبش سياراتهم كما يفعل عند الهوارى !! انا باكره الكوسه جدا ..

وكم القبح إللى بيسدوا بيه الشوارع الجانبيه بالحجاره بصوره ومنظر بشع علشان يجبروا الناس على إتجاه واحد مش بيخليكى تتحسرى على جمال شوارع زى جامعه الدول العربيه وشهاب ومحى الدين أبو العز زمان ؟

كنت لسه هاقولها !! اختراع سد الشوارع بالحجاره لجعلها اتجاه واحد اجباريا وطبعا العقليه المصريه الجبببببببباره فى استغلال كل شئ و اى شئ و استغلال الفراغات الناتجه عن هذا السدد كاماكن انتظار للسيارات تزيد اختناق الشوارع الرئيسيه .. حسبنا الله ونعم الوكيل :) .. وكل كوم و الميدان اللى بقى فى آخر جامعة الدول عند التقائه مع شارع السودان .. صعب جدا عبور الشارع من غير ما ربنا يكرمك بست ازواج من العيون gt: زى النحل مثلا عشان تشوف كل الاتجاهات المفتوحه لقدوم السيارات

آآآآآآآآآآآآه صحيح قبل ما أنسى ، بتروحى تشربى فخفخينا عند فرغلى بتاع جامعه الدول ؟

الصراحه لا .. زمان ايام المدرسه كان ممكن ايام العيد اروح مع اصدقائى بس دلوقت صعب جدا .. للاسف الشديد شارع جامعة الدول مابقاش جميل زى زمان .. كله قلق .. rs:

على فكره جربى كمان صلوات الجمعه والتراويح فى رمضان فى مسجد السليمانيه ، تعرفيه ؟

لا دى اول مره اعرفه من حضرتك .. بس كتر الف خيرك لان فعلا صلاة التراويح فى المسجد هذا العام كانت عذاب .. مكان ضيق ومكشوف وحاجه تضيع اى ثواب الواحد ممكن يرجوه من الصلاه .. rs:

طبعا أرجو من كل من سيعثروا على جيران مثلى أو أصدقاء أو زملاء مدارس ألا يأخذوا الأمر بنوع من الحساسيه المفرطه وألا يقعوا فريسه سهله للغيره المدمره والحقد الأعمى وأن يتعاملوا مع الأمر بواقعيه شديده ، فالدقى والمهندسين هما دره أحياء مصر على مر العصور وأهلهما هم خيره الناس من نوابغ البلد وقد يحتاج الأمر منا إلى صفحات وصفحات لتغطيه هذا الجانب الثرى من مصر المحروسه ، أما وإذا أضفنا للأمر الإنتساب والتخرج من الأورمان بالإضافه لذلك فنحن إذا بصدد حاله unique

بجددد .. اصل الصراحه الواحد من كتر الزحمه بقى حاسس انه مفروض يتبرأ من منطقته رغم انى باحبها جدا ..

يا سلام الواحد كان محتاج الموضوع ده عشان يجدد حماسه لمنطقته وسبحان الله .. ينبغى ان نرى الاشياء عن بعد حتى ندرك جمالها !! rs:

عارفه الرسول صلى الله عليه وسلم كان متعلق وبيحب جبل أحد قد إيه ؟

هو كان بيقول عليه "هذا جبل يحبنا و نحبه"

بصراحه حب المكان هذا شعرت به بصوره غريبه حين سافرت البحرين من كام شهر .. والله وانا فى المطار اول ما اللوحه اللى بيتكتب عليها اسماء المدن ظهر عليها اسم Cairo حسيت انى هاعيط من السعاده .. رغم انها مجرد كلمه بتجرى على لوحه .. هيييييه جميل اوى الاحساس ده rs:

[Cleo]

حد هنا كان مدرسة الزهرات للغات - الكوربة فى الفترة من 81-87؟؟

[Sharkiah]

وكمان ابو ذكرى بيقفل شارع احمد عرابى بالعربيات اللى بتقف فيه

لا ياأفندم تلاقى بس حضرتك إتلخبطتى من تأثير سيل العواطف المتأججه فى هذا الموضوع ، تقصدى أبو ذكرى زباينه بيقفلوا شارع محيى الدين أبو العز (ولا يكونش فتح فرع جديد فى أحمد عرابى وأنا إللى لسه ماأعرفش وبأتكلم بثقه !!!!!)

طبعا الزحام الرهيب والضجيج وكل المنغصات إللى بتتكلمى عنها أنا موافقك عليها تماما ، أنا ساعات لما أكون فى مصر وأتأخر بره أرجع بالليل أفضل ألف حوالين البيت بالنصف ساعه بلا مبالغه علشان ألاقى مكان صف تانى أركن فيه ، بس والله متعه من متع الدنيا بالنسبه لى إنى بس أترجل فى الشوارع بتاعت الطفوله والصبا وأبص على المحلات القديمه إللى الحداثه والعولمه أخرجتها خارج دائره الأعمال لتطور أنشطتها المهنيه زى سباكين وكهربائيه وعجلاتيه كان زماااااااان الواحد بيتعامل معاهم وهو طفل ، وحتى محلات البقاله بتاعت زمان برضه ، والله كانت أيام جميله وكان حى جمييييييل ووهااااااااادى ، تعرفى يافيروز إن أصل المهندسين من أول بدايته عند تقاطعه مع الدقى فى المنطقه المعروفه بمدينه الأوقاف كانت أصلا مشاتل ، وأديكى شايفه الهجوم الخرسانى الكاسح عمل فيها إيه ووصلها لإيه ، وتلا ذلك إن 90 فى المائه من الفيلات تتهد ويقام مكانها أبراج أسمنتيه شاهقه وكل حدائق المنازل بقت دكاكين لحد ماوصلنا للحاله إللى إنتى بتتكلمى عنها ، بس برضه على قلب الواحد زى العسل ، أنا يمكن كل العواطف إللى بتتكلمى عنها لما شفتى كلمه Cairo ما بأحسش بيها قوى علشان جتتى نحست من كثره سفرياتى بس عشرأضعاف العواطف الجياشه دى بأحس بيها بعد وصولى للقاهره وخروجى من المطار وإقتراب السياره من نهايه كوبرى 6 أكتوبر عند منزل وزاره الزراعه ولا أستطيع أن أصف لك بأحس بإيه لما نخش على شارع نادى الصيد ومحى الدين أبو العز ونقترب رويدا رويدا من أماكن الصبا والطفوله ، رغم إن ربنا رزقنى ببعض الجيران ال.......... (ربنا يسامحهم) ، بس برضه ممكن آه أعيش فى مدينه جديده بعيد عن الضجيج إنما لا أتخيل يعدى على يومين تلاته على بعض من غير ما أروح منطقه الصبا والطفوله ولايمكن أستغنى عن سكنى فيها أبدا أبدا ، وأتحداكى لو قدرتى تعملى غير كده بعد زواجك بإذن الله ، على الأقل ربنا يحفظ لك ويخليلك الوالده الكريمه وتبقى تروحى تزوريها وتجترى الذكريات إن شاء الله

بس إسمعينى وإتكلى على الله وجربى العربى بتاع العجوزه وإنتى هاتعرفى الفرق بينه وبين أبوشقره ، هو كمان بيوصل للمنازل على فكره

بس ماقلتيش لى ، بتجيبوا الساندوتشات من بون أبيتى ولا من مؤمن ؟ فيه واحد هايل فتح جديد جنب نادى الصيد على صف عماره عمرو موسى إسمه على ماأتذكر كلوك دوور أو حاجه كده ، بس ساندويتشاته برضه تستاهل بقك

بصراحه إللى ماباأطيقهوش لما أصحابى بيجبرونى للذهاب له هو المقاهى الشبابيه بتاعت الروشنه إللى عماله تنتشر بشكل سرطانى فى كل شارع ، أنا أصلى مش مدخن وأكره رائحه الدخان ويبقى الواحد مخنوق من دخان الشيشه ، وآلمنى بشده أن أجد بنات فى العشرينات من عمرهن بيشيشوا (بس طبعا أكيد أغراب من مناطق تانيه مش منطقتنا العظيمه الISO rs: )

مستنيكى تجربى مسجد السليمانيه مره وتقولى لى رأيك

وعلى فكره فى جامع كبير ويحتوى على قسم كبير للسيدات إسمه جامع دعوه الحق فى ميدان بابل لو تعرفيه (تكسرى شمال من شارع مصدق عند لابوار تلاقيه فى وشك) والجامع ده بيروحه الدكتور صفوت حجازى لإعطاء درس أسبوعى على حسب ماسمعت من أختى

وأطيب تحياتى يابنت حتتى :)