الله معك -2-

[hemaya]

راجع بكره

ورجوعي هوه الأخير

لا تاني سفر

ولا تاني غربة

ولا إنسان بيعيش أسير

كل شيء أصبح تمام

الشنطتين والتذاكر

والجيوب فاضية بتعزف

لحن السلام

وغنوة غربة

بتقول اتقدم للأمام

واتقدمنا للأمام

حتي اننا راجعين

بأحزاننا وكلمة من بين الكلام

يالاه عشان ألحق

أنام

بكره خلاص يوم السفر

حبيبي عالشط البعيد

واقف بيحسب ف الساعات

جايبله فستانه الجديد

عارف

بيعشقني ف سكات

وصحيت علي صوت الغراب

قولت الأمل عمره ما غاب

وجريت علي شباك تذاكر مركبي

وغيري ألفين من البشر

الكل راجع من السفر

حتي المطر

ده فيش مطر

خدت البقية من حياتي

وشنطتين

وركبت مركب السفر

وبعد أكتر من ساعات

قرب خلاص حلمي اللي فات

قلبه معي والذكريات

وجملتين مع بعضنا

هو وأنا

دقت ساعات وقف القدر

غرقت مراكب السفر

والليل ونجمة بتحتضر

شاهدين علي غدر البشر

فعلا رجوعي ده الأخير

عمري تاني ما اكون أسير

حرية وقت الاحتضار

حرية الليل للنهار

واللي فاضل لك كلمتين

مني أنا

الله معك

19/08/2009