المصريون وعادة الإحتفاظ بالقديم

[se_ Elsyed]

قريباً إن شاء الله سيتم إفتتاح هذا التوبيك .... إحجز مقعدك من الآن ... أو إتصل على زيرو 900 أربع ستات لتربح كرسي قدام التوبيك لزق ... إتصل يا حاج إتصلي يا حاجة وماتضيعوش الفرصة fsh:: :lol: تم تعديل 9 ديسمبر 2003 بواسطة se_ Elsyed

[Guest Mohd Gramoun]

اربع ستات.....مرة واحدة....

فين فيروز؟؟؟

عموما التوبك جيد جدا و خاصة لسكان الادوار العليا الذين يرون اسطح البنايات المجاورة المنخفضة و كذلك لمعتادي الطيران ممن يجبرهم حظهم السئ علي مشاهدة القاهرة من الطائرة نهارا....

[فــيــروز]

مين بينادى !! :lol:

الحقيقه الموضوع من الاستفتاح اللى عامله س.س. واضح انه جذاب جدا :lol:

ومن كتر فضولى عشان اعرف الموضوع عن ايه اتكتمت وماسالتش ولا طلبت hint ولا أماره ولا اى حاجه بس نفسى اعرف الموضوع عن ايه؟ taz:: قول بقى يا س.س. خلينا نلبس العيال الهدمه الجديده و نبعتوا الافندى يحجز لوج :lol:

[أسد]

أسكن في الطابق العاشر .. على شارع رئيسي جداً جداً ... وحيوي للغاية بالقاهرة .

في العمارة المقابلة وهي عمارة مرتفعة أيضاً ...

يوجد أثنان من سكانها يحتفظون بأشياء قديمة في البلكونة ..

أشياء .. لا يمكن إستخدامها مستقبلاً ...

رجل ترابيزة ...

صناديق مياه غازية لم تعد موجودة (سيكو)

بالعربي ... مخلفات وليست أشياء قديمة ....

ويكسوها التراب بشكل يؤكد عدم إقتراب أي شخص من تلك الأشياء منذ أعوام ...

وبحكم سكني في طابق مرتفع نسبياً يسمح لي بمشاهد الأسطح ..

فأشاهد يومياً مناظر مروعة من المخلفات الموجودة علىالأسطح ...

سألت يوماً حماتي ... وكانت تحتفظ بأربعة أياد مقشة في البلكونة ...

لماذا ... ؟؟؟

قالت لي يمكن تتكسر أيد المقشة اللي موجودة فنستعمل واحدة منهم ...

قلت لها وهو انت عندك 4 مقشات ...

قالت لأ ...

سألتها أمال شايلة أربعة ليه ؟؟؟

قالت أهم بينفعوا .. مفيش حاجة بتخسر ...

الحقيقة الموضوع أثار انتباهي ... وسارعت بالمشاركة فيه ... فأنا أكره هذا الشئ (الإحتفاظ بالأشياء القديمة - الغير ذات قيمة)

[Lighthouse]

موضوع جميل كالعادة يا سي السيد

المصريين مشهورين دونا عن اي بشر بحب الاحتفاظ بالكراكيب وتكديسها في البلكونات بدلا من وضع زهور او زرع في البلكونات :lol:

منذ عدة شهور عرضوا برنامج في التليفزيون عن حملة لتنظيف اسطح البيوت وزرعها .

المشروع برعاية وزارة الزراعة ومجاني من الالف للياء fwrk:

تذهب إليهم وتسجل اسمك

فيرسلوا معك متخصص ليعاين السطح ويحدد كم النباتات التي يحتملها حسب المساحة .

ويتم تزويد السطح بمجموعة من الحوامل التي تشبه الموائد وسطحها يميل بميل معين لتفريغ الماء الزائد .

وبعد ذلك تختار نوعية النباتات التي تريدها او الخضار الذي تحب زرعه .

تأخذ دورة تدريبية في كيفية العناية بهذه النباتات والاستفادة منها.

اظهر البرنامج عدة بيوت قامت بتجريب هذه الفكرة والمعوقات التي تواجه اصحاب الفكرة في اقناع الناس بقبولها بدلا من الكراكيب .

فكانت النتائج مذهلة حيث خاف عدد كبير من الناس على اسطح منازلهم من ثقل الزرع ( غريبة مع ان الكراكيب تثقيلة برضه :lol: )

وناس تانية خافت من المية ( مع ان المكان مجهز بحيث يتم تسريب الماء الزائد في اواني بلاستيكية ويمكن اعادة ري الزرع بالماء الفائض ولا يوجد تسريب على السطح نهائي fwrk: )

مش عارفة اخبار التجربة دي ايه

ياترى لسه شغالة

ولا اتقتلت زي اي فكرة حلوة :lol:

[بنت شعنونة]

كلنا فينا العادة دي :lol:

انا بقى اعلنت التمرد عليها لما عزلنا السنة دي

وبعدها

احتجت لكلللللل الحاجات الي رمتها :lol: fwrk:

اه والله زي ما بقولكم كدا

بس فعلا اوقات الحاجات القديمة بتنفع فعلا.. :lol:

انا لحد دلوقتي لسا محتفظة ب هدوم ماما الله يرحمها

واجندة تلفوناتها

حتى ورقة الأسم اللي كانت على ايدها في المستشفى قبل ما تتوفى لسة عندي

والأبشع من كداااااا بقىىىىىىىى

ان عندي كللللللللللل الجوابات الغرامية الي اتبعتتلي من ناس قالوا انهم حبوني :P mf) :D

اهي دي لوحدها تكسبنييييي دههههههههببببببب

خصوصا ان كلهم اتجوزوا دلوقتييييييي

اطلعها واخد الفديييييييييييية fwrk: fwrk: blw) blw) blw) gt:

[se_ Elsyed]

شكراً لكل الزملاء الذين بادروا بالحجز ودفع مبلغ تحت الحساب ...

بس الغريب في الموضوع إني ماكنتش بأفكر في الكراكيب اللي قصدكوا عليها دي لأن كان فيه موضوع جميل جداً في المنتدى عن كده ...

لكن الكراكيب الذين أقصدها هي كراكيب سياسية .... طبعاً كل واحد هايفتح بؤوا 95 درجة ويقولي يعني أيه كراكيب سياسية .....

وللإجابة على هذا إنتظرونا قريباً على شاشة المنتدى ( والله لأبهدلكوا .. إشمعنى التليفزيون المصري بيعمل فينا كده )

[Lighthouse]

شكراً لكل الزملاء الذين بادروا بالحجز ودفع مبلغ تحت الحساب ...

بس الغريب في الموضوع إني ماكنتش بأفكر في الكراكيب اللي قصدكوا عليها دي لأن كان فيه موضوع جميل جداً في المنتدى عن كده ...

لكن الكراكيب الذين أقصدها هي كراكيب سياسية .... طبعاً كل واحد هايفتح بؤوا 95 درجة ويقولي يعني أيه كراكيب سياسية .....

وللإجابة على هذا إنتظرونا قريباً على شاشة المنتدى  ( والله لأبهدلكوا .. إشمعنى التليفزيون المصري بيعمل فينا كده )

كده برضه يا س س

مش حرام عليك

يعني نبطل فرجة على التليفزيون علشان الاعلانات والذي منه والفرسة اللى بيفرسهولنا

نيجي نلاقيك فاتح لنا وصلة اعلانات هنا

وانتظروني قريبا

ومااعرفش ايه

حرام عليك كده stnd::

طيب بالعند فيك منتظرين بقى

ووريني ح تطفشنا من امام شاشاة الموضوع ازاي

هات يابني الفيشار واللب والترمس والسوداني وتعالي اقعد جنبي هنا

mf( :P

[afiona]

بس الغريب في الموضوع إني ماكنتش بأفكر في الكراكيب اللي قصدكوا عليها ...........لكن الكراكيب الذين أقصدها هي كراكيب سياسية

لأ....ملعوبة وأصبت الهدف وحركة معلمين صيع وخبرة فى المنتديات...علقت المنتدى كله...هعهعهعها( ضحكة هراس)...

إحتراماتى

[se_ Elsyed]

بالتأكيد إن الموضوع ده ناس كتير إتكلموا فيه وأعطوه حقه وزيادة ولكن عندما نربطه بالسياسة بيكون شيء تاني .

- فقد لقت نظري يا أعزائي إن عادة الإحتفاظ بالأشياء القديمة عادة متأصلة فينا كمصريين ومش بس بنحتفظ بالجمادات لأ ده أحنا بنحتفظ بالبنى آدميين أيضاً ، فرأينا المصريين القدامى يتفنون في عمليات التحنيط للإحتفاظ بجثث موتاهم ومش أي موتى ولكنهم الطبقة الحاكمة ومن حولها .. وهذا لاننا شعب طيب ومابيهونش عليه العِشره ..

- إلى أن تطور ذلك فأصبح في الموروث الشعبي لدينا وأنعكس على أمثالنا الشعبية والأقوال المأثورة فنجد من يقول " من فات قديمة تاه " و " قديمك نديمك " و " إللي مالوش قديم مالوش جديد " و " اللي نعرفعه أحسن من اللي مانعرفوش "

- والظاهر أن حكامنا الأفاضل قد فطنوا لذلك وأكتشفوا هذه الصفات فينا فوفروا علينا التحنيط والتخليل ووجع الفراق وخدوها من قصيرها وعقدوا العزم إنهم مايسبوناش إلا إذا جاء قضاء الله وربنا خدهم وحتى هذا فقد خططوا له وقرروا إنهم يسيبولنا حاجة من ريحتهم - إإإإف - وهو أبناءهم رؤساء المستقبل الصغننين ... وهذا وفاء منهم لحق العشره ومراعاة لإحساسنا وعلشان مايسيبوناش نتألم لفراقهم .....

[disappointed]

لأن كان فيه موضوع جميل جداً في المنتدى عن كده ...

مشكلة الكراكيب (موضوع بدأه الأستاذ عادل أبو زيد)

http://www.egyptiantalks.org/invb/index.ph...208&hl=الكراكيب

وبالمناسبة :

كان متسائل ألمح عن تغيير مجرى الحوار من كراكيب السندرة لكراكيب العقل (وهو ما أطلق عليه اسم "ثقافة الكراكيب")....لكن لم يكن هناك رد فعل فى هذا الاتجاه فى المداخلات التى تلت تعقيب متسائل , فكويس ان سى السيد أثار الموضوع من هذه الزاوية مرة أخرى (وهى الزاوية الأهم و الأكثر تأثيرا فى مجتمعاتنا بالطبع).... وشكرا على هذا الموضوع "الطليعى" يا سى السيّد stnd:: ...أيوه كده يا راجل...اتحفنا بهذه المواضيع كل ما ربّنا يقدّرك (ده مافيش أحلى من "الطليعيّه" mf( )

[Lighthouse]

حلوة طليعي دي

ممكن نعمله مسلسل بالالوان الطليعية ونبيعه stnd::

[فــيــروز]

لكنى اعتقد ان هذا هو النوع الوحيد من الكراكيب الذى لا نحتفظ به باختيارنا mf(

يعنى احنا نفسنا ننسف حمامنا القديم بس هو اللى مش عاوز يتنسف stnd::

[فــيــروز]

بمناسبة الحديث عن كراكيب العقل

هل يمكن ان نضع لها تعريف؟ ما هى كراكيب العقل يا ترى؟

اليست آراءنا و افكارنا هى نتاج لكل ما نختزنه فى عقلنا من خبرات و تجارب و افكار؟ يا ترى اى من هذه المخزونات يمكن ان نعتبره من كراكيب العقل؟ ويا ترى اذا كان من الصعب على الانسان ان يتخلص من الكراكيب الماديه كيف يمكنه ان يقنع عقله بالتخلص من كراكيبه الفكريه !!

[se_ Elsyed]

لأن كان فيه موضوع جميل جداً في المنتدى عن كده ...

مشكلة الكراكيب (موضوع بدأه الأستاذ عادل أبو زيد)

http://www.egyptiantalks.org/invb/index.ph...208&hl=الكراكيب

وبالمناسبة :

كان متسائل ألمح عن تغيير مجرى الحوار من كراكيب السندرة لكراكيب العقل (وهو ما أطلق عليه اسم "ثقافة الكراكيب")....لكن لم يكن هناك رد فعل فى هذا الاتجاه فى المداخلات التى تلت تعقيب متسائل , فكويس ان سى السيد أثار الموضوع من هذه الزاوية مرة أخرى (وهى الزاوية الأهم و الأكثر تأثيرا فى مجتمعاتنا بالطبع).... وشكرا على هذا الموضوع "الطليعى" يا سى السيّد :unsure: ...أيوه كده يا راجل...اتحفنا بهذه المواضيع كل ما ربّنا يقدّرك (ده مافيش أحلى من "الطليعيّه" B) )

يـــــاه يا محبط بقالي ييجي 50 سنة ماسمعتش مصطلح الطلائع ده ، هــــــيه فين أيام الإتحاد الإشتراكي والكوادر السياسية لحزب البعث التقدمي الإشتراكي ....

وسع يا جدع لجيل الطلائع ...