نهر النيل

[hemaya]

يا نيل

يا جي ومسافر

من آخر البلاد

لا تعبت يوم ولا اشتكيت

طول البعاد

دايماً تملي معانا

في فرحنا وآسانا

ولا يوم غبت

يمكن يغيب الضي

يمكن ما ييجي الجَيّ

بس إنتَ دايما يا نيل

يا للي مالكشي زي

بالحب والخير تملي جي

يا نيل وحشني

صحبتك ولقاك

ومركبة علي ضهرك

واقفة علي مرساك

كانت حكاوينا

كل أمانينا

حِلِمْنَا وتعبنا

سافرنا ما نولنا

كبرنا وصغرنا

وانتَ زي ما انتَ

عمال تغنيلنا

وكل ما نقول من ظلمنا

نيلنا انتهي

تصرخ تقول أنا حي

يمكن يغيب الضي

يمكن ما ييجي الجي

بس انت دايما جي

يا نيل ومسافر

من ملايين السنين

لا اتغير في الغربة

لونك ولا طعمك

ولا صوت الأنين

أما أنا أصبحت غيري

ولا عرفت أنا مين

لسه خريرك في ودني

مصاحبني

وصوت مراكبك في المواني

تملي تطربني

وأوعدك إني أعود

وأرجع وأحكيلك

يمكن أعود موجوع

ودموعي تشكيلك

وأغسل خطايايا

بطهر ماء نيلك

وأفضل معاك في النهار

وأسهر معاك ليلك

ولو معدتش

ما تزعلشي

أنا مش نيل تملي جي

أنا إنسان سافر مش جي

27/08/2009