حكاياتي مع ديكوراتي

[ahmos1]

سى السيد لا زلت فى انتظار ردك- كيف يمكن الاتصال بك

تم تعديل 13 ديسمبر 2009 بواسطة ahmos1

[se_ Elsyed]

بص بعينك وأرحم بقلبك يا مؤمن

شويه صور على ما قُسم بالذات لشغل الجبس

أول صورة لشغل ظريف وراء سرير غرفة النوم .. مع إني ما كنتش طالبه كده لكن الراجل صممه ونفذه أفضل مما طلبت بصراحه

ده المدخل المؤدي إلى المطبخ والغرف الرئيسية

ده البانو اللي في السقف ... في غرف النوم الأخرى أنا مش عامل أي بهرجه .. كورنيشة وبانو وصُره very simple

المطبخ ... بس لسه ما فيش اكل عشان ما غيرناش الأنبوبة

رُكن السلطنة ... قصدي غرفة المعيشة .... هاعملها تصميم عربي ... وأنزل سوق العبور أشتري بعض الجواري الحسان ... نفسي أبقى مآنتخ عالشلته وهما ماشيكن مراوح زي اللي عند الكبابجي ويهووا عليه في عز الحر وقدامي نص بطيخه ساقعه ... وخروف مشوي بمستلزماته ( بس طبعاً هاعمل كده لما المدام تكون عند أهلها عشان هي ما بتحبش البطيخ )

[se_ Elsyed]

هارد عليك يا أحمس بس أستنى أنا معكوك في تحميل الصور من أمبارح .. وأهو كله ليكو

الرسيبشن والفيو بتاعته

صورة بروفيل لمستر رسيبشن بعد ما رجع من نيو جيرسي

المدام من دلوقت بتوريني العين الحمرا وتقول لي : مش هاسمح لك تقعد في الرسيبش تشتغل وتقرا وتتفرج على ماتشاتك وتكسر الدنيا لما الاهلي يكسب ... طب ده يرضي ربنا ؟ يعني أروح أتفرج عند عبدو البواب يا جدعان ؟

[HanaaOsama]

:lol:

ما شاء الله فعلا شغل الجبس فعلا جميل جدا و خصوصا الصوره الاولي الشغل الي ورا سرير غرفة النوم فعلا رائع و فكره اول مره اشوفها

في الدهانات هتكون جميله

بس الي ناقصها كنت حضرتك عملت فيها " اسبوتات " بس جميله

[president]

رُكن السلطنة ... قصدي غرفة المعيشة .... هاعملها تصميم عربي ... وأنزل سوق العبور أشتري بعض الجواري الحسان ... نفسي أبقى مآنتخ عالشلته وهما ماشيكن مراوح زي اللي عند الكبابجي ويهووا عليه في عز الحر وقدامي نص بطيخه ساقعه ... وخروف مشوي بمستلزماته ( بس طبعاً هاعمل كده لما المدام تكون عند أهلها عشان هي ما بتحبش البطيخ )

أستاذ سى السيد . بس ممكن حضرتك شرح بسيط للتصميم العربى . اللى هوا مجلس زى اللى فى السعوديه ولا شغل الأرابيسك (اعتقد اسمه اسلامى) مش كده برده ؟

وياترى حقوق الملكيه محفوظه ولا ينقل بتصرف :)

تحياتى لك.

[mama nona]

بسم الله ما شاء الله ربنا يباركلك فيها ان شاء الله

الجبس شغله حلو وكويس انك حطيته علسان نقترح الدهانات عليه

وكويس انك معملتش اسبوتات كهربا فالجبس ال ورا السرير لانه انا عملته عندى فتاج فوق فالسقف فى منتصف السرير والنور بيضرب فعينيك وبيكون شديد لانه موجه لتحت عالسرير

معرفش اذا كان فيه اسبوتات باضاءة خافتة ولا لأ

بس عن تجربة مش عملى

باستخدم الابليكات اكتر من الاسبوت

المطبخ ده هو مطبخى بالضبط ؟

انت منفذ الحوض فين فالمطبخ

لو لسه فيه صور يا ريت تنزلها

سلام

[se_ Elsyed]

سى السيد لا زلت فى انتظار ردك- كيف يمكن الاتصال بك

بص يا احمس

قدامك حل من تلاته عشان تشطب :

1- تشيل الليلة بنفسك وتجيب أنت صنايعية وتفتكس ديكورات على مزاجك وهما ينفذوا .. ودي عيوبها كتيره منها إنك هاتتروق من غلب وقلة أدي كل الصنايعية .... وكمان مش شرط تكون مُطلع على كل فنون الديكور ... وميزيتها إنك هاتسيطر عالتكاليف الى حد كبير

2- تجيب مكتب ديكور محترم ... يبقى أعمل حسابك على مبلغ وقدره رايح بس لأجر المكتب .. وبما إن عندك فيلا ربنا يزيدك .. يبقى اعمل حسابك على 100 باكو اتعاب روسومات وأشراف والمواد الخام عالعروسة طبعاً ... وعيوبها زي مانت شايف التكاليف .. لكن ميزتها إن لو مكتب كويس فبيطلع لك شغل نضيف من الاخر ...

3- تعمل زي مانا عملت ... تشارك المكتب في مقترحات الديكور ... وتخليه تقريباً 30 أقتراحات منه و70 إشراف منه برضوا ومعاه يكون في شخص تثق فيه يشتري المواد الخام ويستلم من المهندس ده ....

ودي عيوبها إنا المتب مش هايكون بنفس كفاءه مكتب الديكور المتخصص .. وميزتها ضغط التكاليف والسيطرة عليها

اتمنى اكون أفدتك

[se_ Elsyed]

:lol:

بس الي ناقصها كنت حضرتك عملت فيها " اسبوتات " بس جميله

يا هناء باشا الأسبوتات موجوده يا فندم .. بس ما عنديش أسبوتات تتكشف على رجاله هههههه

شوفي سيادتك

الجبس بيتعمل الاول زي مانتي شايفه ... ومن جواه بيبقى مُفرغ ... وبييجي الكهربائي المهندس يعلم له على اماكن الأسبوتات فيقوم جايب شنيور ومركب فيه بتاعه زي الكوباية بمقاس الأسبوت سواء كبير أو صغير .. وفاتح مكان الأسبوت .. قبل ذلك بقى .. وقبل بداية شغل الجبس .. الكهربائي بيكون ممدد خراطيم كهربا وسايبها كده .. وييجي بتاع الجبس يمشيها جو السقف المعلق او الشكل المفرغ اللي عامله ..

انا بس صورت الحركات دي قبل الكهربائي ما ييجي ينفذ

وصلت الفكرة ؟

-------

وكويس انك معملتش اسبوتات كهربا فالجبس ال ورا السرير

في

وكتاب الله في يا باشمهندسة ماما

الجبس شغله حلو وكويس انك حطيته علسان نقترح الدهانات عليه

آه والنبي إيدك معايا أحسن عماله ادورها في دماغي بقى لي كام يوم

انت منفذ الحوض فين فالمطبخ

مش عيب بنت الحج بعد التواب ما تعرفش أصول التحزين ؟ هههههههه

يعني لو ضربتي بعينك كده على شمال الشوباك هاتلاقي مكان ماسورة الميه بتاعت الخلاط .. وتحتيها مواسير الصرف ...

وفي الحيط اللي جنبها شمال مواسير صرف تانيه بتاعت غسالة الملابس وغسالة الأطباق

المطبخ ده هو مطبخى بالضبط ؟

عارفه

بعد ما أتشريته . لقيته منتشر في معارض كتير جداً لدرجة بأقول لمراتي : ده ولا مقرر الثانوية العامة .. بُصي على أعلانات معارض سيراميكا كليوباترا اللي بيقولوا عليها متاحف .. هاتلاقي صورته بتتكرر

سمعت إشاعه إن فعلاً كليوباترا أشترطت على مارك أنطونيو إنها مش هاتتمم الجوازه الا لما يجيب لها مطبخ زي ده ... كانت بقى ام انطونيو .. حما إنما قرشانه .. قالت له يابني إنت لسه متخرج ومش حمل التكاليف دي كلاتها ومشيها قيشاني ماركه ليسيكو ... أبو كليوباترا - الحج سوبر الله يرحمه - ركب دماغه وقال علي الطلاق من مراتي مارلبور ما هاحط إيدي في إيدك ياض يا أنطونيو إلا لما تجيب المطبخ ده ذات نفسيته ومعاه حوض فرانكي سامي بصفايتين ومغسله

المهم إتدخل ولاد الحلال وكانت جوازه سودا راح فيها رقاب ويوليوس قيصر حرق إسكندرية وحرق معاها معارض كليوباترا .. معليش بأحب كلامي يكون موثق وكله بالورق والمستندات

[mama nona]

السلام عليكم

انا بقترح عليك متفتحش للاسبوتات فالجبس ال ورا السرير لانه مقرف ومش عملى

وانا كان ولابد منه ممكن تعمل فالناحيتين ال عالطرفين وبلاش النص دى

لانها تجربة مريرة بالنسبة لى

طبعا انا شفت مكان الحوض

بس كان اقتراحى انه يكون تحت الشباك مباشرة

بس رجعت فكرت فين هتحط الصفاية ؟؟

ممكن بقى تجيب حوض من ابو صفاية الكبير

[HanaaOsama]

علي فكره يا استاذ سي السيد في مفاتيح جديده للسبوتات زي زر مدور بتقلل او تزود بيه شده الاضاءة زي بتاع الصوت الي في الكاست لكن صغير طيعا :lol: اختي عاملاه في شقتها

[se_ Elsyed]

علي فكره يا استاذ سي السيد في مفاتيح جديده للسبوتات زي زر مدور بتقلل او تزود بيه شده الاضاءة زي بتاع الصوت الي في الكاست لكن صغير طيعا :rolleyes: اختي عاملاه في شقتها

بالظبط يا مدام هناء

دي مش للأسبوتات بس ولكن كمان لللمبات العادية وإسمها " ديمر "

[se_ Elsyed]

كنت بأشتري بعض الأحتياجات لشقتي ومنها باب خشبي للحمام .. وفوجئت إن كل محلات النجارة عارضه باب شقة صيني مسميينه الباب المصفح ..

شيء خرافي يا جماعه بصراحة وشكله شيك قوي وخامته أكثر من جيده

الباب من الحديد وسُمكه 7 سم

به أصابع للسك ... مش زي الكالون بتاعنا مستطيل كده .. لأ دي صوابع صلب للغلق على الاجناب

كام صوباع بقى ؟

هههههههههههههه

16 صوباع متوزعين أربعات فوق وتحت ...

وكمان صوباعين كبار تحت .. واتنين أخرين فوق

يعني ولا باب خزنة البنك المركزي

وفي امكانية أنك تستخد جزء من تلك الأصابع مش كلها عشان يبقى عملي أكثر .. مش معقول في الدخلة والخارجة أقعد أعمل الفيلم ده

الباب مدهون جاهز وبييجي معاه الحلق كمان وعلى التركيب فقط ومتركب على 4 مفصلات لا يقل طول المفصلة عن 10 سم

وله كمان عينان سحريتان

واللي بهرني بصراحه ..

بييجي معاه 8 مفاتيح

مفتاحين منهم منفصلين لوحدهم ...

دول ليه بقى ؟

دول عشان تعطيهم للعمال اللي بيكونوا شغالين في الشقة وبيشطبوا فيها

ولما ييجوا يخلصوا تروح رامي المفتاحين دول ولاغيهم

وفي مفتاحين ماستر ... مجرد ما تضع واحد منهم في الكالون .. اوتوماتيكي بيروح لاغي برمجه المفتاحين بتوع العمال ويصبحوا عديمي النفع .. عشان لو حد فيهم قل عقله وعمل كوبي عليه

وبالتالي بيصبح عندي 6 مفاتيح أخرى

ثمنه كام بقى عند المجرمين دول ؟

1000 ج ... تخيلوا ؟ بسلطاته ببابا غنوجه .. ده سعر المستهلك .. يعني اللي مستوردة ممكن يكون واقف عليه بما لا يزيد عن 500 ج

طب انا مثلاً الباب الخشب مكلفني كام ؟

بالصلاتو عالحبيب ما يقرب من 4000 ج ..

إزاي ؟

- 1500 ج باب خشب زان بالحلق بتاعه

- 1500 ج باب حديد بره الباب الخشب زيادة في التأمين

- 600 ج دهان للبابين مصنوعية وخامات

- 300 ج أو أكثر أكسسوارات للبابين

- 100 ج تركيب

شوفتوا بقى ؟

موال ... باب بره وباب جوه وشغلانه

العيب الوحيد في الباب الصيني هو ان من كتر المياه في الأرض أثناء التنظيف أو خلافه ممكن الباروما تاكله ... عشان كده ممكن يترش عند أي بتاع دوكو لمادة مقاومة للصدأ وسلام عليكم

وعمار يا بكين

وبصراحه بعد كده لو حصل وحبيت أركب باب شقة .. مش هاركب الصيني ... وأن فاتك الصيني .. اوعى تزعلني او تبكيني

[ذهبية]

سؤال بجد

هى الناس دى بتاكل اية علشان تكون ناصحة قوى و تجيب الدماغ دى منين

بس انا اتاكدت انهم مش بياكلوا فول :aslam:

[SoSo R]

بصراحة فكرته جميلة قوى الباب ده...

بس أنا مش فاهمة قوى ..موضوع الصوابع ده

ممكن توضحه أكتر..

و إزاى بتعاد برمجة المفاتيح...فيه لوحة زراير أو حاجة؟؟

طيب ممكن صورة نشوف الشىء ده :happy:

[ahmos1]

يا عم سين سين ماتحرمناش من الحاجات الجمبلة دى دا احنا غلابة و بعدين وقفت حكايتك مع ديكورانك و تشطيباتك لية - بلاش بخل يا عمنا ربنا يخليك

طيب خدت من السعودية اية من ديكورات او لزوم تشطيب الشقة

شكراااااااااااااااااااااااااا

[mama nona]

اهلا عمو سى السيد

من زووووووومااااااااااااااااااااان اوى وانا مستنية اشوفك وصلت لفين

لو عندك صورة للباب حطها خلى الناس تتخض

يا راجل ده لو حرامى شاف باب شقة زى ده

دى تطلع فى دماغه انه لازم يدخلها باى شكل

ومال باب ايه ده كله....اكيد جوة الشقة دى ملاييين وجبال فلوس لازم تتسرق

انت متعرفشى انه الحرامية الوقتى بيقوروا بابا الشقة من النص دوران كده على اد ال هيدخل

؟؟

هو اه باب شكله حلو اوى وى

وشيك

ولونه اكتر من رائع

بس سعره كده رخيص انا لما شفته كان ب 3 الاف وبعد الفحص والتمحيص ب 2500

ها خلصت الشقة ولا لسه ؟

[se_ Elsyed]

بصراحة فكرته جميلة قوى الباب ده...

بس أنا مش فاهمة قوى ..موضوع الصوابع ده

ممكن توضحه أكتر..

و إزاى بتعاد برمجة المفاتيح...فيه لوحة زراير أو حاجة؟؟

طيب ممكن صورة نشوف الشىء ده :happy:

الموضوع سهل خالص يا سوسو

شوفتي اللسان بتاع الكالون بتاع الأبواب بتاعتنا بيبقى ضعيف إزاي ؟

ده بقى اللسان عامل زي السيخ الحديد بالظبط .. بس أستانلنس ستيل ... تخيلي 16 سيخ يمكن بطول 5 سم داخلين في الحيطة ؟

وضِعف سُمك اللسان ده بقى عباره عن لسانين فوق ولسانين تحت كمان يعني قده مرتين في السماكه بتاعته

يعني بالصلاتو عالنبي يا سوسو عاوز بلدوزر يهدوا

البرمجة سهلة قوي

المفتاحين اللي بأقول لك عليهم دول عبارة عن ماستر كي .. مجرد ما يدخلوا في الباب بيغيروا التروس بتاعت الكالون للوضع الأساسي بتاعه اللي يشتغل عليهم الست مفاتيح الأساسين اللي بيبقوا مع صاحب الشقة وبالتالي بيلغوا المفتاحين بتوع الصنايعية لو عندك صنايعية يعني بيشتغلوا وخايفه منهم يعني يكونوا عملوا نسخه وده محتمله على فكرة

------------------

تحتمس باشا .. هاحكي لك إن شاء الله

بس أخر المستجدات إن بعد السيراميك ما خلص روحت طارد مهندس الديكور شر طرده لأنه سلك سلوك الهمجية بتاعت الصنايعية الجهله .. وبدات تظهر الحجج .. معليش كنت عيان ... أصلي ما قدرتش أجي عشان أبن عمة اخو مرات خالتي مات وكنت في الجنازة .. فكانت النتيجية أن بتاع السيراميك كان شغال .. وكنا متفقين وكاتبين أن شكل سيراميك أرضية المطبخ يكون سمبوكسة .. مش مرصوص على عدلته يعني ... فاتعمل على عدلته لأ الباشمهندس مآنتخ وما جاش يشوف ايه اللي بيحصل ومعتمد على وجود اخويا إعتماد كُلي وجزئي .. نوع من أنواع الأستهبال يعني

وبالتالي مش معقول هاقول له هد اللي اتعمل او اعمله على حسابك ... فكان وصله نص اللي أتفقنا عليه وكنا قطعنا شوط كبير في الشقة .. فقلت له قشطة كده ومع السلامه يا شربات

-----------------

ماما

إنتي فين يا ماما نونا ؟

انت متعرفشى انه الحرامية الوقتى بيقوروا بابا الشقة من النص دوران كده على اد ال هيدخل

؟؟

يبقى كده دي شقة في صحراء الربع الخالي بقى هههههه

اهو الواحد بيعمل اللي عليه يا ستي وبياخد بالأسباب

واهم حاجه يا نونا يا بنتي .. عليكي بشبابيك حديد للشبابيك اللي عالمنور لأن دي أضعف نقطة في الشقة

ها خلصت الشقة ولا لسه ؟

هاقولك أن شاء الله

بس النقاش شغال وقرب يخلص

وبالتالي مش هايبقى فاضل إلا تركيب الألوميتال ووشاش الكهربا وتقفيل السباكة والتتشات النهائية بقى

السباكة على فكرة كانت ممكن تتقفل بعد السيراميك .. لكن أنتي خبرة وعارفه ... في عمال شغالين لسه في الشقة .. ولو عملت لهم سباكة خالصه مخلصه .. مش بعيد أدخل الشقة في مره الاقي واحد فيهم لابس الروب دي شامبر وبياخد شاور في البانيو ومش بعيد كمان يكون بيغني الميه توري العطشان

[egyptawy]

طيب يا س س

الباب ده بيتباع فين بالظبط ممكن تدينى العنوان

سوال كمان انا فى الدولر الاخير تنصحنى اعما ايه

هل معقولة اعمل الشبابيك كلها حديد واقفل على نفسى الهوا

[mama nona]

اهلا سى السيد

انا حاليا فى مصر

كان عندى شوية امتحانات

ربنا يباركلك فى شقتك ويبعد عنك الحرامية ان اشاء الله

انا عملت الحديد ال ع شبابيك المناور بس لانها اوميتال

والجيران اتسلو على تسليه فيها مقلكشى ..

وفضلو يقولولى مين ال هيطلع للتاسع علشان يجيلك من المنور

بالنسبة للسباكة كلامك صح خليها اخر حاجة

انا عملت كده بس البانيو كنت ركبته من الاول مع السيراميك

وفعلا اتجرح واتبهدل

بس هنقول ايه بقى الواحد بيتعلم فى اول شقة

وفالشقق الجاية بقى نصلح غلطنا...

سلام

[egyptawy]

الباب اجيبه منان ياسن سن

شكرا