ممكن ايه يتعمل ؟؟؟؟؟؟؟؟؟؟؟

[Farida]

انا ما كنتش مصدقه اللى باسمعه عن الشرطه امبارح كان فيه برنامج عن اللى اتسجنوا بتهمة القتل و ظهرت برائتهم بعد 3 سنين سجن و عن الممثله اللى اتسجنت 5 سنين و طلعت بريئه و السبب انهم اتعذبوا بالكهربا و الضرب امام زوجاتهم و اهلهم لمدة 40 يوم فى القسم علشان يعترفوا لحد ما اعترفوا و بقت قضيه .......... ممكن نعمل ايه و فين المحاميين الشرفاء ياترى ممكن حاجه تحصل و لا ادينا بنتكلم و خلاص ...... ممكن ايه يتعمل ؟؟؟؟؟؟؟؟

[se_ Elsyed]

ولا هانعمل أي حاجة يا ست فريدة لأن ببساطة حقوق الإنسان سواء الحر أو المسجون ضائعة في مصر وبالتالي فمجرد الإفراج عن البريء هي تعويض له في حد ذاته ... يعني بالبلدي كده لو حصل ده في اوروبا أو أمريكا مثلاً بيحصل المتضرر على ملايين الدولارات من الدولة كتعويض - ما عدا أسرى جونتانامو طبعاً لأنها نوع من البلطجة الامريكاني - أما في بلادنا العربية الحبيبة فإننا فيها نعامل بمبدأ

take it or take it يعني مافيش أختيار تاني هو إختيار واحد فقط .....

وحاولي بقى تحكي وتكتبي عن حالات التعذيب وإمتهان الأدمية في أقسام الشرطة وفي السجون وعلى الطرف الآخر المساجين اللي عايشين عيشة الملوك داخلها لأنهم بيدفعوا المعلوم .... فساد X فساد يا ست الكل ...

فالمسجون اللي يطلع براءة يحمد ربنا على انه لسه عايش وماتقتلش وقالوا عنه أنه " مات نتيجة هبوط حاد في الدورة الدموية "

يحكي لي صديق قضى يومين في حجز أحدى أقسام الشرطة بإنه كان معاهم شاب سيخرج إفراج بعد 24 ساعة والولد فطس من الحر داخل الحجز اللي هو أشبة ما يكون بالحمام ولا يوجد فيه أي فتحة تهوية ومكدس به أكثر من 30 أو 40 شخص - بدون مبالغة - وكل واحد نايم في محيط عبارة عن بلاطه ...... خليها على الله وقولي يا باسط ..

وخلي بالك أن المحاميين في معظم حالات التعذيب بيقفوا عاجزين عن إثبات حالات التعذيب لأن ظباط الشرطة وصولوا لدرجة الإحتراف في التعذيب بدون أن يتركوا أثر لذلك .. أنا شوفت ده بعيني لما دخلت القسم لأول مرة في حياتي أبلغ عن حادث سرقة وأستعجبت من طريقة التعذيب البشعة لأحد المتهمين في قضية سرقة سيارات وفي نفس الوقت طريقة مبتكرة الظابط اقالي إنتظر شوية باخلص حاجة في أيدي بس يعني بيوضب الزيون اللي معاه ..... وزي ما بيقولوا في الأفلام عملية نضيفة مية في المية

[أبو حميد]

ثلاث سنوات مرت على هذا الموضوع والحال هي الحال. نفس المنهج التعذيب حتى الإعتراف.

ذكرني النسر المصري بالواقعة الشهيرة لرجل أضطر تحت التعذيب للإعتراف بقتل أبنته التي أبلغ عن إختفائها عندما وجدت الشرطة جثة غير واضحة المعالم ربطت بينها وبين بلاغ الإختفاء وبعد فترة من الحكم على والد الفتاه ظهرت الفتاة وأتضح انها ليست صاحبة الجثة التي أعترف الرجل بقتلها. وكثير من هذه الحالات تتكر كل يوم وليست مذبحة بني مزار ببعيدة.

السؤال يا ترى المباحث عندنا معندهاش بحث جنائي وأدلة وبراهين ومعاينات وأستنتاجات لحد ما يمسكوا الجاني ولا هم بيحبوا يوصلوا لسيد الأدلة (الأعتراف) على طول توفيرا للجهد والمال. بس بصراحة الناس بيتعبوا لما يحلوا القضايا الصعبة على رأي أحمد زكي في فيلم "زوجة رجل مهم" (أنا طول النهار طالع عيني مع مجرمين ولاد كلب مش عاوزين يعترفوا) ما هو لو كانت الناس تريحهم وتعترف على طول كان التعذيب أختفى بس عالم متعبة.

فريدة سألت

ممكن ايه يتعمل ؟؟؟؟؟؟؟؟

وسي السيد قال:

وحاولي بقى تحكي وتكتبي عن حالات التعذيب وإمتهان الأدمية في أقسام الشرطة وفي السجون

طيب ما في ناس كتبوا وحطوا فيديوهات على النت والصحف نشرت وبرضه لم يحدث شئ.

طب نعمل أيه؟؟؟؟؟ نكشف راسنا وندعي ونحتسب إلى الله ونفرح لما واحد يقتل ظابط عذبه ولا نعمل أيه؟

[Sherief AbdelWahab]

الحل أن يبتهل الإنسان إلى العلي القدير أن يوقع العداوة والبغضاء بين وزير الداخلية وبين الصحفيين المسنودين من بعض رجال الأعمال فيقومون بحملة ضد التعذيب في مصر (الذي سكت عليه الصحفيون لسنوات طويلة) وحينئذ سيتم تجريس الضباط محترفي التعذيب أمام الشعب المصري كله وحتبقى فضيحة بجلاجل وصاجات!

خلص الكلام