الزبـــــــالة . . عار قومى

[أسد]

كارثة كبرى في مصر ..

الزبالة ..لدينا حكومة خائبة لا تعرف كيف تحل مشكلة الزبالة في مصر ..

كارثة غير معقولة .. غير مقبولة ..

هل من المعقول أن نكون اليوم في مصر لدينا مشكلة في تصريف الزبالة ..

خايفين من أنفلونزا الطيور .. وخايفين من الطاعون .. وسايبين الزبالة في شوارع مصر ..

إزاي .. أنا مش قادر أفهم .. مش قادر أستوعب الموضوع ده ..

كارثة مش قادر أفهمها ..

ايه الحكاية دي ..

كل القوى السياسية في مصر بيصيفوا .. وبيقضوا وقت طيب في متابعة المسلسلات الرمضانية ..

الحكومة والمعرضة وكل القائمين على هذا الأمر ..

مش فاهم ايه الحكاية دي ..

كارثة ... أمر غير منطقي ..

مش عارف أقول إيه ..

مصر .. شوارعها الرئيسية والداخلية كلها زبالة ..

أمر غير معقول ..

الزبالة في كل مصر .. في كل مكان ..

أحياء راقية وأحياء شعبية ..

الناس مستمرة في إلقاء الزبالة في الشارع ..

والحكومة مستمرة في تقاعسها عن معالجة المشكلة ..

والصحف مستمرة يومياً في الكتابة .. والكل ساكت ..

ما الحل ..

كارثة كبرى في مصر .. والكل يقف عاجز .. ولا أحد يريد أن يعمل شيئاً ..

وياساتر ياساتر ..

من أكوام الزبالة ..

يانظيف

[se_ Elsyed]

استناني

ده انا راجع لك وهاشمر عن ساعدي وهالبس لك الشورت والفانله وهاتبقى ليلة لأنه موضوع في غاية الخطورة لا يقل عن اي موضوع سياسي يمس مستقبل البلد

فاصل ونواصل

هاروح البس الشورت بس

[لولا]

ربما كان الحل هو الحملة التى على النت التى تقول "

يا أبناء الجيزة الكرام، اجمعوا قمامتكم على نفقتكم والقوها في ميدان التحرير حتى تتحرك الحكومة النظيفة!!!

آآآآآآه يابلد !!

[تامر مصطفى]

قرأت من كام شهر كده في جريدة كويتية اسمها الأنباء تحقيق عن أشهر زبال مصري

وكان الزبال ده في زيارة للكويت وقتها والموضوع اخد صفحتين في الجريدة

الاخ ده بكالوريوس علوم ورايح الكويت يعرض عليهم انه يشتري زبالتهم بأسعار أغلى من النفط وعرض انه يشتري القمامة من البيوت بمبلغ 10 دنانير كويتي للأسرة المكونه من 5 افراد و 20 دينار للأكثر من 10 افراد .

وقال انه هيشغل شباب معاه في جمع القمامة وهيكون راتب كل واحد فيهم يتراوح ما بين 1500 الى 2000 دينار (الدينار الكويتي ب 20 جنيه مصري تقريبا )

لانه هيكسب من وراء كل واحد 6000 دينار شهريا .

وقال انه قادر على تحويل القمامة الى ذهب وانه مش هيرمي منها اي حاجة وكل حاجة ( حتى بقايا الأطعمة ) هيستفيد منها بشكل كبير يأثر في اقتصاد الدولة .

طيب مش الزبال ده يخلص الزبالة اللي في مصر الأول وبعدين يبقى يبص لزبالة الخليج ؟؟؟؟

[se_ Elsyed]

وقال انه هيشغل شباب معاه في جمع القمامة وهيكون راتب كل واحد فيهم يتراوح ما بين 1500 الى 2000 دينار (الدينار الكويتي ب 20 جنيه مصري تقريبا )

طبعاً الصحفي اللي كتب المقال ده كان لسه ضارب بانجو او شم صفيحه كُله

بقى هايشغل معاه شباب ويدي الواحد 2000 دينار ما يعادل 40 الف جنيه ؟!!!!!!!

ده كان الكوايته نفسهم اشتغلوا عنده

يا عم سيبك من زبالة الناس وخلينا في زبالتنا احنا

[سكر]

اعجب ما فى الموضوع ان رئيس الحكومة نــــــــــــــــــظـــــــــــــــــــــــــيـــــــــــــــــــــــــــــــــف

ـــــــــــــــــــــــــــــــــــــــــــــــ

دة احنا بقينا بلد العجائب

[Alshiekh]

كارثة كبرى في مصر ..

الزبالة ..دينا حكومة خائبة لا تعرف كيف تحل مشكلة الزبالة في مصر ..

بداية ماهو الدور الذى يجب ان تلعبه الحكومة فى مسألة ازالة الزبالة ؟

هل المطلوب ان تتولى الحكومة ادارة شركات لجمع القمامة؟ أم ان الحكومة دورها ينحصر فى طرح المناقصات بين شركات القطاع الخاص المتخصصة ومراقبتة عملها ومحاسبتها؟

فى رأيى ان تطرح مناقصات بين شركات متخصصة فى جمع وتدوير القمامة ، يكون دور الحكومة ( الحكومات المحلية كالمحافظة والاحياء ) هو دور المراقب وممثل حقوق العملاء ( السكان واصحاب الاعمال ) للتأكد من عدم تقصير تلك الشركات فيما هو منوط بها من التزامات ( جمع قمامة ، تدوير ، وتخلص من النفايات ) وفى نفس الوقت مراقبة عدم استغلال تلك الشركات للعملاء.

والسؤال ماذا تم فى تجربة الاسكندرية وماهى الملابسات والظروف التى افشلت التجربة؟

[se_ Elsyed]

كما ذكرت من قبل من حوالي سنتين ....

موضوع الزبالة ده بقى أكبر عملية نصب قام بها مبارك على الشعب المصري .....

ههههههههههه

إدفع دم قلبك يا معلم كل شهر وكل الشعب المصري رقبته جت تحت مقصلة الزبالة وبيدفعها ضمن فاتورة الكهربا في إجراء قراقوشي هُلامي لم يسبق له مثيل ... وبعدين إخبط راسك في الحيط وأدي دقني لو شوفت خيال زبال جه عشان يلم الزبالة زي زمان ....

بل تعدى الأمر إلى إختفاء تام لصناديق القمامة من الشوارع ....

ومع ذلك العداد بيعد ولو ما دفعتش وأعترضت ... يقطعوا عنك ميه ونور وترجع تعيش عيشة أهل الكهف

أيوه في سلوكيات فوضاوية من كثير من الناس مثل إلقاء القمامة خارج الصناديق ...

ومثل سرقة الصناديق البلاستيكية ..

لكن دور الحكومة هو الظبط والربط

لإن الأنسان ... فوضاوي بطبعه ما لم تكن هناك قوانين رادعه ... مثلما فعلوا بمترو الأنفاق في بداياته ... اللي لولا الانضباط اللي فرضوه في الأول كان زمانه بقى مقلب رسمي للقمامة ومصيره كان هايبقى نفس مصير القطارات العادية ...

بجد بجد أن بأعذر الشركات الإيطالية والفرنسية والأسبانية اللي رسي عليها مناقصات جمع القمامة ... لإنهم لم يتصوروا أن يوجد بشر على وجه البسيطة بهذه العشوائية ...

عشوائية حكومية

وعشوائية شعبية

واللي زاد وغطى إن الزبال القديم ظهر تاني الأن على أستحياء... ولما تيجي تسأله إنت ما بتجيش ليه وبقت متقاعس ليه ؟ يقول لك : ما هم قتلوا الخنازير .. فالزبالة دي هانوديها فين ؟

وكإن دول العالم كلها بتربي خنازير عشان تاكل الزبالة !!!!!!!!!!!!!!!!!

هههههه نظيف بيه وعدنا إن من بداية العام القادم هاتشوفوا بعينكم مستوى النضافة .....

الظاهر إنه هايستخدم مسحوق " بونيكس " نضافه ... ريحة ... توفير

[عبقرينو]

الموت مزبولا

اضافة جديدة تحسب للحكومة الرشيدة

للتخلص من المواطنين

وحملة التطهير يجب ان تبدا

بهذا النظييييف وحكومتة التي لا اري فيها

شيئا نظيفا غير نظافة الدماغ وفقر الفكر والمحتوى

تم تعديل 12 سبتمبر 2009 بواسطة عبقرينو

[أسد]

لا أحد يهتم ...

لا رئيس حي .. ولا محافظ .. ولا رئيس وزراء .. ولا رئيس جمهورية .. ولا رئيس شركة النظافة ..

ولا حتى الناس ..

منتهى التسيب ..

الشركة الإيطالية عاملة إضراب .. يعني إيه ..؟؟؟ إزاي ؟؟

عندما هدد الأطباء بأنهم سيضربون .. صرج الجميع في وجوههم .. وقال هذه مسألة غير أخلاقية .. صحة المواطن .. والناس ..... الخ

وعندما أضرب الصيادلة .. إتهموا بخيانة الوطن والمواطن ..

وعندما تضرب شركات النظافة .. لا أحد يحاسبهم ..

من الذي قرر هذا الإضراب .. ومن تركه يستمر ...

أعتقد لو كنت مسئول في هذا البلد لأمرت بإعتقاله فوراً ..

هذا هراء وكلام فارغ ..

الشركة المضربة كانت في الجيزة .. وهي الأسوأ حظاً ..

ولكن تعالى شوف المحافظات الأخرى .. ومنها القاهرة ..

الزبالة في كل مكان .. مارأيته هذا الصيف زيادة عن كل عام .. أمر غير معقول ..

وكأن مصر بلا مسئولين ..

وزير البيئة بيقول حيدعم حملة المصري اليوم ويوزع تي شيرتات وكابات على الأطفال المشاركين ..

يافرحتي ..

حاجة تكسف ..

مش عارف نقول إيه ..

القوى الوطنية الخايبة .. كلهم .. بما فيهم الإخوان المسلمين ..

لم يكن لهم أي دور في أي حاجة ..

فضيحة .. ياترى حد واخد باله منها ...

لم يخرج علينا أي منهم ليقول لنا عن حل أو فكرة أو إقتراح ..

الكوارث والمصائب في مصر تكشف الجميع

فهي كما تكشف الحكومة الخائبة ..

تكشف أيضاً خائبي القوى السياسية المصرية جميعاً

[النسر المصري]

طب ياجماعة احنا فرشنا الملاية للحكومة وسعناها مزيكة حسبالله وخلصنا خلاص!!!

السؤال اللي بجد مالهوش جواب ف راسي لحد دلوقتي.....اييييه الحل؟؟؟؟؟!!!!!

انا بصراحه فشلت اني ابحث عن حل مقنع....ياترى حد شايف حل جذري؟؟!!!

[MZohairy]

لغاية ما يلاقولهم حل دائم

اقترح نزول الجيش جنودا و معدات ( مليون جندي الا شويه) الى ارض المزبله

حيخلصوا الفيلم ده في يوم واحد

و اهو يبقى البلد بتستفيد من الجيش في حاجه

[Sherief AbdelWahab]

بلغة المسلسلات ح أكتب اللي حصل إزاي:

الحلقة الأولى : تجمعات مافيا الزبالة والخنازير ومليونيراتها يعملون أحلى سبوبة من الوضع السابق ..

الحلقة الثانية : الحكومة تتعاقد مع شركات نظافة أجنبية..

الحلقة الثالثة : المافيا تستشيط غضباً فتتآمر مع عدد من الموظفين والصحفيين على الشركات..

الحلقة الرابعة : الشركات غير الصبورة تهرب من المعركة..

الحلقة الخامسة : يتم ذبح الخنازير كإجراء وقائي بعد أن تركت وسط حراسة الفاسدين ترتع في مناطق سكنية..

الحلقة السادسة : يبدأ مسلسل الاتجار البغيض إياه.. وتصطدم المافيا بالحكومة وتنتصر..

الحلقة السابعة : تحاول الحكومة ترضية المافيا..

الحلقة الثامنة : الشركات تغضب.. ثم تضرب!

ولا زال مسلسل الابتزاز مستمراً ، تارة بالسياسة وتارة بالدين وتارة بالإضراب وتارة بالعنف ، وبما أننا في رمضان فلا تتوقعوا أن يقل عدد حلقات أي مسلسل ، بما فيهم دة ، عن ثلاثين حلقة ، يديكم ربنا ويديني طولة العمر..

وما تنتظرش كتير من الإعلام المصري لعدة أسباب ، من بينها حب المال السياسي للاستثمار في مجموعة ضغط قوية وواعدة زي مافيا مليونيرات الزبالة قادرة على إحداث ضجة وفرقعة سياسية ، ورغبة صحف حزبوطنية محسوبة على شخصيات داخل الحزبوطني في انتهاز الفرصة للترويج لشخصيات معينة في التشكيل الوزاري الجديد مستغلةً أخطاء فادحة في طريقة إدارة الحكومة الحالية للأزمات بشكل عام ، وإن كانت تلك الشخصيات الجديدة كارثة في ذاتها!

خلص الكلام

[aimen]

طبعا حضراتكم بتتكلموا عن القاهرة والجيزة والأسكندرية

من ثلاث اعوام ونصف كان فى القرية عندنا مشروع لجمع القمامة وكل بيت كان بيدفع 3 جنيهات والناس كانت بتيجى ثلاث مرات اسبوعيا والبلد كانت نظيفة جدا

لما نزلت مصر من شهر ونصف فوجئت بكميات الزبالة اللى مش معقولة ..فى كل مكان واى مكان

استغربت مش كان فيه شركة بتلم الزبالة دى ؟ قالوا لى الشركة اتخانقت مع المجلس المحلى لأن الناس مش عاوزه تدفع ال3 جنيهات فقط عاوزه تتشال الزبالة بتاعتها ومن غير مقابل ...النكته بقى ان الناس بتدفع المقابل واللى مش يدفع يتعمل له غرامه وعربية جمع القمامة بتيجى يوم واحد فى الأسبوع اما باقى الأسبوع فعليك بقى تتصرف مع نفسك ؟؟؟

اتصرف ازاى ؟ الناس بترمى الزبالة فى المدارس بجوار اى بيت ....فى البحر .....اعتقد انهم رموا ايضا فى المجلس المحلى نفسه..

القرى مهما كانت غير المدن الشوارع صغيرة ونادرا لما تلاقى مساحة كبيرة علشان تتعمل مقلب زبالة لكن اللى حصل ان الناس بتختار اى مكان وخلاص وبالقوة يتعمل مقلب زبالة واتفرج بقى على كم الخناقات اللى بتحصل

كنت متخيل ان الموضوع دا عندنا بس بحكم اننا قرية ومافيش اهتمام

لكن الحمد لله لقيت ان مصر كلها بقت مزبلة كبيرة ولا فرق بين قرية او مدينة ....ودى حاجة تحسب للحكومة النظيفة

[أسد]

أنا لما فتحت الموضوع .. لم أكن أتكلم عن القاهرة أو الجيزة فقط ..

ففي كل مدينة خطت قدماي فيها في مصر في صيف 2009 .. وحتى القرى ..

كانت في منتهى القذارة .. بشكل غير معقول ..

حتى المدن التي كانت معروفة بنظافة شوارعها .. مثل بورسعيد والإسماعيلية .. لا توجد هناك شركات أجنبية .. والمحليات هي المسئولة عن جمع القمامة .. قد يكون من خلال شركات محلية ..

ولكن الأمر أصبح فظيع بشكل لا يمكن إحتماله ..

حتى على الطرق السريعة ..

الزبالة والمخلفات على جانبي الطريق .. زبالة .. مخلفات من رمال وزلط وطوب يتساقط من سيارات النقل ..

أو حتى مخلفنا إنشاء بلدورات الطريق أو سفلتة الطريق ..

لم يفكر أحد في إزالتها ..

أمر مشين .. وغير منطقي

أنا لا أوافق أن الجيش ينزل يجمع الزبالة .

الجيش ممكن ينزل يعتقل المسئولين عن تلك المأساة ..

وبعدين إحنا كلنا سيسعدنا أن نجمع الزبالة .. إذا أحسسنا أن هناك من يتفهم مشاكلنا

[aimen]

انا نفسى افهم حاجه مش انا بدفع مقابل للخدمة لماذا لا اجدها

اذا لم تكن الحكومة قادرة على تنفيذ تلك الخدمات فلترحل

فالحين بس يعملوا لنا كتاب ويقولوا انجازات الحكومة فى 60 شهر ..ربنا يخدهم يارب

[مدام محمود]

مساء الخير دي اول مشاركه ليا في المنتدي اتمني تقبلوني معاكم

اما بالنسبه لموضوع الزباله احب أقول رأيي انا رأيي ان الزباله اللي في الشوارع دي اصلا صادره مننا بمعني اللي بياكل بسكوت او بيشرب اي حاجه بعد ما يخلص بيرميها في الارض وكأن الحكومه مسؤله عنه تمشي وراه تنظف زبالته

انا اقصد من الاخر ان لو كل واحد حاول يحافظ علي البيئه حواليه واخد في سيارته كيس وخصصه للزباله مش هتبيقي كميه الزباله اللي في الشارع موجوده

مش معني كدا اني بدافع عن الحكومه بل بالعكس انا كل اللي بقوله ان لو كل واحد عمل اللي عليه الدنيا يمكن تتظبط احوالها

شكرا :wub:

[محمد عيسى]

مساء الخير دي اول مشاركه ليا في المنتدي اتمني تقبلوني معاكم

اما بالنسبه لموضوع الزباله احب أقول رأيي انا رأيي ان الزباله اللي في الشوارع دي اصلا صادره مننا بمعني اللي بياكل بسكوت او بيشرب اي حاجه بعد ما يخلص بيرميها في الارض وكأن الحكومه مسؤله عنه تمشي وراه تنظف زبالته

انا اقصد من الاخر ان لو كل واحد حاول يحافظ علي البيئه حواليه واخد في سيارته كيس وخصصه للزباله مش هتبيقي كميه الزباله اللي في الشارع موجوده

مش معني كدا اني بدافع عن الحكومه بل بالعكس انا كل اللي بقوله ان لو كل واحد عمل اللي عليه الدنيا يمكن تتظبط احوالها

شكرا :wub:

الكلام ده نص الحقيقه

و النص التاني .. لما الكيس ده يتملي .. نوديه فين؟؟

و بعد كده ازاي يتشال من "فين" دي لحد "فين" الكبيره

و بعد كده ازاي يتعالج؟

[se_ Elsyed]

مساء الخير دي اول مشاركه ليا في المنتدي اتمني تقبلوني معاكم

اما بالنسبه لموضوع الزباله احب أقول رأيي انا رأيي ان الزباله اللي في الشوارع دي اصلا صادره مننا بمعني اللي بياكل بسكوت او بيشرب اي حاجه بعد ما يخلص بيرميها في الارض وكأن الحكومه مسؤله عنه تمشي وراه تنظف زبالته

انا اقصد من الاخر ان لو كل واحد حاول يحافظ علي البيئه حواليه واخد في سيارته كيس وخصصه للزباله مش هتبيقي كميه الزباله اللي في الشارع موجوده

مش معني كدا اني بدافع عن الحكومه بل بالعكس انا كل اللي بقوله ان لو كل واحد عمل اللي عليه الدنيا يمكن تتظبط احوالها

شكرا

أولاً : أهلاً بحضرتك يا مدام محمود في أول مداخلة وبإذن الله نرى لكي أفكار وأراء بناءه ...

لا شك إنني أتفق مع حضرتك فيما قلتيه وإن سلوك الناس له عامل كبير في الموضوع...

لكن هنا الوضع مختلف سيادتك

هنا إحنا امام عملية سرقة وسطو مُسلح في وضح النهار

ناس متفقه معايا إني هادفع مبلغ معين - غصب عني او غصب وإقتدار - شهري على فاتورة الكهربا ... مقابل إنهم يخصصوا شركات أجنبية عنيهم صفر وشعرهم أخضر .. وييجوا لحد البيت يجمعوا القمامة من البيوت

لكن بقى لنا أكثر من 5 سنوات ما شوفناش صرصار جه البيت أخد كيس زبالة

وكل اللي عملوه إنهم نطوروا شوية صناديق في الشوارع لفترة معينه وبعيدن لموها وإختفت تماماً من الشوارع الا نادراً ...

حتى فكرة حضرتك إن كل واحد ياخد كيسه في عربيته ويرميه في أقرب صندوق

ده على أفتراض إننا شعب مرفه وجيمعنا عندنا سيارات يعني ولا إيه ؟

أقسم بالله ساعات كنت بأسافر وأكياس القمامة في السيارة من كتر ما بأنسى شكل صندوق القمامة أو مش لاقيه في الشوارع ...

يا مدام محمود إحنا بنتكلم عن سبوبة جمعوا منها مليارات ... مليارات واخده بالك ... وهربوا وسابونا غرقانين في الزبالة

امبارح جريدة المصري اليوم نشرت صور لحي المهندسين .... فاكره لما كان بينضرب به المثل في النضافة ؟ ... وهو غرقان في الزبالة في منظر مُخزي ويُظهر مدى عجزنا عن تنظيف أنفسنا حتى ...

طب إزاي بنطالب الناس بسلوك مثالي في المحافظة على البيئة وأنا مش مدي للمواطن فرصة يتخلص من زبالته بطريقة أدمية ومحترمه ؟!!!!!!!!!!!

وأؤيد فعلاً أقتراح زهيري بإن الجيش والشرطة ينزلوا الشوارع يلموا الزبالة

ونغير بالمرة إسم الأخ القائد إلى " القائد الاعلى لقوات الزبالة وعجين الفلاحه " أصل الجيش لسه بيخبز عيش ويبيعه للمواطنين عشان يساهم في حل أزمة رغيف الخبز ..

يبقى قوات من الجيش تشيل قُفف- جمع قفه - وتنزل تلم الزبالة ...

وجزء أخر يعجنوا ويخبزوا ويقعدوا قدام الفرن يعملوا لنا عيش سخن ومفقع ...

وممكن نطلب كمان قوات الإحتباط لو إحنا عندنا طموع وعاوزين ناكل عيش فينو ... دي هاتبقى قفزة هايلة في تاريخ القوات المُسلحة ..

---------------------

آه بالمناسبة ..... عاوز أبعث تحيه للسيد الرئيس واقول له : إبقى سلم لي على مشروع الطاقة النووية اللي عاوزين تعملوه في مصر ..

[النسر المصري]

أنا لا أوافق أن الجيش ينزل يجمع الزبالة .

الجيش ممكن ينزل يعتقل المسئولين عن تلك المأساة ..

وبعدين إحنا كلنا سيسعدنا أن نجمع الزبالة .. إذا أحسسنا أن هناك من يتفهم مشاكلنا

ليه كده يا أسد...غريبة اوي انك ترفض اقتراح زي ده الا اذا كان هناك مفهوما لم يصل لي!!

لان بصراحة اقتراح عبقري من عبقري زيه (طبعا زوهيري هيتنفخ دلوقتي لغاية لما البنطلون يفرقع منه )

حد ينسى مشكلة الرغيف اللي ماتوا فيها افراد الشعب.....مين اللي انقذ الموقف.....هو الجيش!!

وبعدين الكجنديين القاهريين ماهيصدقوا وهيفرحوا لما يعرفوا الخبر ده....لانهم عندهم ينزلوا القاهره يلموا زبالة ولا انهم يقعدوا في دهشور والحتت اللي مليانة عفاريت دي !!

يعني البلد هتنظف

وهتنضف بببلاش (مهمه بالنسبة لناس كتير)

بل في عساكر هتسترزق جامد من ورا الموضوع ده

وكمان مش هيبقى فيها اي عمليات نصب او مافيا او غيره

وبما ان الجيش اغنى مؤسسه حكومية ف مصر

يبقى ممكن يعملو محطات معالجة وفصل للمواد ويشتغل فيها الجيش واهالي البلد.....وهيكسبوا من وراها بلاوي متلتله...

يعني الجيش كده كسبان كسبان...ومصر كلها هتكسب من وراها النضافه كمان.....

مش كده ولا ايه؟!