فتوى سعودية بتحريم بدء الدراسة مع انتشار وباء انفلونزا الخنازير

[عبير يونس]

http://albawaba.com/ar/countries/Sudan/303468

صدرت فتوى بتحريم بدء الدراسة في المدارس مع انتشار وباء انفلونزا الخنازير

كلنا خايفين على ولادنا طبعا و أنا أول واحدة مش حأدخل ولادي المدرسة

و السؤال الآن ما هو مصير المدرسين في المدارس الأهلية؟؟؟

إذا كان أصحاب المدارس بمنتهى الدم البارد يتركون المدرسين بلا راتب طوال الصيف

ترى ماذا سيكون تصرفهم عند إلغاء الدراسة؟؟؟

هل سيقومون بإلغاء عقود المدرسين؟؟؟

أم سيظل المدرسون على كفالة المدرسة بلا راتب إلى أجل غير مسمى؟؟؟

[doha]

النهرده كنت بكلم اخويه في مصر وهو بالمناسبة طالب في احدى الجامعات ..

قالي وهو بيضحك ان احتمال الدراسة في مصر تتاجل سنة ( طبعا قالها وهو بيتنطط من الفرح )

قلت له طيب ازاي تروح عليك سنة كاملة ؟

قالي ( بيقولوا ) هيبقى في دراسة عن طريق النت ودروس خصوصيه ..

طبعا كل دي مجرد احتمالات او ( اشاعات )

اعتقد والله اعلم لو تأجلت الدراسة في المدارس بس مع بقاء العام الدراسي كما هو يبقى المدرسين في المدارس الخاصه ( باضت لهم في القفص )

اما لو تأجلت نهائيا بمعنى مفيش دراسه ولا دروس يبقى برضه هتبيض لهم في القفص لان ربنا الي بيرزق مش المدرسة ولا رواتبها ..

بس بيني وبينك منغاظه اوي الحكايه دي مجاتش ليه وانا طالبه كنا ( بنتنشق ) على يوم اجازه يقوموا يدوهم ( ســـــــــــــــــــــنه!!)

ربنا يبارك مش هبص لهم في اجازتهم ..

[لولا]

صدرت فتوى بتحريم بدء الدراسة في المدارس مع انتشار وباء انفلونزا الخنازير

حتى الأمور التنظيمة تحتاج لفتوى للتطبيق ؟؟!!!!!!!!!!!!!!!!!!!!!

حلال

حرام

حلال

حرام

حرام

حلال

حرام

حرام

هكذا تُدار الحياة !!

تحياتى

لولا

[enjisultan]

اية اخر كلام عن الدراسة

هى الفتوى يعنى لازم تتنفذ ولا كلام بدون تنفيذ

هيتأجل ولا أية؟

[enjisultan]

كان فى توبيك لريمو عن بدأ الدراسة راح فين؟

تم تعديل 13 سبتمبر 2009 بواسطة enjisultan

[doha]

بصي هو آخر كلام انها مش هتتأجل بس اتوقع ان كل مايشاع حاليا تمهيد لاعلان تأجيلها فعلا ..

قرأت خبر ان منظمة الصحة العالمية اوصت بتأجيل الدراسة في المدارس ( لتبطيء) انتشار المرض حتى يجدوا له لقاح او على الاقل عشان متبقاش كمية المصابين اكبر من الطاقة الاستيعابيه للمستشفيات ..

برضه قرأت خبر عن الدراسه في السعوديه بالذات بس مفهمتش المقصود بالظبط ..

قالوا في الخبر ان لو لاقدر الله حد من التلاميذ مات يبقى المدرسه تغلق

وقالوا برضه مش هتتاجل غير لو 10 في المية من الطلاب ( بحد ادنى ) اصيبوا بالمرض أو تغيبوا عن المدرسه

كنت هفهم المقصود لو قالوا بحد اقصى يعني لو عشرة في المية من الطلبة اهلهم قعدوهم في البيت يبقى مفيش دراسه في المدرسه لغايه مالعدد يكتمل لكن هم قالوا بحد ادنى وعلى كده انا مش فاهمه المقصود بصراحة ..

برضه قالوا بالنسبة للكيجيهات والاطفال في تمهيدي والصفوف الاولى الحد الادنى هو 5 % مش عشره

الخلاصة في الموضوع احنا هننتظر باذن الله لبعد العيد ووقتها ان شاء الله هيبان اودي بنتي المدرسه ولا اقعدها في البيت ..

مبدئيا انا ناويه اوديها بس لو الموضوع زاد شويه عن كده للاسف شكلي هقعدها السنة دي ومجاتش على سنة ..

[الباشمهندس ياسر]

صدرت فتوى بتحريم بدء الدراسة في المدارس مع انتشار وباء انفلونزا الخنازير

انا اسف انى انشد عكس الفريق

بس هى الناس ف السعودية عندها فوبيا اللافتوى

يعنى الحياة متمشيش من غير عمو الشيخ ما يدخل

ايه العلاقة بين المدرسة ( وزارة التربية و التعليم ) و المرض ( وزارة الصحة) بدار الافتاء

ممكن افهم

[عبير يونس]

ميرسي على التفاعل و الردود

الغالية ضحى

طبعا زي ما قلتي الرزاق هو الله عز و جل و ليس المدارس و رواتبها

و لكنها أسباب للرزق

و قد حدث فعلا أثناء حرب الخليج ان امتنع أصحاب المدارس الأهلية (الخاصة) عن دفع رواتب المدرسين

لا أعرف عن باقي مدن المملكة و لكن هذا حدث في مكة بالتحديد

و همة هنا بقى لهم سنتين مستهبلين و بيقعدوا المدرس أربع شهور الصيف بدون راتب

رغم انه حتى لو المدرس في مصر في اجازته فالإيجار هنا ماشي و اشتراكات الخدمات من كهرباء و تلفونات و خلافه ماشية برضه

الناس اللي عندها دم تعمل كده مافتكرش ابدا انهم في كارثة زي دي حيدوا مرتبات و مفيش طلبة

السؤال ماذا سيكون الوضع ؟؟

هل ستنهى العقود و يعود المدرسون لمصر؟؟

أم سيظلون على كفالة المدرسة بدون راتب بعد شهور الصيف و التي أيضا بدون راتب؟؟؟

الغالية لولا

فعلا هنا كل حاجة تحتاج لفتوى

أمال حتقولي ايه لو عرفتي فتاوي المفتي العام بأن فرق الشعر على جنب حرام

و السوستة حرام

و لبس البنطلون للزوج حرام

:happy:

ما هو هنا مش ممكن قرار جاء بفتوى ما يتنفذش

لازم فتوى عشان يتنفذ

و إلا ....

طبعا الرد ده كمان للباشمهندس ياسر

فعلا يا باشمهندس

الحياة متمشيش من غير عمو الشيخ ما يدخل

الغالية انجي

موضوع بدء الدراسة لا يزال موجودا في باب التعليم و العمل

و التوبيك ده لا يحمل نفس الفكرة من موعد بدء الدراسة أو إلغاءها من عدمه

و لكن يتعلق بالفتوى و تداعياتها على المدرسين المصريين