محتاجة مشورتكم ضرورى!!!!!

[جويرية]

على فكره ياذهبية والدتي لها شقة في بيت اهلها ومساحتها كبيرة اكتر من 200 متر والشقة مغلقة بقالها سنين طويلة جدا وحصل ان مرة وحده بس اجرناها لمده شهر او شيء زي كده والمستاجرين طلعوا وقالوا ان ( خالي ) عاملهم معامله وحشه لغايه ماطفشوا .. وبعدها حاولنا نأجرها تاني ووجدنا شبه اعتراض من اخوة ماما ان مش عاوزين حد غريب في البيت ـ هم مقالوهاش صراحة لكن لمحوا لذلك وعلى هذا فالشقة مغلقة من يومها . وبالمناسبة سبق لخالي الكبير انه كان يبأجر شقته الي في البيت ومحدش اعترض .. عادي ..

بالنسبة لوالدتي هي ( شارية دماغها ) وطالما مش محتاجه فلوس الشقة دي فبتفضل مصلحه اخواتها او علاقتها بيهم على اي شيء تاني وهم وللحق يقال بيحبوها وبيحتفوا بيها دائما لما تروح عندهم لانها فعلا بتعاملهم كويس اوي عمرها ماقالت لهم حقي او مش حقي الي بيقولوا عليه بتمشيه .. صحيح انا احيانا مبيعجبنيش سلبيتها بس هس راضية .. الفلوس جات لها من ناحية تانيه وهي مش محتاجه من اخواتها غير يكونوا جنبها او علاقتهم ببعض تبقى كويسه وهذا موجود فعلا يبقى خلاص مبتدقش بقى على تصرفاتهم معاها احيانا ..

انا رايي لو انتي مش محتاجه الفلوس يبقى انسي الشقة دي خالص دلوقت واوعي تبيعيها او تاجريها لحد من اخواتك .. اما لو مزنوقه اوي في ايجارها يبقي في حل وسط .. انتي اسألي الاول الايجار بتاع الشقة دي يساوي كام فرضا قالوا بـ 6000 في السنة مثلا .. خلاص انتي اطلبي من اخوكي انك تأجريها ولو رفض وقالك اؤجرها انا قولي له خلاص في حل انت ادفع لي 3000 كل سنة وهو نصف ايجارها مقابل انها تفضل مقفوله كده .. يعني انا هسيب لك نصف الايجار عشان انت اخويه وفي المقابل انت هتسيب لي الشقة عشان مش منتفع بيها اساسا ومش دافع ثمنها كله .. لانها وهي مغلقة كده انتي بتخسري كل سنة 6000 فلان هو سبب خسارتك يبقى يشيلها معاكي بالنص هو 3 وانتي 3

اذا الشقة هتفضل مغلقة واخوك يدفع لك نصف ايجارها مقابل هذا الوضع وبكده غلقها هيبقى عاد عليكم انتم الاثنين بنفس الخساره هو خسر مبلغ وانتي خسرتي زيه بالظبط في مقابل انه يستمتع بالبيت كله لوحده مش يبقى البيت بتاعه وانتي تخسري وهو قاعد كسبان . . هو هيتنازل ويدفع مع انه مش مجبر عشان يحصل على ميزة ان البيت ميدخلهوش غريب وانتي برضه هتتنازلي عن نصف ايجار شقتك مقابل تنازله هذا وفي سبيل ان تفضل بينكم روابط الاخوه زي ماهي ..

هتنفذوا الاتفاق ده لو وافق بدون اي اوراق رسمية وبدون ماتديله مفتاح الشقه .. يعني مجرد تعهد منك انك مش هتأجريها وانتهينا بحيث لو جاء يوم مدفعش الي عليه يبقى خلاص الاتفاق لاغي ..

لو رفض وده متوقع جدا انه هيرفض يبقى وسطي حد من اخوالك او ماشابه .. بدون خناق ولا شيء .. قولي له انت بتقول تبقى مقفوله وانا بقول استفيد منها فنشوف راي حد يحكم مابينا .. هيقولك لاه اؤجرها وبثمنها وهو الست الاف قولي له اسفه لاني مقدرش اقولك كل سنة هات فلوس ولو مجبتش مش هقدر اشتكيك ( عادي الي مينكسفش منك متنكسفش منه ) قوليها له في وشه عادي ..

وفي الاول والآخر اووعي تخسري اخوكي مهما حصل وزي ماقلت لك قبل كده هتخسري اخواتك النهرده هيبيعك جوزك بكرا .. ده قانون من القوانين الثابته التي لايشذ عنها الا القليل .. والقليل جدا ..

اذا واحد بياخد حق اخته ازاي متخسرهوش