قصيدة مش باقى منى

[nancy]

قصيدة مش باقي منى

للشاعر جمال بخيت

مش باقي منى غير شوية ضى في عنيا

إنا حدهملك وامشي بصبري في الملكوت

يمكن في نورهم تلمحي خطوة تفرق معاكى بين الحياة والموت

مش باقي منى غير شوية نبض في عروقي خدي وعيشي

وافتح لي تابوت افرح بريحه ورد فرعوني وربنا في عوني

إذا دخلت الجنة ولا النار حشتاق لضحكتك وقعدتى في الدار

والقهوة متحوجه من طيبة العطار

في كل يوم الصبح اشرب حليب قبطي

وفى النهار والمسا امسك ستار الكعبة لو سبتي

واثبت اذا هربتى

اهديكى عمري وحسي وجوارحي

اهديكى جرحى هو إلى باقي في دنيتي لما خلص فرحى

مش باقي منى غير شوية لحم في كتافى

بلاش يتبعثروا في البحر

بلاش يتحرقوا في قطر الصعيد في العيد

بلاش لكلب الصيد تنوليهم

خدي إلى باقي من الأمل فيهم

وابنيلى من عظمهم في كل حارة مقام

وزورينى مرة وحيده لو كل ألفين عام

الم الجراح يتلم

مش باقي منى غير شوية دم

متلوثين بالهم مرين وفيهم سم

كانوا زمان شربات والنكتة سكرهم

شربتهم الخفافيش في الب أوكرهم

مش باقي منى غير شوية دم مقدرش اسقيكى مواجعهم

ويرضوا مقدرش ارميكى وأبعهم

يمكن في مرة تعوز تطلبيني شهيد

حاحتاج يميها الدم يمضى على شهدتى

مش باقي منى غير شوية قوة في إرادتي

على شوية شعر من خطى

حسبي عليهم وأنت بتخطي

وأنت في صبح الدلال بتعطري شطي

مش باقي غير شوية ضى في عنيا

انأ مش عاوزهم

لو كنت يوم حالمحك وأنت بتوطى

في معركة مفيهاش ولا طيارات ولا جيش

وأنت في طابور العيش

بتبوسى أيد الزمن ينولك لقمة من حقك المشروع

مش باقي منى غير شهقة

شهقة في نفس مقطوع

بفتح لها سكة ما بين رئة وضلوع

ما بين غبار ودموع

وأنا تحت حجر المقطم في الدويئة بموت

أنا والعطش والجوع

يئن تحتي التراب

وأنا صوتي مش مسموع

يا حلمنا الموجوع من المرور ممنوع

مستني لما يمر موكب سلاطينك

مش باقي منى غير شوية رحمة من طينك

على شوية صبر من دينك

مش باقي منى غير حبة غنى تايهين

في الضلمة مش لاقين حس الفواعلية

ولا صوت مركبي عفي فوق المعدية

ولا صوت بناتي العذارى في كل صبحيه

والغنوه أمنية يما نفسي أقابل حبيبي

وأنا على الزراعية صوتك وصوتهم غاب

وأنا تحت حجر المقطم بموت لوحدية

الليلية راحت عيوني تطل على البستان

وجناين الرمان رجعت لي توصف عناد الغل والدخان

وسحابة سوده تضلل على غُنى الغلبان

رجعت لي توصف هبوب الموت على الألوان

رجعت لي توصف خيال الزُل في موائد الرحمن

مش باقي منى غير شوية كفر بشروقك

وأنا منبع الإيمان

مش باقي منى غير شوية ضى

وعنيا مش قادرة تلمحك

في وحدتي محنى

خايف أموت من الخوف والضعف يفضحني

السجن عشش في قلبي وماشى في شوارعك

نفس إلى بعني وخدعني بالرخيص بيعك

أشيل حمولى أنا ولا أشيل حملك

ماعدت املك شيء فيكى ولا فيا

ولا قيراط ولا بيت

ولا نسمة صافية تلاغى النيل بحريه

مش باقي منى غير شوية حب جرحني

ولا باقي منى غير شوية ضى في عنيا

لنك القصيدة على اليوتيوب

http://www.youtube.com/watch?v=SJzCEXmMNmY

[الباشمهندس ياسر]

الاخت نانسى

ينفع تحطى موضوع يقلب عليا المواجع وانا خلاص مسافر كمان كام يوم

ربنا يسامحك

[Mohamed Fayek]

الاخت نانسى

ينفع تحطى موضوع يقلب عليا المواجع وانا خلاص مسافر كمان كام يوم

ربنا يسامحك

تروح وترجع بالسلامة ياباشا والله معك

[nancy]

اسفة طبعا انها قلبت المواجع بس انت مش متخيل القصيدة دى ملخص الحال والى جوة كل المصريين بس فى صورة شعرية انا بكيت لما سمعت القصيدة فى برنامج العاشرة واول ما لقتها على النت فى اليو تيوب كتبتها كلمة كلمة ونزلتها فى كل المواقع الى انا موجودة فيها على النت وسعيدة ان 27 قروها فى خلال كام ساعة يا ريت مليون يقراوها

انا فى راى دى مش قصيدة دى اكتر من كدة بكتير جدا

[الباشمهندس ياسر]

الاخت نانسى

ينفع تحطى موضوع يقلب عليا المواجع وانا خلاص مسافر كمان كام يوم

ربنا يسامحك

تروح وترجع بالسلامة ياباشا والله معك

الله يسلمك و بارك الله فيك

اسفة طبعا انها قلبت المواجع بس انت مش متخيل القصيدة دى ملخص الحال والى جوة كل المصريين بس فى صورة شعرية انا بكيت لما سمعت القصيدة فى برنامج العاشرة واول ما لقتها على النت فى اليو تيوب كتبتها كلمة كلمة ونزلتها فى كل المواقع الى انا موجودة فيها على النت وسعيدة ان 27 قروها فى خلال كام ساعة يا ريت مليون يقراوها

انا فى راى دى مش قصيدة دى اكتر من كدة بكتير جدا

هى فعلا مش قصيدة

هى حكايه شعب بينتهى بس بالبطىء

عموما الامل موجود

و بكره مصر تعووووووووووووووووود

ان شاء الله

[ابو حودة]

فعلا اصبحنا كمغتربين كالمستجير من الرمضاء بالنار

لا قادرين نعيش بعيد عنها ولا قادرين ناخد قرار الرجوع وهي حالها على ماهي عليها

المشكلة ليست في الفقر ولكن المشكلة في السياسات التي ادت الى الإفقار

وربنا يصلح الحال

[طه بدر]

الاخت العزيزة نانسى

انا مش هاقول الا كما قالت منى الشاذلى للشاعر

الله يسامحك

ومع هذا فقد قرات القصيدة واستمعت اليها عشرات المرات وارسلتها لكل من اعرف فهى حقا كلمات توزن بالذهب وتخرج من القلب الى القلب

الكلمات على الجرح

وتحلل لموضعنا ومشاعرنا افضل من كل ما تلفظه مطابع الجرايد حكومية ومستقلة من غثاء الكلام

فشكرا للشاعر جمال بخيت وشكرا لك على امتاعنا بهذه التحفة

ملاحظة (الله يسامحك) دعاء للمرء وليس عليه

تحياتى

تم تعديل 22 يناير 2009 بواسطة طه بدر

[nancy]

الله يسمحنا كلنا القصيدة دى تمسنا كلنا بلا استثناء

وانا سعيدة انها اثرت فى ناس كتير

[زهرة الجبل]

الأخت الكريمه نانسي

لم أسمع القصيده في البرنامج لأنني لم أشاهد هذه الحلقه من العاشره مساءً ..

القصيده بالفعل صوره متحركه لواقع حقيقي رغم مرارته .. عندما قرأتها هنا عدت و سمعتها على اليو تيوب

و إستدرجتني القصيده لمشاهدة الحلقه كامله بأجزائها الخمسه على اليو تيوب

أبدع الشاعر جمال بخيت و أبدعتي بإختيار النقل

أشكرك لمشاركتنا بها .. و فعلاً .. الله يسامحك و يسامحه .. و الله المستعان

[nancy]

يسامح كل المظلومين وكل الى كان السبب فى الظلم يلقى عقابة الحقيقي وياريت يكون فى الدنيا كمان مش فى الاخرة بس يمكن حزن الناس يخف شوية

[سهيلة]

اولا حمد اللة بالسلامة يا نانسى

فينك من زمان

وحشتينا بجد

ثانيا

شكرا جزيلا لكى لنقلك لهذة القصيدة اللى اكتر من راءعة

لشاعر الكبير جدا اللى قدر يجسد احاسسيس المصريين المظلمومين بكلام وحروف

واللة قصيدة موجعة والواحد دمع غصب عنة وهوة بيسمعها

ونسال اللة ان تزاح هذة الغمة والظلمة ويشرق الفجر من جديد

كفاية كدة

بجد الظلم فاق الحد

[nancy]

مرسى يا سهيلة على كلامك دة وانا سعيدة انك افتكرتينى لان محدش فكرنى هنا غيرك انت وشهد

وعندك حق فعلا القصيدة بتاثر فى كل الى بيقراءها

[الباشمهندس ياسر]

مش باقي مني غير شوية ضي ف عينيا

أنا هاديهوملك

وامشي بصبري ف الملكوت

يمكن ف نورهم تلمحي خطوة

تفرق معاكي

بين الحياة والموت

مش باقي مني غير شوية نبض ف عروقي

خُدي.. وعيشي..

وافتحي لي تابوت

أفرح بريحة ورد فرعوني

وربنا ف عوني

إذا دخلت الجنة ولاّ النار

هاشتاق إلي ضحكتك

وقعدتي ف الدار

والقهوة متحوجة

من طيبة العطار..

ف كل يوم الصبح

باشرب حليب قبطي

وف النهار والمسا

بامسك ستار الكعبة لو سبتي

واثبت إذا هربتي

أهديكي عمري وحسي وجوارحي

أهديكي جرحي

هو اللي باقي ف دنيتي لما خلص فرحي

مش باقي مني

غير شوية لحم ف كتافي

بلاش يتبعتروا ف البحر

بلاش يتحرقوا ف قطر الصعيد

ف العيد

بلاش لكلب الصيد.. تناوليهم

خدي اللي باقي من الأمل فيهم

وابني لي من عضمهم

في كل حارة مقام

وزوريني مرة وحيدة

لو كل ألفين عام

ألم الجراح يتلم

مش باقي مني غير شوية دم

متلوثين بالهم

مُرين وفيهم سم

كانوا زمان شربات

والنكتة سكرهم

شربتهم الخفافيش

في قلب أوكارهم

مش باقي مني غير شوية دم.. ماأقدرشي

أسقيكي.. مواجعهم

وبرضه ما أقدرشي

أرميكي..

وأبيعهم

يمكن ف مرة تعوزي تطلبيني شهيد

هاحتاج يوميها الدم

يمضي علي شهادتي

مش باقي مني

غير شوية قوة ف إرادتي

علي شوية شِعر من خطي

حاسبي عليهم وانتي بتخطي

وانتي ف صبح الدلال

بتعطري شطي..

مش باقي مني

غير شوية ضي ف عينيا

أنا مش عايزهم

لو كنت يوم هالمحك

وانتي بتوطي

في معركة مافيهاش

ولاطيارات ولاجيش

وانتي ف طابور العيش

بتبوسي إيد الزمن

ينولك لقمة

من حقك المشروع

مش باقي مني.. غير

شهقة ف نفس مقطوع..

بافتح لها سكة

ما بين رئة.. وضلوع..

ما بين غبار.. ودموع..

وأنا تحت حجر «المقطم»

ف الدويقة باموت

أنا.. والعطش.. والجوع..

يئن تحتي التراب

وانا صوتي مش مسموع..

ياحلمنا الموجوع..

من المرور ممنوع..

مستني لما يمر

موكب سلاطينك..

مش باقي مني

غير شوية رحمة من طينك..

علي شوية صبر من دينك..

مش باقي مني غير حبة غُنا تايهين

ف الضلمة مش لاقيين

حس الفواعلية..

ولا صوت مراكبي عَفي

فوق المعدية..

ولا صوت بناتي العذاري

في كل صبحية..

والغنوة.. أمنية

«ياما نفسي أقابل حبيبي..

وانا ع الزراعية»..

صوتك وصوتهم غاب..

وانا تحت حجر المقطم.. باموت لوحديّا..

الليلة راحت عيوني

تطل ع البستان..

وجناين الرمان..

رجعت لي توصف عناد الغل والدخان

وسحابة سودا تضلل

علي الغُنا الغلبان..

رجعت لي توصف هبوب الموت

علي الألوان..

رجعت لي توصف….

خيال الذل..

ف موائد الرحمن..

مش باقي مني غير شوية كُفر بشروقك

وأنا..

منبع الايمان..

مش باقي مني..

غير شوية ضي..

وعينيا

مش قادرة تلمحني..

في وحدتي محني..

خايف أموت م الخوف

والضعف يفضحني..

السجن عشش ف قلبي

وماشي ف شوارعك..

نفس اللي باعني وخدعني

بالرخيص بايعك..

هاشيل حمولي انا

ولا هاشيل حملك ؟!

ماعدت أملك شيء..

فيكي.. ولا فيّا

ولا قيراط ولا بيت..

ولا نسمة صافية تلاغي النيل بحرية..

مش باقي مني

غير شوية حب جارحّني

ولا باقي مني

غير شوية ضي ف عينيا

[قلب ابيض]

إرجع بأه

وفك حبل المشنقة

وامسح همومنا باللقا

ياجدرنا تحت التراب

يا حلمنا فوق السحاب

يا عمرنا طال العذاب

فى الإنتظار

رجعوا التتار

لكننا أشواك بتتحدى العطش

وجنود بتتحدى الفرار

نسقط ساعات

لكننا نفضل كبار

نفتح عيون للانبهار

متشوقة

فارجع بأه

وفك حبل المشنقة

وارفع راياتك يا أبى

قريش بتسأل عن نبى

يهديها من بعد العمى

خالد قتل مسيلمة

لكن جنوده الكدابين

عينهم فى طابا

يتحدوا فرسان الخطابة

ويلجموهم بالسكوت

فى عصر بيروت الحزين

خالد قتل مسيلمة

لكن جنوده الكدابين

بيفتتوا دلتاك بصبر

وبيحفرولى فى سينا قبر

وبيركبوا نيلى العنيد

وبيخنقونى فى الصعيد

بكلام نكت وبتريقه

فارجع بأه

دا الهزل زاد

والباشا إيده على الزناد

وصدقى بيصلى لفؤاد

وبيحلفوا نرجع عبيد

نتباع فى أسواق الكساد

الهزل زاد

والباشا إيده على الزناد

والسد جوه الفوهة

لو ينسفه تغرق بلادك كلها

وتعود سنين الأوبئة

تسكن ضلوعنا الضيقة

فأرجع بأه

الشمس سكنت كل غرب

حلفت ما ترجع للشروق

من أى شرق

إن لم تكن فى الأنتظار

إنت وسيفك -والتتار تحت القدم-

فأقضى بصوتك على العدم

إعدل موازين الزمان

رتب نجومنا فى الفضا

وأكسى وجوهنا بالرضا

بعد الشقى

دى الأمة لسه محتاجاك

والأرض لسه مهيأة

فأرجع بأه

"كلمات جمال بخيت 00فى ذكرى جمال عبد الناصر "

تم تعديل 16 سبتمبر 2009 بواسطة قلب ابيض

[الباشمهندس ياسر]

المشكلة بقى يا قلب ابيض

انى مش تبع الزعيم جمال عبد الناصر خااااااااااالص

و ان كنت بحبه قلبى او مش بحبه و ده مش موضوعنا طبعا

انما انا شايف انه احد اسباب وصولنا للدرجة اللى احنا فيها دى بشكل او باخر

مودتى و احترامى

ياسر

[قلب ابيض]

حقك على n2&(

تحياتى

[bentmasria]

اختيار رائع

حروفه حارقة موجعة تمس وتُحس وتؤلم

بوركت يا باشمهندس محتاجين كتير قوى عشان

نقدر نرجع ربع ما كناد

يارب وادينى بحلم معاكم

البنت المصرية

[الباشمهندس ياسر]

حقك على :lol:

تحياتى

مقدرش على زعلك ابدا

اختيار رائع

حروفه حارقة موجعة تمس وتُحس وتؤلم

بوركت يا باشمهندس محتاجين كتير قوى عشان

نقدر نرجع ربع ما كناد

يارب وادينى بحلم معاكم

البنت المصرية

لو بطلنا نحلم نمووووووت

ربنا يكرمنا و نعرف نحلم صح و نشتغل صح و نحول احلامنا لحقيقة

[هشام الجنيدى]

شكرا يا باشمهندس على مجهودك الكريم وانا من اشد المعجبين بالكبير جمال بخيت ....

دمتم بكل ود وحب وكل سنه وانتو طيبين

[الباشمهندس ياسر]

و انت طيب يا استاذ هشام

غايب بقالك فترة

طمنا عليك