تعالوا نزرع البامية فى هولندا

[هشام عبد الوهاب]

تضامنا مع الحكومة بعد تصريحها الجاد بزراعة القمح فى رومانيا .. الخبر حقيقى وموجود فى الصفحة الأقتصادية عندنا.

الحقيقة فكرت كثيرا منذ الأمس فى هذه المشكلة العويصة ، فبعد ان قمت ببهدلة الطباخ على طاجن البامية الذى تعاطيته مع صديق لى بأحد المحلات وجدت الطباخ وهو يقوم من على الأرض بمساعدة زملاءة ويقول موجها كلامه فى الهوا خوفا من عضلات صديقى بطل كمال الأجسام .

مش قادرين ع الحكومة وجايين يفتروا علينا

رد صديقى بسرعة واستغراب : حكومة ايه ياجدع انت مال الحكومة ومال البامية

واذا بصاحب المحل يتدخل ويقول وهو يتلفت حوله ، اصل يابهوات محصول البامية السنة دى اضرب والوزير بيقول ان العيب فى الأرض .

وفضلت افكر فى حل لموضوع البامية خصوصا بعدما تأكدت من ان المحصول اتضرب فعلا ويظهر انى لن اكل بامية تانى ، لا انا ولا الشعب المصرى المحب للبامية وعرفت من بعض الأصدقاء الذين يعملون فى مناصب حساسة فى الدولة ان الكوسة والبسلة ام جزر والبسلة السادة والكرنب والفلفل وكله كله اتضرب لكن الحكومة مخبية على الناس .

وعشان يوم الحكومة بسنة قلت اتصرف ... ولقيت الحل .

بدل مانزرع البامية فى طنطا والأرض هناك مش على فيو خالص والبقر بيعمل حاجات وحشة على نفسة وكمان البامية حيلمها الفلاحين وهما ايديهم مش نضيفة ولابيلبسوا جوانتيهات . يبقى نزرع فى مكان شيك وهاى كلاس وكمان على فيو يجنن واخترت هولندا علشان كده .

المفاجئة العجيبة ان اصدقائى فى محاورات المصريين اتصلوا بيا ولقيت ايه شوية افكار هايلة .

نزرع كرنب فى المانيا ... نزرع فلفل فى فرنسا .... نزرع المكرونة فى ايطاليا . المهم نزرع بره وخلاص وارضنا نعمل فيها اى حاجة تانية مش مهم .......

المهم كله يبقى على فيو.

[se_ Elsyed]

وبهذه المناسبة يعلن المعلم س س ناظر أوقاف ومدير أطيان الخديوي عباس حلمي الثاني سابقاً عن إستعداده لتوريد العمالة اللازمة لجمع هذه المحاصيل في تلك البلدان الجميلة عن طريق تنظيم رحلات شارتر بطائرات رش المبيدات الخاصة بشركتنا ...

ومكتبنا على أستعداد لتحمل كافة التكاليف الخاصب بالبازبورتات والتأشيرات والملابس التي سيرتديها الفلاحين وهي عباره عن :

1- بالنسبة للفلاحين الرجالة سيكون اليونيفورم مكون من قطعتين ، جلابية جينز ولاسه جابردين مخططة بالطول ..

2- بالنسبة للفلاحات : عدد اتنين قطعة برضوا .... جلابية ليموني كوشية ومنديل بأويه فسفوري شيفون ....

مع تحيات س س مقاول أنفار ( جمع محاصيل ، لم دودة ....... بتاع كله )

[disappointed]

والنبى الله يسترك يا س.س ما تبقاش تنسى تكتب فى الإعلانات و المناقصات أن "الكوسة" بالذات غير مطروحة فى أى مناقصات أو عروض لزراعة محاصيل مصرية فى الخارج

(على الأقل من باب أن موطنها الأصلى هو أرض مصر المحروسه)

و..

و...

و...

القمح الليله

الليله

ليلة عيده

يارب تبارك

تبارك

وتزيده

وسلّم لى على بوخارست

[Lighthouse]

ممكن يا س س

حيث انك بتاع كله

تشوف لنا نزرع السلطة فين

[zamalkawy]

طيب الفلاحين هنجبهم منين من الدول اللي هنزرع فيها و لا من مصر ؟

و ياريت اعرف مرتب الفلاح علشان اسيب البرتول و اروح اشتغل فلاح اهو منه الف العالم و منه اعيش في جو نضيف :)

يعني دلوقتي الخضار اتضرب و اللحوم و الفراخ مضروبة

طيب نكل ايه سمك :) و اللهي مية مية انا بموت في السمك بس لو اضرب محدش يقولي

[ragab2]

قرار الحكومة

بزراعة القمح قى رمانيا وهولندا هو قرار صائب

حتى تتفرغ مصر للصناعات الثقيلة وزراعة الكوسة والقرع

وتترك زراعة القمح الذى لا يحتاج الى ذكاء لهذه البلاد المتخلفة