عشان تعرفوهم روحوا شجعوهم

[adrianocrespo]

بمناسبه كأس العالم للشباب

تقوم شركه كوكاكولا راعيه البطوله بعمل بعض الاعلانات

تحت شعار عنوان الموضوع

عشان تعرفوهم روحوا شجعوهم

و هو عباره عن مواقف تحدث للاعبي منتخب مصر الغير معروفين للناس

و يتم التعامل معهم معامله الناس العاديين

مثلا ..... احد اللاعبين راكن في الممنوع يجي امين شرطه يخبط له علي العربيه و يقوله يالا يا بني من هنا مفيش ركنه

يقوم الولد زعلان و طالع بالعربيه

طب المفروض لو عارفه ........ يسيبه يعني

و غيرها ( حوالي خمسه اعلانات )

اعلان مستفز بصراحه

ايه رأي حضراتكم ؟

[الباشمهندس ياسر]

كنا لسه بنتكلم ف موضوع قريب عن مستوى التخلف فى الاعلام بتاعنا

[president]

اعلان جامد جدا وبيحاول يدخل الناس فى مود البطوله عشان نشجع المنتخب . بالنسبه للأعلان اللى اللى انت بتحكى عنه .

فكرة الأعلان مش ان امين الشرطه يسيبه عشان هوا معروف الأعلان قصده بدل ما أمين الشرطه يقولوا يالا يابنى لو كان عارفه كان هيقولوا ياكابتن ... ممنوع الوقوف هنا .

تخيل نفسك ان امين شرطه ساكن فى شارعكم وشافك واقف فى الممنوع لو هو عارفك اكيد هيزهر معاك وهيقوللك مينفعش توقف هنا غير لو هوا ميعرفكش هيبقى فى نوع من الرسميه شويه دى فكرة الأعلان .

بس صحيح هوا اعلانات المنتخب مستفزاك ليه ؟ مش دا اعلان عشان منتخب مصر ولا منتخب بلد تانيه ؟

نقطه اخيره ال 11 لاعيب بتوع منتخب مصر ممكن يفرحوا 80 مليون واحد وبرده ممكن يزعلوهم ويارب مايزعلونا عشان كده ال 11 لاعب دول مش زى الناس العاديه .

تحياتى

[Shehab]

فكرة الأعلان مش ان امين الشرطه يسيبه عشان هوا معروف الأعلان قصده بدل ما أمين الشرطه يقولوا يالا يابنى لو كان عارفه كان هيقولوا ياكابتن ... ممنوع الوقوف هنا .

تخيل نفسك ان امين شرطه ساكن فى شارعكم وشافك واقف فى الممنوع لو هو عارفك اكيد هيزهر معاك وهيقوللك مينفعش توقف هنا غير لو هوا ميعرفكش هيبقى فى نوع من الرسميه شويه دى فكرة الأعلان .

و يقوله يا كابتن و لا يا زفت ليه ...هو هيناسبه...و يخبط له ع العربية ليه من اساسه...يكونش شاريها له؟؟؟

و بعيداً عن تخيل الأمين اللى ساكن فى شارعنا....عشان لو فيه أمين فى شارعنا هاسيب الحى كله و أمشى!!

يعنى كده أفهم ان حضرتك شايف أن لو ماكنتش لعيب كورة أو اى واحد من الأفاضل اللى فى مهن تانية كتير

غنية عن التعريف و اللى بقوا فى صدارة المجتمع....و لو ماكنتش عارف الشخص اللى بيطبق القانون معرفة شخصية

يبقى أتعامل وحش و بأسلوب مقرف؟؟

و بعدين حضرتك لاحظ أن فيه فرق كبير أوى بين الرسمية و النظام و بين قلة أدب و قلة زوق فى التعامل.

تحياتى ليك و للى ال 80 مليون اللى ما بقاش يفرحهم و لا يحزنهم الا كورة

ولو انى اعتقد ان اكتر من نصهم مش هايحزنوا اكتر من كده لأن شغلهم الشاغل يدبروا قوت يومهم أزاى

[adrianocrespo]

بس صحيح هوا اعلانات المنتخب مستفزاك ليه ؟ مش دا اعلان عشان منتخب مصر ولا منتخب بلد تانيه ؟

نقطه اخيره ال 11 لاعيب بتوع منتخب مصر ممكن يفرحوا 80 مليون واحد وبرده ممكن يزعلوهم ويارب مايزعلونا عشان كده ال 11 لاعب دول مش زى الناس العاديه .

اهلا و سهلا بحضرتك

و عيد سعيد

المنتخب بتاع بلدي

ده صحيح

انا مصري

اللي مزعلني ان امين الشرطه اتعامل مع اللاعب بجليطه و خبطله عالعربيه

و كأن ده العادي

متعملش معاه بطريقه رسميه

لكن لو كان عارفه

كان قاله يا باشا و اتفضل يا كابتن

و بعدين يا استاذنا

اختلف معاك في فكره ان اللاعبين هما اللي بيفرحوا الشعب المصري

اذن تجب معاملتهم معامله خاصه

هما مش بيلعبوا لله و للوطن

و يتقاضوا مبالغ طائله

و هذا حقهم تجاه واجبهم الذي ادوه

لكن ليس من حق اي لاعب ان يعاير الناس انه يفوز بالبطولات و يفرحهم

لانه قبض ثمن هذه البطولات

و لماذا لم نسمع ان لاعبي المنتخبات الاخري تطالب بمعامله خاصه

او ان مايكل فيليبس الحاصل علي اكبر عدد من الميداليات الذهبيه في تاريخ الاوليمبيات يقول انا اللي فرحت الامريكان و من حقي كذا و كذا

علي فكره الاعلانات فكرتها حلوه

و تدل علي عدم معرفة الناس باللاعبين

و عدم اهتمام الاعلام بالبطوله

و الاعلانات الباقيه جميله

بس انا استفزتني معامله امين الشرطه للاعب _ و اكرر _ بجليطه و قله ذوق و كأنه العادي

تقبل تحياتي

[فــيــروز]

بصراحه أنا من الذين استفزّهم الإعلان لأسباب ذكرها بالفعل المشاركون بالموضوع ..

يعنى أحد الإعلانات -أظنّه فى مطعم- يظهر به عامل المطعم يتحدّث بقلّة ذوق مع اللاعب و السبب -الذى يقدّمه الإعلان- إنّه ما يعرفوش !!

وكأن أى مواطن عادى مش بيلعب كوره ولا بيرقّص ليس من حقّه معامله محترمه و هذه المعامله لا ينالها سوى لاعيبة الكوره !!

كلّنا بنتعب فى أعمالنا من غير ما نمنّ على غيرنا أنّنا نقوم بأعمالنا التى نتقاضى عليها أجرا و التى يكون جزء منها ليس مجرّد إسعاد الناس بل خدمتهم و قضاء مصالحهم .. فبأى مبرر يكون من حق لاعبى الكره معامله خاصّه سينالونها بعد ما نعرفهم !!

نقطه أخرى تقنيه بعض الشئ : مش لازم عشان "نعرفهم" ---> إننا "نروح" نشجّعهم كما يقول سلوجان الإعلان .. معرفة لاعبى الكره سواء صورهم أو معلومات عنهم صارت متاحه و سهله من خلال النت أو حتى من خلال التليفزيون .. مفيش أى ارتباط شرطى بين "روحوا شجّعوهم" و "تعرفوهم" .. أنا باحسّ إن دى نقطة ضعف شويه فى منطقية الإعلان

[president]

اولا تحياتى لكم جميعا .

ثانيا حابب اوضح نقطه مهمه هوا الفرق مابينا احنا كاأفراد بنخدم بلدنا بشغلنا وبنجتهد فيه جدا وبين ناس تانيه بتمثل اسم البلد . انا هابعد تماما عن موضوع الكوره

وهاضرب مثال زى الدكتور زويل والدكتور يعقوب. وهاسأل سؤال اللى يخلى الواحد فينا بيقشعر وينتشى كده لما يسمع ان واحد فيهم حقق انجاز ؟

انا عن نفسى ماببصش ان الدكتور زويل بشخصه هو صاحب الأنجاز انما باصصله ان مصرى صاحب الأنجاز .

فرق كتير انك تكون متميز على اقرانك جوا بلدك او ان تخلى بلدك اعلى من بلاد تانيه حتى لو فى مجال الكوره .

افتكروا قد ايه مصر كلها فرحت فى 2006 و فى 2008 دا مش عشان مصر كسبت بطوله كوره بس عشان حسينا ان بلدنا بقت نمره واحد فى مجال معين . يارب اكون قدرت اوصلكم

فكرت ان ليه معتبر لعيبة المنتخب اشخاص مش عاديين وأى حد بيمثل بلده فى اى مجال وبيحطها فى مكانه عاليه فأكيد برده هنعتبره مش شخص عادى .

نقطه تانيه من قال ان لعيبة المنتخب بيمنوا علينا بالبطولات محدش قال كده خالص بالعكس اى لاعب بيلعب فى المنتخب بتكون امه دعياله .

بالنسبه للأعلان نفسه فأكيد اى اعلان فى الدنيا لازم يكون فى مبالغه فى الشخصيه . يعنى تفتكروا حضراتكم ان السمنه اللى بيعلنوا عنها بتطلع الأكل بالشكل الجميل ده .

ولا مسحوق الغسيل بينضف بالطريقه دى أكيد لأ بس الأعلان عشان يلفت نظرك ويشدك لازم يبالغ فى الكراكتر عشان كده اداء امين الشرطه او عامل المطعم بيكون فيه مبالغه

بعض الشئ عشان اديك احساس ان اللعيب اللى فى الأعلان لو كان معروف كان هيتعامل بطريقه احسن من كده وبالتالى بيخلق نوع من التعاطف معاه واللى يوصلنا

ان احنا لازم نشجعهم عشان نرفع روحهم المعنويه.

هدف الأعلان مش اننا نعرف اللعيبه زى ماقالت الأخت الكريمه الهدف منه انه يوصلنا ان فى بطوله يوم 24 سبتمر وكاس عالم ولازم نشجع منتخبنا . واكيد فى ناس كتير ماكنتش عارفه

حاجه عن البطوله غير لما حملة الأعلانات دى ظهرت .

حاجه اخيره للأخ شهاب مش بس الكوره اللى تزعل وتفرح شعبنا . بس صدقنى الكوره هى الترفيه الوحيد والممتع للناس اللى بتدور على قوت يومها بالعافيه .

انزل على القهاوى الشعبيه وقت الماتشات المهمه وشوف الناس بتطلع ال خمسين قرش ازاى تمن كوباية الشاى عشان يتفرجوا على ساعه ونص كوره .

تحياتى لكم

تم تعديل 21 سبتمبر 2009 بواسطة president

[Dr.mmfriend]

والله يا جماعه انا مش عارف ارد اقول ايه

الاعلان ده استفزنى جدا جدا وخصوصا انى مش بحب الكورة اصلا

ايه يعنى اعرفوهم وشجعوهم

هو الامور وصلت انهم يعملوا اعلانات علشان الناس تروح تشجع لا تعرف اللعيبه!!!

يعنى مش كفايه اعلانات الشحاته الى ماليه التليفزيون طول رمضان وخلوا رقابتنا قد السمسمه قدام الاخوة العرب

كمان اعلانات التفاهه

والاستاذ الى بيقول انه 80 مليون بيفرحهم الكورة

مهو دى غلطه قاتله سببها الاعلام الموجه المدمر لبنيه الشعب

لو الاعلام بطل يزيع كوره وبطل يجيب ماتشات ويعملها اهميه اكيد الناس هتلاقى اى حاجه مفيده تشغلها

انما هو موجه بهدف التنفيس عن شعب اهبل مطحون مش لاقى حد يلعب بيها او يتسلى بيها

وعذرا لو طولت

وده مجرد رايي الشخصي

[president]

الاعلان ده استفزنى جدا جدا وخصوصا انى مش بحب الكورة اصلا

ايه يعنى اعرفوهم وشجعوهم

كمان اعلانات التفاهه

والاستاذ الى بيقول انه 80 مليون بيفرحهم الكورة

مهو دى غلطه قاتله سببها الاعلام الموجه المدمر لبنيه الشعب

لو الاعلام بطل يزيع كوره وبطل يجيب ماتشات ويعملها اهميه اكيد الناس هتلاقى اى حاجه مفيده تشغلها

انما هو موجه بهدف التنفيس عن شعب اهبل مطحون مش لاقى حد يلعب بيها او يتسلى بيها

ماهو عشان انت مش بتحب الكوره بنيت رايك ده .

وصفت شعب واناس انهم هبل ومش لا قيين حاجه يعملوها لمجرد ان انت مابتحبش الحاجه اللى بيحبوها .

الرياضه عموما ومن ضمنها كرة القدم عمرها ماكنتش هبل ولو ترجع لأيام الصحابه هتلاقى فى (رمايه وسباحه وركوب خير) .

اختلافك فى الرأى شئ محمود ولكن الغير مقبول هو نعت طرف أخر بالسذاجه والهبل لمجرد انك مابتحبش الحاجه اللى بيحبوها .

يعنى انا مابحبش اروح سينمات بس ماينفعش اقول على الناس دول انهم سطحيين . وسائل الترفيه تختلف من شخص الى اخر بس اهم حاجه انها تكون شرعيه .

ولو كلمة ال 80 مليون هيا اللى عمله مشكله ياسيدى نخليها 10 مليون .

تحياتى لك

[Shehab]

سعادة الريس.....President باشا

أولاً بعيداً عن أى شىء احييك ع هدوءك و ردك بسلاسة رغم انك انك الوحيد اللى عكس التيار

اولا تحياتى لكم جميعا .

ثانيا حابب اوضح نقطه مهمه هوا الفرق مابينا احنا كاأفراد بنخدم بلدنا بشغلنا وبنجتهد فيه جدا وبين ناس تانيه بتمثل اسم البلد . انا هابعد تماما عن موضوع الكوره

وهاضرب مثال زى الدكتور زويل والدكتور يعقوب. وهاسأل سؤال اللى يخلى الواحد فينا بيقشعر وينتشى كده لما يسمع ان واحد فيهم حقق انجاز ؟

انا عن نفسى ماببصش ان الدكتور زويل بشخصه هو صاحب الأنجاز انما باصصله ان مصرى صاحب الأنجاز .

معلش يا باشا...ماينفعش تقارن بين دول و دول....شتان الفارق

لأنه ببساطة شديدة ممكن تشوف أى أسم من الأسماء ديه قدم أيه فى المجال بتاعه و ساهم فيه ازاى

مش هقولك للبشرية......هقولك ع الأقل لو حتى للمكان و لا المجتمع اللى هما فيه

هقولك لو أفترضنا أن هما مثلاً أتركنوا ع جنب و أختفوا من الحياة اساساً...تفتكر أيه تأثير عدم وجود واحد

منهم مقارنة بأختفاء منتخبات كرة القدم فى البلاد العربية كلها مش مش مصر بس؟؟

هقولك شوف الناس ديه بذلوا مجهودات اد أيه و تعبوا و حاربوا أد أيه عشان يوصولوا الى ما هم فيه الآن

أى نعم ممكن تكون ظروفهم كانت أفضل من الظروف دلوقتى...ماشى....هنقول البلد هى اللى علمتهم

لحد الجامعة ....و ماله......لكن كل مشوارهم بعد كده كان بمجهودهم فقط ....دون اى تشجيع أو مساندة

ما بنعرفهمش بس غير لما بياخدوا جايزة و يتكرموا بره......و نجرى عليهم ساعتها نقولك المصريين أهما

و للأسف ع الرغم من كل ده و الرغم من حجم الناس ديه و قيمتهم ما بيخدوش واحد ع ميه من التشجيع

اللى يستحقوه مش هقول مكافأت ....فى مقابل ما يحصل عليه لعيب و لا راقصة درجة تالتة من شهرة و تكريم!!!!

يا راجل ده عندك اخر حاجة الدكتور مصطفى السيد....أتفرجت ع لقاء كان معمول معاه لما جيه مصر و أكتشفت

أنه كان مفروض يقابل عدد من المسؤلين الأفاضل اللى منهم وزير التعليم ( العالى) و اللى هو مفروض يكون أول

واحد مهتم بلقاء راجل زى ده و رغم كده ما حضرش !!!

شوف بقى أنت مين بيطلع المطار يقابل اللعيبة الأفاضل و هما راجعين من بطولة كسبوها....و لا كأنهم فتحوا

فلسطين!!!

حاجة تانية ع سبيل المثال لا الحصر....و خلينا فى مصطفى السيد برده.....ع أساس انه اقرب حاجة لأذهان الناس

الراجل ده من قبل حوار تكريمه فى امريكا و الوسام اللى خده و البيت الابيض و بوش و الحكاوى الظريفة ديه

اى بمعنى اصح من قبل ما احنا نعرفه أو نسمع عنه....الراجل كان من قبلها بسنين بيساهم فى انشاء

وحدة ابحاث فى مركز البحوث...و حتى لو ما شاركش مادياً....يكفى مجهوده و علمه

و فيه زيه ناس تانية احنا ما نعرفهمش اساساً

تقدر تقولى أيه بقى اللى قدموه اللعيبة الأفاضل بتوعنا؟؟

فرق كتير انك تكون متميز على اقرانك جوا بلدك او ان تخلى بلدك اعلى من بلاد تانيه حتى لو فى مجال الكوره .

افتكروا قد ايه مصر كلها فرحت فى 2006 و فى 2008 دا مش عشان مصر كسبت بطوله كوره بس عشان حسينا ان بلدنا بقت نمره واحد فى مجال معين . يارب اكون قدرت اوصلكم

أكيد فرق كبير أنك تكون متميز.....بس للأسف التميز مش فالكورة....أنت عندك بلاوى كتير محتاجة الأهتمام و الفلوس

اللى بتروح للكورة عشان حالنا يبدأ يتعدل

و بعدين هو ليه ما بنسمعش عن فرق كورة ع مستوى عالى فى دول زى أمريكا و كندا و أستراليا

هى الدول ديه مش متميزة عن أقرانها برده و لا أيه؟؟؟؟

يمكن عشان التقدم و الحضارة و الأقتصاد القوى .....اساسهم مجهود و علم مش رياضة بس؟؟

انا عارف انى طولت و يمكن أكون خرجت بره الموضوع ....معلش أعتبرنى بأهذى و خدنى ع قد عقلى

نفسى أوصلك نقطة و احدة بس ....انا مش ضد الرياضة ....و لا شايف أن لعيب كورة موهوب و اللعيبة دول

أخدوا مكانى فأنا مضايق منهم

بالعكس الرياضة شىء مهم جداً.....و جزء أساسى عشان تبنى انسان ع مستوى عالى يأدى دوره فى المجتمع

و أهميتها مش ع الجانب البدنى بس ...فى جوانب تانية....مش وقته نتكلم فيها

بس ما ينفعش تبقى المعادلة بالشكل ده ( رياضة = كرة قدم فقط)

و ما ينفعش نقتل كل الرياضات التانية بكل ما فيها من مميزات و أبطال فعليين بدون أى مساندة

عشان خاطر لعيبة بيتصرف عليهم بلاوى .....و فى الاخر ما عملوش حاجة

ما ينفعش يبقى الأغلبية العظمى من الشعب مش لاقية تدفع اشتراك مكان -عشان ولادهم يمارسوا فيه

أى نشاط رياضى و يفرغوا طاقتهم فى شىء مفيد- بسبب الأشتراكات الخرافية للنوادى اللى خلت ممارسة

الرياضة نوع من و انواع الرفاهية المبالغ فيه....و اللى بيتصرف ع اللعيبة ممكن يفتح بدل النادى عشرة

و لا حتى فلوس الأعلانات اللى بيتسولوا فيها التشجيع!!

ما ينفعش و ما ينفعش .......و ما ينفعش .....حاجات كتير أوى

و أهم حاجة ما تنفعش هو أنه ما يبقاش فيه مساواة فى التعامل بين الناس ...اياً كان اساسها

و حضرتك بتعتبر الطريقة اللى مش و لا بد فى التعامل نوع من انواع الرسمية....و مبالغة فى الأعلان!!!

و لحد ما البلاوى ديه تتحل اقدر أقول لحضرتك....يحمد ربنا أن الامين ما دفعهوش عشرة جنيه عشان ما يخدوش

مخالفة!!

د لأ بس الأعلان عشان يلفت نظرك ويشدك لازم يبالغ فى الكراكتر عشان كده اداء امين الشرطه او عامل المطعم بيكون فيه مبالغه

بعض الشئ عشان اديك احساس ان اللعيب اللى فى الأعلان لو كان معروف كان هيتعامل بطريقه احسن من كده وبالتالى بيخلق نوع من التعاطف معاه واللى يوصلنا

طيب ده كلام جميل...حضرتك كده اللى أنا فاهمه من كلامك ان الاعلان ده مبالغة فى حاجة اساساً موجودة

و الحاجة ديه وجودها فى حد ذاته مشكلة....اما ان احنا نعتبرها حاجة طبيعية فديه تعتبر كارثة!!!

هدف الأعلان مش اننا نعرف اللعيبه زى ماقالت الأخت الكريمه الهدف منه انه يوصلنا ان فى بطوله يوم 24 سبتمر وكاس عالم ولازم نشجع منتخبنا . واكيد فى ناس كتير ماكنتش عارفه

حاجه اخيره للأخ شهاب مش بس الكوره اللى تزعل وتفرح شعبنا . بس صدقنى الكوره هى الترفيه الوحيد والممتع للناس اللى بتدور على قوت يومها بالعافيه .

انزل على القهاوى الشعبيه وقت الماتشات المهمه وشوف الناس بتطلع ال خمسين قرش ازاى تمن كوباية الشاى عشان يتفرجوا على ساعه ونص كوره .

بفرض أن الأعلان لشد الأنتباه للبطولة مش للاعبين.....برده فى حاجات تانية أهم أن الانتباه يتشدلها

كفاية علينا شوية الأوبئة ....و مشاكل المرور و التعليم ....مش هاقولك حتى المشاكل ع المياه مع دول المنبع

وطول ما الشعب مغيب عن مصايبه بالكورة و طول ما احنا بنشجعه يبقى مغيب زيادة.....طول ما أحنا بنرجع بضهرنا

زيادة

و اخيراً...بالنسبة للناس اللى انا بكلمك عليهم اللى مش لاقيين يكلوا و ساكنين فى عشش هتقع عليهم

صدقنى الكورة ما بتفرحهمش اوى كده.....و النص جنيه بتاع كباية الشاى ده لى اولويات أخرى عنده

و الناس ديه انا مش محتاج انزل لهم ع القهاوى...انا روحت الحتت اللى هما قاعدين فيها و شوفت ع الطبيعة و يا ريتنى ماشوفت.....و عددهم أكبر مما تتخيل بس احنا ما بنحسش ....عشان ما بنقابلهمش و ما مبنضطرش نمر بالأماكن

اللى هم فيها

تحياتى ليك يا باشا و كل سنة و أنت طيب و مش محتاج أقولك ان الاختلاف فى الرأى لا يفسد للود قضية

لأنه فى النهاية كل واحد حر فى اعتقاده طالما لم يتعد ع الاخرين

و سامحنى أذا ما شاركتش فى الموضوع تانى عشان حاسس انى رغيت بزيادة أوى و الناس أكيد هاتتخنق منى

تم تعديل 21 سبتمبر 2009 بواسطة Shehab

[president]

سيدى الفاضل شهاب . استمتعت بقراءة مداخلتك وبرأيك . بس هاوضح نقطه صغيره .

كل الأختلاف اللى مابينا هوا احنا بنشوف لاعب الكوره ازاى . او بنبص لأى رياضى ازاى . ان مؤمن تماما ان الموهبه الفذه فى اى مجال يجعل الأنسان عالم فى هذا المجال .

دعنا لا نبخس الموهوبين حقهم . هاضربلك مثال فى كام استاذ جامعه فى مصر وحاصل على دكتوراه وماجستير كتير جدا جدا جدا . بس فى كام واحد من وسط 70 مليون واحد

جاب ذهبيه فى اثينا هو واحد بس .دا احنا لغاية دلوقتى فاكرين الميداليه اللى جابها رشوان .

أخيرا واعتقد ان دا مربط الفرس دعنا لا نتحامل على اشخاص يقوموا بعملهم ويأخذون الكثير وهم يستحقونه دعنا لا نتحامل عليهم نتيجة ان جهات اخرى زى الحكومه قصرت فى عملها

ناحية الشعب .

تحياتى لك واعتقد انه طالما شرحت وجهة نظرى فسأكتفى مثلك بعدم التعليق مره أخرى .

تم تعديل 21 سبتمبر 2009 بواسطة president

[ايهاب سالم]

وهاضرب مثال زى الدكتور زويل والدكتور يعقوب. وهاسأل سؤال اللى يخلى الواحد فينا بيقشعر وينتشى كده لما يسمع ان واحد فيهم حقق انجاز ؟

انا عن نفسى ماببصش ان الدكتور زويل بشخصه هو صاحب الأنجاز انما باصصله ان مصرى صاحب الأنجاز .

صاحب الإنجاز هو دكتور زويل الأمريكي مش المصري

والإنجاز تم بمساعدة إمكانيات البحث العلمي الأمريكيه و بتمويل من دافع الضرائب الأمريكي

الدكتور زويل نفسه لما سألوه عن هويته في حفل نوبل قالهم إنه

Egyptian-born American

[ايهاب سالم]

تخيل نفسك ان امين شرطه ساكن فى شارعكم وشافك واقف فى الممنوع لو هو عارفك اكيد هيزهر معاك وهيقوللك مينفعش توقف هنا .

يا راجل

هو الموضوع يتوقف على علاقتك بأمين الشرطه في شارعكم

لو مش بيحبك هيرزعك المخالفه و يجيب الونش يشيل العربيه و لما تروح تستلمها هتلاقيها إتنفضت و إتجرحت

لو بيحبك هيجيب إتنين م القسم يغسلوهالك و هي واقفه في الممنوع و مش بعيد يحجز لك المكان كل يوم

[MZohairy]

وهاضرب مثال زى الدكتور زويل والدكتور يعقوب. وهاسأل سؤال اللى يخلى الواحد فينا بيقشعر وينتشى كده لما يسمع ان واحد فيهم حقق انجاز ؟

انا عن نفسى ماببصش ان الدكتور زويل بشخصه هو صاحب الأنجاز انما باصصله ان مصرى صاحب الأنجاز .

صاحب الإنجاز هو دكتور زويل الأمريكي مش المصري

والإنجاز تم بمساعدة إمكانيات البحث العلمي الأمريكيه و بتمويل من دافع الضرائب الأمريكي

الدكتور زويل نفسه لما سألوه عن هويته في حفل نوبل قالهم إنه

Egyptian-born American

:lol:

[Diab]

الحكومة بتأجل الدراسة عشان تقلل الاختلاط اثناء الزحام عشان H1N1

الحكومة بتعرقل ذهاب المعتمرين وبتفكر تلغي موسم الحج عشان نفس السبب

هي هي نفس الحكومة اللي نظمت حفل منير في الأوبرا في رمضان

وهي اللي عاوزة الناس ترروح بألالاف للأستاد ومش مهم المرض ينتشر المهم سمعة مصر والسياحة

شعارنا

عشان تعدوهم روح شجعوهم

[Dr.mmfriend]

تاييدي الشديد استاذ شهاب

عجبتنى جدا الجمله " هقولك لو أفترضنا أن هما مثلاً أتركنوا ع جنب و أختفوا من الحياة اساساً...تفتكر أيه تأثير عدم وجود واحد

منهم مقارنة بأختفاء منتخبات كرة القدم فى البلاد العربية كلها مش مش مصر بس؟؟ "

بصراحه ولا تفرق اى حاجه اختفاء جميع المنتخبات الى بتلعب بفلوسنا وباعصابنا دى

بالعكس ممكن الناس تلاقى حاجه افيد تهتم بيها

انا برضه مش ضد الرياضه

ولكن انا ضد انه الامور تاخد حجم غير طبيعي

تحياتى

واسف على الالفاظ الى طلعت منى سابقا ماخدتش بالى منها

عيد سعيد جميعا