هل اسم محمد او احمد او محمود يقلل من فرصة حصولك على عمل بكندا؟

[MZohairy]

لا شك ان الأزمه الماليه العالميه مازالت تؤثر على اسواق العمل بالسلب

في كل مكان

بما فيهم كندا

و لكن بالنسبه للمهاجرين الجدد تظل امامهم بعض العوائق الأخرى غير الازمه الماليه العالميه

و هي عدم وجود خبرات كنديه في تاريخك الوظيفي

ايضا عدم وجود شهادات علميه كنديه بين شهاداتك

و بالعوده الى موضوعنا

هل تعتقدون ان نسبه من الشركات في سوق العمل الكندي قد ترفض بعض السير الذاتيه بمجرد قراءة الإسم؟

هل تعتقدون ان بعض كارهي الاسلام و المسلمين قد يفضلون استبعاد من يحملون اسامي مسلمه من منطلق الباب اللي ممكن يجيلك منه الريح سده و استريح؟ فسوق العمل مكتظ بطالبي العمل و بالتالي فالخيار امام صاحب العمل متوافر بشده

طبعا لن نقول انها حاله عامه

و لكن الا تعتقدون ان الاسم قد يقلل الفرص بنسبه معينه حتى و ان كانت قليله؟

اعلم ان كندا ليست بها عنصريه

و اعلم ان الارزاق على المولى

اتكلم هنا فقط من ناحيه دنيويه احصائيه منطقيه

اشكركم

[حسام يوسف]

بالفعل أنا سمعت الملحوظة دي

لكن مدي صحتها

مش عارف لحد فين هية صحيحة؟

وياريت الأفاضل فى بر كندا الشقيقة يفتونا

[wagdi]

تختلف...

لو رايح تشتغل في حاجة صغيرة او private buisness يعتمد فيها القرار اولاً واخيراً على صاحب العمل فانت هنا طبعاً ماتقدرش تتوقع ميوله ... يعني ممكن اوي واحد مش عايز مسلمين او يهود يشتغله عنده... كدة...

لكن في الشركات الكبيرة المحترمة فالمعيار في الغالب هو الكفاءة والاحترافية...

ومثلاً انا اسمي محمد وعندي دقن (مش لحية متسابة علشان مخك مايروحش بعيد ) وقاعد في كيبك الى هي اكتر مقاطعة عنصرية في كندا والحمد لله ماكنش عندي اي مشكلة في عملي ولا في التقدم فيه...

بس زي ما قولتلك الكفاءة والاحترافية تجبر الجميع على احترامك...

تحياتي

تم تعديل 22 سبتمبر 2009 بواسطة wagdi

[MZohairy]

كلام سليم يا وجدي

بونجور الأول

بس ماتنساش ان معظم المهاجرين الجدد بيشتغلوا غالبا سيرفايفال جوبز

يعني غالبا شغلانات صغيره لا تحتاج مهارات عاليه و غالبا في شركات مش كبيره

يعني غالبا القرار فيها فردي

ايه رأيك؟

[MZohairy]

للرفع

[wagdi]

بس ماتنساش ان معظم المهاجرين الجدد بيشتغلوا غالبا سيرفايفال جوبز

يعني غالبا شغلانات صغيره لا تحتاج مهارات عاليه و غالبا في شركات مش كبيره

يعني غالبا القرار فيها فردي

ايه رأيك؟

طب أنا حاقولك حاجة... لو أنت فتحت شغل ليك مثلاً وعايز تجيب اتنين تلاتة يساعدوك... جالك واحد اسمه محمد وواحد أسمه موشي... والاتنين نفس المستوى وكل حاجة... حتختار مين... طيب لو موشي واضح جداً أنه أجدع وعنده خبرة وبتاع شغل... حتختار مين؟...

حاقولك الحلول المتاحة...

ممكن واحد ياخد محمد على اساس انه بلديات ومسلم وحيتكلم معاه عربي ووو

ممكن واحد ياخد موشي لأنه أصلاً مش طايق إلى اسمهم محمد (مع إن هو نفسه أسمه محمد)

ممكن واحد يخاف من محمد لأنه عارف المحمدات بيشتغلوا أزاي في مصر...

ممكن واحد يقول لو موشي أخر واحد في الدنيا مش مشغله...

ممكن واحد يقول موشي موشي...إن شالله يكون ابليس المهم شغلي

ممكن واحد كان مشغل عنده بنيامين قبل كدة وبنيامين ده كان واد ماجبتوش ولادة...فبالتالي حيبقى مستبشر بموشي خير...

ممكن واحد كان عند أحمد قبل كدة وطلع عينه لحاد ما كرشه وبالتالي فهو متعقد من الصنف...

ممكن واحد طبيعة الشغل يستحب فيها واحد بيتكلم عربي فمحمد بالنسبة له أوقع (المطاعم اللبناني والحركات دي)

ممكن واحد طبيعة الشغل عنده مايطلبش فيها حد يبقى أسمه محمد أصلاً (بار.....عصائر :))

وممكن تحط من عندك متين ممكن تانيين....

فالشاهد هو إن الموضوع ده لا يمكن تصنيفه من الهلهليات... لا ينفع تقول فيه أه ولا تنفع تقول فيه لأة...

بونسواريه يا باشا...

[MZohairy]

يعني يا وجدي بشكل عام نصيحتك ايه للي اسامهم اسلاميه واضحه و جايين كندا جداد و عايزين يشتغلوا سيرفايفل جوبز في هذا الوضع الاقتصادي الخانق

يغيروا اساميهم في الريسومى على الاقل ام لا؟

[wagdi]

تصدق كان نفسي مايكونش ده قصدك من الموضوع... بجد...

بص يا محمد... كلامي يمكن يبان لك كلام إنشاء... بس حاقولهولك مدام أنت طلبت نصيحتي مباشرة...

أوعى تفتكر إنك لما تغير أسمك أو دينك أو هويتك وتخبيهم المواضيع حتمشي معاك... أنا لو أتعلمت حاجة من الكام سنة إلى أنت قعدتهم هنا يبقى إن عملك وإجتهادك ومعاملتك هما بس إلى ممكن يخلوا الدنيا تفتح في وشك أو تقفل... وهما بس إلى تخلي الناس تحترمك أو تحتقرك...

وبعدين انت بتخبي إيه... حتخبي نفسك... طب حاتخبيها أد إيه؟... طب لو قدمت الريسوميه بتاعتك وشلت محمد... ورحت عملت الانترفيو وقالولك تعالى أشتغل... مانت لازم تديهم ساعتها بيناتك... حاتخبيها إزاي... طب هو في الانترفيو قانوناً مش حقه يسألك عن ديانتك أو حتى يلمح بكدة بس أول يوم حتشتغل فيه زملائك في العمل حيبقوا عايزين يتعرفوا عليك... حتقولهم إيه... أسمك إيه... طب دينك إيه... حتخبيه؟... ده يبقى يلعن ابو كندا...

طب بلاش... تفتكر هما حايحترموك لما يحسوا إنك مستخبي من أسمك...

يا محمد أسمك ودينك هما هويتك... الidentity بتاعتك... لو مش عاجبينك غيرهم... تقدر هنا في كندا تغير أسمك رسمي لأي حاجة تانية... وتقدر تغير دينك لو عايز... يعني إنت حر مش مجبر على حاجة... بس مدام وافقت عليهم يبقى ما تستخباش منهم... يا إما تبقى عامل زي واحد راح أتجوز واحدة منقبة وبعد الجواز بقى مستعر منها وبيكسف يمشي معاها الناس تشوفه...

طب أعقلها معايا... لو والدك او والدتك كانوا مثلاً ناس على قد حالهم وأنت رايح تتجوز واحدة من عيلة كبيرة ملزقة ومتنتفة... حاتقول بلاش أخدهم معايا وأنا بتقدم للعروسة... خليهم مستخبيين علشان المواضيع تمشي... تفتكر كدة حاتمشي؟؟؟؟

طيب أنهاردة واحد خبى أسمه... بكرة حيخبي إيه؟.. مراته... لغته... عياله... ده يبقى يلعن أبو أبو كندا تاني مرة...

أنا زي ما قولتلك أسمي محمد... وملامحي إسلامية صرفة... وعايش في كيبك إلى الناس في كندا بيحلفوا بعنصريتهم... وبشتغل شغلانة محتاجة SC...و 4 أترفيوهات... والظروف إلى أشتغلت بيها أصلاً ينفع تتعمل فيلم هندي هابط ممكن أبقى أحكيهالك بيني وبينك... وده بفضل ربنا مش شطارة مني... ولما أشتغلت من أول يوم كنت بأصلي الضهر والعصر في مكتبي... والناس شايفيني من الإزاز... وكان رمضان وكنت صايم... وكانوا عاملين حفلة صغنطوطة تعارف بيا... وقولتلهم أنا صايم وحضرت وماكلتش... وكان معانا واحد عراقي مسلم قاللي في بداياتي-من باب النصيحة- فكها شوية علشان الناس هنا ماتخدش منك موقف... هو دلوقتي مش موجود مع إنه كان فاككها على الأخر... وأنا والحمد لله وبفضله مش شطارة مني تقدمت في شغلى والناس بتحترمني... مش علشان سواد عيوني بس علشان شغلي... وتلاقي مديري يجي يقعد يفضفض معايا ويشتكيلي من فلان ويشتم في علان إلى هما أصلاً كيبيكواه زيه وعنيهم زرقا وشعرهم أصفر وأسمهم بنجامين وسيلفان وكريستيان... وأنا أقوله معلش ياعم الحاج ربنا يصلح الحال أهم أولادنا برضه...

أنا عمري ما بحب أتكلم عن نفسي أو شغلي أو تجربتي هنا في كندا... بس لأنك أنت إلى طلبت نصيحتي... ولأني يعز عليا إنك حتى تجيب سيرة الكلام ده أو تفكر فيه...

بونسواريه يا باشا...

[MZohairy]

لأ

ما تفهمنيش غلط يا وجدي فلا يوجد في كلامي اي محاوله للفلفصه من دينك او ايمانك به

كل الحكايه ان مراحل التوظيف تبدأ اولا بقراءة جهة التوظيف للريسومي بتاعة الموظف

يا تعجبهم و يندهولك للانتر فيو

يا يرموها في الزباله

بعد كده مقابلته ليك وجها لوجه و سماع لغتك و تمكنك من ادواتك بيكون له عامل ضخم جدا في الاختيار

و بالتالي المقابله الشخصيه عليها عامل ضخم جدا في التوظيف

فاذا كان الاسم ممكن يحرمك من عمل المقابله.....فوجهة نظري ان تغير الاسم في الريسومي فقط (و ليس الباسبور او البي آر) ممكن يجنبك احتمالات الرفض الاوليه

و عند المقابله امكانياتك و اسلوبك ممكن يغير رأي الشركه فيك حتى و لو كانوا بيكرهوا كل المسلمين

يعني حركه تكتيكيه لتفادي استبعادك من مجرد قراءة الريسومي و ليس اكثر

فاهمني؟

[wagdi]

معلش بقى... أنت كدة مش بتتكلم عن شغل سيرفايفال...

بس شوف... عامة... السكرينينج بتاع الوظايف هنا بيتم بعدة طرق...

يا إما عن طريق الكمبيوتر... وده لما بيبقى فيه أعداد كبيرة متقدمة... فالكمبيوتر بيبتدي يدور على keywords معينة صاحب الشغل بيبقى بيدور عليها ويبتدي يحصر الريسوميهات لحاد عشرة مثلاً... ودول يجي بتاع الHR يقراهم ويكلمهم وممكن يعملهم سكرينينج سريع على التليفون... يحصرهم لأربعة خمسة هما إلى يعمل معاهم ميعاد... وعادة الأسم مالوش أي دخل في البروسيس ده... لأن بتاع الHR كل إلى بيدور عليه مواصفات معينة... يعني مصالح...

الطريقة التانية لما بتبقى شغلانة لها مواصفات محددة هما أصلاً قايلنها في إعلانهم فبيبقى أعداد المتقدمين مش كتير... وإلى بيفرزهم بيقعد يفصص السي في بتاع كل واحد... وعادة لو لقى إلى بيدور عليه مش حايهمه خالص إسمه... المهم المصلحة...

الطريقة التالتة إن تبقى إنت سمعتك سبقاك وشركة تانية هي إلى تيجي تعرض عليك الشغل لمواصفات خاصة فيك بيدوروا عليها... وساعتها أنت إلى في مركز القوة وممكن تقعد في الأنترفيو وصباعك في مناخيرك...لأن أصلاً الموضوع إيه...هه... مصلحة...

الطريقة الرابعة هو شركات توظيف العمالة المؤقتة... ودول إنت بتروحلهم وتسيب عندهم السي في وهما بيقعدوا معاك ويعملولك أنترفيو صغير كدة ويشوفوا ظروفك إيه... وممكن ينصحوك تروح فين وتدور فين.... ودول أحسن حاجة في رأيي لو عايز تشتغل حاجة تدخلك في جو الشغل في كندا... فتشوف مثلاً حاجة data entry أو كدة... بتبقى مؤقتة... بس عادة بتبقى في شركات كبيرة محترمة وبتبدي تشوف الدنيا ماشي إزاي وتعمل network...ودول مش فارقة خالص معاهم أسمك لأنها بتبقى شركة فيها واحدة حامل ولا عيانة وحاتغيب كام شهر وعايزين حد بدالها... فهما أصلاً مابيشوفوش سي فيهات... دول بيكلموا شركة التوظيف يقولولها أنا عايز واحد يعرف يعمل كذا وكذا وكذا بكرة الصبح... وبتوع شركة التوظيف أصلاً مش فارقة معاهم أسمك لأنهم بياخدوا فلوس على كل راس بيورودوها... يعني برضه مصالح...

وأخيراً هو صاحب البقالة إلى تحت البيت إلى عايز يجيب حد يستعبده ويديله 9 دولار في الساعة... وده إلى ممكن أسمك يفرق معاه... بس ماعتقدش إنه يستاهل أصلاً تبعت له سي في...

وده رأيي... والله أعلم... على رأي سيد حمدي....

[jundi]

في شغل السيرفايفل الموضوع مش حيفرق خالص، في الشهادات العليا والمتعادله والمطلوبه كمان مش حيفرق، ممكن يفرق في الشغلانات اللي في النص بين اللونين واللي ممكن القرار فيها يرجع لصاحب الشغل أو في شركه صغيره و المدير شخص واحد

[مراد أنور]

السلام عليكم أستاذ زهيرى :closedeyes:

ويارب تكون والاسرة بخير و سعادة

انا بشكرك على الموضوع ده رغم إن إسمى لايمثل لى فى رأى هذه المشكلة

ولكن لأنه عرفنا بالأستاذ وجدى وأرائه الرائعة وإعتزازه بدينه :blush2:

وارجوك يا أستاذ وجدى أن تحكى لنا قصة كفاحك فى كيبك

وتوفيق المولى عز وجل لك حتى تبث الأمل فى قلوب كل إخواننا :happy:

وترسخ لديهم يقين أن الله على كل شىء قدير وانه من حفظ الله حفظه ووجده تجاهه

أمانة عليك يا أستاذ وجدى أن تنشر قصتك للإفادة وجزاكم الله كل الخير بفضله ومنّه إن شاء الله :happy:

[MZohairy]

يا محمد انا بحاول اناقش فكره صغيره جدا

لو السوق فيه 10 فرص و تقدم للوظايف دي 1000 شخص (انت من ضمنهم)

يعني كل 100 عندهم فرصه واحده فقط

لو افترضنا ان 2 وظيفه من ال 10 دول ممكن يستبعدوا السيفي بتاعتك بسبب اسمك

يبقى انت فرصتك بقت اقل من باقي المتقدمين اللي فرصتهم اصلا ضعيفه جدا

المهاجر الجديد اصلا عنده اكثر من عائق بمجرد وصوله لكندا

1- عدم وجود شهادات علميه دراسيه كنديه

2- عدم وجود خبره كنديه

3- عدم وجود معارف لمساعدته على التوظيف

4- ربما يكون عنصر اجادته للانجليزي غير موجود او قليل احيانا

و بالتالي ما اقصده انك واقف بطبيعة الحال في آخر طابور المتقدمين للوظايف بشكل عام

و مفيش داعي انك تزود في المشرحه قتله (اذا كان الاسم ممكن يتسبب في استبعادك من بعض الوظايف)

و الله اعلم

تم تعديل 24 سبتمبر 2009 بواسطة mzohairy

[أحمد سيف]

شوف يا باشا ... في موضوع الشغل أحسن حاجه ما تجاوبش على السؤال إلا لو اتطرح عليك ... وسؤال الديانة ده غير مطروح أساسا في كندا بحكم القانون ... يعني اللي بيعمل معاك انترفيو مش مسموح له إنه يسألك عن ديانتك أو أصلك أو سنك أو حتى ميولك الجنسية ... يبقى إذا كنت عارف إن الديانه ممكن تشكل استفزاز له وتحرمك من فرصة العمل ما فيش داعي تركز عليها كثير ... وحكاية الإسم ممكن ببساطه تكتب اسمك في الريسيومي M. Zohairy مش لازم تركز أوي على محمد وهما أساسا بينادوا الناس في التعاملات الرسمية بإسم عيلتهم. على فكره كله بعمل كده حتى في الدول العربية والإسلامية ... ياما ناس يهود وملحدين جم واشتغلوا على أساس انهم مسيحيين وما حدش خذ باله وياما هندوس وسيخ بنتعامل معاهم على إنهم مسلمين وما نعرفش ديانتهم إلا بعدييييين.

لكن بيني وبينك ... ما أنصحكش تشتغل عند واحد عنده مشكله مع ديانتك ... هتتعبوا بعضكم كثير ... إلا طبعا لو مضطر وما فيش قدامك خيار ثاني.

[ايهاب سالم]

أنا عمر إسمي ما كان عقبه في طريق شغلي في كندا يا مزوهيري

عندي شوية شغل بس هأخلصهم في السريع و هأرغي معاك في القصه دي و أديلك رأيي

بس إجابه سريعه

نعم و لا

[jgeorge]

مفيش مشكلة كبيرة لان محمد بيسموه MOO و مصطفى بيسموه Moos و شفت واحد مصر اسمه احمد مسمى نفسه Eddie علشان يمشى مع الموجة

[isaCanadian]

مفيش مشكلة كبيرة لان محمد بيسموه MOO و مصطفى بيسموه Moos و شفت واحد مصر اسمه احمد مسمى نفسه Eddie علشان يمشى مع الموجة

طب ما هو في مصر محمد بيسمي نفسه حماده ومودي وميدو ومصطفي بيقولوله يا درش واحمد بيقولوله يا ابو حميد عادي يعني

وبعدين الشغل دي رزق يعني اسمك محمد اسمك مصطفي اسمك عبد الرحمن كده كده ده رزق مكتوبلك ومحدش يقدر يمنعه عنك ولو كان هو مين في الارض

يعني مافتكرش المفروض اصلا نشغل دماغنا بحاجه زي كده اصلا ونتوكل علي ربنا ونسعي وبس عشان حتي نفضي دماغنا للمهم

ده علي كده اي واحد اسمه محمدين ميفكرش يهاجر خالص ليرجعوه من المطار

[MZohairy]

ده علي كده اي واحد اسمه محمدين ميفكرش يهاجر خالص ليرجعوه من المطار

:lol:

ده حيشغلوه و ياخدوا منه فلوس :blink:

[جبار سينج]

السلام عليكم

كيفك يا استاذ زهيرى

مرة جابوا فلم وثائقى عن الهجرة الى كندا وعن عنصريه كيبك وكان واحد بيئول انه علشان اسمه محمد معرفش يشتغل

راح غير اسمه بدل محمد لاسم تانى راح اشتغل علطوول

الكلام دا فى كيبك مش عارف باقى الولايات

[MZohairy]

بصراحه يا جبار مفيش الظاهر قاعده واضحه

اعرف كذا صديق اسمهم محمد في كيبك و بيشتغلوا

بس ماننكرش ان كيبك هي اكثر واعلى الولايات الكنديه من ناحية العنصريه و خصوصا في موضوع اللغه الفرنسيه