مجتمع الشمال ومجتمع الجنوب

[سكر]

نانسى وكاظم فى حفل الساحل الشمالى: مبروك لمصر

كتب محسن محمود ٢٦/ ٩/ ٢٠٠٩

أكثر من ٣ آلاف متفرج حضروا الحفل، الذى أقيم أمس الأول فى الساحل الشمالى، وجمع لأول مرة بين المطربين العربيين كاظم الساهر ونانسى عجرم، وهو أول الحفلات التى تحييها نانسى فى مصر بعد فترة غياب بسبب الحمل والإنجاب.

صعدت نانسى عجرم على المسرح فى الحادية عشرة مساء لتعلن خبر فوز مصر بأربعة أهداف مقابل هدف واحد، فى أولى مباريات كأس العالم للشباب قائلة: «أنا سعيدة جداً بفوز المنتخب المصرى»، فتعالت صيحات الجمهور خاصة الذين لم يعرفوا خبر فوز مصر، وتفاعلا مع الجمهور قدمت نانسى أغنيتها الشهيرة «لو سألتك إنت مصرى».

وبعد فقرة نانسى صعد كاظم الساهر على المسرح مهنئاً المنتخب المصرى بالفوز، وبمجرد انتهائه من أول أغنية تلقى عشرات الهدايا من المعجبات، وصعد مواطن عراقى الجنسية إلى المسرح وأهدى كاظم علم العراق، فرفعه كاظم مردداً: «مظلومين ومساكين.. يا عراق».

يذكر أن نانسى حصلت على أجر قدره ٦٥ ألف دولار، واشترطت على منظمى الحفل توفير طائرة خاصة لتنقلها من أبوظبى إلى مصر وتعود بها إلى دبى، وحصل كاظم على ١٢٠ ألف دولار، واشترط أيضاً توفير طائرة خاصة لانتقالاته.

الف مبروك لمصر فعلا

كون ان كاظم او نانسى يطالبوا بالاجور دى فده من حقهم ولا خلاف عليه

مادام فى طلب عليهم وكل واحد حر فى فلوسه خلاص والله ما لا حسد

بس انا متعصب ومضايق جدا ليس من الاجور او من الحفل ولكن على المصريين

ايه دة احنا بقى فى فرق اجتماعى كبير جدا فى البلد وفى ثروات ضخمة جدا اصبحت فى ايد قله من المجتمع

مصر تحولت الى مجتمعين

مجتمع الشمال (اصحاب الساحل الشمال ) ربنا يبارك لكل الى عنده ويرزق الى معندهوش

بس الرحمه شويه على الناس

ومجتمع الجنوب (اصحاب الهم والحزن ) ربنا يفك كربهم ويوسع فى رزقهم

لما بسمع اى خبر عن الساحل الشمالى دائما تيجى فى دماغى الايه دى

{وَإِذَا أَرَدْنَا أَن نُّهْلِكَ قَرْيَةً أَمَرْنَا مُتْرَفِيهَا فَفَسَقُواْ فِيهَا فَحَقَّ عَلَيْهَا الْقَوْلُ فَدَمَّرْنَاهَا تَدْمِيرًا}

اعتقد والله اعلم ان الفسق ليس الابتذال فقط ولكن السفه فى صرف الاموال

ربنا يبعد عنا مصرنا واهلنا التدمير والخراب ويهدى الجميع

تم تعديل 26 سبتمبر 2009 بواسطة موعود

[se_ Elsyed]

الأمور ما بتحسمش كده يا موعود

منذ أن خلق الله الأرض ومن عليها إلى أن تقوم الساعه والفوارق الإجتماعية والمادية موجودة ..ز

[سكر]

والله يا ابو الاسيان انا عارف كلامك ومقدرة كويس جدا

بس انا بطالب بشويه عدل فى توزيع الثروة فى مصر

واهتمام اكثر بالعلم والعلماء

مش معقول السعودية تعمل جامعة بالضخامة دى على ساحل البحر الاحمر

واحنا نضيع الثروة فى شاليهات فقط

شاليهات ماشى عشان الناس تنبسط بس جنب الشاليهات والافراح والليالى الملاح

عايز اشوف حاجة تعدل الميزان

والفوارق الاجتماعيه شى اساسى فى حياة اى مجتمع

مفيش مجتمع كله اغنياء او كله فقراء

بس السؤال هل من حق الغنى ان يصرف امواله فى اى شى مدام هو غنى وهى فلوسه ؟؟؟

[se_ Elsyed]

برضوا لم ولن تكون هناك عدالة في التوزيع

وإذا كنت بتضرب مثل بالسعودية

يبقى تعالى شوف ساكني القصور الفارهة .. وساكني العشش الصفيح ...

الشاليهات لها ناسها

وبعدين العدالة تكمُن في التطبيق الصحيح لمبدأ التكافل الأجتماعي والزكاة والرعاية وما إلى ذلك

وليس توزيع الثروة بالمعنى الحرفي

بس السؤال هل من حق الغنى ان يصرف امواله فى اى شى مدام هو غنى وهى فلوسه ؟؟؟

للاسف ... في الدنيا أيوه إن شالله يجيب بيها بومب ويفرقعه

لكن في الأخره هايتحاسب على ده كله طبعاً

[سكر]

وليس توزيع الثروة بالمعنى الحرفي

امسحها فيا يا ابو الاسيان

بس التوزيع العادل للثروة مش عن طريق ان البلد يكون دخلها 80 مليون واحنا 80 مليون فكل واحد ياخد مليون ( :D )

التوزيع العادل هو اعطى لكل ذى حق حقه

ولكل مجتهد نصيب

هو المظاهرات الى فى الشوارع كل يوم من اجل بعض الجنيهات ليه

يا ريت حتى مظاهرات من اجل تغير افكار او معتقدات او حتى ابدا راى

شوف الناس الى عايشه على الراتب بتاعها حصل فيها ايه الخمس سنين الى فاتوا

انا مش عايز ابعد عن الموضوع

بس الفجوة الى بين الشمال والجنوب كلما كبرت كلما اصبح الجميع فى خطر

[ذهبية]

و انا بقرا التوبك بتاعك دة يا موعود افتكرت جزء من مسرحية عادل امام الزعيم و هو بيتكلم عن الزعيم او الحاكم يارب الشعوب

تموت علشان الحاكم يستريح و يعرف يعيش كويس

علشان الشعوب الفقيرة تعابة الحاكم و مكندة علية و مش عارف يستمتع بقصرة و فلوسة و قعد يدعى يارب ياخد الشعوب كلها علشان الزعيم يستريح

عدالة اية يا موعود هو فية اصلا كلمة زى فى اى بلد فى الدنيا هى بس فية عدم عدالة بتتفاوت درجتها من الواضحة قوى الى الصريحة الى المستترة

و عمر ما هيكون فية ابدا لازم تتقبل دة و تعيش بية موضوع من جد وجد اة موجود على مستوى الافراد و ليست على مستوى الشعوب او الدول

موضوع من حق الغنى يعيش زى ما هو عايز اة من حقة طالما لم ياتى حرية احد او يجرح احد وطالما حلال

الفقير بقى من حقة يغض البصر و يتحمل شظف الحياة و يكون اجرة فى الاخرة

وعلى قد غناك هيكون حسابك يوم لا ينفع ولد و لا مال و لا سلطان هتسال يوم القيامة اين انقفت مالك و كلما كتر مالك زادت سيئاتك لو لم تراعى الله فى تصرفاتك يعنى هى ممكن جدا تكون حسنة فى الدنيا وسبب سعدك و ممكن جدا تكون هى سبب تعاستك

ذهبية

[سكر]

الاخت الفاضله ذهبيه

اسعدتنى مشاركتك ولى بعض التعقيب

عمر ما هيكون فية ابدا لازم تتقبل دة و تعيش بية موضوع من جد وجد اة موجود على مستوى الافراد و ليست على مستوى الشعوب او الدول

موضوع من حق الغنى يعيش زى ما هو عايز اة من حقة طالما لم ياتى حرية احد او يجرح احد وطالما حلال

حلال وحرام دى بالذات ممكن نختلف فيها للصبح بس انا مش عايز الموضوع ياخد جانب دينى

الفقير بقى من حقة يغض البصر و يتحمل شظف الحياة و يكون اجرة فى الاخرة

طيب والفقير لو بقى غنى يبقى من حقه ميغضش البصر

مفيش حاجة اسمها فقير زاهد فى الدنيا لكن فى حاجة اسمها غنى زاهد دة بمقايس العصر

يعنى الفقير اصلا معندهوش يبقى ازاى زاهد فى الدنيا لما يكون عنده من حلال يبقى نحكم عليه

وبالتالى صفه الزهد يجب ان تكون لاغنياء الذين اعتبروا الغنى هو من استغنى

بردة بكرر مش عايز الموضوع ياخد شكل دينى

ولكن فى اطار الدوله الحديثه التى تحكم بالقوانين وتنفتح على ثقافات العالم

يجب فتح المجال اكثر الى الشعوب الى رفع مستواها الاجتماعى وليس قصره بفئه معينه

دة مش عدل

دة الف باء دوله

رفهيات الحياة تترك لاغنياء ولكن اساسيات الحياة حق للجميع

مرة مراتى سالتنى هو الواحد بيحوش فلوس من راتبه ليه

وبنسافر ونتغرب ليه

قلتها بكل سذاجة عشان يكون معاة فلوس وقت الذنقه

طيب اية هى الذنقة

لقدر الله مرض - شراء شقة -جواز كدة يعنى

قالتى

عشان كدة الاجانب مش بيحوشوا

ضحكت وقلتلها تقريبا

بس بردة هحوش

"دة حوار فلسفى محدش يطبقه على نفسه انا مليش دعوه"

تم تعديل 27 سبتمبر 2009 بواسطة موعود

[ذهبية]

موضوع حلال و حرام انا اتفق معاك ان مفهومها واسع مش فى مووضع الغنى و الفقر بس فى اى حاجة فى الدنيا

مهنة كلمة نظرة اكلة اى شىء فى الدنيا بيحمل الجانب الحرام و الجانب الحلال حسب الاستخدام

انا اختلف مع حضرتك فى موضوع غض البصر مش دة المعنى الى كنت اقصدة انا كنت اقصد ان الفقير يغض البصر عن الاشياء الىل ممكن توصلة لدرجة انة ممكن يحسد الغنى فيها يعنى لو هتوصل لدرجة الحسد يبقى غض البصر احسن

على فكرة برضة الغنى بيرضة بيحسد الفقير على سعادتة و ضحكتة فى وسط عيالة و صحتة وراحة بالة يعنى ممكن جدا يكون عندة الفلوس لكن معندوش حاجة من دول سهل جدا يحسد الفقير عليهم لان للاسف دول ما بيشتروا بالفلوس يعنى غض البصر موجود عند الطرفين لان مش السعادة فلوس

انا كان قصدى الشىء الىل ممكن يوصلنى و اليعاذ بالله حسد يبقى اغض البصر عنة او اللى ممكن يحسسنى انة هتعبنى نفسيا لان مش بايدى اعمل حاجة تانية غير كدة لا ام ااقضى حياتى كلها اندب حظى ةو اتعب اعصابى و اتحسر على بختى لانى مش قادر اعمل زيهم ولا اعيش و ادلع نفسى زى ما هما بيعملوا

اتفق معاك كليا فى ان الدولة واجب عليها ان توفر اساسيات الحياة للافراد و الشعوب باى طريقة تجدها لتحقق العدالة الاجتماعية

لكن تفتكر دة فى ارض الواقع موجود

احنا حتى اساسيات الحياة مش قادرين عليها و المواطن الفقير مش لاقى حتى ابسط حقوقة و هو الاكل مش هاقول لبس و لا دكتارة و لا فسح و لا ترفيهة ولا غيرة

ياترى بقى الحل اية ؟؟والمواطن الغلبان يحاسب مين ؟؟؟

يحاسب الدولة و لا الغنى اللى مش حاسس بمعاناتة و لا يحاسب نفسة لانة مش عارف يطلع من الى هو فية

وللاسف مازالت هذة المعادلة موجودة و ليست لها حل

و يبقى الامر فى الاخر يبقى الوضع كما هو عليةةةةةةةة

[سكر]

الاخت ذهبيه اسعدتنى جدا مشاركتك وتوضيحك لبعض الامور ولى تعقيب على على نقطة

احنا حتى اساسيات الحياة مش قادرين عليها و المواطن الفقير مش لاقى حتى ابسط حقوقة و هو الاكل مش هاقول لبس و لا دكتارة و لا فسح و لا ترفيهة ولا غيرة

ياترى بقى الحل اية ؟؟والمواطن الغلبان يحاسب مين ؟؟؟

قلتى الى عايز اقوله من الصبح

وهل هذا يخرج مجتمع سليم ام مجتمع ارهابى

ليس ارهاب الذقن والجلباب ولكن ارهابى محاربه الاخر وحب الانتقام منه

ليس لكل الاسباب ولكن يكفى سبب الحرمان

حرمان الانسان من اساسيات الحياة ومشاهدة الاخر فى رفاهيه

كفيله بتدمير الانسان والمجتمع

[miramikhail]

معلش أنا عندى أختلاف مع اللى بيقول أن ربنا خلق الناس طبقات

أحنا اللى عملنا كده فى نفسنا مش معقول واحد عشان ربنا مدى له شوية قوة يقوم يكرش واحد من أرضة و يأخدها .

الأساس فى الكون العدل يعنى ربنا أدى كل واحد مواهب مختلفة و مطلوب منه ينميها و يستعملها للخير بمعنى أن المليونير لازم يدفع ضرائب بمايوازى مكسبه _يعنى ضرائب تصاعدية.و المتعلم يعلم الجاهل و القوى يحمى الضعيف مش يأكل حقة.

يعنى مثلا بستثناء أقلية اللى فكر فى أختراع جديد ولا عمل حاجة مفيدة للبشرية تستحق تبقى أغنية . لكن لما تمص دم الناس زى ما بنقول عشان محتكر سلعة معينة و بيبعها بعشر أضعاف تمنها ولا اللى أشترى شركات القطاع العام (بتاعتنا يعنى مش بتاعة حد تانى) بتراب الفلوس و............

يبقى حرام نقول ربنا عايز كده و أرزاق وألا لانحاسب حرامى و لا بلطجى :blush2:

كده بفتكر أفلام أسماعيل ياسين أيام الملك لما كان بيطلع الفقراء سعداء و الأغنية تعساء وده طبعا عشان الناس تقول الحمد لله أنى فقير.

على فكرة أنا من النوع اللى بيحمد ربنا على النعمة اللى أنا فيها و ديما بعلم أولادى طبعا فية ناس أغنى منا بكتير لكن فية ناس كمان أقل منا بكتير لكن ده ما يمنعش أن الأنسان يحاول يرفع مستواه _يعنى بالبلدى اللى عنده ربنا يذيدة و اللى معندهوش ربنا يدى له المهم أنا عندى الحمد لله اللى مكفينى وراضية و ما بتبترش على النعمة.

لكن مش بحب أنى أقنع الفقير أن ده أمر ربنا خلقك فقير و حتخش الجنة عشان أنك فقير و البلاوى اللى بتشوفها دية كلها نصيب .

يعنى المبدأ أنى بحمد ربنا أنى عندى نعم كتير حتى لوكنت فقير لأن فية الأفقر منى و فية العيان أكتر منى لكن ده ما يمنعش أنى أحاول أبقى أحسن بشغلى طبعا و مسبش حد يأكلنى و يسرقنى و ألا حتبقى كده غابة و البقاء للأقوى و أنا و من بعدى الطوفان :lol:

[سكر]

استكمالا لحاله الفقع الى بعشها لما اشوف مجتمع الشمال ومجتمع الجنوب اليكم هذا الخبر

«بيونسيه» تغير ملابسها على المسرح.. ولاعزاء لـ «الصحفيين»

كتب إيهاب الخطيب ٨/ ١١/ ٢٠٠٩

جانب من الحفل

بعد ضجة وجدل استمرا طيلة الأسابيع الماضية بسبب حفل الأمريكية بيونسيه فى بورتو غالب، وحالة الرفض الشعبى لإقامة الحفل فى مصر، أقيم مساء أمس الأول الحفل وسط حضور كبير من الشباب والشخصيات العامة وعدد من وزراء البيئة الأجانب، الذين تواجدوا فى مصر لحضور مؤتمر بيئى، وسط تجهيزات أمنية مكثفة وترقب عالمى للحفل الأول من نوعه، ظهرت بيونسيه على خشبة المسرح فى الحادية عشرة مساء.

وكان الجمهور قد سبقها إلى حجز أماكنه فى السابعة مساء، وأدت المطربة الأمريكية عدداً من الأغنيات والاستعراضات منها أغنيتان، واحدة لرثاء المطرب الراحل مايكل جاكسون والثانية وجهتها إلى الرئيس الأمريكى باراك أوباما، وارتدت بيونسيه عدداً كبيراً من الملابس واستبدلتها وهى على خشبة المسرح مستخدمة طرق الإبهار بالإضاءات والدخان.

ورفضت بيونسيه حضور الحفل الذى أقيم بعد حفلها، واشترطت لحضوره الحصول على قيمة أجرها الذى حصلت عليه فى الحفل، والذى بلغ مليوناً ونصف المليون دولار، الغريب أن زحام الجمهور كان على بوابات تذاكر الفئة الأولى التى تراوحت بين ألف وألفى جنيه، فيما خلت بوابات الفئة الثالثة من الجمهور، حيث بلغت قيمة تذاكرها ٢٥٠ جنيهاً.

وشهد الحفل بعض المشكلات، فرغم نجاح أحمد البلتاجى، نجل وزير السياحة السابق فى تنظيمه، فإنه اصطدم بالصحفيين، حيث رفض حضور الصحفيين والمصورين بصفة رسمية، وكان حضور بعضهم بعلاقاته الخاصة أو سداده قيمة تذكرة الحفل

[tantrum]

الأمور ما بتحسمش كده يا موعود

منذ أن خلق الله الأرض ومن عليها إلى أن تقوم الساعه والفوارق الإجتماعية والمادية موجودة ..ز

برضوا لم ولن تكون هناك عدالة في التوزيع

وإذا كنت بتضرب مثل بالسعودية

يبقى تعالى شوف ساكني القصور الفارهة .. وساكني العشش الصفيح ...

الشاليهات لها ناسها

وبعدين العدالة تكمُن في التطبيق الصحيح لمبدأ التكافل الأجتماعي والزكاة والرعاية وما إلى ذلك

وليس توزيع الثروة بالمعنى الحرفي

بس السؤال هل من حق الغنى ان يصرف امواله فى اى شى مدام هو غنى وهى فلوسه ؟؟؟

للاسف ... في الدنيا أيوه إن شالله يجيب بيها بومب ويفرقعه

لكن في الأخره هايتحاسب على ده كله طبعاً

فى ظل الفقر و المرض و البطالة المنتشرة و المستشفيات الغارقة فى المجارى و الناس الغارقة فى المجارى و اللى حضرتك أشرت إليهم من قبل يا س س.

فمثل هذه الأمور و هذه الأجور للمطربين لا يمكن أن تكون إلا سفه و إستفتزاز و أكثر من ذلك.

تم تعديل 8 نوفمبر 2009 بواسطة tantrum