مغتربات السعودية اجمع

[moamana]

السلام عليكم و رحمة الله و بركاته

انا مصرية ساسافر الى السعودية لاعيش هناك مع زوجى الذى يعمل فى الرياض

و بصراحة تايهة مش عارفة اجيب ايه من مصر و الاجهزة الكهربائية الكويسة فى السعودية............الخ

انا لاحظت ان اغلب النقط متكلمين فيها الا النقاط الخاصة بالبيت و تجهيزاته

ايه رايكم نعمل ملف لتجهيز البيت المغتربة

و نبدا بالاتى

اجيب ايه من مصر معايا؟؟؟؟؟؟فوط و ملايات قطنية فقط؟؟؟؟؟؟؟؟؟؟ :closedeyes: :unsure:

ملابس الخروج اللى استخدمتها فى مصر لها داعى؟جيبات و عباءات ملونة .......الخ؟ام سالتزم بالعباءة السوداء فقط؟ :ninja: :blink:

طبعا الاغلب يشترون اثاث البيت من الحراج مستعمل للتوفير......يا ترى فيه اماكن تانية و اسعارها معقولة ؟

افضل ماركات الاجهزة الكهربائية خاصة البوتجاز و التلاجة و الغسالة؟و تكون اسعارهم معقولة ؟

السؤال اللى هيجننى ايه الفرق بين الغسالة الاتوماتيك التى تملا من الاعلى و التى تملا من الامام "اللى بتتملى من فوق مشفتهاش فى مصر "؟؟؟؟؟

اشترى اوانى الطهى و تجهيزات المطبخ منين؟؟؟؟؟؟؟؟؟؟؟؟؟؟؟

يلا يا بنات الرجالة كتبوا كل شىء عن الاستقدام و شراء السيارات فعايزين نكمل احنا تجهيزات البيت من الداخل

[عبير يونس]

السلام عليكم و رحمة الله و بركاته

انا مصرية ساسافر الى السعودية لاعيش هناك مع زوجى الذى يعمل فى الرياض

و بصراحة تايهة مش عارفة اجيب ايه من مصر و الاجهزة الكهربائية الكويسة فى السعودية............الخ

انا لاحظت ان اغلب النقط متكلمين فيها الا النقاط الخاصة بالبيت و تجهيزاته

ايه رايكم نعمل ملف لتجهيز البيت المغتربة

أهلا بيكي يا عزيزتي

و إن شاء الله إقامتك تكون سعيدة

صراحة أنا عايشة في مكة

و معرفش إذا كان في فرق كبير و الا لأ

لكن حأجاوب على اسئلتك بالنسبة لمكة

و أهل الرياض بقى يقولوا إذا كان في فرق و الا لا

و نبدا بالاتى

اجيب ايه من مصر معايا؟؟؟؟؟؟فوط و ملايات قطنية فقط؟؟؟؟؟؟؟؟؟؟ :closedeyes: :unsure:

بالنسبة للملايات هنا مش حلوة و معظمها صيني و الفوط كمان مش قد كده

بس في ماركات يعني حاجات مستوردة وخامتها أحسن بصراحة ما سألتش عليها عشان عندي أطفال صغيرين و انتي عارفة البهدلة :blink:

هنا في مكة في حاجات للاستهلاك العادي و في حاجات شيك

مأنصحش بالحاجات الشيك إلا في الصالون اللي حيتقفل و غرفة نومك لو مفيش بيبي بيشاركك السرير

أما لو لسه عروسة أو ولادك كبار فعيشي حياتك

ملابس الخروج اللى استخدمتها فى مصر لها داعى؟جيبات و عباءات ملونة .......الخ؟ام سالتزم بالعباءة السوداء فقط؟

موضوع الملابس ده يتوقف على حاجة مهمة أن حضرتك بتشتغلي و الا بس مرافقة لزوجك

يعني لو بتشتغلي يبقى لازم تلتزمي و انتي رايحة وجاية من الشغل بالعباية السوداء و في جدة مثلا ممكن تلبسي مع العباية السوداء طرح ملونة على راحتك

معرفش أخبار الرياض ايه

أما لو كنتي مش ملتزمة بعمل فعلى راحتك في الألوان بس عبايات برضه

في مكة و المدينة كمان ممكن تبقي براحتك عشان في معتمرين كتير

يعني عندنا الايرانيات بيلبسوا بنطلون و عليه زي تونيك للركبة كده و ماحدش بيكلمهم

بس طبعا بيلفت الأنظار جامد

بس زي ما قلت في الشغل لازم الالتزام بالعباية السوداء

طبعا الجيبات في الشارع انسي

بس حتنفعك لو بتشتغلي

عشان طبعا الشغل مش مختلط إلا في القطاع الصحي

ومع النساء حتقلعي العباية و الطرحة و تلبسي بلوزات و جيبات فقط

بعض الأماكن فقط تسمح بارتداء البنطلون و البلوزة داخل العمل

لكن غالبا بيطلبوا الجيب

ده طبعا في جدة و الرياض و الدمام و الخبر

غير كده في تشديد كبير

طبعا الاغلب يشترون اثاث البيت من الحراج مستعمل للتوفير......يا ترى فيه اماكن تانية و اسعارها معقولة ؟

زي ما قلت لحضرتك في الفوط و الملايات

الموضوع متوقف على وجود أطفال و أعمارهم و البهدلة اللي ممكن يعملوها

خصوصا في جو الحبسة اللي احنا فيه لا مفر من التنطيط على السراير و الكنب

يعني زي ما قلت لحضرتك اهتمي بالصالون و غرفة نومك

أما الليفينج و غرف الأطفال فبلاش تكلفيها اوي عشان زي ما قلتلك الحبسة وحشة

بيبقى سلوكياتهم زي المساجين

:sad:

معظم الشقق بتبقى المطابخ فيها مجهزة بدواليب المطبخ

مفيش داعي لسفرة و نيش و الكلام ده

حتاكلوا في الليفينج قدام التلفزيون

و لو ان ترابيزة السفرة ما تضرش بتنفع لو في عزايم و لها استخدامات كتير

بس ممكن ترابيز كبيرة عادية و تشيكيها بمفرش شيك

و لو المطبخ كبير ممكن تاكلوا فيه

افضل ماركات الاجهزة الكهربائية خاصة البوتجاز و التلاجة و الغسالة؟و تكون اسعارهم معقولة ؟

في مؤسسة الزقزوق و المتبولي و عبد اللطيف جميل

و طبعا أحسن حاجة الأجهزة اليابانية لأن الصيني بيخرب بأسرع مما تتصوري

في شقق بتبقى متأجرة بالمكيفات و في شقق انتي بتجيبي المكيفات و تاخديها معاكي لو نقلتي لبيت تاني

طبعا أهم حاجة المكيفات

لازم كل غرفة مكيف

الديب فريزر كمان عملي جدا

وبراد الميه " الكولدير" ضروري

الكيتشين ماشينز هنا من 500 ريال و طالع

بس في حاجات رخيصة زي مولينيكس ممكن ب 200 و حاجة و مش بطالة

المايكرو ويف ب 300 و حاجة ده الحجم الصغير

طبعا جيبي غسالة فول اتوماتيك و دي سعرها من 2000-2500 ريال و انتي طالعة

و منشر داخلي

مفيش في السعودية نشير في البلكونات

و مفيش بلكونات من أصله :blink:

البوتجاز و التلاجة بنفس رينج الغسالة بس ممكن تجيبيهم مستعمل في الأول

يعني بتبقى في حاجات لقط من الناس اللي بتنزل نهائي و بتبيع حاجتها مش من الحراج

و لو عايزة حاجة من الحراج يبقى تقفي في أوله و تستني العربيات المحملة بالحاجة و تشوفي الحاجة قبل ما تنزل أرض الحراج

السؤال اللى هيجننى ايه الفرق بين الغسالة الاتوماتيك التى تملا من الاعلى و التى تملا من الامام "اللى بتتملى من فوق مشفتهاش فى مصر "؟؟؟؟؟ :ninja:

أنا أقولك يا ستي

اللي بتعبأ من الأمام ما تقدريش تفتحيها و لا تحطي اي حاجة لو البرنامج اشتغل

أم اللي من الأعلى

فعندك إمكانية فتحها و وضع ملابس أخرى حتى بعد بداية البرنامج

اشترى اوانى الطهى و تجهيزات المطبخ منين؟؟؟؟؟؟؟؟؟؟؟؟؟؟؟

في محلات شاملة ممكن أهل الرياض يقولوا لك على اسمائها

نصيحتي تجيبيلك طقم حلل كويس و من الأصلي لأن الحلل العادية وحشة اوي و بتتطبق بسرعة و الستانلس له معاملة خاصة طبعا بس جيبي الأصلي

بالنسبة للكوبايات اعملي حسابك حتجيبي مثلا طقم كاسات و طقم كوبايات طويلة وطقم كوبايات شاي

لو في أطفال جيبي ماجات مش زجاج طبعا

جيبي بويلر عشان المية السخنة

جيبي ملاعق و شوك و سكاكين صغيرة بتاعة الفاكهة بيجوا ستات او اتنشرات

جيبي مغارف

جيبي صواني فرن بايركس أو أطباق فرن

أطقم الصيني الشاملة و الكبيرة ملهاش لزمة

في أطقم شاي مع أطباق الجاتوه و براد ظريفة و سعرها معقول

طبعا لما تروحي المحلات دي بتتهوسي و يبقى نفسك تنقلي المحل كله البيت

بس

اقعدي و اكتبي لستة بالحاجات اللي انتي محتاجاها فعلا

فيه رولات سفر بلاستيك دي حلوة اوي و عملية سواء بتحطيها على الأرض أو على ترابيزة السفرة

بتحافظ على نظافة الأرض أو مفرش السفرة القماش

و عملي عن المشمع لأنه استعمال واحد و ترميه

بينفعني اوي مع الولاد في السناكس اللي بياخدوها أو عصير بيشربوه او ايس كريم و خلافه

لأن الحاجات دي بتجيب لي انهيار عصبي لو وقعت على الأرض أو الكنب :blink:

نسيت اقولك مكواة بالبخار و ترابيزة مكواة

ده اللي أنا فاكراه دلوقت و لو افتكرت حاجة تانية حأقولك

يلا يا بنات الرجالة كتبوا كل شىء عن الاستقدام و شراء السيارات فعايزين نكمل احنا تجهيزات البيت من الداخل

نتمنى كم إقامة سعيدة يا فندم

:blink:

[hosambob]

حمد لله علي السلامة أولا ً ... يا ستى خليها علي الله ... اجهزة اية و تجيبي اية .. الدنيا سهله هنا قوي و اي حاجة بتقضي الغرض .. احنا جيين علشان نتجوز من جديد و لا علشان نلم شمل الأسرة و نقلل سنين الغربة و نوفر قرشين ينفعونا في مصر

متهيألي كلامي واضح و ربنا يجيبك و يوصلك بالسلامة و عقبال ما اجيب مراتي و ابني انا كمان

مع خالص تحياتي

[ozoozo]

الاجهزه الكهربيه بلاش مستعمل

هاتلاقي جديد صيني وبسعر قريب من المستعمل

[mama nona]

الاهلا بيكى فالرياض وهتنوريها ان شاء الله

الاخت الفاضلة مصرية متغربة قالت كل حاجة ما شاء الله

اولا تجيبى ايه وانتى جاية فيكفى انك تجيى انتى والولاد فقط

كل حاجة موجودة وبخامات احسن كتير من مصر

بس فعلا الملايات والمفروشات تجيبيها من مصر

لان هنا جودتها مش زى ال ف مصروكمان اغلى

بالنسبة للبس هنا الخروج برة البيت سواء للعمل او غيره بالعباية السوداء فقط

مفيش حد بيخرج بملون ابدا

لو هتشتغلى اكيد لبسك هينفعك

لانه بتخلعى العباية وبتفضلى بلبسك العادى

وهنا اللبس من اروع ما يكون واسعاره حلوة

الا التونيكات لان اغلب اللبس بيكون موديلاته على انه تحت العباية فقط

ممكن تغطى وجهك بالنقاب وممن لأ

بالنسبة لباقى حاجة البيت هنا كل حاجة

بيتوقف بس على امكانياتك المادية

هتجيبى جديد او مستعمل حسب طبيعة حياتك

انا بصراحة مشترتش حاجة من الحراج قبل كده

مقدرش اقولك عليه اى معلومات

انما فيه محلات للاثاث المستعمل غير الحراج

وفيه كمان الجمعية الخيرية ودىبتبيع حاجات مستعملة بس تمنها بيكون رخيص

ودى مكانها خلف الحياة مول

وجنبها كذا محل اثاث مستعمل

الاجهزة الكهربائية موجودة كل الانواع رخيص وغالى

وزى ما قلت لك على حسب الماديات

بس فيه محلات للاجهزة المخفضة ودى بتكون حاجات جديدةو بس ممكن تلاقيها واخدة خبطة او مخدوشة من الخارج

وبيكون سعرها مناسب وعليها ضمان زيها زى الجديد عادى

وللحديث بقية

وانا تحت امرك لو فيه اى استفسار

[doudy]

اهلا بيكى يا مؤمنة الرياض هتنور

و بصراحة مش هضيف حاجة جديدة

كل اللى قالته مصرية و ماما نونو كفى ووفى

فعلا كفاية تيجى انتى و الولاد بالف سلامة

و كل حاجة هنا موجودة زى مصر و احسن :lol:

[rewsha]

اهلا بيكي يا مؤمنه في الرياض ....

انا بقه لسه جديده في الرياض بقالي 3 اسابيع بس.وكنت باجهز فيهم الشقه فالمعلومات عندي لسه طازه :closedeyes:

وطبعا اللي ساعدني في موضوع شراء الحاجه ده (الاخت الفاضله)ماما نونه ..ربنا يكرمها

انا جبت الاجهزه الكهربائيه بصراحه كلها جديه لاْن كل اللي ساْلتهم خوفوني من المستعمل .وفي فعلا المحلات اللي في الحراج اللي بتبيع حاجات مخفضه فيها خدش بسيط لكن انا جبت الغساله فول اتوماتيك دايو بتتفتح من الاعلى ودي جديده بتاخد 12 كيلو ب 1300 وفي نفس النوع بس بتاخد 6 كيلو وفي 8 كيلو وطبعا دول سعرهم اقل

اما الثلاجه جبتها من محل في الحراج هيه موتورها امريكي وتقفيل سعودي وهيه 25 قدم ب 1800 ريال وكويسه معايه

التكييفات بقه مش هاقدر افيدك فيها علشان انا اخدت الشقه بالتكييفات اللي كانت فيهالمحل وانت بتشتري لاْني بعد ما جبته لاقيت فيه بقعه بن=تظهر على الجنب لونها موف وبتختفي احيانا .فانت جربيه في المحل قبل ما تمشي

الميكروويف ب330 سامسونج

وفي ب300 بس اصغر شويه

عندك بقه الخلاط والكبه او قطاعة البصل دول ياريت تجيبيهم ماركات (مولينكس مثلا او براون)لاْني بصراحه استرخصت وجبت خلاط ب كبه صيني بس ما طلعش حلو واضطريت اروح اشتري كبه تانيه

ايه تاني..........؟......اه بالنسبه للاْدوات المنزليه (الاطباق والشوك والمعالق والحلل والكوبايات )جبتها كلها من محل اسمه الشامل على الطريق الدايري عند النقل الجماعي جنبه محل مشهور جدا اسمه الهرم فيه ملابس تووووووحفه واسعارها جميله جدا وجبت بقه من الهرم ده الحفه (جمع لحاف) الكبير ب114 والصغير ب90

وكل لحاف معاه طقم ملايه

والمخدات كمان من الهرم برضو في نوع ب14 ريال الواحده ونوع اصغر ب 7 ريال

الملابس هنا حلوه واسعارها معقوله .

لو مش بتشتغلي هاتي معاكي عبايات بيت علشان لو انت في البيت تلبسيها لو حد جالك بدل العبايه السمراء .لكن في الشارع العبايه السمراء بس وياريت تستعملي غطاء الوحه لو رايحه سوق او مكان عام بيكون افضل لكن لو في العربيه مع جوزك ممكن تكشفي وشك .وممكن تكشفي وشك عادي برضو في الشارع بس الافضل تغطيه علشان في عمال من جنسيات مختلفه هاتلاقيهم في كل مكان

اما عن العفش بقه انا جبته من الجمعيه اللي قالت عليها ماما نونه جنب الحياه مول .فيها حاجات حلوه ورخيصه .بس مستعمله لكن حالتها واسعارها احسن من الحراج .

بس دي بقه عاوزه يكون معاكي عربيه وتروحي كل يوم تشوفي اللي يعجبك تشيليه علطول .لاْن العفش هناك ما بيستناش وممكن تروحي النهارده تلاقي حاجات تعجبك وممكن ما تلاقيش .بس عموما الجمعيه كويسه جدا في موضوع العفش ده

ده اللي انا فاكراه دلوقتي .ولو حبيتي تستفسري عن حاجه احنا كلنا موجودين .اساْلي بس واحنا نجاوب

التلفزيون جبته صيني 21 بوصه ب 340 لكن نصيحه خليهم يجربوهولك في ا

[moamana]

جزاكم الله كل خير خاصة مغتربة مصرية و ماما نوناو rewsh

استاذ حسام بوب انا اسال عشان مجيبش حاجة و ارجع اندم و يبقى كده موفرتش حاجة

ماما نونا سوال لك اين المحلات التى تبيع الاجهزة الكهربائية المخبوطة او التى بها عيب بسيط ديه

[moamana]

يعنى باختصارا الى الان

الافضل ان ناتى بملايات قطنية من مصر و ايضا بفوط قطنية

لا داعى للملابس الملونة الا اذا كنت ستعملين و فى بيئة غير مختلطة و هو ما لا ينطبق على لانى صيدلانية اى ساعمل بالاختلاط بالناس و بعد عام او اثنان حتى يكبر رضيعىى

شراء الاجهزة الكهربائية الجديدة و التى لم تصنع فى الصين اضمن و افضل

شراء الاثاث المستعمل من الجمعية التى تقع وراء الحياة مول او من الحراج

شراء ادوات المطبخ و المائدة يكون من المحلات الشاملة مثل الشامل الذى يقع على الدايرى

و اعتقد ان هذه اللستة بالادوات كافية و اللى يفتكر حاجة يضيفها

مكواة و ترابيزة المكواة

منشر داخلى و مشابك و سلة للغسيل المتسخ

ادوات نظافة من جردل و ممسحة و مقشة و جروف و زعافة و طبق للغسيل

سلات للقمامة للحمامات و اخرى لليفنج و غرفة النوم وواحد كبير للمطبخ

ادوات المطبخ هى طقم شوك و معالق و سكاكين او اشتريهم فردانى

سكاكين فردانى و مقص للسمك و مقص عادى و خيط الوان مختلفة

طقم حلل اعتقد الومنيوم افضل من الاستانلس

يكفى حلتان تيفال للارز بمقاسات تناسب حجم العائلة يعنى لو عيلة شخصين او 3 يكفى 16 و 18 اما لو اكثر 20 و 24 مناسبين

صينية الومنيوم او تيفال صغيرة ووسط و لو عائلة كبيرة وسط و كبيرة يعنى 2 كفاية

3 قلايات صغيرة ووسط و كبيرة و انا افضل التيفال

كيتشن ماشيين عشان فيها كل حاجة

طقم صينى استخدام

طقم شاى و طقم قهوة و طقم كوبايات طويلة للضيوف

طقم كوبايات 18 قطعة للاستخدام المنزلى

2 ماج

2 صينية بلاستك صغيرة و كبيرة

2 شفشق و الافضل بلاستك عشان الاطفال

طقم توابل و3 بطرمانات كبيرة للحبوب

مصفاة مكرونة و مصفاة ارز و طبق بلاستك للفاكهة

مطبقية و صفاية للحوض

علب للثلاجة

عصارة ليمون و مقشرة بطاطس وقطاعة تفاح

بران بايركس وسط و فوط مطبخ

و اخيرا شماعات

ديه لستة بكل الحاجات اللى هحتاجها او اى بيت محتاجها

مستنية من البنات يفكرونى باى حاجة نسيتها او مهمة هناك او يشيلوا حاجة ملهاش لازمة

طبعا اغلب الرجالة هيقولوا ايه ده كله بس ديه ااقل الاشياء التى ينفع استخدمها فى السنوات الى ساعيشها فى الغربة

نجى باه للسوال

ايه نوع التيفال و الالومنيوم الجيد فى السعودية

[عبير يونس]

يعنى باختصارا الى الان

الافضل ان ناتى بملايات قطنية من مصر و ايضا بفوط قطنية

لا داعى للملابس الملونة الا اذا كنت ستعملين و فى بيئة غير مختلطة و هو ما لا ينطبق على لانى صيدلانية اى ساعمل بالاختلاط بالناس و بعد عام او اثنان حتى يكبر رضيعىى

عشان حضرتك تبقي واخدة بالك

مفيش ستات بيقفوا في صيدليات هنا

همة ممكن يشتغلوا في المستوصفات أو المستشفيات

و في هكذا أماكن حضرتك داخل العمل حتلبسي حجاب زي مصر و فوقيه البالطو الأبيض

يعني جيب و بلوزة و طرحة ملونة و فوقهم البالطو الأبيض

لكن في الشارع برضه حتلبسي العباية السوداء

و طبعا طرحة سوداء و نقاب عشان متتعرضيش لمضايقات

زي ما قالولك الأخوات الفاضلات في الرياض

لأن مكة مختلفة طبعا

عشان متعودين يشوفوا المعتمرات الإيرانيات و الأتراك

بس هوة في العمل عموما الالتزام بزيهم أفضل كثيرا منعا للمشاكل

و عموما نصيحة مادام عندك رضيع ما تشتغليش الا لو في مكان العمل حضانة للرضع

لأن تجربتي مع الشغالات هنا ما تسرش :lol:

ربنا يوفقك يارب

و يسعد أيامك

تحياتي

:blink:

[moamana]

جزاك الله خيرا مصرية متغربة على التوضيح اكثر و انا لن اعمل قبل سنة لان رضيعى عنده 50 يوم فقط

لكن معلقتيش يا جميل على اللستة اللى كتبتها ازود و لا انقص و لا ايه؟؟؟؟

و يا ترى ايه رايك فى تلاجة توشيبا 14 قدم و و غسالة توشيبا 5 ك التى تفتح من الاعلى اتوماتيكعة طبعا

و البوتجاز عايزة اربعة شعلة كفاية ؟صح؟ و عايزة اعرف نوع كويس؟

[rewsha]

ممكن اعلق انا على الثلاجه والغساله والبوتاجاز؟

لو عاوزه راْيي جاولي تجيبي تلاجه كبيره شويه عن ال 14 قدم.لاْن هنا انت بتنزلي مره كل اسبوع تشتري حاجات البيت وبتحطيها في الثلاجه .فبتحتاجي مكان والفريزر بتاع التلاجه كمان هايبقى صغير على انك تحطي فيه متطلباتك بتاعت اسبوع لو جبتي خضار ولحوم وسمك مثلا .مش زي مصر بتكون كل حاجه متوفره جنب البيت او في نفس المنطقه وممكن تنزلي انت بنفسك تشتريها

اما الغساله بقه اللي بتفتح من الاعلى فدي كويسه وعمليه جدا عن تجربه (انا مجرباها في مصر)بس كانت ناشونال .لاْنك بتستعملي مسحوق عادي او اتوماتيك مش مقيده بالاوتوماتيك بس.وكمان لو نسيتي اي حاجه من الغسيل بره الغساله ممكن تفتحي وتحطيها في اي وقت .غير اللي بابها من الامام .

والبوتوجاز 4 شعله حلو وكويس

اما عن الماركات بقه حد تاني يدلك .لاْني جبت الماركات اللي لاقيتها قدامي بصراحه .الغساله دايو ...التلاجه HAASدي متور امريكي وتقفيل سعودي بس حلوه والله .والبوتوجاز جيبته بقه مستعمل .اريستون ايطالي 5 شعله ب 600من المحلات بتاعت المستعمل اللي جنب الجمعيه .الانبوبه بقه جبتها مره ب 170 مليانه بالمنظم من الحراج .ومره ب 120 فاضيه ومن غير منظم من نفس المحل اللي جبت منه البوتوجاز جنب الجمعيه ...واي خدمه

[عبير يونس]

جزاك الله خيرا مصرية متغربة على التوضيح اكثر و انا لن اعمل قبل سنة لان رضيعى عنده 50 يوم فقط

لكن معلقتيش يا جميل على اللستة اللى كتبتها ازود و لا انقص و لا ايه؟؟؟؟

و يا ترى ايه رايك فى تلاجة توشيبا 14 قدم و و غسالة توشيبا 5 ك التى تفتح من الاعلى اتوماتيكعة طبعا

و البوتجاز عايزة اربعة شعلة كفاية ؟صح؟ و عايزة اعرف نوع كويس؟

الليستة كويسة طبعا

بس حضرتك عارفة البيت دايما بيحتاج حاجات

و بيختلف الوضع مع وجود الأولاد

و بالذات حاجة المطبخ بتتوقف على العادات الغذائية لكل أسرة

يعني اللي بيحبوا المقليات و المحمرات و أكلهم بيعتمد عليها بيحتاجوا أدوات غير اللي متعودين عل المشويات و السوتيه و الطبخ بالبخار و هكذا

في بيوت لازم كل يوم حلويات

و في ناس بتعتمد على الفواكه أكتر و هكذا

و الأدوات بتتنوع من بيت لبيت حسب عادات الأسرة و متطلبات أفرادها و مزاجهم الغذائي

بالنسبة للتلاجة بيعتمد مش على الأسرة كبيرة و الا لأ

بيعتمد على مرات نزول حضرتك للتسوق

يعني في ناس تحب تجيب حاجتها بالشهر و بتلجأ للتجليد و التجميد

و في ناس بتجيب طلباتها بالأسبوع

و في ناس يوم بيوم

و الأخير ده مينفعش في الخليج (السعودية بالتحديد) لأن الست هنا مش بتنزل السوق زي مصر كده و تتسوق عادي براحتها

و ان عملتها مرة في الأسبوع ماشي انما كل يوم دي متنفعش لوحدها

و بالنسبة للغسالة حسب أفراد الأسرة و كمية الغسيل و حسب الاستخدام كمان

لأن لو في أطفال بنغسل كل يوم مرة و اتنين

خصوصا مع وجود بيبي

و في ناس بتخصص يوم في الأسبوع للغسيل و طبعا بتبقى الكمية كبيرة حتى لو الأسرة مش كبيرة

طبعا حضرتك أدرى بنظامك

و البوتجاز أربعة شعلة مش بطال بس فرنه مش كبير

الا لو حضرتك حتعتمدي على الفرن الكهرباء (نصيحة الكهرباء هنا نار مش أقل من 200 ريال في الشهر مع الاستهلاك المتوسط خصوصا المكيفات بتسحب جامد)

و ارجع وأقول برضه حسب نظام حضرتك

لو طبيعة الاكلات اللي بتطبخيها حضرتك تخللي استخدام الفرن أساسي و الا لا

بوتجازي رسلان جاز

حاجة كده تمشي الحال بس خمسة شعلة و فرنه كبير و فيه ميزة اشعال الشواية مع الفرن و الباب مقفول

مش فاكرة بكام بالضبط بس متهيألي هو والغسالة الاتوماتيك معدوش 2500

مش فاكرة ده بكام و ده بكام

و كانوا جداد بس من اللي بيبقوا مخبوطين أو حاجة زي كده

بس هو شكله كويس و مش باين فيه أي حاجة

بس لما تبقة الاجهزة مفكوكة كرتونتها بتبقى أرخص حتى لو مفيهاش خدش

اهو ممشي الحال و خلاص

على فكرة ماعادش في حاجة اسمها سلع معمرة

آخره تلات أربع سنين و اقلب

مهما كان غالي

كله بقى كده دلوقت

ما عادش زي زمان تقعد بال15 و ال20سنة :D

ما تدويشيش نفسك يا قمر بالحاجات من دلوقت

جهزي الكلام ده في نوتة صغيرة

كبيره أسبوع و تجهزي كل حاجة و تستريحي

و حاولي في الأول تجيبي الضروري اوي و بلاش توسع لحد ما تعرفي راسك من رجليكي wst::

و تحت أمرك يا جميل في أي استفسارات

تحياتي

:sad:

[moamana]

روشة و مصرية مغتربة ربنا يكرمكم على المساعدة

لكن المشكلة ان زوجى هو اللى بيشترى و بس بيبلغنى بالتليفون فطبعا لا شايفة الحاجة و لاقادرة اوايمها او اعرف معلومات اساسية عنها

واضح ان الموضوع بيختلف جامد حسب امكانيات كل شخص فى الاجهزة و التجهيزات

معلش ممكن حد يشرحلى الجمعية ديه فين بالتفصيل لان زوجى عايز يروحها

[mama nona]

روشة و مصرية مغتربة ربنا يكرمكم على المساعدة

لكن المشكلة ان زوجى هو اللى بيشترى و بس بيبلغنى بالتليفون فطبعا لا شايفة الحاجة و لاقادرة اوايمها او اعرف معلومات اساسية عنها

واضح ان الموضوع بيختلف جامد حسب امكانيات كل شخص فى الاجهزة و التجهيزات

معلش ممكن حد يشرحلى الجمعية ديه فين بالتفصيل لان زوجى عايز يروحها

خلى زوجك يشتريلك المهم الاول

ولما توصلى بالسلامة انتى كملى الباقى على ذوقك

بالنسبة لوصف الجمعية

يقف فاشارة الحياة مول

هيكون الحياة مول عاليسار

ووزارة العمل عاليمين

يقوم ياخد من الاشارة ال هو واقف فيها يسار

ويمشى حوالى 300م

هتكون عاليمين

ولها يافطة واضحة وعليها اسمها ولونها يمكن اسود

وفيه جنبها محل اثاث مستعمل ممكن يلقى نظرة فيه

فيه كمان مكان تانى للجمعية دى يمكن على مخرج 16

بس انا معرفش وصفها

وب

[لونا]

اتمنى لك اقامة سعيدة فى الرياض

انا عايزة ااكد على حاجة مهمة و هى موضوع حجم التلاجة لازم تكون كبيرة زى ما قالوا الاخوات لانك بتشترى حاجتك بالاسبوع

تانى حاجة الغسالة الاوتوماتيك اللي بتفتح من فوق عملية جدا عن تجربة شخصية

اما بالنسبة لاوانى الطهى فانا انصحك بتجنب الالومنيوم تماما لان ثبت ضرره و الان كل اخصائيين التغذية بينصحوا بالستانلس ستيل

و في نوع تركى انا مجرباه رائع جدا اسمه (كورك ماز ) و القاعدة بتاعته سميكة و ممكن تلاقيه فى كل المحلات

وكل فترة كارفور بينزل عليه عرض بيكون طقم خمس قطع كان نازل في اول رمضان ب300 ريال

تحياتي

[doha]

قبل ماقولك رايي في نجيب ايه ومنجيبش ايه اسمحي لي اقولك على تجربتي ( سابقة ) لي في الحكاية دي ..

حاليا انا بقالي مع زوجي حوالي سنة هنا في الرياض بس قبل كده عشت عمري كله تقريبا فيها مع والديّ .. يمكن 30 سنة او اكتر .. في خلال السنين دي كنا دائما مابنسكن في احسن واغلى شقة ممكنه في احسن مكان .. العفش بنغيره كل سنتين تلاته بالكتير .. مصاريف لبس ولعب وخروج وفسح متعديش .. في المقابل كنا بنشوف زميلات لنا في المدرسة لما ندخل بيوتهم في اماكن متواضعه جدا واثاث وعفش على نفس النظام .. وعادي مكانتش الحكاية دي بتفرق معانا على فكره فالطبع الغالب على بيوت المصريين عامه في الخليج انها بيوت عاده بسيطه وعاديه مفيهاش البهرجه او المصاريف الي ممكن تشوفيها في بيوت جنسيات تانيه زي اللبنانيين او الشوام عامه ..

مش هندخل في جدلية هنعيش حياتنا كمصريين امتى لكن الي يهمني هو الواقع النهرده بالنسبة لنا احنا وزميلاتنا الي بحكي لك عليهم لما بدخل بيوتهم النهرده في مصر شكلها ايه..

حياتنا في مصر او لاكون اكثر دقة حياة والدي ووالدتي نفس الشيء تقريبا زي ماهي هنا .. ( شقة ) حلوة في احسن حته وشويه عفش وديكورات وخلاص على كده .. نعمه والحمد لله من ربنا .. لكن بقية الزميلات ( بالذات الي كانوا في بيوت متواضعه هنا ) كلهم في مصر تقريبا وبلا استثناء ساكنين اما في ( عمائر ) تمليك خاصه بيهم او في شقة برضه بس من ام 300 متر في ارقى احياء القاهرة ومش ضواحيها او حتى الاقاليم.. مش هقولك برضه على العفش والاثاث والذي منه ..

في الشكل الظاهري تقريبا مفيش فرق بينا احنا الاثنين وان وجد فهو لصالحهم بكل تأكيد .. بس في المضمون اعتقد الفرق شاسع مابين موظف بسيط يقدر ينتقل بكام الف ويشيل نفسه من طبقه اجتماعية معينه لطبقه تانيه وبين شخص عاش حياته كلها يصرف ببذخ ويرمي يمين وشمال على اساس انه ( ابن ناس ) وده مستوى حياته الطبيعي الي يفترض بيه يعيش فيه ليفاجأ بعد ثلاثين سنه او اكتر انه بقى خلاص زيه زي فلان ميختلفوش عن بعض ( ظاهريا ) في شيء بل ان فلان او علان حاليا وبما اننا في بلد بتقيس المستوى الاجتماعي بالماديات فربما الي عرف يمسك على ايده هنا ويعمل له قرشين كويسين هو نفسه الي هيبقى في مصر فوق والناس التانيه للاسف تحت .. طبعا اتفاقنا او اختلافنا مع هذا التقسيم الطبقي لن يؤثر في حقيقه كونه موجود وملموس ..

مايهمني هنا في كل ده اكثر من اننا بقينا فين وهم فين مسألة الي عملناه زمان كله والي عشناه راح فين ؟ وعاد علينا بايه ؟ وهل لو كنا عشنا باقل من ربع اوثمن المستوى الي كنا عايشين فيه زمان كان هيتاثر معانا كتير ولا حتى كنا هنحس بحرمان او ماشابه ؟

للاسف لما بحسبها بكتشف اننا مكناش محتاجين نصرف كل الي صرفناه عشان نعيش في مستوى كويس بل وممتاز كمان .. طيب وان كان الحكايه كده يبقى هل كنا صح لما اتبعنا اسلوب شفناه احنا بمنطق الي حوالينا من الطبقة الي زينا طبيعي ومعتدل وشافوه الناس العاديه الي هي السواد الاعظم من المصريين هنا من قبيل التبذير او حتى ( السفه ) ؟

بعد ماوضحت لك الخلفية الي انطلقت منها عشان ابني رايي الي هقوله لك فمبدئيا ياريت قبل ماتجيبي ( قشايه ) وحده في بيتك في الرياض تكوني حاطه في ذهنك التالي ..

اولا هنا مش زي مصر نهائيا يعني لا دي عيشتنا الابدية ولا الي مش هنجيبه النهرده مش هنعرف نجيبه بكرا .. يعني فكرة انك تجهزي شقة ( من كله ) دي معتقدش لها اي مجال هنا زي ماهو في مصر حتى ولو كنتي عروسه زي مابيقولوا ومحتاجه ( جهاز ) هنا مفيش الكلام ده ولا ربعه حتى .. هتجيبي الاساسي بس وضروري الضروري فقط ومع الوقت ان ظهر انك محتاجه شيء تاني حاجه ( حقيقية ) تقدري في اي وقت تنزلي تشتريه ايه المشكلة ؟ الفلوس في الجيب والبضاعه ف السوق .. ومن هنا يتضح اهمية المبدا القائل بان مهما كانت الحاجه حلوة ومبهره فالفلوس احيانا بتكون احلى وابهر واحيانا حاجتك لها هتكون اكبر فحافظي عليها انفع لك ..

ثانيا .. متوقع انك ترجعي مصر في اي وقت .. بل ولو مرجعتيش فامر وارد جدا انك هتنقلي من شقة للثانيه او من مدينة لاخرى وفقا لظروف عمل زوجك او اي ظروف تانيه .. هتربطي نفسك ليه بكوم عفش وكوم لبس وكوم ادوات واواني ؟ خليكي دائما ( خفيف خفيف ) عشان تبقى حياتك اسهل وتكاليف انتقالك سواء ماديا او بدنيا او حتى ذهنيا اقل و ( ارخص ) .

ثالثا . . الحياه هنا مملة جدا مقارنة بمصر ويكاد يكون نزول السوق هو الترفيه الوحيد المتاح فيها للناس الي زي حالاتنا .. فعودي نفسك متجيبيش كل الاساسي مرة وحده لانك كده كده هتنزلي تاني وكده كده هتشتري . فخلي دائما شيء ناقص يكون هدف لك بعدين تروحي تجيبيه بدال ماتكملي كله فتضطري بعد كده ( تخترعي ) احتياج جديد ..

رابعا .. انتي غالبا في بداية حياتك مع زوجك سواء بقالكم كام شهر او كام سنة يادوب .. البدايات دي مهمه اوي وتصرف كل واحد فيكم حيال صعوباتها امر في غايه الاهمية وهو نفسه الي هيشوفه الطرف الثاني بعد مايقطع مشوار كبير في رحلة العمر ويقف فجأه ويبص وراه ويقول يااه والله صبرت معايا .. بجد تعبت .. لولاها مش عارف كنت عملت ايه ..

خلي دلوقت من تصرفاتك ماتحبي انك تسمعيه من زوجك بعد عشرين تلاتين سنه لما يقول عنك كنتي والشهاده لله بتوفري له وتقولي بلاش الحاجه الفلانيه بدال ما يقول مخلتش في جيبي مليم بطلباتها الي مبتخلصش ..

خامسا ..حطي امامك هدفنا جميعا من حياتنا هنا في الغربة ايه .. حياة كريمه .. دلوقت .. وبعدين ..

اذا فحاولي بكل مااوتيت من قوة توازني مابين انك تعيشي هنا حياه كريمه تستحقي انك تعيشيها بكل تاكيد لان اليوم الي بيروح من العمر مبيرجعش .. ومابين انك تدخري شيء لبكرا عشان تضمني تعيشي في مصر نفس الحياة او قريب منها بعد عمر آخر طال هنا او قصر ..

يبقى لو اتفقنا على النقاط السابقة فلما تنزلي تشتري او زوجك ينزل على اعتبار انك لسه في مصر هتجيبي معاكي الاساسيات فقط لك وللطفل .. ملابس خروج تنفع تلبسيها قدام ستات تكون بكم وطويلة على اساس النوع ده من الملابس مبيتباعش هنا تقريبا كله اما ضيق او بدون اكمام او حمالات حتى .. وطالما انتي مش ناويه تشتغلي هنا يبقى كفايه عليك لبسك الحالي في مصر وممكن تجيبي طقم واحد جديد وخلاص يكون هو زيك المعتمد . . طبعا هنا ممكن تخرجي بجيب وبلوزه او بنطلون زي مانتي عاوزه وممكن تكون كم او بدون اكمام لان في كل الاحوال هتلبسي عليها عبايه سوده .. لكن المشكلة لو هتزوري ستات او ستات تزورك هنا بتقلعي العبايه خالص فهاتي معاكي اللبس الي تحبي تلبسيه قدام الستات دول ..

هتجيبي لبس شتوي طقم واحد على الاقل تلبسيه لما الشتا يجي لغايه حتى ماتشتري من هنا لبس جديد ..

هاتي احذية وشنط في مصر ارخص واحسن كتير من هنا .. برضه الملايات والملابس الداخليه الرجالي والفوط .. لبس الاطفال منصحش ابدا تجيبيه من مصر الفرق شاسع مابين السعر هنا وهناك لصالح هنا ..

الادوية في مصر رخيصه جدا مقارنة بهنا ..

متجيبيش اي اجهزه كهربائية معاكي غير حاجه بتستخدميها فعلا زي استشوار مثلا او خلاط صغير بدال الركنه هاتيه بس اعملي حسابك ترميه هنا بعد كده وانتي راجعه مش مستاهل شيل ..

زوجك يشتري ايه قبل ماتيجي ؟

تكييف , بوتاجاز , امبوبه , سرير او حتى مرتبه مؤقتا لغايه ماتلاقوا حاجه كويسه في المستعمل , ممكن طقم صالون وممكن ينتظر شويه الدنيا مش هتطير لغايه ماتيجي انتي تختاري معاه .. لحاف وبطانية ( البطاطين دلوقت رخيصه عشان في الصيف هتغلى في الشتا ) .. مخدات .. حلتين وكوبايتين وطبقين وكام ملعقة وشوكه والذي منه.. غساله .. سخان . طاولة قابلة للثني . كرسيين .. منشر غسيل ..

وبرضه فكري انتي في سيناريو متوقع لاول يومين تلاته هتعملي ايه فهتكتشفي الحاجات الي محتاجه تكون موجوده بمجرد وصولك يعني لو ناويه اول ماتيجي تنظفي مثلا يبقى هتطلبي مقشة وليفة صحون وصابون اطباق .. الخ

زي ماقالوا لك الاخوات الشامل هنا ممتاز جدا لادوات البيت بس نصيحه اشتري الاساسي بس وبعدين لما تعوزي حاجه ابقي اشتريها من ( ابو ريالين ) ودي محلات للادوات المنزلية منتشره في كل الاحياء تقريبا وفيها كل حاجه باسعار رخيصه جدا ..

الجمعية الي بتبيع المستعمل انا مش عارفه مكانها بالظبط بس هي في الشمال وبالمناسبة لما تروحي هناك اسألوا بتوع الليموزين واصحاب المحلات عن سوق الشمال هو قريب منها جدا يعني بتاع دقيقتين او ثلاثه بس للاسف مش عارفه الوصف بالظبط .. شارع اسمه ابن سينا هتلاقي فيه عدد من محلات الاثاث المستعمل راقيه جدا واسعارها رخيصه جدا .. انا رحته مرتين كده مع وحده من باب الفضول وبصراحه رهيب ورائع لدرجه لو مكانش عندي عفش في مصر ممكن كنت اخذت منه ونزلته هناك .. وطبعا الموضوع حظوظ يعني ممكن يصادف تلاقي حاجات حلوة وممكن متلاقيش الي على مزاجك بس اجمالا الحاجه هناك مستواها ممتاز لانها اساسا فرش فلل بعكس الموجود في حراج بن قاسم في الجنوب حاجته نص نص لانها مستوى الحياه هناك اقل من الشمال اجمالا ..

بالنسبة للماركات فطول عمرنا بنستخدم الغساله الي تعبأ من اعلى .. هنا كان عندنا كلفينيتور دي بصراحه لمهاش حل ممتازه جدا لكن سعرها غالي شويه فممكن تجيبي اي نوع تاني عن نفسي عندي في مصر ال جي وشغاله تمام ماشاء الله وميزه الي بتعبأ من فوق بالظبط زي ماقالوا لك انك بتحطي الغسيل في اي وقت وكمان بتوفر كهرباء لان مفيهاش سخان هي بتسحب من السخان ( عندي في مصر بتسحب من سخان المطبخ غاز ) وطبعا بتوفر مسحوق الى حد ما لانها بتغسل بالمسحوق العادي مش الاوتوماتيك .. بغض النظر عن كل الفوائد دي فبصراحه انا مبرتاحش ابدا للي تبعأ من الامام خاصه وان الي من اعلى سعتها غالبا بتكون اكبر بكتير ( ممكن توصل 12 كيلو ) .

البوتاجاز خليكي في جليم جاز احسن شيء . .هو غالي لو هتجيبيه جديد لو هتنزليه مصر اشتري جديد طبعا لكن لو لهنا هاتي مستعمل هيمشي الحال .. تلاقيه في الحراج مابين 250 الى 500 على حسب حجمه ونظيف جدا ..

لما تيجي باذن الله خذي لك جوله في محل اسمه ( اكسترا ) أو ( ساكو ) هتلاقي كل الانواع والماركات اشتري براحتك خالص بس يفضل دائما تلفي الاول وتقارني .. بعدين في شهر 11 و 12 بيكون في تخفيضات جامده جدا خاصه في اكسترا لانه بيقفل الميزانية فبينزل اجهزه باسعار ممتازه .

اول ماتيجي برضه باذن الله ابقي روحي الشامل او اي محل ادوات منزلية واشتري الضروري من كبايات وملاعق وماشابه ميكونش زوجك اشتراها ..

ادوات استقبال الضيوف متجيبيهاش دلوقت .. انتي لسه جديده لما تيجي وتقعدي وتستقري وتشوفي نوعية الضيوف الي متوقع ييجوا لك و( كثافتهم ) ابقي اشتري .. دلوقت لك عذرك ان معندكيش ادوات كافيه فعادي تستقبلي من غيرها لو فرض حد زارك فجأه .. وقدام ومع اول عزومه تحتاجيها ابقي اشتري اللازم لكن متجيبيش من دلوقت لانك لسه متعرفيش الوضع هيكون شكله ايه ..

برغم اني رغيت كتير الا ان لسه في حاجات في دماغي عاوزه اقولها لك بس كفايه كده عشان متفصليش مني وباذن الله لو قدرت لي عوده اقولك بقية الحاجات وربنا معاكي تيجي بالف سلامه يارب ومتنسيش باذن الله اول ماتيجي اول حاجه تعملوها في شهر محرم القادم باذن الله هي العمره بتكون ولا اروع في الوقت ده وبرضه ولا اسهل وارخص .. ربنا يكتبهالكم على الف خير باذن الله ومتنسينيش من دعواتك ..

[moamana]

السلام عليكم

لونا جزاك الله خيرا و فعلا هاشترى طقم كوكارماز ده لانى سمعت انه تحفة و الحلة الواحدة هنا فى مصر ب300 جنيه منه

ضحى

حبيبتى متخفيش مش هفصل على العكس انا احب من يتكلم بموضوعية

و انا لى مبدا و هو انه مفيش داعى للمصاريف الكثير ابدا بس برده لازم نعيش حياتنا لان هذه السنوات لن تعود ابدا لذلك فانا امسك العصاية من النصف

فبدلا من طقم تيفال كامل او 6 اطقم كوبايات مثلما املك فى مصر يكفى حلتان و طقم كوبايات واحد..........الخ

وانا معروفة بتوفيرى فى البيت رغم مستوانا الراقى و الحمد لله وانا فتحت الموضوع لاجعل من يملكون خبرة مثلك ينصحونى حتى لا اجلب الكثير من مصر او من هنا مما لا يكون له فائدة

اههههههههههه على فكرة اكثر ما يفرق بين شخص يصرف و لا ليس معدل الصرف بل معدل الاستثمار يعنى متعمليش نصف مليون و فرحانه و حطاهم فى البنك و ساكتة لا .........اعملى 100 الف و استثمريها افضل و احسن و هكذا

و هقول لجوزى على سوق الشمال ده

[لونا]

امبارح كنت في كارفور و لقيته منزل طقم الكوركماز 5 قطع ب 300 ريال

عرض حلو اوى يا ريت تلحقوه :closedeyes:

[aimen]

ممكن اسال سؤال خارج شوية ؟

هى الكوركماز دى على العريس ولا العروسة ... :closedeyes: