مغتربات السعودية اجمع

doha · 17 يناير 2010

انا مش متابعه الموضوع بس كنت داخله اسال على حاجه وطالعه بس اتكعبلت في كام استفسار بعد اذنكم ارد على الماشي سريع سريع كده .. .

بالنسبة لك يامريومه متجيبيش حاجه من جهازك نوهائي

يادوب ملابسك بس ( الي بتحبيها وقعدتي قبل الفرح بالشهرين تطلعيها من مكانها تبصي لها وترجعيها تاني ) كل حاجه موجوده هنا وبرخص التراب ده اولا وثانيا عشان تعملي حسابك كل حاجه هتجيبيها هترميها باذن الله قبل ماترجعي مصر فعلى ايه الشيل والحط .. ده غير حقيقة انك باذن الله لازم تجهزي شقتك في مصر فمش معقول تشيلي من هناك وترجعي تودي من هنا ..

هاتي زي مااتفقنا ملابسك بس ومش كلها طبعا ممنوع الكوبايات والحلل والكلام الفارغ ده كله موجود هنا وبالتاكيد وطالما انك عروسه فاكيد اشتريتي حاجات كويسه ( معمرة يعني ) فمش منطق تجيبيها لهنا .. خليها في مكانها هناك ..

بالنسبة لانك تقعدي مع مامتك ولا زوجك لاه طبعا زوجك فوق كل اعتبار .. لو بدأتي حياتك الزوجية بماما هتنهيها بماما برضه ..

بالنسبة للي سال عن لبس العمرة فعن نفسي بعمل العمرة ( بالجلابية ) بجيب جلابية حلوة تكون قطن وطويلة وساترة ومفيهاش نقوش ( عندي وحده مخصصاها لذلك معلقاها مغسولة ومكويه في الدولاب لهذا الغرض )

طبعا بلبس الجلابية وفوقها عباية سمرا من الي بيلبسوها هنا والعباية مقفوله طبعا من الامام بكباسين ..

وبما انك كده كده هتشتري عبايه فممكن تعتمدي الطريقة دي في لبس العمرة ..

على كل حال لو مصرة انك تجيبي لبس للعمره فانا كان معايا وحده سعوديه في الحج عامله حاجه عجبتني اوي .. مفصلة مخصوص زي جلابية خضرا ساترة وطويلة باكمام واحلى حاجه فيها جيوب سحرية قريبة من تحت الباط كده والجيوب دي مقفوله بسوسته .. وطبعا الجلابية دي كانت من قماشه مناسبة اظن قطن او كتان حاجه زي كده .. المهم تراعي ان مكه دائما حر ..

بالنسبة لموضوع الليفة السلك ..

(( ايوه احنا الستات بنهتم بالتفاصيل انت مالك انت يلي عارف نفسك و قاعد تضحك على كلامنا .. ايه مدخلك اصلا ؟ ))

ماعلينا نرجع لموضوعنا .. بالنسبة للكفته قصدي الليفة السلك فانا ملاحظتش انها هنا فيها مشكلة ..النوع الكويس موجود هنا في محلات ابو ريالين القطعه بثلاثه ريال تقريبا او ريالين مش متاكده .. عباره عن ليفة ( مكورة ) ومتداخله في بعضها وتضغطي عليها تلاقيها طرية كده مش النوع الناشف المستدير ده ملوش لازمه وبيصدي اصلا ..

ادوات المطبخ هنا اجمالا افضل من مصر وبمراحل ببساطه لانها كلها مستورده من نفس المصدر وهو الصين او الهند وفي مصر عليها ضريبة وجمارك وهنا معليهاش يبقى نجيبها منين افضل ؟

بالنسبة للبهارات والتوابل وخلافه فبرضه كل شيء موجود هنا حتى العرقسوس .. انا بتكلم عن الرياض .. لو في جده فاهلها ادرى بشعابها يجوز مفيش ..

واخيرا بالنسبة للكوسى فالكوسى هنا ممتازة كخضار اما كشغل في المدارس فانا شفت بنفسي وهنا في المنتدى اولياء امور بيقيموا المدارس وفقا لجنسيات المدرسين فيها .. معروف ان افضل المدارس ( الانترناشيونال ) الي جنسية المدرسين فيها اجانب اولا ثم لبنانيين ثانيا وبعدهم ياتي المصريين

يعني الموقف الي حصل بتاع المدرسة اللبنانية هم مش اخذوا اللبنانية عشان الكوسى وانما عشان هيستفيدوا منها ( كيافطه ) دعائية للمدرسة ..

على كل حال الشغل هنا في المدارس على قفا من يشيل .. بس المهم تقدمي من اجازة الصيف او من قبل التيرم مايبدأ وفي كل المدارس الي حواليكي من غير ماتنتظري منهم اعلان لان غالبا مبيعلنوش ..

==============

سيبكم من كل ده انا كنت داخله ليه .. ايوه افتكرت

دلوقت انا بقالي ثلاث ايام لفيت نص الرياض بحثا عن جاكيت او بالطو شتوي يكون ثقيل على مقاس بنتي الصغيره .

مش لاقيه خااااالص

اما مقاسات صغيره اوي سنتين تلاته .. او المقاس مظبوط بس الشكل مقرف جدا .. او حاجات خفيفه جدا زي الورقة لا تنفع ولا تشفع .. وللاسف الحاجات الي بتعجبني ويبقى شكلها مناسب بتطلع اصلا جاكيت قصير لبنت كبيرة مش بالطو .

فدلوقت انا عاوزه لو حد فيكم يدلني على مكان مضمون اني اروح الاقي عنده باذن الله بالطو او جاكيت على سن ست سبع سنين كده ويكون فخم وشكله حلو والاهم يكون ثقيل ومش مهم السعر .. نسيت اقول ان ميكونش لونه اسود احسن انا تعقدت ..

وعادي لو كان العرف فيه احمر او بنفسجي منقط مش مشكلة المهم يكون يتيم ..

حد يعرف طلبي ده ممكن الاقيه فين ؟

fatfouta · 17 يناير 2010

أنا مش عارفة يا ضحى انتى لفيتى فين فى نص الرياض قوليلى

عشان مش معقول ماروحتيش الهرم او مبارك هتلاقى فيهم لان فيهم جميع مقاسات الاطفال والكبار كمان هما بصراحة ازراقهم ساعات بتبقى مش حلوة اوى بس والله اوقات الواحد بيلاقى فيهم حاجات حلوة واسعارهم مناسبة

اما لو فى اماكن تانية عندك مثلا مركز الشعلة على طريق الملك عبد العزيز هتلاقى فيه محلات كتير اوى فيها حاجات حلوة من سن بنتك ولو دخلتى من الباب اللى على طريق الملك عبد العزيز نفسه فيه عندك محل اسمه (نادى الاسعار) وده اول محل على ايدك اليمين من الباب ده

وعندك سيتى ماكس ليه فروع كتير وماليه الدنيا وبرضو هتلاقى مقاس بنوتك وفروعه كتير اولهم اللى فى مركز ابن سلمان اللى فى البطحاء :lol: انا بقربلك بس ماتقوليش هتنزلينى البطحاء يا فتفوتة.....طب خلاص ماتزعليش ليه فروع كتيرة منهم اللى فى التلاتينى العليا او اللى على طريق الملك عبد الله

وممكن تلاقى فى سويقة عارفاها؟ دى فى الديرة مش معقولة ماجيبتيش عباية منها مرة .....ادخلى ولفى فيها هتلاقى فيها كل حاجة وفيه محلات لبس وباسعار كويسة ......بس خدى بالك هتدخلى من باب وتقعدى تلفى وتتوهى جوا لانها تتوه وفجاة تلاقى نفسك طالعة من نفس الباب اللى دخلتى منه

ونيجى بقى لمحلات تانية هتلاقى فيها اكيد بس هتبقى غالية شوية لانها ماركات ذى أدامز و زارا وسبلاش وحاجات تانية كتير اوى بصراحة اللبس فيها بيبقى نظيف وبيستحمل وجميل اوى وبالذات جواكت او بلاطى الاطفال

ودول هتلاقيهم فى المولات الكبيرة ذى الرياض مول اللى فى شارع العليا العام بعد الهرم بتاع العليا بشوية عالناحية التانية وكمان فى صحارى سيتى مول والحياة مول هتلاقيهم جمب بعض وكمان جمبهم سيتى بلازا كل دول هتلاقى فيهم

ياللا روحى لفى النص التانى من الرياض وابقى قوليلى عملتى ايه ولو مالقيتيش ابقى انزل انا اجيبهولها ماتزعليش

doha · 17 يناير 2010

هههههههههه

قلبك ابيض بجد يافتفوته . . .

اول حته رحتها كانت زارا العليا .. ملقيتش فيه اساسا غير لبس اطفال سنة او سنتين بالكتير . لقيت بالطو واحد بس فرو عجبني جدا بس لقيت اكمامه طويلة فاكتشفت انه بتاع آنسات بس قصير شويه ..

طلعت من زارا على نكست ومذر كير .. الاثنين مفيهمش حاجه ( بالمناسبة كلهم عاملين تخفيضات جامده بس للاسف مفيش حاجه عدله )

ثاني مكان رحت له طبعا الهرم .. فاكره شفت فيه السنة الي فاتت بالطو كان رائع وندمت اني مجبتوش لاني وقتها قلت الدنيا هنا مش بتبرد اوي فمش مستاهله البالطو التقيل ده .. رحت لفيت الهرم شبر شبر ملقيتش اي اثر غير لجواكيت اطفال صغيرين او اولاد لكن ملقيتش غير بالطو او اثنين بناتي وشكلهم مايعلم بيه الا ربنا ..

ثالث مكان رحته وده كان يوم السبت يعني اول امبارح .. حزري فزري ؟ السويقة ..

عشان بس متزعليش .. طبعا قبل ماروح السويقة خدت لي لفة محترمه في محلات الخزان محل محل ..

السويقة لقيت فيها جواكيت بالهبل بس كلها نظام عشرين ريال الجاكيت :rolleyes:

طبعا متنفعش ببصلة . . لفيت كل المحلات تقريبا مفيش حاجه ..

النهرده بقى ارتكبت جريمه رحت البطحا .. اوعى حد يروحها ياجماعه ..

لقيت نفس جواكيت السويقة ام عشرين ريال بس للامانة يعني اثقل حاجه بسيطه جدا . وقال ايه نظام ستين وسبعين ريال ..

وطبعا الاذواق والعياذ بالله .. بلاش الواحد يوصف حرصا على مشاعر القراء ..

المهم حسيت باليأس . . .

فكرت في الشعله على اساس ان زمان من يجي عشرة عشرين سنة كنا بنجيب منها بس بقالي من وقتها مرحتش ومش عارفه هلاقي عندهم حاجه دلوقت ولا لاه ..

دلوقت مش عارفه اروح فين .. بفكر اروح الرياض جالري بس مشكلته بعيد علي وخايفه اطخ المشوار على مفيش زي مشوار النهرده الي ندمانة عليه آخر ندم .. بكرر للمرة الالف اوعى حد يروح البطحا ياجماعه مفيهاش حاجه نظيفة تتشرى . .

مش عارفه بصراحة اروح فين بعد كده خاصه وانا تعبت ووقتي ضيق .. حد عنده اقتراح ؟

maruoma · 19 يناير 2010

شكرا يا ضحي لردك عليا

والله انا لقيت حاجات حلوه ف الاسماعيليه للاطفال واسعارها كويسه

اجيبلك من هنا وخلاص

هههههههههههههههههههههه

يا جماعه دلوقتي جوزي بيجيب حاجات فالشقه

ياريت اعرف منكو انواع كويسه

تلاجه وبوتجاز وغساله وحلل وصواني واطباق

ومنين من جده عشان اعرف اقولو

وكمان هو بيقولي نجيب ديب فريزر

اجيب معاه تلاجه صغيره ولا كبيره

تم تعديل 19 يناير 2010 بواسطة maruoma

doha · 19 يناير 2010

شكرا يا ضحي لردك عليا
والله انا لقيت حاجات حلوه ف الاسماعيليه للاطفال واسعارها كويسه

اجيبلك من هنا وخلاص

هههههههههههههههههههههه

يا جماعه دلوقتي جوزي بيجيب حاجات فالشقه

ياريت اعرف منكو انواع كويسه

تلاجه وبوتجاز وغساله وحلل وصواني واطباق

ومنين من جده عشان اعرف اقولو

وكمان هو بيقولي نجيب ديب فريزر

اجيب معاه تلاجه صغيره ولا كبيره

الله يكرمك يامريومه الحمد لله ربنا كرمني ووقعت على سوق ممتاز لقيت فيه طلبي ..

بالنسبة لزوجك لو هو ( شاطر ) ويعرف ينقي حاجه كويسه يبقى يجيب الثلاجة والغسالة والبوتاجاز مستعملين افضل بكتير .. لو نص نص على الاقل يجيب البوتاجاز مستعمل

بالنسبة للديب فريزر ياريت لو تاجلي شراؤه شويه لغايه ماتتاكدي ان كنتي هتحتاجيه ولا لاه ..

بما انك لسه عروسه ولسه مش بتشتغلي فممكن متحتاجيش ديب فريزر دلوقت ويمكن متحتاجيهوش خالص ..

بالنسبة للثلاجة هاتي حاجه كبيرة افضل .. بس مش كبيرة اوي الي بيبقى لها بابين جنب بعض زي الدولاب وانما كبيرة يعني بابين تحت بعض الي متعودين عليها دي .. وشوفي انتي على حسب امكانياتك هاتي يعني كل ماكانت كبيرة كل ماكان افضل ..

بالنسبة للصواني والحلل خليه يجيب اقل اقل شيء ممكن يعني حلة ولا حلتين وطبقين تلاته وكفايه على كده عشان لما تيجي انتي باذن الله تختاري على ذوقك واحتياجك الباقي .. الرجاله غالبا مبتعرفش في الحاجات دي اوي فممكن يجيب حاجات ملهاش لازمه او ينسى حاجات مهمه . وكمان ادوات المطبخ هنا مغرية جدا انك تشتريها فمتضيعيش على نفسك المتعه دي وهاتيها بنفسك افضل ..

اما تجيبي منين في جده فدي بقى يفيدك فيها باذن الله اخواتنا في جده لان معنديش فكرة خالص ..

fatfouta · 19 يناير 2010

الله يكرمك يامريومه الحمد لله ربنا كرمني ووقعت على سوق ممتاز لقيت فيه طلبي ..

فين يا ضحى قوليلنا؟

fatfouta · 19 يناير 2010

من فضلك قولة اسم السوق وفين

تم تعديل 19 يناير 2010 بواسطة fatfouta

doha · 19 يناير 2010

فين يا ضحى قوليلنا؟

بصي ياستي هو ممكن يكون سوق مش معروف بس انا كنت بشوفه كتير لما اكون رايحه اكسترا هو في طريق الملك فهد بعد اسواق مكه مباشرة على نفس الصفة الي هي فيه .. تقدري تقولي طريق الملك فهد مع كوبري عتيقه هو السوق امام كوبري عتيقه وبعده مباشرة بيكون اكسترا السويدي العام ..

اوصف لك وصف تاني لو الاولاني مش باين

هتاخذي طريق الملك فهد جنوب وتمشي فيه طوالي لا يمين ولا شمال هتقابلك اسواق مكه على يمينك خليكي ماشية بعدها هتلاقي السوق ده على يمينك برضه وكوبري عتيقة على شمالك بس كده ..

السوق اسمه اسواق النخبة ..

فيه محلات كتير على الواجهة فيها ملابس اطفال ( تحفه )

بس نظام 300 و400 للطقم

وفيها ملابس افراح للاطفال ( تاخذ العقل ) على راي اخواتنا السعوديات ..

السوق من جوا بقى فيه محلات اطفال تانيه وفيها حاجات اقل شويه في الاسعار من المحلات الي على الواجهة بس برضه ممكن تكون اقل شويه في الفخامة وماشابه ..

بس اجمالا عجبتني الملابس الموجوده في السوق ده حسيت انها لبس ( بجد ) مش شويه قماش عاوز ينكوي وبمبالغ طائلة زي ملابس التوكيلات ولا لبس تحسي انه ملبوس قبل كده زي الملابس الي سعرها رخيص .. يعني ملابس ممكن غاليه شويه عن الي برا بس من وجهة نظري تستاهل بجد حاجات نظيفة يعني ..

amy · 4 فبراير 2010

السلام عليكم انا بقالى اكتر من ساعتين بقرا مغتربات السعوديه بصراحه اول مره ادخل فيه لقيت كل الكلام الى كنت عايزاه بجد اصحاب واهل ربنا يخليكوا بالصدفه وانا بدور على نوع رجيم على النت لاقيت حاجه حلوه افتحوها ان شاء الله تعجبكوا http://alfrasha.maktoob.com/alfrasha19/thread465107/

نور عيني · 7 فبراير 2010

الموضوع عجبني جدا وقريت نصه من كام يوم وماكملتش علشان ابني كان بيمتحن لكن دلوقت الحمد لله كملته علشان الاستاذ خلاص خلص امتحاناته

انا بقى اللى هكلمكم عليه هو مصر مش السعودية فانا حاسه اني هكون زي الناس اللى كنت بستهزأ بيهم من المصريين اللى مسافرين بره ولما يرجعو مصر ما يكونوش عارفين حاجه في مصر وناسين الشوارع

فانا بقالي سنه واحده هنا وواحده قريبتي اتجوزت فبسأل عن مكان فرحها على اساس اني عارفه كل الاماكن طبعا

فاتفاجأ انهم يقولولي الفرح كان في كتاراكت ........ايه كتراكت؟؟؟؟

اول مره اسمع عن المكان ده فقالولي ده عند ترعة المريوطيه

طيب ده انا اصلا من سكان الهرم

امال لما اقعد هنا كام سنه فنسي بيتي مش كده ولا اييه؟؟؟

fatfouta · 8 فبراير 2010

الموضوع عجبني جدا وقريت نصه من كام يوم وماكملتش علشان ابني كان بيمتحن لكن دلوقت الحمد لله كملته علشان الاستاذ خلاص خلص امتحاناته
انا بقى اللى هكلمكم عليه هو مصر مش السعودية فانا حاسه اني هكون زي الناس اللى كنت بستهزأ بيهم من المصريين اللى مسافرين بره ولما يرجعو مصر ما يكونوش عارفين حاجه في مصر وناسين الشوارع

فانا بقالي سنه واحده هنا وواحده قريبتي اتجوزت فبسأل عن مكان فرحها على اساس اني عارفه كل الاماكن طبعا

فاتفاجأ انهم يقولولي الفرح كان في كتاراكت ........ايه كتراكت؟؟؟؟

اول مره اسمع عن المكان ده فقالولي ده عند ترعة المريوطيه

طيب ده انا اصلا من سكان الهرم

امال لما اقعد هنا كام سنه فنسي بيتي مش كده ولا اييه؟؟؟

نور عينى انا بحبك اوى

عارفة ليه ؟؟؟؟؟؟ انا متابعاكى من ساعة موضوعك بتاع (عايزة اعمل حاجة) وكان نفسى ارد بس كنت هقول ايه مش عارفة

انا بقى يا ستى بحبك عشان بتفكرينى بنفسى بالضبط من ساعة ماجيت الرياض من حوالى يعنى....داخلين اهو على ست سنين

كنت ذيك بالضبط عاوزة اعمل حاجة بس مش عارفة هى ايه الحاجة او من كتر الحاجات اللى عاوزة اعملها مش عارفة ابدا باى حاجة فيهم

شايفة ضيق الحال وعاوزة اساعد جوزى وعاوزة اوفر ومش قادرة لان المرتب صغير جداااا والديون اكتر منه ذى ما قلتى

شايفة حاجات كتير حواليا عاوزة اغيرها ومش قدرة لاسباب كتيرة ومنها عادات وتقاليد البلد اللى انا جيت فيها

حاسة انى متكتفة جدااااااا وفى الاخر مش عارفة اعمل ولا حاجة

حاولت اشتغل لقيت الحرب من كل اللى حواليا اول واحد جوزى قاللى ماينفعش طبيعة شغلك ماتنفعش هنا ......نصحونى بالتدريس والشغل فى المدارس وانا مش بحب كده

بعد حوالى 8 سنين شغل وكنت بشتغل وانا فى ثانوى والله......قعدت فى البيت وبقيت متكتفة

اول حاجة جوزى اتحجج بيها قاللى اذاى هتقدمى (CV)....هتحطى فيها رقم تليفونك؟؟؟؟ اسكتى انتى ماتعرفيش لسه الناس هنا وفعلا يا بنتى اديكى جربتى كم الارف والمعاكسات كل يوم لغايت مازهقت

وفيييييين بعدها بقى بكااااام سنه على ماوافق انى اشتغل انا بقى اللى كنت اتعودت عل كده بس كان جوايا رافض فكرة انى اقعد فى البيت....زفعلا حاولت انى اشتغل بس خلاص بقى مابقاش ذى الاول ....بقى عندى ولادى ومشاغلهم

عاوزة اقولك انك بعد كام سنه مش هتنسى مصر واماكن مصر لا لان مصر ماتتنسيش

بس هتتعودى عالغربة والضيقة والتعب وهتبقى بالنسبالك الكلام ده عاااااادى جداااا

زعلتى من نفسك لما لقيتى نفسك مش عارفة مكان فى مصر؟؟؟ لا ماتزعليش لان كل شوية ف حاجات بتجد فى البلد واماكن جديدة بتتنشأ وانتى هنا ومش على دراية بيها ولما تنزلى تبصى تقولى يااااااه ده المكان ده كان لسه صحرا لحق يبقى عمار كده.......وهو ده اللى حصل معاكى اكيد

ماتزعليش ربنا يفتح عليكوا يارب ويوفق جوزك وبيعليه فى شغله ويديله رزقكم وتقدروا تسدوا ديونكم وبعدها توفروا كمان

ان شاااااااااااء الله

نور عيني · 9 فبراير 2010

quote name='fatfouta' date='Feb 8 2010, 12:57 PM' post='567175']

)نور عينى انا بحبك اوى