الهدايا وسنينها

[noureymo]

سلام عليكم وكل سنة وانتم طيبين

بصراحة انا شايف ان الموضوع الي هفتحه ده بجد غريب جدا على الاقل من وجهة نظري يمكن علشان لسة جديد في الغربة.

الموضوع باختصار يا جماعة اني سافرت الامارات يوليو 2008(ركزوا معايا في المدد) اول اجازة نزلتها كانت في ديسمبر 2008 وطبعا اخدت معايا هدايا لحمايا وحماتي واخوات المدام (عادي يعني) ومن الهدايا دي ساعة غاليا جدا لحمايا.

المهم مش ده الموضوع في يناير 2009 جت المدام والبنت في اجازة نص السنة وهما راجعين مصر طبعا هدايا تاني (عادي)

مايو 2009 انا نزلت اجازة وما اخدتش حاجة كان متهيالي ان الناس مش في دماغها الحاجات التافهة دي .

المهم اغسطس 2009 نزلت المدام والبنت تاني اسبوعين قعدوه معايا هنا في ابوظبي وبرده اخدوا هدايا وحاجات رمضان وحاجات تانية كتير

المشكلة الي عاوز اخد رايكم فيها حصلت الاسبوع الي فات بعد المدام والبنت ما جم هنا قعدوا معايا اسبوع العيد ورجعوا وهي ماشية بعت معاها موبايل لحمايا العزيز الي بعتبره زي والدي وبجد الموبايل مش رخيص موبايل محترم

المهم لقيت المدام بتكلمني على التليفون بعد يومين من وصولهم بالسلامة الى ارض الوطن وبتقولي انها متضايقة ومخنوقة

ليه يا ست الكل ايه الي مزعلك

بصراحة ردها كان اخر حاجة ممكن اتوقعها في حياتي

اختها بتقولها جبتي لنفسك لبس وما افتكرتنيش ومامتها بتقولها كل مرة بتنزلي بتجيبي حاجات تافهة ليا.

(الجملة دي علشان المدام جابت لجدتها ست جلاليب كانت المدام وعداهم بيها) جدتها دي الي هي ام حماتي فحماتي زعلت من الحكاية دي وبتقولها عمرك ما عملتيها معايا.

طبعا انتم متخيلين الموضوع ده وايه الي يكون اتقال

بس بصراحة انا فوجئت جدا وما كنتش متوقع ان الموضوع ده الناس بتعتبره فرض خاصة انهم عارفين ان احنا علينا اقساط شقة وداخلين على تشطيب وحاجات كده

انا مش عارف اقول ايه بس يا ريت يا جماعة حد يقولي احط حد للموضوع ده ازاي مع العلم اني انشاء الله نازل في العيد الكبير واكيد مش هاخد معايا حاجة خاصة بعد الي اتقال ده وبصراحة عاوز اوصلهم اني فعلا مصدوم فيهم بسبب الموضوع ده وفي نفس الوقت عاوز افهمهم ان ما فيش حاجات من دي تاني لحد ما اخلص التزاماتي على الاقل والي عاوز حاجة يدفع تمنها الاول وانا تحت امره هتكون عنده على طول

يا ترى الي بقوله ده غلط ولا ايه.

[MZohairy]

اسمع كلام واحد عايش بره بقاله بتاع 20 سنه

منهم 15 سنه كنت بنزل من مرتين الى 4 مرات كل سنه لمصر

متجيبش حاجه لحد خالص

و هي اول مره اللي حتبقى صعبه عليك و عليهم و بعدين كله حيتعود على كده

و خلي بالك........

لو جبت هدايا رخيصه حيتريقوا عليك في سرهم و يقولوا شوفوا بسلامته جايبلنا ايه!!!!

و لو جبت هدايا غاليه حيحسدوك و يقولوا عليك بتعبي الفلوس في زكايب بس ياريته كان جابلنا احسن او اكتر من كده!!!

يعني محدش حيرضى ابدا

لذلك خد القرار الشجاع بمنع موضوع الهدايا تماما

و تأكد انك حتدعيلي

[noureymo]

والله معاك حق ربنا يكرمك

تعرف حضرتك ان المشكلة دلوقت بقت ان المدام هتخاف تجيب حاجة لنفسها يما تيجي علشان الكلام الي مالوش لازمة ده

اصلها قاعدة معاهم علشان شغلها وعلشان البنت

بس بجد انا تقريبا كنت فاهم الدنيا غلط وعلشان كده هنفذ الي انت قلت عليه وهدعيلك

[محمد عيسى]

لو جبت هدايا رخيصه حيتريقوا عليك في سرهم و يقولوا شوفوا بسلامته جايبلنا ايه!!!!

و لو جبت هدايا غاليه حيحسدوك و يقولوا عليك بتعبي الفلوس في زكايب بس ياريته كان جابلنا احسن او اكتر من كده!!!

كلامك ميه ميه و اضيف:

كده هاتبقى ملزم في كل زياره انك تجيب هدايا

و لازم الهدايا دي لا تقل قيمتها عن الهدايا بتاعة المره اللي قبلها

و ده اللي بعمله و مرتاح عالآخر:

بروح بشنطة هدومي بس

في البيت عندي باساهم في حاجات مفيده (يعني دفع مصاريف المدرسه لاختي الصغيره - شراء جهاز هما محتاجينه و من مصر ما هو المبدأ عندي انني مبشيلش)

بعمل تجمع لكل فرع في العيله على حده و غالبا يتولي تجميع العيله حد من السيدات الكبار فيها .. و باخد معايا و انا رايح حلويات شرقيه مناسبه من العبد او البحصلي

ما رحتش البلد خالص .. الاجازه ما فيهاش وقت كفايه و غالبية اقاربي في القاهره

خليك محدد أحسن حاجه

[ozoozo]

انا لسه نازل مصر اجازه في العيد

ودي اول سنه في الغربه

جبت هدايا بحوالي 5 او 6 الاف ريال

في ناس كويسه وشكرتني

وناس تانيه انتقدت اللي جايبه من ورايا

وناس كانت بتبين انها مضايقه امامي عشان جبت لحد حاجات اكتر من حد تاني

المهم اني قررت اعمل زي استاذ زهيري بالظبط مش هاجيب لحد حاجه خالص

وفلوس الهدايا اتفسح بيها في مصر احسن

[noureymo]

وبصراحة عاوز اوصلهم اني فعلا مصدوم فيهم بسبب الموضوع ده وفي نفس الوقت عاوز افهمهم ان ما فيش حاجات من دي تاني لحد ما اخلص التزاماتي على الاقل والي عاوز حاجة يدفع تمنها الاول وانا تحت امره هتكون عنده على طول

يا ترى الي بقوله ده غلط ولا ايه.

بس حضرتك ما ردتش عليا يا استاذ زهيري في النقطة دي

[noureymo]

انا لسه نازل مصر اجازه في العيد

ودي اول سنه في الغربه

جبت هدايا بحوالي 5 او 6 الاف ريال

في ناس كويسه وشكرتني

وناس تانيه انتقدت اللي جايبه من ورايا

وناس كانت بتبين انها مضايقه امامي عشان جبت لحد حاجات اكتر من حد تاني

المهم اني قررت اعمل زي استاذ زهيري بالظبط مش هاجيب لحد حاجه خالص

وفلوس الهدايا اتفسح بيها في مصر احسن

والله الظاهر ان ده الحل الامثل

[noureymo]

لو جبت هدايا رخيصه حيتريقوا عليك في سرهم و يقولوا شوفوا بسلامته جايبلنا ايه!!!!

و لو جبت هدايا غاليه حيحسدوك و يقولوا عليك بتعبي الفلوس في زكايب بس ياريته كان جابلنا احسن او اكتر من كده!!!

كلامك ميه ميه و اضيف:

كده هاتبقى ملزم في كل زياره انك تجيب هدايا

و لازم الهدايا دي لا تقل قيمتها عن الهدايا بتاعة المره اللي قبلها

و ده اللي بعمله و مرتاح عالآخر:

بروح بشنطة هدومي بس

في البيت عندي باساهم في حاجات مفيده (يعني دفع مصاريف المدرسه لاختي الصغيره - شراء جهاز هما محتاجينه و من مصر ما هو المبدأ عندي انني مبشيلش)

بعمل تجمع لكل فرع في العيله على حده و غالبا يتولي تجميع العيله حد من السيدات الكبار فيها .. و باخد معايا و انا رايح حلويات شرقيه مناسبه من العبد او البحصلي

ما رحتش البلد خالص .. الاجازه ما فيهاش وقت كفايه و غالبية اقاربي في القاهره

خليك محدد أحسن حاجه

شكرا يا أ/محمد على ردك بس بجد انا كنت فاكر ان دي هدية مني وانا حر اجيب او ما اجيبش وبعدين كلنا اتربينا على ان الهدية رمز ومش بقيمتها

بس برده حضرتك كمان ما رتش عليا في اني عاوز اوصلهم اني فعلا مصدوم فيهم بسبب الموضوع ده وفي نفس الوقت عاوز افهمهم ان ما فيش حاجات من دي تاني لحد ما اخلص التزاماتي على الاقل والي عاوز حاجة يدفع تمنها الاول وانا تحت امره هتكون عنده على طول

[عنبو]

السلام عليكم ورحمة الله وبركاته

انا شخصياً كنت متردد فى موضوع الهدايا يعنى من جوايا مش عاوز اجيب بسبب الشيل ومعرفش ايه ؟؟لكن فيه ناس بتزن عليا وتقول هات ؟؟

بس خلاص قررت انى مجبش هدايا خالص ؟ الا حاجات بسطيه جداً على سبيل الذكرى وللناس معينه ودمتم

ولو حبيت اهدى حد ابقى اديله فلوووس ويجيب اللى هو عاوزه وخلاص ؟

[النجم الثاقب]

الموضوع ده شاغلنى من فترة كبيرة .

الاجازة اللى فاتت كانت اول اجازة ليا .. و أول ما سافرت نويت إنى مش هجيب هدايا لحد خالص مالص .. و اتناقشت فى الموضوع ده مع زمايلى فى الشغل و بما إنهم خبرة أكتر منى فى الموضوع ده فاقتنعت شوية برأيهم .. المهم ما جبتش هدايا .. اديت لأخواتى و بعض الأطفال من المقربين مبلغ من المال .. الموضوع كان محرج بالنسبة لى بصراحة .. بس هو الحل اللى قدامى خصوصا انى كنت عايز اهرب من موضوع المقاسات و الألوان و اللف فى المحلات .. و طبعا كله يقولى يابنى ليه التكاليف دى و ملهاش لازمة و الكلام المعروف ده .

المشكلة دلوقتى إنى مش عارف هعمل إيه الاجازة اللى جاية إن شاء الله .. انا نفسى الغى الموضوع ده خالص .. بس المشكلة اللى بتقابلى إن فى ناس كتير جاملونى قبل كده و كل ما كانوا بيسافروا و لو حتى لعمرة كانوا لازم يجيبولى أى حاجة .. الله يكرمكم فيه حد عنده حل للموضوع ده . :unsure:

[ذهبية]

الموضوع بسيط جدااا انك تسبق بنفسك و باهل بيتك يعنى حضرتك متجبش اى شىء ابدااااا ليهم و مايشوفوش اى حاجة جديدة على

المدام طالما هى قاعدة معاهم

و بنت حضرتك تسبق لجدتها و تقول يا تيتة تصدقى ان بابا زعل منى لما قولت لة ان هديتك وحشة فقالى خلاص علشان كلمتك دى و

الله ما عنت جايب علشان انتى مقدرتيش تعبى و لا ذوقى معاكى و انا مش مجبر انى اجيب لحد وممنوع هدايا تانى

و بكدة انت وصلت الرسالة و ضربت عصفورين بحجر وقولت اللى انت عايز تقولة عن طريق بنتك و مهدت للكل ان معتدش فية هدايا تانى

و بكدة معندهم حجة اصلا يزعلوا لانك مجبتش لاهل بيتك و لا بنتك و لا زوجتك

لو حد من اصحابك عايز تجيب لة هدية مش لازم تعملها اعلان فى الجرنار يعنى خليها فى السكرتة ولا من شاف و لا من علم

لك تحياتى و تيجى بالسلامة

ذهبية

[hosambob]

يا جماعة تقاليد و عادات المصريين .. مش هتنتهي

النهاردة مجبتش .. هتلاقي حد بيقلك دة حته مجبتلاناش كيلو كاجو أو مكسراتو انت جي

تيجي المرة التانية تفتكر الكلام و تقول نجيب السنة دى .. تلاقي طاقت جهنم اتفتحت عليك .. فلان و علان و ابن فلانه و بنت علانة ...

و بردة مش هتعجب ... بس بتقول اية هاجة كسر عين أو برو عتب زي ما بيقول ..

المهم

كبر دماغك و خليك كووووووول و اعمل مقدمات قبل ما تنزل انك تشتكي و تقول المصاريف هنا كتيييرة و الحاجة ولعت نار و الكلام دة

و متجبش الا للي يستاهل و اللي انت عاوز تجامله و بيقدر و البقي كبر دماغك عنهم و خليهم يعرفوا انك جملت ناس و هما لئة علشان يحسوا بغلطهم و فركش

[mama nona]

انا من رأيى انك خلاص تقرر بعدم شراءالهدايا بينك وبين زوجتك فقط

انت مش هتعرف تحسسهم بالصدمة ال انت اتصدمتها

وحاجة زى دىمتفرقش معاهم طالما صرحو لبنتهم

وكبردماغك من موضوع الشرا وقول بصراحة ان الغربة معدتش مضمونة والحالة الاقتصادية اثرت على شغلى

ولازم الم كل قرش علشان اقدر اشطب شقتى

وبعدين طنش ال حصل ومشى امورك عادى

انا عن نفسى بسأل اهلى عن متطلباتهم علشان مجبش حاجة مش هتعجبهم او مش هيستعملوها

بس دول اهلى فدايما تلاقيهم قلبهم علينا ومتكلفيش نفسك وهاتى حاجة بسيطة

انما اهل زوجى كل ما اجيب لهم حاجة واقعد بالشهورالف فالاسواق

لا حد بيقولى شكرا ولاحاجة وكأنه فرض محتوم علينا

لأ وايه ؟ده ممكن حماتى تدى ولادها الهدايا وتقولهم دى حاجة على اد الحال من اخوكم

وخلاص قررت مجبش هدايا لحد نهائى

[عنبو]

mama nona مشاركة بتاريخ اليوم, 01:36 PM

انا عن نفسى بسأل اهلى عن متطلباتهم علشان مجبش حاجة مش هتعجبهم او مش هيستعملوها

بس دول اهلى فدايما تلاقيهم قلبهم علينا ومتكلفيش نفسك وهاتى حاجة بسيطة

انما اهل زوجى كل ما اجيب لهم حاجة واقعد بالشهورالف فالاسواق

لا حد بيقولى شكرا ولاحاجة وكأنه فرض محتوم علينا

لأ وايه ؟ده ممكن حماتى تدى ولادها الهدايا وتقولهم دى حاجة على اد الحال من اخوكم

ايه الحياديه دى طيب المفروض زى لما تسالى اهلك تسالى اهله كمان من باب العدل يعنى ؟؟

ولا انتى رايك ايه ؟؟

ذهبية مشاركة بتاريخ اليوم, 12:28 PM

لو حد من اصحابك عايز تجيب لة هدية مش لازم تعملها اعلان فى الجرنار يعنى خليها فى السكرتة ولا من شاف و لا من علم

لك تحياتى و تيجى بالسلامة

ذهبية

بجد المصطلح بتاع سكرته ده انا عارف من زمان بس مكنتش اعرف نه منتشر كده بس تمام يامعلم وحلو قوى موضوع التخطيط بتاعك كده

[mama nona]

ايه الحياديه دى طيب المفروض زى لما تسالى اهلك تسالى اهله كمان من باب العدل يعنى ؟؟

ولا انتى رايك ايه ؟؟

انا مش بسألهم لانهم بيقولو طلباتهم من بدرى

وبعد ما اخلص طلباتهم تلاقى بقي طلبات استثنائية ال هى بتيجى ليلة السفر

طيب اخر طلب كان ليلة سفرى انه اخوه عاوز لاب توب فحدود المعقول يعنى اد امكانياتنا ما تسمح

ايه رأيك فالهدايا !!!!!!!!!!!!!!!!!!

[سهيلة]

فعلا يا جماعه موضوع الهدايا دة بيحصل عليه خناقات كل ما بننزل مصر

لاننا عندنا التزامات انا وزوجى كتير تشطيب شقه واقساط هنا

لكن ف نفس الوقت لما بنزل مصر بحس ان الناس مستنيه الهدايا

من عنيهم لما بييجوا يسلموا علينا

فبجيب هدايا

وصراحه جوزى موش بيبقى موافق نظراللظروف الاقتصاديه والميزانيه اللى بعافيه شويه

بس بيجيب لاهله المقربين اوى هدايا

واهلى بقى يطلع موضوع الميزانيه دة يطبقه عليهم

وبيقولى لانك موش بتشتغلى موش مطلوب انك تجيبى هدايا لحد

ولما تشتغلى جيبى اللى انتى عاوزاة

طب موش اهلى واهله المفروض واحد والمفروض اننا عيله واحدة كمان يعنى اهلى هما اهله

انا طبعا موش بناقشه ف الموضوع دة خالص

لانى بتحرج وموش قادرة اقوله موضوع اشمعنى اهلك

وموش عارفه هوة عندو حق ولا لا ف الموضوع دة

المشكله انا نازله مصر على العيد الكبير لوحدى ومكسوفه اطلب انى اشترى هدايا

ومكسوفه بردو انى انزل من غير ....... زى ما اخونا زوهيرى قال

عاوزة اخد حباية الشجاعه عشان الموضوع دة واحاول اعمل بنصيحة زوهيرى

[roby]

انا اقولك اللى حصلى بقى انا خاطب من سنة و 9 شهور و لان الشقة مخلصتش فالجواز متعطل المهم يعنى عشان اعوض خطيبتى فكنت بنقى احسن حاجة و اغلى حاجة و جبهالها وبصراحة اهلها كنت بشترلهم حاجات مش غالية اوى يعنى المعقول المهم ان الاجازة دى كانت فى رمضان فانا جبت هدايا كالعادة ولبس غالى لخطيبتى و فوجئت ان المقاس طلع كبير شوية بس لانى سألتها و هيه اديتنى مقاسات غلط المهم حصل خلاف بسيط عندهم فى البيت و انا معرفش و والدها قالها الهدايا الللى بيجبها خطيبك دى مش قد مقامنا و لا مقامك و هوه مسترخصك كدة ,وبس دى كانت اخرها معايا بقى اما عرفت منها الكلام ده اتصلت بيه و رحت قبلته و فهمته ان الحاجات دى غالية و ان لو الحاجة مش عجباه يدهانى انا عارف قيمتها و بينى و بين نفسى قولت ملهومش بعد كدة غير المواسم العادية و حد من اهلى يروح بيها سواء كحك و لا لحمة و لا حلاوة المولد و شكرا على كدة ,بصراحة الموضوع ده بيتعبنى جدا مش ماديا بس لا كمان جسمانيا فى التنقية و اللف و المقاسات و معنويا لانى مبلقيش اى تقبل من اى حد للحاجة اللى جت زى ميكون متخيل انى هجبلهم موبيلات و لاب توب بقى مدام انا فى الامارات لانهم متخيلين ان الحاجات دى بناخدها هدايا مع اكياس الخضار و الفاكهة .

[سهيلة]

انا من رايي يا روبى بالنسبه لهدايا خطيبتك انها هيه لازم تختاره بنفسها

بصراحة لان اغلب اللبس هنا ف الامارات ماركات عالم|]ه وغالى جدا

بس موش معنى انو غالى انو يعجبها

لان ازواق الرجاله ف اللبس غير البنات مطلقا

انا بردو خطيبى اول ما اتخطبنا جابلى لبس وبصراحة ما عجبنيش بس شكرتو وفهمته بالراحة ان دة كويس وغالى موس موش زوقى

والافضل ف اجازتك تنزل معاها وهيه تختار من مصر اللى يعجبها

وكمان هتوفر على نفسك التعب ف اللف

اما بالنسبه لكلمة اهلها بصراحة تقيله شويه لانهم اكيد موش عارفيين ان الماركات هنا عالميه وغاليه والحاجات دى قيمه

ولازم تعرفهم ان الحياه هنا غاليييييييييهه جدا

عشان يقدروا

تحياتى

[HDarwish]

أنا لو حمايا قال الكلام ده بصراحة حيكون موقفي أصعب من كده .. بصراحة حتكون بداية النهاية ..

[noureymo]

شكرا ليكم كلكم يا جماعة على ردودكم

بصراحة وانا بكتب الموضوع ده كنت متخيل ان دي مشكلة مش عند حد تاني

لكن بما انكم افدتموني بالرأي

بصراحة انا هعتبر الهدايا الي جبتها للسنتين تلاتة الجايين لحد ما اخلص التزاماتي

متهيالي ده صح