ممكن تبيع ذهب علشان تشترى شقة!!!!!!!

[ذهبية]

هل ممكن تبيع ذهب علشان تشترى شقة خاصة ان الذهب مرتفع اليومين دول و الشقق اسعارها فى النازل

انهو يكون استثمارة احسن ان تظل تحتفظ بالذهب كقيمة سواء قل تمنة او زاد مع الايام والسنين

او انك تبيعة و تضع فلوس فى شقة وتنتهز فرصة انخفاض الاسعار

ارجو ان اسمع ارائكم من وجهة نظر اقتصادية

اشكرم مقدماااا و لكم تحياتى

ذهبية

[doha]

على حسب ..

يعني مش دائما ده صح وده غلط او العكس ..

يعتمد الامر على حاجات كتير زي هل يغلب الظن ان سعر الذهب في اللحظه دي في قمته ولا قريب منها ؟ وهل الشقة دي لقطه مثلا او في سبب يخليني استعجل في شرائها على حساب امور اخرى او لاه ..

بس اجمالا وعني انا شخصيا بعتبر الذهب مشكلة من ناحية الحفاظ عليه مهما كانت افكارك مبتكره لاخفاؤه برضه هيكون في قلق وشك مش هيكون ابدا زي السيوله في البنك ( وان كان هو بيزيد في القيمه وهي بتنقص ) ولا في امان الاحتفاظ بالحاجه على شكل اي عينيات اخرى غير الذهب ..

عن نفسي لو امامي فرصة ابيع ذهب واشتري قطعه ارض مش هتردد ابدا خاصه لو عندي رصيد تاني يجابه الاحتياجات الطارئة .. لكن لو الوضع متعلق بشقة ممكن افكر الاول هل الشقة دي ميزه ولا فيها لقطه لو اشتريتها دلوقت ولا استنى شويه احسن ..

وفي كل الاحوال عمري ماحط ( تحويشه عمري ) كلها في حاجه ثابته زي شقة او ارض بنية الاستثمار وانما ممكن في حاله واحده لو هسكن فيها فعلا او كانت ضروره فيما عدا ذلك فمن الحكمه انك تحتفظي بشيء للايام الممطره :closedeyes: ..

[Salwa]

صباح الخير..

على فكرة الموضوع ده فعلا ممكن نراه من اكثر من جهة..

يعنى لو حضرتك اشتريتى الدهب بقصد الاستثمار ...!!....ولازلتى فى وضع يسمح لك بعد كدة انك لو بعتيه ممكن تشترى غيره.

اذن مفيش مشكلة ..

لكن؟؟

لو كان الدهب عندك ..(( ورثتيه...او..له قيمة معنوية معينة كأن يكون دهبك وانتى طفلة او فى بدايات الحياة او احضرتيه فى مناسبة معينة ..او كان هدايا....اظن انه صعب التفريط فيه ))

الا..

فى حالة ضرورة قصوى...

وعموما وجوده معك لايضر....

اما مسألة الاحتفاظ بالدهب ..و قول صعب الاحتفاظ به فى مكان آمن...(( لو كان بكمية كبيرة نوعا ما ))

بالنسبة لى كنت لمدة سنين طويلة ...احتفظ بالدهب وغيره او اى شئ آخر او حتى اوراق مهمة جدااا ..فى صندوق فى البنك ادفع له ايجار سنوى ....لكن؟؟

منذ فترة ..بدأت ...فى تقسيم مقتنياتى الخاصة على اولادى ...واحتفظت لى فقط بأشياء اعلم جيدا انى سوف استعملها ولن احتفظ بها فى درج من الادراج.

و...لغيت...موضوع البنك.

فكرى فى ...هل الشقة ضرورية للسكن؟؟ ام انها للاستثمار ؟؟

لاحظى الزيادة فى اسعار الذهب ...وقارنى بينها وبين الزيادة فى اسعار المبانى ....فى الحالتين انتى تحتفظى بالذهب بدون اى عائد مادى شهرى ...وكذلك الشقة .

لذلك لن تتحيرى فى الاختيار ..

وكما يقال..

للضرورة احكام..

رأيى الشخصى فى حالة بيع الذهب ....ضعى المبلغ كله فى البنك ....ومن الفوائد ادفعى اقساط الشقة .

وبهذا تكونى قد استثمرتى مرتين .....ده رأى ممتاز...يعنى زى ما بيقولوا ...الشقة بتدفع نفسها ..خصوصا لو مبلغ كبيررر...دى نصيحة لوجه الله ..وصح

مجرد خاطر تذكرته الآن

قرأت من يومين تعليق للراحل (( يوسف ادريس )) كتبه من حوالى اربعين سنة ........عن حكاية الشقق التمليك ....

وقال...

انه تهريج..

الدولة تنادى بالاشتراكية ..وفى الحقيقة قريباا سوف تبدأ فى بيع ممتلكات القطاع العام...!!!

تريد ان تمحو الرأسمالية وفى نفس الوقت تخلق رأسماليين صغار ...

مامعنى ان امتلك شقة وجزء من ارض....فى بناية كاملة مع مجموعة من الناس ؟؟

اظن ان الحل يكمن فى ...بناء وحدات اقتصادية ...او ..التوسع فى بناء المساكن الشعبية ..

تحياتى ..

[Mercedes]

السلام عليكم و رحمة الله و بركاته

و الله يا أخى الفاضل ,أنا ضد حاجتين , الأولى أنك تسيب الفلوس فى البنوك و خاصة لو كانت كتير , بمعنى أنها أكتر من أنك تحتاجها فى حالة طارئة , ربنا يكفيك شر الطوارئ

و التانية أنك تحتفظ بالدهب و هو سعره شادد و مستقر و خلى بالك من كلمة مستقر دى , بمعنى أن مش متوقع ان سعره هيزيد عن كده بشكل ملحوظ , ناهيك عن الارتفاعات و الانخفاضات الطفيفة اللى بتحصل فى سعر أى سلعةعالمية دى الدهب و لما سعره يبقى يقع تانى دى ماحصل سنة 2000 ابقى اشترى اللى انت عاوزه و على فكرة ماتصدقش اللى يقولك أن الدهب مش هينزل تانى , الدهب طول عمره بيطلع و ينزل بس الدورة بتاعته بطيئة و بتاخد سنين .

أنا رأى لو أمامك عقار لقطة سواء كانت شقة أو قطعة أرض خالصة مخلصة و ما عاليهاش مشاكل, اشتريها. و برضوه خلى بالك من حتة ماعاليهاش مشاكل دى لأن ولاد الحرام ماسابوش لولاد الحلال اللى زيك حاجة مع الأخد فى الاعتبار أن أكتر الناس خبرة و مكرا و دهاء و أتقل المعلمين اللى فى السوق من عشرين سنة بيتنصب عليهم !!!!!!!!!!

و انا مع شراء العقار اليومين دول لأن الأسعار فالنازل و أنا و الله لو ضامن أن أشترى عقار أو أرض و ما يتنصبش على فيها كنت اشتريت بكل فلوسى اللى فى البنك و ممكن استلف فوقها كمان .

و ربنا يوفقك و يررزقك الخير من حيث لا تحتسب

[ziad]

الذهب مخزن للقيمه قوي ولا يمكن القلق عليه من التضخم ,مشكلته هي فكره الاحتفاظ بييه فين

الشقه برضو مخزن للقيمه وغالبا برضو يتحدي التضخم ,مفيش خوف من العقار ,محدش هيسرق شقتك مش زي الدهب

فلوس في البنك = خساره

مهما كانت قيمه الفايده اللي عليها كلام كبير ومعظم العلماء الثقه بيعتبروها ربي لا تعوض غول التضخم ,السنه اللي فاتت التضخم في مصر وصل فوق 30 % وكانت افضل فايده علي الوعيه الادخاريه في مصر كانت 15 % ,اظن مش محتاج كلام

طيب حاليا سعر الدهب حلو جدا (ديه حقيقه ) وسعر العقار احلي ( ديه حقيقه ,أنا حاليا بدور علي شقه لو قلتلك الناس بتعملني إزاي مش هتصدقي ,واحد بائع في التليفون قالي يا دكتور شوف أنت عايز تدفع إزاي وادفع )

اظن والله اعلم إن الوقت ده وقت صح أو قريب من الصح عشان شراء العقار وبيع الذهب ,انصحك بالتحرك قبل نهايه السنه ,السنه الجايه اسعار العقار هتبتدي ترجع تاني

اتوكل علي ربنا واشتري

[ذهبية]

هوالقرار محتاج خطوة جريئة جدا منى واى حاجة فى الدنيا محتاجة جراة فى القرار لو ما تاخدش فى الوقت المناسب او لو ما تحطت فى مكان صح يبقى قرار متسرع و غلط

انا عايزة اجابة من ذوى الخبرة او المجربين سابقا هلى دورة زيادة سعر الذهب اعلى من دورة زيادة اسعار الشقق

والعكس هل الانخفاض فى اسعار الذهب يوازى الانخفاض فى اسعار الشقق

يعنى الان هما عكس بعض الذهب فى العالى و الشقق فى النازل هل الدورة هتلف و تعكس فى الحالة دى انا هاكون مستفيدة لو اخدت الاقرار دة

لو حصل العكس هيكون قرار خطا

ارجو من يتابع السوق من قرب او لدية خبرة فى الموضوع دة يدخل يقولى راية

وشكرا على مشاركتم

ذهبية

[عطر الجنة]

الذهب اللى حيتباع و يشترى بدلا منه شقة اكيد يعدى نصاب الزكاة

وهو 85 جرام

فلو كنتى بتدفعيها سنويا فبكده الزيادة السنوية فى سعر الذهب الان اغلبها حيروح فى الزكاة

وفعلا دورة زيادة اسعار الذهب بطيئة

فانا اشتريت مثلا الذهب اللازوردى من السعودية ب 38 ريال سنة 2001 وسنة 2008 اشتريته ب 105 ريال للجرام

طبعا انا اللى اشتريته الاول لما جيت ابيعه الان كسبت فيه لكن الثانى لو بعته حخسر

تعالى نقارن انا فى اسكندرية فى الوقت ده كانت الشقق امام جرين بلازا ( منطقة توها ناشئة ) فى سموحة المتر ب 500 جنيه وبتسهيلات كبيرة و مش لاقية اللى يشترى و كمان فى ابراج خرافة

الان المتر يباع ب 4000 جنيه اى زيادة 8 اضعاف

اى اللى اشترى شقة كسب اكثر منى

خذيها نصيحة و اشترى ولكن فى مكان جديد عشان كلما زاد نسبة تعميره غلا ثمنه كمان مكان يكون مبشر اى مستواه حلو

تم تعديل 2 أكتوبر 2009 بواسطة عطر الجنة

[ozoozo]

المشكله في العقارات لما تيجي تبيعها

هاتقعد تدلل عليها زي دلوقتي

والمشكله الاكبر انا عايز فلوسي كاش

فلما الارض توصل مليون جنيه هلاقي حد جايبلي مليون جنيه كاش

ولا لازم اتهاود فب سعرها

ولو بقيت فلوس هاقعد احري وراه عشان يسدد

يعني انا اديله ارضي وهو يديني حتته ورقه-شيك-ويبقي ضحك عليا

انما الدهب وقت ماعوذه ابيعه وممكن ابيعه لاكتر من تاجر لو واحد معاهوش السيوله الكافيه

[الباشمهندس ياسر]

اشترى العقار يا ذهبيه و سيبك م الدهب

و بعد 5 سنيين هتعرفى الفارق شكله ايه

**********************************************

أنا و الله لو ضامن أن أشترى عقار أو أرض و ما يتنصبش على فيها كنت اشتريت بكل فلوسى اللى فى البنك و ممكن استلف فوقها كمان .

و ربنا يوفقك و يررزقك الخير من حيث لا تحتسب

الله يصلح حالك يا استاذ مرسيدس

يعنى كل الناس اللى بتشتغل ف العقار نصابيين

خلاص ... متعرفش حد كويس و عنده اسم و سمعه بيحافظ عليهم...!!!!!

[بنت الشاطئ1]

انا هرد عليكى من واقع تجربتى

انا فعلا بعت كمية دهب لوضعها فى شراء شقة وسوف نأجرها عن قريب .بأذن الله ......والحمد لله ارتحت من الهم اللى كنت بشيلة فى حساب زكاتهم..لأن الزكاة فرض ولازم تطلع..وكنت ببقى محتارة ومش عارفة احسب الزكاة الان ارتحت..ناهيك عن الخوف من سرقته ..طب والله ضاع منى خاتم وانسيال من عدة اشهر وزعلت خالص بس الحمد لله يمكن لخير ..وفى نفس الوقت حمدت ربنا ان اللى ضاع حاجة هايفة بالنسبة للحاجة اللى اتباعت ..وكمان لو هتشترى حاجة وهتعود عليكى بعائد شهرى او سنوى يبقى مفيش مجال للتردد لأن الدهب مركون مش بتستفيدى من ركنته وكمان عرضة للسرقة ..بس ده رأيى ..

[ذهبية]

اشكركم يا جماعة جدا على الردود اللى فادتنى جدا

عطر الحنة انتى قولتى فى مداخلتك ياريت فى الاماكن الجديدة الى سعرها فى الطالع مع زيادة التعمير

بما ان حضرتك خبرة فى المجال دة اكتر ممكن بس توضحى لية امثلة للاماكن دى

فىالقاهرة و الاسكندرية لانى من المنصورة و ليست لى خبرة بالجديد عندكم

وياريت لو اى حد يدلنى على احسن الاماكن اللى مستقبلها واضح انة كويس او اخد فية شقة و مبسوط منها

اشكركم مرة تانية

ذهبية

[عطر الجنة]

الله يرزقنا من فضله

شوفى يا ذهبية الاماكن الجديدة زى 6 اكتوبر و العبور و الشيخ زايد و الشروق و بدر

بس اشترى فى مكان مميز فيهم لان الاماكن المميزة سهل بيعها و كمان تأجيرها

يعنى لو شقة على شارع رأيسى او ميدان و فى الدور الارضى او الاول ممكن تتأجر لسنتر دروس او حضانة و خصوصا لو فيها جزء حديقة

او مكتب او عيادة لطبيب

المدن الجديدة محتاجة مشاريع خدمية كتير على المدى و كلها حتكون بكر لسه فحتكون مكسبة

و ممكن تعملى اتيليه خياطة و خصوصا ان ليكى فى موضوع الاكسسوار ده

ده لو فى القاهرة اما فى الاسكندرية فدى حكاية تانية فالشراء فى الشتاء افضل و محتاج تأنى كتير

و اولا تبعدى عن حكاية اعلانات الجرايد لان معظمها شقق مضروبة من حيث السعر و تناسبه مع المكان

عارفة انا لما بحتاج شقة لاحد الاقارب من خارج اسكندرية بعمل ايه

1 - بشوف حدوده المادية و عارفة ان لكل منطقة سقف سعر

2 - بشوف طلبه يعنى عاوز شقة سكن ولا مصيف

3 - بحدد المنطقة التى تتفق مع السعر و طلبه

4 - بنزل المنطقة و باخدها عمارة عمارة و شارع شارع و اسأل البوابين و بفوجئ بحصيلة كبيرة من الشقق و الله كتير منها بتكون اسعارها مناسبة و غير الاعلانات نهائى

بس فى حتة يا جماعة لازم تقولوا انكم بدوروا على شقق تنفع تمويل عقارى عشان تقدروا تاخدوا شقق مترخصة و مفيهاش قلق

يعنى كده الشقق بتكون محصورة من الدور الارضى الى السادس او الخامس تقريبا عشان تكونى فى الامان

[عطر الجنة]

الاحلى من كده يا ذهبية كإستثمار

مشاركات البناء و عندك فى المنصورة يعنى تحت عنيكى

[doha]

على فكره منصحكيش تشتري في المدن الجديده بالنسبة لوضعك انتي بالذات فالشراء في التجمعات الجديده في المنصورة افضل لك بكتير من انك تشتري في حته بعيده هيبقى صعب عليك تتابعيها او ( تدوري عليها ) كل شويه بعكس ناس تانيه ممكن تكون الحكايه دي بالنسبة لهم اسهل . ..

انا معرفش المنصورة وضعها ايه في الاماكن الجديده لكن مثلا عندنا في طنطا منطقة الاستاد دي منطقة ناشئة نسبيا وفيها اماكن قطع اراضي زراعية من ثلاث سنين تقريبا كان سعر القيراط ( 175 متر ) ثلاثين الف جنيه بس .. من سنة سمعت انه عدى المية الف وياعالم وصل كام دلوقت .. طبعا هي مش اراضي بناء جاهز لكن مصيرها تدخل بناء في القريب وساعتها هتتباع بالمتر وهكذا معظم الي اعرفهم معاهم فلوس بيشتروا في المنطقة دي بالذات لانها جديده وفيها مناطق وصلت لاسعار عالية جدا ومناطق تانيه مازالت بتنضم لها وعلى هذا بنصحك تدوري في المنصورة على منطقة عندكم يكون لها نفس المواصفات ( ظهير زراعي ) وتكون ملاصقة للعمران وكل يوم والثاني بتظهر فيها مباني جديده هي دي الي تشتري فيها شقة او قطعه ارض على اساس ان سعرها هيكون رخيص مقارنة بالمستقبل وانتي مش محتاجاها دلوقت فهتبقى دي احسن استثمار بالنسبة لك ..

لو مش هتشتري في المنصورة يبقى مقدامكيش غير الاسكندرية او العجمي تشتري لك شقة مصيف على اساس ان الشائع هناك ان معظم اصحاب الشقق مش ساكنين فيها اصلا وبالتالي هتلاقي الوضع يخدمك كونك بعيده عنها فزيك زي غيرك هتلاقي الي ينوب عنك او مش هيبقى وضعك شاذ بينما لو اشتريتي في الشيخ زايد او سته اكتوبر او غيرها من المدن الي يفترض ان اصحابها ساكنين فيها فعلا هتلاقي صعوبه زي ماقلت لك قبل كده في متابعتها خاصه وزي مافهمت من كلامك سابقا انك تقريبا ( لوحدك ) غالبا في اتخاذ القرارات وتنفيذها وبلتالي هيبقى عبء كبير عليك مراعاة استثمار في مدينة تانيه غالبا الي بيستثمر فيها ياهيعيش هناك يااما فاهم هو بيعمل ايه ودي( لعبته ) اصلا مش بس بيجرب صابت او خابت ..

على العموم استخيري كتير وباذن الله هيوفقك للصح ..

[ذهبية]

الله يرزقنا من فضله

شوفى يا ذهبية الاماكن الجديدة زى 6 اكتوبر و العبور و الشيخ زايد و الشروق و بدر

بس اشترى فى مكان مميز فيهم لان الاماكن المميزة سهل بيعها و كمان تأجيرها

يعنى لو شقة على شارع رأيسى او ميدان و فى الدور الارضى او الاول ممكن تتأجر لسنتر دروس او حضانة و خصوصا لو فيها جزء حديقة

او مكتب او عيادة لطبيب

المدن الجديدة محتاجة مشاريع خدمية كتير على المدى و كلها حتكون بكر لسه فحتكون مكسبة

و ممكن تعملى اتيليه خياطة و خصوصا ان ليكى فى موضوع الاكسسوار ده

ده لو فى القاهرة اما فى الاسكندرية فدى حكاية تانية فالشراء فى الشتاء افضل و محتاج تأنى كتير

و اولا تبعدى عن حكاية اعلانات الجرايد لان معظمها شقق مضروبة من حيث السعر و تناسبه مع المكان

عارفة انا لما بحتاج شقة لاحد الاقارب من خارج اسكندرية بعمل ايه

1 - بشوف حدوده المادية و عارفة ان لكل منطقة سقف سعر

2 - بشوف طلبه يعنى عاوز شقة سكن ولا مصيف

3 - بحدد المنطقة التى تتفق مع السعر و طلبه

4 - بنزل المنطقة و باخدها عمارة عمارة و شارع شارع و اسأل البوابين و بفوجئ بحصيلة كبيرة من الشقق و الله كتير منها بتكون اسعارها مناسبة و غير الاعلانات نهائى

بس فى حتة يا جماعة لازم تقولوا انكم بدوروا على شقق تنفع تمويل عقارى عشان تقدروا تاخدوا شقق مترخصة و مفيهاش قلق

يعنى كده الشقق بتكون محصورة من الدور الارضى الى السادس او الخامس تقريبا عشان تكونى فى الامان

اشكرك من قلبى يا عطر الجنة كلامك كلة موزون و عقل بجدو افكارك كلها روعة بصراحة و فتحت تفكيرى لحاجات ما خطرت على بالى زى مووضع السنتر و الحضانة و الخياطة

و موضوع التمويل العقارى دة مكنتش اعرفة من قبل

اشكرك مرة تانية لك منى جزيل الشكر :closedeyes:

ذهبية

[ذهبية]

على فكره منصحكيش تشتري في المدن الجديده بالنسبة لوضعك انتي بالذات فالشراء في التجمعات الجديده في المنصورة افضل لك بكتير من انك تشتري في حته بعيده هيبقى صعب عليك تتابعيها او ( تدوري عليها ) كل شويه بعكس ناس تانيه ممكن تكون الحكايه دي بالنسبة لهم اسهل . ..

انا معرفش المنصورة وضعها ايه في الاماكن الجديده لكن مثلا عندنا في طنطا منطقة الاستاد دي منطقة ناشئة نسبيا وفيها اماكن قطع اراضي زراعية من ثلاث سنين تقريبا كان سعر القيراط ( 175 متر ) ثلاثين الف جنيه بس .. من سنة سمعت انه عدى المية الف وياعالم وصل كام دلوقت .. طبعا هي مش اراضي بناء جاهز لكن مصيرها تدخل بناء في القريب وساعتها هتتباع بالمتر وهكذا معظم الي اعرفهم معاهم فلوس بيشتروا في المنطقة دي بالذات لانها جديده وفيها مناطق وصلت لاسعار عالية جدا ومناطق تانيه مازالت بتنضم لها وعلى هذا بنصحك تدوري في المنصورة على منطقة عندكم يكون لها نفس المواصفات ( ظهير زراعي ) وتكون ملاصقة للعمران وكل يوم والثاني بتظهر فيها مباني جديده هي دي الي تشتري فيها شقة او قطعه ارض على اساس ان سعرها هيكون رخيص مقارنة بالمستقبل وانتي مش محتاجاها دلوقت فهتبقى دي احسن استثمار بالنسبة لك ..

لو مش هتشتري في المنصورة يبقى مقدامكيش غير الاسكندرية او العجمي تشتري لك شقة مصيف على اساس ان الشائع هناك ان معظم اصحاب الشقق مش ساكنين فيها اصلا وبالتالي هتلاقي الوضع يخدمك كونك بعيده عنها فزيك زي غيرك هتلاقي الي ينوب عنك او مش هيبقى وضعك شاذ بينما لو اشتريتي في الشيخ زايد او سته اكتوبر او غيرها من المدن الي يفترض ان اصحابها ساكنين فيها فعلا هتلاقي صعوبه زي ماقلت لك قبل كده في متابعتها خاصه وزي مافهمت من كلامك سابقا انك تقريبا ( لوحدك ) غالبا في اتخاذ القرارات وتنفيذها وبلتالي هيبقى عبء كبير عليك مراعاة استثمار في مدينة تانيه غالبا الي بيستثمر فيها ياهيعيش هناك يااما فاهم هو بيعمل ايه ودي( لعبته ) اصلا مش بس بيجرب صابت او خابت ..

على العموم استخيري كتير وباذن الله هيوفقك للصح ..

ضحى شكرا على ردك و اهتمامك بصى يا ستى المنصورة من اغلى المحافظات و التوسع فيها مفيش و ماسكين سعر مووووت

التاجر من دول او حتى اصحاب البيوت عندهم يسيبوا البيت كدة بترابة و لا انهم ينزلوا من سعرة جنيهة

مفيش فيها اى تجمعات جديدة و اللى بيطلع جديد صدقينى عالى جداااا يعنى عندنا منطقة جديدة اسمها مبارك بالرغم من انها جديدة لكن سعرها عالى جداااا

لان معظمها من بتوع القضاء و دكاترة الجامعة و فية حى الجامعة و صل المتر فية 4 الاف على الطوب الاحمر و مساحات واسعة جدااا

الشقق بقى اللى سعرها معتدل 1700 فى اماكن عادية و عرض الشارع لا يتعدى 10 متر ان قل و برضة نص تشطيب

و تيجى تسالى السمسار من دول يقولك السوق واقع لو هتبيعى لو هتشترى يضربلك السعر عالى

بالاضافة انك لو اتجرأتى و اشتريتى و حبيتى بقى انك تبيعيها تانى تقيلة جدااااا فى الحركة البيع و الشراء لية لان معظم الى هنا ما زال عندهم الفكر الريفى انة ياخد الباب من بابة يعنى ارض و ابنى

يعنى الانتعاش عندنا فى الاراضى اكتر بكتير جدا من الشقق

دة الاسباب اللى مخلينى ادور خارج المنصورة بالذات لنقطة دورة الشقة يعنى انى افكر فى شقة لمااجى افكر ابيعها ما يطلع عينى فى التدوير او انى اتذل على ايدالسمسارة يشتغلونى او افضل مدة طويلة لحد ما تفرج و الشقة تتباع

النقطة دى مش موجودة فى القاهرة او الاسكندرية نتيجة ان الطلب على البيع و الشراء اعلى بكتير

ام موضوع المتابعة هى نقطة جديرة بالاهتمام و هافكر احلها ازاى لكن لو الورق سليم او انى اتصرفت فىالشقة بسرعة بحيث ااجرها اعتقد انى وقتها هاطمن و طبعا لازم هيكون معايا محامى اثق فية ربنا سهل و يقرب الخير يارب

ذهبية

[aimen]

لكن مثلا عندنا في طنطا منطقة الاستاد

ياه اول مرة اشوف حد من الغربية فى المنتدى ....ومن طنطا كمان ....

اشى يا خيال يا ناس ....

ممكن يا مدام ضحى ..تعطينى معلومات اكثر عن اماكن صالحة للإستثمار مستقبلا فى طنطا ...او تعطينا نصائح بصراحة لأنى تايه فى الحكاية دى ومش عارف اشترى فين ولا اعمل ايه ؟

تحياتى

[doha]

لكن مثلا عندنا في طنطا منطقة الاستاد

ياه اول مرة اشوف حد من الغربية فى المنتدى ....ومن طنطا كمان ....

اشى يا خيال يا ناس ....

ممكن يا مدام ضحى ..تعطينى معلومات اكثر عن اماكن صالحة للإستثمار مستقبلا فى طنطا ...او تعطينا نصائح بصراحة لأنى تايه فى الحكاية دى ومش عارف اشترى فين ولا اعمل ايه ؟

تحياتى

هو انا للاسف من طنطا ومش من طنطا .. يعني بيت والدي في طنطا لكن حياتي كلها عشتها في الرياض واخيرا تزوجت في المحلة على اساس ان بيت والد زوجي هناك رغم ان حتى هم مش من المحلة اساسا ..

بس بما اني عشت في طنطا يجي عشر سنين فعادي بعتبر نفسي طنطاوية خاصه وانا مبحبش المحلة برغم انها مش وحشه بس سبحان الله دمها على قلبي .. مش خفيف ..

بالنسبة لامكان الاستثمار في طنطا انت عارف المرشحة .. لما تكون جاي من طريق المحلة هتلاقي في ترعه قبل المرشحه الشط اليمين من الترعه دي كله اراضي شبه زراعية اهي دي كلها استثمار وعلى فكره هي دي مستقبل طنطا يعني الي عاوز يشتري يشتري فيها لان مفيش توسع تاني لطنطا غيرها ..

انت دور على محامي كويس يكون محامي وسمسار في نفس الوقت دول بيبقوا عارفين الاراضي كلها وممكن يجيبوا لك حته كويسه ..

برضه في كمان على طريق طنطا المحلة اراضي للاستثمار بس دي بتتباع بالقيراط وعلى مااسمع في فرق مابين الجزء الي فيه ابراج الكهرباء بيكون ارخص لان مستقبله وحش من الي مفيهوش .

في داخل طنطا صعب انك تلاقي حته ارض معليهاش مشاكل ولو لقيت هيبقى سعرها غالي جدا .. بس بالنسبة للشقق في كتير بس الاسعار معنديش فكرة عنها مفيش غير الي كنت بقراه في الوسيط وبصراحه اسعاره متطمنش ابدا ..

============

ذهبية اعملي حسابك لو معندكيش عربية وقررتي تستثمري في حته بعيده انك هتضطري تحسبي تكلفة المشوار ميتين تلتمية جنيه في كل مرة تنزلي فيها الشقة .. يعني مرة الساكن مدفعش الايجار هتروحي له تاخذيه منه ومرة السقف بينقط هتطخي نفس المشوار بنفس التكلفة كل مرة عشان تحلي اي مشكلة وهتلاقي نفسك بدال مالشقة بتصرف عليك انتي بتصرفي عليها ..

حطي الحكايه دي في بالك وانتي بتشتري عشان متتورطيش ..

[Guest رافت جمعه الغمازى]

عندى ا ض زراعيه فى الخانكه سنه وتدخلى مبانى بينها وبين العمار ٣٠٠ كتر بالظبط **********    رافت جمعه الغمازى